ارسل27
1وَامِي ؤُمَرن اَذَانغ سّكّن ذݣ وغَرَّابُو غَار ثْمُوْرْث ن إِطَالْيَا، سلّْمن بُوْلُس ذ ڒبْعَاض ن يمحْبَاس اَكِذس يجّن ن وعَسْكَارِي ذ اَمقّْرَان ن اَرُّوْمَانُوْس قَّارن-اَس يُوْلْيُوْس. نتَّا يُوْسَا-د زِي ڒْعَسْكَار نِّي ؤُمِي قَّارن <لْفِرْقَا ن قَيْصَر.>2نْݣَعّذ ذݣ يِجّن ن وغَرَّابُو يتْرَاحن ذِي ڒْوقْث نِّي زِي ڒْمُوْيِـي ن أَدْرَمِيت غَار ڒْمُوْيَاوَاث ن لْإِقْلِيم ن آسْيَا. ئِرُوْح اَكِذْنغ أَرِيْسْتَارْخُوْس، نتَّا زِي أَيث-مَاسِدُوْنْيَا زِي ثنْدِينْت ن سَالُوْنِيكْ.3ثِيوشَّا نّس، وَامِي نُوْوض غَار ثنْدِينْت ن صَيْدَا يݣَّا ڒْخِير يُوْلْيُوْس ذِي بُوْلُس يجّ-يث اَذ يرَاح غَار يمدُّوْكَاڒ نّس بَاش اَذَايس تهِيلَّان.4سّنِّي نفّغ نْرُوْح ذݣ وغَرَّابُو ذِي جِّهث نِّي مَانِي يهدّن ڒبْحَر ن ثيْزِيرْث ن قُبْرُص، مِينْزِي اَرِّيح يشَّاث-اَنغ-د غَار وغمْبُوْب نّغ.5وَامِي نعْذُو ڒبْحَر نِّي إِي يدْجَان زَّاث إِ لْإِقْلِيم ن كِيلِيكْيَا ذ لْإِقْلِيم ن پَـامْفِيلْيَا، نُوْوض غَار ثنْدِينْت ن مِيْرَا ذِي لْإِقْلِيم ن لِيكْيَا.6يُوْفَا ذِنِّي وعَسْكَارِي نِّي اَمقّْرَان يجّن ن وغَرَّابُو يُوْسَا-د زِي ثنْدِينْت ن إِسْكَنْدَارِيَا يتْرَاح ذِي ڒْوقْث نِّي غَار ثْمُوْرْث ن إِطَالْيَا، ئِسْني-اَنغ ذَايس.7أَطَّاس ن وُوْسَّان نشِّين يݣُّوْر زَّايْنغ وغَرَّابُو وَلَكِن يُوْيُوْر غِير شْوَايْت ن وبْرِيذ وَاهَا، منْبَعْد نعْذُو طَّارْف إِ ثنْدِينْت ن كَنِيْدُوْس. وَامِي اَرِّيح وَار ذَانغ يجِّي شَا أَ نْكمّڒ خ وبْرِيذ نِّي، نعْذُو سْوَادَّاي ن ثيْزِيرْث ن كْرِيت جِّهث ن قَابُو ن سَالْمُوْن.8س بزّز نُوْݣُّوْر طَّارْف طَّارْف ن ڒْبَرّ منْبَعْد نُوْوض غَار يِجّن ن ومْشَان قَّارن-اَس <ڒْمَرْسَاث ثِصبْحَانِين> نتَّا يُوْذس إِ وبِيلَاج ن لِيسْيَا.9ؤُسَّان ن ڒْعِيذ صَافِي عْذُوْن، تُوْغَا نعْظڒ اَطَّاس ن ڒْوقْث حتَّا وَامِي يذْوڒ وسَفَر نّغ ذِي ڒبْحَر ذَايس لْخَطَر. ئِكَّر بُوْلُس يعْڒم-اَسن ينَّا-ٱسن: "آ سِيَاذِي، قَا نش تْوَاڒِيغ اَسَفَر نّغ اَذ يِيڒِي ذ يجّن ن لْمُصِيبَا ذ يجّن ن ثْخسَّارْث ذ ثَمقّْرَانْت، مَاشِي غِير اَغَرَّابُو ذ سّڒْعَاث وَاهَا، وَلَكِن عَاوذ ؤُڒَا ذ ثُوْذَارْث نّغ."11وَلَكِن اَعَسْكَارِي نِّي اَمقّْرَان وَار ذَاس يݣِّي شَا اَرَّاي إِ بُوْلُس، يݣَّا اَرَّاي إِ بَاب ن وغَرَّابُو ذ اَرَّايس نّس.12لِأَنَّا ڒْمَرْسَا نِّي ذ ثَعفَّانْت بَاش اَذَايس سعْذُوْن ڒْمشْتَا ذِنِّي. خ مَانَايَا اَزْين اَمقّْرَان ݣِّين اَذ ؤُيُوْرن سّنِّي ذݣ وغَرَّابُو، تْمنَّان اَذ اَوْضن غَار وبِيلَاج ن فِيْنِيْكس اَذَايس سعْذُوْن ڒْمشْتَا. نتَّاث ذ يجّن ن ڒْمَرْسَا ذِي ثيْزِيرْث ن كْرِيت تظْهُوْر غَار لْجَانُوْب ذ شَّمَال ذِي جِّهث ن لْغَرْبِي.13وَامِي د يصُوْض يجّن ن اَرِّيح يفْسُوْس زِي لْجَنُوْب، ئِتْغِيڒ-اَسن ؤُفِين مِين رزُّوْن. سْݣَعّْذن-د اَڒِيزِيم ن وغَرَّابُو رُوْحن ذِي ڒبْحَر طَّارف إِ ڒْبَرّ ن ثيْزِيرْث نِّي ن كْرِيت.14وَلَكِن منْبَعْد شْوَايت يكَّر-د يجّن ن اَرِّيح يجْهذ يهْوَا-د زِي ثيْزِيرْث نِّي، أَرِّيح نِّي قَّارن-اَس <أَسْمَاوِي.> 15لْعَاصِفَا نِّي ثُوْوِي اَغَرَّابُو، وَامِي وَار نْزمَّر شَا أَ نُوْيُوْر غَار زَّاث نجَّا اَغَرَّابُو نِّي اَث يَاوِي اَرِّيح.16نْنُوْفَّر زِي اَرِّيح وَامِي نعْذُو سْوَادَّاي ن يِجّن ن ثيْزِيرْث ذ ثَمزْيَانْت قَّارن-اَس كَوْدَا. ئِزيَّار خَانغ اَطَّاس ڒْحَاڒ وَلَكِن نْركّن ثَغَرَّابُوْت ن لْإِغَاثَا،17نسْݣَعّذ-يت-يد غَار وغَرَّابُو. ئِخدَّامن شدّن اَغَرَّابُو س يسغْوَان سْوَادَّاي بَاش وَار يتْرزِّي شَا. وَامِي ݣّْوْذن اَغَرَّابُو اَذ يُوْيُوْر اَذ ينَّاغ ذݣ يِجْذِي ن ڒبْحَر ن سُرْت، سهْوَان-د ڒقْڒُوْع وغَرَّابُو جِّين اَرِّيح اَث يَاوِي.18ثرْنِي لْعَاصِفَا نِّي، ثِيوشَّا نّس بْذَان نطَّارن سّڒْعَاث ذِي ڒبْحَر.19نْهَار وِيس ثڒْتِيَّام نْضَارن ڒْقشّ وغَرَّابُو ذِي ڒبْحَر س يفَاسّن نْسن.20ثقِّيم اَمنِّي لْعَاصِفَا نِّي، أَطَّاس ن وُوْسَّان وَار نࢲْرِي ثْفُوْشْت ؤُڒَا ذ يِيثْرَان. نشِّين ذݣ ونݣَّارُو نفْقذ لْأَمَل بلِّي أَ ننْجم.21وَامِي كِّين اَطَّاس ن ڒْوقْث وَار شِّين شَا اَغْرُوْم، ئِكَّر بُوْلُس ينَّا-ٱسن: "آي يرْيَازن، مَعْلِيك ذَايِي ثݣِّيم اَرَّاي وَار ثفِّيغم شَا زِي ثيْزِيرْث ن كْرِيت، أَتَاف قَا وَار خَاوم ثكِّي شَا تَمَارَا-يَا نِغ ذ ثْخسَّارْث-أَ.22ڒخُّو تتَّارغ زَّايْوم اَذ تِيڒِيم ذ يرْيَازن اَقَا وَار يتْمتِّي حَدّ زَّايْوم، غِير اَغَرَّابُو-يَا اَذ يرز وَاهَا.23شُوْف، دْجِيڒث-أَ ثَانِيتَا قَا ثْمظْهَار-اَيِي-د يجّن ن لْمَلَائِكَا ن أَربِّـي، أَربِّـي ونِّي ؤُمِي خدّْمغ نتَّا ذ بَاب ينُو.24ثنَّا-ٱيِي لْمَلَائِكَا نِّي: آ بُوْلُس وَار تݣّْوْذ شَا! وَا لَابُد اَذ تْبدّذ غَار لْمَلِك قَيْصَر. خْزَر عَاوذ، يِنِّي إِي كِذش يتْسَفَارن مَارَّا يسنْجم-يثن أَربِّـي اَكِذش."25ينَّا-ٱسن بُوْلُس: "إِيوَا إِڒِيث ذ يرْيَازن! قَا نش تَامْنغ زِي أَربِّـي مِين ذَايِي ينَّا اَذ يِيڒِي قَا ٱذ يِيڒِي.26وَلَكِن لَابُد اَذ ينَّاغ وغَرَّابُو-يَا غَار طَّارْف ن شَان ثيْزِيرْث."27ذِي دْجِيڒث نِّي وِيس اَربعْطَاشَر يُوْم نشِّين عَاذ نُوْݣُّوْر نْودَّر ذِي ڒبْحَر ن وَادْرِيَاتِيكِي، غَار ؤُزْين ن دْجِيڒث تْغِيڒ-اَسن إِ يخدَّامن ن وغَرَّابُو قَا تْقرَّابن غَار ڒْبَرّ.28عْبَرن ڒَادْجغ ن ڒبْحَر ؤُفِين سبْعَا أُو ثْڒَاثِين مِيتْرُو. ثعْذُو شْوَايْت ن ڒْوقْث، عَاوذ عْبَرن ؤُفِين غِير سبْعَا أُو عِشْرِين مِيتْرُو.29ݣّْوْذن اَغَرَّابُو اَذ يڒْقف يزْرَا، نْضَرن زِي پُـوْپَّـا ن وغَرَّابُو اَربْعَا ن يڒِيزَام قِّيمن تْࢲَادْجَان بَاش اَذ يصْبح ڒْحَاڒ.30ئِخدَّامن ن وغَرَّابُو وَامِي رزُّوْن اَذ اَروْڒن زَّايس، سهْوَان ثَغَرَّابُوْت ن لْإِغَاثَا غَار وَامَان سْنعْمِيڒن اَخْمِي خْسن اَذ نْضَرن يڒِيزَام زِي پْـرُوْبَا وغَرَّابُو.31ينَّا-ٱس بُوْلُس إِ وعَسْكَارِي نِّي اَمقّْرَان ذ ڒْعَسْكَار نِّي اَكِذس: "مڒَا وَار قِّيمن شَا يخدَّامن-أَ ذݣ وغَرَّابُو، وَار ثْزمَّرم شَا اَذ تْنجْمم."32ڒخْدّنِّي ڒْعَسْكَار قسّن يسغْوَان ن ثْغَرَّابُوْت ن لْإِغَاثَا جِّين-تث اَخَاسن ثْبعّذ.33وَامِي يبْذَا اَذ يصْبح ڒْحَاڒ، ئِكَّر بُوْلُس يتَّار زَّايْسن مَارَّا اَذ شّن شَا ن ڒْحَاجث ينَّا-ٱسن: "ثعْذُو اَرْبعْطَاشَر يُوْم تْرَاجَام وَاهَا ثدْجُوْزم، وَار ثشِّيم وَالُو.34ڒخُّو تتَّارغ زَّايْوم اَذ تشّم شَان ڒْحَاجث بَاش اَذ تقِّيمم ثدَّرم، وَار يوطِّي ؤُڒَا ذ يجّن ن وزُوْطُّو زݣ وزدْجِيف نْوم."35وَامِي ينَّا اَوَاڒ-أَ، ئِكَّر ييْسِي-د اَغْرُوْم يشكَّر أَربِّـي زَّاثْسن مَارَّا، يرز-يث يبْذَا يتتّ-يث.36شجّْعن مَارَّا إِذْسن شِّين.37نشِّين لْعَدَد نّغ ذݣ وغَرَّابُو مِيّتَاين أُو ستَّا أَو سبْعِين ن يِوْذَان.38وَامِي شِّين جِّيْوْنن، نْضَرن يرْذَان ذِي ڒبْحَر بَاش اَذ سْفسّن اَغَرَّابُو.39وَامِي د يصْبح ڒْحَاڒ، تْوَاڒَان شَا ن ثْمُوْرْث نِثْنِي وَار ت سِّينن شَا. ࢲْرِين يجّن ن لْخَلِيج ذِنِّي، شّطّ نّس ذَايس يجْذِي. ݣِّين اَغَارس سْقَارّْبن اَغَرَّابُو مڒَا زمَّرن-اَس.40قضْون يڒِيْزَام جِّين-ثن ذي ڒبْحَر، سرْخُوْن يسغْوَان إِي زِي تْوَاركّْنن دْمَامَاث. سْݣَعّْذن ڒقْڒَع ن زَّاث إِ اَرِّيح يتْصُوْضن، وجّْهن غَار ڒْبَرّ.41وَلَكِن اَغَرَّابُو يكَّا ذݣ يِجّن ن ويدِّيم ن يِجْذِي ذِي ڒْوسْط ن وَامَان ينُّوْغ ذَايس ذِنِّي. پْـرُوْبَا نّس ثنُّوْغ مْلِيح وَار تنْهزِّي شَا. پُـوْپَّـا نّس ثبْذَا تْرزَّا شَّاثن-ت ڒمْوَاج.42ڒْعَسْكَار نْوَان اَذ نْغن يمحْبَاس بَاش وَار زَّايْسن يتْعُوْمِّي حَدّ اَذ يَرْوڒ.43وَلَكِن اَعسْكَارِي نِّي اَمقّْرَان يخس اَذ يسنْجم بُوْلُس، ئِسْبدّ-يثن خ مِين خْسن اَذ ݣّن. يُوْمَر يِنِّي يسّْنن اَذ عُوْمّن اَذ نضْون ذ يمزْوُوْرَا حمَا اَذ فّْغن غَار ڒْبَرّ.44ئِنّغْنِي اَثن ذْفَارن خ ثْفڒْوِين نِغ خ ثڒْوِيحِين وغَرَّابُو. أَمنِّي إِي ݣِّين بَاش اَذ فّْغن مَارَّا إِذْسن غَار ڒْبَرّ اَذ نجْمن.
Wycliffe Bible Translators, Inc.