لواحي15
1ࢲْرِيغ يجّن ن لْعَلَامَا نّغْنِي ذ ثَمقّْرَانْت ذݣ وجنَّا يسْذهَّاشن، يعْنِي سبْعَا ن لْمَلَائِكَاث غَارْسنْت سبْعَا ن لْمُصِيبَاث ثِنݣُّوْرَا، زَّايْسنْت إِي غَا يتْوَاكمّڒ ؤُغْضَب ن أَربِّـي.2ࢲْرِيغ عَاوذ اَمشْنَاو ڒبْحَر ن جَّاج يخلّط اَك ثْمسِّي، بدّن خَاس يِنِّي يغڒْبن ڒْوَحْش ذ لْأَصْنَام نّس ذ رَّقم ن يِيسم نّس. كُڒ يجّن زَّايْسن يكسِّي يجّن ن ثْݣَامْبْرِيت ن أَربِّـي.3تْغنَّاجن س يِيْزْڒِي ن مُوْسَى ڒْعَبْذ ن أَربِّـي ذ يِزْڒِي ن يِزْمَار قَّارن:"ڒخْذَايم نّش ذ ثِمقّْرَانِين يسْذهَّاشن،آ سِيذِي أَربِّـي نّغ إِ كُڒْشِي إِي يزمَّرن.ئِبْرِيذن نّش ذ ڒْحَقّ ذ نِيشَان إِݣ يدْجَان،آي اَزدْجِيذ ن ڒݣْنُوْس ن يِوْذَان.4آ سِيذِي، مِين عْنَان يِنِّي وَار ش يتݣّْوْذن؟مِين عْنَان يِنِّي يسم نّش وَار ث يسمْغَارن؟أَقَا شك وَاحْذش إِݣ يصْفَان.مَارَّا ڒݣْنُوْس اَذ د اَسن اَذاش سجّْذن،مِنْزِي ڒخْذَايم نّش بَاننْت-يد نِيشَان."5منْبَعْد إِ مَانَايَا ࢲْرِيغ ثَمزِيذَا ثَمقّْرَانْت يعْنِي اَقِيضُوْن ن شْهَاذث ينُوْرْزم ذݣ وجنَّا.6فّْغنْت-يد زَّايس سبْعَا-يَا ن لْمَلَائِكَاث غَارْسنْت لْمُصِيبَاث نِّي س سبْعَا. ݣِّينْت اَرُّوْض ن ڒْكتَّان ن لُوْلَان يصْفَان يڒقّن، كُڒ يشْتن زَّايْسنْت غَارس اَحزَّام ن دّْهب يقْضع-د زݣ ؤُغِيڒ غَار نّصّ.7يجّن زِي اَرْبعَا ن لْمُخْلُوْقَاث يُوْشَا-ٱسنْت إِ سبْعَا نِّي ن لْمَلَائِكَاث سبْعَا ن ثْمجْمَارِين ݣِّين-ثنْت س دّْهب، عمَّرنْت س ؤُغْضَب ن أَربِّـي يدَّرن إِ ڒبْدَا ن ڒبْدَاث.8أُوْشَا ثَمْزِيذَا ثَمقّْرَانْت ثْعمَّر س دّخَّان ن لْعَظَمَا ن أَربِّـي ذ جّْهذ نّس. وَار يزمَّر حَدّ اَذ يَاذف غَار ثمْزِيذَا ثَمقّْرَانْت حتَّا اَڒ غَا كمّْڒنْت سبْعَا-يَا ن ڒْمُصِيبَاث إِي د غَا سهْوَانْت سبْعَا ن لْمَلَائِكَاث نِّي.
Wycliffe Bible Translators, Inc.