يعقوب4
ئِبْرِيذن ن دُّنشْت-أَ تْعَارَّاضن إِ أَربِّـي
1إِيوَا يخَرْوِيضن ذ يمنْغِيْون يتِيڒِين جَارَاوم، مَانِيس د تكّن؟ تكّن-د زِي شّهَاوَاث نْوم ثِعفَّانِين إِي يتْمنْغَان غَار ذَاخڒ نْوم.2خْمِي وَار تِيفم شَا كنِّيو خ مِينْخف ثْرزُّوْم، أَتَاف ثْنقّم. تْمنْغَام تمْنَاقَارم جَارَاوم، مَايمِّي؟ لِأَنَّا كنِّيو وَار ثْزمَّرم شَا اَذ تَاوْضم غَار مِين ثْعشّْقم. وَار غَارْوم شَا، مَايمِّي؟ لِأَنَّا كنِّيو وَار تتَّارم شَا إِ أَربِّـي.3خْمِي ذَاس تتَّارم وَار ذَاوم د يتِيشّ شَا، مَايمِّي؟ لِأَنَّا كنِّيو تْغَالَّاطم ذِي مِين ذَاس تتَّارم، ثخْسم اَذ تْسعّْفم شّهَاوَاث نْوم أُو صَافِي.4آ يِنِّي يخدّْعن، كنِّيو مَا وَار ثسِّينم شَا بلِّي ونِّي يتخْسن دُّنشْت-أَ ذ ونِّي ذ ڒْعَذُو ن أَربِّـي؟ وَاه، ونِّي يخْضَرن دُّنشْت-أَ قَا نتَّا نِيشَان ذ ڒْعَذُو ن أَربِّـي.5اَوَاڒ ن لْكِتَاب يقَّار: <أَرُّوْح نِّي إِي ذَايْنغ يݣَّا أَربِّـي يْعِيزّ خَاس اَطَّاس.> مَا تْغِير-أَوم اَوَاڒ نِّي وَار غَارس بُو ڒْمَعْنَا؟6وَلَكِن نتَّا يَرْنِي-يَانغ-د اَرْضَا زَّايس. س مَانَايَا يقَّار لْكِتَاب: <أَربِّـي اَقَاث ضد ن يِنِّي يسمْغَارن يخف نْسن، يِنِّي يسمْزَاين يخف نْسن يتِيشّ-اَسن اَرْضَا نّس.>7س مَانَايَا طَاعث إِ أَربِّـي. عَرّْضث إِ إِبْڒِيس، أَزَّايْوم يَرْوڒ.8أَذْسث غَار أَربِّـي، نتَّا اَغَارْوم د يَاذس. آ يِنِّي يخْضَان، سِيرْذث يفَاسّن نْوم. آ يِنِّي كُڒ ڒَعْقڒ مِين ذَاوم يقَّار، سصْفَاث ؤُڒَاون نْوم.9خيّْقم، حزْنم، تْرُوْم. بدّْڒم ثَضحَّاشْت نْوم غَار يمطَّاون ذ ڒفْرَاحْث نْوم غَار وخِيّق.10سمْزْيث يخف نْوم زَّاث إِ سِيذِي أَربِّـي، نتَّا اَكنِّيو يسمْغَار.وَار تْعيَّاب شَا ؤُمَاش
11آي أَيثْمَا، وَار قَّارث بُو ڒْبَاطڒ خ وَايَاوْيَا. مِينْزِي ونِّي يقَّارن ڒْبَاطڒ خ وُوْمَاس نِغ يتْعيَّاب-يث، أَتَاف يقَّار ڒْبَاطڒ خ شَّرِيعَا يتْعيَّاب-يت. خْمِي تْعيَّابذ شَّرِيعَا اَتَاف شك وَار زَّايس ثخدّْمذ شَا؛ لَّا، أَتَاف شك ذ ڒْقَاضِي نّس وَاهَا.12ذِنِّي يجّن إِݣ يݣِّين شَّرِيعَا نتَّا عَاوذ ذ ڒْقَاضِي، نتَّا ذ أَربِّـي. نتَّا وَاحْذس إِݣ يزمَّرن اَذ يسنْجم يزمَّار اَذ يسفْنَا، وَلَكِن مِين ثعْنِيذ شك تْعيَّابذ اَجَّار نّش؟ذݣ وفُوْس ن أَربِّـي إِي ذِي ثدْجَا ثُوْذَارْث نّغ
13صنّْطث مْلِيح آ يِنِّي يقَّارن، "يَالَّاهث أَ نْرَاح نْهَارَا نِغ ثِيوشَّا غَار ثنْدِينْت-ين نِغ غَار ثنْدِينْت-أَ، أَ نْسعْذُو ذِنِّي لْعَام أَ نݣّ تِّجَارَا بَاش أَ نرْبح."14إِيوَا، مَا ثسّْنم مِين غَا يوقْعن ثِيوشَّا؟ لَّا، أَقَا ثُوْذَارْث نْوم تݣّ اَم يِجّن ن ثْسيْنُوْت، تْمظْهَار-د ذغْيَا، ذغْيَا تْرَاح.15ئِتْخصَّا-يَاوم اَذ تِينِيم اَمُّو: <مڒَا يخس سِيذِي أَربِّـي أَ ندَّر، أَ نݣّ شّْغڒ-أَ نِغ ذ شّْغڒ-ين.>16وَلَكِن ڒخُّو كنِّيو تفْتَخَارم، تْسمْغَارم يخْف نْوم. مَارَّا تَّكبُّر-أَ ٱم وَانِيتَا نتَّا ذ شَّرّْ.17ونِّي يتْوَاڒَان شَان ن ڒْخِير اَث يݣّ، مڒَا وَار ث يݣِّي شَا يتْوَاحْسَاب-اَس ذ ڒْمُعْصِيّث.Wycliffe Bible Translators, Inc.