اقرأ 𐴌𐴡𐴔𐴞𐴀𐴡𐴥𐴓𐴢 3

𐴌𐴡𐴔𐴞𐴀𐴡𐴥𐴓𐴢3

𐴀𐴝𐴓𐴧𐴝 𐴇𐴝𐴥𐴔𐴞𐴐𐴝 𐴏𐴡𐴥𐴘𐴧𐴞 𐴃𐴝𐴥𐴑𐴠

¹𐴇𐴠𐴥𐴀𐴕 𐴀𐴡𐴥𐴘𐴓𐴠, 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴑𐴞𐴦 𐴉𐴝𐴥𐴘𐴊𐴝 𐴀𐴝𐴏𐴠𐴤؟ 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥𐴌 𐴑𐴞𐴦 𐴑𐴞𐴔𐴡𐴃𐴢 𐴀𐴝𐴏𐴠𐴤؟²𐴁𐴠𐴐𐴡𐴥𐴑, 𐴇𐴝𐴥𐴀𐴌 𐴔𐴞𐴑𐴧𐴝𐴥𐴃𐴧𐴟 𐴁𐴞𐴐𐴞𐴤 𐴉𐴝𐴥𐴘𐴊𐴝 𐴀𐴝𐴏𐴠𐴤. 𐴀𐴠𐴁𐴧𐴠 𐴀𐴝𐴒𐴡𐴌 𐴒𐴝𐴥𐴕 𐴀𐴡𐴥𐴙𐴓𐴊𐴠, 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴀𐴞𐴥𐴁𐴝𐴌 𐴑𐴝𐴓𐴝𐴔 𐴕𐴝𐴎𐴞𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴃𐴝𐴌𐴝𐴌𐴠 𐴁𐴡𐴥𐴌𐴝𐴐𐴝 𐴒𐴡𐴙𐴅𐴧𐴞𐴥𐴓𐴢.

³𐴀𐴞𐴥𐴃𐴝𐴌𐴝 𐴑𐴠𐴏𐴧𐴟𐴥𐴘𐴠 𐴁𐴠𐴘𐴔𐴝𐴕𐴞 𐴒𐴡𐴙𐴅𐴧𐴠𐴥 𐴊𐴠 𐴀𐴡𐴥𐴘𐴓𐴠 𐴘𐴡 𐴑𐴞𐴦 𐴀𐴡𐴥𐴘𐴧𐴠؟ 𐴀𐴞𐴥𐴃𐴝𐴌𐴝 𐴁𐴠𐴘𐴔𐴝𐴕𐴞 𐴒𐴡𐴙𐴅𐴧𐴠𐴥 𐴁𐴡𐴥𐴓𐴞 𐴑𐴞𐴥 𐴀𐴝𐴓𐴧𐴝𐴘𐴠 𐴘𐴡𐴥 𐴁𐴠𐴘𐴔𐴝𐴕𐴞 𐴒𐴡𐴌𐴞𐴥𐴁𐴡 𐴕𐴠𐴥؟⁴𐴁𐴞𐴓𐴑𐴟𐴥𐴓𐴢 𐴕𐴡! 𐴁𐴡𐴥𐴓𐴑𐴠 𐴉𐴡𐴃𐴧𐴞𐴥 𐴔𐴝𐴕𐴟𐴥𐴙𐴐𐴢 𐴔𐴞𐴏𐴝𐴥 𐴄𐴡𐴥𐴀𐴌𐴞𐴓𐴠 𐴘𐴡, 𐴀𐴝𐴓𐴧𐴝 𐴏𐴡𐴥𐴘𐴧𐴞 𐴄𐴡𐴥𐴀𐴌𐴝𐴌 𐴎𐴡𐴌𐴟𐴌, 𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,”𐴃𐴟𐴣𐴀𐴝𐴥𐴣𐴌 𐴈𐴡𐴃𐴝𐴤𐴘𐴠 𐴏𐴝𐴥𐴁𐴟𐴃𐴢 𐴒𐴡𐴌𐴠𐴥 𐴊𐴠, 𐴃𐴟𐴀𐴛 𐴇𐴝𐴥𐴔𐴞𐴐𐴝 𐴏𐴡𐴥𐴘𐴧𐴞 𐴃𐴝𐴥𐴑𐴡,𐴀𐴝𐴦𐴌 𐴃𐴟𐴣𐴀𐴝𐴥𐴣𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝 𐴎𐴝 𐴊𐴠 𐴀𐴡𐴑𐴃𐴡𐴥𐴃𐴢 𐴃𐴟𐴀𐴛 𐴎𐴞𐴃𐴞 𐴀𐴝𐴘𐴧𐴡𐴤.“

⁵𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴌 𐴑𐴟𐴈𐴝𐴔𐴠 𐴎𐴡𐴊𐴞 𐴀𐴝𐴓𐴧𐴝𐴌 𐴇𐴡𐴥𐴑 𐴁𐴞𐴏𐴝𐴌 𐴎𐴝𐴇𐴠𐴥𐴌 𐴀𐴡𐴥, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴑𐴞𐴦 𐴈𐴡𐴘𐴃𐴝𐴥𐴔؟ 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌𐴠 𐴏𐴝𐴥𐴣𐴎𐴝 𐴊𐴠𐴥 𐴊𐴠 𐴇𐴞𐴥𐴘𐴝𐴕 𐴕𐴝𐴀𐴞𐴕𐴏𐴝𐴥𐴉𐴞 𐴕𐴡 𐴀𐴡𐴥𐴌 𐴕𐴠؟ 𐴁𐴠𐴐𐴡𐴥𐴑 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴞𐴕𐴏𐴝𐴥𐴕𐴡𐴌 𐴀𐴠𐴑𐴧𐴝𐴥𐴕 𐴕𐴡𐴎𐴡𐴌𐴞𐴘𐴝.⁶𐴇𐴠𐴥𐴕𐴊𐴞𐴓𐴧𐴝 𐴁𐴞𐴓𐴑𐴟𐴥𐴓𐴢 𐴕𐴡! 𐴀𐴝𐴌𐴕𐴡𐴥𐴘𐴓𐴠 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴙𐴌 𐴁𐴞𐴏𐴝𐴌 𐴑𐴠𐴀𐴕𐴒𐴡𐴌𐴞 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥؟⁷𐴇𐴡𐴊𐴟𐴥𐴕𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴡𐴤, ”𐴀𐴝𐴣𐴀𐴌 𐴔𐴞𐴏𐴝𐴥 𐴈𐴡𐴃𐴝𐴤𐴘𐴠 𐴎𐴡𐴊𐴞 𐴀𐴝𐴓𐴧𐴝 𐴇𐴝𐴥𐴔𐴞𐴐𐴝 𐴏𐴡𐴥𐴘𐴧𐴞 𐴃𐴝𐴥𐴑𐴠 𐴊𐴠 𐴇𐴞𐴥𐴘𐴝𐴕 𐴎𐴝𐴇𐴠𐴥𐴌 𐴀𐴡𐴥 𐴀𐴝𐴦𐴌 𐴇𐴞𐴥𐴘𐴝𐴕𐴠 𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝 𐴀𐴡𐴥, 𐴃𐴡𐴥𐴀𐴘𐴓𐴠 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴒𐴟𐴕𐴝𐴤𐴒𐴝𐴌 𐴀𐴞𐴥𐴏𐴝𐴉𐴠 𐴑𐴞𐴘𐴝𐴥 𐴁𐴞𐴏𐴝𐴌 𐴒𐴡𐴌𐴠𐴥؟“⁸𐴇𐴠𐴥𐴕𐴊𐴞𐴓𐴧𐴝 𐴈𐴡𐴀 𐴊𐴠 𐴀𐴞𐴥𐴃𐴝𐴌𐴝 𐴀𐴠𐴕𐴊𐴞𐴓𐴧𐴝 𐴘𐴡𐴥 𐴈𐴡𐴘𐴁𐴡𐴤, 𐴎𐴞𐴘𐴝𐴥𐴕 𐴀𐴝𐴣𐴀𐴌𐴝 𐴈𐴡𐴀𐴘𐴢 𐴁𐴡𐴥𐴓𐴞 𐴈𐴡𐴀𐴘𐴢 𐴇𐴡𐴊𐴟𐴥𐴕𐴠 𐴀𐴝𐴣𐴀𐴌𐴝𐴌 𐴁𐴡𐴊𐴕𐴝𐴔 𐴒𐴡𐴌𐴠𐴥, 𐴑𐴞 𐴈𐴡𐴘𐴓𐴠𐴥, ”𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴁𐴟𐴌𐴝𐴘 𐴒𐴡𐴌𐴞𐴥𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴃𐴡𐴥 𐴁𐴟𐴌𐴝𐴘 𐴒𐴡𐴌𐴞𐴥 𐴉𐴝𐴌𐴠 𐴇𐴠𐴥𐴃𐴡 𐴒𐴡𐴔.“ 𐴇𐴠𐴥 𐴁𐴡𐴊𐴕𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴓𐴝𐴦𐴘𐴠𐴑 𐴏𐴝𐴥𐴣𐴎𐴝 𐴈𐴝𐴥𐴔𐴝𐴈𐴝 𐴉𐴝𐴘 𐴎𐴝𐴘𐴁𐴡.

𐴉𐴡𐴌𐴇𐴠𐴥𐴏𐴒𐴝𐴌 𐴑𐴞𐴘𐴠𐴥 𐴕𐴝𐴥𐴘

⁹𐴘𐴝𐴓𐴝 𐴀𐴝𐴣𐴀𐴌𐴝 𐴑𐴞𐴦 𐴈𐴡𐴘𐴃𐴝𐴥𐴔؟ 𐴀𐴝𐴣𐴀𐴌𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴑𐴞𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴁𐴠𐴀𐴃𐴡𐴌؟ 𐴁𐴞𐴓𐴑𐴟𐴥𐴓𐴢 𐴕𐴡; 𐴀𐴝𐴣𐴀𐴌𐴝 𐴃𐴡 𐴀𐴝𐴒𐴠 𐴘𐴡𐴥 𐴈𐴡𐴀𐴘𐴓𐴝𐴔, 𐴃𐴝𐴔𐴝𐴥𐴔 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴒𐴟𐴕𐴝𐴤𐴌 𐴑𐴡𐴁𐴎𐴝𐴃𐴢 𐴀𐴝𐴏𐴠𐴤.¹⁰𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,”𐴉𐴡𐴌𐴇𐴠𐴥𐴏𐴒𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴝𐴥𐴘, 𐴀𐴠𐴑𐴎𐴡𐴕 𐴀𐴟𐴥𐴊𐴧𐴗𐴝 𐴕𐴝𐴥𐴘;¹¹𐴁𐴟𐴎𐴢 𐴀𐴡𐴓𐴝 𐴑𐴞𐴘𐴠𐴥 𐴕𐴝𐴥𐴘,𐴇𐴡𐴕𐴡𐴤𐴑𐴞𐴘𐴠 𐴀𐴝𐴓𐴧𐴝𐴌 𐴃𐴝𐴓𐴝𐴐𐴢 𐴕𐴡 𐴒𐴡𐴌𐴠𐴥.¹²𐴁𐴠𐴒𐴧𐴟𐴥𐴕 𐴔𐴝𐴕𐴟𐴥𐴙𐴐𐴢 𐴏𐴡𐴥𐴘𐴧𐴞𐴃𐴧𐴟 𐴓𐴡𐴌𐴞𐴒𐴞𐴘𐴡𐴥𐴘,𐴁𐴠𐴒𐴧𐴟𐴥𐴕 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴁𐴞𐴒𐴞𐴍𐴞𐴒𐴞𐴘𐴡𐴘;𐴒𐴡𐴔 𐴈𐴝𐴔 𐴒𐴡𐴌𐴠𐴥 𐴊𐴠 𐴇𐴡𐴕𐴡𐴤𐴑𐴞𐴘𐴠 𐴕𐴝𐴥𐴘,𐴀𐴠𐴑𐴎𐴡𐴕 𐴀𐴟𐴥𐴊𐴧𐴗𐴝 𐴕𐴝𐴥𐴘.“ ¹³”𐴀𐴞𐴥𐴃𐴝𐴌𐴝𐴌 𐴔𐴟𐴑 𐴉𐴡𐴦𐴣𐴏𐴝 𐴓𐴝𐴐𐴡𐴌 𐴑𐴟𐴥𐴓𐴝 𐴈𐴡𐴁𐴡𐴌𐴡𐴌 𐴋𐴡𐴥𐴙𐴓𐴧𐴝;𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴎𐴞𐴌𐴠 𐴉𐴠𐴥𐴌𐴡𐴑𐴁𐴝𐴎𐴞 𐴒𐴡𐴌𐴠𐴥,“ ”𐴀𐴞𐴥𐴃𐴝𐴌𐴝𐴌 𐴀𐴟𐴣𐴄𐴡𐴃𐴢 𐴇𐴝𐴥𐴉𐴡𐴌 𐴁𐴞𐴐𐴢 𐴀𐴝𐴏𐴠𐴤.“ ¹⁴”𐴀𐴞𐴥𐴃𐴝𐴌𐴝𐴌 𐴔𐴟𐴑 𐴒𐴡𐴎𐴧𐴡𐴁𐴠 𐴉𐴟𐴌𐴝𐴘𐴧𐴝; 𐴀𐴞𐴥𐴃𐴝𐴌𐴝𐴌 𐴈𐴡𐴃𐴝𐴤𐴃𐴢 𐴇𐴡𐴕𐴡𐴤 𐴔𐴞𐴍𐴝𐴤 𐴕𐴝𐴥𐴘.“ ¹⁵”𐴑𐴟𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴃𐴝𐴌𐴝 𐴊𐴟𐴣𐴌𐴞 𐴎𐴝𐴦;¹⁶𐴀𐴞𐴥𐴃𐴝𐴌𐴝 𐴎𐴠𐴍𐴠𐴥 𐴎𐴝𐴦 𐴇𐴠𐴥𐴍𐴠 𐴊𐴡𐴥𐴚𐴐𐴡 𐴀𐴠𐴊𐴧𐴠 𐴔𐴡𐴏𐴞𐴁𐴡𐴃𐴢 𐴉𐴡𐴘𐴊𐴝 𐴒𐴡𐴌𐴠𐴥.¹⁷𐴐𐴝𐴥𐴕𐴃𐴞 𐴒𐴡𐴥𐴌𐴞 𐴃𐴝𐴥𐴑𐴝𐴌 𐴌𐴝𐴏𐴃𐴝 𐴀𐴞𐴥𐴃𐴝𐴌𐴝 𐴕𐴡 𐴏𐴞𐴕𐴠𐴥.“ ¹⁸”𐴀𐴞𐴥𐴃𐴝𐴌𐴝𐴌 𐴊𐴞𐴓𐴡𐴃𐴢 𐴀𐴝𐴓𐴧𐴝𐴌 𐴇𐴡𐴕𐴡𐴤 𐴋𐴡𐴦𐴌 𐴕𐴝𐴥𐴘.“

¹⁹𐴘𐴝𐴓𐴝 𐴀𐴝𐴣𐴀𐴌𐴝 𐴎𐴝𐴕𐴞 𐴊𐴠, 𐴐𐴡𐴥𐴌𐴞𐴘𐴡𐴃𐴠 𐴎𐴞𐴀𐴕 𐴈𐴡𐴀 𐴇𐴞𐴥𐴀𐴕 𐴀𐴟𐴘𐴃𐴝𐴌𐴝𐴤𐴌𐴠 𐴁𐴠 𐴈𐴡𐴀 𐴎𐴠𐴃𐴝𐴌𐴝𐴤 𐴐𐴡𐴥𐴌𐴞𐴘𐴡𐴃𐴡𐴌 𐴃𐴡𐴓𐴠 𐴀𐴝𐴏𐴠𐴤; 𐴎𐴠𐴀𐴕𐴠 𐴇𐴡𐴕𐴡𐴤 𐴀𐴞𐴕𐴏𐴝𐴥𐴕𐴡𐴃𐴧𐴟 𐴈𐴡𐴘𐴁𐴝𐴥𐴌 𐴑𐴠𐴏𐴧𐴟𐴥 𐴕𐴡 𐴃𐴝𐴥𐴑𐴠, 𐴀𐴝𐴦𐴌 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃𐴧𐴟 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴞𐴥𐴏𐴝𐴉𐴑𐴞𐴃𐴝𐴁𐴢 𐴊𐴞𐴘𐴝 𐴉𐴡𐴌𐴠,²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴇𐴡𐴕𐴡𐴤 𐴀𐴞𐴕𐴏𐴝𐴥𐴕 𐴀𐴞𐴥𐴁𐴝𐴌 𐴕𐴡𐴎𐴡𐴌𐴡𐴃𐴢 𐴉𐴡𐴌𐴇𐴠𐴥𐴏𐴒𐴝𐴌 𐴕𐴡 𐴄𐴡𐴥𐴀𐴌𐴞𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴡𐴌 𐴊𐴟𐴖𐴝𐴌𐴝 𐴃𐴡 𐴒𐴟𐴕𐴝𐴤𐴌 𐴎𐴝𐴕𐴑𐴝𐴌𐴞 𐴀𐴠𐴥𐴕𐴝 𐴀𐴝𐴘𐴧𐴠𐴤.

𐴀𐴞𐴔𐴝𐴕𐴡𐴌 𐴊𐴟𐴖𐴝𐴌𐴝 𐴉𐴡𐴌𐴇𐴠𐴥𐴏𐴒𐴝𐴌𐴞

²¹𐴔𐴡𐴕𐴃𐴡𐴌 𐴘𐴝𐴓𐴝 𐴃𐴡 𐴀𐴝𐴓𐴧𐴝𐴘𐴠 𐴔𐴝𐴙𐴕𐴐𐴡𐴥𐴌𐴠 𐴐𐴡𐴥𐴌𐴞𐴘𐴡𐴃𐴢 𐴏𐴝𐴥𐴌𐴝 𐴑𐴠𐴀𐴕𐴒𐴡𐴌𐴞 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠 𐴌𐴝𐴏𐴃𐴝 𐴇𐴞𐴥𐴘𐴝𐴕 𐴎𐴝𐴇𐴠𐴥𐴌 𐴀𐴡𐴥𐴘𐴧𐴠, 𐴎𐴞𐴘𐴝𐴥𐴕𐴡𐴌 𐴁𐴝𐴦𐴁𐴟𐴃𐴠 𐴃𐴡𐴌𐴝𐴃𐴢 𐴐𐴡𐴥𐴌𐴞𐴉𐴡𐴃𐴢 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴡𐴃𐴢 𐴀𐴡𐴥 𐴎𐴞𐴑𐴞𐴥𐴌 𐴀𐴝𐴏𐴠𐴤.²²𐴌𐴝𐴏𐴃𐴝 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, 𐴎𐴠𐴃𐴝𐴌𐴝𐴤 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴀𐴞𐴔𐴝𐴕𐴠 𐴀𐴝𐴓𐴧𐴝𐴘𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴠𐴥; 𐴌𐴝𐴏𐴃𐴝 𐴇𐴞𐴥𐴘𐴝𐴕𐴡𐴃𐴢 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞 𐴇𐴡𐴕𐴡𐴤 𐴉𐴡𐴌𐴡𐴥𐴑 𐴕𐴝𐴥𐴘,²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴒𐴧𐴟𐴥𐴕𐴠 𐴃𐴡 𐴒𐴟𐴕𐴝𐴤 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝𐴃𐴧𐴟 𐴔𐴝𐴀𐴌𐴟𐴔 𐴀𐴡𐴥𐴘𐴒𐴞𐴘𐴡𐴘.²⁴𐴔𐴡𐴕𐴃𐴡𐴌 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤 𐴊𐴠 𐴀𐴝𐴎𐴝𐴊𐴞𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴓𐴧𐴝𐴘𐴠 𐴁𐴠𐴒𐴧𐴟𐴥𐴕𐴡𐴌𐴠 𐴕𐴞𐴎𐴡𐴌 𐴌𐴝𐴇𐴝𐴥𐴔𐴡𐴃𐴡𐴌 𐴇𐴝𐴥𐴊𐴞𐴘𐴝 𐴀𐴞𐴥𐴏𐴝𐴉𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴠𐴥.²⁵𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴕𐴞𐴎𐴡𐴌 𐴓𐴡𐴖𐴢 𐴁𐴝𐴥𐴐𐴝 𐴁𐴝𐴥𐴘 𐴀𐴠𐴕𐴊𐴞𐴓𐴧𐴝 𐴑𐴡𐴉𐴧𐴝𐴌𐴝 𐴀𐴞𐴥𐴏𐴝𐴉𐴠 𐴂𐴠𐴦𐴐𐴢 𐴒𐴡𐴙𐴅𐴧𐴠𐴥 𐴎𐴞𐴘𐴝𐴥𐴕𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤𐴓𐴠 𐴒𐴟𐴕𐴝𐴤𐴌 𐴔𐴝𐴉𐴢 𐴉𐴝𐴦 𐴎𐴝. 𐴇𐴞𐴥𐴘𐴝𐴕 𐴓𐴡𐴥𐴘 𐴀𐴝𐴓𐴧𐴝𐴘𐴠 𐴊𐴝𐴈𐴝𐴤𐴘𐴧𐴠 𐴊𐴠, 𐴀𐴞𐴥𐴁𐴝 𐴀𐴡𐴣𐴃𐴧𐴠𐴤 𐴘𐴡𐴥 𐴀𐴞𐴕𐴏𐴝𐴥𐴉𐴖𐴝𐴓𐴝 𐴀𐴝𐴐𐴧𐴞𐴥𐴓𐴢 𐴎𐴠𐴣𐴃𐴧𐴠𐴥 𐴀𐴞𐴕𐴏𐴝𐴥𐴕𐴠 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴒𐴟𐴕𐴝𐴤𐴌 𐴏𐴝𐴥𐴣𐴎𐴝 𐴕𐴡 𐴊𐴞 𐴀𐴞𐴥𐴁𐴝𐴘𐴠 𐴐𐴡𐴥𐴀𐴘𐴢-𐴐𐴡𐴥𐴀𐴘𐴢 𐴀𐴝𐴐𐴧𐴞𐴥𐴓𐴢.²⁶𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴀𐴞𐴥𐴁𐴝𐴘𐴠 𐴀𐴠 𐴀𐴡𐴑𐴃𐴡𐴥𐴃𐴢 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴠𐴥 𐴊𐴠 𐴑𐴞, 𐴀𐴞𐴥𐴁𐴝 𐴀𐴞𐴕𐴏𐴝𐴥𐴉𐴖𐴝𐴓𐴝, 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴀𐴞𐴥𐴃𐴝𐴌𐴠 𐴀𐴞𐴥𐴁𐴝𐴘𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴠𐴥.

²⁷𐴃𐴡𐴥𐴀𐴘𐴓𐴠 𐴁𐴡𐴌𐴝𐴥𐴘 𐴒𐴡𐴌𐴞𐴥𐴁𐴝𐴌 𐴑𐴞𐴦 𐴀𐴝𐴏𐴠𐴤؟ 𐴑𐴠𐴏𐴧𐴟𐴥 𐴕𐴝𐴥𐴘. 𐴇𐴡𐴕 𐴐𐴡𐴥𐴌𐴞𐴘𐴡𐴃𐴡𐴓𐴧𐴝 𐴁𐴡𐴥𐴓𐴞 𐴕𐴝𐴥𐴘 𐴊𐴠؟ 𐴀𐴝𐴔𐴡𐴥𐴓𐴡𐴌 𐴕𐴠𐴥؟ 𐴕𐴡, 𐴁𐴡𐴥𐴓𐴑𐴠 𐴀𐴞𐴔𐴝𐴕𐴡𐴌 𐴐𐴡𐴥𐴌𐴞𐴘𐴡𐴃𐴡𐴓𐴧𐴝 𐴁𐴡𐴥𐴓𐴞.²⁸𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴊𐴡𐴥𐴌𐴞 𐴊𐴠 𐴑𐴞, 𐴔𐴝𐴕𐴟𐴥𐴙𐴐𐴢 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴌𐴠 𐴊𐴠 𐴕𐴞𐴎𐴡𐴌 𐴀𐴞𐴔𐴝𐴕𐴠, 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴔𐴡𐴥𐴓𐴠 𐴕𐴡.²⁹𐴃𐴡𐴥𐴀𐴘𐴓𐴠 𐴀𐴝𐴓𐴧𐴝 𐴑𐴞 𐴏𐴞𐴌𐴞𐴥𐴉𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴀𐴝𐴓𐴧𐴝؟ 𐴀𐴞𐴥𐴁𐴝 𐴑𐴞𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴀𐴡𐴥 𐴀𐴝𐴓𐴧𐴝 𐴕𐴡؟ 𐴁𐴠𐴐𐴡𐴥𐴑, 𐴀𐴞𐴥𐴁𐴝 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴀𐴡𐴥 𐴀𐴝𐴓𐴧𐴝,³⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝 𐴃𐴡 𐴀𐴠𐴑𐴒𐴗𐴝𐴥 𐴀𐴠𐴥𐴕𐴝 𐴀𐴝𐴏𐴠𐴤, 𐴎𐴞𐴁𐴝𐴤𐴘𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴞𐴥𐴁𐴡 𐴊𐴠 𐴘𐴡𐴥 𐴀𐴞𐴔𐴝𐴕𐴠, 𐴀𐴝𐴦𐴌 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴌𐴞𐴥𐴁𐴡 𐴊𐴠 𐴘𐴡𐴥 𐴀𐴞𐴔𐴝𐴕𐴠.³¹𐴃𐴡𐴥𐴀𐴘𐴓𐴠 𐴑𐴞𐴥 𐴀𐴝𐴣𐴀𐴌𐴝 𐴀𐴞𐴔𐴝𐴕𐴠 𐴐𐴡𐴥𐴌𐴞𐴘𐴡𐴃𐴡𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥𐴌؟ 𐴁𐴞𐴓𐴑𐴟𐴥𐴓𐴢 𐴕𐴡! 𐴁𐴡𐴥𐴓𐴑𐴠, 𐴀𐴝𐴣𐴀𐴌𐴝 𐴐𐴡𐴥𐴌𐴞𐴘𐴡𐴃𐴢 𐴎𐴝𐴌𐴞 𐴌𐴝𐴑𐴞𐴥 𐴊𐴠.

The Word for the World International

https://app.library.bible/content/87faca8b51c22590