阅读𐴌𐴡𐴔𐴞𐴀𐴡𐴥𐴓𐴢 12

𐴌𐴡𐴔𐴞𐴀𐴡𐴥𐴓𐴢12

𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴕𐴡𐴘𐴝 𐴎𐴞𐴕𐴊𐴞𐴒𐴞

¹𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴓𐴧𐴝𐴌 𐴔𐴠𐴀𐴌𐴁𐴝𐴕𐴞𐴌𐴠 𐴘𐴝𐴦𐴊𐴢 𐴒𐴡𐴌𐴝𐴥𐴘𐴊𐴞 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝𐴌 𐴒𐴝𐴦𐴌𐴠 𐴎𐴞𐴕𐴊𐴝, 𐴂𐴝𐴑 𐴀𐴠𐴊𐴧𐴠 𐴑𐴡𐴁𐴟𐴓𐴊𐴝𐴥𐴌 𐴑𐴟𐴌𐴁𐴝𐴕𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴂𐴠𐴦𐴐𐴢 𐴒𐴡𐴌𐴡𐴤; 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴃𐴟𐴣𐴀𐴝𐴥𐴌𐴝𐴌 𐴏𐴡𐴥𐴘𐴧𐴞 𐴀𐴠𐴁𐴝𐴦𐴊𐴡𐴃𐴢.²𐴀𐴠 𐴊𐴟𐴕𐴞𐴘𐴝𐴙𐴌 𐴑𐴡𐴉𐴞𐴥𐴘𐴡𐴃𐴢 𐴕𐴡 𐴓𐴡𐴘𐴧𐴡𐴥, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡𐴘𐴝 𐴊𐴠𐴔𐴝𐴑 𐴊𐴞𐴦𐴘𐴡𐴌𐴠 𐴀𐴝𐴓𐴧𐴝𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴊𐴡𐴙𐴓𐴃𐴡 𐴊𐴡. 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴎𐴝𐴕𐴞 𐴉𐴝𐴌𐴞𐴁𐴝𐴥, 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴑𐴞𐴦, 𐴒𐴡𐴔 𐴑𐴞𐴦, 𐴑𐴡𐴁𐴟𐴓𐴊𐴝𐴥𐴌 𐴑𐴞𐴦, 𐴀𐴠𐴊𐴧𐴠 𐴇𐴝𐴥𐴄𐴞 𐴑𐴞𐴦.

³𐴀𐴝𐴣𐴀𐴌𐴠𐴥 𐴊𐴞𐴦𐴘𐴝 𐴒𐴞𐴘𐴠𐴥 𐴊𐴠 𐴃𐴡𐴖𐴉𐴞𐴥𐴑𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴈𐴡𐴀𐴙𐴌, 𐴕𐴞𐴎𐴡𐴌𐴠𐴥 𐴎𐴠𐴃𐴧𐴡𐴥𐴌 𐴁𐴝𐴥𐴉𐴡𐴕 𐴏𐴝𐴥, 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴕𐴡 𐴁𐴝𐴥𐴉𐴞𐴘𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴘𐴠 𐴎𐴝𐴌𐴠𐴥 𐴎𐴠𐴊𐴧𐴟𐴥𐴌 𐴀𐴞𐴔𐴝𐴕 𐴊𐴞𐴦𐴘𐴠𐴥, 𐴇𐴠𐴥 𐴔𐴡𐴎𐴞𐴕 𐴕𐴞𐴎𐴡𐴌𐴠𐴥 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴁𐴝𐴥𐴉𐴡.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴝𐴃𐴧𐴟 𐴀𐴠𐴑𐴧𐴝𐴥𐴕 𐴒𐴝𐴦𐴃𐴢 𐴁𐴡𐴀𐴗𐴃𐴢 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴈𐴝𐴔 𐴀𐴠𐴑 𐴋𐴡𐴙𐴓𐴧𐴝 𐴕𐴡,⁵𐴇𐴠𐴥𐴕𐴊𐴞𐴓𐴧𐴝, 𐴀𐴝𐴣𐴀𐴌𐴝 𐴁𐴞𐴐𐴞𐴤 𐴊𐴠 𐴀𐴡𐴥𐴘𐴓𐴠 𐴘𐴡, 𐴀𐴝𐴣𐴀𐴌𐴝 𐴃𐴡 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴏𐴞𐴌𐴞𐴥𐴉𐴢 𐴀𐴠𐴑 𐴒𐴝𐴦, 𐴀𐴝𐴦𐴌 𐴀𐴝𐴣𐴀𐴌𐴝 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕 𐴁𐴝𐴎𐴝𐴥𐴘𐴧𐴝 𐴀𐴝𐴏𐴞𐴤.⁶𐴀𐴝𐴣𐴀𐴌𐴝 𐴃𐴡 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴠 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴝𐴘𐴧𐴞𐴥. 𐴎𐴡𐴊𐴞 𐴀𐴝𐴣𐴀𐴌𐴝𐴌 𐴕𐴞𐴘𐴝𐴔𐴡𐴃𐴢 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥𐴁𐴝𐴌 𐴊𐴠 𐴀𐴡𐴥𐴘𐴓𐴠, 𐴀𐴞𐴔𐴝𐴕𐴡𐴌 𐴔𐴟𐴃𐴝𐴁𐴠𐴑 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴞𐴥;⁷𐴎𐴡𐴊𐴞 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥𐴁𐴝𐴌 𐴊𐴠 𐴀𐴡𐴥𐴘𐴓𐴠, 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥. 𐴎𐴠𐴦𐴕𐴞𐴑𐴞 𐴃𐴝𐴦𐴓𐴞𐴔 𐴊𐴞𐴁𐴝𐴌 𐴕𐴞𐴘𐴝𐴔𐴡𐴃𐴢 𐴉𐴝𐴘𐴧𐴡𐴥, 𐴀𐴞𐴥𐴃𐴠 𐴃𐴝𐴦𐴓𐴞𐴔 𐴊𐴡;⁸𐴎𐴠𐴦𐴕𐴞𐴑𐴞 𐴅𐴡𐴏𐴁𐴝 𐴊𐴞𐴁𐴝𐴌 𐴉𐴝𐴘𐴧𐴡𐴥, 𐴀𐴞𐴥𐴃𐴠 𐴅𐴡𐴏𐴁𐴝 𐴊𐴡; 𐴎𐴠𐴦𐴕𐴞𐴑𐴞 𐴏𐴡𐴥𐴃𐴑𐴝 𐴒𐴡𐴌𐴞𐴥𐴁𐴝𐴌 𐴉𐴝𐴘𐴧𐴡𐴥, 𐴀𐴞𐴥𐴃𐴠 𐴊𐴞𐴓𐴑𐴟𐴥𐴓𐴝 𐴒𐴡𐴥𐴌𐴞 𐴏𐴡𐴥𐴃𐴑𐴝 𐴒𐴡𐴌𐴡𐴤; 𐴎𐴠𐴦𐴕𐴞𐴑𐴞 𐴏𐴡𐴥𐴊𐴧𐴝𐴌𐴞 𐴒𐴡𐴌𐴞𐴥𐴁𐴝𐴌 𐴉𐴝𐴘𐴧𐴡𐴥, 𐴀𐴞𐴥𐴃𐴠 𐴊𐴞𐴥𐴘𐴝𐴕𐴡𐴌 𐴏𐴝𐴥𐴀𐴣𐴃𐴠 𐴏𐴡𐴥𐴊𐴧𐴝𐴌𐴞 𐴒𐴡𐴌𐴡𐴤; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴌𐴝𐴇𐴝𐴥𐴔 𐴒𐴡𐴌𐴞𐴥𐴁𐴝𐴌 𐴉𐴝𐴘𐴧𐴡𐴥, 𐴀𐴞𐴥𐴃𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴌𐴝𐴇𐴝𐴥𐴔 𐴒𐴡𐴌𐴡𐴤.

𐴀𐴞𐴏𐴝𐴤𐴘𐴞 𐴎𐴞𐴕𐴊𐴞𐴒𐴞𐴌 𐴕𐴞𐴘𐴡𐴔

⁹𐴔𐴟𐴕𐴝𐴉𐴠𐴥𐴑𐴞 𐴏𐴝𐴥𐴌𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴡𐴥. 𐴈𐴡𐴥𐴌𐴝𐴉𐴞𐴌𐴠 𐴒𐴞𐴥𐴕 𐴒𐴡𐴙𐴅𐴧𐴡𐴥; 𐴎𐴞𐴘𐴝𐴥𐴕 𐴒𐴡𐴔 𐴇𐴞𐴥𐴘𐴝𐴕 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴊𐴡𐴥𐴌𐴞 𐴃𐴝𐴥𐴙𐴑𐴧𐴡.¹⁰𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴁𐴝𐴥𐴘𐴧𐴝𐴓𐴞 𐴔𐴟𐴇𐴝𐴥𐴁𐴧𐴡𐴃𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴡𐴥; 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴕𐴞𐴎𐴡𐴌 𐴃𐴟𐴥𐴖𐴝𐴌𐴡 𐴀𐴞𐴎𐴧𐴡𐴃𐴢 𐴊𐴞𐴘𐴡;¹¹𐴀𐴝𐴓𐴐𐴞𐴤 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴌𐴟𐴀𐴈𐴝𐴥𐴕𐴞𐴌 𐴅𐴡𐴏𐴁𐴝𐴌 𐴏𐴝𐴥𐴀𐴣𐴃𐴠 𐴔𐴝𐴓𐴞𐴑𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴙𐴅𐴧𐴡𐴥;¹²𐴀𐴝𐴐𐴝𐴤𐴘𐴠 𐴑𐴟𐴥𐴐𐴞 𐴃𐴝𐴥𐴙𐴑𐴧𐴡, 𐴔𐴡𐴏𐴞𐴁𐴡𐴃𐴡𐴃𐴢 𐴏𐴡𐴁𐴡𐴥𐴌 𐴒𐴡𐴙𐴅𐴧𐴡𐴥, 𐴕𐴞𐴃𐴧𐴞 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴃𐴝𐴥𐴙𐴑𐴧𐴡;¹³𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴎𐴡𐴌𐴟𐴌𐴡𐴃𐴡𐴃𐴢 𐴉𐴡𐴙𐴓𐴧𐴠 𐴏𐴝𐴣𐴊𐴝 𐴊𐴞𐴦𐴘𐴡; 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴙𐴅𐴧𐴡𐴥.

¹⁴𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴟𐴓𐴟𐴥𐴔 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴓𐴧𐴝 𐴁𐴡𐴌𐴈𐴡𐴃𐴢 𐴔𐴝𐴒𐴞𐴘𐴡𐴥; 𐴀𐴡𐴥𐴘, 𐴒𐴡𐴎𐴧𐴡𐴁𐴢 𐴕𐴡, 𐴁𐴡𐴌𐴈𐴡𐴃𐴢 𐴔𐴝𐴒𐴞𐴘𐴡𐴥.¹⁵𐴎𐴠𐴃𐴝𐴌𐴝𐴤 𐴑𐴟𐴥𐴐𐴞 𐴒𐴡𐴌𐴠𐴥𐴌, 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞 𐴒𐴡𐴌𐴞𐴥𐴘𐴡; 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴠𐴥𐴌, 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴞𐴥𐴘𐴡.¹⁶𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴀𐴠𐴑 𐴑𐴞𐴥𐴘𐴝𐴓𐴠 𐴏𐴝𐴘𐴧𐴡𐴥. 𐴉𐴡𐴇𐴡𐴥𐴌𐴝𐴘 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴕𐴞𐴌𐴡𐴥𐴐𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴔𐴞𐴘𐴝𐴥𐴘-𐴎𐴟𐴖𐴝𐴘 𐴏𐴡𐴓𐴞𐴘𐴡𐴥. 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴁𐴟𐴊𐴧𐴞𐴥𐴔𐴝𐴕 𐴕𐴡 𐴄𐴝𐴥𐴀𐴌𐴞𐴘𐴡.

¹⁷𐴇𐴡𐴕𐴡𐴤𐴑𐴞𐴘𐴡𐴌𐴠 𐴁𐴟𐴌𐴝𐴙𐴌 𐴁𐴡𐴊𐴡𐴓𐴢 𐴁𐴟𐴌𐴝𐴘 𐴕𐴡 𐴒𐴡𐴙𐴅𐴧𐴡𐴥. 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴕𐴡𐴎𐴡𐴌𐴡𐴃𐴢 𐴎𐴞𐴘𐴝𐴥𐴕 𐴏𐴡𐴥𐴘𐴧𐴞 𐴇𐴞𐴥𐴘𐴝𐴕 𐴒𐴡𐴙𐴃𐴧𐴡𐴥 𐴊𐴞𐴥𐴘𐴝𐴕 𐴊𐴞𐴥𐴘𐴡.¹⁸𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴓𐴡𐴥𐴘 𐴐𐴝𐴥𐴕𐴃𐴞𐴃𐴢 𐴃𐴝𐴥𐴑𐴞 𐴁𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴃𐴡𐴌𐴉𐴡𐴥𐴃𐴧𐴟 𐴎𐴠𐴊𐴧𐴟𐴥𐴌 𐴉𐴝𐴌𐴡 𐴇𐴠𐴥𐴊𐴧𐴟𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴡𐴥.¹⁹𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴕𐴞𐴎𐴠𐴁𐴝𐴎𐴠 𐴁𐴡𐴊𐴡𐴓𐴝 𐴕𐴡 𐴓𐴡𐴘𐴧𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴡𐴓𐴧𐴝 𐴔𐴡𐴦𐴗𐴑𐴝 𐴌𐴝𐴙𐴑𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴔𐴝𐴁𐴟𐴊𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴌, ”𐴁𐴡𐴊𐴡𐴓𐴝 𐴓𐴡𐴕 𐴀𐴝𐴣𐴀𐴌 𐴈𐴝𐴔, 𐴀𐴝𐴀𐴛 𐴉𐴟𐴥𐴣𐴎𐴝𐴘𐴧𐴟𐴔.“ ²⁰𐴘𐴝𐴥𐴌𐴁𐴡𐴊𐴡𐴓𐴢,”𐴃𐴟𐴣𐴀𐴝𐴥𐴣𐴌 𐴊𐴟𐴐𐴧𐴡𐴕𐴡𐴃𐴧𐴟 𐴁𐴟𐴥𐴑 𐴓𐴝𐴒𐴞𐴓𐴠𐴥, 𐴀𐴞𐴥𐴃𐴝𐴌𐴠 𐴈𐴝𐴥𐴕𐴝 𐴊𐴡𐴦;𐴃𐴞𐴌𐴝𐴥𐴐𐴢 𐴓𐴝𐴒𐴞𐴓𐴠𐴥, 𐴀𐴞𐴥𐴃𐴝𐴌𐴠 𐴉𐴝𐴕𐴞𐴥 𐴊𐴡𐴦.𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥𐴓𐴠 𐴃𐴡 𐴃𐴟𐴀𐴛 𐴀𐴞𐴥𐴃𐴝𐴌 𐴔𐴝𐴃𐴝𐴥𐴌 𐴖𐴡𐴌𐴠 𐴎𐴡𐴓𐴠𐴌 𐴊𐴠 𐴇𐴡𐴘𐴓𐴝𐴌 𐴄𐴝𐴓𐴢 𐴃𐴟𐴓𐴞𐴤𐴊𐴞𐴘𐴡 𐴉𐴝𐴥𐴕 𐴀𐴡𐴥𐴘𐴁𐴡.“

²¹𐴁𐴟𐴌𐴝𐴘𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴃𐴞 𐴀𐴝𐴘𐴃𐴡𐴤 𐴕𐴡 𐴊𐴞𐴘𐴡𐴥, 𐴁𐴡𐴥𐴓𐴑𐴠 𐴁𐴝𐴥𐴓𐴝𐴘 𐴓𐴡𐴥𐴘 𐴁𐴟𐴌𐴝𐴘𐴌𐴠 𐴎𐴞𐴃𐴞 𐴀𐴝𐴙𐴐𐴧𐴡𐴥.

The Word for the World International

https://app.library.bible/content/87faca8b51c22590