لواحي9
1ثكَّر لْمَلَائِكَا وِيس خمْسَا ثْصُوْض ذِي زَّمَّار نّس أُوْشَا ࢲْرِيغ يجّن ن يِيثْرِي تُوْغَا يوْضَا-د زݣ وجنَّا خ ثْمُوْرْث. ئِمُّوْش-اَس إِ يِيثْرِي نِّي ڒْمفْتَاح ن وَانُو نِّي يتَاوِين غار ڒَادْجغ بْڒَا ڒَاحدّ.2يرْزم اَنُو نِّي يتَاوِين غَار ڒَادْجغ بْڒَا ڒَاحدّ، يُوْڒِي-د زَّايس دّخَّان اَمشْنَاو دّخَّان ن يِجّن ن ڒْكُوْشث ذ ثَمقّْرَانْت. دّخَّان ن ڒَادْجغ نِّي يغطَّا ثْفُوْشْت ذ لْجُو.3زِي دّخَان-أَ ثفّْغ-د سّنِّي ثْمُوْرْغِي غَار ثْمُوْرْث، يمُّوْش-اَسنْت جّْهذ اَم ثْغِيرْذمِيوِين ن ثْمُوْرْث.4نَّان-اَسنْت وَار تْضيَّاعنْت اَربِيع ن ثْمُوْرْث ؤُڒَا ذ مِين يدْجَان ذ اَزيْزَا ؤُڒَا ذ ڒْشجُّوْر، غِير يوْذَان نِّي إِي وَار غَار يدْجِي شَا طَّابَع ن أَربِّـي خ ثنْيَارْث نْسن.5مَاشِي مسْمُوْح اَثن نْغنْت، وَلَكِن اَثن عدّْبنْت خمْس شْهُوْر. ڒَعْذَاب-أَ إي تݣّنْت اَمشْنَاو ثِغِيرْذمِيوِين خْمِي تقّْسنْت إِ بْنَاذم.6ذِي ڒْوقْث نِّي اَذ اَرْزُوْن يِوْذَان خ ڒْموْث وَار ت تِيفن شَا، أَذ تَّارن ڒْموْث اَزَّايْسن ثَرْوڒ.7ثْمُوْرْغِي-يَا تْشَابَّاه ذݣ يِيْسَان نِّي إِي وجْذن اَذ حَرْبن. غَارْسنْت خ يزدْجِيفن نْسنْت اَم تَّاج ن دّْهب، أَغمْبُوْب نْسنْت اَم وغمْبُوْب ن بْنَاذم.8غَارسنْت اَشوَّاف اَمشْنَاو اَشوَّاف ن ثمْغَارِين. ثِغْمَاس نْسنْت اَمشْنَاو ثِغْمَاس ن سّْبَع.9ثِيجِيلِيثِين نْسنْت ݣِّينْت اَم ثِيجِيلِيثِين ن ڒحْذِيذ. سّْدَع ن وَافْرِيْون نْسنْت يݣَّا اَم سّْدَع ن وَاطَّاس ن يكَارُّوْثن ن يِيْسَان إِي تَازّْڒن غَار ڒْحَرْب.10غَارْسنْت ثِيشّط اَم ثنِّي ن ثْغِيرْذنْت، تقّْسنْت زَّايس. غَارْسنْت جّْهذ اَذ ضَرّْنت يوْذَان خمْس شْهُوْر س ثِيشّط نِّي.11أَزدْجِيذ نْسنْت نتَّا ذ لْمَلَاك ن ڒَادْجغ بْڒَا ڒَاحدّ، س لْعِبْرِيَا قَّارن-اَس أَبَدُّوْن، س ثْيُوْنَانِيث قَّارن-اَس أَبُوْلْيُوْن.12ثعْذُو تَمَارَا ثَمزْوَارُوْت، عَاذ اَذ د اَسنْت ثْنَاين نّغْنِي.13ثكَّر لْمَلَائِكَا وِيس ستَّا ثْصُوْض ذِي زَّمَّار نّس أُوْشَا سْڒِيغ إِ يِجّن ن ثْمِيجَّا ثنْدق-د زِي اَرْبعَا نِّي ن وَاشَّاون ن ڒْمذْبَح ن دّْهب إِي يدْجَان زَّاث إِ أَربِّـي.14ثنَّا-ٱس ثْمِيجَّا نِّي إ لْمَلَائِكَا وِيس ستَّا إِي غَار ثدْجَا زَّمَّار: "ضْڒق-د إِ اَرْبعَا ن لْمَلَائِكَاث يتْوَاشدّن ذݣ يِغْزَار ن لْفُوْرَات اَمقّْرَان."15أُوْشَا تْوَاضڒْقنْت-يد اَرْبعَا-يَا ن لْمَلَائِكَاث إِي تُوْغَا تْوَاسّوْجْذنْت إِ ثْسَعَّات-أَ ذ نْهَار-أَ ذ شْهَار-أَ ذ وسݣّْوَاس-أَ حمَا اَذ نْغنْت تُلُث ن يِوْذَان.16سْڒِيغ خ لْعَدَد ن ڒْعَسْكَار إِي ينْيِين خ يِيْسَان: لْعَدَد نْسن مِيَّاتَاين مِلْيُوْن.17ࢲْرِيغ ذي لْوَحِي-يَا ينُو ييْسَان ذ يِنِّي خَاسن ينْيِين، غَارْسن ثِيجِيلِيثِين ن ڒحْذِيذ ذ ثِزݣّْوَاغِين اَم ثْمسِّي، ذ ثِزيْزَاوِين اَم لْيَقُوْت، ذ ثِوْرَاغِين اَم ڒكْبْرِيْيث. ئِزدْجِيفن ن يِيْسَان-أَ اَم وزدْجِيف ن سّْبَاع، تفّغ-د زݣ وقمُّوْم نْسن ثْمسِّي ذ دّخَّان ذ ڒكْبْرِيْيث.18مُّوْثن تُلُث ن يِوْذَان س ثْڒَاثَا ن لْمُصِيبَاث-أَ يعْنِي س ثْمسِّي ذ دّخَّان ذ ڒكْبْرِيْيث إِي د يتفّْغن زݣ وقمُّوْم نْسن.19جّْهذ ن يِيْسَان-أَ اَقَاث ذݣ وقمُّوْم نْسن ذ يعنَّابن نْسن. ئِعنَّابن نْسن تْشَابَّاهن ذݣ يفِيغرَان، تْضَرَّان س يزدْجِيفن نْسن.20وَلَكِن يِوْذَان إِݣ ينجْمن زِي لْمُصِيبَاث-أَ وَار تُوْبن شَا س مِين ݣِّين س يفَّاسن نْسن. قِّيمن عَاذ عبّْذن شَّيَاطِن ذ لْأَصْنَام ن دّْهب ذ نُّقَارْث ذ نّحَّاس ذ وزْرُو ذ وكشُّوْض إِي وَار يتْوِيڒِين شَا إِي وَار يتْسْڒِين شَا إِي وَار يݣُّوْرن شَا.21وَار تُوْبن شَا وَامِي نْغِين يوْذَان نِغ وَامِي ݣِّين سّْحُوْر ذ لْفَسَاد ذ ثُوْكَّارْدَا.
Wycliffe Bible Translators, Inc.