Filipi1
1Surata ne ra ngoi Paulus, re Timotius ḏi'i, ngomi ga'a ta Kristus Yesus ma tero sa'olo 'Ai budaka. Ngomi mi siḏingoto surata nena-ne ra ngini ioronongoḏu ngo-ngaku rimoi mo-moini ga'a ni tegoro toma limau Filipi re reni marimoi ra Kristus Yesus, sidogo ḏi'i ioronongoḏu ngo-ngaku rimoi ga'a jama'ata ma bi-biri'i re jama'ata ma ri-riono:2Ngomi mi golo'o ra Ma Jou'ongu Madutu nanga Ḇaḇa re Ma Jou Yesus Kristus di'a 'aḏi pula'a mura re dadalara re 'aḏi pula'a dame ḏi'i ra ngini mo-moini.3Wakutu ngoi to si'elingi ie ngini, ngoi to sibere ie murasa ma la tari Jou'ongu Madutu.4Re toma 'orasa 'oru ḇato ngoi to manyiata di'a 'ari ioronongoḏu ngo-ngaku rimoi ngini mo-moini, ngoi to manyiata tau-taunu rari 'akala re sinyingara ma roanga.5Ngoi to sibere ie 'ari murasa ma la ra Ma Jou'ongu Madutu, sababu toma mulaingi i'a moju singadolo nange-ne, ngini reni riono ngoi tau-taunu di'a sirera re siwalata Habari Roanga.6Ma Jou'ongu Madutu masiretene 'o mulaingi munara taninga sigolona. Re ngoi to ngaku mode-mode'e Ma Jou'ongu Madutu 'a siturusu munara la-la gena-ge singadolo siḏuanga toma wangere Kristus Yesus dadunu 'o sapolo moju.7Tero mode'e ngoi to basono maroanga ra ngini mo-moini. Sababu bae ngoi toma bui, bolo talaḏi toma juruhakimi di'a ngoi to sitarangi mangale i'a sa'olo ngoi to singadolo Habari Roanga re to sijumu habari gena-ge 'i banari, ngini mo-moini ni riono ngoi di'a to siḏagi 'ari munara ga'a Ma Jou'ongu Madutu 'o pula'a ra ngoi sababu 'Ai mura re dadalara. Sababu gena-ge, ngini ni tegoro tari 'akala re sinyingara ma dara.8Ma Jou'ongu Madutu 'a waro mangale ngoi to mau masala di'a to ma'u sanga ngini moju, sababu ngoi to dadalara ngini ma tero sa'olo Kristus Yesus masiretene 'o dadalara ngini.9Nena-ne 'ari go-golo'o ra Ma Jou'ongu Madutu di'a ngini: Mangale Unanga gena-ge lebe madogo-dogo ninga dadalara re 'O pula'a wo-waro re 'akala soro'unu ra ngini di'a sinyanyasele dadalara gena-ge.10Ngoi 'ari go-golo'o so'o gena-ge, la ngini ni pili 'ori i'a ma la-la re ninga 'ahu 'i 'ofi-'ofi re kama sala ua singadolo toma wangere Kristus dadunu 'o sapolo moju.11Re ḏi'i mangale ninga 'ahu ma duhu enanga 'i romanga reo de'oso re ḏegoro ma la-la ga'a pa'i sababu Yesus Kristus masiretene 'ai kuasa ḇato. Dadi ngowa'a ḏuanga i'a 'aḏi simulia re 'aḏi puji re silamo'o Ma Jou'ongu Madutu.12Ioronongoḏu ngo-ngaku rimoi, ngoi to mau ngini ni waro mangale 'oru ga'a 'i dadi ḏua ra ngoi, gena-ge si'a'a ngowa'a lebe repe ya 'isene Habari Roanga ga'a ngoi ta singadolo.13Dadi Kadato ma ja-jaga mo-moini re ngowa-ngowa'a lelegu manga repe ya waro mangale ngoi to osama bui sababu ngoi 'ari munara di'a Kristus.14Re ḏi'i sababu ngoi to osama bui, ngowa'a repe raḏi ngaku Yesus toma limau gena-ge ananga lebe repe manga ngo-ngaku lebe te'e, singadolo ananga ganapu nau'u di'a singadolo Ma Jou'ongu Madutu 'ai demo kamanga mojongo ua.15Tantu ḏua, 'age mamuni'a tamanga sigolona ananga ya singadolo mangale Kristus sababu manga 'akala ma go-goḏi re 'aḏi mau lawana ngoi. Mada'a 'age ma lelegu ananga 'aḏi singadolo remanga 'ulungu 'ofi-'ofi.16Ngowa'a gena-ge 'aḏi singadolo mangale Kristus sababu manga dadalara. Re ḏi'i sababu ananga ya waro mangale Ma Jou'ongu Madutu 'o siwatasa ngoi 'ane toma bui di'a to sibukiti mangale Habari Roanga gena-ge 'i banari.17Mada'a 'age rema ngowa'a lelegu, ananga singadolo mangale Kristus remanga 'ulungu ma jira, la ngowa-ngowa'a pa'i 'aḏi mete'e ananga ḇato. Re wakutu ananga 'aḏi 'a'a so'o gena-ge, ananga 'aḏi fikiri lebe ya dogo 'ari sangisara toma bui.18Mada'a ananga gena-ge 'aḏi rapu: 'Oru ua ra ngoi! Bae ya si'a'a remanga 'ulungu 'ofi-'ofi bolo ya si'a'a remanga 'ulungu ma jira ra ngoi. Enanga lebe la-lamo'o i'a ngowa'a 'aḏi singadolo mangale Kristus. Sababu gena-ge, nange-ne ngoi to maroanga re ḏuanga i'a to maroanga tau-taunu.19Sababu ngoi ta waro mangale ngoi ḏuanga i'a to sanga salamata sababu ngini ni manyiata di'a ngoi; re sababu ḏi'i ri-riono toma Ngagara 'Ofi-'Ofi ga'a ra Yesus Kristus.20'Oru ga'a ngoi to nyafusu re to masingano-nganono mode-mode'e mangale soi moi i'a mai ua, ngoi ḏuanga i'a to simara'a Yesus 'ai lomanga sababu 'ari munara. Siḏibo ḏi'i, ngoi lato nau'u di'a to kanau kama mojongo ua. Dadi ma tero sa'olo ngoi to si'a'a toma mulaingi singadolo 'orasa nange-ne, ngoi ḏuanga i'a to silamo'o Kristus tau-taunu, bae 'i sijumu tari 'ahu ma duhu bolo tari sengene ma duhu.21Sababu di'a ngoi, ngoi 'ari 'ahu pa'i to silamo'o Kristus; na'o to sengene, ngoi to bara'utungu: Ngoi to mame-mete'e mode-mode'e ra Kristus!22Mada'a na'o ngoi to 'ahu moju toma dungia nena-ne, ngoi to munara rema faeda. Dadi ngoi ta waro ua le'a ngoi balasu ta pili: 'Ahu bolo sengene?!23Ngoi nga'unu ua ta sitantukanga le'a 'i rousu: Ngoi to nyafusu madutu to sisoi'i tala dungia nena-ne di'a to tagi to mamete'e ra Kristus sababu gena-ge lebe la.24Mada'a lebe la-lamo'o i'a di'a ngini, ngoi to 'ahu moju toma dungia nena-ne.25Sababu gena-ge, tantu ḏua ngoi ta waro, ngoi to 'ahu moju re 'age taninga sigolona, 'ari ioronongoḏu ngo-ngaku rimoi mo-moini. Dadi nga'unu tini riono ngini singadolo ngini lebe maroanga re ninga ngo-ngaku ra Ma Jou lebe te'e i'a.26Dadi, wakutu ngoi to maḏibo i'a ra ngini, ngini ni basono lebe sanangi re lebe ni maroanga sababu Kristus Yesus 'o sigasa i'a ngoi ra ngini moju.27'Orasa nange-ne, lebe la-lamo'o i'a ngini ninga 'ahu ma duhu balasu 'i patasa di'a ngowa'a ga'a 'aḏi mete'e Habari Roanga mangale Kristus gena-ge. Dadi, bae ngoi to ma'u sanga moju bolo sanga riwara ra ngini, ngoi ḏuanga i'a ta 'isene mangale ngini ni marimoi. Re ḏi'i ngini ni marimoi taninga munara di'a ni sibukiti mangale Habari Roanga gena-ge 'i banari, dadi ngowa-ngowa'a ḏuanga i'a ya ngaku.28Ni mojongo ceka'a i'a mai awa taninga lawana. Gena-ge 'i dadi didina'o ra ananga mangale ḏuanga i'a Ma Jou'ongu Madutu 'o sihukumu ananga. Mada'a ngini Ma Jou'ongu Madutu masiretene nu sisalamata.29Sababu Ma Jou'ongu Madutu ro sibarakati ngini, la ngini nga'unu ni ngaku Kristus, re ḏi'i Unanga ro cumutu ngini di'a ni basono sangisara sababu ni ngaku Unanga.30'Orasa nange-ne, ngini ḏi'i ni sanga sangisara ma tero sa'olo ngoi reta sanga ga'a ngini reni oḏi'i ḏua. Re ma tero ḏi'i sa'olo ngini na 'isene mangale ngoi ta sanga toma 'orasa nange-ne.
The Seed Company