Re Tabtôan15
1Pon soksok êr anlo aê Ebram lemtanê ane Warsangul m'pe banê i epea, “Ebram, o ngalomta. Nê m'du kookor goro êk. Gelem aê i m'betlap balêp.”2Aê Ebram m'pea, “?Warsangul Bwatkôlkôl, O met'sunê sa manê nê? Olin ane wanjuk mwahlal nga, aê nak soksok êr aê i met'po be na Eliesa na ôt Dimaskas.3O telsê! O tabosunê wanjuk tesu, aê nak antôn na ômwan su an sek lon nak im metehgo nak soksok êr bonga.”4Aê dal na Warsangul bamanê i epea, “Êhêê! Antôn anre aê i taetehgo nam soksok, olin ane bwarin wanjum ane o met'pasu i en met'nga hgo nam soksok.”5Aê i m'ka Ebram ba ôô aê epea, “O t'le bare mtaran nga rundela, aê eplum kêlê jubuubur êr. ?O mwangrê ane ebwili êr bwa?” Aê Warsangul mo pe banê i epea, “Wanjum êr an metamama pom ronga, aê êr met'gatgat papanre.”6I m'kakoknga ra Warsangul aê Warsangul mwalê i epe i m'be antôn an mwaknoknon.7Aê i m'pea, “Nê m'be Warsangul ane nê m'ka êk jingin ôt Ur ran tan na ta Babilon êr olin ane nê met'sunê tan na ôt Keenan banê êk aê i metebe nam.”8Aê Ebram m'pea, “Warsangul Bwatkôlkôl! ?Nê meteklê papanbê epe nê metalê ôt re ne i metebe nak?”9Aê i m'pea, “Êlê na buluk êsên an taabsus tesu ane an dam betêl, aê êlê naani êsên tesu ane an dam betêl aê sipsip bôtôlso tesu ane an dam betêl aê waamwar tesu aê up tesu.”10Aê papanre aê Ebram mwahgo soksok êr anre bonga banê Warsangul aê ekor kebwasê êr ne beretê êr beberu. Aê i mwalngi beretê êr aê êr ket bihri êr, ape i taakor kebwa bwêsêl rakô.11Aê bal êr an jiljilêp mamlel ma ran tarbea êr anre aê Ebram korgaju êr.12Wamran ane iêl banê ane i metahdor aê mêlêk sure atlap bama ra Ebram aê i mamtatnê. Aê madru sure an mwapwiris baran aê i mamjur aê lon mametmet.13Aê re ane Warsangul pe banê Ebram epea, “O metekêlê epe wanjum êr an metadodo ma pom ronga metasek ran tan ane taabe nar, aê eba ôm na antôn êr na ôt re, aê êr anre me'tang bêrê êr nga nê nuulsangul na dam beêt.14Ape nê met'pepe antôn êr ane êr metaôm nar ere, aê pon anre aê êr met'pii jingin ôt re me nar soksok êr gatgat antôôtôô.15O metemtômtô tehree bwa aê enga mat.16Lon ormelang an beêt aê êr metamôl ma, olin ane sekan êr an taaknoknon na ta Amoro êr aê i taasotê ngane nê tesunê lumluman banê êr bwa.”17Aê re wamran ane iêl ba hdor aê ôt mamlêk, aê basu nga aê nakur su ane suap susu lon men apjungjung su mi roo lon tobol na bubu ta êr anre.18Ran bông anre aê Warsangul linglingnê dal su ane i m'kambôônê me Ebram ne pea, “Nê m'sunê tan anlo banê wanjum êr an metadodo ma ronga. I m'tabtôn re waloklok na ôt Ijip aê eba nok re buli wa atlap an Iupretis:19tan na ta Kenae êr, aê na ta Kenas êr, aê na ta Kadmon êr,20aê tan na ta Het êr, aê na ta Peris êr, aê na ta Rapae êr,21aê tan na ta Amoro êr, aê na ta Keenan êr, aê na ta Girgas êr, aê na ta Jebus êr.”
Pioneer Bible Translators