لواحي14
1وَامِي خْزَرغ، تْوَاڒِيغ يزْمَار يبدّ خ وذْرَار ن لْقُدْس اَكِذس مِيَّا أُو اَرْبعَا أُو اَرْبعِين اَڒَاف. يُوْرَا خ ثنْيَارْث نْسن يسم ن يِزْمَار ذ يِيسم ن بَابَاس.2سْڒِيغ إِ يِجّن ن ثْمِيجَّا زݣ وجنَّا ثݣَّا اَم صُّوْت ن وَاطَّاس ن وَامَان نِغ اَم وَاجَّاج يجهْذن. عَاوذ ثْمِيجَّا نِّي ؤُمِي سْڒِيغ ثݣَّا اَم صُّوْت ن يِنِّي يشَّاثن ذِي ثْݣَامْبْرِيت.3تْغنَّاجن يجّن ن يِزْڒِي ذ جْذِيذ زَّاث إِ لْعَرْش ذ اَرْبعَا نِّي ن لْمخْلُوْقَاث ذ يمْغَارن. وَار يزمَّر ؤُڒَا ذ يجّن اَذ يڒْمذ يزْڒِي نِّي إِلَّا ذ مِيَّا أُو اَرْبعَا أُو اَرْبعِين اَڒَاف نِّي إِي يتْوَاسْنجْمن زي دُّنشْت-أَ.4يِـيْنَا ذ يِنِّي وَار يࢲْرِين عمَّارْص ثِمْغَارِين قِّيمن ذ يعْزْرِيْين. يِـيْنَا ذ يِنِّي يذفَّارن يزْمَار مَانِي مَا يرُوْح. تْوَاسْنجْمن نِثْنِي زِي ڒْوسْط ن يِوْذَان حمَا اَذ تْوَاقدّْمن ذ يمزْوُوْرَا إِ أَربِّـي ذ يِزْمَار.5عمَّارْص وَار سْخرِّيقن، نِثْنِي اَقَاثن بْڒَا ڒْعِيب.6ࢲْرِيغ يجّن ن لْمَلَائِكَا نّغْنِي ثطَّاو ذِي ڒْوسْط ن وجنَّا. غَارس لْإِنْجِيل وَار يفنِّين اَذ تْبشَّر زَّايس يمزْذَاغ ن ثْمُوْرْث زِي مْكُڒ ڒْݣنْس ذ ڒْقُوْم ذ لُّغَا ذ شَّعْب.7ثقَّار س جّْهذ: "ݣّْوْذم أَربِّـي سمْغَارم-ث، أَقَا ثُوْوض-د ثْسَعَّات نّس اَذ يݣّ لْحِسَاب ذ لْعِقَاب. سجّْذث إِ ونِّي إِي د يخڒْقن اَجنَّا ذ ثْمُوْرْث ذ ڒبْحَر ذ ڒَعْنَاصر."8ثكَّر ثذْفَار-يت يجّن ن لْمَلَائِكَا نّغْنِي وِيس ثْنَاين ثقَّار: "قَا ثوْضَا قَا ثوْضَا ثنْدِينْت ن بَابِل ثَمقّْرَانْت ثنِّي إِݣ يسسّْون مَارَّا ڒݣْنُوْس س وَامَان نّس ن ؤُضِيڒ، يعْنِي لْفَسَاد نّس اَمقّْرَان."9ثكَّر ثذْفَار-يثنْت يجّن ن لْمَلَائِكَا نّغْنِي وِيس ثْڒَاثَا ثقَّار س جّْهذ: "ونِّي غَا يسجّْذن إِ ڒْوَحْش ذ لْأَصْنَام نّس، ئِقْبڒ عَاوذ طَّابَع خ ثنْيَارْث نّس نِغ خ وفُوْس نّس،10أَتَاف اَذ يسو زݣ وَامَان ؤُضِيڒ يقسْحن إِݣ يدْجَان ذ اَغْضَب ن أَربِّـي يعْنِي ذ ڒْكَاس ن لْعِقَاب نّس. أَذ يعدّب س ثْمسِّي ذ ڒكْبْرِيْيث زَّاث إِ لْمَلَائِكَاث يصْفَان ذ يِزْمَار.11دّخَّان ن ڒَعْذَاب نْسن يتْݣَعَّاذ إِ ڒبْدَا ن ڒبْدَاث. يِنِّي يسجّْذن إِ ڒْوَحْش ذ لْأَصْنَام نّس قبْڒن عَاوذ طَّبَع ن يِيسم نّس اَتَاف وَار غَارْسن يتِيڒِي بُو اَرَّاحث س دْجِيڒث نِغ ذ نْهَار."12ذِي لْحَالَا نِّي يتْخصَّا-يَاسن إِ ڒْمُوْمِنِين صَّالِحِين اَذ صْبَرن اَذ ݣّن اَرَّاي س ڒُوْصِيَاث ن أَربِّـي اَذ اَمْنن زِي عِيْسَى.13سْڒِيغ إِ يِجّن ن ثْمِيجَّا زݣ وجنَّا ثقَّار: "أَرِي مَانَايَا: سَّعْذ ن يمتِّينن إِي غَا يمّْثن سَّا اَڒ ثْسَاونْت ؤُمْنن زِي سِيذِيثْنغ." أَرُّوْح ن أَربِّـي يقَّار: "وَاه، حمَا اَذ ريّْحن زِي تَمَارَا نْسن ڒَاحقَّاش ذفَّارنْت-ثن لْحَسَانَات نْسن."14وَامِي خْزَرغ، تْوَاڒِيغ يجّن ن ؤُسيْنُو ذ اَشمْڒَاڒ، ونِّي خَاس يقِّيمن يتْشَابَّاه ذي مِّيس ن بْنَاذم، خ وزدْجِيف نّس يجّن ن تَّاج ن دّْهب، ذݣ وفُوْس نّس يجّن ن ؤُمْجَار يقْضع.15ئِكَّر يفّغ-د يجّن ن لْمَلَاك نّغْنِي زي ثمْزِيذَا ثَمقّْرَانْت، ئِقَّار-اَس س جّْهذ إِ ونِّي يقِّيمن خ ؤُسيْنُو: "يْسِي اَمْجَار نّش، مْجَر. أَقَا ثْسَعَّات ن ؤُمْجَار ثُوْوض-د، ثَفدْجَاحْث ن ثْمُوْرْث قَا ثوْجذ."16ونِّي يقِّيمن خ ؤُسيْنُو يُوْوْثَا س ؤُمْجَار خ ثْمُوْرْث، ثمْجَر ثْفدْجَاحْث نّس.17ئِكَّر يفّغ-د يجّن ن لْمَلَاك نّغْنِي زِي ثمْزِيذَا ثَمقّْرَانْت يدْجَان ذݣ وجنَّا، ؤُڒَا ذ نتَّا غَارس يجّن ن ؤُمْجَار يقْضع.18ئِكَّر يفّغ-د يجّن ن لْمَلَاك نّغْنِي زِي ڒْمذْبَح ن ثمْزِيذَا ثَمقّْرَانْت غَارس سُّلْطَا خ ثْمسِّي، ئِڒَاغَا س جّْهذ ينَّا-ٱس إِ لْمَلَاك نِّي غَار يدْجَا ؤُمْجَار يقْضع: "يْسِي اَمْجَار نّش، جْمع-د زَّايس يزكُّوْنن ن ثْزَايَارْث ن ثْمُوْرْث ڒَاحقَّاش اَضيڒ ثُوْوض-د ڒْوقْث نّس."19لْمَلَاك نِّي يُوْوْثَا س ؤُمْجَار نّس خ ثْمُوْرْث، ئِجْمع-د يزكُّوْنن ن ؤُضِيڒ ن ثْمُوْرْث ينْضَر-يثن ذِي ثْسِيرْث ثَمقّْرَانْت إِي يدْجَان ن ؤُغْضَب ن أَربِّـي.20عفّْسنْت ذِي ثْسِيرْث ن ؤُضِيڒ بَارَّا إِ ثنْدِينْت. حمْڒن-د زَّايس يذَامّن اَڒ وَامِي د يُوْوْضن غَار سْڒِيمث ن ؤُيِيس، ؤُيُوْرن يذَامّن نِّي شَان ثڒْتمِيَّات كِيلُوْمِت.
Wycliffe Bible Translators, Inc.