يعقوب2
ؤُذمَاون تْسبَّابن إِ ڒْمُعْصِيّث
1آي أَيثْمَا، كنِّيو ثُوْمْنم زِي سِيذِيثْنغ عِيْسَى لْمَسِيح إِي غَار ثدْجَا لْعَظَمَا، وَار تݣّث شَا س وُوْذْمَاون جَار يوْذَان.2مَثَلَان، يُوْذف-د يجّن ن تَّاجَر غَار جْمَاعث نْوم يݣَّا ثْخَاذنْت ن دّْهب ذݣ وفُوْس نّس يَرض اَرُّوْض يصْبَاح. ئِذْفَار-يث-يد يجّن ذ ڒْمسْكِين اَرُّوْض نّس يوسّخ.3كنِّيو ذغْيَا ثقَّارم-اَس إِ ونِّي يݣِّين اَرُّوْض ذ اَصبْحَان: قِّيم شك ذَانِيتَا ذݣ ومْشَان-أَ اَصبْحَان. ثقَّارم-اَس عَاوذ إِ ڒْمسْكِين: شك بدّ ذِيهَا نِغ قِّيم ذَانِيْتَا ذِي ثْمُوْرْث غَار يضَارن نّغ.4يعْنِي تݣّم س وُوْذمَاون اَك وَايَاوْيَا تْميَّازم جَار يِوْذَان س لأَفْكَار ثِعفَّانِين.5شُوْف آي أَيثْمَا يمْعِيزّن ينُو، مَا وَار ثسِّينم شَا أَربِّـي يخْضَر ڒْمُسَاكِين ن دُّنشْت-أَ حمَا اَذ يڒِين ذ تْوَاجَر س لْإِيمَان نْسن اَذ وَرْثن ذِي ڒْمُلْك إِي زِي يوْعذ أَربِّـي يِنِّي إِي ث يتْحِبَّان؟6وَلَكِن كنِّيو ثْحݣَّرم ڒْمُسَاكِين! مَا وَار ثسِّينم شَا ذ تْوَاجَر إِي كنِّيو إِي ضدْجْمن، تْجَرَّان-كنِّيو غَار لْمَحَاكِيم؟7مَا وَار ثسِّينم شَا بلِّي ذ نِثْنِي إِݣ يسَّاوَاڒن س ڒْعِيب ذݣ يِيسم اَصبْحَان ن لْمَسِيح ونِّي إِي زِي ذَاوم تْڒَاغَان يِوْذَان؟8ڒُوْصِيّث ن وزدْجِيذ يزدْجِيذن إِي د يُوْسِين ذِي لْكِتَاب ثقَّار: "أَذ تخْسذ اَجَّار نّش اَمشْنَاو يخف نّش." كنِّيو اَذ تݣّم مْلِيح مڒَا ثْخدّْمم زَّايس.9وَلَكِن مڒَا تݣّم س وُوْذمَاون جَار يِوذَان، أَقَا كنِّيو تݣّم ڒْمُعْصِيّث، ثْحكّم خَاوم شَّرِيعَا بلِّي ثعْصَام.10لِأَنَّا ونِّي يخدّْمن ذِي شَرِيعَا-يَا مَارَّا، مڒَا يخْضَا غِير ذݣ يِجّن ن ڒُوْصِيّث نّس اَتَاف نتَّا يخْضَا ذِي شَرِيعَا اَمن-ثكْمَاڒ.11لِأَنَّا ونِّي ينَّان: <وَار زنَّا شَا> ينَّا عَاوذ <وَار نقّ شَا.> مڒَا ثنْغِيذ وَار ثزْنِيذ شَا، أَتَاف ثعْصِيذ س شَّرِيعَا.12إِيوَا سِّيوْڒث ݣّث اَم يِوْذَان إِي خف غَا يحْكم أَربِّـي س شَّرِيعَا نِّي إِي ذِي ثدْجَا لْحُرِّيَا.13نْهَار ن لْحِيسَاب أَربِّـي وَار يرحّم شَا ونِّي وَار يرحّْمن شَا؛ أَرَّحْمث ثْغدْجب لْحِيسَاب.مِين يعْنَا لْإِيمَان بْڒَا لْحَسَانَاث؟
14آي أَيثْمَا، مِين ث غَا ينفْعن بْنَاذم مڒَا يقَّار نش ذ ڒْمُوْمن وَلَكِن ڒخْذَايم نّس وَار د تسْبيِّيننْت شَا بلِّي نتَّا ذ ڒْمُوْمن؟ مَا ذ لْإِيمَان-أَ إِي ث غَا يسْنجْمن؟ لَّا عمَّارْص!15أَقَا يشْتن ن وُوْتْشْمَاثْنغ نِغ ذ يِجّن ن وُوْمَاثْنغ وَار غَارس بُو اَرُّوْض إِي غَا يَرض ذَايس جُّوْع.16ثنِّيذ-اَس شك نِغ ذ حَدّ نّغْنِي: "رُوْح اَذ تشّذ اَذ تَرْضذ اَرُّوْض. أَش يعَاون أَربِّـي اَخَاك يسْهڒ." يعْنِي شك وَار ذَاس ثُوْشِيذ شَا مِين ثحْذَاج دَّات نّس. مَان نّْفَع ذِي مَانَايَا؟17لْإِيمَان نّش اَمنِّي مڒَا وَار د يسْبيّن شَا ڒخْذَايم نّس يتْوَاحْسَاب يمُّوْث.18ئِمْكن شَان يِجّن اَذ يِينِي: "إِيوَا شك ذَايش لْإِيمَان نّش، نش غَارِي ڒخْذَايم ينُو." نش قَّارغ: "شك سْبيّن-اَيِي-د مَامّش يݣَّا لْإِيمَان نّش بْڒَا ڒخْذَايم نّش، نش اَذَاش سْبيّْنغ مَامّش يݣَّا لْإِيمَان ينُو س ڒخْذَايم ينُو."19شك تَامْنذ بلِّي أَربِّـي نتَّا ذ يجّن؟ إِيوَا مْلِيح، وَلَكِن ؤُڒَا ذ شَّيَاطِين تَامْنن س مَانَاينِّي ترْجِيجِين.20آي اَرْيَاز، شك ثْقفْڒذ! مَا نش اَذَاوم د سْبيّْنغ بلِّي لْإِيمَان بْڒَا ڒخْذَايم وَار ذَايس بُو نّْفَع؟21خْزَر غَار جدِّيثْنغ بْرَاهِيم، أَقَا يحْسب-يث أَربِّـي نِيشَان س مِين يݣَّا بْرَاهِيم وَامِي يقدّم مِّيس إِسْحَاق خ ڒْمذْبح.22أَقَا تْوَاڒِيذ لْإِيمَان ن بْرَاهِيم يخدّم اَك ڒخْذَايم نّس، أُوْشَا لْإِيمَان نّس يذْوڒ يكْمَاڒ س ڒخْذَايم-أَ إِي يݣَّا.23ذ وَا ذ ڒْمَعْنَا ن وَاوَاڒ نِّي ن أَربِّـي ذِي لْكِتَاب وَامِي ينَّا: "أُوْشَا يُوْمن بْرَاهِيم زِي أَربِّـي، ئِكَّر أَربِّـي يسمْصْڒَاح-يث اَكِذس س لْإِيمَان نِّي." أَمنِّي إِݣ يجَّا أَربِّـي بْرَاهِيم ذ اَمدُّوْكڒ نّس.24كنِّيو يسْبيّن-اَوم-د أَربِّـي يحسّب بْنَاذم نِيشَان مَاشِي غِير س لْإِيمَان نّس أُو صَافِي، ؤُڒَا س ڒخْذَايم نّس.25أَمنِّي ؤُڒَا ذ ثَحنْجِيرْث نِّي ؤُمِي قَّارن رِيحَاب تُوْغَا ثفّغ اَبْرِيذ، يحْسب-يت أَربِّـي نِيشَان س مِين ثݣَّا وَامِي ثْرحّب زِي ثْنَاين نِّي ن لْمُخَابَرَات، ثْسنْجم-يثن ثسّكّ-يثن خ يِجّن ن وبْرِيذ نّغْنِي.26شُوْف، دَّات ن بْنَاذم بْڒَا بُوْحْبڒ ثمُّوث، أَمنِّي لْإِيمَان بْڒَا ڒخْذَايم يمُّوْث.Wycliffe Bible Translators, Inc.