𐴌𐴡𐴔𐴞𐴀𐴡𐴥𐴓𐴢11
𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴝𐴏𐴝𐴘 𐴌𐴝𐴑𐴝𐴤
1𐴃𐴡𐴥𐴘 𐴀𐴝𐴌𐴡𐴤 𐴀𐴝𐴣𐴀𐴌 𐴏𐴟𐴥𐴖𐴝𐴓𐴢 𐴀𐴡𐴥𐴙𐴓𐴊𐴠, 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴁𐴝𐴏𐴞𐴥𐴓𐴡𐴘𐴧𐴝 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠 𐴊𐴠 𐴕𐴠𐴥؟ 𐴁𐴞𐴓𐴑𐴟𐴥𐴓𐴢 𐴕𐴡! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴊𐴠 𐴀𐴠𐴥𐴎𐴧𐴡𐴕 𐴀𐴞𐴏𐴌𐴝𐴥𐴙𐴓𐴞; 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴕𐴡𐴏𐴡𐴥𐴓𐴢, 𐴀𐴝𐴦𐴌 𐴁𐴞𐴕𐴘𐴝𐴔𐴞𐴕𐴡𐴌 𐴈𐴝𐴥𐴀𐴕𐴊𐴝𐴕𐴡𐴌 𐴔𐴝𐴕𐴟𐴥𐴙𐴐𐴢.2𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴁𐴡𐴕𐴊𐴝 𐴎𐴠𐴃𐴝𐴌𐴝𐴤𐴌𐴠 𐴀𐴝𐴒𐴠 𐴓𐴡𐴥𐴃𐴞 𐴁𐴝𐴏𐴞𐴥 𐴌𐴝𐴙𐴑𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴠. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴕𐴡𐴁𐴞 𐴀𐴠𐴓𐴞𐴘𐴝𐴏𐴡𐴌 𐴁𐴝𐴦𐴁𐴟𐴃𐴠 𐴑𐴞𐴦 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥؟ 𐴘𐴡𐴥𐴒𐴧𐴗𐴝𐴘𐴠 𐴃𐴡 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴌 𐴀𐴟𐴓𐴋𐴝 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴠𐴕𐴊𐴞𐴓𐴧𐴝 𐴁𐴞𐴏𐴝𐴌 𐴊𐴞𐴀𐴓𐴢,3”𐴀𐴡𐴥 𐴔𐴝𐴁𐴟𐴊𐴢, 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴣𐴌 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠 𐴀𐴝𐴦𐴌 𐴃𐴟𐴣𐴀𐴝𐴥𐴣𐴌 𐴑𐴟𐴌𐴁𐴝𐴕𐴞-𐴒𐴝𐴥𐴣 𐴀𐴡𐴥𐴑𐴧𐴡𐴓𐴢 𐴁𐴝𐴥𐴚𐴒𐴞𐴉𐴠𐴓𐴝𐴘𐴧𐴠. 𐴀𐴝𐴀𐴛 𐴀𐴠𐴑𐴎𐴡𐴕 𐴁𐴠 𐴁𐴝𐴏𐴞 𐴀𐴝𐴏𐴞𐴤 𐴊𐴠, 𐴘𐴝𐴓𐴝 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴎𐴝𐴕 𐴓𐴡𐴘𐴃𐴡 𐴘𐴡𐴥 𐴃𐴝𐴓𐴝𐴐𐴢 𐴒𐴡𐴌𐴠𐴥𐴌.“ 4𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴑𐴞𐴦 𐴎𐴟𐴖𐴝𐴁𐴢 𐴊𐴞𐴀𐴓؟ 𐴘𐴝𐴀𐴕𐴝, ”𐴀𐴝𐴀𐴛 𐴕𐴞𐴎𐴡𐴌 𐴓𐴧𐴝 𐴇𐴝𐴥𐴣𐴃𐴢 𐴀𐴝𐴥𐴎𐴝𐴌 𐴔𐴝𐴕𐴟𐴥𐴙𐴐𐴢 𐴌𐴝𐴑𐴞𐴥𐴊𐴞𐴘𐴞, 𐴎𐴠𐴃𐴝𐴌𐴝𐴤 𐴁𐴝𐴦𐴓𐴢 𐴊𐴠𐴁𐴡𐴃𐴝𐴌 𐴇𐴝𐴣𐴏𐴠 𐴀𐴝𐴣𐴍𐴟𐴥 𐴕𐴡𐴥 𐴉𐴠𐴓𐴝.“ 5𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴀𐴠𐴇𐴡𐴥𐴕𐴡𐴌 𐴀𐴡𐴑𐴃𐴡𐴥𐴃𐴢 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴃𐴝𐴥𐴑𐴞𐴒𐴞𐴘𐴡𐴘, 𐴎𐴠𐴃𐴝𐴌𐴝𐴤𐴌𐴠 𐴀𐴝𐴓𐴧𐴝𐴘𐴠 𐴌𐴝𐴇𐴝𐴥𐴔𐴡𐴃𐴠 𐴁𐴝𐴏𐴞𐴥 𐴌𐴝𐴙𐴑𐴧𐴠𐴥.6𐴀𐴝𐴦𐴌 𐴇𐴞𐴥𐴘𐴝𐴕 𐴎𐴠𐴃𐴧𐴡𐴥𐴃𐴢 𐴌𐴝𐴇𐴝𐴥𐴔𐴡𐴃𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴃𐴡 𐴇𐴡𐴕𐴡𐴤 𐴀𐴝𐴔𐴡𐴥𐴓𐴠 𐴕𐴡; 𐴎𐴡𐴊𐴞 𐴀𐴝𐴔𐴡𐴥𐴓𐴠 𐴀𐴡𐴥𐴘𐴃𐴡, 𐴃𐴡𐴥𐴀𐴘𐴓𐴠 𐴃𐴡 𐴌𐴝𐴇𐴝𐴥𐴔𐴡𐴃𐴢 𐴀𐴝𐴌 𐴌𐴝𐴇𐴝𐴥𐴔𐴡𐴃𐴢 𐴕𐴡 𐴃𐴝𐴥𐴑𐴞𐴃𐴡.7𐴃𐴡𐴥𐴀𐴘𐴓𐴠 𐴕𐴡𐴃𐴞𐴎𐴝 𐴑𐴞𐴦؟ 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴎𐴞𐴘𐴝𐴥𐴕𐴡𐴌 𐴃𐴝𐴓𐴝𐴐𐴢 𐴒𐴡𐴙𐴅𐴧𐴞𐴥𐴓𐴢 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝 𐴇𐴝𐴥𐴏𐴞𐴓𐴢 𐴕𐴡𐴥 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴃𐴧𐴟 𐴎𐴠𐴃𐴝𐴌𐴝𐴤𐴌𐴠 𐴁𐴝𐴏𐴞𐴥𐴓𐴡𐴖𐴝 𐴒𐴞𐴥𐴘𐴠 𐴀𐴞𐴥𐴃𐴝𐴌𐴝 𐴁𐴠 𐴇𐴞𐴥𐴘𐴝𐴕 𐴇𐴝𐴥𐴏𐴞𐴓𐴢 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴁𐴝𐴊𐴁𐴝𐴑𐴞 𐴒𐴟𐴥𐴕𐴡𐴌 𐴊𐴞𐴓𐴢 𐴊𐴡𐴌𐴡𐴤 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠.8𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠,”𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴀𐴕 𐴏𐴟𐴥𐴇𐴝𐴌𐴝𐴘𐴧𐴝 𐴒𐴡𐴌𐴞𐴥𐴉𐴠𐴓𐴝𐴘𐴧𐴠,𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴏𐴟𐴑𐴠𐴤 𐴕𐴡 𐴊𐴠𐴑𐴠𐴥𐴌,𐴀𐴝𐴦𐴌 𐴈𐴝𐴕𐴠 𐴕𐴡 𐴉𐴟𐴥𐴕𐴠𐴌.“ 9𐴊𐴝𐴖𐴟𐴊𐴠 𐴈𐴡𐴘𐴧𐴠𐴥 𐴊𐴠,”𐴀𐴞𐴥𐴃𐴝𐴌𐴝𐴌 𐴔𐴠𐴓𐴝-𐴐𐴡𐴥𐴁𐴝 𐴀𐴡𐴥𐴑𐴧𐴡𐴓𐴢 𐴀𐴞𐴥𐴃𐴝𐴌𐴝𐴓𐴧𐴝𐴐𐴞𐴥𐴘𐴝𐴌𐴞𐴌 𐴎𐴝𐴓𐴢 𐴀𐴠𐴊𐴧𐴠 𐴉𐴝𐴥𐴕 𐴁𐴡𐴕𐴞𐴎𐴡𐴒𐴧𐴡𐴘;𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴔𐴡𐴏𐴞𐴁𐴡𐴃𐴢 𐴀𐴝𐴘𐴧𐴡𐴤𐴑,𐴀𐴝𐴦𐴌 𐴕𐴞𐴎𐴡𐴌 𐴈𐴡𐴥𐴌𐴝𐴉𐴢 𐴈𐴝𐴔𐴡𐴌 𐴏𐴝𐴥𐴣𐴎𐴝 𐴉𐴡𐴗𐴑.10𐴀𐴞𐴥𐴃𐴝𐴌𐴝𐴌 𐴏𐴟𐴑 𐴀𐴝𐴣𐴊𐴝𐴤 𐴀𐴡𐴥𐴘𐴎𐴡𐴒𐴧𐴡𐴘,𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴕𐴡 𐴊𐴠𐴑𐴠𐴥;𐴀𐴞𐴥𐴃𐴝𐴌𐴝 𐴇𐴝𐴥𐴔𐴞𐴐𐴝𐴓𐴧𐴝 𐴒𐴟𐴎𐴝 𐴀𐴡𐴥𐴘𐴎𐴡𐴒𐴧𐴡𐴘.“ 11𐴀𐴝𐴁𐴝𐴌 𐴀𐴝𐴣𐴀𐴌 𐴏𐴟𐴥𐴖𐴝𐴓𐴢 𐴀𐴡𐴥𐴙𐴓𐴊𐴠, 𐴀𐴞𐴥𐴃𐴝𐴌𐴝 𐴇𐴠𐴥 𐴀𐴟𐴅𐴝𐴥𐴄𐴢 𐴇𐴝𐴥𐴘𐴧𐴠 𐴊𐴠 𐴇𐴝𐴥𐴔𐴞𐴐𐴝𐴓𐴧𐴝 𐴉𐴡𐴌𐴞 𐴁𐴡𐴓𐴧𐴝 𐴕𐴠𐴥؟ 𐴁𐴞𐴓𐴑𐴟𐴥𐴓𐴢 𐴕𐴡. 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝𐴌 𐴕𐴝𐴉𐴡𐴥𐴌𐴔𐴝𐴕𐴞𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴕𐴠𐴅𐴝𐴃𐴢 𐴉𐴝𐴘𐴁𐴝𐴌 𐴔𐴡𐴦𐴗𐴑𐴝 𐴊𐴞𐴘𐴠𐴥 𐴊𐴠, 𐴎𐴠𐴀𐴕𐴠 𐴇𐴠𐴥 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴒𐴝𐴘𐴌𐴡𐴃𐴢 𐴓𐴝𐴒𐴠.12𐴇𐴠𐴥 𐴇𐴝𐴥𐴓𐴡𐴃𐴠 𐴁𐴟𐴎𐴝𐴥 𐴎𐴝 𐴊𐴠, 𐴀𐴞𐴥𐴃𐴝𐴌𐴝𐴌 𐴕𐴝𐴉𐴡𐴥𐴌𐴔𐴝𐴕𐴞𐴘𐴠 𐴎𐴠𐴃𐴧𐴡𐴥𐴃𐴢 𐴊𐴟𐴕𐴞𐴘𐴝𐴘 𐴓𐴧𐴝 𐴁𐴡𐴀𐴗𐴃𐴢 𐴉𐴝𐴥𐴘𐴊𐴝 𐴀𐴡𐴥𐴘𐴧𐴠 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴓𐴟𐴏𐴧𐴝𐴥𐴕𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴡𐴀𐴗𐴃𐴢 𐴉𐴝𐴥𐴘𐴊𐴝 𐴀𐴡𐴥𐴘𐴧𐴠, 𐴃𐴡𐴥𐴘 𐴁𐴝𐴏𐴝𐴥𐴃𐴢 𐴔𐴝𐴥𐴎𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴐𐴝𐴥𐴔𐴞𐴓𐴢 𐴃𐴝𐴥𐴑𐴞𐴓𐴠 𐴀𐴝𐴌𐴡𐴤 𐴇𐴡𐴃𐴡𐴥 𐴉𐴝𐴥𐴘𐴊𐴝 𐴀𐴡𐴥𐴘𐴁𐴡 𐴉𐴝𐴥𐴣𐴓𐴧𐴝𐴌!𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴕𐴠𐴅𐴝𐴃𐴢
13𐴀𐴡𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌 𐴊𐴠. 𐴀𐴝𐴣𐴀𐴌𐴠𐴥 𐴎𐴠𐴃𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴏𐴝𐴥𐴇𐴝𐴁𐴞 𐴁𐴝𐴕𐴝 𐴒𐴞𐴘𐴠𐴥, 𐴀𐴝𐴀𐴛 𐴀𐴝𐴣𐴀𐴌 𐴇𐴠𐴥 𐴎𐴞𐴔𐴧𐴝𐴌𐴠 𐴁𐴞𐴐𐴞𐴤 𐴀𐴞𐴎𐴧𐴡𐴃𐴢 𐴊𐴞,14𐴎𐴠𐴀𐴕𐴠 𐴇𐴡𐴕𐴡𐴤 𐴁𐴡𐴃𐴠 𐴀𐴝𐴀𐴛 𐴀𐴝𐴣𐴀𐴌 𐴑𐴡𐴗𐴔𐴡𐴌𐴠 𐴒𐴝𐴘𐴌𐴡𐴃𐴢 𐴃𐴟𐴓𐴞𐴤𐴊𐴞, 𐴀𐴞𐴥𐴃𐴝𐴌𐴝𐴃𐴧𐴟 𐴇𐴡𐴊𐴟𐴥𐴕𐴡𐴌𐴠 𐴕𐴠𐴅𐴝𐴃𐴢 𐴉𐴝 𐴁𐴝𐴘 𐴉𐴝𐴌𐴞.15𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴞𐴥𐴘𐴝𐴕𐴠 𐴎𐴠𐴃𐴧𐴡𐴥𐴃𐴢 𐴀𐴝𐴓𐴧𐴝 𐴓𐴧𐴡𐴘 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴡𐴌 𐴁𐴡𐴕𐴡𐴃𐴢 𐴀𐴡𐴥𐴘𐴒𐴞𐴘𐴡𐴘, 𐴃𐴡𐴥𐴘 𐴀𐴞𐴥𐴃𐴝𐴌𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴞𐴥𐴁𐴡 𐴊𐴠 𐴇𐴞𐴥𐴘𐴝𐴕𐴠 𐴑𐴞𐴦 𐴀𐴡𐴥𐴘𐴁𐴡 𐴉𐴝𐴥𐴣𐴓𐴧𐴝𐴌؟ 𐴇𐴞𐴥𐴘𐴝𐴕 𐴃𐴡 𐴔𐴡𐴌𐴝 𐴔𐴝𐴕𐴟𐴥𐴙𐴐𐴢 𐴎𐴞𐴕𐴊𐴝 𐴀𐴡𐴥𐴌 𐴉𐴝𐴥𐴕 𐴀𐴡𐴥𐴘𐴁𐴡!16𐴎𐴠 𐴉𐴡𐴀𐴘𐴓𐴝 𐴌𐴟𐴄𐴞 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴂𐴠𐴦𐴐𐴢 𐴒𐴡𐴌𐴝𐴥 𐴒𐴞𐴥𐴘𐴠, 𐴇𐴠𐴥 𐴌𐴟𐴄𐴞 𐴂𐴝𐴑 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴌𐴟𐴄𐴞 𐴁𐴠𐴒𐴧𐴟𐴥𐴕 𐴂𐴝𐴑. 𐴒𐴝𐴏𐴡𐴌 𐴐𐴞𐴥𐴛𐴡𐴌 𐴂𐴝𐴑 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴂𐴝𐴑.17𐴊𐴡𐴥𐴌𐴡, 𐴀𐴠𐴑 𐴎𐴝𐴘𐴃𐴟𐴕-𐴒𐴝𐴏𐴡𐴃𐴧𐴟 𐴑𐴠𐴏𐴧𐴟𐴥 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴢 𐴁𐴝𐴥𐴚𐴒𐴞𐴉𐴠𐴓𐴝 𐴒𐴞𐴥𐴘𐴠, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴎𐴝𐴒𐴝𐴃𐴢 𐴔𐴝𐴎𐴠 𐴃𐴟𐴣𐴀𐴝𐴥𐴌𐴝 𐴅𐴡𐴚𐴒𐴡𐴓𐴞 𐴎𐴝𐴘𐴃𐴟𐴕-𐴒𐴝𐴏𐴡𐴌 𐴑𐴠𐴏𐴧𐴟𐴥 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴟𐴌𐴝𐴊𐴞𐴘𐴝 𐴒𐴞𐴘𐴠𐴥, 𐴀𐴝𐴦𐴌 𐴀𐴝𐴏𐴡𐴥𐴓𐴢 𐴎𐴝𐴘𐴃𐴟𐴕-𐴒𐴝𐴏𐴡𐴌 𐴐𐴞𐴥𐴛𐴡𐴌𐴡𐴃𐴧𐴟 𐴌𐴡𐴐𐴢 𐴄𐴝𐴕𐴞 𐴓𐴡𐴦𐴌.18𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴇𐴠𐴥 𐴋𐴠𐴥𐴀𐴘𐴓𐴝 𐴒𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴝𐴌𐴞𐴥𐴑 𐴁𐴡𐴥𐴓𐴞 𐴕𐴡 𐴄𐴝𐴥𐴀𐴌𐴞𐴘𐴡, 𐴎𐴡𐴊𐴞 𐴄𐴝𐴥𐴀𐴌𐴡, 𐴔𐴡𐴕𐴡𐴃𐴢 𐴌𐴝𐴑𐴞𐴥𐴘𐴡 𐴊𐴠, 𐴃𐴟𐴣𐴀𐴝𐴥𐴌𐴝 𐴐𐴞𐴥𐴛𐴡𐴌𐴡𐴌𐴠 𐴄𐴞𐴑𐴝𐴘 𐴌𐴝𐴑𐴡𐴥𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌𐴠 𐴐𐴞𐴥𐴛𐴡𐴌𐴠 𐴄𐴞𐴑𐴝𐴘 𐴌𐴝𐴑𐴠𐴥𐴌 𐴊𐴠.19𐴀𐴡𐴥𐴘𐴃𐴡𐴉𐴝𐴌𐴠 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴝𐴤, ”𐴇𐴠𐴥 𐴋𐴠𐴥𐴀𐴘𐴓𐴝 𐴒𐴟𐴥𐴕 𐴁𐴝𐴥𐴣𐴒𐴝 𐴒𐴞𐴥𐴘𐴠 𐴊𐴠, 𐴀𐴝𐴣𐴀𐴌𐴠𐴥 𐴇𐴞𐴥𐴀𐴕𐴡𐴌 𐴎𐴝𐴒𐴝𐴃𐴢 𐴎𐴟𐴌𐴝 𐴊𐴞 𐴁𐴡𐴓𐴧𐴝.“20𐴁𐴠𐴐𐴡𐴥𐴑 𐴏𐴡𐴥𐴘𐴧𐴞. 𐴇𐴞𐴥𐴀𐴕𐴡𐴌𐴠 𐴃𐴡 𐴀𐴞𐴔𐴝𐴕 𐴎𐴝𐴌𐴞 𐴕𐴡 𐴌𐴝𐴑𐴝𐴤𐴌 𐴎𐴡𐴌𐴞𐴘𐴝 𐴀𐴠𐴥𐴕𐴝 𐴁𐴝𐴥𐴚𐴒𐴞𐴉𐴠𐴓𐴝 𐴒𐴞𐴥𐴘𐴠, 𐴔𐴡𐴕𐴃𐴡𐴌 𐴃𐴟𐴀𐴛 𐴇𐴠𐴥 𐴎𐴝𐴒𐴝𐴃𐴢 𐴀𐴞𐴔𐴝𐴕𐴠 𐴁𐴠 𐴄𐴞𐴑𐴞 𐴀𐴝𐴏𐴡𐴤. 𐴇𐴞𐴥𐴘𐴝𐴕 𐴓𐴡𐴥𐴘 𐴉𐴡𐴇𐴡𐴥𐴌𐴝𐴘 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴋𐴡𐴦𐴌 𐴌𐴝𐴑𐴡𐴥;21𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴎𐴠𐴃𐴧𐴡𐴥𐴃𐴢 𐴀𐴝𐴏𐴡𐴥𐴓𐴞 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴡𐴌𐴠 𐴁𐴝𐴏𐴝𐴘 𐴕𐴡𐴥 𐴌𐴝𐴑𐴠𐴥, 𐴀𐴞𐴥𐴁𐴝𐴘𐴠 𐴃𐴡 𐴃𐴟𐴣𐴀𐴝𐴥𐴣𐴌𐴠 𐴘𐴡𐴥 𐴁𐴝𐴏𐴝𐴘 𐴕𐴡 𐴌𐴝𐴑𐴞𐴥𐴁𐴡.22𐴇𐴠𐴥𐴃𐴡𐴓𐴧𐴝 𐴏𐴡𐴀, 𐴀𐴝𐴓𐴧𐴝 𐴑𐴠𐴀𐴕 𐴔𐴠𐴀𐴌𐴁𐴝𐴕 𐴀𐴝𐴦𐴌 𐴑𐴠𐴀𐴕 𐴈𐴡𐴌𐴝: 𐴎𐴠𐴃𐴝𐴌𐴝𐴤 𐴉𐴡𐴌𐴞𐴒𐴞𐴘𐴡𐴥𐴘 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴀𐴞𐴥𐴁𐴝 𐴁𐴞𐴐𐴞𐴤 𐴈𐴡𐴌𐴝, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴀𐴞𐴥𐴁𐴝 𐴔𐴠𐴀𐴌𐴁𐴝𐴕; 𐴇𐴠𐴥 𐴔𐴠𐴀𐴌𐴁𐴝𐴕𐴞 𐴀𐴡𐴃𐴡𐴥𐴊𐴞𐴕 𐴃𐴝𐴥𐴑𐴞𐴁𐴡 𐴎𐴠𐴃𐴡𐴥𐴊𐴞𐴕 𐴃𐴟𐴀𐴛 𐴀𐴞𐴥𐴁𐴝𐴌 𐴔𐴠𐴀𐴌𐴁𐴝𐴕𐴞𐴃𐴢 𐴓𐴝𐴒𐴞 𐴃𐴝𐴥𐴑𐴡. 𐴀𐴝𐴌𐴕𐴡𐴥𐴘𐴓𐴠 𐴃𐴟𐴣𐴀𐴝𐴥𐴣𐴌𐴠 𐴘𐴡𐴥 𐴈𐴝𐴍𐴞𐴉𐴠𐴥𐴓𐴝 𐴎𐴝𐴘𐴁𐴡.23𐴀𐴝𐴦𐴌 𐴇𐴠𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴎𐴡𐴊𐴞 𐴀𐴝𐴁𐴝𐴌 𐴀𐴞𐴔𐴝𐴕 𐴀𐴝𐴕𐴠𐴤, 𐴀𐴞𐴥𐴃𐴝𐴌𐴝𐴌𐴠 𐴕𐴞𐴎𐴡𐴌 𐴒𐴝𐴏𐴡𐴃𐴢 𐴀𐴝𐴁𐴝𐴌 𐴎𐴟𐴌𐴝𐴊𐴞𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴀𐴝𐴁𐴝𐴌 𐴎𐴟𐴌𐴝 𐴊𐴞 𐴉𐴝𐴌𐴠.24𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴊𐴠 𐴀𐴠𐴥𐴒𐴧𐴗𐴝 𐴅𐴡𐴚𐴒𐴡𐴓𐴞 𐴎𐴝𐴘𐴃𐴟𐴕-𐴒𐴝𐴏𐴡𐴌 𐴀𐴝𐴏𐴡𐴥𐴓𐴞 𐴋𐴠𐴥𐴀𐴘𐴓𐴝, 𐴎𐴞𐴁𐴝𐴤𐴌𐴠 𐴈𐴝𐴍𐴞 𐴓𐴡𐴦𐴘𐴢 𐴕𐴞𐴎𐴡𐴌 𐴎𐴝𐴃𐴡𐴌 𐴀𐴟𐴓𐴋𐴝 𐴀𐴞𐴥𐴏𐴝𐴉𐴠 𐴁𐴝𐴒𐴝𐴕𐴡𐴌 𐴎𐴝𐴘𐴃𐴟𐴕-𐴒𐴝𐴏𐴡𐴃𐴢 𐴎𐴟𐴌𐴝𐴊𐴞𐴘𐴝 𐴒𐴞𐴘𐴠𐴥. 𐴃𐴡𐴥𐴘 𐴁𐴝𐴥𐴉𐴞𐴏𐴡, 𐴎𐴞𐴀𐴕 𐴇𐴠𐴥 𐴁𐴝𐴒𐴝𐴕 𐴒𐴝𐴏𐴡𐴌 𐴀𐴝𐴏𐴡𐴥𐴓𐴞 𐴋𐴠𐴥𐴀𐴘𐴓𐴝 𐴀𐴝𐴏𐴠𐴤, 𐴇𐴞𐴥𐴀𐴕𐴡𐴌𐴠 𐴕𐴞𐴎𐴡𐴌 𐴒𐴝𐴏𐴡𐴃𐴢 𐴀𐴝𐴁𐴝𐴌 𐴎𐴟𐴌𐴝 𐴊𐴞𐴃𐴠 𐴇𐴡𐴃𐴡𐴥 𐴀𐴝𐴏𐴝𐴤𐴕 𐴀𐴡𐴥𐴘𐴁𐴡!𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴢 𐴁𐴠𐴒𐴧𐴟𐴥𐴕 𐴀𐴡𐴓𐴧𐴝
25𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴎𐴠𐴊𐴧𐴟𐴥𐴌 𐴕𐴡 𐴇𐴠𐴥𐴊𐴧𐴟𐴌 𐴒𐴞𐴘𐴝𐴕𐴞 𐴁𐴡𐴓𐴞 𐴕𐴡 𐴄𐴝𐴥𐴀𐴌𐴞 𐴁𐴡𐴓𐴧𐴝, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠 𐴒𐴟𐴉𐴡𐴕 𐴏𐴡𐴥𐴘𐴧𐴞 𐴒𐴝𐴥𐴕 𐴎𐴝𐴕𐴝𐴘𐴊𐴞𐴌, 𐴑𐴞 𐴈𐴡𐴘𐴓𐴠𐴥, 𐴁𐴡𐴀𐴗𐴃𐴢 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴌 𐴊𐴞𐴓𐴢 𐴀𐴡𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴊𐴡𐴌𐴡𐴤 𐴃𐴝𐴥𐴑𐴞𐴁𐴡 𐴎𐴠𐴃𐴡𐴥𐴊𐴞𐴕 𐴁𐴝𐴙𐴐𐴧𐴝𐴥 𐴁𐴠𐴘𐴡𐴇𐴟𐴥𐴊𐴞 𐴁𐴠𐴒𐴧𐴟𐴥𐴕𐴠 𐴕𐴠𐴅𐴝𐴃𐴢 𐴕𐴡𐴥 𐴉𐴝𐴦;26𐴀𐴝𐴦𐴌 𐴇𐴠𐴥𐴀𐴕𐴒𐴡𐴌𐴞 𐴃𐴝𐴔𐴝𐴥𐴔 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡, 𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,”𐴏𐴞𐴥𐴘𐴡𐴕𐴡𐴃𐴧𐴟 𐴌𐴠𐴇𐴝𐴥𐴘-𐴒𐴡𐴌𐴡𐴤𐴘𐴝 𐴀𐴝𐴘𐴁𐴡𐴤,𐴀𐴞𐴥𐴁𐴝𐴘𐴠 𐴘𐴝𐴑𐴟𐴁𐴡𐴌 𐴕𐴡𐴏𐴡𐴥𐴓𐴡𐴃𐴧𐴟 𐴃𐴝𐴔𐴝𐴥𐴔 𐴁𐴠𐴊𐴞𐴕𐴞 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘𐴁𐴡.27𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴇𐴞𐴥𐴘𐴝𐴕 𐴀𐴡𐴥𐴘𐴁𐴡 𐴊𐴠 𐴀𐴝𐴣𐴀𐴌 𐴌𐴝𐴎𐴞𐴕𐴝𐴔𐴝,𐴎𐴠𐴣𐴃𐴧𐴠𐴥 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴢 𐴊𐴟𐴌 𐴒𐴡𐴌𐴞𐴥𐴘𐴟𐴔.“ 28𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴇𐴠𐴥 𐴌𐴟𐴥𐴖𐴝𐴃𐴠 𐴃𐴟𐴣𐴀𐴝𐴥𐴌𐴝𐴌 𐴉𐴝𐴥𐴘𐴊𐴝𐴓𐴧𐴝 𐴀𐴞𐴥𐴃𐴝𐴌𐴝 𐴃𐴡 𐴀𐴝𐴓𐴧𐴝𐴌 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴢, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴁𐴝𐴏𐴝𐴥𐴌 𐴇𐴠𐴥 𐴌𐴟𐴥𐴖𐴝𐴃𐴠 𐴁𐴝𐴉𐴊𐴝𐴊𐴝 𐴒𐴟𐴥𐴕𐴡𐴌 𐴎𐴡𐴌𐴞𐴘𐴝 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴀𐴝𐴊𐴡𐴌𐴁𐴡𐴕 𐴀𐴡𐴥𐴑𐴧𐴡𐴓𐴢;29𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴎𐴠 𐴕𐴞𐴘𐴝𐴔𐴡𐴃𐴢 𐴊𐴠𐴦 𐴀𐴠𐴊𐴧𐴠 𐴎𐴞𐴘𐴝𐴥𐴕𐴡𐴓𐴧𐴝 𐴋𐴝𐴑𐴠, 𐴇𐴞𐴥𐴀𐴕𐴡𐴓𐴧𐴝 𐴀𐴞𐴥𐴁𐴝𐴌 𐴔𐴡𐴕 𐴁𐴡𐴊𐴡𐴓𐴞 𐴕𐴡 𐴎𐴝𐴒𐴡𐴥𐴘.30𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴠𐴑 𐴇𐴝𐴓𐴠 𐴀𐴝𐴓𐴧𐴝𐴌 𐴕𐴝𐴉𐴡𐴥𐴌𐴔𐴝𐴕 𐴀𐴝𐴐𐴧𐴞𐴥𐴓𐴝, 𐴔𐴡𐴕𐴃𐴡𐴌 𐴘𐴝𐴓𐴝 𐴀𐴞𐴥𐴃𐴝𐴌𐴝𐴌 𐴕𐴝𐴉𐴡𐴥𐴌𐴔𐴝𐴕𐴞𐴌 𐴎𐴡𐴌𐴞𐴘𐴝 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴝𐴥 𐴒𐴞𐴥𐴘𐴠,31𐴇𐴠𐴥𐴕𐴊𐴞𐴓𐴧𐴝, 𐴀𐴞𐴥𐴃𐴝𐴌𐴝 𐴘𐴡𐴥 𐴘𐴝𐴓𐴝 𐴕𐴝𐴉𐴡𐴥𐴌𐴔𐴝𐴕 𐴁𐴡𐴕𐴞 𐴀𐴝𐴏𐴠𐴤, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴘𐴡𐴥 𐴌𐴝𐴇𐴝𐴥𐴔 𐴒𐴡𐴌𐴝𐴥 𐴎𐴝.32𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴁𐴠𐴒𐴧𐴟𐴥𐴕𐴡𐴌𐴠 𐴃𐴡 𐴕𐴝𐴉𐴡𐴥𐴌𐴔𐴝𐴕𐴞𐴃𐴢 𐴁𐴡𐴕 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴞𐴥 𐴉𐴝𐴌𐴠.33𐴀𐴝𐴓𐴧𐴝𐴌 𐴊𐴡𐴥𐴕-𐴊𐴡𐴓𐴡𐴃𐴢 𐴇𐴡𐴃𐴡𐴥 𐴁𐴞𐴐𐴞𐴤! 𐴀𐴞𐴥𐴁𐴝𐴌 𐴒𐴞𐴘𐴝𐴕 𐴀𐴠𐴊𐴧𐴠 𐴁𐴟𐴊𐴧𐴞𐴥 𐴇𐴡𐴃𐴡𐴥 𐴔𐴟𐴌!𐴀𐴞𐴥𐴁𐴝𐴌 𐴉𐴝𐴥𐴘𐴏𐴠𐴓𐴝𐴌𐴠 𐴁𐴟𐴎𐴞𐴥 𐴉𐴝𐴌𐴝 𐴕𐴡 𐴎𐴝.𐴀𐴞𐴥𐴁𐴝𐴘𐴠 𐴎𐴞𐴀𐴕 𐴒𐴡𐴌𐴠𐴥 𐴇𐴞𐴥𐴀𐴕 𐴁𐴟𐴎𐴞𐴥 𐴉𐴝𐴌𐴞𐴁𐴝𐴥𐴌 𐴌𐴝𐴀 𐴕𐴝𐴥𐴘.34𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴇𐴡𐴕𐴠 𐴔𐴝𐴁𐴟𐴊𐴡𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞 𐴉𐴝𐴌𐴠؟𐴀𐴞𐴥𐴁𐴝𐴌𐴠 𐴔𐴡𐴐𐴖𐴝𐴌𐴝 𐴊𐴞𐴁𐴝𐴌 𐴓𐴝𐴦𐴘𐴠𐴑 𐴇𐴡𐴕 𐴀𐴝𐴏𐴠𐴤؟“ 35”𐴀𐴞𐴥𐴁𐴝𐴌𐴠 𐴇𐴡𐴕𐴠 𐴑𐴞𐴦 𐴊𐴞𐴀𐴓𐴢 𐴊𐴠 𐴀𐴝𐴏𐴠𐴤,𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴁𐴝𐴃𐴧𐴟 𐴀𐴞𐴥𐴃𐴝𐴌𐴠 𐴉𐴟𐴥𐴣𐴎𐴝𐴘 𐴊𐴞𐴥𐴘𐴝 𐴉𐴡𐴙𐴃𐴧𐴡؟“ 36𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴃𐴡 𐴀𐴞𐴥𐴁𐴝𐴘𐴠 𐴀𐴠𐴥𐴕𐴝 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴄𐴞𐴑𐴞 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝𐴌 𐴎𐴡𐴌𐴞𐴘𐴝 𐴀𐴠𐴊𐴧𐴠 𐴀𐴞𐴥𐴁𐴝𐴓𐴧𐴝.𐴀𐴞𐴥𐴁𐴝𐴌 𐴃𐴝𐴦𐴌𐴞𐴉𐴢 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴀𐴡𐴥𐴖𐴝𐴃𐴢 𐴃𐴝𐴥𐴑𐴡𐴗𐴑. 𐴀𐴝𐴦𐴔𐴞𐴕.The Word for the World International