阅读𐴌𐴡𐴔𐴞𐴀𐴡𐴥𐴓𐴢 2

𐴌𐴡𐴔𐴞𐴀𐴡𐴥𐴓𐴢2

𐴀𐴝𐴓𐴧𐴝𐴌 𐴇𐴡𐴥𐴑 𐴁𐴞𐴏𐴝𐴌

¹𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴔𐴡𐴕𐴞𐴐𐴧𐴡𐴥, 𐴃𐴟𐴘 𐴎𐴠𐴦𐴕𐴞𐴑𐴞 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴈𐴡𐴏𐴟𐴥𐴌𐴞 𐴊𐴡𐴥𐴌𐴡𐴏𐴢, 𐴃𐴡𐴌𐴃𐴧𐴟 𐴇𐴡𐴕𐴡𐴤 𐴁𐴝𐴇𐴝𐴤𐴕𐴝 𐴕𐴝𐴥𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴘 𐴎𐴞𐴘𐴝𐴥𐴕𐴡𐴓𐴧𐴝 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴈𐴡𐴏𐴟𐴥𐴌𐴞 𐴊𐴡𐴥𐴌𐴡𐴏𐴢, 𐴇𐴞𐴥𐴘𐴝𐴕 𐴃𐴡 𐴃𐴟𐴘 𐴕𐴞𐴎𐴠 𐴘𐴡𐴥 𐴒𐴡𐴌𐴞𐴥 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴈𐴡𐴏𐴟𐴥𐴌𐴁𐴡𐴕 𐴊𐴠 𐴏𐴝𐴥𐴁𐴟𐴃𐴢 𐴒𐴡𐴌𐴡𐴤𐴏𐴢.²𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴎𐴠𐴃𐴝𐴌𐴝𐴤 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔 𐴒𐴡𐴌𐴠𐴥 𐴀𐴞𐴥𐴃𐴝𐴌𐴝𐴌𐴠 𐴀𐴝𐴓𐴧𐴝𐴘𐴠 𐴏𐴡𐴥𐴘𐴧𐴞𐴌 𐴖𐴡𐴌𐴠 𐴁𐴞𐴏𐴝𐴌 𐴒𐴡𐴌𐴠𐴥.³𐴓𐴠𐴑𐴞𐴕، 𐴀𐴡𐴥 𐴔𐴡𐴕𐴞𐴐𐴧𐴡𐴥, 𐴃𐴟𐴘 𐴎𐴠𐴦𐴕𐴞𐴑𐴞 𐴀𐴠𐴑𐴞𐴤 𐴈𐴝𐴔 𐴀𐴟𐴀𐴙𐴕 𐴒𐴡𐴌𐴡𐴤𐴏𐴢 𐴎𐴞𐴀𐴕𐴡𐴓𐴧𐴝 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴈𐴡𐴏𐴟𐴥𐴌 𐴊𐴡𐴥𐴌𐴡𐴏𐴢, 𐴃𐴟𐴘 𐴀𐴝𐴓𐴧𐴝𐴌 𐴏𐴝𐴥𐴣𐴎𐴝𐴃𐴧𐴟 𐴇𐴝𐴥𐴌𐴞 𐴎𐴝𐴁𐴞𐴒𐴡𐴘 𐴁𐴡𐴥𐴓𐴞 𐴄𐴝𐴥𐴀𐴌𐴡𐴏𐴢 𐴕𐴞𐴥𐴑𐴞؟⁴𐴀𐴝𐴦𐴌 𐴕𐴝𐴥𐴑𐴞 𐴃𐴟𐴘 𐴀𐴞𐴥𐴁𐴝𐴌 𐴀𐴡𐴃𐴞 𐴔𐴠𐴀𐴌𐴁𐴝𐴕𐴞, 𐴁𐴡𐴌𐴊𐴝𐴐𐴢, 𐴀𐴠𐴊𐴧𐴠 𐴏𐴡𐴁𐴡𐴥𐴌𐴡𐴌𐴠 𐴀𐴡𐴒𐴧𐴝𐴌𐴝𐴥𐴅𐴧𐴝 𐴒𐴡𐴌𐴡𐴤𐴌 𐴊𐴠𐴥؟ 𐴃𐴟𐴘 𐴎𐴝𐴕𐴡𐴏𐴢 𐴊𐴠 𐴕𐴡 𐴕𐴠𐴥, 𐴀𐴝𐴓𐴧𐴝𐴌 𐴔𐴠𐴀𐴌𐴁𐴝𐴕𐴞𐴌 𐴔𐴡𐴑𐴏𐴡𐴥𐴃𐴢 𐴀𐴡𐴥𐴙𐴓𐴊𐴠 𐴃𐴡𐴌𐴠𐴥 𐴃𐴡𐴖𐴝𐴥 𐴒𐴡𐴌𐴝𐴥𐴌 𐴀𐴟𐴎𐴟 𐴓𐴡𐴘𐴎𐴡𐴕 𐴊𐴠𐴥؟

⁵𐴔𐴡𐴕𐴃𐴡𐴌 𐴃𐴡𐴌 𐴊𐴞𐴓𐴢 𐴃𐴡 𐴊𐴡𐴌𐴡𐴤, 𐴃𐴡𐴌𐴃𐴧𐴟 𐴃𐴡𐴖𐴝𐴥 𐴒𐴡𐴌𐴞𐴥𐴁𐴝𐴌 𐴊𐴞𐴓𐴢 𐴕𐴝𐴥𐴘; 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴃𐴟𐴘 𐴕𐴞𐴎𐴡𐴌 𐴓𐴧𐴝 𐴒𐴡𐴎𐴧𐴡𐴁𐴢 𐴎𐴡𐴔𐴝 𐴒𐴡𐴌𐴡𐴤𐴌, 𐴀𐴡 𐴊𐴞𐴕𐴡𐴓𐴧𐴝 𐴎𐴠 𐴊𐴞𐴕 𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴢 𐴕𐴝𐴎𐴞𐴓𐴢 𐴀𐴡𐴥𐴘𐴁𐴡 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴇𐴡𐴥𐴑 𐴁𐴞𐴏𐴝𐴌 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡.⁶𐴀𐴞𐴥𐴁𐴝𐴘𐴠 𐴃𐴡 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴕𐴞𐴎𐴡𐴌-𐴕𐴞𐴎𐴡𐴌 𐴈𐴝𐴔 𐴔𐴡𐴎𐴞𐴕 𐴁𐴡𐴊𐴡𐴓𐴝 𐴊𐴞𐴁𐴡: ⁷𐴎𐴠𐴃𐴝𐴌𐴝𐴤 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴒𐴡𐴔 𐴈𐴝𐴔 𐴒𐴡𐴌𐴞𐴥-𐴒𐴡𐴌𐴞𐴥 𐴔𐴡𐴈𐴞𐴥𐴔𐴝, 𐴀𐴞𐴎𐴧𐴡𐴃𐴢 𐴀𐴠𐴊𐴧𐴠 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴎𐴞𐴕𐴊𐴞𐴒𐴞 𐴉𐴝𐴘𐴁𐴝𐴌 𐴃𐴝𐴓𐴝𐴐𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴘𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴊𐴞𐴦𐴁𐴡;⁸𐴔𐴡𐴕𐴃𐴡𐴌 𐴎𐴠𐴃𐴝𐴌𐴝𐴤 𐴏𐴞𐴌𐴞𐴥𐴉𐴢 𐴕𐴞𐴎𐴡𐴌 𐴉𐴝𐴥𐴘𐴊𐴝 𐴃𐴟𐴖𐴝 𐴀𐴝𐴦𐴌 𐴏𐴡𐴥𐴘𐴧𐴞 𐴒𐴝𐴥𐴕 𐴕𐴡 𐴔𐴝𐴕𐴠 𐴁𐴡𐴥𐴓𐴑𐴠 𐴑𐴟𐴈𐴝𐴔𐴡𐴌 𐴉𐴞𐴏𐴝𐴥 𐴊𐴡𐴌𐴠, 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴀𐴞𐴥𐴁𐴝𐴘𐴠 𐴒𐴡𐴎𐴧𐴡𐴁𐴢 𐴀𐴠𐴊𐴧𐴠 𐴓𐴝𐴀𐴕𐴡𐴃𐴢 𐴕𐴝𐴎𐴞𐴓𐴢 𐴒𐴡𐴌𐴞𐴥𐴁𐴡.⁹𐴑𐴟𐴈𐴝𐴔 𐴒𐴡𐴌𐴠𐴥 𐴊𐴠 𐴉𐴡𐴃𐴧𐴞𐴥 𐴀𐴞𐴕𐴏𐴝𐴥𐴕𐴡𐴌 𐴖𐴡𐴌𐴠 𐴔𐴡𐴏𐴞𐴁𐴡𐴃𐴢 𐴀𐴠𐴊𐴧𐴠 𐴀𐴡𐴐𐴝𐴥𐴕𐴃𐴞 𐴀𐴝𐴘𐴁𐴡𐴤, 𐴀𐴝𐴒𐴠 𐴘𐴡𐴇𐴟𐴥𐴊𐴞𐴌 𐴖𐴡𐴌𐴠 𐴘𐴝𐴥𐴌𐴁𐴝𐴦𐴊𐴠 𐴁𐴠𐴘𐴡𐴇𐴟𐴥𐴊𐴞𐴌 𐴖𐴡𐴌𐴠;¹⁰𐴔𐴡𐴕𐴃𐴡𐴌 𐴒𐴡𐴔 𐴈𐴝𐴔 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥 𐴀𐴠𐴑𐴎𐴡𐴕𐴠 𐴔𐴡𐴈𐴞𐴥𐴔𐴝, 𐴀𐴞𐴎𐴧𐴡𐴃𐴢, 𐴀𐴠𐴊𐴧𐴠 𐴐𐴝𐴥𐴕𐴃𐴞 𐴉𐴝𐴘𐴁𐴡, 𐴀𐴝𐴒𐴠 𐴘𐴡𐴇𐴟𐴥𐴊𐴞𐴘𐴠 𐴘𐴝𐴥𐴌𐴁𐴝𐴦𐴊𐴠 𐴁𐴠𐴘𐴡𐴇𐴟𐴥𐴊𐴞 𐴘𐴠.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴃𐴡 𐴀𐴠𐴑𐴃𐴡𐴌𐴉𐴞𐴥𐴘𐴝 𐴕𐴡 𐴒𐴡𐴌𐴠𐴥.

¹²𐴎𐴠𐴊𐴟𐴥𐴕𐴠 𐴐𐴡𐴥𐴌𐴞𐴘𐴡𐴃𐴢 𐴕𐴡 𐴉𐴝𐴘 𐴒𐴟𐴕𐴝𐴤 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝 𐴊𐴡𐴥𐴚𐴐𐴡 𐴀𐴡𐴥𐴘𐴁𐴡 𐴊𐴠 𐴘𐴡𐴥 𐴐𐴡𐴥𐴌𐴞𐴘𐴡𐴃𐴢 𐴏𐴝𐴥𐴌𐴝; 𐴀𐴝𐴦𐴌 𐴎𐴠𐴊𐴟𐴥𐴕𐴠 𐴐𐴡𐴥𐴌𐴞𐴘𐴡𐴃𐴢 𐴉𐴝𐴘 𐴒𐴟𐴕𐴝𐴤 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴐𐴡𐴥𐴌𐴞𐴘𐴡𐴃𐴢 𐴓𐴡𐴥𐴘 𐴁𐴠 𐴁𐴞𐴏𐴝𐴌 𐴒𐴡𐴌𐴝𐴥 𐴎𐴝𐴘𐴁𐴡;¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴉𐴡𐴌𐴇𐴠𐴥𐴏𐴒𐴝𐴌 𐴃𐴡 𐴐𐴡𐴥𐴌𐴞𐴘𐴡𐴃𐴡𐴌 𐴁𐴡𐴘𐴧𐴝𐴕 𐴉𐴟𐴥𐴕𐴠 𐴊𐴠 𐴀𐴞𐴥𐴃𐴝𐴌𐴝 𐴕𐴡, 𐴁𐴡𐴥𐴓𐴑𐴠 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴁𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴝𐴥 𐴎𐴝𐴘𐴁𐴡.¹⁴𐴁𐴠𐴐𐴡𐴥𐴑, 𐴐𐴡𐴥𐴌𐴞𐴘𐴡𐴃𐴢 𐴕𐴝𐴥𐴘 𐴊𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴣𐴃𐴧𐴠𐴥 𐴕𐴞𐴎𐴡𐴌 𐴉𐴞𐴥𐴃𐴡𐴌𐴡𐴃𐴠 𐴈𐴝𐴔 𐴀𐴟𐴀𐴙𐴕 𐴒𐴡𐴌𐴠𐴥 𐴎𐴞𐴀𐴕 𐴐𐴡𐴥𐴌𐴞𐴘𐴡𐴃𐴡𐴃𐴢 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝𐴃𐴧𐴟 𐴐𐴡𐴥𐴌𐴞𐴘𐴡𐴃𐴢 𐴕𐴡 𐴃𐴝𐴥𐴑𐴞𐴓𐴠 𐴘𐴡 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴓𐴧𐴝 𐴕𐴞𐴎𐴠 𐴐𐴡𐴥𐴌𐴞𐴘𐴡𐴃𐴢.¹⁵𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴏𐴝𐴥𐴁𐴟𐴃𐴢 𐴒𐴡𐴌𐴠𐴥 𐴊𐴠, 𐴐𐴡𐴥𐴌𐴞𐴘𐴡𐴃𐴡𐴌 𐴐𐴡𐴌𐴡𐴥𐴃𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴃𐴝𐴌𐴝𐴌 𐴊𐴞𐴓𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤. 𐴇𐴠𐴥𐴕𐴊𐴞𐴓𐴧𐴝 𐴁𐴡𐴥𐴓𐴞 𐴀𐴞𐴥𐴃𐴝𐴌𐴝𐴌 𐴇𐴠𐴥𐴓𐴡𐴔𐴠 𐴘𐴡𐴥 𐴒𐴡𐴁𐴝𐴤 𐴊𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌 𐴁𐴝𐴥𐴉𐴝𐴕𐴞𐴘𐴠 𐴃𐴝𐴥𐴘𐴃𐴝𐴘 𐴀𐴞𐴥𐴃𐴝𐴌𐴝𐴌 𐴈𐴡𐴏𐴟𐴥𐴌 𐴊𐴠 𐴀𐴝𐴦𐴌 𐴃𐴝𐴥𐴘𐴃𐴝𐴘 𐴀𐴞𐴥𐴃𐴝𐴌𐴝𐴌 𐴏𐴡𐴥𐴉𐴝𐴘 𐴊𐴠.¹⁶𐴇𐴞𐴥𐴀𐴕 𐴀𐴡 𐴊𐴞𐴕 𐴀𐴡𐴥𐴘𐴁𐴡 𐴎𐴠 𐴊𐴞𐴕 𐴀𐴝𐴓𐴧𐴝𐴘𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴝𐴥𐴃𐴝 𐴀𐴞𐴕𐴏𐴝𐴥𐴕𐴡𐴌 𐴒𐴟𐴉𐴡𐴕𐴞 𐴀𐴡𐴥𐴑𐴧𐴡𐴓𐴡𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴡. 𐴇𐴠𐴥 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴊𐴠 𐴑𐴟𐴥𐴐𐴈𐴡𐴥𐴁𐴡𐴌𐴡𐴃𐴢 𐴀𐴝𐴏𐴠𐴤.

𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴐𐴡𐴥𐴌𐴞𐴘𐴡𐴃𐴢

¹⁷𐴁𐴠𐴐𐴡𐴥𐴑 𐴃𐴟𐴘 𐴃𐴡 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴘𐴡𐴇𐴟𐴥𐴊𐴞 𐴈𐴡𐴀𐴏𐴢, 𐴀𐴝𐴦𐴌 𐴐𐴡𐴥𐴌𐴞𐴘𐴡𐴃𐴡𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴒𐴡𐴌𐴡𐴤𐴏𐴢 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴈𐴝𐴥𐴀𐴏𐴢 𐴁𐴡𐴕𐴊𐴝 𐴁𐴡𐴓𐴞 𐴉𐴡𐴇𐴡𐴥𐴌𐴝𐴘 𐴒𐴡𐴌𐴡𐴤𐴏𐴢;¹⁸𐴃𐴟𐴘 𐴐𐴡𐴥𐴌𐴞𐴘𐴡𐴃𐴡𐴃𐴧𐴟 𐴃𐴝𐴦𐴓𐴞𐴔 𐴉𐴝𐴘𐴧𐴡𐴥𐴏𐴢 𐴀𐴞𐴥𐴏𐴝𐴉𐴠 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴎𐴝𐴕𐴡𐴏𐴢, 𐴀𐴝𐴦𐴌 𐴏𐴡𐴥𐴘𐴧𐴞 𐴒𐴝𐴥𐴕 𐴁𐴝𐴏𐴞𐴥 𐴎𐴝𐴕𐴡𐴏𐴢;¹⁹𐴃𐴟𐴘 𐴉𐴟𐴌𐴝𐴉𐴟𐴌𐴞 𐴄𐴝𐴥𐴀𐴌𐴡𐴏𐴢 𐴊𐴠, 𐴃𐴟𐴘 𐴀𐴡𐴥𐴘𐴓𐴞𐴊𐴠 𐴀𐴝𐴣𐴊𐴝𐴤 𐴀𐴡𐴥𐴑𐴧𐴡𐴓𐴡𐴌 𐴉𐴡𐴣𐴃𐴢 𐴊𐴝𐴈𐴡𐴥𐴘𐴝, 𐴀𐴝𐴕𐴊𐴝𐴤𐴌𐴡𐴃𐴢 𐴀𐴝𐴏𐴠𐴤 𐴊𐴠 𐴀𐴞𐴥𐴃𐴝𐴌𐴝𐴓𐴧𐴝 𐴀𐴠𐴑𐴧𐴝𐴥𐴕 𐴉𐴡𐴀𐴌,²⁰𐴉𐴡𐴦𐴓𐴢 𐴀𐴡𐴥𐴑𐴧𐴡𐴓𐴡𐴌 𐴀𐴠𐴥𐴎𐴧𐴡𐴕 𐴃𐴡𐴌𐴁𐴞𐴘𐴡𐴃𐴊𐴡𐴘𐴝, 𐴀𐴝𐴦𐴌 𐴕𐴝𐴁𐴝𐴓𐴡𐴑 𐴀𐴡𐴥𐴑𐴧𐴡𐴓𐴡𐴌 𐴀𐴠𐴥𐴎𐴧𐴡𐴕 𐴀𐴟𐴏𐴃𐴝𐴃𐴢; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌 𐴁𐴝𐴥𐴉𐴝 𐴀𐴡𐴥𐴙𐴓𐴊𐴠, 𐴐𐴡𐴥𐴌𐴞𐴘𐴡𐴃𐴡𐴃𐴢 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌 𐴎𐴝𐴕𐴑𐴝𐴌𐴞 𐴀𐴠𐴊𐴧𐴠 𐴏𐴡𐴥𐴘𐴧𐴞 𐴀𐴝𐴏𐴠𐴤.²¹𐴃𐴡𐴥𐴀𐴘𐴓𐴠, 𐴃𐴟𐴘 𐴎𐴠𐴦𐴕𐴞𐴑𐴞 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴐𐴞𐴥𐴑𐴧𐴝 𐴊𐴡𐴥𐴏𐴢, 𐴃𐴟𐴘 𐴕𐴞𐴎𐴡𐴌𐴠𐴥 𐴐𐴞𐴥𐴑𐴧𐴝 𐴊𐴡𐴥𐴏𐴢 𐴕𐴠𐴥؟ 𐴃𐴟𐴘 𐴎𐴠𐴦𐴕𐴞𐴑𐴞 𐴏𐴟𐴌𐴞 𐴕𐴡 𐴒𐴡𐴙𐴅𐴧𐴡𐴥 𐴈𐴡𐴀𐴘𐴢 𐴖𐴝𐴀𐴎𐴢 𐴒𐴡𐴌𐴡𐴤𐴏𐴢, 𐴃𐴟𐴘 𐴇𐴡𐴥𐴕𐴡 𐴏𐴟𐴌𐴞 𐴒𐴡𐴌𐴡𐴤𐴏𐴢 𐴕𐴠𐴥؟²²𐴃𐴟𐴘 𐴎𐴠𐴦𐴕𐴞𐴑𐴞 𐴎𐴠𐴕𐴝𐴤 𐴕𐴡 𐴒𐴡𐴙𐴃𐴧𐴡𐴥 𐴈𐴡𐴀𐴏𐴢, 𐴃𐴟𐴘 𐴇𐴡𐴥𐴕𐴡 𐴎𐴠𐴕𐴝𐴤 𐴒𐴡𐴌𐴡𐴤𐴏𐴢 𐴕𐴠𐴥؟ 𐴃𐴟𐴘 𐴎𐴠𐴦𐴕𐴞𐴑𐴞 𐴔𐴟𐴃𐴧𐴞 𐴀𐴡𐴥𐴑𐴧𐴡𐴓𐴡𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴡𐴤𐴏𐴢, 𐴃𐴟𐴘 𐴇𐴡𐴥𐴕𐴡 𐴔𐴡𐴕𐴊𐴞𐴌𐴡𐴃𐴧𐴟 𐴏𐴟𐴌𐴞 𐴒𐴡𐴌𐴡𐴤𐴏𐴢 𐴕𐴠𐴥؟²³𐴃𐴟𐴘 𐴎𐴠𐴦𐴕𐴞𐴑𐴞 𐴐𐴡𐴥𐴌𐴞𐴘𐴡𐴃𐴢 𐴓𐴡𐴥𐴘 𐴁𐴡𐴌𐴝𐴥𐴘 𐴒𐴡𐴌𐴡𐴤𐴏𐴢, 𐴃𐴟𐴘 𐴇𐴡𐴥𐴕𐴡 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴞 𐴀𐴝𐴓𐴧𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴡𐴤𐴏𐴢 𐴕𐴠𐴥؟²⁴𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴃𐴟𐴣𐴀𐴝𐴥𐴌𐴝𐴌 𐴏𐴡𐴓𐴝𐴏𐴡𐴓𐴢 𐴊𐴠𐴑𐴞𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴓𐴧𐴝𐴌 𐴕𐴝𐴔𐴡𐴌 𐴑𐴟𐴉𐴠𐴥𐴌𐴞 𐴒𐴡𐴌𐴠𐴥𐴌.“

²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴁𐴠𐴐𐴡𐴥𐴑 𐴃𐴡𐴌 𐴀𐴝𐴥𐴎𐴡𐴔𐴞𐴌 𐴑𐴞𐴔𐴡𐴃𐴢 𐴀𐴝𐴏𐴠𐴤 𐴎𐴡𐴊𐴞 𐴃𐴟𐴘 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴡𐴤𐴏𐴢, 𐴔𐴡𐴕𐴃𐴡𐴌 𐴎𐴡𐴊𐴞 𐴃𐴟𐴘 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴡𐴘𐴝 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴃𐴡𐴌 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥 𐴀𐴝𐴥𐴎𐴡𐴔𐴞 𐴕𐴡𐴥 𐴒𐴡𐴌𐴡𐴤𐴏𐴢 𐴉𐴝𐴥𐴕 𐴀𐴡𐴥𐴘𐴒𐴞𐴘𐴡𐴘.²⁶𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴠 𐴐𐴡𐴥𐴌𐴞𐴘𐴡𐴃𐴡𐴌 𐴊𐴝𐴁𐴞-𐴊𐴝𐴖𐴝 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴠 𐴑𐴞𐴥 𐴀𐴝𐴓𐴧𐴝𐴘𐴠 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴁𐴡𐴥𐴓𐴞 𐴕𐴡 𐴒𐴡𐴕𐴞𐴁𐴡𐴥 𐴕𐴠𐴥؟²⁷𐴃𐴟𐴣𐴀𐴝𐴥𐴌𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴈𐴡𐴏𐴟𐴥𐴌 𐴊𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴓𐴠𐴙𐴑𐴧𐴝𐴥 𐴐𐴡𐴥𐴌𐴞𐴘𐴡𐴃𐴢 𐴃𐴝𐴥𐴑𐴞 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴔𐴝𐴕𐴟𐴥𐴙𐴐𐴢 𐴀𐴡𐴥𐴘 𐴁𐴝𐴦𐴊𐴠 𐴀𐴟𐴥𐴊𐴧𐴗𐴝 𐴃𐴟𐴣𐴀𐴝𐴥𐴌𐴝 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴡, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴃𐴡 𐴅𐴞𐴏𐴞𐴥𐴔𐴡𐴃𐴢 𐴀𐴝𐴥𐴎𐴡𐴔𐴞 𐴕𐴡 𐴒𐴡𐴌𐴠𐴥 𐴊𐴠 𐴀𐴡𐴥𐴘𐴓𐴠 𐴘𐴡 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥.²⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴡𐴥𐴓𐴢 𐴘𐴡𐴇𐴟𐴥𐴊𐴞 𐴃𐴡 𐴀𐴟𐴘𐴃𐴠 𐴕𐴡 𐴎𐴠𐴦𐴕𐴞𐴑𐴞 𐴏𐴞𐴌𐴞𐴥𐴉𐴢 𐴘𐴡𐴇𐴟𐴥𐴊𐴞 𐴑𐴟𐴥𐴖𐴝𐴓𐴝, 𐴀𐴝𐴦𐴌 𐴀𐴝𐴏𐴡𐴥𐴓𐴢 𐴀𐴝𐴥𐴎𐴡𐴔𐴞 𐴃𐴡 𐴖𐴝𐴀𐴕 𐴕𐴡 𐴎𐴞𐴘𐴝𐴥𐴕 𐴅𐴞𐴏𐴞𐴥𐴔 𐴈𐴝𐴍𐴞 𐴁𐴝𐴀𐴃𐴧𐴟 𐴒𐴡𐴌𐴝𐴥 𐴎𐴝.²⁹𐴁𐴡𐴥𐴓𐴑𐴠 𐴀𐴝𐴏𐴡𐴥𐴓𐴢 𐴘𐴡𐴇𐴟𐴥𐴊𐴞 𐴀𐴡𐴥𐴙𐴓𐴊𐴠 𐴀𐴟𐴘𐴃𐴠 𐴎𐴠𐴦𐴕𐴞𐴑𐴞 𐴊𐴞𐴓𐴡𐴃𐴧𐴟 𐴘𐴡𐴇𐴟𐴥𐴊𐴞; 𐴀𐴝𐴦𐴌 𐴀𐴝𐴏𐴡𐴥𐴓𐴢 𐴀𐴝𐴥𐴎𐴡𐴔𐴞 𐴀𐴡𐴥𐴙𐴓𐴊𐴠 𐴖𐴝𐴀𐴕 𐴎𐴞𐴘𐴝𐴥𐴕 𐴀𐴝𐴓𐴧𐴝𐴌 𐴌𐴟𐴀𐴌 𐴊𐴟𐴖𐴝𐴌𐴝 𐴊𐴞𐴓𐴡𐴃𐴢 𐴒𐴡𐴌𐴝𐴥 𐴎𐴝, 𐴓𐴠𐴙𐴑𐴧𐴝𐴥 𐴐𐴡𐴥𐴌𐴞𐴘𐴡𐴃𐴡𐴌 𐴊𐴟𐴖𐴝𐴌𐴝 𐴕𐴡. 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴠 𐴃𐴝𐴦𐴌𐴞𐴉𐴢 𐴉𐴝𐴦 𐴊𐴠 𐴀𐴞𐴕𐴏𐴝𐴥𐴕𐴡𐴌 𐴃𐴡𐴌𐴉𐴡𐴥𐴃𐴧𐴟 𐴕𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟.

The Word for the World International

https://app.library.bible/content/87faca8b51c22590