Zaburi18
Yahawe umukuru w’abaririmvyi. Ni Zaburi ya Dawidi umusavyi w’Uhoraho, iyo yaririmbiye Uhoraho muri aya majambo amaze kumukiza abansi biwe bose, no kumukura mu maboko ya Sawuli. Yavuze ati:
1Ndagukunda, Uhoraho, uri inkomezi zanje.2Uhoraho ni we gitandara canje, igihome canje kinkingira n’umutabazi wanje;Imana yanje ni igitandara canje nihishamwo,inkinzo yanje, n’ihembe ry’agakiza kanje, n’umunara mpungiramwo.3Nambaje Uhoraho, we abereye gushimwa,na we ankiza abansi banje.4Iminyororo y’urupfu yaranyiboheyeko;imikuba y’ukurandura yarandengeye.5Iminyororo y’i kuzimu yaranyizingiriyeko;imitego y’urupfu yarantangiriye.6Mu mubabaro wanje nambaje Uhoraho;natakambiye Imana yanje ngo intabare.Iri mu Ngoro yayo yumvise ijwi ryanje;ugutakamba kwanje kwashitse imbere yayo, mu matwi yayo.7Isi yaratigise ihinda agashitsi,amatanguriro y’imisozi aranyiganyiga;yahinze agashitsi kuko Uhoraho yari yaratse.8Umwotsi wapfunduka mu mazuru yiwe;umuriro utongora wava mu kanwa kiwe,hamwe n’amakara yaka.9Yamenye ijuru aramanuka;ibicu vyirabura vyari musi y’ibirenge vyiwe.10Yaje aguruka ku mukerubi;yagendera ku mababa y’umuyaga.11Yisakaye umwijima awugira nk’ihema rimukikuje;ibicu vyirabura vyo kw’ijuru vyuzuye imvura.12Mu gukayangana kwo mu nyonga hiwe,havamwo ibicu vy’imvura y’urubura n’ibikeke vy’imiravyo.13Uhoraho yaraturagaye ari mw’ijuru;ijwi ry’Iyisumbavyose ryarasamiranye.14Yarashe imyampi yiwe asanzaza abansi,yasohoye ibikeke vy’imiravyo birabakinagiza.15Ibiyaya vyo mu kiyaga vyagiye ahabonan’amatanguriro y’isi aragaragaraku bw’ugukankama kwawe, ewe Uhoraho,no ku bw’impwemu ziva mu mazuru yawe.16Yagoroye ukuboko kwiwe ari iyo hejuru aramfata;ankura mu mazi menshi.17Yantabaye umwansi wanje akomeye,ankiza abanyanka bandusha inkomezi.18Banteye ku musi w’ivyago vyanje,ariko Uhoraho ni we yanshigikiye.19Yaransohoye anjana ahagutse;arankiza kuko yanezererewe.20Uhoraho yankoreye ibihwanye n’ukugororoka kwanje;yampaye ingero ikwiranye n’ugutungana kw’amaboko yanje.21Kuko nagumye mu nzira z’Uhoraho;sinigeze ncumura ngo mve ku Mana yanje.22Ivyagezwe vyiwe vyose biri imbere yanje;sinigeze mpindukira ngo mve mu vyo yihanikirije.23Namye ntagira umugayo imbere yiwekandi nirinze icaha.24Uhoraho yanyishuye ibikwiranye n’ukugororoka kwanje,ibihwanye n’ugutungana kwanje mu nyonga hiwe.25Ku mwizigirwa wiyerekana uri umwizigirwa,ku wutagira umugayo wiyerekana uri uwutagira umugayo,26ku wutunganye wiyerekana uri uwutunganye,ariko ku muntu w’intabarirwa wiyerekana nk’uwutagira akagongwe.27Ukiza abaciye bugufiariko ucisha bugufi abafise amaso y’ubwibone.28Ni wewe, Uhoraho, ugumiza itara ryanje ryaka;Imana yanje ihindura umwijima wanje ukaba umuco.29Ku bwawe, nshobora gutera ingabo nyinshi;turi kumwe n’Imana yanje, nshobora kwurira uruzitiro.30Imana yo, inzira yayo iratunganye:ijambo ry’Uhoraho ni iry’ukuri;abera inkinzo abamuhungirako bose.31None ni nde Mana atari Uhoraho?Kandi ni nde Gitandara atari Imana yacu?32Imana ni yo inyambika inkomeziikagorora inzira yanje.33Ihindura ibirenge vyanje nk’ivy’impongo;ikanshoboza guhagarara ku dutwe tw’imisozi.34Yigisha iminwe yanje kugwana;agashoboza amaboko yanje gufora umuheto w’umwakaka.35Agakiza kawe kabaye inkinzo yanje,kandi ukuboko kwawe kw’i buryo ni kwo kunshigikiye;ubushobozi bwawe ni bwo bwangize uwuhambaye.36Wanteguriye inzira ncamwo yagutse,kugira ngo ibirenge vyanje ntibinyerere.37Nakurikiye abansi banje kandi ndabashikira;sinasubiye inyuma badaherengeteye.38Nabagize ubunywenywe nta n’uwushobora kuvyura umutwe;baguye musi y’ibirenge vyanje.39Wanyambitse inkomezi zo kugwana;wacishije bugufi abansi banje imbere yanje.40Watumye abansi banje bata barahunga,kandi wampaye kubaherengeteza.41Baratakamvye, habura uwubakiza;batakambiye Uhoraho, ariko ntiyabishura.42Maze ndabasya nk’umukungugu utumurwa n’umuyaga;ndabasiribanga nk’ivyondo mu nzira y’abahita.43Wankijije ibitero vy’abantu;umpindura uwutwara amahanga.Abantu ntigeze kumenya ubu ni bo bankorera,44uko bumvise ijwi ryanje, baranyumvira;abanyamahanga baranyunamira.45Bose bacika intege;bava aho bari binyegeje bahinda agashitsi.46Uhoraho ni muzima! Hahimbazwe igitandara canje!Hashirwe hejuru Imana y’agakiza kanje!47Ni we Mana imporera,igashira amahanga musi yanje,48inkiza abansi banje.Wanshize hejuru y’abangwanya;untabara abantu b’inkozi z’ikibi.49Ni co gituma nzoguhimbaza mu mahanga, ewe Uhoraho;nzotazira izina ryawe.50Ni we aha umwami wiwe intsinzi zihambaye;yerekanye urukundo rudashira ku wo yarobanuje amavuta,ari we Dawidi n’uruvyaro rwiwe.Biblica, Inc.