Efesus6
1Ngini, ngowa 'olo-ngowa 'olo, sababu ngini ni marimoi ra Ma Jou, ngini balasu ni 'isene ninga ḇaḇa re ngina, sababu balasu ni si'a'a so'o gena-ge ga'a banari ra Ma Jou'ongu Madutu 'ai momina.2Toma Boku 'Ofi-'Ofi 'i silefo parenta so'o ne: “Silamo'o ninga ḇaḇa re ngina.” Parenta gena-ge Ma Jou'ongu Madutu 'ai parenta ma mulaingi rema jaji:3“Na'o ni silamo'o ninga ḇaḇa re ngina, ninga 'ahu lai rousu re ninga 'umuru 'i kiḏanga toma dungia nena-ne.”4Ioronongoḏu ngo-ngaku rimoi ga'a ni dadi ḇaḇa, awa ngini ninga ga'a 'i kasara taninga ngowa 'olo-ngowa 'olo, la ananga nu'u duruta awa. Siḏibo ḏi'i, ngini ni kalesanga re ni doto'o ninga ngowa 'olo ga'a mete'e Ma Jou 'ai do-doto'o.5Ioronongoḏu ngo-ngaku rimoi ga'a ni dadi budaka, ni mete'e ninga tuanga toma dungia nena-ne, re nu silamo'o reninga 'akala re sinyingara mode-mode'e sa'olo ni sidodai ra Kristus masiretene.6Awa pa'i ni sidodai, wakutu tai biono ḇato, la ni sanga sitoro. Siḏibo ḏi'i, ni sidodai sa'olo 'a Kristus 'ai budaka ga'a mete'e Ma Jou'ongu Madutu 'ai 'akala ma mau reninga 'akala re sinyingara mode-mode'e.7Ngini ngowa'a budaka, munara 'oru ḇato ngini na sidodai balasu ni munara reninga 'akala re sinyingara sa-sanangi, ma tero sa'olo ni munara di'a Ma Jou, awa pa'i toma manusia ḇato.8Bae ngowa'a budaka, bae ngowa'a bebasa, ngini nyengara ni waro mangale Ma Jou ḏuanga i'a 'O pula'a ngogele na'o ngene wo munara la-la.9Ngini tuanga-tuanga ḏi'i, ninga go-gasa balasu rousu taninga budaka-budaka, awa ni simojo-mojongo ananga. 'Elingi, ngini re ninga budaka-budaka, ninga Tuanga pa'i matengo ḇato. Unanga gena-ge Ma Jou'ongu Madutu toma soroga, re Unanga gena-ge 'o pa'ala kaci moi ua.10Ma ḏo-ḏogumu, ngini balasu ni dadi te'e reo de-de'e ga'a na sanga ra Ma Jou Yesus 'ai kuasa, sababu ngini marimoi ra Unanga.11Ni pake mo-moini dare parangi ga'a Ma Jou'ongu Madutu ro pula'a ra ngini, la nga'unu ni lawana 'o 'Iblisi ma bo-baja.12Nange-ne, ngene wo lawana manusia ua, mada'a wo lawana roh-roh ma jira ma repe 'i kuasa toma dungia hafu-hafu re toma ngawa-ngawa.13Sababu gena-ge, nange-ne balasu ni pake Ma Jou'ongu Madutu 'ai dare 'i ti-tiai. Dadi wakutu 'orasa ma jira 'i ngadolo, ngini nga'unu ni matahana taninga lawana, ma tero sa'olo sordado matahana tamanga lawana. Re ḏi'i wakutu parangi ma ḏo-ḏogumu, ngini ninga ngo-ngaku 'i te'oso ogo-ogoro kama elala ua, sababu ni pake Ma Jou'ongu Madutu 'ai dare 'i ti-tiai.14Sababu gena-ge, balasu ni ḏu-ḏuanga ḏua ni matahana toma 'Iblisi re roh-roh ma jira ga'a ninga lawana-lawana, ma tero sa'olo sordado. Ngini balasu ni mete'e ba-banari tau-taunu ra Ma Jou'ongu Madutu. Gena-ge 'i ma tero sa'olo sordado 'o mapake 'ai golona ma bi-biri'u ga'a 'a piri'u tai golona 'a sinamoto. Re ḏi'i ngini ninga de'oso re ḏegoro balasu 'i boloto 'i ma tero sa'olo sordado 'o mapake 'ai baju ḇesi di'a sidaku 'ai katere.15Ngini balasu ni ḏu-ḏuanga ḏua di'a singadolo Habari Roanga ga'a 'i sigasa dame ra Ma Jou'ongu Madutu tala. Gena-ge 'i ma tero sa'olo sordado manga capato.16Sidogo ḏi'i, toma 'orasa 'oru ḇato, ngini balasu ni macako'o namo-namoto taninga ngo-ngaku ra Ma Jou'ongu Madutu. Ninga ngo-ngaku gena-ge 'i ma tero sa'olo sordado manga ta-taini ga'a ni pake di'a ni sorumu 'o 'Iblisi ma ngami ma doto 'i leja-lejanga.17Ma Jou'ongu Madutu 'ai salamata ga'a na dawongo, gena-ge 'i ma tero sa'olo sordado manga capeo waja. Re Ma Jou'ongu Madutu 'ai demo ga'a 'Ai Ngagara 'Ofi-'Ofi 'i pula'a, gena-ge 'i ma tero sa'olo sordado manga samaranga.18Toma ngi'i le'a ḇato re toma donga mo-moini, ngini balasu ni manyiata re ni golo'o tau-taunu reo ri-riono toma Ngagara 'Ofi-'Ofi. Wakutu ngini ni manyiata balasu ni ma'istiari, re ni manyiata tau-taunu di'a Ma Jou'ongu Madutu 'ai 'umata mo-moini.19Re ngini ni manyiata di'a ngoi ḏi'i, la wakutu ngoi to kanau, Ma Jou'ongu Madutu 'o pula'a demo-demo 'i rapu ua. Dadi ngoi nyengara to sitarangi mangale Habari Roanga ma rahasia kama mojongo ua.20Sababu Habari Roanga gena-ge, ngoi to dadi Kristus 'ai 'utusana re nange-ne ngoi to osama bui. Dadi ni manyiata di'a ngoi ḏi'i, la ngoi to singadolo Habari Roanga, re ma duhu sa'olo ngoi balasu ta singadolo, kama mojongo ua.21Tikhikus nanga ioronongoḏu matengo ngo-ngaku rimoi, unanga 'o munara cufala sa'olo falalomu di'a Ma Jou'ongu Madutu. Ngoi reto siajele mo-moini ra unanga, la ngini ḏuanga i'a ni waro habari mangale ngoi re 'ari munara.22Ngoi to siḏingoto unanga ra ngini, la unanga 'o singadolo minga habari. Dadi ngini ninga 'akala re sinyingara 'i elala ua.23Ioronongoḏu ngo-ngaku rimoi, ngoi to golo'o ra Ma Jou'ongu Madutu, nanga Ḇaḇa, re Ma Jou Yesus Kristus, la pula'a dame ra ngini. Re ngoi to golo'o ḏi'i, la ngini ni ma'u dadalara re ni ngaku Kristus mode-mode'e.24Ngoi to golo'o ra Ma Jou'ongu Madutu, la 'O sibarakati ngene mo-moini ga'a wo dadalara nanga Jou Yesus Kristus renanga dadalara kama sora ua.
The Seed Company