Ezekiyeli47
Uruzi ruva mu Ngoro
1Wa muntu ansubiza inyuma ku rwinjiriro rw’Ingoro, mbona amazi ava musi y’umuryango w’Ingoro, atemba aja mu buseruko, kuko iyo nzu yaraba mu buseruko. Ayo mazi yatemba aca musi y’uruhande rwo mu bumanuko, musi y’igicaniro.2Aca aransohokana ancishije mw’irembo ryo mu buraruko, antwara kw’irembo riraba mu buseruko. Ni ho nabona ko ayo mazi atemba aca musi y’uruhande rwo mu bumanuko.3Maze uwo muntu agenda aja mu buseruko, apimisha umugozi yari afise mu ntoke. Apima ingero z’igice c’ukuboko igihumbi z’umugende wa ya mazi amanuka. Ayancishijemwo, yagera ku jisho ry’ikirenge.4Yongera apima izindi ngero z’igice c’ukuboko igihumbi, yongera ayancishamwo, angera mu mavi. Yongera apima izindi ngero z’igice c’ukuboko igihumbi, ayancishijemwo angera mu rukenyerero.5Arasubira apima izindi ngero z’igice c’ukuboko igihumbi, amazi aca angera aho ntashobora kujabuka, kuko yari yabaye menshi, vyasaba ko noga, rwari rwabaye uruzi runini aho ata worucamwo atambuka.6Arambaza ati: “Mwana w’umuntu, mbega urabona ivyo?”Araheza ansubiza ku nkombe y’uruzi.7Ndahashitse mbona ibiti vyinshi cane ku mpande zose z’uruzi.8Arambwira ati: “Uru ruzi rutemba ruja mu ntara yo mu buseruko, rukamanuka rugashika muri Araba, aho rwisesera mu kiyaga. Nirwashika mu kiyaga, amazi yaco azoca aba meza.9Aho urwo ruzi ruzotembera hose, ibinyabuzima vyo mu mazi bizobaho. Hazoba amafi menshi, kuko aya mazi aratemba agatuma amazi arimwo umunyu acika meza; aho ruzoshika hose, ruzohazana ubuzima.10Abarovyi bazohagarara ku nkengera z’ikiyaga c’Umunyu, kandi kuva muri Eni-Gedi gushika muri Eni-Egulayimu hazobaho ibibanza vyo kwanikira insenga. Hazoba amafi y’ubwoko bwinshi nk’ayo mu kiyaga Mediterane.11Ariko imyonga n’inkengera zayo ntibizokira bizogumana umunyu.12Ibiti vy’ubwoko bwose bitanga ivyamwa bizomera ku mpande zose z’uruzi. Amababi yavyo ntazigera yuma, kandi ntibizigera bireka kwama. Amezi yose bizokwama vyamye, kuko amazi azova mu Ngoro ibihe vyose abitemberamwo. Ivyamwa vyavyo bizoba ivyokurya, amababi yavyo na yo avure ingwara.”
Imbibe z’igihugu
13“Uku ni ko jewe Uhoraho Nyeninganji mvuze: ‘Izi ni zo zizoba imbibe zerekana igihugu uzogaburira imiryango cumi n’ibiri ya Isirayeli nk’iragi ryabo harimwo n’imigabane ibiri ya Yosefu ingene kingana.14Uzokibagaburira ku rugezo rungana. Kuko narahiye manitse ukuboko ko nzogiha ba sekuruza, kikazoba iragi ryabo.15Imbibe z’ico gihugu zizobe izi:Mu buraruko urubibe ruzove ku kiyaga Kinini kw’ibarabara rya Hetiloni rurengane Lebo-Hamati gushika i Sedadi,16ruce i Berota n’i Sibirayimu, biri hagati y’urubibe rwa Damasiko na Hamati, rushike i Hezeri-Hatikoni, hari ku rubibe rwa Hawurani.17Urwo rubibe ruzova ku kiyaga rugende gushika i Hazari-Enoni, ruce ruguru y’urubibe rwa Damasiko, hamwe n’urubibe rwa Hamati mu buraruko. Urwo ni rwo ruzoba urubibe rwo mu buraruko.18Mu buseruko urubibe ruzoca hagati ya Hawurani na Damasiko rujane Yorodani hagati ya Gileyadi na Isirayeli, gushika ku kiyaga co mu buseruko, no gushika i Tamari. Uru ni rwo ruzoba urubibe rwo mu buseruko.19Mu bumanuko ruzova i Tamari, rushike ku mazi y’i Meriba Kadeshi, ruheze ruce ku kagezi ka Egiputa, rushike ku Kiyaga Kinini. Urwo ni rwo rubibe rwo mu bumanuko.20Mu burengero, ikiyaga kinini ni co kizoba urubibe aharabana n’i Lebo-Hamati. Urwo ni rwo rubibe rwo mu burengero.21Uzogabure iki gihugu uko imiryango ya Isirayeli ingana.22Muzokigabure nk’iragi ryanyu mwe n’abanyamahanga baba muri mwebwe, bahavyariye abana, na bo nyene muzobafate nk’Abisirayeli ba kavukire. Bazohabwe iragi mu miryango y’Abisirayeli.23Mu miryango abanyamahanga bazoba babamwo azobe ari yo batoranamwo iragi, ni jewe Uhoraho Nyeninganji ndabivuze.’ ”
Biblica, Inc.