Read 𐴌𐴡𐴔𐴞𐴀𐴡𐴥𐴓𐴢 13

𐴌𐴡𐴔𐴞𐴀𐴡𐴥𐴓𐴢13

𐴇𐴡𐴥𐴑𐴟𐴔𐴡𐴃𐴡𐴌 𐴀𐴝𐴙𐴕-𐴑𐴝𐴦𐴕𐴟𐴕 𐴔𐴝𐴕𐴝𐴌 𐴁𐴝𐴦𐴁𐴟𐴃𐴠

¹𐴇𐴝𐴥𐴀𐴌 𐴀𐴠𐴑𐴎𐴡𐴕𐴠 𐴊𐴠𐴐𐴡𐴌 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴕𐴞 𐴏𐴡𐴓𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴕𐴡 𐴊𐴠 𐴇𐴡𐴕𐴡𐴤 𐴇𐴡𐴥𐴑𐴟𐴔𐴡𐴃𐴢 𐴕𐴝𐴥𐴘. 𐴎𐴠𐴊𐴟𐴥𐴕 𐴇𐴡𐴥𐴑𐴟𐴔𐴡𐴃𐴢 𐴀𐴝𐴏𐴠𐴤, 𐴇𐴞𐴥𐴀𐴕 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴁𐴠 𐴎𐴝𐴌𐴞 𐴀𐴡𐴥𐴘𐴧𐴠.²𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴇𐴡𐴥𐴑𐴟𐴔𐴡𐴃𐴡𐴌 𐴔𐴟𐴈𐴝𐴥𐴓𐴠𐴉𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴝𐴓𐴧𐴝𐴘𐴠 𐴎𐴞𐴘𐴝𐴥𐴕 𐴀𐴠𐴕𐴃𐴠𐴎𐴝𐴔 𐴒𐴡𐴙𐴅𐴧𐴠𐴥 𐴇𐴞𐴥𐴘𐴝𐴕𐴡𐴌 𐴁𐴠 𐴔𐴟𐴈𐴝𐴥𐴓𐴠𐴉𐴢 𐴒𐴡𐴌𐴠𐴥. 𐴎𐴠𐴃𐴝𐴌𐴝𐴤 𐴇𐴠𐴥𐴕𐴊𐴞𐴓𐴧𐴝 𐴔𐴟𐴈𐴝𐴥𐴓𐴠𐴉𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌𐴠𐴥 𐴁𐴞𐴏𐴝𐴌𐴡𐴌 𐴓𐴝𐴦𐴘𐴠𐴑 𐴁𐴝𐴕𐴝.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴡𐴔 𐴈𐴝𐴔 𐴒𐴡𐴙𐴓𐴧𐴠𐴥 𐴃𐴡 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌𐴠 𐴋𐴡𐴦𐴌𐴝𐴘𐴁𐴝𐴥𐴌 𐴕𐴝𐴥𐴘, 𐴔𐴡𐴕𐴃𐴡𐴌 𐴑𐴟𐴈𐴝𐴔 𐴒𐴡𐴙𐴓𐴧𐴠𐴥 𐴋𐴡𐴦𐴌𐴝𐴘𐴁𐴝𐴥𐴌 𐴀𐴝𐴏𐴠𐴤. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴦𐴌 𐴏𐴝𐴥𐴌𐴝 𐴀𐴡𐴥𐴘𐴃𐴡 𐴔𐴡𐴕𐴠𐴈𐴡𐴀𐴌 𐴕𐴠𐴥؟ 𐴃𐴡𐴥𐴀𐴘𐴓𐴠 𐴎𐴞𐴘𐴝𐴥𐴕 𐴒𐴡𐴔 𐴇𐴞𐴥𐴘𐴝𐴕 𐴒𐴡𐴌𐴡𐴤, 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌 𐴃𐴡𐴌𐴉𐴡𐴥𐴃𐴧𐴟 𐴃𐴝𐴦𐴌𐴞𐴉𐴢 𐴉𐴝𐴘𐴁𐴝;⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴈𐴝𐴥𐴀𐴊𐴠𐴔 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴓𐴝𐴘 𐴓𐴧𐴝. 𐴓𐴠𐴑𐴞𐴕 𐴎𐴡𐴊𐴞 𐴑𐴟𐴈𐴝𐴔 𐴒𐴡𐴌𐴡𐴤, 𐴀𐴞𐴥𐴃𐴝𐴌𐴝𐴌𐴠 𐴋𐴡𐴦𐴌𐴝𐴘𐴁𐴝𐴥𐴌 𐴀𐴝𐴏𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡 𐴇𐴝𐴥𐴕𐴧𐴝𐴑 𐴏𐴝𐴥𐴣𐴎𐴝 𐴕𐴡 𐴊𐴠𐴥. 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴒𐴟𐴓𐴝𐴔 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴡𐴥𐴘 𐴑𐴟𐴈𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴏𐴝𐴥𐴣𐴎𐴝 𐴊𐴠𐴥 𐴊𐴠.⁵𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴀𐴞𐴥𐴃𐴝𐴌𐴝𐴌𐴠 𐴔𐴝𐴕𐴞 𐴏𐴡𐴓𐴝𐴌 𐴎𐴡𐴌𐴟𐴌; 𐴏𐴞𐴌𐴞𐴥𐴉𐴢 𐴏𐴝𐴥𐴣𐴎𐴝𐴌 𐴋𐴡𐴦𐴌𐴠 𐴕𐴡, 𐴁𐴡𐴥𐴓𐴑𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴡𐴤𐴕 𐴏𐴡𐴥𐴘𐴧𐴞 𐴊𐴠 𐴁𐴟𐴎𐴞𐴥𐴘𐴡𐴌𐴠 𐴘𐴡𐴥.

⁶𐴃𐴟𐴣𐴀𐴝𐴥𐴌𐴝 𐴇𐴠𐴥𐴃𐴡𐴓𐴧𐴝 𐴃𐴡 𐴀𐴞𐴥𐴃𐴝𐴌𐴝𐴌𐴠 𐴇𐴝𐴥𐴎𐴝𐴕𐴝 𐴘𐴡𐴥 𐴊𐴡𐴦, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴠𐴥𐴌 𐴊𐴠 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥𐴌 𐴊𐴠.⁷𐴁𐴠𐴒𐴧𐴟𐴥𐴕𐴡𐴌 𐴇𐴡𐴥𐴑 𐴀𐴝𐴊𐴝𐴘 𐴒𐴡𐴙𐴅𐴧𐴡𐴥; 𐴎𐴝𐴌𐴠𐴥 𐴇𐴝𐴥𐴎𐴝𐴕𐴝 𐴊𐴞𐴦𐴁𐴝𐴌 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴌𐴠 𐴇𐴝𐴥𐴎𐴝𐴕𐴝 𐴊𐴞𐴦𐴘𐴡; 𐴎𐴝𐴌𐴠𐴥 𐴇𐴝𐴥𐴏𐴞𐴓𐴢 𐴊𐴞𐴦𐴁𐴝𐴌 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴌𐴠 𐴇𐴝𐴥𐴏𐴞𐴓𐴢 𐴊𐴞𐴦𐴘𐴡; 𐴎𐴠𐴦𐴕𐴞𐴑𐴞 𐴀𐴞𐴎𐴧𐴡𐴃𐴡𐴌 𐴓𐴝𐴦𐴘𐴠𐴑, 𐴘𐴡𐴥𐴒𐴧𐴗𐴝𐴌𐴠 𐴀𐴞𐴎𐴧𐴡𐴃𐴢 𐴒𐴡𐴙𐴅𐴧𐴡𐴥; 𐴎𐴠𐴦𐴕𐴞𐴑𐴞 𐴃𐴝𐴦𐴌𐴞𐴉𐴡𐴌 𐴓𐴝𐴦𐴘𐴠𐴑, 𐴘𐴡𐴥𐴒𐴧𐴗𐴝𐴌 𐴃𐴝𐴦𐴌𐴞𐴉𐴢 𐴒𐴡𐴙𐴅𐴧𐴡𐴥.

𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴓𐴧𐴠𐴥 𐴐𐴡𐴥𐴌𐴞𐴘𐴡𐴃𐴢 𐴀𐴝𐴊𐴝𐴘 𐴒𐴡𐴙𐴅𐴧𐴝𐴥

⁸𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝𐴌 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴑𐴠𐴏𐴧𐴟𐴥𐴌 𐴒𐴟𐴕𐴡𐴌 𐴃𐴡𐴓𐴠 𐴕𐴡 𐴃𐴝𐴥𐴙𐴑𐴧𐴡. 𐴎𐴠𐴦𐴕𐴞𐴑𐴞 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴐𐴡𐴥𐴌𐴞𐴘𐴡𐴃𐴢 𐴉𐴟𐴌𐴝𐴉𐴟𐴌𐴞 𐴀𐴝𐴊𐴝𐴘 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴡𐴃𐴢 𐴀𐴝𐴏𐴠𐴤 𐴊𐴠, ”𐴎𐴠𐴕𐴝𐴤 𐴕𐴡 𐴒𐴡𐴌𐴞𐴥𐴁𐴝; 𐴑𐴟𐴥𐴕 𐴕𐴡 𐴒𐴡𐴌𐴞𐴥𐴁𐴝; 𐴏𐴟𐴌𐴞 𐴕𐴡 𐴒𐴡𐴌𐴞𐴥𐴁𐴝; 𐴓𐴝𐴓𐴡𐴥𐴏𐴢 𐴕𐴡 𐴒𐴡𐴌𐴞𐴥𐴁𐴝,“ 𐴀𐴞𐴀𐴕 𐴀𐴠𐴊𐴧𐴠 𐴀𐴝𐴌 𐴁𐴝𐴊𐴁𐴝𐴑𐴞 𐴇𐴡𐴥𐴑𐴟𐴔 𐴁𐴠𐴒𐴧𐴟𐴥𐴕 𐴀𐴠 𐴇𐴡𐴥𐴑𐴟𐴔 𐴀𐴠𐴑𐴧𐴝𐴥𐴕𐴡𐴃𐴢 𐴒𐴡𐴥𐴓𐴝𐴘𐴧𐴝 𐴀𐴝𐴏𐴠𐴤, 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, ”𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤.“ ¹⁰𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴓𐴧𐴠𐴥 𐴃𐴡 𐴇𐴡𐴕𐴡𐴤𐴑𐴞𐴘𐴠 𐴇𐴡𐴕𐴡𐴤𐴑𐴞𐴘𐴡𐴌 𐴇𐴡𐴥𐴃𐴞 𐴕𐴡 𐴒𐴡𐴌𐴠𐴥. 𐴇𐴠𐴥𐴃𐴡𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴓𐴧𐴠𐴥 𐴉𐴟𐴌𐴝 𐴐𐴡𐴥𐴌𐴞𐴘𐴡𐴃𐴢 𐴀𐴝𐴊𐴝𐴘 𐴒𐴡𐴙𐴅𐴧𐴝𐴥.

𐴀𐴝𐴘𐴁𐴝𐴤𐴌 𐴊𐴞𐴕 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘

¹¹𐴀𐴠𐴇𐴡𐴥𐴕𐴡𐴌 𐴀𐴡𐴑𐴃𐴡𐴥 𐴁𐴟𐴎𐴞𐴥 𐴇𐴞𐴥𐴀𐴕 𐴒𐴡𐴌𐴡𐴤. 𐴒𐴟𐴥𐴔𐴡𐴃𐴧𐴟 𐴀𐴟𐴍𐴞𐴤𐴁𐴝𐴌 𐴀𐴡𐴑𐴃𐴡𐴥 𐴉𐴡𐴀𐴣𐴙𐴐𐴧𐴠𐴒𐴝𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴎𐴠𐴣𐴃𐴧𐴠𐴥 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤𐴓𐴝𐴔 𐴇𐴞𐴥𐴘𐴝𐴓𐴝𐴌 𐴃𐴟𐴥𐴖𐴝𐴌𐴡 𐴘𐴝𐴓𐴝 𐴀𐴝𐴣𐴀𐴌𐴝𐴌 𐴕𐴠𐴅𐴝𐴃𐴡𐴌 𐴀𐴡𐴑𐴃𐴡𐴥 𐴀𐴝𐴌𐴡𐴤 𐴋𐴝𐴥𐴑𐴠.¹²𐴌𐴝𐴙𐴃𐴢 𐴉𐴟𐴥𐴌𐴡𐴕-𐴉𐴟𐴥𐴌𐴡𐴕 𐴀𐴡𐴥𐴘𐴧𐴠, 𐴘𐴝𐴓𐴝 𐴉𐴡𐴥𐴎𐴡𐴌 𐴉𐴝𐴥𐴍𐴞𐴁𐴝𐴌 𐴀𐴡𐴑𐴃𐴡𐴥 𐴀𐴡𐴥𐴌𐴒𐴝𐴘. 𐴇𐴠𐴥𐴃𐴡𐴓𐴧𐴝, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴝𐴕𐴊𐴝𐴤𐴌𐴡𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴉𐴠𐴥𐴓𐴝𐴘𐴊𐴞 𐴉𐴡𐴀𐴌𐴡𐴌 𐴀𐴝𐴥𐴃𐴞𐴘𐴝𐴌 𐴀𐴡𐴥𐴑𐴧𐴡𐴓𐴢 𐴉𐴞𐴕𐴊𐴞𐴥 𐴃𐴡𐴘𐴧𐴝𐴌 𐴀𐴡𐴥𐴘 𐴃𐴝𐴥𐴑𐴞.¹³𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴐𐴡𐴥𐴌𐴝𐴁𐴞𐴌 𐴉𐴟𐴥𐴌𐴟𐴃𐴞, 𐴕𐴞𐴐𐴝𐴥𐴁𐴝𐴎𐴞, 𐴎𐴠𐴕𐴝𐴤𐴑𐴝𐴌𐴞, 𐴀𐴝𐴘𐴝𐴐𐴞, 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢, 𐴀𐴠𐴊𐴧𐴠 𐴀𐴝𐴓𐴞𐴚𐴝𐴛 𐴁𐴝𐴊𐴢 𐴊𐴞, 𐴊𐴞𐴕𐴡𐴌 𐴉𐴡𐴀𐴌𐴡𐴃𐴢 𐴀𐴝𐴏𐴞𐴤 𐴉𐴝𐴥𐴚𐴒𐴡𐴌𐴞 𐴏𐴡𐴓𐴞.¹⁴𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌𐴠 𐴉𐴞𐴕𐴊𐴞𐴥𐴉𐴠𐴓𐴡, 𐴀𐴝𐴦𐴌 𐴅𐴞𐴏𐴞𐴥𐴔𐴡𐴌 𐴁𐴟𐴌𐴝 𐴀𐴝𐴎𐴧𐴟 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴒𐴡𐴌𐴞𐴥𐴁𐴝𐴌 𐴀𐴟𐴎𐴟 𐴇𐴡𐴕𐴡𐴤 𐴊𐴞𐴥𐴘𐴝𐴕 𐴕𐴡 𐴊𐴞.

The Word for the World International

https://app.library.bible/content/87faca8b51c22590