Kuvayo18
Yetiro agendera Mose
1Maze Yetiro, umuherezi w’i Midiyani akaba na sebukwe wa Mose, yumva ivyo Imana yakoreye Mose n’Abisirayeli, n’ukuntu Uhoraho yakuye Abisirayeli muri Egiputa.2Imbere y’aho Mose yari yararungitse iwabo umugore wiwe Zipora hamwe n’abahungu biwe babiri, sebukwe Yetiro arabakira.3Umuhungu wa mbere wa Mose yamwise Gerishomu risigura inyambukira, kuko Mose yavuga ati: “Nabaye inyambukira mu mahanga.”4Uwa kabiri yamwise Eliyezeri, risigura ngo Uhoraho ni we mutabazi wanje, kuko Mose yavuga ati: “Imana ya ba sogokuruza yambereye umufasha, yankijije inkota ya Farawo.”5Yetiro, sebukwe wa Mose, ari kumwe n’abahungu ba Mose na muka Mose, baza mu bugaragwa aho Mose yari acumbitse hafi y’umusozi w’Imana.6Yetiro yari yatumye intumwa kuri Mose ati: “Jewe sobukwe Yetiro ndaje kukuraba ndi kumwe n’umugore wawe n’abahungu biwe babiri.”7Maze Mose aja gusanganira sebukwe, aramwunamira, aramugumbira. Bahejeje kuramukanya, baca binjirana mw’ihema.8Mose yiganira sebukwe ivyo Uhoraho yakoreye Farawo n’Abanyegiputa kubw’Abisirayeli, amwiganira n’amakuba baciyemwo mu nzira yose n’ingene Uhoraho yayabakijije.9Maze Yetiro aranezerwa cane yumvise ivyiza Uhoraho yakoreye Abisirayeli akabakiza Abanyegiputa.10Aravuga ati: “Uhoraho nahimbazwe, we yabakijije Abanyegiputa na Farawo, agakura Abisirayeli mu maboko y’Abanyegiputa.11Ubu rero menye ko Uhoraho asumba izindi mana zose, kuko yavyerekanye igihe yatabara ubwoko bwiwe akabukura mu gacinyizo k’Abanyegiputa.”12Maze Yetiro, sebukwe wa Mose, aca ashikanira Uhoraho imibavu n’ibindi bimazi, Aroni na we aca azanana n’abatware bose b’Abisirayeli, basangira ivyokurya na sebukwe wa Mose bari imbere y’Imana.13Bukeye mu gatondo, Mose afata icicaro ngo ace imanza, maze abantu baramukikuza ririnda rirenga.14Sebukwe abonye ivyo Mose akorera abantu vyose, aramubaza ati: “Mbega ivyo uriko urakora ni ibiki? Kubera iki uca imanza wenyene, abantu bakagukikuza rikarinda rirenga?”15Mose aramwishura ati: “Ni kubera abantu baza aho ndi barondera kumenya ico Imana ishaka.16Iyo hagize uwugira ico apfa n’uwundi, baraza aho ndi nkabacira imanza, nkabereka ivyo amategeko n’ivyagezwe vy’Imana bivuga.”17Sebukwe wa Mose aramubwira ati: “Ivyo uriko urakora si vyiza.18Wewe mwe n’abo bantu bose muzoruha kuko igikorwa ufise ari kinini. Ntushobora kugikora neza wenyene.19Ntega amatwi ndaguhe impanuro, kandi Imana ibane nawe. Ubandanye userukira abantu ku Mana, uyizanira amatati yabo.20Ubigishe amategeko n’ivyagezwe, kandi ubereke uko bakwiye kwigenza n’ivyo bakwiye gukora.21Ariko utoranye bamwe mu bantu bubaha Imana, b’abizigirwa, banka igiturire, ubagire abacamanza bamwe b’ibihumbi, abandi b’amajana, abandi ba mirongo itanu hamwe n’aba cumi.22Ubagire abacamanza b’abandi ibihe vyose, bazohore bakuzanira imanza zigoye gusa, izoroshe abe ari bo bazica. Ivyo bizotuma igikorwa cawe coroha kuko bazokigufasha.23Niwabikora uko, kandi nimba bivuye ku Mana, ntuzoruha cane kandi n’abantu bazotunganirizwa.”24Nuko Mose yumvira sebukwe, abikora uko yabimubwiye.25Atoranya abantu mu Bisirayeli bose bashoboye guca imanza, abagira abarongozi bazocira imanza abandi, bamwe ibihumbi, abandi amajana, abandi mirongo itanitanu, abandi na bo cumicumi.26Abo bantu bamara imyanya yabo yose bacira imanza abantu. Izigoye bagaca bazizanira Mose, ariko izoroshe bakazica bonyene.27Maze Mose asezera sebukwe, sebukwe aca asubira mu gihugu ciwe.Biblica, Inc.