Yosuwa24
Basubiramwo isezerano
1Maze Yosuwa akoraniriza i Shekemu imiryango yose ya Isirayeli. Ahamagaza abakuru, abatware, abacamanza n’abarongozi, bose baza imbere y’Imana.2Yosuwa abarira abantu bose ati: “Uku ni ko Uhoraho Imana ya Isirayeli avuze: ‘Mu gihe ca kera, ba sogokuruza banyu, harimwo Tera se wa Aburahamu na Nahori, babaye hakurya y’uruzi Efurate kandi basenga izindi mana.3Ariko mfata sogokuruza Aburahamu ndamukura hakurya y’urwo ruzi ndamushikana i Kanani, ndamuha uruvyaro runini nciye kuri Isaka.4Isaka namuhaye Yakobo na Esawu. Esawu namuhaye imisozi ya Seyiri ngo ayegukire, ariko Yakobo n’abana biwe ndabamanukana muri Egiputa.5Maze ntuma Mose na Aroni, nongera ntera ivyago Abanyegiputa, hanyuma ndabakura muri Egiputa.6Igihe nakura ba sogokuruza banyu muri Egiputa, mwashitse ku Kiyaga Gitukura, Abanyegiputa babakurikira bari ku mikogote no ku mafarasi.7Ariko ba sogokuruza banyu batakambira jewe Uhoraho ngo ndabatabare, nca nsuka umwijima hagati yabo n’Abanyegiputa, ndabarenzako ikiyaga kirabatwara. Amaso yanyu yariboneye ivyo nakoreye Egiputa.8Nabazanye mu gihugu c’Abamori baba mu buseruko bwa Yorodani. Barabagwanije, ariko ndabatanga mu maboko yanyu. Nabaranduye imbere yanyu, namwe mufata igihugu cabo.9Igihe Balaki mwene Zipori, umwami w’i Mowabu, yitegura ngo agwanye Abisirayeli, yarungitse Balamu mwene Beyori kubavuma.10Ariko sinumviriza Balamu, na we aho kubavuma arabahezagira, gutyo ndabakiza Balaki.11Nuko mujabuka Yorodani mushika i Yeriko, abatware b’i Yeriko barabatera ngo babagwanye, nk’uko Abamori, Abaperizi, Abanyakanani, Abaheti, Abagirugashi, Abahiwi n’Abayebusi babigize. Ariko nabatanze mu maboko yanyu.12Narungitse amavubi imbere yanyu, yirukana abami babiri b’Abamori. Si inkota yanyu canke umuheto wanyu vyabahaye intsinzi.13Nabahaye igihugu c’amatongo mutarimye, n’ibisagara mutubatse, mubibamwo, murya inzabibu n’imyelayo mutateye.’14None rero, nimwubahe Uhoraho mumukorere mu kuri no mu bwizigirwa; mushire kure imana ba sogokuruza banyu bakoreye hakurya y’uruzi Efurate, no muri Egiputa, hanyuma mukorere Uhoraho.15Ariko nimba mudashaka gukorera Uhoraho, nimwitorere uwu musi iyindi mana mukorera, zaba imana ba sogokuruza bakorera hakurya y’uruzi Efurate, zaba imana z’Abamori, abo mubereye mu gihugu. Ariko twe n’abo mu nzu yanje, tuzokorera Uhoraho.”16Maze abantu bose bishura bati: “Guheba Uhoraho tugakorera izindi mana ntibikatubeko!17Uhoraho Imana yacu ni we yatwikuriye muri Egiputa twe na ba sogokuru bacu, mu gihugu c’ubuja, akorera ibitangaza n’ibimenyetso mu maso yacu. Yaturinze urugendo rwose atuzigamira mu mahanga yose twaciyemwo.18Uhoraho ni we yirukanye ayo mahanga yose imbere yacu, harimwo Abamori baba muri iki gihugu. None rero natwe tuzokorera Uhoraho, kuko ni we Mana yacu wenyene.”19Maze Yosuwa arababarira ati: “Mwebwe ntimushoboye gukorera Uhoraho, kuko ni Imana itunganye kandi ipfuha. Ntizokwihanganira ubugarariji n’ivyaha vyanyu.20Nimwava k’Uhoraho mugakorera izindi mana, azobateza ivyago bibatikize bibamare, inyuma y’ivyiza vyose yabagiriye.”21Na bo bishura Yosuwa bati: “Haba na mba! Tuzokorera Uhoraho.”22Maze Yosuwa arababarira ati: “Mwebwe ubwanyu muri ivyabona vyanyu ko mwahisemwo gukorera Uhoraho.” Na bo bati: “Egome turi ivyabona.”23Yosuwa arababwira ati: “Nuko rero nimukure imana z’abanyamahanga ziri muri mwebwe, imitima yanyu muyegurire Uhoraho Imana ya Isirayeli.”24Na bo bishura Yosuwa bati: “Tuzokorera Uhoraho Imana yacu, twongere tumwubahe.”25Uwo musi nyene Yosuwa aca agirana isezerano n’abo bantu aho i Shekemu, aca abaha amabwirizwa n’ivyagezwe vy’Uhoraho.26Hanyuma Yosuwa aca yandika ivyo vyose mu gitabu c’ivyagezwe vy’Imana. Afata n’ibuye rinini ry’icibutso, arishira musi y’igiti kinini kiri hafi y’ihema ry’ibonaniro ry’Uhoraho.27Yosuwa ababwira ati: “Iri buye ni icabona hagati yacu. Ryumvise ivyo Uhoraho yatubwiye vyose. Rizobacira urubanza nimwava ku Mana yanyu.”28Nuko Yosuwa aca arabarungika basubira iwabo, umwe wese aja mu ntara bahawe nk’iragi ryabo.Abahambwe mu gihugu c’isezerano
29Inyuma y’ivyo vyose, Yosuwa mwene Nuni, umusavyi w’Uhoraho, arahwera amaze imyaka ijana na cumi.30Bamuhamba mw’itongo yahawe i Timunati-Sera, mu ntara y’imisozi ya Efurayimu, haruguru y’umusozi Gayashi.31Abisirayeli bakorera Uhoraho mu gihe cose Yosuwa yari akiriho no mu gihe c’abatware bakoranye na we, abo yasize amaze gupfa, hamwe n’abandi bose bari barabonye ivyo Uhoraho yari yarakoreye Isirayeli.32Na ya magufa ya Yosefu Abisirayeli bari baduganye bayakuye muri Egiputa baca bayahamba i Shekemu, mw’itongo Yakobo yari yaraguze ibiceri vy’ifeza ijana ahaguze na bene Hamori se wa Shekemu. Ryaciye riba iry’uruvyaro rwa Yosefu.33Hanyuma Eliyazeri mwene Aroni arapfa, ahambwa i Gibeya, ahari hahawe umuhungu wiwe Finehasi mu gihugu c’imisozi miremire ca Efurayimu.Biblica, Inc.