Ezekiyeli48
Ingene igihugu cagaburiwe Abisirayeli
1“Iyi ni yo miryango ya Isirayeli, uko amazina yabo ari:Dani azohabwa intara imwe, izoba mu buraruko. Urubibe rwayo ruzoba ibarabara rya Hetiloni, rugenda rugashika i Hamati, rukabandanya gushika i Hazari-Enani no ku rubibe rwa Damasiko rwo mu buraruko, hafi ya Hamati. Intara ya Dani izova ku ruhande rwo mu buseruko ishike mu burengero bw’igihugu ca Isirayeli.2Asheri azoronka intara imwe, ihana urubibe n’iya Dani, ive mu buseruko ishike mu burengero.3Nafutali azohabwa intara imwe, ihana urubibe n’iya Asheri, ive mu buseruko igere mu burengero.4Manase azohabwa intara imwe, ihana urubibe n’iya Nafutali, ive mu buseruko igere mu burengero.5Efurayimu azoronka intara imwe, ihana urubibe n’iya Manase, ive mu buseruko igere mu burengero.6Reyubeni azohabwa intara imwe, ihana urubibe n’iya Efurayimu, ive mu buseruko igere mu burengero.7Yuda azoronka intara imwe, ihana urubibe n’iya Reyubeni, ive mu buseruko igere mu burengero.8Ahahana urubibe n’intara ya Yuda, hazoba ari ahantu hateguriwe igikorwa kidasanzwe. Hazoba hangana ingero z’igice c’ukuboko ibihumbi mirongo ibiri na bitanu vy’uburebure, ubwaguke bwaho na bwo buzova ku rubibe rwa Isirayeli mu buseruko, rushike mu burengero nk’uko intara z’imiryango zimeze. Ingoro yanje izoba hagati muri ico kibanza.9Umugabane wera muzoha Uhoraho uzoba ufise ingero z’igice c’ukuboko ibihumbi mirongo ibiri na bitanu z’uburebure hamwe n’ingero z’igice c’ukuboko igihumbi z’ubwaguke .10Umugabane wera muzoha abaherezi uzogira uburebure bw’ingero z’igice c’ukuboko ibihumbi mirongo ibiri na bitanu z’uburebure n’ibihumbi icumi vy’ubwaguke ku ruhande rwo mu burengero. Ingoro y’Uhoraho izoba hagati na hagati muri wo.11Uwo uzoba uw’abaherezi bejejwe, bakomoka kuri Sadoki, bankoreye mu bwizigirwa, batantaye nk’Abalewi igihe Abisirayeli banta.12Uzobe umugabane wabo udasanzwe, ukuwe ku mugabane wejejwe wo muri ico gihugu, umugabane wera cane, uhana urubibe n’intara y’Abalewi.13Abalewi bazohabwa intara ihana urubibe n’umugabane w’abaherezi, hazoba hangana ingero z’igice c’ukuboko ibihumbi mirongo ibiri na bitanu z’uburebure n’ibihumbi icumi vy’ubwaguke.14Ntibazohagurishe canke ngo bagire ico bahakaba. Ntihazohabwe abandi kuko ari isi nziza cane, kandi hakaba herejwe Uhoraho.15Ahasigaye hangana n’ingero z’igice c’ukuboko ibihumbi bitanu z’uburebure, n’ibihumbi mirongo ibiri na bitanu vy’ubwaguke hazohabwa Abisirayeli, bahubake amazu hongere habe uburagiro, igisagara kibe hagati.16Ico gisagara kizoba gipima ingero z’igice c’ukuboko ibihumbi bine n’amajana atanu ku ruhande rwose.17Uburagiro buzogire ingero z’igice c’ukuboko amajana abiri na mirongo itanu ku mpande zine zabwo.18Ahasigaye, hahana urubibe n’umugabane wera, hazoba hafise uburebure bungana n’ubw’uwo mugabane wera, hazoba hafise uburebure bw’ingero z’igice c’ukuboko ibihumbi icumi n’ubwaguke bw’ibihumbi icumi nyene. Indimiro zaho zizovamwo ivyokurya vy’abakora mu gisagara.19Abazoba bakora mu gisagara barima izo ndimiro, bazoba bava mu miryango yose ya Isirayeli.20Uwo mugabane wera wose uzoba ufise ingero z’igice c’ukuboko ibihumbi mirongo ibiri na bitanu uruhande rwose. Muzowutoranye nk’ingabire idasanzwe, hamwe n’ahubatse igisagara.21Ahasigaye ku mpande zompi z’umugabane wera n’igisagara, hazobe ah’umwami. Hazongana n’ingero z’igice c’ukuboko ibihumbi mirongo ibiri na zitanu kuva ku mugabane wera uja mu buseruko, n’ingero z’igice c’ukuboko ibihumbi mirongo ibiri na zitanu kuva ku mugabane wera uja mu burengero. Iyo migabane yose uko ari ibiri, izoba ihana urubibe rurerure n’imigabane yahawe imiryango, izoba iy’umwami; kandi umugabane wera hamwe n’urusengero bizoba hagati na hagati y’aho.22Nuko rero umugabane w’Abalewi uzoba ugizwe n’ahantu hose hari hagati y’intara ya Yuda n’intara ya Benyamini, ukuyemwo ahatoranirijwe kuba umugabane wera n’igisagara.23Ku miryango isigaye:
Benyamini azohabwa intara imwe, izova mu buseruko ishike mu burengero.24Simeyoni azohabwa intara imwe, izoba ihana urubibe n’iya Benyamini, ikava mu buseruko igashika mu burengero.25Isakari azohabwa intara imwe, izoba ihana urubibe n’iya Simeyoni, izova mu buseruko ishike mu burengero.26Zebuloni azohabwa intara imwe, izoba ihana urubibe n’iya Isakari, kandi izova mu buseruko ishike mu burengero.27Gadi azohabwa intara imwe, izoba ihana urubibe n’iya Zebuloni, izova mu buseruko ishike mu burengero.28Urubibe rwo mu bumanuko bw’intara ya Gadi ruzova i Tamari rushike mu mazi y’i Meriba Kadeshi, rugere no ku kagezi ka Egiputa, rushike no ku Kiyaga Mediterane.29Ng’uko uko muzogabura igihugu, kikaba ishamvu ry’Abisirayeli, izo zikaba intara zabo, ni jewe Uhoraho Nyeninganji ndabivuze.
Amarembo y’igisagara gishasha
30Aya azobe ari yo marembo asohoka ava mu gisagara:Uhereye ku ruhande rwo mu buraruko, rufise ingero z’igice c’ukuboko ibihumbi bine n’amajana atanu z’uburebure,31hazoba amarembo atatu rimwe ryose rigire izina ry’umuryango umwe wa Isirayeli. Irya mbere rizokwitwe irembo rya Reyubeni, irya kabiri ryitwe irembo rya Yuda, irya gatatu ryitwe irembo rya Lewi.32Ku ruhande rwo mu buseruko; na ho nyene rufise uburebure bw’ingero z’igice c’ukuboko ibihumbi bine n’amajana atanu, hazoba amarembo atatu: Irembo rya Yosefu, irembo rya Benyamini n’irembo rya Dani.33Ku ruhande rwo mu bumanuko, na ho nyene rufise uburebure bw’ingero z’igice c’ukuboko ibihumbi bine n’amajana atanu, hazoba amarembo atatu: irembo rya Simeyoni, irembo rya Isakari, n’irya Zebuloni.34Ku ruhande rwo mu burengero, na ho nyene rufise uburebure bw’ingero z’igice c’ukuboko ibihumbi bine n’amajana atanu, hazoba amarembo atatu: irembo rya Gadi, irembo rya Asheri n’irembo rya Nafutali.35Inkikuro y’ico gisagara izobe ingero z’igice c’ukuboko ibihumbi icumi n’umunani .
Kandi kuva ico gihe, izina ry’ico gisagara rizobe iri: Uhoraho ni ho ari.”
Biblica, Inc.