𐴉𐴞𐴓𐴞𐴤𐴂𐴧𐴝𐴘𐴀𐴡đ´Ĩ𐴓đ´ĸ1

𐴏𐴡đ´Ĩ𐴓𐴝𐴔

1𐴀𐴝𐴀𐴛 𐴂𐴝đ´Ĩ𐴀𐴟𐴓đ´ĸ, 𐴀𐴝đ´Ŗ𐴀𐴌 𐴉𐴟đ´Ĩ𐴖𐴝đ´Ŗ𐴃𐴞 𐴃𐴞𐴔𐴡đ´Ĩ𐴃𐴞 𐴘𐴥đ´Ĩ 𐴀𐴝𐴏𐴠𐴤. 𐴀𐴝đ´Ŗ𐴀𐴌𐴝 𐴀𐴡đ´Ĩ𐴘𐴓𐴝𐴔 𐴊𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴒𐴟𐴓𐴝𐴔.
𐴉𐴞𐴓𐴞𐴤𐴂𐴧𐴞 𐴐𐴥đ´Ĩ𐴀𐴌𐴡𐴃đ´ĸ 𐴔𐴡𐴀𐴏𐴞𐴤𐴌 𐴁𐴟đ´Ĩ𐴃𐴡𐴌𐴠 𐴀𐴝𐴓𐴧𐴝𐴌 𐴎𐴠 𐴂𐴝𐴑 𐴁𐴡𐴕𐴊𐴝 𐴀𐴡đ´Ĩ𐴑𐴧𐴡𐴓đ´ĸ 𐴀𐴝𐴏𐴠𐴤 𐴀𐴞đ´Ĩ𐴃𐴝𐴌𐴝 𐴁𐴠𐴒𐴧𐴟đ´Ĩ𐴕𐴡𐴌 𐴇𐴝đ´Ŗ𐴏𐴠 𐴓𐴠𐴑𐴞đ´Ĩ𐴌; 𐴇𐴠đ´Ĩ𐴍𐴠 𐴎𐴡𐴔𐴝đ´Ĩ𐴃𐴡𐴌 𐴕𐴠𐴃𐴝 𐴀𐴡đ´Ĩ𐴑𐴧𐴡𐴓đ´ĸ 𐴀𐴠𐴊𐴧𐴠 𐴈𐴝đ´Ĩ𐴀𐴊𐴠𐴔 𐴀𐴡đ´Ĩ𐴑𐴧𐴡𐴓đ´ĸ 𐴀𐴡đ´Ĩ 𐴒𐴡đ´Ĩ𐴓𐴝𐴘𐴧𐴝 𐴀𐴝𐴏𐴠𐴤.
2𐴃𐴟đ´Ŗ𐴀𐴝đ´Ĩ𐴌𐴝𐴌 𐴖𐴡𐴌𐴠 𐴀𐴝đ´Ŗ𐴀𐴌𐴝𐴌 𐴁𐴝𐴉đ´ĸ 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴃𐴡𐴌𐴉𐴡đ´Ĩ𐴃𐴧𐴟 𐴌𐴝𐴇𐴝đ´Ĩ𐴔𐴡𐴃đ´ĸ 𐴀𐴠𐴊𐴧𐴠 𐴐𐴝đ´Ĩ𐴕𐴃𐴞 𐴕𐴝𐴎𐴞𐴓đ´ĸ 𐴀𐴡đ´Ĩ𐴑.

𐴉𐴞𐴓𐴞𐴤𐴂𐴧𐴝𐴘𐴀𐴡đ´Ĩ𐴓𐴡𐴓𐴧𐴝 𐴂𐴝đ´Ĩ𐴀𐴟𐴓𐴡𐴌 𐴊𐴟𐴖𐴝

3𐴀𐴝𐴀𐴛 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴎𐴠𐴃𐴡đ´Ĩ𐴁𐴝𐴌 𐴘𐴝đ´Ļ𐴊đ´ĸ 𐴒𐴡𐴌𐴞đ´Ĩ, 𐴇𐴠đ´Ĩ𐴃𐴡𐴁𐴝𐴌 𐴀𐴝đ´Ŗ𐴀𐴌 𐴀𐴝𐴓𐴧𐴝𐴌 𐴐𐴟đ´Ĩ𐴑𐴟𐴌 𐴒𐴡𐴌𐴞đ´Ĩ,4𐴀𐴝đ´Ļ𐴌 𐴃𐴟đ´Ŗ𐴀𐴝đ´Ĩ𐴌𐴝 𐴁𐴠𐴒𐴧𐴟đ´Ĩ𐴕𐴡𐴓𐴧𐴝 𐴒𐴡𐴌𐴞đ´Ĩ 𐴊𐴠 𐴇𐴝đ´Ĩ𐴀𐴌 𐴊𐴟𐴖𐴝 𐴇𐴝đ´Ĩ𐴔𐴞𐴐𐴝 𐴑𐴟đ´Ĩ𐴐𐴞𐴌 𐴏𐴝đ´Ĩ𐴀đ´Ŗ𐴃𐴠 𐴒𐴡𐴌𐴞đ´Ĩ,5𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴃𐴟đ´Ŗ𐴀𐴝đ´Ĩ𐴌𐴝 𐴃𐴥 𐴉𐴡𐴀𐴘𐴓𐴝 𐴊𐴞𐴕𐴡𐴃𐴧𐴟 𐴓𐴡đ´Ĩ𐴃𐴞 𐴑𐴟đ´Ĩ𐴐𐴈𐴥đ´Ĩ𐴁𐴡𐴌 𐴉𐴡đ´Ĩ𐴓𐴝𐴌 𐴈𐴝𐴔𐴡𐴃đ´ĸ 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴐𐴥đ´Ĩ𐴌𐴞𐴑 𐴀𐴝𐴏𐴡𐴤.6𐴀𐴝đ´Ŗ𐴀𐴃𐴧𐴟 𐴘𐴝𐴀𐴕 𐴀𐴠𐴑𐴞𐴕 𐴀𐴝𐴏𐴠𐴤 𐴊𐴠 𐴑𐴞, 𐴎𐴞𐴁𐴝𐴤𐴘𐴠 𐴃𐴟đ´Ŗ𐴀𐴝đ´Ĩ𐴌𐴝𐴌 𐴁𐴟đ´Ĩ𐴃𐴡𐴌𐴠 𐴎𐴠 𐴀𐴠𐴑𐴧𐴝đ´Ĩ𐴕 𐴒𐴡𐴔 𐴈𐴝𐴔 𐴐𐴟đ´Ĩ𐴌𐴟 𐴒𐴡𐴙𐴅𐴧𐴠đ´Ĩ 𐴀𐴞đ´Ĩ𐴁𐴝𐴘𐴠 𐴇𐴞đ´Ĩ𐴘𐴝𐴕𐴡𐴌𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤 𐴀𐴝𐴘𐴁𐴡𐴤 𐴊𐴠 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴏𐴡𐴓𐴝𐴘 𐴓𐴡𐴘𐴎𐴝𐴘 𐴉𐴟𐴌𐴟𐴏𐴧𐴝𐴃đ´ĸ 𐴒𐴡𐴌𐴞đ´Ĩ𐴁𐴥.
7𐴃𐴟đ´Ŗ𐴀𐴝đ´Ĩ𐴌𐴝 𐴁𐴠𐴒𐴧𐴟đ´Ĩ𐴕𐴡𐴌 𐴁𐴝đ´Ļ𐴁𐴟𐴃𐴠 𐴇𐴠đ´Ĩ𐴕𐴊𐴞𐴓𐴧𐴝 𐴑𐴞đ´Ĩ𐴘𐴝𐴓đ´ĸ 𐴌𐴝𐴑𐴡đ´Ĩ𐴕 𐴀𐴝đ´Ŗ𐴀𐴌 𐴓𐴧𐴝 𐴄𐴞đ´Ĩ𐴑, 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴃𐴟đ´Ŗ𐴀𐴝đ´Ĩ𐴌𐴝 𐴃𐴥 𐴀𐴝đ´Ŗ𐴀𐴌 𐴊𐴞𐴓𐴡𐴃đ´ĸ 𐴀𐴝𐴏𐴡𐴤, 𐴀𐴝đ´Ļ𐴌 𐴀𐴝𐴀𐴛 𐴁𐴡𐴕 𐴃𐴝đ´Ĩ𐴑𐴞 𐴘𐴝đ´Ĩ 𐴑𐴟đ´Ĩ𐴐𐴈𐴥đ´Ĩ𐴁𐴡𐴌𐴡𐴌 𐴏𐴡đ´Ĩ𐴉𐴝𐴘 𐴊𐴞đ´Ĩ 𐴇𐴞đ´Ĩ𐴘𐴝𐴕𐴡𐴌 𐴏𐴡đ´Ĩ𐴘𐴧𐴞𐴌𐴠 𐴏𐴝đ´Ĩ𐴁𐴟𐴃đ´ĸ 𐴒𐴡𐴌𐴞đ´Ĩ, 𐴃𐴟đ´Ŗ𐴀𐴝đ´Ĩ𐴌𐴝 𐴁𐴠𐴒𐴧𐴟đ´Ĩ𐴕 𐴃𐴥 𐴀𐴝đ´Ŗ𐴀𐴌 𐴉𐴟đ´Ĩ𐴖𐴝đ´Ŗ𐴃𐴞 𐴀𐴝𐴓𐴧𐴝𐴌 𐴌𐴝𐴇𐴝đ´Ĩ𐴔𐴡𐴃𐴡𐴌 𐴁𐴝đ´Ĩ𐴒𐴞.8𐴀𐴝𐴓𐴧𐴝 𐴀𐴝đ´Ŗ𐴀𐴌 𐴒𐴡𐴁𐴝𐴤 𐴀𐴝𐴏𐴠𐴤, 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴀𐴝𐴊𐴡𐴌𐴠 𐴀𐴝đ´Ŗ𐴀𐴃𐴧𐴟 𐴃𐴟đ´Ŗ𐴀𐴝đ´Ĩ𐴌𐴝 𐴁𐴠𐴒𐴧𐴟đ´Ĩ𐴕𐴡𐴓𐴧𐴝 𐴇𐴡𐴊𐴧𐴟đ´Ĩ𐴌 𐴉𐴟𐴌𐴠𐴌.
9𐴀𐴝𐴀𐴛 𐴊𐴟𐴖𐴝 𐴒𐴡𐴌𐴞đ´Ĩ 𐴊𐴠, 𐴃𐴟đ´Ŗ𐴀𐴝đ´Ĩ𐴌𐴝𐴌 𐴔𐴟𐴇𐴝đ´Ĩ𐴁𐴧𐴥𐴃đ´ĸ 𐴏𐴡đ´Ĩ𐴘𐴧𐴞 𐴒𐴞𐴘𐴝𐴕 𐴀𐴠𐴊𐴧𐴠 𐴇𐴝đ´Ĩ𐴀𐴌 𐴋𐴡đ´Ĩ𐴙𐴓𐴧𐴝 𐴁𐴟𐴊𐴧𐴞đ´Ĩ𐴌 𐴏𐴝đ´Ĩ𐴀đ´Ŗ𐴃𐴠 𐴎𐴠𐴃𐴡đ´Ĩ 𐴀𐴠đ´Ĩ𐴃𐴥 𐴁𐴞𐴐𐴞𐴤 𐴁𐴝𐴌𐴝𐴤𐴃đ´ĸ 𐴃𐴝đ´Ĩ𐴑𐴠 𐴉𐴝đ´Ĩ𐴕;10𐴎𐴠𐴀𐴕𐴠 𐴃𐴟đ´Ŗ𐴀𐴝đ´Ĩ𐴌𐴝 𐴎𐴞𐴀𐴕 𐴀𐴟𐴃𐴧𐴡𐴔 𐴇𐴞đ´Ĩ𐴀𐴕 𐴉𐴡𐴌𐴡đ´Ĩ𐴑 𐴒𐴡𐴌𐴞đ´Ĩ 𐴎𐴝𐴕𐴡, 𐴀𐴝đ´Ļ𐴌 𐴔𐴡𐴀𐴏𐴞𐴤 𐴀𐴝𐴘𐴁𐴡𐴤 𐴊𐴠 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴂𐴝𐴑 𐴀𐴠𐴊𐴧𐴠 𐴁𐴠𐴈𐴡𐴏𐴟đ´Ĩ𐴌 𐴃𐴝đ´Ĩ𐴑𐴡,11𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴉𐴡𐴌𐴇𐴠đ´Ĩ𐴏𐴒𐴝𐴌𐴞𐴌 𐴒𐴟𐴓𐴝𐴒𐴝𐴓𐴝 𐴀𐴡đ´Ĩ𐴑𐴧𐴡𐴓đ´ĸ 𐴀𐴝𐴘𐴧𐴠𐴤 𐴊𐴠 𐴇𐴞đ´Ĩ𐴀𐴕 𐴓𐴡đ´Ĩ𐴘 𐴁𐴥đ´Ĩ𐴌𐴝𐴘𐴧𐴝 𐴀𐴡đ´Ĩ𐴘𐴧𐴡𐴌𐴠; 𐴎𐴠𐴀𐴕𐴠 𐴀𐴝𐴓𐴧𐴝𐴌 𐴔𐴡𐴈𐴞đ´Ĩ𐴔𐴝 𐴀𐴠𐴊𐴧𐴠 𐴃𐴝đ´Ļ𐴌𐴞𐴉đ´ĸ 𐴀𐴡đ´Ĩ.

𐴀𐴝đ´Ŗ𐴀𐴌 𐴓𐴧𐴝 𐴔𐴡𐴀𐴏𐴞𐴤 𐴀𐴡đ´Ĩ𐴙𐴓𐴊𐴠 𐴎𐴞𐴕𐴊𐴞𐴒𐴞

12𐴀𐴡đ´Ĩ 𐴁𐴝đ´Ĩ𐴘𐴁𐴡𐴘𐴕𐴝đ´Ĩ𐴙𐴕 𐴀𐴡đ´Ĩ𐴑𐴧𐴡𐴓đ´ĸ, 𐴀𐴝đ´Ŗ𐴀𐴃𐴧𐴟 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌 𐴊𐴠 𐴑𐴞, 𐴀𐴝đ´Ŗ𐴀𐴌 𐴖𐴡𐴌𐴠 𐴎𐴞𐴀𐴕-𐴎𐴞𐴀𐴕 𐴒𐴟𐴎𐴡𐴙𐴅𐴧𐴠đ´Ĩ, 𐴇𐴞đ´Ĩ𐴀𐴕𐴠 𐴑𐴟đ´Ĩ𐴐𐴈𐴥đ´Ĩ𐴁𐴡𐴌 𐴎𐴠𐴃𐴡đ´Ĩ 𐴀𐴠đ´Ĩ𐴃𐴥 𐴉𐴡đ´Ĩ𐴓𐴝𐴃đ´ĸ 𐴔𐴡𐴊𐴡𐴃đ´ĸ 𐴒𐴡𐴙𐴅𐴧𐴠đ´Ĩ,13𐴎𐴠𐴀𐴕 𐴕𐴞đ´Ĩ𐴑𐴞 𐴀𐴝𐴀𐴛 𐴔𐴡𐴀𐴏𐴞𐴤𐴌 𐴖𐴝𐴏𐴃𐴠đ´Ĩ 𐴁𐴡𐴕 𐴀𐴝𐴏𐴞𐴤 𐴊𐴠 𐴇𐴞đ´Ĩ𐴘𐴝𐴕 𐴌𐴝𐴎𐴔𐴡𐴇𐴡đ´Ĩ𐴓𐴡𐴌 𐴃𐴝𐴔𐴝đ´Ĩ𐴔 𐴉𐴝𐴀𐴌𐴝𐴊𐴝𐴌 𐴀𐴡đ´Ĩ𐴑𐴧𐴡𐴓𐴠 𐴀𐴠𐴊𐴧𐴠 𐴁𐴝𐴑𐴞 𐴔𐴝𐴕𐴟đ´Ĩ𐴙𐴐đ´ĸ 𐴁𐴠𐴒𐴧𐴟đ´Ĩ𐴕𐴠 𐴎𐴝𐴕𐴞 𐴉𐴝𐴙𐴅𐴧𐴠đ´Ĩ.14𐴀𐴝đ´Ļ𐴌 𐴀𐴝đ´Ŗ𐴀𐴌 𐴁𐴡𐴕𐴡𐴌 𐴎𐴡𐴌𐴞𐴘𐴝 𐴁𐴞𐴐𐴞𐴤 𐴎𐴡𐴕 𐴀𐴞𐴔𐴝𐴕𐴊𐴝đ´Ĩ𐴌 𐴁𐴝đ´Ĩ𐴘𐴁𐴡𐴘𐴕𐴝đ´Ĩ𐴙𐴕 𐴊𐴡𐴃𐴧𐴟 𐴔𐴝𐴓𐴞𐴑𐴡𐴌 𐴖𐴡𐴌𐴠 𐴁𐴥đ´Ĩ𐴌𐴝𐴐𐴝 𐴀𐴠𐴊𐴧𐴟đ´Ĩ𐴌 𐴁𐴝𐴌𐴞đ´Ĩ𐴒𐴞𐴘𐴡𐴘 𐴎𐴠𐴀𐴕 𐴕𐴞đ´Ĩ𐴑𐴞 𐴀𐴞đ´Ĩ𐴃𐴝𐴌𐴝 𐴕𐴡 𐴋𐴡đ´Ļ𐴌𐴝𐴘 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴞đ´Ĩ 𐴁𐴡𐴓𐴧𐴝 𐴀𐴝𐴌𐴡𐴤 𐴁𐴞𐴐𐴞𐴤 𐴇𐴞đ´Ĩ𐴔𐴧𐴡𐴃đ´ĸ 𐴉𐴝𐴘𐴧𐴠đ´Ĩ.
15𐴁𐴠𐴐𐴥đ´Ĩ𐴑, 𐴇𐴡𐴊𐴟đ´Ĩ𐴕𐴠 𐴌𐴞𐴐𐴠đ´Ĩ 𐴀𐴠𐴊𐴧𐴠 𐴎𐴞𐴁𐴧𐴝𐴃𐴡𐴌 𐴕𐴞𐴘𐴡𐴃𐴠 𐴔𐴡𐴀𐴏𐴞𐴤𐴌 𐴃𐴡𐴁𐴡𐴓𐴞𐴑 𐴒𐴡𐴌𐴠đ´Ĩ, 𐴔𐴡𐴕𐴃𐴡𐴌 𐴇𐴡𐴊𐴟đ´Ĩ𐴕𐴠 𐴁𐴝đ´Ĩ𐴓𐴝 𐴕𐴞𐴘𐴡𐴃𐴠 𐴒𐴡𐴌𐴠đ´Ĩ 𐴊𐴠 𐴘𐴥đ´Ĩ 𐴀𐴝𐴏𐴠𐴤.16𐴉𐴞𐴏𐴡đ´Ĩ𐴌 𐴒𐴟đ´Ĩ𐴕𐴠 𐴇𐴞đ´Ĩ𐴘𐴝𐴕 𐴔𐴟𐴇𐴝đ´Ĩ𐴁𐴧𐴥𐴃𐴠 𐴁𐴠 𐴒𐴡𐴌𐴠đ´Ĩ, 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴑𐴟đ´Ĩ𐴐𐴈𐴥đ´Ĩ𐴁𐴡𐴌𐴡𐴌 𐴏𐴡đ´Ĩ𐴉𐴝𐴘 𐴊𐴞đ´Ĩ 𐴁𐴡𐴓𐴧𐴝 𐴀𐴝đ´Ŗ𐴀𐴌𐴠đ´Ĩ 𐴁𐴝𐴏𐴞đ´Ĩ𐴓𐴡𐴖𐴝 𐴒𐴞đ´Ĩ𐴘𐴠 𐴊𐴠 𐴇𐴞đ´Ĩ𐴘𐴝𐴕 𐴀𐴞đ´Ĩ𐴃𐴝𐴌𐴝 𐴎𐴝𐴕𐴠.17𐴔𐴡𐴕𐴃𐴡𐴌 𐴀𐴝𐴒𐴡𐴌 𐴒𐴟đ´Ĩ𐴕𐴠 𐴔𐴡𐴀𐴏𐴞𐴤𐴌 𐴃𐴡𐴁𐴡𐴓𐴞𐴑 𐴒𐴡𐴌𐴠đ´Ĩ 𐴊𐴠 𐴀𐴠𐴈𐴠đ´Ĩ𐴓𐴝𐴏𐴞𐴌 𐴏𐴝đ´Ĩ𐴀đ´Ŗ𐴃𐴠 𐴕𐴡 𐴁𐴥đ´Ĩ𐴓𐴑𐴠 𐴕𐴞𐴎𐴡𐴌 𐴉𐴝đ´Ĩ𐴘𐴊𐴝𐴌 𐴕𐴞𐴘𐴡𐴃𐴠; 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴀𐴞đ´Ĩ𐴃𐴝𐴌𐴝 𐴄𐴝đ´Ĩ𐴀𐴌𐴠 𐴊𐴠, 𐴀𐴝𐴀𐴛 𐴁𐴡𐴕 𐴀𐴝𐴏𐴞𐴤 𐴊𐴠 𐴇𐴠đ´Ĩ𐴍𐴠 𐴀𐴞đ´Ĩ𐴃𐴝𐴌𐴝 𐴀𐴝đ´Ŗ𐴀𐴌 𐴓𐴧𐴝 𐴔𐴡𐴏𐴞𐴁𐴡𐴃đ´ĸ 𐴉𐴡𐴘𐴊𐴝 𐴒𐴡𐴌𐴞đ´Ĩ 𐴉𐴝𐴌𐴞𐴁𐴡đ´Ĩ.18𐴃𐴥đ´Ĩ𐴘 𐴑𐴞đ´Ļ 𐴀𐴡đ´Ĩđ´˜đ´§đ´ ØŸ 𐴀𐴝𐴏𐴡đ´Ĩ𐴓đ´ĸ 𐴈𐴡𐴃𐴝𐴤 𐴀𐴡đ´Ĩ𐴙𐴓𐴊𐴠, 𐴁𐴠đ´Ĩ𐴃đ´ĸ 𐴊𐴡đ´Ĩ𐴌𐴞 𐴀𐴡đ´Ĩ𐴑 𐴘𐴝đ´Ĩ 𐴏𐴡đ´Ĩ𐴘𐴧𐴞 𐴕𐴞𐴘𐴡𐴃𐴠 𐴀𐴡đ´Ĩ𐴑, 𐴉𐴡𐴃𐴧𐴞đ´Ĩ 𐴔𐴞𐴑𐴧𐴝đ´Ĩ𐴃𐴧𐴟 𐴊𐴠 𐴔𐴡𐴀𐴏𐴞𐴤𐴌 𐴃𐴡𐴁𐴡𐴓𐴞𐴑 𐴀𐴠đ´Ĩ𐴕𐴝 𐴀𐴡đ´Ĩ𐴌; 𐴇𐴠đ´Ĩ𐴃𐴡𐴓𐴧𐴝 𐴀𐴝𐴀𐴛 𐴑𐴟đ´Ĩ𐴐𐴞.
𐴀𐴡đ´Ĩ𐴘, 𐴀𐴝đ´Ļ𐴌 𐴑𐴟đ´Ĩ𐴐𐴞 𐴀𐴡đ´Ĩ𐴖𐴝𐴃đ´ĸ 𐴃𐴝đ´Ĩ𐴑𐴞𐴘𐴟𐴔 𐴀𐴡đ´Ĩ,19𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴀𐴝𐴀𐴛 𐴎𐴝𐴕𐴞 𐴊𐴠, 𐴀𐴝đ´Ŗ𐴀𐴌 𐴖𐴡𐴌𐴠 𐴎𐴞𐴀𐴕-𐴎𐴞𐴀𐴕 𐴒𐴟𐴎𐴡𐴌𐴠𐴌 𐴇𐴞đ´Ĩ𐴀𐴕𐴡𐴌 𐴕𐴡𐴃𐴞𐴎𐴝 𐴀𐴞đ´Ĩ𐴏𐴝𐴉𐴠 𐴀𐴝𐴀𐴛 𐴇𐴝đ´Ĩ𐴓𐴝𐴏đ´ĸ 𐴀𐴡đ´Ĩ𐴘𐴧𐴟𐴔. 𐴇𐴞đ´Ĩ𐴘𐴝𐴕 𐴃𐴟đ´Ŗ𐴀𐴝đ´Ĩ𐴌𐴝𐴌 𐴊𐴟𐴖𐴝𐴘𐴠 𐴀𐴠𐴊𐴧𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴌𐴟𐴀𐴌 𐴔𐴡𐴊𐴡𐴃𐴠 𐴁𐴠 𐴀𐴡đ´Ĩ𐴘𐴁𐴥.20𐴀𐴝đ´Ŗ𐴀𐴃𐴧𐴟 𐴉𐴟𐴌𐴝𐴉𐴟𐴌𐴞 𐴀𐴠𐴑𐴞𐴕 𐴀𐴠𐴊𐴧𐴠 𐴀𐴝𐴐𐴝𐴤 𐴀𐴝𐴏𐴠𐴤 𐴊𐴠 𐴑𐴞, 𐴀𐴝đ´Ŗ𐴀𐴃𐴧𐴟 𐴇𐴡𐴕𐴡𐴤 𐴑𐴠𐴏𐴧𐴟đ´Ĩ𐴃đ´ĸ 𐴐𐴥đ´Ĩ𐴌𐴔𐴞𐴕𐴊𐴝 𐴀𐴡đ´Ĩ𐴖𐴝 𐴕𐴡 𐴉𐴡𐴌𐴞𐴁𐴡đ´Ĩ, 𐴁𐴥đ´Ĩ𐴓𐴑𐴠 𐴀𐴠𐴀𐴕 𐴉𐴟𐴌𐴝𐴉𐴟𐴌𐴞 𐴇𐴞đ´Ĩ𐴔𐴧𐴡𐴃đ´ĸ 𐴃𐴝đ´Ĩ𐴑𐴞𐴁𐴡 𐴎𐴠𐴀𐴕 𐴕𐴞đ´Ĩ𐴑𐴞 𐴇𐴝đ´Ĩ𐴔𐴞𐴐𐴝𐴌 𐴋𐴡đ´Ĩ𐴙𐴓𐴧𐴝 𐴘𐴝𐴓𐴝 𐴘𐴥đ´Ĩ 𐴀𐴝đ´Ŗ𐴀𐴌 𐴒𐴝đ´Ļ𐴌 𐴊𐴟𐴖𐴝𐴌𐴝 𐴔𐴡𐴀𐴏𐴞𐴤𐴌 𐴔𐴡𐴈𐴞đ´Ĩ𐴔𐴝 𐴎𐴝𐴇𐴠đ´Ĩ𐴌 𐴀𐴡đ´Ĩ𐴘𐴁𐴥, 𐴀𐴝𐴀𐴛 𐴎𐴞𐴕𐴊𐴝 𐴃𐴝đ´Ĩ𐴑𐴞 𐴘𐴝đ´Ĩ 𐴔𐴡𐴌𐴞.21𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴀𐴝đ´Ŗ𐴀𐴌 𐴓𐴧𐴝 𐴔𐴡𐴀𐴏𐴞𐴤 𐴀𐴡đ´Ĩ𐴙𐴓𐴊𐴠 𐴎𐴞𐴕𐴊𐴞𐴒𐴞, 𐴀𐴝đ´Ļ𐴌 𐴔𐴡đ´Ļ𐴃đ´ĸ 𐴀𐴡đ´Ĩ𐴙𐴓𐴊𐴠 𐴓𐴝𐴉đ´ĸ.22𐴎𐴡𐴊𐴞 𐴀𐴝𐴀𐴛 𐴇𐴝𐴘𐴧𐴝𐴘𐴠 𐴎𐴞𐴕𐴊𐴝 𐴃𐴝đ´Ĩ𐴑𐴞, 𐴀𐴝𐴀𐴛 𐴑𐴞𐴔𐴡𐴃𐴞 𐴈𐴝𐴔𐴡𐴌 𐴔𐴠𐴀𐴕𐴧𐴡𐴃đ´ĸ 𐴀𐴡đ´Ĩ𐴑𐴧𐴡𐴓đ´ĸ 𐴒𐴡𐴌𐴞đ´Ĩ 𐴉𐴝𐴙𐴅𐴧𐴟𐴔. 𐴇𐴠đ´Ĩ𐴃𐴡𐴓𐴧𐴝 𐴇𐴡𐴕 𐴕𐴝đ´Ĩ𐴕 𐴁𐴝𐴏𐴞đ´Ĩ𐴃𐴝𐴔 𐴀𐴝𐴀𐴛 𐴇𐴡𐴘 𐴕𐴡 𐴉𐴝𐴌𐴞.23𐴀𐴝𐴀𐴛 𐴊𐴟𐴘𐴈𐴝𐴍𐴝𐴃đ´ĸ 𐴉𐴡𐴙𐴅𐴧𐴞đ´Ĩ: 𐴔𐴡𐴕𐴠𐴈𐴡𐴀𐴌 𐴊𐴠, 𐴊𐴟𐴕𐴞𐴘𐴝𐴙𐴃𐴧𐴟 𐴎𐴝𐴘𐴒𐴡đ´Ĩ𐴘 𐴔𐴡𐴀𐴏𐴞𐴤𐴌 𐴉𐴟đ´Ĩ𐴖𐴝đ´Ŗ𐴃𐴞 𐴃𐴝đ´Ĩ𐴑𐴞𐴃𐴡, 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴇𐴞đ´Ĩ𐴘𐴝𐴕 𐴁𐴡𐴀𐴗𐴃đ´ĸ 𐴁𐴠𐴀𐴃𐴡𐴌 𐴀𐴡đ´Ĩ𐴘𐴁𐴥;24𐴔𐴡𐴕𐴃𐴡𐴌 𐴃𐴟đ´Ŗ𐴀𐴝đ´Ĩ𐴌𐴝𐴌 𐴖𐴝𐴏𐴃𐴠đ´Ĩ 𐴀𐴝𐴀𐴛 𐴇𐴝𐴘𐴧𐴝𐴘𐴠 𐴁𐴝𐴏𐴞 𐴃𐴝đ´Ĩ𐴑𐴝 𐴃𐴥 𐴀𐴝𐴌𐴡𐴤 𐴎𐴡𐴌𐴟𐴌.25𐴇𐴞đ´Ĩ𐴘𐴝𐴕𐴡𐴌 𐴀𐴠𐴑𐴞𐴕𐴠 𐴀𐴝𐴀𐴛 𐴎𐴝𐴕𐴞 𐴊𐴠, 𐴀𐴝𐴀𐴛 𐴁𐴝𐴏𐴞 𐴃𐴝đ´Ĩ𐴙𐴑𐴧𐴟𐴔 𐴀𐴝đ´Ļ𐴌 𐴃𐴟đ´Ŗ𐴀𐴝đ´Ĩ𐴌𐴝 𐴁𐴠𐴒𐴧𐴟đ´Ĩ𐴕𐴡𐴌 𐴉𐴟đ´Ĩ𐴖𐴝đ´Ŗ𐴃𐴞 𐴃𐴝đ´Ĩ𐴑𐴞𐴘𐴟𐴔, 𐴎𐴠𐴀𐴕𐴠 𐴃𐴟đ´Ŗ𐴀𐴝đ´Ĩ𐴌𐴝 𐴀𐴞𐴔𐴝𐴕𐴡𐴃đ´ĸ 𐴁𐴝𐴌𐴡đ´Ĩ 𐴀𐴝đ´Ļ𐴌 𐴇𐴞đ´Ĩ𐴘𐴝𐴕𐴡𐴃đ´ĸ 𐴑𐴟đ´Ĩ𐴐𐴞 𐴃𐴝đ´Ĩ𐴑𐴡.26𐴀𐴝𐴀𐴛 𐴃𐴟đ´Ŗ𐴀𐴝đ´Ĩ𐴌𐴝𐴌 𐴇𐴠đ´Ĩ𐴍𐴠 𐴀𐴝𐴁𐴝𐴌 𐴀𐴝𐴘𐴓𐴠𐴤, 𐴃𐴟đ´Ŗ𐴀𐴝đ´Ĩ𐴌𐴝𐴃𐴧𐴟 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟đ´Ĩ𐴃𐴡𐴌𐴠 𐴀𐴝𐴏𐴠𐴤 𐴊𐴠 𐴁𐴡𐴌𐴝đ´Ĩ𐴘 𐴀𐴝đ´Ŗ𐴀𐴌 𐴎𐴡𐴌𐴞𐴘𐴝 𐴁𐴞𐴐𐴞𐴤 𐴈𐴡𐴘𐴓𐴠đ´Ĩ 𐴁𐴞𐴐𐴞𐴤 𐴁𐴝𐴌𐴞đ´Ĩ𐴎𐴝𐴘𐴁𐴡𐴘.
27𐴏𐴞𐴌𐴞đ´Ĩ𐴉đ´ĸ 𐴀𐴠𐴕𐴊𐴞𐴓𐴧𐴝 𐴒𐴡𐴌𐴡𐴤, 𐴑𐴞 𐴈𐴡𐴘𐴓𐴠đ´Ĩ, 𐴃𐴟đ´Ŗ𐴀𐴝đ´Ĩ𐴌𐴝𐴌 𐴏𐴡𐴓𐴝𐴏𐴡𐴓𐴡𐴌𐴠 𐴔𐴡𐴀𐴏𐴞𐴤𐴌 𐴑𐴟đ´Ĩ𐴐𐴈𐴥đ´Ĩ𐴁𐴡𐴌𐴡𐴌 𐴓𐴝đ´Ļ𐴘𐴠𐴑 𐴁𐴝𐴕𐴡, 𐴎𐴠𐴀𐴕𐴠 𐴀𐴝𐴀𐴛 𐴀𐴝𐴀𐴘𐴧𐴡𐴌𐴠 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴏𐴝𐴀𐴘đ´ĸ 𐴘𐴝đ´Ĩ 𐴒𐴝𐴙𐴌𐴇𐴝đ´Ĩ𐴎𐴞𐴌 𐴃𐴝đ´Ĩ𐴑𐴞, 𐴀𐴝𐴀𐴛 𐴎𐴠𐴕 𐴃𐴟đ´Ŗ𐴀𐴝đ´Ĩ𐴌𐴝𐴌 𐴁𐴝đ´Ļ𐴁𐴟𐴃𐴠 𐴉𐴟đ´Ĩ𐴕𐴞 𐴊𐴠, 𐴃𐴟đ´Ŗ𐴀𐴝đ´Ĩ𐴌𐴝 𐴀𐴠𐴑 𐴌𐴟𐴀𐴃đ´ĸ 𐴔𐴝đ´Ĩ𐴎𐴠 𐴔𐴡𐴎𐴁𐴟𐴃đ´ĸ 𐴒𐴡𐴌𐴞 𐴃𐴞đ´Ĩ𐴘𐴝𐴘𐴧𐴝 𐴀𐴝𐴏𐴡𐴤 𐴀𐴝đ´Ļ𐴌 𐴑𐴟đ´Ĩ𐴐𐴈𐴥đ´Ĩ𐴁𐴡𐴌𐴡𐴃𐴧𐴟 𐴉𐴡𐴘𐴊𐴝 𐴀𐴡đ´Ĩ 𐴊𐴠 𐴀𐴞𐴔𐴝𐴕𐴡𐴓𐴧𐴝 𐴀𐴠𐴑 𐴔𐴡𐴕𐴠 𐴔𐴞𐴓𐴞𐴎𐴟đ´Ĩ𐴓𐴞 𐴁𐴞𐴐𐴞𐴤 𐴔𐴠𐴀𐴕𐴧𐴡𐴃đ´ĸ 𐴒𐴡𐴌𐴡𐴤𐴌.28𐴃𐴟đ´Ŗ𐴀𐴝đ´Ĩ𐴌𐴝𐴌 𐴔𐴟𐴈𐴝đ´Ĩ𐴓𐴠𐴉đ´ĸ 𐴀𐴡đ´Ĩ𐴑𐴧𐴡𐴓𐴡𐴌𐴠 𐴇𐴡𐴕𐴡𐴤 𐴇𐴝đ´Ĩ𐴓𐴡𐴃𐴠 𐴕𐴡 𐴋𐴡đ´Ļ𐴌𐴝𐴘𐴧𐴡đ´Ĩ, 𐴎𐴞𐴘𐴝đ´Ĩ𐴕 𐴀𐴡đ´Ĩ𐴙𐴓𐴊𐴠 𐴀𐴞đ´Ĩ𐴃𐴝𐴌𐴝𐴓𐴧𐴝 𐴇𐴝đ´Ĩ𐴓𐴝𐴑 𐴀𐴡đ´Ĩ𐴘𐴁𐴝𐴌 𐴀𐴠𐴑𐴧𐴝đ´Ĩ𐴕 𐴕𐴞𐴐𐴝đ´Ĩ𐴕, 𐴓𐴠𐴑𐴞𐴕 𐴃𐴟đ´Ŗ𐴀𐴝đ´Ĩ𐴌𐴝𐴓𐴧𐴝 𐴕𐴠𐴅𐴝𐴃đ´ĸ 𐴉𐴝𐴘𐴁𐴝𐴌, 𐴎𐴠 𐴕𐴠𐴅𐴝𐴃đ´ĸ 𐴀𐴡đ´Ĩ𐴙𐴓𐴊𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡đ´Ĩ𐴃𐴧𐴟.29𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴃𐴥 𐴔𐴡𐴀𐴏𐴞𐴤𐴌 𐴖𐴝𐴏𐴃𐴠đ´Ĩ 𐴃𐴡𐴖𐴉𐴞đ´Ĩ𐴑 𐴊𐴞đ´Ļ𐴘𐴝 𐴒𐴞𐴘𐴠đ´Ĩ 𐴊𐴠 𐴏𐴞𐴌𐴞đ´Ĩ𐴉đ´ĸ 𐴀𐴞đ´Ĩ𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤𐴁𐴝𐴌 𐴕𐴡, 𐴁𐴥đ´Ĩ𐴓𐴑𐴠 𐴀𐴞đ´Ĩ𐴁𐴝𐴌 𐴖𐴝𐴏𐴃𐴠đ´Ĩ 𐴊𐴟𐴑 𐴉𐴝𐴘 𐴁𐴡𐴓𐴧𐴝 𐴘𐴥đ´Ĩ.30𐴇𐴠đ´Ĩ𐴃𐴡𐴓𐴧𐴝 𐴃𐴥 𐴃𐴟đ´Ŗ𐴀𐴝đ´Ĩ𐴌𐴝 𐴘𐴥đ´Ĩ 𐴊𐴟𐴑 𐴀𐴟𐴀𐴙𐴕 𐴉𐴡𐴀𐴌 𐴎𐴞𐴀𐴕 𐴀𐴝𐴀𐴛 𐴉𐴝𐴀𐴘𐴓𐴝𐴔 𐴊𐴠 𐴊𐴠𐴙𐴑𐴧𐴞đ´Ĩ𐴓𐴝 𐴀𐴝đ´Ļ𐴌 𐴘𐴝𐴓𐴝 𐴘𐴥đ´Ĩ 𐴉𐴝𐴙𐴌 𐴊𐴠 𐴉𐴟đ´Ĩ𐴕𐴡𐴌.

The Word for the World International

https://app.library.bible/content/87faca8b51c22590

expand_more
chevron_rightPrevious Chapter
chevron_leftNext Chapter