Read 𐴀𐴞𐴥𐴉𐴞𐴐𐴞𐴀𐴡𐴥𐴓𐴢 6

𐴀𐴞𐴥𐴉𐴞𐴐𐴞𐴀𐴡𐴥𐴓𐴢6

𐴉𐴟𐴀𐴝𐴙𐴕 𐴀𐴠𐴊𐴧𐴠 𐴁𐴝𐴉𐴔𐴝𐴦

¹𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑𐴡𐴌 𐴀𐴞𐴥𐴏𐴝𐴉𐴠, 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴔𐴝𐴦𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴔𐴝𐴕𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕 𐴃𐴡 𐴄𐴞𐴥𐴑.²”𐴁𐴝𐴉𐴔𐴝𐴦𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴞𐴥𐴁𐴝“ 𐴀𐴡𐴥𐴙𐴓𐴊𐴠 𐴖𐴝𐴦𐴊𐴝𐴌 𐴏𐴝𐴥𐴀𐴣𐴃𐴠 𐴉𐴡𐴀𐴘𐴓𐴝 𐴇𐴡𐴥𐴑𐴟𐴔, 𐴑𐴞 𐴈𐴡𐴘𐴓𐴠𐴥,³”𐴎𐴠𐴀𐴕𐴠 𐴃𐴟𐴣𐴀𐴝𐴥𐴣𐴌 𐴁𐴝𐴥𐴓𐴝𐴘 𐴀𐴡𐴥, 𐴀𐴝𐴦𐴌 𐴃𐴟𐴀𐴛 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴓𐴝𐴔𐴁𐴝 𐴇𐴡𐴥𐴘𐴧𐴝𐴃𐴢 𐴉𐴡𐴦.“

⁴𐴁𐴝𐴉𐴝𐴥𐴙𐴕, 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴒𐴟𐴐𐴧𐴝𐴤 𐴃𐴟𐴓𐴞𐴤 𐴕𐴡 𐴊𐴞𐴘𐴡, 𐴁𐴡𐴥𐴓𐴑𐴠 𐴔𐴝𐴓𐴞𐴑𐴡𐴌 𐴃𐴡𐴌𐴁𐴞𐴘𐴡𐴃𐴠 𐴀𐴠𐴊𐴧𐴠 𐴕𐴡𐴏𐴞𐴥𐴘𐴡𐴃𐴠 𐴀𐴞𐴥𐴃𐴝𐴌𐴝𐴌𐴠 𐴋𐴡𐴣𐴀𐴌 𐴒𐴡𐴌𐴡𐴤.

𐴒𐴟𐴓𐴝𐴔 𐴀𐴠𐴊𐴧𐴠 𐴒𐴞𐴌𐴡𐴥𐴏𐴢

⁵𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴢, 𐴊𐴞𐴓𐴡𐴌 𐴀𐴠𐴈𐴠𐴥𐴓𐴝𐴏𐴞𐴌 𐴏𐴝𐴥𐴀𐴣𐴃𐴠 𐴀𐴞𐴎𐴧𐴡𐴃𐴠 𐴀𐴠𐴊𐴧𐴠 𐴋𐴡𐴦𐴌𐴠 𐴃𐴟𐴣𐴀𐴝𐴥𐴌𐴝𐴌 𐴊𐴟𐴕𐴞𐴘𐴝𐴘𐴁𐴞 𐴒𐴞𐴌𐴡𐴥𐴏𐴢 𐴀𐴡𐴥𐴑𐴧𐴡𐴓𐴡𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴔𐴝𐴕𐴡, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴈𐴡𐴃𐴝𐴤 𐴀𐴡𐴥𐴘𐴃𐴡 𐴔𐴝𐴙𐴕𐴃𐴝;⁶𐴔𐴝𐴙𐴕𐴐𐴡𐴥𐴌𐴠 𐴑𐴟𐴥𐴐𐴞 𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴊𐴝𐴈𐴝𐴤𐴘𐴁𐴝𐴌 𐴕𐴞𐴘𐴡𐴃𐴠 𐴕𐴡, 𐴁𐴡𐴥𐴓𐴑𐴠 𐴔𐴡𐴀𐴏𐴞𐴤𐴌 𐴒𐴟𐴓𐴝𐴔 𐴀𐴞𐴥𐴏𐴝𐴉𐴠 𐴊𐴞𐴓𐴡𐴃𐴧𐴟 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴡𐴤.⁷𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴅𐴟𐴏𐴠 𐴇𐴠𐴥𐴊𐴔𐴡𐴃𐴢 𐴒𐴡𐴌𐴡𐴤, 𐴎𐴠𐴀𐴕 𐴕𐴞𐴥𐴑𐴞 𐴔𐴝𐴓𐴞𐴑𐴡𐴌𐴠 𐴁𐴠 𐴒𐴡𐴌𐴡𐴤𐴌, 𐴀𐴞𐴕𐴏𐴝𐴥𐴕𐴡𐴌𐴠 𐴕𐴡;⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴎𐴠𐴦 𐴎𐴠 𐴒𐴡𐴔 𐴈𐴝𐴔 𐴒𐴡𐴌𐴠𐴥 𐴀𐴞𐴥𐴃𐴠 𐴇𐴞𐴥𐴘𐴝𐴕𐴡𐴌 𐴁𐴡𐴐𐴧𐴞𐴥𐴐𐴢 𐴔𐴝𐴓𐴞𐴑𐴡𐴌 𐴃𐴡𐴌𐴉𐴡𐴥𐴃𐴧𐴟 𐴉𐴝𐴘𐴁𐴡, 𐴀𐴞𐴥𐴃𐴠 𐴒𐴟𐴓𐴝𐴔 𐴀𐴡𐴥𐴑 𐴘𐴝𐴥 𐴁𐴠𐴒𐴟𐴓𐴝𐴔.

⁹𐴒𐴞𐴌𐴡𐴥𐴏𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴞𐴥𐴃𐴝𐴌𐴝𐴌𐴠 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴏𐴡𐴥𐴓𐴧𐴟𐴑 𐴒𐴡𐴌𐴡𐴤, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴊𐴡𐴥𐴔𐴑𐴞 𐴊𐴞𐴥𐴘𐴝 𐴉𐴠𐴥𐴓𐴝𐴘𐴊𐴡; 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴏𐴔𐴝𐴕𐴡𐴃𐴢 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴞𐴥𐴃𐴝𐴌𐴝𐴌 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴒𐴞𐴌𐴡𐴥𐴏𐴢, 𐴀𐴝𐴦𐴌 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴇𐴡𐴕𐴡𐴤 𐴀𐴠𐴑𐴃𐴡𐴌𐴉𐴞𐴥𐴘𐴝 𐴕𐴝𐴥𐴘.

𐴀𐴝𐴓𐴧𐴝𐴌 𐴊𐴞𐴦𐴘𐴝 𐴀𐴝𐴥𐴃𐴞𐴘𐴝𐴌

¹⁰𐴀𐴝𐴇𐴠𐴥𐴌𐴞 𐴈𐴡𐴃𐴝𐴤 𐴀𐴡𐴥𐴙𐴓𐴊𐴠, 𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑 𐴓𐴡𐴘 𐴓𐴝𐴙𐴒𐴧𐴝 𐴃𐴝𐴥𐴑𐴞 𐴀𐴞𐴥𐴁𐴝𐴌 𐴑𐴟𐴊𐴟𐴌𐴟𐴃𐴡𐴌 𐴁𐴡𐴓𐴠 𐴔𐴡𐴎𐴁𐴟𐴃𐴢 𐴀𐴡𐴥𐴘𐴎𐴡𐴒𐴡𐴘.¹¹𐴓𐴝𐴌𐴝𐴥𐴘 𐴓𐴧𐴝 𐴀𐴝𐴓𐴧𐴝𐴌 𐴊𐴞𐴦𐴘𐴝 𐴃𐴝𐴔𐴝𐴥𐴔 𐴀𐴝𐴥𐴃𐴞𐴘𐴝𐴌 𐴉𐴞𐴕𐴊𐴞𐴥𐴉𐴠𐴓𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴁𐴞𐴓𐴞𐴥𐴐𐴡𐴌 𐴏𐴝𐴙𐴓𐴢 𐴀𐴡𐴥𐴑𐴧𐴡𐴓𐴡𐴌 𐴀𐴟𐴓𐴋𐴝 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴃𐴞𐴥𐴘𐴝𐴘 𐴉𐴝𐴌𐴡.¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌 𐴓𐴝𐴌𐴝𐴥𐴘 𐴃𐴡 𐴇𐴡𐴕𐴡𐴤 𐴀𐴞𐴕𐴏𐴝𐴥𐴕 𐴓𐴡𐴥𐴘 𐴕𐴡, 𐴁𐴡𐴥𐴓𐴑𐴠 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘, 𐴑𐴠𐴥𐴔𐴡𐴃𐴝 𐴀𐴡𐴓𐴝 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘, 𐴀𐴠𐴊𐴧𐴠 𐴀𐴠 𐴀𐴝𐴕𐴊𐴝𐴤𐴌 𐴊𐴟𐴕𐴞𐴘𐴝𐴙𐴌 𐴇𐴝𐴥𐴑𐴞𐴔 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘; 𐴘𐴝𐴥𐴕𐴞 𐴀𐴝𐴏𐴔𐴝𐴕𐴞 𐴎𐴝𐴒𐴝𐴃𐴢 𐴀𐴝𐴏𐴠𐴤 𐴊𐴠 𐴀𐴞𐴁𐴞𐴓𐴞𐴥𐴐𐴡𐴌 𐴁𐴟𐴥𐴃𐴉𐴠𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴠𐴥𐴕𐴝.¹³𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴊𐴞𐴦𐴘𐴝 𐴇𐴝𐴥𐴀𐴌 𐴀𐴝𐴥𐴃𐴞𐴘𐴝𐴌 𐴉𐴞𐴕𐴊𐴞𐴥𐴉𐴠𐴓𐴡, 𐴎𐴠𐴀𐴕𐴠 𐴎𐴠 𐴊𐴞𐴕 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴁𐴞𐴓𐴞𐴥𐴐𐴠 𐴇𐴝𐴥𐴔𐴓𐴝 𐴒𐴡𐴌𐴞𐴥𐴁𐴡 𐴇𐴠𐴥𐴣𐴃𐴧𐴠 𐴔𐴟𐴑𐴝𐴁𐴠𐴓𐴝 𐴒𐴡𐴌𐴞𐴥 𐴉𐴝𐴌𐴡, 𐴀𐴝𐴦𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴇𐴡𐴥𐴃𐴡𐴔 𐴒𐴡𐴌𐴞𐴥𐴉𐴠𐴓𐴝𐴘 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴃𐴞𐴥𐴘𐴝𐴘 𐴃𐴝𐴥𐴑𐴞 𐴉𐴝𐴌𐴡.¹⁴𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴏𐴡𐴥𐴘𐴧𐴞 𐴓𐴡𐴥𐴘 𐴒𐴟𐴄𐴢 𐴊𐴞, 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴎𐴝𐴔𐴝 𐴉𐴞𐴕𐴊𐴞𐴥,¹⁵𐴀𐴠𐴊𐴧𐴠 𐴐𐴝𐴥𐴕𐴃𐴞𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴁𐴡𐴓𐴧𐴝 𐴕𐴝𐴓𐴢 𐴃𐴝𐴥𐴑𐴞𐴃𐴡 𐴐𐴠𐴕𐴄𐴝𐴥𐴌 𐴉𐴞𐴕𐴊𐴞𐴥, 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴃𐴞𐴥𐴘𐴝𐴘 𐴃𐴝𐴥𐴑𐴡.¹⁶𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴞𐴔𐴝𐴕𐴡𐴌 𐴋𐴝𐴥𐴓𐴢 𐴓𐴡𐴘𐴌𐴝𐴑𐴡𐴥, 𐴎𐴞𐴘𐴝𐴥𐴕 𐴓𐴡𐴥𐴘 𐴃𐴟𐴣𐴀𐴝𐴥𐴌𐴝 𐴀𐴞𐴁𐴞𐴓𐴞𐴥𐴐𐴡𐴌 𐴃𐴝𐴔𐴝𐴥𐴔 𐴀𐴡𐴦𐴘𐴕𐴞 𐴃𐴞𐴌 𐴀𐴡𐴥𐴑𐴧𐴡𐴓𐴢 𐴕𐴞𐴉𐴝𐴥𐴘𐴉𐴠𐴓𐴝𐴘 𐴉𐴝𐴌𐴞𐴁𐴝𐴥.¹⁷𐴕𐴠𐴅𐴝𐴃𐴡𐴌𐴠 𐴄𐴟𐴉𐴞𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴔𐴝𐴃𐴝𐴥𐴃𐴢 𐴊𐴡, 𐴀𐴝𐴦𐴌 𐴂𐴝𐴑-𐴌𐴟𐴀𐴌 𐴃𐴡𐴓𐴟𐴖𐴝𐴌 𐴓𐴡𐴘𐴌𐴝𐴑𐴡𐴥, 𐴎𐴞𐴘𐴝𐴥𐴕 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔.

¹⁸𐴂𐴝𐴑-𐴌𐴟𐴀𐴌 𐴁𐴡𐴓𐴠 𐴇𐴝𐴥𐴔𐴞𐴐𐴝 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴊𐴟𐴖𐴝 𐴀𐴠𐴊𐴧𐴠 𐴉𐴡𐴥𐴌𐴞𐴘𐴝𐴃𐴢 𐴀𐴡𐴥𐴑𐴧𐴡𐴓𐴢 𐴒𐴡𐴌𐴝𐴥𐴃𐴢 𐴃𐴝𐴥𐴑𐴡; 𐴀𐴝𐴦𐴌 𐴇𐴠𐴥 𐴕𐴞𐴘𐴡𐴃𐴠 𐴉𐴟𐴌𐴝𐴉𐴟𐴌𐴞 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴏𐴠𐴃𐴡𐴕 𐴃𐴝𐴥𐴑𐴡 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴃𐴝𐴔𐴝𐴥𐴔 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴃𐴝𐴥𐴑𐴡.¹⁹𐴀𐴝𐴣𐴀𐴌 𐴓𐴧𐴝 𐴘𐴡𐴥 𐴊𐴟𐴖𐴝 𐴒𐴡𐴙𐴅𐴧𐴡𐴥, 𐴎𐴠𐴀𐴕𐴠 𐴎𐴠𐴣𐴃𐴧𐴠𐴥 𐴀𐴝𐴕𐴞𐴤 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴇𐴠𐴥𐴣𐴃𐴧𐴠 𐴀𐴝𐴣𐴀𐴌𐴠𐴥 𐴀𐴠𐴕𐴊𐴞𐴓𐴧𐴝 𐴓𐴡𐴉𐴎𐴡𐴥 𐴀𐴡𐴥𐴑𐴧𐴡𐴓𐴢 𐴊𐴞𐴦𐴘𐴝 𐴎𐴝 𐴎𐴞𐴀𐴕 𐴓𐴡𐴥𐴘 𐴀𐴝𐴀𐴛 𐴇𐴞𐴥𐴔𐴧𐴡𐴃𐴢 𐴒𐴡𐴥𐴌𐴞 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴒𐴟𐴉𐴡𐴕𐴞 𐴎𐴝𐴇𐴠𐴥𐴌 𐴒𐴡𐴌𐴞𐴥 𐴉𐴝𐴙𐴅𐴧𐴟𐴔,²⁰𐴎𐴞𐴘𐴝𐴥𐴕𐴡𐴓𐴧𐴝 𐴀𐴝𐴀𐴛 𐴁𐴡𐴕 𐴀𐴝𐴏𐴞𐴤 𐴊𐴠 𐴇𐴝𐴥𐴓𐴡𐴃𐴡𐴃𐴢 𐴀𐴡𐴥 𐴀𐴠𐴎𐴧𐴡𐴕 𐴕𐴡𐴔𐴝𐴙𐴕𐴊𐴝 𐴀𐴞𐴥𐴏𐴝𐴉𐴠 𐴈𐴝𐴔 𐴒𐴡𐴌𐴞𐴥𐴌. 𐴊𐴟𐴖𐴝 𐴒𐴡𐴌𐴞𐴥𐴁𐴝 𐴊𐴠, 𐴀𐴝𐴀𐴛 𐴇𐴞𐴥𐴘𐴝𐴕 𐴁𐴡𐴘𐴧𐴝𐴕 𐴒𐴡𐴙𐴃𐴧𐴠𐴤 𐴀𐴠𐴀𐴕 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴒𐴡𐴌𐴞𐴥 𐴉𐴝𐴌𐴞 𐴉𐴝𐴥𐴕, 𐴎𐴠𐴊𐴧𐴟𐴥𐴌 𐴒𐴡𐴥𐴌𐴞 𐴀𐴝𐴣𐴀𐴃𐴧𐴟 𐴒𐴡𐴌𐴞𐴥𐴁𐴝𐴌 𐴎𐴡𐴌𐴟𐴌.

𐴀𐴝𐴇𐴠𐴥𐴌𐴞 𐴏𐴡𐴥𐴓𐴝𐴔

²¹𐴀𐴝𐴣𐴀𐴌 𐴇𐴝𐴥𐴓𐴡𐴃𐴢 𐴑𐴠𐴀𐴕 𐴀𐴝𐴏𐴠𐴤 𐴀𐴝𐴦𐴌 𐴀𐴝𐴀𐴛 𐴑𐴞𐴦 𐴒𐴡𐴌𐴞𐴥𐴌 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝 𐴎𐴝𐴕𐴡 𐴉𐴝𐴥𐴕, 𐴔𐴝𐴓𐴞𐴑𐴡𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤 𐴊𐴠 𐴀𐴝𐴊𐴡𐴙𐴅𐴧𐴝 𐴁𐴝𐴥𐴘 𐴀𐴠𐴊𐴧𐴠 𐴁𐴞𐴐𐴧𐴝𐴥𐴐𐴊𐴝𐴌 𐴈𐴝𐴥𐴀𐴊𐴠𐴔 𐴃𐴟𐴑𐴞𐴑𐴟𐴏𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴕𐴝𐴘𐴊𐴞𐴁𐴡,²²𐴎𐴞𐴁𐴝𐴤𐴌𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴠𐴃𐴡𐴓𐴧𐴝𐴤 𐴊𐴞𐴉𐴠𐴍𐴝𐴥𐴙𐴌, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌 𐴁𐴝𐴦𐴁𐴟𐴃𐴠 𐴎𐴝𐴕𐴡, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴘𐴠 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴃𐴡𐴏𐴡𐴥𐴓𐴧𐴞 𐴊𐴠𐴥.

²³𐴃𐴟𐴣𐴀𐴝𐴥𐴌𐴝 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴌 𐴖𐴡𐴌𐴠 𐴀𐴝𐴓𐴧𐴝 𐴁𐴝𐴉𐴡𐴌 𐴀𐴠𐴊𐴧𐴠 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴃𐴡𐴌𐴉𐴡𐴥𐴃𐴧𐴟 𐴐𐴝𐴥𐴕𐴃𐴞, 𐴀𐴞𐴔𐴝𐴕, 𐴀𐴠𐴊𐴧𐴠 𐴔𐴟𐴇𐴝𐴥𐴁𐴧𐴡𐴃𐴢 𐴕𐴝𐴎𐴞𐴓𐴢 𐴀𐴡𐴥𐴑.²⁴𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌𐴠 𐴀𐴡𐴉𐴟𐴥𐴌𐴝𐴕𐴞 𐴔𐴟𐴇𐴝𐴥𐴁𐴧𐴡𐴃𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴎𐴝𐴌𐴞 𐴃𐴝𐴥𐴑𐴡𐴗𐴑.

The Word for the World International

https://app.library.bible/content/87faca8b51c22590