Read 𐴌𐴡𐴔𐴞𐴀𐴡𐴥𐴓𐴢 10

𐴌𐴡𐴔𐴞𐴀𐴡𐴥𐴓𐴢10

¹𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴝𐴣𐴀𐴌 𐴊𐴞𐴓𐴡𐴌 𐴀𐴝𐴎𐴧𐴟 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴝𐴣𐴀𐴌 𐴊𐴟𐴖𐴝 𐴀𐴡𐴥𐴙𐴓𐴊𐴠, 𐴀𐴞𐴥𐴃𐴝𐴌𐴝 𐴕𐴠𐴅𐴝𐴃𐴢 𐴉𐴡𐴗𐴑.²𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴁𐴝𐴦𐴁𐴟𐴃𐴠 𐴀𐴠 𐴒𐴡𐴁𐴝𐴤 𐴒𐴝𐴥𐴕 𐴊𐴞𐴌 𐴊𐴠 𐴑𐴞, 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴓𐴧𐴝𐴓𐴧𐴝 𐴅𐴟𐴏𐴢 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴏𐴡𐴥𐴘𐴧𐴞 𐴎𐴝𐴕𐴑𐴝𐴌𐴞 𐴃𐴝𐴥𐴑𐴞 𐴕𐴡.³𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴓𐴧𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤 𐴎𐴝𐴕𐴑𐴝𐴌𐴞 𐴕𐴝𐴥𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴑𐴟𐴐𐴞𐴥𐴐𐴠 𐴁𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴘𐴃𐴡 𐴏𐴝𐴀; 𐴇𐴠𐴥𐴃𐴡𐴓𐴧𐴝 𐴎𐴠 𐴃𐴡𐴌𐴞𐴑𐴝 𐴓𐴡𐴘 𐴀𐴝𐴓𐴧𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞 𐴇𐴝𐴥𐴏𐴞𐴓𐴢 𐴒𐴡𐴌𐴠𐴥 𐴇𐴠𐴥 𐴃𐴡𐴌𐴞𐴑𐴝 𐴀𐴞𐴥𐴃𐴝𐴌𐴝 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥.⁴𐴔𐴡𐴀𐴏𐴞𐴤𐴘𐴠 𐴃𐴡 𐴐𐴡𐴥𐴌𐴞𐴘𐴡𐴃𐴡𐴌𐴠 𐴇𐴡𐴥𐴃𐴡𐴔 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴎𐴠𐴀𐴕𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴊𐴠 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴉𐴡𐴌𐴇𐴠𐴥𐴏𐴒𐴝𐴌𐴞 𐴇𐴝𐴥𐴏𐴞𐴓𐴢 𐴒𐴡𐴌𐴠𐴥.

𐴀𐴝𐴓𐴧𐴝𐴌 𐴊𐴞𐴘𐴝 𐴕𐴠𐴅𐴝𐴃𐴢 𐴁𐴠𐴒𐴧𐴟𐴥𐴕 𐴀𐴡𐴓𐴧𐴝

⁵𐴐𐴡𐴥𐴌𐴞𐴘𐴡𐴃𐴢 𐴓𐴡𐴥𐴘 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴘𐴁𐴝𐴌 𐴁𐴝𐴦𐴁𐴟𐴃𐴠 𐴔𐴟𐴀𐴏𐴝𐴘𐴠 𐴃𐴡 𐴀𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴠𐴥, ”𐴎𐴠𐴦𐴕𐴞𐴑𐴞 𐴐𐴡𐴥𐴌𐴞𐴘𐴡𐴃𐴡𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴔𐴝𐴕𐴠, 𐴀𐴞𐴥𐴃𐴠 𐴇𐴞𐴥𐴀𐴕𐴠 𐴁𐴠 𐴁𐴝𐴏𐴞 𐴃𐴝𐴥𐴑𐴞𐴁𐴡.“ ⁶𐴔𐴡𐴕𐴃𐴡𐴌 𐴀𐴞𐴔𐴝𐴕𐴠 𐴎𐴠 𐴉𐴡𐴌𐴇𐴠𐴥𐴏𐴒𐴝𐴌𐴞 𐴇𐴝𐴥𐴏𐴞𐴓𐴢 𐴒𐴡𐴌𐴠𐴥 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠, ”𐴃𐴟𐴣𐴀𐴝𐴥𐴌𐴝 𐴊𐴞𐴓𐴠-𐴊𐴞𐴓𐴠 𐴕𐴡 𐴈𐴡𐴘𐴧𐴡𐴥 𐴊𐴠, ’𐴇𐴡𐴕𐴠 𐴀𐴝𐴏𐴔𐴝𐴕𐴡𐴃𐴢 𐴀𐴟𐴍𐴞𐴤𐴁𐴡؟‘“ 𐴘𐴝𐴥𐴕𐴞 𐴔𐴡𐴀𐴏𐴞𐴤𐴌𐴠 𐴓𐴝𐴔𐴝𐴘 𐴀𐴝𐴕𐴞𐴤 𐴁𐴡𐴓𐴧𐴝.⁷𐴀𐴝𐴦𐴌 𐴀𐴠𐴕𐴊𐴞𐴓𐴧𐴝 𐴘𐴡𐴥 𐴕𐴡 𐴈𐴡𐴘𐴧𐴡𐴥 𐴊𐴠, ”𐴇𐴡𐴕𐴠 𐴕𐴞𐴏𐴠 𐴉𐴝𐴃𐴝𐴓𐴉𐴟𐴌𐴡𐴃𐴢 𐴓𐴝𐴔𐴞𐴁𐴡𐴥؟“ 𐴘𐴝𐴥𐴕𐴞 𐴔𐴡𐴀𐴏𐴞𐴤𐴌𐴠 𐴔𐴟𐴌𐴟𐴊𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴖𐴝𐴦𐴉𐴠𐴏𐴢 𐴓𐴡𐴘𐴀𐴝𐴕𐴞𐴤 𐴁𐴡𐴓𐴧𐴝.⁸𐴔𐴡𐴕𐴃𐴡𐴌 𐴂𐴝𐴑-𐴑𐴝𐴓𐴝𐴔𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴌 𐴊𐴠 𐴕𐴡 𐴕𐴠𐴥؟ ”𐴑𐴝𐴓𐴝𐴔 𐴃𐴟𐴣𐴀𐴝𐴥𐴌𐴝𐴌 𐴋𐴝𐴥𐴑𐴠 𐴀𐴝𐴏𐴠𐴤, 𐴘𐴝𐴥𐴕𐴞 𐴃𐴟𐴣𐴀𐴝𐴥𐴌𐴝𐴌 𐴔𐴟𐴑𐴡𐴃𐴢 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴀𐴡𐴃𐴢.“ 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴞𐴔𐴝𐴕𐴡𐴌 𐴁𐴝𐴦𐴁𐴟𐴃𐴠 𐴑𐴝𐴓𐴝𐴔 𐴀𐴟𐴀𐴙𐴕 𐴎𐴞𐴀𐴕 𐴀𐴝𐴣𐴀𐴌𐴝 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴊𐴠 𐴑𐴞,⁹𐴎𐴡𐴊𐴞 𐴃𐴟𐴀𐴛 𐴕𐴞𐴎𐴡𐴌 𐴔𐴟𐴑𐴠𐴥 𐴀𐴞𐴏𐴝𐴤𐴌𐴠 𐴔𐴝𐴓𐴞𐴑 𐴊𐴠 𐴐𐴞𐴥𐴑𐴝𐴌 𐴒𐴡𐴌𐴡𐴤, 𐴀𐴝𐴦𐴌 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥 𐴊𐴠 𐴇𐴞𐴥𐴘𐴝𐴕 𐴊𐴞𐴓𐴠 𐴀𐴞𐴔𐴝𐴕 𐴀𐴝𐴕𐴡𐴤, 𐴃𐴟𐴀𐴛 𐴕𐴠𐴅𐴝𐴃𐴢 𐴉𐴝𐴘𐴁𐴝.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴞𐴓𐴠 𐴀𐴞𐴔𐴝𐴕 𐴀𐴝𐴕𐴞𐴤𐴓𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴝𐴥 𐴎𐴝, 𐴀𐴝𐴦𐴌 𐴔𐴟𐴑𐴠𐴥 𐴐𐴞𐴥𐴑𐴝𐴌 𐴒𐴡𐴌𐴞𐴥𐴓𐴠 𐴕𐴠𐴅𐴝𐴃𐴢 𐴉𐴝 𐴎𐴝.¹¹𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴀𐴞𐴥𐴃𐴠 𐴁𐴞𐴓𐴑𐴟𐴥𐴓𐴢 𐴐𐴡𐴥𐴌𐴔𐴞𐴕𐴊𐴝 𐴕𐴡 𐴀𐴡𐴥𐴘𐴁𐴡.“ ¹²𐴇𐴞𐴥𐴘𐴝𐴕𐴡𐴃𐴢 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞 𐴇𐴡𐴕𐴡𐴤 𐴉𐴡𐴌𐴡𐴥𐴑 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴒𐴧𐴟𐴥𐴕𐴡𐴌 𐴑𐴟𐴥𐴊𐴝 𐴃𐴡 𐴀𐴠𐴑𐴒𐴗𐴝𐴥. 𐴀𐴞𐴥𐴁𐴝𐴌𐴠 𐴎𐴠𐴃𐴝𐴌𐴝𐴤 𐴔𐴝𐴃𐴝, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴞𐴥𐴁𐴝𐴘𐴠 𐴀𐴝𐴄𐴝𐴓𐴞𐴑𐴧𐴝 𐴌𐴝𐴇𐴝𐴥𐴔𐴡𐴃𐴢 𐴊𐴠𐴦,¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, ”𐴎𐴠𐴦𐴕𐴞𐴑𐴞 𐴔𐴝𐴁𐴟𐴊𐴡𐴌 𐴕𐴝𐴔 𐴓𐴡𐴘𐴁𐴡, 𐴀𐴞𐴥𐴃𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡.“

¹⁴𐴔𐴡𐴕𐴃𐴡𐴌 𐴎𐴞𐴁𐴝𐴤𐴌 𐴖𐴡𐴌𐴠 𐴀𐴞𐴥𐴃𐴝𐴌𐴝 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤, 𐴀𐴞𐴥𐴁𐴝𐴌𐴠 𐴀𐴞𐴥𐴃𐴝𐴌𐴝 𐴑𐴠𐴀𐴕𐴒𐴡𐴌𐴞 𐴔𐴝𐴃𐴝𐴘𐴁𐴡𐴥؟ 𐴀𐴝𐴦𐴌 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴊𐴞𐴕 𐴕𐴡𐴥 𐴉𐴟𐴥𐴕𐴠, 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴥𐴃𐴝𐴌𐴝 𐴑𐴠𐴀𐴕𐴒𐴡𐴌𐴞 𐴀𐴞𐴔𐴝𐴕 𐴀𐴝𐴕𐴞𐴤𐴁𐴡؟ 𐴃𐴡𐴁𐴡𐴓𐴞𐴑-𐴒𐴡𐴌𐴡𐴤𐴘𐴝 𐴕𐴡 𐴃𐴝𐴥𐴑𐴞𐴓𐴠 𐴀𐴞𐴥𐴃𐴝𐴌𐴝 𐴑𐴠𐴀𐴕𐴒𐴡𐴌𐴞 𐴉𐴟𐴥𐴕𐴞 𐴉𐴝𐴌𐴞𐴁𐴡𐴥؟¹⁵𐴀𐴝𐴦𐴌 𐴀𐴞𐴥𐴃𐴝𐴌𐴝 𐴑𐴠𐴀𐴕𐴒𐴡𐴌𐴞 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥𐴁𐴡, 𐴎𐴡𐴊𐴞 𐴀𐴞𐴥𐴃𐴝𐴌𐴝𐴌𐴠 𐴕𐴡 𐴊𐴞𐴉𐴠𐴍𐴝𐴥؟ 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴎𐴠𐴃𐴝𐴌𐴝𐴤 𐴒𐴡𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴒𐴡𐴔 𐴈𐴡𐴥𐴁𐴡𐴌 𐴀𐴝𐴕𐴠𐴤, 𐴀𐴞𐴥𐴃𐴝𐴌𐴝𐴌 𐴄𐴠𐴥𐴚 𐴇𐴡𐴃𐴡𐴥 𐴔𐴟𐴁𐴝𐴌𐴠𐴑!“

¹⁶𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴇𐴡𐴥𐴕𐴡 𐴇𐴠𐴥 𐴒𐴡𐴔 𐴈𐴡𐴥𐴁𐴡𐴌 𐴒𐴝𐴥𐴕 𐴑𐴡𐴁𐴟𐴓𐴢 𐴕𐴡𐴥 𐴒𐴡𐴌𐴠𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴡𐴁𐴞 𐴘𐴠𐴏𐴝𐴥𐴘𐴝𐴘𐴠 𐴃𐴡 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ”𐴀𐴡𐴥 𐴔𐴝𐴁𐴟𐴊𐴢, 𐴀𐴝𐴣𐴀𐴌𐴝𐴌 𐴂𐴡𐴘𐴒𐴝𐴔 𐴇𐴡𐴕𐴠 𐴀𐴠𐴑𐴞𐴕 𐴒𐴡𐴙𐴅𐴧𐴠𐴥؟“ ¹⁷𐴇𐴠𐴥 𐴀𐴞𐴥𐴏𐴝𐴉𐴠, 𐴀𐴞𐴔𐴝𐴕 𐴀𐴝𐴘𐴧𐴠𐴤 𐴊𐴠 𐴉𐴟𐴥𐴕𐴞𐴓𐴠, 𐴘𐴝𐴥𐴕𐴞 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴑𐴝𐴓𐴝𐴔 𐴉𐴟𐴥𐴕𐴞𐴓𐴠.¹⁸𐴓𐴠𐴑𐴞𐴕 𐴀𐴝𐴣𐴀𐴌 𐴏𐴟𐴥𐴖𐴝𐴓𐴢 𐴀𐴡𐴥𐴙𐴓𐴊𐴠, 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴇𐴠𐴥 𐴑𐴝𐴓𐴝𐴔 𐴕𐴡𐴥 𐴉𐴟𐴥𐴕𐴠 𐴊𐴠 𐴕𐴠𐴥؟ 𐴁𐴠𐴐𐴡𐴥𐴑 𐴉𐴟𐴥𐴙𐴕𐴧𐴠. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠,”𐴀𐴞𐴥𐴃𐴝𐴌𐴝𐴌 𐴀𐴝𐴁𐴝𐴏𐴢 𐴊𐴟𐴕𐴞𐴘𐴝𐴙𐴌 𐴀𐴝𐴒𐴝𐴒𐴟𐴌𐴝𐴃𐴧𐴟 𐴉𐴟𐴥𐴕𐴝 𐴒𐴞𐴥𐴘𐴠,𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴈𐴡𐴃𐴝𐴤 𐴊𐴟𐴕𐴞𐴘𐴝𐴙𐴌 𐴐𐴠𐴥𐴐𐴢 𐴔𐴝𐴃𐴝𐴥 𐴉𐴡𐴙𐴅𐴧𐴡𐴕𐴃𐴡 𐴉𐴡𐴀𐴣𐴙𐴐𐴧𐴠.“

¹⁹𐴀𐴝𐴁𐴝𐴌 𐴀𐴝𐴣𐴀𐴌 𐴏𐴟𐴥𐴖𐴝𐴓𐴢 𐴀𐴡𐴥𐴙𐴓𐴊𐴠, 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴕𐴡𐴥 𐴁𐴟𐴎𐴠𐴥 𐴊𐴠 𐴕𐴠𐴥؟ 𐴇𐴞𐴥𐴘𐴝𐴕𐴡𐴌 𐴎𐴟𐴖𐴝𐴁𐴢 𐴀𐴝𐴓𐴧𐴝𐴘𐴠 𐴔𐴟𐴀𐴏𐴝𐴌 𐴀𐴝𐴥𐴃𐴝 𐴀𐴝𐴒𐴠 𐴓𐴡𐴥𐴃𐴞 𐴊𐴞𐴉𐴠𐴥𐴓𐴝𐴘𐴧𐴠 𐴊𐴠 𐴑𐴞,”𐴀𐴠𐴑 𐴁𐴠𐴎𐴝𐴃𐴞𐴌 𐴊𐴟𐴖𐴝𐴌𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴒𐴟𐴐𐴧𐴝𐴤 𐴃𐴟𐴓𐴞𐴤𐴊𐴞𐴘𐴟𐴔,𐴀𐴝𐴦𐴌 𐴀𐴠𐴑 𐴀𐴡𐴁𐴟𐴎𐴢 𐴎𐴝𐴃𐴞𐴌 𐴊𐴟𐴖𐴝𐴌𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴒𐴟𐴐𐴧𐴝𐴤 𐴃𐴟𐴓𐴞𐴤𐴊𐴞𐴘𐴟𐴔.“

²⁰𐴉𐴡𐴌𐴠𐴎𐴝𐴘 𐴀𐴝𐴓𐴧𐴝𐴘𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴀𐴝𐴥𐴃𐴝 𐴀𐴝𐴌𐴡𐴤 𐴈𐴡𐴌𐴝𐴒𐴡𐴌𐴞 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥,”𐴎𐴠𐴃𐴝𐴌𐴝𐴤 𐴀𐴝𐴣𐴀𐴌 𐴃𐴝𐴓𐴝𐴐𐴢 𐴕𐴡𐴥 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴓𐴡𐴦𐴃𐴢 𐴉𐴝𐴘𐴧𐴠𐴥;𐴎𐴠𐴃𐴝𐴌𐴝𐴤 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤 𐴉𐴟𐴏𐴝𐴥𐴌 𐴕𐴡𐴥 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴀𐴝𐴀𐴛 𐴕𐴞𐴎𐴡𐴌𐴠𐴥 𐴎𐴝𐴇𐴠𐴥𐴌 𐴒𐴡𐴙𐴅𐴧𐴞𐴥.“

²¹𐴓𐴠𐴑𐴞𐴕 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴌 𐴔𐴟𐴃𐴝𐴓𐴠𐴑 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠,”𐴀𐴠𐴑 𐴕𐴝𐴉𐴡𐴥𐴌𐴔𐴝𐴕 𐴀𐴠𐴊𐴧𐴠 𐴀𐴠𐴒𐴧𐴗𐴝𐴣𐴅𐴧𐴝 𐴑𐴡𐴗𐴔𐴡𐴌 𐴀𐴟𐴎𐴟𐴀𐴝𐴀𐴛 𐴊𐴞𐴕𐴁𐴡𐴥𐴌 𐴀𐴝𐴣𐴀𐴌 𐴊𐴟𐴕𐴞𐴥 𐴀𐴝𐴥𐴃𐴢 𐴔𐴠𐴓𐴞𐴥 𐴌𐴝𐴙𐴑𐴧𐴞𐴥.“

The Word for the World International

https://app.library.bible/content/87faca8b51c22590