لواحي8
1ئِزْمَار وَامِي يرْزم اَشمَّاع وِيس سبْعَا، ينقْضع ڒْحسّ ذݣ وجنَّا شَان ؤُزْين ن ثْسَعَّات.2ࢲْرِيغ سبْعَا ن لْمَلَائِكَاث إِي يتْبدَّان زَّاث إِ أَربِّـي، يمُّوْش-اَسنْت سبْعَا ن زّْوَامَّار.3يُوْسَا-د يجّن ن لْمَلَاك نّغْنِي يبدّ غَار ڒْمذْبَح، ئِيْسِي-د ثِمجْمَارْث نِّي يتْوَاصنْعن س دّْهب. ئِمُّوْش-اَس اَطَّاس ن تْبَخُوْر حمَا اَذ يقدّم تْبَخُوْر نِّي اَك ثْࢲَادْجِيث ن ڒْمُوْمِنِين صَّالِحِين خ ڒْمذْبَح ن دّْهب يدْجَان زَّاث إِ لْعَرْش.4دّخَان ن تْبَاخُوُر-أَ اَك ثࢲَادْجِيث ن ڒْمُوْمِنِين صَّالِحِين يݣَعّذ زݣ وفُوْس ن لْمَلَاك-أَ وَانِيتَا غَار وجنَّا زَّاث إِ أَربِّـي.5ئِيْسِي لْمَلَاك-أَ ثِمجْمَارْث نِّي ن تْبَخُوْر، يعمَّر-يت س ثْمسِّي ن ڒْمذْبَح، ئِزدْجع-يت غَار ثْمُوْرْث. يوْقع وَاجَّاج ذ يغُوْيَان ذ وَاسَّام ذ زِّنْزَال.6سبْعَا ن لْمَلَائِكَاث نِّي إِي غَار دْجَانْت سبْعَا ن زّْوَامَّار سوْجَاذنْت يخف نْسنْت حمَا اَذَايْسن صُوْضنْت.7ثكَّر لْمَلَائِكَا ثَمزْوَارُوْت ثْصُوْض ذِي زَّمَّار نّس أُوْشَا يُوْسَا-د يشَرَّا ذ ثْمسِّي مْخلّْطن اَك يذَامّن منْضَارن غَار ثْمُوْرْث. ثشْمض تُلُث ن ثْمُوْرْث ذ تُلُث ن ڒْشجُّوْر ذ مَارَّا اَربِيع اَزيْزَا.8ثكَّر لْمَلَائِكَا وِيس ثْنَاين ثْصُوْض ذِي زَّمَّار نّس أُوْشَا ثمنْضَار-د شَان ڒْحَاجث ذِي ڒبْحَر اَمشْنَاو شَان وذْرَار ذ اَمقّْرَان يتْشعَّاڒ س ثْمسِّي. تُلُث ن ڒبْحَر يذْوڒ ذ يذَامّن.9تُلُث ن لْمخْلُوقَاث إِݣ يتعِيشَان ذِي ڒبْحَر مُّوْثن، تُلُث ن يغَرُّوْبَا تْوَارْزن.10ثكَّر لْمَلَائِكَا وِيس تْڒَاثَا ثْصُوْض ذِي زَّمَّار نّس أُوْشَا يوْضَا-د يجّن ن يِيثْرِي ذ اَمقّْرَان زݣ وجنَّا يتْشعَّاڒ اَمشْنَاو اَسْفض. ئِوْضَا-د خ تُلُث ن يِغزْرَان ذ ڒَعْنَاصر ن وَامَان.11ئِثْرِي نِّي قَّارن-اَس شِّيح. تُلُث ن وَامَان نِّي ذوْڒن ذ يمرْزَاݣن. أَطَّاس زݣ يِنِّي يسْوِين زَّايْسن مُّوْثن مِينْزِي اَمَان نِّي ذ يمَرْزَاݣن.12ثكَّر لْمَلَائِكَا وِيس اَرْبعَا ثْصُوْض ذِي زَّمَّار نّس أُوْشَا تُلُث ن ثْفُوْشْت ذ ثْزِيرِي ذ يِيثْرَان تْوَاسنْهزّن حمَا تُلُث نِّي اَذ تِيڒِي ذ ثَادْجسْت، أَذ تنْقس يجّن ن تُلُث ن ثْفَاوْث ذِي نْهَار ؤُڒَا ذ دْجِيڒث.13خْزَرغ، سْڒِيغ إِ يِجّن ن نْسر يطَّاو ذِي ڒْوسْط ن وجنَّا يڒَاغَا س جّْهذ ينَّا: "يَا تَمَارَا، يَا تَمَارَا، يَا تَمَارَا خ يمزْذَاغ ن ثْمُوْرْث عْلَاحْسَاب ثْڒَاثَا ن لْمَلَائِكَاث نِّي إِݣ يقِّيمن عَاذ وَار صُوْضنْت شَا ذِي زّْوَامَّار نْسنْت".
Wycliffe Bible Translators, Inc.