يعقوب3
شَّرّْ إِي يدْجَان ذݣ يِيڒس
1آي أَيثْمَا، ئِتْخصَّا وَار زَّايْوم يتِيڒِي بُو اَطَّاس ن يمْسڒْمَاذن، أَقَا ثسّْنم بلِّي نشِّين يمْسڒْمَاذن اَتَاف اَخَانغ يزيَّار أَربِّـي ذِي لْحِسَاب.2مَارَّا إِذْنغ نْتݣّ اَطَّاس ن لْغَالَط. مڒَا شَان يِجّن وَار يخطِّي شَا ذݣ وَاوَاڒ نّس قَاع، أَتَاف وَانِيتَا ذ يجّن ن بْنَاذم نِيشَان يكْمَاڒ. ئِزمَّر اَذ يحْكم خ دَّات نّس مَارَّا.3خْمِي نْتݣّ سْڒِيمث ذݣ وقمُّوْم ن يكِيْدَّارن، نْندّه-يثن مَانِي مَا نخْس.4شُوْف عَاوذ، أَغَرَّابُو وَاخَّا ذ اَمقّْرَان اَطَّاس يذفّع-يث أَرِّيح يجهْذن، وَلَكِن اَرَّايس يزمَّر اَث ينْده س يِجّن ن دْمَام ذ اَمزْيَان اَث ينْده مَانِي مَا يخس.5ؤُڒَا ذ يڒس نّغ نتَّا ذ يجّن ن ثْمسْڒَايْث ذ ثَمزْيَانْت ذِي دَّات نّغ، وَلَكِن يتفْتَاخَر س ثْمسْڒَايِين ثِمقّْرَانِين. شُوْف، ئِجّن ن ڒْغَابث ذ ثَمقّْرَانْت ثسْحَرّق-يت يجّن ن ثْڒُوْقِيت ذ ثَمزْيَانْت!6ئِڒس نتَّا ذ يجّن ن ثْمسِّي ذَايس شَّرّْ اَطَّاس يسْوسَّاخ مَارَّا مِين غَارْنغ ذِي دَّات نغ. ئِسْرُوْغَا ثِمسِّي ذِي مَارَّا ثُوْذَارْث نّغ، عَاوذ نتَّا س يِيخف نّس ثسْرُوْقّ-يث ثْمسِّي ن جَهنَّمَا.7ئِزمَّر بْنَاذم اَذ يربَّا ڒُحُوْش ذ يِجْضَاض ذ مِين يتنْحُوْرُوْذن ذ مِين يتْعِيشن ذِي ڒبْحر مْكُڒ نُّوْع، أُو ذ صَّح نتَّا يتْربَّا-ثن.8وَلَكِن بْنَاذم وَار يزمَّر اَذ يربَّا يڒس نّس، مَايمِّي؟ نتَّا ذ يجّن ن شَّرّْ وَار يدْجِي ؤُو إِي ث غَا يسْبدّن يعمَّر س سّم ينقّن.9زَّايس إِي نْحمّذ سِيذِي أَربِّـي بَابَاثْنغ. مَا زَّايس عَاوذ إِي زِي غَا ننْعڒ يرْيَازن إِي د يخْڒق أَربِّـي خ صِّفث نّس؟10وَاش زݣ يِجّن ن وقمُّوْم إِي زِي غَا نْسُوْفغ شُّكر ذ نَّعْڒث؟ لَّا آي أَيثْمَا، مَانَايَا يتْخصَّا وَار يتِيڒِي شَا.11مَا زمَّرن اَذ فّْغن وَامَان ذ يمِيزِيضن ذ يمرْزَاݣن زݣ يِجّن ن ڒْعُنْصَر؟12لَّا آي أَيثْمَا. مَا ثزمَّر ثْشجَّارْث ن ثَازَارْث اَذ تَارو زِّيتُون، نِغ ثْزَايَارْث وضِيڒ اَذ تَارو ثَازَارْث؟ لَّا. ؤُڒَا ذ ڒْعُنْصَر اَمدْجَاح وَار يزمَّر اَذ د يسُوْفغ اَمَان ذ يمِيزِيضن.ثَانِيتَا ذ ڒفْهَامث ن صَّح إِي د يُوْسِين زِي أَربِّـي
13مَا ٱكِذْوم ونِّي إِي ذِي ثدْجَا ڒفْهَامث ذ ثُوْسْنَا؟ ئِتْخصَّا-يَاس اَذ د يسْمظْهَار مَانَايَا س مَامّش يتْعِيش س لْمَعْقُوْل ذ لْحَسَانَاث نّس إِݣ يتݣّ اَك يِجّن ن تَّوَاضُع إِي د يتَاسن س ڒفْهَامث.14وَلَكِن مڒَا ذَايْوم ڒحْسذ ذ اَعفَّان ذ لْأَنَانِيَا، وَار تفْتَخَارث شَا س يِيخف نْوم. يعْنِي يتْخصَّا-يَاوم كنِّيو وَار ثسْخرِّيقم شَا خ لْحَقِيقَا.15نُّوْع ن ڒفْهَامث-أَ وَار د تْهوِّي شَا زݣ وجنَّا؛ لَّا، نتَّاث ن دُّنشْت-أَ ن يِوذَان ن شِّيطَان.16مِينْزِي مَانِي مَا يدْجَا ڒحْسذ ذ لْأَنَانِيَا، ذِنِّي ؤُڒَا ذ ڒْفَوْضَا ذ كُڒ شَّرّْ.17ڒفْهَامث إِي د يهوَّان زݣ وجنَّا، مِين ذَايس مُهِم قَاع اَذ تِيڒِي ثصْفَا. نتَّاث عَاوذ ذَايس ڒهْنَا ذ صّْبَار، وَار ذَايس تِيڒِي بُو ثْغنَّانْت. ثشُّوْر س أَرَّحْمث ذ لْحَسَنَاث، وَار ذَايس بُو وُوْذمَاون نِغ ذ نِّفَاق.18يِنِّي يسمْصْڒَاحن يوْذَان زرّْعن مَانَاينِّي، أَتَاف اَذ مْجَرن يجّن ن ثْفدْجَاحْث ن ڒْحَقّ.Wycliffe Bible Translators, Inc.