Read 𐴉𐴞𐴓𐴞𐴤𐴂𐴧𐴝𐴘𐴀𐴡𐴥𐴓𐴢 2

𐴉𐴞𐴓𐴞𐴤𐴂𐴧𐴝𐴘𐴀𐴡𐴥𐴓𐴢2

𐴔𐴡𐴀𐴏𐴞𐴤𐴌 𐴕𐴞𐴌𐴡𐴥𐴐𐴞 𐴀𐴠𐴊𐴧𐴠 𐴋𐴡𐴣𐴀𐴌𐴒𐴞𐴌𐴞

¹𐴇𐴠𐴥𐴃𐴡𐴓𐴧𐴝, 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢 𐴀𐴞𐴥𐴏𐴝𐴉𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴡𐴤 𐴅𐴡𐴏𐴁𐴝 𐴃𐴝𐴥𐴑𐴞𐴓𐴠, 𐴔𐴟𐴇𐴝𐴥𐴁𐴧𐴡𐴃𐴡𐴌 𐴇𐴡𐴕𐴡𐴤 𐴃𐴡𐴏𐴡𐴥𐴓𐴧𐴞 𐴃𐴝𐴥𐴑𐴞𐴓𐴠, 𐴂𐴝𐴑-𐴌𐴟𐴀𐴌 𐴇𐴡𐴕𐴡𐴤 𐴃𐴝𐴦𐴓𐴟𐴑𐴝𐴃𐴢 𐴃𐴝𐴥𐴑𐴞𐴓𐴠, 𐴀𐴝𐴦𐴌 𐴇𐴡𐴕𐴡𐴤 𐴀𐴝𐴊𐴡𐴌 𐴀𐴠𐴊𐴧𐴠 𐴌𐴝𐴇𐴝𐴥𐴔 𐴃𐴝𐴥𐴑𐴞𐴓𐴠,²𐴀𐴠𐴕𐴊𐴞𐴓𐴧𐴝 𐴒𐴡𐴌𐴞𐴥 𐴀𐴝𐴣𐴀𐴌 𐴑𐴟𐴥𐴐𐴞 𐴉𐴟𐴌𐴝 𐴒𐴡𐴌𐴡𐴤: 𐴀𐴠𐴑 𐴔𐴡𐴕 𐴀𐴡𐴥𐴘𐴧𐴡𐴌𐴠, 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴌𐴝𐴑𐴞𐴥𐴘𐴡𐴌𐴠, 𐴎𐴝𐴕𐴠 𐴀𐴠𐴑 𐴀𐴡𐴥𐴘𐴧𐴡𐴌𐴠, 𐴀𐴠𐴊𐴧𐴠 𐴀𐴠𐴑𐴞𐴤 𐴑𐴞𐴥𐴘𐴝𐴓𐴢 𐴌𐴝𐴑𐴞𐴥𐴘𐴡𐴌𐴠.³𐴕𐴞𐴎𐴡𐴌 𐴉𐴝𐴥𐴘𐴊𐴝𐴌 𐴕𐴞𐴘𐴡𐴃𐴠 𐴘𐴝𐴥 𐴁𐴝𐴌𐴞𐴥𐴑 𐴑𐴟𐴥𐴖𐴝𐴓𐴝𐴘 𐴁𐴡𐴓𐴧𐴝 𐴑𐴠𐴏𐴧𐴟𐴥 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴕𐴞𐴌𐴡𐴥𐴐𐴢 𐴀𐴡𐴥𐴘 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴕𐴞𐴎𐴡𐴌 𐴃𐴟𐴥𐴖𐴝𐴌𐴡 𐴀𐴟𐴃𐴧𐴡𐴔 𐴁𐴝𐴥𐴉𐴞𐴘𐴡.⁴𐴏𐴞𐴌𐴞𐴥𐴉𐴢 𐴕𐴞𐴎𐴡𐴌 𐴉𐴝𐴥𐴘𐴊𐴝 𐴕𐴡 𐴏𐴝𐴘𐴧𐴡𐴥, 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴉𐴝𐴥𐴘𐴊𐴝 𐴘𐴡𐴥 𐴏𐴝𐴘𐴧𐴡𐴥.

⁵𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠 𐴑𐴞𐴥𐴘𐴝𐴓𐴢 𐴌𐴝𐴑𐴡𐴥 𐴎𐴞𐴘𐴝𐴥𐴕 𐴔𐴡𐴀𐴏𐴞𐴤 𐴀𐴞𐴏𐴝𐴤𐴃𐴧𐴟 𐴘𐴡𐴥 𐴀𐴝𐴐𐴧𐴞𐴥𐴓𐴢:⁶𐴀𐴞𐴥𐴁𐴝 𐴃𐴡 𐴀𐴝𐴓𐴧𐴝𐴌 𐴏𐴟𐴥𐴌𐴡𐴃𐴠 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴥𐴘𐴓𐴠 𐴘𐴡,𐴀𐴝𐴓𐴧𐴝𐴌 𐴉𐴟𐴥𐴀𐴝𐴙𐴕𐴧𐴝𐴒𐴞𐴌𐴞𐴌𐴠 𐴏𐴞𐴁𐴞 𐴊𐴡𐴥𐴌𐴞 𐴌𐴝𐴑𐴞𐴥𐴊𐴞𐴃𐴡 𐴕𐴡𐴥 𐴏𐴝𐴀,⁷𐴁𐴡𐴥𐴓𐴑𐴠 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌𐴠𐴥 𐴇𐴝𐴥𐴓𐴞 𐴒𐴡𐴌𐴞𐴥𐴉𐴠𐴓𐴝𐴙𐴓𐴢,𐴒𐴟𐴓𐴝𐴔 𐴁𐴡𐴕𐴞,𐴀𐴞𐴕𐴏𐴝𐴥𐴕 𐴀𐴞𐴥𐴏𐴝𐴉𐴠 𐴎𐴡𐴕𐴡𐴔 𐴓𐴡𐴘𐴧𐴡𐴌𐴠.⁸𐴀𐴞𐴥𐴁𐴝𐴘𐴠 𐴀𐴞𐴕𐴏𐴝𐴥𐴕𐴞 𐴐𐴡𐴑𐴡𐴥𐴓𐴠 𐴃𐴝𐴥𐴑𐴞,𐴔𐴡𐴦𐴃𐴢 𐴉𐴡𐴙𐴅𐴧𐴡𐴕𐴃𐴡, 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴑𐴟𐴥𐴌𐴟𐴐𐴡𐴌 𐴖𐴡𐴌𐴠 𐴔𐴡𐴌𐴠 𐴉𐴡𐴙𐴅𐴧𐴡𐴕𐴃𐴡 𐴉𐴡𐴥𐴌𐴔𐴝𐴊𐴝𐴌 𐴀𐴡𐴥𐴘𐴧𐴡𐴌𐴠𐴕𐴞𐴎𐴡𐴌𐴠𐴥 𐴕𐴞𐴌𐴡𐴥𐴐𐴢 𐴒𐴡𐴙𐴅𐴧𐴞𐴥𐴓𐴢.

⁹𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴃𐴡 𐴀𐴝𐴓𐴧𐴝𐴘𐴠 𐴘𐴡𐴥 𐴀𐴞𐴥𐴁𐴝𐴌𐴠 𐴁𐴞𐴐𐴞𐴤 𐴀𐴟𐴣𐴏𐴡𐴓𐴢 𐴃𐴡𐴑𐴧𐴝𐴃𐴢 𐴃𐴟𐴙𐴓𐴧𐴠𐴥,𐴀𐴝𐴦𐴌 𐴀𐴞𐴥𐴁𐴝𐴌𐴠 𐴕𐴝𐴔 𐴖𐴝𐴀𐴕 𐴊𐴞𐴦𐴘𐴠𐴥 𐴎𐴞𐴘𐴝𐴥𐴕 𐴇𐴝𐴥𐴀𐴌 𐴕𐴝𐴔𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌,¹⁰𐴎𐴠𐴀𐴕𐴠 𐴀𐴞𐴏𐴝𐴤 𐴕𐴝𐴔𐴡𐴃𐴢 𐴇𐴝𐴥𐴀𐴌 𐴑𐴞𐴘𐴠𐴥 𐴀𐴝𐴣𐴍𐴟𐴥 𐴉𐴠𐴥𐴓𐴝,𐴇𐴞𐴥𐴀𐴕 𐴀𐴝𐴏𐴔𐴝𐴕𐴡𐴃𐴢 𐴃𐴡𐴥𐴑 𐴘𐴝𐴥 𐴎𐴡𐴁𐴞𐴕 𐴀𐴡𐴃𐴢, 𐴘𐴝𐴥 𐴎𐴡𐴁𐴞𐴕𐴡𐴌 𐴕𐴞𐴏𐴠;¹¹𐴀𐴝𐴦𐴌 𐴇𐴝𐴥𐴀𐴌 𐴎𐴡𐴁𐴝𐴕𐴠 𐴎𐴠𐴕 𐴁𐴝𐴉𐴢 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴀𐴡𐴥𐴘 𐴁𐴡𐴓𐴧𐴝 𐴐𐴞𐴥𐴑𐴝𐴌 𐴒𐴡𐴌𐴠𐴥 𐴊𐴠,𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴔𐴝𐴓𐴞𐴑.

𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴘𐴝𐴙𐴃𐴢 𐴏𐴠𐴌𐴝𐴑𐴡𐴌 𐴋𐴡𐴥𐴙𐴓𐴧𐴝 𐴎𐴡𐴓𐴡𐴀𐴌

¹²𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴏𐴞𐴌𐴞𐴥𐴉𐴢 𐴀𐴝𐴣𐴀𐴌 𐴐𐴝𐴥𐴙𐴑𐴧𐴝𐴃𐴢 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴒𐴝𐴙𐴌𐴇𐴝𐴥𐴎𐴞𐴌𐴞𐴃𐴢 𐴇𐴝𐴥𐴔𐴞𐴐𐴝 𐴀𐴝𐴌𐴡𐴤 𐴉𐴡𐴥𐴌𐴔𐴝𐴊𐴝𐴌 𐴀𐴝𐴐𐴧𐴞𐴥𐴓𐴝, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴝𐴓𐴝 𐴋𐴡𐴦𐴌𐴠 𐴀𐴠𐴊𐴧𐴠 𐴇𐴝𐴉𐴝𐴕𐴞𐴌 𐴏𐴝𐴥𐴀𐴣𐴃𐴠 𐴕𐴞𐴎𐴡𐴌 𐴕𐴠𐴅𐴝𐴃𐴡𐴌 𐴈𐴝𐴔 𐴒𐴡𐴌𐴞𐴥𐴎𐴡,¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴃𐴡 𐴀𐴝𐴓𐴧𐴝𐴘𐴠 𐴀𐴠𐴥𐴕𐴝 𐴈𐴝𐴔 𐴒𐴡𐴌𐴠𐴥𐴌, 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴥𐴁𐴝𐴘𐴠 𐴑𐴟𐴥𐴐𐴞 𐴀𐴡𐴥 𐴊𐴠 𐴀𐴠𐴌𐴝𐴊𐴝 𐴉𐴟𐴌𐴝 𐴒𐴡𐴌𐴞𐴥𐴁𐴝𐴌 𐴔𐴡𐴕 𐴀𐴠𐴊𐴧𐴠 𐴀𐴝𐴔𐴡𐴥𐴓𐴢 𐴊𐴞𐴥 𐴁𐴡𐴓𐴧𐴝.

¹⁴𐴇𐴝𐴥𐴀𐴌 𐴑𐴠𐴏𐴧𐴟𐴥 𐴐𐴠𐴥𐴑𐴝𐴘𐴡𐴃𐴢 𐴏𐴝𐴥𐴌𐴝 𐴀𐴠𐴊𐴧𐴠 𐴃𐴡𐴌𐴑𐴝𐴃𐴡𐴌𐴑𐴞 𐴏𐴝𐴥𐴌𐴝 𐴒𐴡𐴙𐴅𐴧𐴡𐴥,¹⁵𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴁𐴠𐴈𐴡𐴏𐴟𐴥𐴌 𐴀𐴠𐴊𐴧𐴠 𐴔𐴝𐴦𐴏𐴟𐴔 𐴁𐴡𐴕𐴞, 𐴀𐴠 𐴎𐴡𐴁𐴝𐴕𐴝𐴌 𐴄𐴠𐴍𐴝𐴤 𐴀𐴠𐴊𐴧𐴠 𐴁𐴝𐴥𐴀𐴣𐴌𐴝 𐴔𐴝𐴙𐴕𐴐𐴡𐴥𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴀𐴝𐴓𐴧𐴝𐴌 𐴊𐴝𐴑 𐴏𐴝𐴥𐴌𐴝 𐴉𐴟𐴀𐴝𐴙𐴕 𐴄𐴡𐴥𐴀𐴌𐴡, 𐴎𐴠𐴃𐴝𐴌𐴝𐴤𐴌 𐴔𐴝𐴎𐴠𐴥 𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴘𐴝𐴙𐴃𐴢 𐴏𐴠𐴌𐴝𐴑𐴡𐴌 𐴋𐴡𐴥𐴙𐴓𐴧𐴝 𐴎𐴡𐴓𐴡𐴀𐴌,¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴞𐴕𐴊𐴞𐴒𐴞𐴌 𐴑𐴝𐴓𐴝𐴔𐴡𐴌𐴠 𐴔𐴡𐴎𐴁𐴟𐴃𐴡𐴌 𐴏𐴝𐴥𐴀𐴣𐴃𐴠 𐴊𐴡𐴥𐴌𐴞 𐴀𐴝𐴏𐴡𐴤; 𐴇𐴠𐴥𐴃𐴡𐴓𐴧𐴝 𐴔𐴡𐴀𐴏𐴞𐴤𐴌 𐴖𐴝𐴦𐴉𐴠𐴏𐴞𐴌 𐴊𐴞𐴕 𐴀𐴝𐴀𐴛 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴉𐴝𐴙𐴅𐴧𐴟𐴔 𐴊𐴠, 𐴀𐴝𐴀𐴛 𐴕𐴡 𐴁𐴠𐴇𐴝𐴌 𐴊𐴟𐴣𐴙𐴅𐴧𐴞𐴥 𐴀𐴝𐴦𐴌 𐴕𐴡 𐴁𐴠𐴇𐴝𐴌 𐴔𐴠𐴀𐴕𐴧𐴡𐴃𐴢 𐴒𐴡𐴙𐴅𐴧𐴞𐴥.¹⁷𐴉𐴟𐴥𐴕𐴡, 𐴎𐴡𐴊𐴞 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕𐴡𐴌 𐴇𐴠𐴥𐴊𐴔𐴡𐴃𐴡𐴌 𐴀𐴠𐴊𐴧𐴠 𐴑𐴟𐴌𐴁𐴝𐴕𐴞𐴌 𐴖𐴡𐴌𐴠 𐴕𐴞𐴎𐴡𐴌𐴠𐴥 𐴀𐴟𐴥𐴊𐴧𐴗𐴝 𐴌𐴡𐴐𐴢 𐴑𐴟𐴌𐴁𐴝𐴕𐴞𐴌 𐴋𐴡𐴥𐴙𐴓𐴧𐴝 𐴋𐴝𐴥𐴓𐴞𐴊𐴞𐴘𐴝 𐴉𐴡𐴌𐴠, 𐴃𐴡𐴀 𐴀𐴝𐴀𐴛 𐴑𐴟𐴥𐴐𐴞 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞 𐴒𐴡𐴙𐴅𐴧𐴟𐴥𐴔.¹⁸𐴃𐴟𐴣𐴀𐴝𐴥𐴌𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴑𐴟𐴥𐴐𐴞 𐴀𐴡𐴥, 𐴀𐴝𐴦𐴌 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞 𐴒𐴡𐴌𐴡𐴤.

𐴃𐴞𐴔𐴡𐴥𐴃𐴞 𐴀𐴠𐴊𐴧𐴠 𐴀𐴠𐴂𐴝𐴉𐴡𐴌𐴡𐴊𐴞𐴃𐴟𐴏𐴡𐴌 𐴁𐴝𐴦𐴁𐴟𐴃𐴠

¹⁹𐴀𐴝𐴀𐴛 𐴀𐴝𐴐𐴝𐴤 𐴒𐴡𐴌𐴞𐴥𐴌, 𐴔𐴝𐴓𐴞𐴑 𐴀𐴞𐴏𐴝𐴤𐴘𐴠 𐴏𐴝𐴘𐴓𐴠𐴥 𐴀𐴝𐴀𐴛 𐴃𐴞𐴔𐴡𐴥𐴃𐴞𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴇𐴝𐴥𐴌𐴝 𐴊𐴞𐴉𐴠𐴍𐴝𐴥𐴘𐴧𐴟𐴔, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴈𐴡𐴥𐴁𐴡𐴌 𐴉𐴟𐴥𐴕𐴞 𐴀𐴝𐴀𐴛 𐴘𐴡𐴥 𐴃𐴡𐴏𐴡𐴥𐴓𐴧𐴞 𐴉𐴝𐴘.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴃𐴧𐴟 𐴘𐴡𐴥𐴒𐴧𐴗𐴝𐴌 𐴋𐴡𐴥𐴙𐴓𐴧𐴝 𐴀𐴝𐴌 𐴑𐴞𐴘𐴡𐴥 𐴕𐴝𐴥𐴘, 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴠𐴈𐴠𐴥𐴓𐴝𐴏𐴞𐴌 𐴏𐴝𐴥𐴀𐴣𐴃𐴠 𐴏𐴞𐴕𐴃𐴝𐴁𐴝𐴥𐴉𐴝𐴕𐴝 𐴒𐴡𐴌𐴠𐴥.²¹𐴁𐴠𐴒𐴧𐴟𐴥𐴕𐴠 𐴕𐴞𐴎𐴡𐴌 𐴒𐴟𐴥𐴕𐴡𐴃𐴢 𐴁𐴠 𐴓𐴝𐴒𐴞 𐴀𐴝𐴏𐴠𐴤, 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴒𐴟𐴥𐴕𐴡𐴃𐴢 𐴕𐴡.²²𐴓𐴠𐴑𐴞𐴕 𐴃𐴞𐴔𐴡𐴥𐴃𐴞𐴌 𐴑𐴞𐴔𐴡𐴃𐴢 𐴏𐴝𐴥𐴁𐴟𐴃𐴢 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴃𐴡 𐴃𐴟𐴣𐴀𐴝𐴥𐴌𐴝 𐴎𐴝𐴕𐴡, 𐴑𐴞 𐴈𐴡𐴘𐴓𐴠𐴥, 𐴉𐴟𐴖𐴝𐴘𐴠 𐴎𐴠𐴕𐴊𐴞𐴓𐴧𐴝 𐴁𐴝𐴉𐴡𐴌 𐴉𐴟𐴥𐴖𐴝𐴣𐴃𐴞 𐴔𐴠𐴀𐴕𐴧𐴡𐴃𐴢 𐴒𐴡𐴌𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴈𐴡𐴥𐴁𐴡𐴌 𐴉𐴡𐴥𐴓𐴝𐴓𐴧𐴝 𐴔𐴠𐴀𐴕𐴧𐴡𐴃𐴢 𐴒𐴡𐴙𐴅𐴧𐴠𐴥.²³𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴀𐴝𐴐𐴝𐴤 𐴒𐴡𐴌𐴞𐴥𐴌, 𐴀𐴝𐴣𐴀𐴌 𐴇𐴝𐴥𐴓𐴡𐴃𐴢 𐴑𐴞𐴦 𐴀𐴡𐴥𐴘𐴁𐴡 𐴇𐴞𐴥𐴘𐴝𐴕 𐴎𐴝𐴕𐴞 𐴉𐴝𐴙𐴓𐴧𐴠 𐴔𐴡𐴃𐴧𐴡𐴌 𐴀𐴝𐴀𐴛 𐴘𐴡𐴥𐴒𐴧𐴗𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴘𐴧𐴟𐴔.²⁴𐴀𐴝𐴦𐴌 𐴀𐴝𐴣𐴀𐴃𐴧𐴟 𐴔𐴝𐴓𐴞𐴑𐴡𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴀𐴝𐴏𐴠𐴤 𐴊𐴠 𐴑𐴞, 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴁𐴞𐴐𐴞𐴤 𐴇𐴝𐴥𐴌𐴝 𐴀𐴝𐴙𐴐𐴧𐴟𐴤𐴔.

²⁵𐴓𐴠𐴑𐴞𐴕 𐴀𐴝𐴣𐴀𐴌 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘 𐴀𐴠𐴂𐴝𐴉𐴡𐴌𐴡𐴊𐴞𐴃𐴟𐴏𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴖𐴝𐴦𐴉𐴠𐴏𐴢 𐴊𐴞𐴉𐴠𐴍𐴝𐴥𐴘𐴊𐴡𐴕 𐴎𐴡𐴌𐴟𐴌𐴞 𐴁𐴡𐴓𐴞 𐴁𐴝𐴥𐴉𐴞𐴌, 𐴎𐴞𐴁𐴝𐴤 𐴀𐴝𐴣𐴀𐴌 𐴏𐴝𐴥𐴀𐴣𐴃𐴞 𐴈𐴝𐴔-𐴒𐴡𐴌𐴡𐴤𐴘𐴝 𐴀𐴠𐴊𐴧𐴠 𐴏𐴝𐴥𐴀𐴣𐴃𐴞 𐴉𐴡𐴥𐴗𐴏𐴢, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴈𐴡𐴥𐴁𐴡𐴌𐴒𐴗𐴝 𐴘𐴡𐴥, 𐴎𐴞𐴁𐴝𐴤𐴌𐴠 𐴀𐴝𐴣𐴀𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴊𐴞𐴉𐴠𐴍𐴝𐴥𐴘𐴓𐴝.²⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴃𐴧𐴟 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴏𐴝𐴘𐴃𐴡𐴥 𐴑𐴟𐴥𐴁𐴢 𐴔𐴡𐴕𐴠𐴈𐴡𐴀𐴌, 𐴀𐴝𐴦𐴌 𐴘𐴡𐴥𐴒𐴧𐴗𐴝 𐴀𐴡𐴐𐴟𐴥𐴑𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝 𐴉𐴟𐴥𐴙𐴕𐴧𐴡 𐴊𐴠 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝 𐴉𐴠𐴌𐴠𐴐𐴝𐴕𐴞𐴃𐴢 𐴀𐴝𐴏𐴠𐴤.²⁷𐴁𐴠𐴐𐴡𐴥𐴑, 𐴘𐴡𐴥𐴒𐴧𐴗𐴝 𐴀𐴡𐴐𐴟𐴥𐴑𐴠 𐴔𐴡𐴌𐴡𐴕-𐴔𐴡𐴌𐴡𐴕 𐴀𐴡𐴥𐴀𐴙𐴓𐴢, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴙𐴅𐴧𐴠𐴥; 𐴏𐴞𐴌𐴞𐴥𐴉𐴢 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴖𐴡𐴌𐴠 𐴘𐴡𐴥, 𐴎𐴠𐴀𐴕𐴠 𐴀𐴝𐴣𐴀𐴃𐴧𐴟 𐴉𐴠𐴌𐴠𐴐𐴝𐴕𐴞𐴌 𐴖𐴡𐴌𐴠 𐴉𐴠𐴌𐴠𐴐𐴝𐴕𐴞 𐴕𐴡 𐴃𐴝𐴥𐴑𐴠.²⁸𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴌𐴠 𐴊𐴞𐴉𐴠𐴍𐴝𐴥𐴘 𐴁𐴡𐴓𐴧𐴝 𐴀𐴝𐴣𐴀𐴃𐴧𐴟 𐴀𐴝𐴌𐴡𐴤 𐴁𐴞𐴐𐴞𐴤 𐴑𐴞𐴥𐴘𐴝𐴓𐴢 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴘𐴡𐴥𐴒𐴧𐴗𐴝𐴌𐴠 𐴀𐴝𐴁𐴝𐴌 𐴊𐴠𐴑𐴞𐴥 𐴑𐴟𐴥𐴐𐴞 𐴀𐴡𐴥, 𐴀𐴝𐴦𐴌 𐴀𐴝𐴣𐴀𐴌 𐴏𐴞𐴕𐴃𐴝 𐴘𐴡𐴥 𐴈𐴡𐴔𐴠.²⁹𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴌𐴠 𐴔𐴝𐴓𐴞𐴑𐴡𐴌 𐴀𐴟𐴔𐴧𐴡𐴃𐴢 𐴀𐴞𐴥𐴏𐴝𐴉𐴠 𐴉𐴟𐴌𐴝𐴉𐴟𐴌𐴞 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴑𐴡𐴁𐴟𐴓𐴢 𐴒𐴡𐴙𐴅𐴧𐴡𐴥, 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝 𐴔𐴝𐴙𐴕𐴐𐴡𐴥𐴌𐴠 𐴀𐴞𐴎𐴧𐴡𐴃𐴢 𐴒𐴡𐴙𐴅𐴧𐴡𐴥;³⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴔𐴡𐴀𐴏𐴞𐴤𐴌 𐴈𐴝𐴔𐴡𐴌 𐴖𐴝𐴏𐴃𐴠𐴥 𐴔𐴡𐴦𐴃𐴡𐴌 𐴉𐴡𐴣𐴃𐴡𐴃𐴢 𐴀𐴡𐴥𐴀𐴙𐴓𐴢, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴣𐴀𐴌 𐴓𐴧𐴝 𐴎𐴠 𐴇𐴠𐴥𐴊𐴔𐴡𐴃𐴢 𐴈𐴡𐴔𐴞 𐴀𐴝𐴐𐴧𐴞𐴥𐴓𐴢 𐴇𐴞𐴥𐴀𐴕 𐴀𐴝𐴊𐴝𐴘 𐴒𐴡𐴌𐴞𐴥 𐴁𐴡𐴓𐴧𐴝 𐴕𐴞𐴎𐴡𐴌 𐴎𐴝𐴕 𐴉𐴡𐴙𐴅𐴧𐴡𐴕𐴃𐴡 𐴇𐴡𐴥𐴃𐴝𐴌𐴝𐴃𐴢 𐴉𐴠𐴥𐴓𐴝𐴙𐴓𐴢.

The Word for the World International

https://app.library.bible/content/87faca8b51c22590