ارسل28
1وَامِي ننْجم نُوْوض غَار ڒْبَرّ، نُوْفَا يسم ن ثيْزِيرْث نِّي قَّارن-اَس مَالْطَا.2ئِبَرْبَرِيْين ن ثْمُوْرْث نِّي ݣِّين ذَايْنغ ڒْخِير اَطَّاس. رحْبن زَّايْنغ مَارَّا، شعّْڒن-اَنغ ثِمسِّي مِينْزِي تُوْغَا ثسْمض عَاوذ يشَّاث ونْࢲَار.3بُوْلُس يجْمع-د يكشُّوْضن، وَامِي ثن يسرْس ذِي ثْمسِّي يفّغ-د يجّن ن وفِيغر زِي ڒحْمُو، ئِقّس-اَس يڒْسق-اَس ذݣ وفُوْس.4وَامِي ࢲْرِين يبَرْبَرِيْين فِيغر يڒْسق ذݣ وفُوْس ن بُوْلُس، نَّان جَارَاسن: نِيشَان اَرْيَاز-أَ وَانِيتَا ينْغَا شَان يِجّن. أَربِّـي نّغ ؤُمِي قَّارن <لْإِرَادَا> وَار ث يجِّي شَا اَذ يدَّر وَاخَّا ينْجم زِي ڒبْحَر.5وَلَكِن بُوْلُس ينْضَر فِيغر نِّي ذِي ثْمسِّي وَار ذَاس يوْقِيع وَالُو.6ئِبَرْبَرِيْين نِّي تْرَاجَان مَا ٱذ يُوْفّ وَا إِمَا ذغْيَا اَذ يوْضَا اَذ يمّث. وَامِي ث رَاجَان اَطَّاس تْوَاڒَان-ث وَار ذَاس يوْقِيع وَالُو، ئِبدّڒ اَرَّاي نْسن نَّان وَانِيتَا ذ شَان يِجّن زِي أَربِّـيثن نّغ!7ڒْبَرّ-أَ وَانِيتَا يُوْذس غَار شَا ن ثْمُوْرَا ن اَرَّايس ن ثيْزِيرْث نِّي، نتَّا قَّارن-اَس پُـوْبْلِيُوْس. يرْحب زَّايْنغ، ئِسْنوْجو-اَنغ يكَرم-اَنغ ثڒْتِيَّام.8بَابَاس ن پُـوْبْلِيُوْس يتْنزْبَار ذِي ثَاسُّوْث يهْڒش س ثْمسِّي يتَازّڒ-اَس وعدِّيس. ئِرُوْح غَارس بُوْلُس غَار وخَّام نّس يࢲُّوْدْج، ئِسرْس خَاس يفَاسّن نّس يسْݣنْفَا-ث.9يوْقع مَانَاينِّي، سّنِّي ؤُسِين-د غَارس يمهْرَاش ن ثيْزِيرْث نِّي مَارَّا يسْݣنْفَا-ثن بُوْلُس.10وقَّرن-اَنغ ؤُشِين-اَنغ اَطَّاس ن ثْمسْڒَايِين. وَامِي نكَّر أَ نفّغ ذݣ وغَرَّابُو، ذبَّرن-اَنغ-د ڒْقشّ نِّي إِي نحْذَاج.11منْبَعْد إِ ثڒْت شْهُوْر، نْݣَعّذ ذݣ يِجّن ن وغَرَّابُو زِي إِسْكَنْدَارِيَا تُوْغَا يسعْذُو ڒْمشْتَا ذِي ثيْزِيرْث نِّي. أَغَرَّابُو نِّي خ وغمْبُوْب نّس ذَايس لْأَصْنَام سمَّان-ثن <ئِشْنِيون ن أَربِّـي.>12نُوْوض غَار ثنْدِينْت ن سَرَقُوْسَا نقِّيم ذَايس ثڒْتِيَّام.13سّنِّي نْرُوْح ذݣ وغَرَّابُو غَار ثنْدِينْت ن رِيدْجو. ثِيوشَّا نّس، ئِكَّر-د يجّن ن اَرِّيح زِي لْجَنُوْب، نْهَار وِيس ثڒْتِيَّام نُوْوض غَار ڒْمُوْيِي ن بُوْتِسُوْلِي.14نُوْفَا ذِنِّي ڒبْعَاض ن اَيثْمَاثْنغ، عَرْضن-اَنغ أَ نقِّيم اَكِذْسن سبْع-يَّام. أَمنِّي إِي نُوْوض غَار ثنْدِينْت ن رُوْمَا.15غَارْسن ڒخْبَار غَار اَيثْمَاثْنغ ذِي رُوْمَا نُوْسَا-د، فّْغن-د اَذَانغ د ڒْقَان حتَّا غَار سُّوْق ن وَابْيَان أُو حتَّا غَار ثْڒَاثَا ن ثُوْذْرِين ن يمْسَافَرن. وَامِي ثن يࢲْرَا بُوْلُس، ئِشكَّر أَربِّـي ئِتْوَاشجّع.16نُوْذف ثَنْدِينْت ن رُوْمَا، ئِسْمح-اَس ڒْمخْزن إِ بُوْلُس اَذ يزْذغ وَاحْذس اَكِذس يقِّيم يجّن ن وعَسْكَارِي اَخَاس يعسّس.17ثعْذُو ثڒْتِيَّام، يڒَاغَا-د بُوْلُس خ يمقّْرَانن ن أَيث-إِسْرَائِيل. وَامِي د مُوْنن ينَّا-ٱسن: "آي اَيثْمَا، نش وَار ݣِّيغ وَالُو ضد إِ شَّعْب نّغ نِغ ضد إِ لْعَادَاث ن ڒجْذُوْذ نّغ. وَاخَّا اَمنِّي طّْفن-اَيِي ذِي لْقُدْس سلّْمن-اَيِي إِ يفَاسّن ن اَرُّوْمَانُوْس.18نِثْنِي ݣِّين-اَيِي لْإِسْتِجْوَاب، خْسن اَذَايِي ضڒْقن مِينْزِي وَار خَافِي ؤُفِين بُو شَان تُّهْمَا إِي خف سْذَاهدْجغ ڒْموْث.19وَامِي أَيث-إِسْرَائِيل عَارّْضن قَا وَار ؤُفِيغ إِلَّا اَذ سْتَانْفغ دَّعْوث ينُو غَار لْمَلِك قَيْصَر. وَلَكِن نش وَار ݣِّيغ بُو شَان تُّهْمَا خ لْأُمَّا ينُو.20إِذن خ مَانَايَا تَّارغ-كنِّيو اَكنِّيو ࢲرغ اَكِذْوم سِّيوْڒغ. أَقَا عْلَاحْسَاب لْأَمَل ن أَيث-إِسْرَائِيل إِي تْوَاشدّغ س سّنْسْڒث-أَ."21نَّان-اَس: "وَار ذَانغ ذ ثُوْوِيض خَاك ؤُڒَا ذ يجّن ن ثبْرَات زِي جْوَايه ن يَهُوْذِيَا. زݣ يِنِّي إِي د يُوْسِين زِي اَيثْمَاثْنغ سّنِّي وَار ذَانغ يسِّيوڒ حَدّ خَاش، وَار خَاك ينِّي حَدّ ڒْعِيب.22وَلَكِن نخْس اَذَاش نْصنّط لْأَفْكَار نّش، مِينْزِي نسّن اَطَّاس ن يِوْذَان ذِي مْكُڒ اَمْشَان تْعَارَّاضن إِ ڒْحِزب-أَ وَانِيتَا."23تَّافْقن اَذ مڒْقن يجّن ن نْهَار، تْمَارْنِين-د ينّغْنِي ؤُسِين-د غَارس اَطَّاس إِذْسن غَار ثدَّارْث مَانِي يقِّيم بُوْلُس. ئِبْذَا يتْحدَّاث-يثن زِي صْبَاح اَڒ وَامِي د يُوْوض وعشِّي نتَّا يشهّذ س ڒْمُلْك ن أَربِّـي، ئِخس اَثن يسقْنع س شَّرِيعَا ن مُوْسَى ذ لْكُتُب ن لْأَنْبِيَا خ عِيْسَى.24ڒبْعَاض زَّايْسن قْتَانْعن س مِين ينَّا، ڒبْعَاض زَّايْسن وَار ؤُمِيْنن شَا.25نِثْنِي وَار مسْفْهِيمن شَا اَك وَايَاوْيَا. قْبڒ مَا ٱذ فّْغن سّنِّي، ينَّا-ٱسن بُوْلُس اَوَاڒ-أَ ذ اَنݣَّارُو: "أَرُّوْح يقدّْسن ينَّا ڒْحَقّْ إِ ڒجْذُوْذ نْوم س يِيڒس ن نَّبِي إِشَعْيَا، ينَّا:26<رُوْح غَار شَّعْب-أَ إِنِي-يَاسن:شْحَاڒ مَا تسْڒَام وَار ثْفهّْمم، شْحَاڒ مَا ثْخزَّرم وَار تْوِيڒِيم.27ڒَاحقَّاش شَّعْب-أَ، ؤُڒَاون نْسن ذوْڒن اَم وزْرُو،عْڒَاين وَار تسْڒِين وَالُو، قّْنن ثِيطَّاوِين نْسن.حمَا وَار تْوِيڒِين س ثِيطَّاوِين نْسن،وَار تسْڒِين س يمجَّان نْسن، وَار فهّْمن س وُوْڒَاون نْسن،أَغَارِي د ذوْڒن اَثن سْݣنْفِيغ.>28إِيوَا يتْخصَّا اَذ تسّْنم ؤُڒَا ذ يِنِّي وَار يدْجِين شَا ذ يسْرَائِيلِيْين أَربِّـي اَثن يسنْجم، نِثْنِي اَذَاس سْڒن."29{وَامِي ينَّا اَوَار-أَ، فّْغن أَيث-إِسْرَائِيل زَّايس تمْنَاقَارن س جّْهذ جَارَاسن.}30ئِقِّيم بُوْلُس عَامَاين ذِي ثدَّارْث نِّي يتْخدْجَاس ڒكْرَا نتَّا س يِيخف نّس. ئِتْرحَّاب س يِنِّي إِي غَارس د يݣُّوْرن مَارَّا.31ئِتْحدَّاث-يثن س ڒْمُلْك ن أَربِّـي، ئِسڒْمَاذ خ سِيذِيثْنغ عِيْسَى لْمَسِيح س يِجّن ن زْعَامث ذ لْحُرِّيَا.
Wycliffe Bible Translators, Inc.