Read 𐴌𐴡𐴔𐴞𐴀𐴡𐴥𐴓𐴢 4

𐴌𐴡𐴔𐴞𐴀𐴡𐴥𐴓𐴢4

𐴀𐴞𐴁𐴌𐴝𐴇𐴞𐴥𐴔𐴡𐴌 𐴔𐴠𐴀𐴏𐴝𐴓𐴢

¹𐴇𐴠𐴥𐴀𐴕 𐴀𐴡𐴥𐴘𐴓𐴠, 𐴅𐴞𐴏𐴞𐴥𐴔𐴡𐴌 𐴇𐴞𐴥𐴑𐴧𐴝𐴃𐴧𐴟 𐴀𐴝𐴣𐴀𐴌𐴝𐴌 𐴎𐴠 𐴁𐴝𐴉𐴢 𐴀𐴝𐴏𐴠𐴤 𐴇𐴠𐴥 𐴀𐴞𐴁𐴌𐴝𐴇𐴞𐴥𐴔𐴠 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴑𐴞𐴦 𐴓𐴡𐴦𐴃𐴢 𐴉𐴝𐴀𐴙𐴓𐴢 𐴈𐴡𐴘𐴃𐴝𐴥𐴔؟²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴎𐴡𐴊𐴞 𐴀𐴝𐴔𐴡𐴥𐴓𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴘𐴡𐴥𐴒𐴧𐴗𐴝𐴃𐴧𐴟 𐴁𐴡𐴌𐴝𐴥𐴘 𐴒𐴡𐴌𐴞𐴥𐴁𐴝𐴌 𐴑𐴠𐴏𐴧𐴟𐴥 𐴃𐴝𐴥𐴑𐴞𐴃𐴡, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴕𐴡.³𐴂𐴝𐴑-𐴑𐴝𐴓𐴝𐴔𐴡𐴃𐴢 𐴑𐴞𐴦 𐴀𐴝𐴏𐴠𐴤؟ 𐴘𐴝𐴀𐴕, ”𐴀𐴞𐴁𐴌𐴝𐴇𐴞𐴥𐴔𐴠 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴌𐴝𐴙𐴑𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴌𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴒𐴞𐴀𐴓𐴢.“

⁴𐴈𐴝𐴔 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌 𐴃𐴡𐴓𐴡𐴉𐴡𐴌𐴠 𐴃𐴡 𐴇𐴝𐴥𐴊𐴞𐴘𐴝 𐴁𐴡𐴥𐴓𐴞 𐴊𐴡𐴥𐴌𐴝 𐴕𐴡 𐴎𐴝, 𐴁𐴡𐴥𐴓𐴑𐴠 𐴇𐴡𐴥𐴑 𐴁𐴡𐴥𐴓𐴞 𐴊𐴡𐴥𐴌𐴝 𐴎𐴝.⁵𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴀𐴝𐴔𐴡𐴥𐴓𐴡𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴕𐴡 𐴒𐴡𐴌𐴞𐴥 𐴀𐴟𐴁𐴝𐴤𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴒𐴡𐴌𐴠𐴥 𐴎𐴞𐴁𐴝𐴤𐴘𐴠 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴡𐴌𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴠 𐴀𐴞𐴥𐴃𐴝𐴌 𐴇𐴠𐴥 𐴀𐴞𐴔𐴝𐴕𐴠 𐴁𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴎𐴝,⁶𐴎𐴠𐴕𐴊𐴞𐴓𐴧𐴝 𐴊𐴝𐴖𐴟𐴊𐴠 𐴘𐴡𐴥 𐴔𐴝𐴕𐴟𐴥𐴙𐴐𐴢 𐴀𐴟𐴁𐴝𐴤 𐴔𐴟𐴁𐴝𐴌𐴠𐴑 𐴁𐴡𐴓𐴞 𐴈𐴡𐴘𐴧𐴠𐴥 𐴎𐴞𐴁𐴝𐴤𐴌𐴠 𐴀𐴝𐴓𐴧𐴝𐴘𐴠 𐴀𐴝𐴔𐴡𐴥𐴓𐴢 𐴏𐴝𐴥𐴌𐴝 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴠. 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠,⁷”𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤𐴎𐴠𐴃𐴝𐴌𐴝𐴤𐴌 𐴈𐴡𐴏𐴟𐴥𐴌 𐴀𐴡𐴥𐴑𐴧𐴡𐴓𐴢 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠,𐴎𐴠𐴃𐴝𐴌𐴝𐴤𐴌 𐴒𐴟𐴕𐴝𐴤 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠.⁸𐴔𐴟𐴁𐴝𐴌𐴠𐴑 𐴔𐴝𐴕𐴟𐴥𐴙𐴐𐴢 𐴀𐴟𐴁𐴝𐴤,𐴎𐴞𐴁𐴝𐴤𐴌 𐴒𐴟𐴕𐴝𐴤 𐴔𐴝𐴁𐴟𐴊𐴠 𐴇𐴞𐴥𐴏𐴝𐴉𐴢 𐴕𐴡 𐴌𐴝𐴑𐴞𐴥𐴁𐴡.“

⁹𐴀𐴠𐴍𐴠𐴥 𐴔𐴟𐴁𐴝𐴌𐴠𐴑 𐴈𐴡𐴘𐴧𐴠𐴥 𐴊𐴠 𐴇𐴞𐴥𐴘𐴝𐴕 𐴑𐴞𐴥 𐴏𐴞𐴌𐴞𐴥𐴉𐴢 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴀𐴡𐴥𐴑𐴧𐴡𐴓𐴢 𐴀𐴡𐴓𐴧𐴝؟ 𐴀𐴝𐴦𐴌 𐴕𐴝𐴥𐴑𐴞 𐴀𐴝𐴥𐴎𐴡𐴔𐴞 𐴀𐴝𐴒𐴡𐴙𐴅𐴧𐴝𐴤 𐴀𐴡𐴥𐴑𐴧𐴡𐴓𐴡𐴓𐴧𐴝 𐴘𐴡𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴝𐴣𐴀𐴌𐴝 𐴀𐴠𐴕𐴊𐴞𐴓𐴧𐴝 𐴉𐴝𐴘𐴧𐴞𐴥, ”𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴀𐴞𐴔𐴝𐴕𐴠 𐴁𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴒𐴞𐴀𐴓𐴢.“¹⁰𐴃𐴡𐴥𐴀𐴘𐴓𐴠 𐴇𐴡𐴣𐴃𐴧𐴠𐴥 𐴒𐴡𐴕𐴝 𐴒𐴞𐴀𐴓𐴢 𐴊𐴠𐴥؟ 𐴘𐴡𐴥𐴒𐴧𐴗𐴝𐴘𐴠 𐴀𐴝𐴥𐴎𐴡𐴔𐴞 𐴒𐴡𐴌𐴞𐴥 𐴁𐴝𐴦𐴊𐴠 𐴕𐴠𐴥 𐴕𐴝𐴥𐴑𐴞 𐴀𐴝𐴥𐴎𐴡𐴔𐴞 𐴕𐴡 𐴒𐴡𐴌𐴞𐴥𐴁𐴝𐴌 𐴀𐴝𐴒𐴠؟ 𐴁𐴠𐴐𐴡𐴥𐴑 𐴀𐴝𐴥𐴎𐴡𐴔𐴞 𐴒𐴡𐴌𐴞𐴥 𐴁𐴝𐴦𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴥𐴎𐴡𐴔𐴞 𐴕𐴡 𐴒𐴡𐴌𐴞𐴥𐴁𐴝𐴌 𐴀𐴝𐴒𐴠.¹¹𐴉𐴡𐴌𐴠𐴎𐴝𐴘 𐴘𐴡𐴥𐴒𐴧𐴗𐴝𐴘𐴠 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴞𐴥𐴓𐴢; 𐴘𐴡𐴥𐴒𐴧𐴗𐴝𐴌 𐴇𐴠𐴥 𐴀𐴝𐴥𐴎𐴡𐴔𐴞 𐴀𐴡𐴥𐴙𐴓𐴊𐴠 𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕 𐴎𐴞𐴘𐴝𐴥𐴕𐴠 𐴊𐴝𐴈𐴝𐴤 𐴊𐴠, 𐴘𐴡𐴥𐴒𐴧𐴗𐴝 𐴀𐴝𐴥𐴎𐴡𐴔𐴞 𐴀𐴝𐴒𐴡𐴙𐴅𐴧𐴝𐴤 𐴃𐴝𐴥𐴑𐴞𐴃𐴠 𐴓𐴡𐴥𐴃𐴞 𐴘𐴡𐴥𐴒𐴧𐴗𐴝𐴌𐴠 𐴀𐴞𐴔𐴝𐴕𐴠 𐴁𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴒𐴞𐴀𐴓𐴢. 𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴟𐴘𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴌 𐴁𐴝𐴉𐴢, 𐴎𐴠𐴃𐴝𐴌𐴝𐴤𐴌𐴠 𐴀𐴝𐴥𐴎𐴡𐴔𐴞 𐴀𐴝𐴒𐴡𐴙𐴅𐴧𐴝𐴤 𐴀𐴡𐴥𐴘𐴓𐴠 𐴘𐴡 𐴀𐴞𐴔𐴝𐴕 𐴀𐴝𐴕𐴡𐴤𐴕𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴎𐴝.¹²𐴇𐴠𐴥𐴕𐴊𐴞𐴓𐴧𐴝, 𐴘𐴡𐴥𐴒𐴧𐴗𐴝 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴀𐴟𐴘𐴃𐴝𐴌𐴝𐴤𐴌 𐴀𐴡𐴥 𐴁𐴝𐴉𐴢 𐴎𐴠𐴃𐴝𐴌𐴝𐴤 𐴏𐴞𐴌𐴞𐴥𐴉𐴢 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴠𐴕𐴊𐴞𐴓𐴧𐴝 𐴀𐴞𐴔𐴝𐴕𐴠 𐴘𐴡𐴥 𐴎𐴞𐴕𐴊𐴞𐴒𐴞 𐴈𐴝𐴍𐴝 𐴎𐴞𐴘𐴝𐴥𐴕 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔𐴡𐴃𐴧𐴟 𐴀𐴝𐴥𐴎𐴡𐴔𐴞 𐴒𐴡𐴌𐴞𐴥𐴁𐴝𐴌 𐴀𐴝𐴒𐴠 𐴀𐴝𐴐𐴧𐴞𐴥𐴓𐴢.

𐴀𐴝𐴓𐴧𐴝𐴌 𐴖𐴝𐴦𐴊𐴝 𐴀𐴞𐴔𐴝𐴕𐴡𐴌 𐴊𐴟𐴖𐴝𐴌𐴝 𐴉𐴝𐴦 𐴎𐴝

¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴎𐴠 𐴖𐴝𐴦𐴊𐴝 𐴊𐴞𐴀𐴓𐴢, 𐴘𐴡𐴥𐴒𐴧𐴗𐴝 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴕𐴡𐴏𐴡𐴥𐴓𐴠 𐴀𐴠 𐴊𐴟𐴕𐴞𐴘𐴝𐴘 𐴔𐴞𐴌𐴝𐴏𐴢 𐴉𐴝𐴘𐴁𐴡 𐴈𐴡𐴀𐴘𐴢, 𐴇𐴞𐴥𐴘𐴝𐴕 𐴃𐴡 𐴘𐴡𐴥𐴒𐴧𐴗𐴝𐴘𐴠 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴉𐴝𐴘𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴞𐴔𐴝𐴕𐴠 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴌𐴞 𐴁𐴠 𐴉𐴝𐴘𐴧𐴠𐴥.¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴔𐴞𐴌𐴝𐴏𐴊𐴝𐴥𐴌 𐴀𐴡𐴥𐴘 𐴉𐴝𐴌𐴠, 𐴃𐴡𐴥𐴀𐴘𐴓𐴠 𐴃𐴡 𐴀𐴞𐴔𐴝𐴕 𐴁𐴠𐴉𐴡𐴥𐴎𐴟𐴓𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴇𐴠𐴥 𐴖𐴝𐴦𐴊𐴝𐴌 𐴇𐴡𐴕𐴡𐴤 𐴑𐴞𐴔𐴡𐴃𐴢 𐴕𐴝𐴥𐴘;¹⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴠 𐴃𐴡 𐴒𐴡𐴎𐴧𐴡𐴁𐴢 𐴀𐴠𐴥𐴕𐴝 𐴀𐴝𐴕𐴠𐴤, 𐴔𐴡𐴕𐴃𐴡𐴌 𐴎𐴠𐴍𐴠𐴥 𐴐𐴡𐴥𐴌𐴞𐴘𐴡𐴃𐴢 𐴕𐴝𐴥𐴘, 𐴇𐴠𐴥𐴍𐴠 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴣𐴒𐴝𐴌 𐴈𐴡𐴃𐴝𐴤 𐴘𐴡𐴥 𐴕𐴝𐴥𐴘.

¹⁶𐴇𐴠𐴥𐴃𐴡𐴓𐴧𐴝, 𐴇𐴠𐴥 𐴔𐴞𐴌𐴝𐴏𐴢 𐴀𐴞𐴔𐴝𐴕𐴠 𐴁𐴠 𐴉𐴝𐴦 𐴎𐴝, 𐴎𐴠𐴀𐴕𐴠 𐴇𐴞𐴥𐴘𐴝𐴕 𐴌𐴝𐴇𐴝𐴥𐴔𐴡𐴃𐴠 𐴀𐴡𐴥 𐴀𐴝𐴦𐴌 𐴇𐴠𐴥 𐴖𐴝𐴦𐴊𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴃𐴝𐴔𐴝𐴥𐴔 𐴕𐴡𐴏𐴡𐴥𐴓𐴠 𐴉𐴝𐴘𐴁𐴡 𐴊𐴠 𐴇𐴞𐴥𐴘𐴝𐴕 𐴉𐴝𐴑𐴧𐴝 𐴀𐴡𐴥; 𐴇𐴞𐴥𐴘𐴝𐴕 𐴏𐴞𐴌𐴞𐴥𐴉𐴢 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴡, 𐴁𐴡𐴥𐴓𐴑𐴠 𐴀𐴟𐴘𐴃𐴝𐴌𐴝𐴤 𐴓𐴧𐴝 𐴘𐴡𐴥 𐴎𐴠𐴃𐴝𐴌𐴝𐴤𐴃𐴧𐴟 𐴀𐴞𐴔𐴝𐴕 𐴀𐴝𐴏𐴠𐴤 𐴀𐴞𐴁𐴌𐴝𐴇𐴞𐴥𐴔𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴁𐴝𐴤 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴡𐴌 𐴁𐴝𐴉𐴢,¹⁷𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤, ”𐴀𐴝𐴀𐴛 𐴃𐴡𐴌𐴠𐴥 𐴁𐴡𐴀𐴗𐴃𐴢 𐴑𐴡𐴗𐴔𐴡𐴌 𐴁𐴝𐴉𐴢 𐴁𐴝𐴕𐴝𐴘𐴧𐴞𐴥.“ 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤𐴌 𐴕𐴡𐴎𐴡𐴌𐴡𐴃𐴢 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴎𐴞𐴁𐴝𐴤𐴌 𐴖𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴀𐴞𐴔𐴝𐴕 𐴌𐴝𐴙𐴑𐴧𐴞𐴥𐴓𐴢, 𐴘𐴝𐴥𐴕𐴞 𐴀𐴝𐴓𐴧𐴝𐴌 𐴖𐴡𐴌𐴠, 𐴎𐴞𐴁𐴝𐴤𐴘𐴠 𐴔𐴡𐴌𐴝𐴌𐴠 𐴎𐴞𐴕𐴊𐴝 𐴒𐴡𐴌𐴠𐴥 𐴀𐴠𐴊𐴧𐴠 𐴕𐴝𐴥𐴘 𐴊𐴠 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴕𐴞𐴎𐴡𐴌 𐴇𐴡𐴥𐴑𐴟𐴔𐴠 𐴉𐴡𐴘𐴊𐴝 𐴒𐴡𐴌𐴠𐴥.

¹⁸𐴀𐴞𐴁𐴌𐴝𐴇𐴞𐴥𐴔𐴠 𐴇𐴡𐴕𐴡𐴤 𐴀𐴝𐴐𐴝𐴤 𐴕𐴡 𐴃𐴝𐴥𐴑𐴞𐴓𐴠 𐴘𐴡 𐴀𐴝𐴐𐴝𐴤𐴌 𐴏𐴝𐴥𐴀𐴣𐴃𐴠 𐴀𐴞𐴔𐴝𐴕 𐴄𐴞𐴑𐴝𐴘 𐴌𐴝𐴙𐴑𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝 𐴁𐴡𐴀𐴗𐴃𐴢 𐴑𐴡𐴗𐴔𐴡𐴌 𐴁𐴝𐴉𐴢 𐴀𐴡𐴥𐴘𐴧𐴠, 𐴎𐴠𐴕𐴊𐴞𐴓𐴧𐴝 𐴘𐴡𐴥𐴒𐴧𐴗𐴝𐴌𐴠 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴑𐴞, ”𐴃𐴡𐴌 𐴕𐴡𐴏𐴡𐴥𐴓𐴢 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴀𐴡𐴥𐴘𐴁𐴡.“ ¹⁹𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝 𐴃𐴡𐴑𐴡𐴌𐴞𐴁𐴝𐴕 𐴀𐴠𐴑 𐴐𐴡𐴥𐴃𐴢 𐴁𐴡𐴏𐴡𐴥𐴌 𐴀𐴡𐴥𐴘𐴧𐴠, 𐴁𐴟𐴙𐴅𐴧𐴞𐴥𐴓𐴢 𐴊𐴠, 𐴕𐴞𐴎𐴡𐴌 𐴔𐴡𐴦𐴃𐴡𐴌 𐴀𐴡𐴑𐴃𐴡𐴥 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘 𐴀𐴝𐴦𐴌 𐴏𐴝𐴥𐴌𐴝𐴃𐴧𐴟 𐴘𐴡𐴥 𐴉𐴟𐴖𐴝 𐴎𐴡𐴌𐴔𐴡 𐴊𐴞 𐴉𐴝𐴌𐴞𐴁𐴝𐴥𐴌 𐴀𐴡𐴑𐴃𐴡𐴥 𐴀𐴝𐴌 𐴕𐴝𐴥𐴘, 𐴔𐴡𐴕𐴃𐴡𐴌 𐴃𐴡𐴀 𐴘𐴡𐴥𐴒𐴧𐴗𐴝𐴌 𐴀𐴞𐴔𐴝𐴕 𐴑𐴡𐴔𐴎𐴟𐴌 𐴕𐴡𐴥 𐴀𐴡𐴥𐴘𐴧𐴡.²⁰𐴀𐴝𐴓𐴧𐴝𐴌 𐴖𐴝𐴦𐴊𐴝𐴌 𐴁𐴝𐴦𐴁𐴟𐴃𐴠 𐴘𐴡𐴥𐴒𐴧𐴗𐴝𐴌 𐴊𐴞𐴓𐴡𐴃𐴢 𐴇𐴡𐴕𐴡𐴤 𐴐𐴡𐴥𐴑-𐴐𐴟𐴁𐴝𐴤 𐴕𐴟𐴥 𐴀𐴝𐴘𐴧𐴠𐴤, 𐴁𐴡𐴥𐴓𐴑𐴠 𐴀𐴞𐴔𐴝𐴕𐴡𐴃𐴢 𐴀𐴝𐴌𐴡𐴤 𐴔𐴡𐴎𐴁𐴟𐴃𐴢 𐴀𐴡𐴥𐴘 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴙𐴃𐴧𐴡𐴥,²¹𐴀𐴝𐴦𐴌 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴌𐴝𐴉𐴟𐴌𐴞 𐴀𐴠𐴑𐴞𐴕 𐴀𐴝𐴐𐴧𐴞𐴥𐴓𐴢 𐴊𐴠, 𐴀𐴝𐴓𐴧𐴝𐴃𐴧𐴟 𐴕𐴞𐴎𐴡𐴌 𐴖𐴝𐴦𐴊𐴝 𐴉𐴟𐴌𐴝 𐴒𐴡𐴌𐴞𐴥𐴁𐴝𐴌 𐴀𐴡𐴥 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤.²²𐴘𐴡𐴥𐴒𐴧𐴗𐴝𐴌𐴠 𐴇𐴠𐴥𐴃𐴡𐴓𐴧𐴝 𐴁𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴒𐴞𐴀𐴓𐴢.²³”𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴒𐴞𐴀𐴓𐴢“ 𐴈𐴡𐴀 𐴊𐴠 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴏𐴞𐴌𐴞𐴥𐴉𐴢 𐴘𐴡𐴥𐴒𐴧𐴗𐴝𐴓𐴧𐴝 𐴓𐴠𐴑𐴝𐴥 𐴒𐴞𐴥𐴘𐴠 𐴊𐴠 𐴕𐴡,²⁴𐴁𐴡𐴥𐴓𐴑𐴠 𐴀𐴝𐴣𐴀𐴌𐴝𐴓𐴧𐴝 𐴘𐴡𐴥. 𐴀𐴝𐴣𐴀𐴌𐴝𐴌𐴠 𐴘𐴡𐴥 𐴊𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴎𐴝𐴘𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴀𐴟𐴁𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤 𐴎𐴞𐴁𐴝𐴤𐴘𐴠 𐴀𐴞𐴏𐴝𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑𐴡𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥,²⁵𐴎𐴞𐴁𐴝𐴤𐴌𐴠 𐴀𐴝𐴣𐴀𐴌𐴝𐴌 𐴈𐴡𐴏𐴟𐴥𐴌𐴠 𐴁𐴠 𐴔𐴡𐴦𐴃𐴡𐴌 𐴀𐴝𐴥𐴃𐴡𐴃𐴢 𐴃𐴟𐴓𐴞𐴤𐴊𐴞𐴘𐴝 𐴒𐴞𐴥𐴀𐴓𐴢, 𐴀𐴝𐴦𐴌 𐴀𐴝𐴣𐴀𐴌𐴝 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴌𐴞 𐴁𐴡𐴓𐴧𐴝 𐴁𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠.

The Word for the World International

https://app.library.bible/content/87faca8b51c22590