Read 𐴔𐴡𐴃𐴞 5

𐴔𐴡𐴃𐴞5

𐴉𐴝𐴀𐴌𐴡𐴌 𐴖𐴡𐴌𐴠 𐴃𐴝𐴦𐴓𐴞𐴔

¹𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴊𐴠𐴑𐴞𐴥 𐴀𐴞𐴏𐴝𐴤 𐴀𐴠𐴒𐴧𐴗𐴝𐴤 𐴉𐴝𐴀𐴌𐴡𐴌 𐴖𐴡𐴌𐴠 𐴀𐴟𐴙𐴄𐴧𐴠𐴥𐴒𐴡𐴘, 𐴀𐴝𐴦𐴌 𐴀𐴞𐴥𐴁𐴝 𐴁𐴡𐴙𐴐𐴧𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥.²𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴟𐴦 𐴑𐴟𐴥𐴓𐴞 𐴀𐴞𐴥𐴃𐴝𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠:

𐴔𐴟𐴁𐴝𐴌𐴠𐴑

³”𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴌𐴟𐴀𐴈𐴝𐴥𐴕𐴞𐴌 𐴒𐴡𐴌𐴞𐴉𐴢,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴃𐴡 𐴀𐴞𐴥𐴃𐴝𐴌𐴝𐴌.⁴𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴉𐴠𐴌𐴠𐴐𐴝𐴕𐴞𐴃𐴢 𐴀𐴝𐴏𐴠𐴤,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡𐴏𐴡𐴥𐴓𐴧𐴞 𐴉𐴝𐴘𐴁𐴡.⁵𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴐𐴞𐴥𐴊𐴝,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡 𐴊𐴟𐴕𐴞𐴘𐴝𐴘 𐴔𐴞𐴌𐴝𐴏𐴢 𐴉𐴝𐴘𐴁𐴡.⁶𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴙𐴃𐴧𐴡𐴥 𐴁𐴟𐴥𐴑𐴧𐴞 𐴀𐴠𐴊𐴧𐴠 𐴃𐴞𐴌𐴝𐴥𐴐𐴞,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌 𐴇𐴠𐴥 𐴔𐴡𐴕𐴐𐴝𐴥 𐴉𐴟𐴌𐴝𐴉𐴟𐴌𐴞 𐴉𐴟𐴌𐴝 𐴀𐴡𐴥𐴘𐴁𐴡.⁷𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴌𐴝𐴇𐴝𐴥𐴔 𐴊𐴞𐴓𐴢 𐴀𐴡𐴓𐴝,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌𐴠 𐴌𐴝𐴇𐴝𐴥𐴔 𐴒𐴡𐴌𐴝𐴥 𐴎𐴝𐴘𐴁𐴡.⁸𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤𐴌 𐴊𐴞𐴓𐴢 𐴏𐴝𐴥𐴉𐴢,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌𐴠 𐴊𐴠𐴑𐴞𐴥𐴁𐴡.⁹𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴏𐴡𐴥𐴓𐴧𐴟𐴑 𐴒𐴡𐴌𐴞𐴥𐴊𐴠,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌𐴠 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕 𐴈𐴡𐴖𐴝𐴤 𐴎𐴝𐴘𐴁𐴡.¹⁰𐴔𐴟𐴁𐴝𐴌𐴠𐴑 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴡𐴤𐴕𐴠 𐴎𐴟𐴓𐴟𐴥𐴔 𐴉𐴝𐴦,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴃𐴡 𐴀𐴞𐴥𐴃𐴝𐴌𐴝𐴌.“

¹¹𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝, 𐴎𐴠𐴣𐴃𐴧𐴠𐴥 𐴔𐴝𐴙𐴕𐴐𐴠𐴥 𐴀𐴝𐴣𐴀𐴓𐴧𐴝 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴠𐴥, 𐴎𐴟𐴓𐴟𐴥𐴔 𐴒𐴡𐴌𐴠𐴥, 𐴀𐴠𐴊𐴧𐴠 𐴕𐴝 𐴇𐴡𐴥𐴑𐴧𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴁𐴝𐴦𐴁𐴟𐴃𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴁𐴟𐴌𐴝-𐴀𐴝𐴥𐴌𐴝 𐴀𐴡𐴥𐴑𐴧𐴡𐴓𐴢 𐴈𐴡𐴀.¹²𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝 𐴑𐴟𐴥𐴐𐴞 𐴒𐴡𐴙𐴅𐴧𐴡𐴥 𐴀𐴠𐴊𐴧𐴠 𐴑𐴟𐴥𐴐𐴞 𐴀𐴡𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴏𐴔𐴝𐴕𐴡𐴃𐴢 𐴋𐴡𐴣𐴀𐴌 𐴁𐴡𐴐𐴧𐴞𐴥𐴐𐴢 𐴀𐴝𐴏𐴠𐴤. 𐴃𐴟𐴣𐴀𐴝𐴥𐴌𐴝𐴌 𐴀𐴝𐴒𐴠 𐴎𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥 𐴔𐴝𐴙𐴕𐴐𐴠𐴥 𐴇𐴠𐴥𐴕𐴊𐴞𐴓𐴧𐴝 𐴎𐴟𐴓𐴟𐴥𐴔 𐴒𐴡𐴙𐴃𐴧𐴡𐴥.

𐴕𐴟𐴕 𐴀𐴠𐴊𐴧𐴠 𐴉𐴡𐴀𐴌

¹³”𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴊𐴟𐴕𐴞𐴘𐴝𐴙𐴌 𐴕𐴟𐴕; 𐴔𐴡𐴕𐴃𐴡𐴌 𐴎𐴡𐴊𐴞 𐴕𐴟𐴕𐴡𐴌 𐴊𐴡𐴑 𐴎𐴝𐴦𐴒𐴡𐴥𐴘, 𐴇𐴞𐴥𐴀𐴕𐴡𐴌𐴠 𐴑𐴠𐴀𐴕𐴒𐴡𐴌𐴞 𐴀𐴝𐴁𐴝𐴌 𐴕𐴟𐴕𐴐𐴝𐴥 𐴒𐴡𐴌𐴞𐴥 𐴉𐴝𐴌𐴝 𐴎𐴝𐴘𐴁𐴡؟ 𐴇𐴞𐴥𐴀𐴕 𐴃𐴡 𐴀𐴝𐴌 𐴇𐴡𐴕𐴡𐴤 𐴈𐴝𐴔𐴡𐴃𐴢 𐴕𐴟 𐴀𐴝𐴘𐴧𐴠𐴤. 𐴇𐴞𐴥𐴀𐴕𐴡𐴌𐴠 𐴁𐴝𐴀𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝, 𐴀𐴝𐴦𐴌 𐴔𐴝𐴙𐴕𐴐𐴡𐴥𐴌 𐴀𐴟𐴥𐴣𐴌𐴝𐴕𐴡𐴃𐴢 𐴉𐴡𐴌𐴠.

¹⁴”𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴊𐴟𐴕𐴞𐴘𐴝𐴙𐴌 𐴕𐴟𐴌. 𐴉𐴝𐴀𐴌𐴡𐴌 𐴖𐴡𐴌𐴠 𐴁𐴝𐴣𐴊𐴝𐴤 𐴒𐴞𐴥𐴘𐴠 𐴊𐴠 𐴐𐴡𐴥𐴀𐴌 𐴃𐴡 𐴓𐴟𐴑𐴝𐴘 𐴌𐴝𐴑𐴞𐴥 𐴉𐴝𐴌𐴝 𐴕𐴡 𐴎𐴝.¹⁵𐴇𐴡𐴕𐴡𐴤 𐴔𐴝𐴙𐴕𐴐𐴠𐴥 𐴏𐴠𐴌𐴝𐴑 𐴊𐴡𐴥𐴌𐴝𐴘 𐴁𐴝𐴥𐴙𐴌𐴡𐴌 𐴃𐴡𐴓𐴠 𐴌𐴝𐴑𐴠𐴥 𐴊𐴠 𐴕𐴝𐴥𐴘, 𐴁𐴡𐴥𐴓𐴑𐴠 𐴁𐴡𐴘𐴍𐴡𐴥𐴕𐴞𐴌 𐴖𐴡𐴌𐴠 𐴁𐴠 𐴌𐴝𐴑𐴠𐴥, 𐴃𐴡𐴥𐴘 𐴇𐴞𐴥𐴘𐴝𐴕𐴠 𐴒𐴡𐴥𐴌𐴡𐴃𐴢 𐴀𐴝𐴏𐴠𐴤 𐴊𐴠 𐴁𐴠𐴒𐴧𐴟𐴥𐴕𐴡𐴌𐴠 𐴉𐴡𐴀𐴌 𐴊𐴠𐴥.¹⁶𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞, 𐴃𐴟𐴣𐴀𐴝𐴥𐴌𐴝𐴌 𐴉𐴡𐴀𐴌 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴎𐴡𐴓𐴡𐴗𐴑, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌 𐴒𐴡𐴔 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴔𐴡𐴈𐴞𐴥𐴔𐴝 𐴒𐴡𐴌𐴠𐴥.

𐴐𐴡𐴥𐴌𐴞𐴘𐴡𐴃𐴡𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹⁷”𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴕𐴡 𐴄𐴝𐴥𐴀𐴙𐴅𐴧𐴡 𐴊𐴠 𐴑𐴞, 𐴀𐴝𐴀𐴛 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴘𐴝𐴥 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴐𐴞𐴥𐴑𐴧𐴝 𐴁𐴝𐴦𐴃𐴠𐴓𐴢 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴞𐴤. 𐴀𐴝𐴀𐴛 𐴇𐴞𐴥𐴀𐴕 𐴁𐴝𐴦𐴃𐴠𐴓𐴢 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴞𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴉𐴟𐴌𐴝 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴞𐴤 𐴊𐴠.¹⁸𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴃𐴡𐴥𐴊𐴞𐴕 𐴀𐴝𐴏𐴔𐴝𐴕 𐴎𐴡𐴁𐴞𐴕 𐴄𐴞𐴑𐴞 𐴃𐴝𐴥𐴑𐴞𐴁𐴡, 𐴐𐴡𐴥𐴌𐴞𐴘𐴡𐴃𐴢 𐴀𐴡𐴥 𐴄𐴞𐴑𐴞 𐴃𐴝𐴥𐴑𐴞𐴁𐴡, 𐴈𐴠𐴥𐴕𐴃𐴟 𐴇𐴡𐴕𐴡𐴤 𐴕𐴡𐴑𐴃𐴝𐴤 𐴘𐴝𐴥 𐴎𐴠𐴌 𐴎𐴡𐴁𐴡𐴌 𐴕𐴡 𐴁𐴟𐴥𐴎𐴞𐴁𐴡 𐴎𐴠𐴃𐴡𐴥𐴊𐴞𐴕 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴕𐴡𐴥 𐴀𐴡𐴥𐴘𐴧𐴡.¹⁹𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴇𐴠𐴥 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴁𐴧𐴠 𐴐𐴡𐴥𐴣𐴍𐴡 𐴀𐴠𐴑𐴧𐴝𐴥𐴕 𐴇𐴡𐴥𐴑𐴟𐴔𐴡𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴠𐴥 𐴀𐴝𐴦𐴌 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴃𐴧𐴡𐴥 𐴐𐴞𐴥𐴑𐴝, 𐴀𐴞𐴥𐴃𐴝𐴌𐴠 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴀𐴠𐴁𐴧𐴠 𐴐𐴡𐴥𐴣𐴍𐴡 𐴈𐴡𐴖𐴝𐴤 𐴎𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴇𐴞𐴥𐴀𐴕 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥 𐴀𐴠𐴊𐴧𐴠 𐴐𐴞𐴥𐴑𐴝, 𐴀𐴞𐴥𐴃𐴝𐴌𐴠 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴋𐴡𐴣𐴀𐴌 𐴈𐴡𐴖𐴝𐴤 𐴎𐴝𐴘𐴁𐴡.

²⁰”𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴕𐴡, 𐴃𐴟𐴣𐴀𐴝𐴥𐴌𐴝 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴁𐴞𐴓𐴑𐴟𐴥𐴓𐴢 𐴒𐴡𐴥𐴓𐴞 𐴕𐴡 𐴉𐴝𐴌𐴞𐴁𐴝𐴥.

𐴒𐴟𐴐𐴧𐴝𐴤𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

²¹”𐴃𐴟𐴣𐴀𐴝𐴥𐴌𐴝 𐴉𐴟𐴥𐴙𐴕𐴧𐴞𐴓𐴝 𐴊𐴠 𐴑𐴞, 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢, ’𐴑𐴟𐴥𐴕 𐴕𐴡 𐴒𐴡𐴌𐴞𐴥𐴁𐴝, 𐴎𐴠𐴦𐴕𐴞𐴑𐴞 𐴑𐴟𐴥𐴕 𐴒𐴡𐴌𐴠𐴥, 𐴀𐴞𐴥𐴃𐴝𐴃𐴧𐴟 𐴀𐴝𐴊𐴝𐴓𐴡𐴃𐴡𐴃𐴢 𐴎𐴟𐴖𐴝𐴁𐴢 𐴊𐴞𐴘𐴝 𐴉𐴡𐴌𐴞𐴁𐴡𐴥.‘²²𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴝𐴥𐴘 𐴀𐴡𐴌 𐴖𐴡𐴌𐴠 𐴒𐴟𐴐𐴧𐴝𐴤 𐴒𐴡𐴌𐴠𐴥, 𐴀𐴞𐴥𐴃𐴝𐴃𐴧𐴟 𐴀𐴝𐴊𐴝𐴓𐴡𐴃𐴡𐴃𐴢 𐴎𐴟𐴖𐴝𐴁𐴢 𐴊𐴞𐴘𐴝 𐴉𐴡𐴌𐴞𐴁𐴡𐴥. 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴝𐴥𐴘 𐴀𐴡𐴌𐴠, ’𐴃𐴟𐴘 𐴁𐴠𐴇𐴝𐴎𐴡𐴌‘ 𐴈𐴡𐴀, 𐴀𐴞𐴥𐴃𐴝𐴃𐴧𐴟 𐴁𐴡𐴌 𐴀𐴝𐴊𐴝𐴓𐴡𐴃𐴡𐴃𐴢 𐴎𐴟𐴖𐴝𐴁𐴢 𐴊𐴞𐴘𐴝 𐴉𐴡𐴌𐴞𐴁𐴡𐴥. 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴝𐴥𐴘 𐴀𐴡𐴌𐴠, ’𐴃𐴟𐴘 𐴁𐴠𐴑𐴟𐴉𐴢‘ 𐴈𐴡𐴀, 𐴀𐴞𐴥𐴃𐴠 𐴎𐴟𐴎𐴟𐴑𐴡𐴌 𐴀𐴡𐴦𐴙𐴕𐴡𐴌 𐴏𐴝𐴥𐴣𐴎𐴝𐴌 𐴓𐴝𐴦𐴘𐴠𐴑 𐴀𐴡𐴥𐴘𐴁𐴡.

²³”𐴇𐴠𐴥𐴃𐴡𐴓𐴧𐴝 𐴃𐴟𐴀𐴛 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴖𐴡𐴌𐴠 𐴑𐴟𐴌𐴁𐴝𐴕𐴞 𐴂𐴠𐴦𐴐𐴢 𐴒𐴡𐴌𐴞𐴥𐴁𐴝𐴐𐴧𐴡𐴃𐴢, 𐴎𐴡𐴊𐴞 𐴃𐴟𐴣𐴀𐴝𐴥𐴣𐴃𐴧𐴟 𐴔𐴡𐴕𐴡𐴃𐴢 𐴀𐴟𐴍𐴠𐴤 𐴊𐴠 𐴑𐴞, 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴃𐴧𐴟 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴑𐴠𐴏𐴧𐴟𐴥 𐴈𐴡𐴘𐴁𐴝𐴥𐴌 𐴀𐴝𐴏𐴠𐴤,²⁴𐴇𐴠𐴥𐴃𐴟𐴕𐴡𐴃𐴢 𐴃𐴟𐴣𐴀𐴝𐴥𐴣𐴌 𐴑𐴟𐴌𐴁𐴝𐴕𐴞 𐴇𐴠𐴥 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴔𐴟𐴀𐴕𐴃𐴟 𐴀𐴠𐴌𐴞 𐴎𐴝𐴘𐴧𐴡𐴒𐴡𐴥𐴘. 𐴎𐴝𐴘𐴧𐴡𐴌𐴠 𐴀𐴝𐴒𐴠 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘 𐴓𐴡𐴥𐴘 𐴁𐴡𐴕𐴞𐴎𐴡𐴒𐴡𐴥𐴘, 𐴁𐴝𐴦𐴊𐴠 𐴀𐴝𐴀𐴘𐴧𐴡𐴌𐴠 𐴃𐴟𐴣𐴀𐴝𐴥𐴣𐴌 𐴑𐴟𐴌𐴁𐴝𐴕𐴞 𐴊𐴞𐴘𐴡𐴒𐴝𐴥𐴘.

²⁵”𐴃𐴟𐴣𐴀𐴝𐴥𐴣𐴌 𐴓𐴧𐴝 𐴁𐴞𐴏𐴝𐴌 𐴒𐴡𐴙𐴃𐴧𐴡𐴥 𐴎𐴝𐴦𐴌 𐴊𐴠 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴉𐴡𐴣𐴃𐴡𐴃𐴢 𐴃𐴝𐴥𐴑𐴞𐴃𐴠 𐴃𐴡𐴌𐴝𐴃𐴡𐴌𐴞 𐴔𐴝𐴦𐴔𐴠𐴓𐴝 𐴇𐴡𐴥𐴓𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴡, 𐴀𐴝𐴌𐴕𐴡𐴥𐴘𐴓𐴠 𐴀𐴞𐴥𐴃𐴠 𐴃𐴟𐴣𐴀𐴝𐴥𐴣𐴌𐴠 𐴅𐴡𐴐𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴁𐴡, 𐴀𐴝𐴦𐴌 𐴅𐴡𐴐𐴠 𐴃𐴟𐴣𐴀𐴝𐴥𐴣𐴌𐴠 𐴉𐴟𐴓𐴞𐴐𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴁𐴡, 𐴁𐴝𐴦𐴊𐴠 𐴃𐴟𐴣𐴀𐴝𐴥𐴣𐴌𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴉𐴠𐴥𐴓𐴝𐴘𐴁𐴡.²⁶𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴀𐴛 𐴀𐴝𐴇𐴠𐴥𐴌𐴞 𐴉𐴡𐴘𐴐𐴝𐴤 𐴕𐴡𐴥 𐴊𐴡𐴦 𐴉𐴡𐴙𐴅𐴧𐴡𐴕𐴃𐴡 𐴈𐴠𐴥𐴕𐴃𐴟 𐴇𐴝𐴥𐴓𐴝𐴏𐴢 𐴀𐴡𐴥𐴘 𐴕𐴡 𐴉𐴝𐴌𐴞𐴁𐴝𐴥.

𐴎𐴠𐴕𐴝𐴤𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

²⁷”𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴉𐴟𐴥𐴙𐴕𐴧𐴞𐴓𐴝, ’𐴎𐴠𐴕𐴝𐴤 𐴕𐴡 𐴒𐴡𐴌𐴞𐴥𐴁𐴝.‘ ²⁸𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴇𐴡𐴕𐴡𐴤 𐴔𐴝𐴘𐴝𐴉𐴟𐴖𐴝𐴌𐴠 𐴁𐴟𐴌𐴝 𐴑𐴞𐴥𐴘𐴝𐴓𐴠 𐴏𐴝𐴀, 𐴀𐴞𐴥𐴃𐴠 𐴕𐴞𐴎𐴡𐴌 𐴊𐴞𐴓𐴠-𐴊𐴞𐴓𐴠 𐴇𐴞𐴥𐴁𐴝 𐴓𐴧𐴡𐴥𐴘 𐴎𐴠𐴕𐴝𐴤 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.²⁹𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴊𐴠𐴕 𐴋𐴝𐴥𐴑𐴡𐴌 𐴏𐴟𐴑𐴠𐴤 𐴃𐴟𐴣𐴀𐴝𐴥𐴣𐴌𐴠 𐴒𐴟𐴕𐴝𐴤𐴌 𐴀𐴟𐴎𐴟 𐴄𐴝𐴕𐴠, 𐴃𐴡𐴥𐴀𐴘𐴓𐴠 𐴘𐴞𐴥𐴁𐴝 𐴕𐴠𐴦𐴓𐴝𐴘 𐴉𐴠𐴥𐴓𐴝𐴘𐴊𐴡. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴣𐴌 𐴒𐴟𐴣𐴍𐴝 𐴒𐴝𐴦 𐴎𐴟𐴎𐴟𐴑𐴡𐴃𐴢 𐴎𐴝𐴦𐴌 𐴃𐴟𐴥𐴖𐴝𐴌𐴡, 𐴃𐴟𐴣𐴀𐴝𐴥𐴣𐴌 𐴒𐴝𐴦𐴌 𐴀𐴠𐴑𐴧𐴝𐴥𐴕 𐴇𐴞𐴥𐴏𐴧𐴝 𐴕𐴡 𐴃𐴝𐴥𐴑𐴡𐴕 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴁𐴠𐴀𐴃𐴡𐴌.³⁰𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴊𐴠𐴕 𐴀𐴝𐴥𐴃𐴠 𐴃𐴟𐴣𐴀𐴝𐴥𐴣𐴌𐴠 𐴒𐴟𐴕𐴝𐴤𐴌 𐴀𐴟𐴎𐴟 𐴄𐴝𐴕𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴈𐴝𐴍𐴞 𐴉𐴠𐴥𐴓𐴝𐴘𐴊𐴡. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴣𐴌 𐴒𐴟𐴣𐴍𐴝 𐴒𐴝𐴦 𐴎𐴟𐴎𐴟𐴑𐴡𐴃𐴢 𐴎𐴝𐴦𐴌 𐴃𐴟𐴥𐴖𐴝𐴌𐴡, 𐴃𐴟𐴣𐴀𐴝𐴥𐴣𐴌 𐴒𐴝𐴦𐴌 𐴀𐴠𐴑𐴧𐴝𐴥𐴕 𐴇𐴞𐴥𐴏𐴧𐴝 𐴕𐴡 𐴃𐴝𐴥𐴑𐴡𐴕 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴁𐴠𐴀𐴃𐴡𐴌.

𐴏𐴝𐴥𐴌𐴞𐴉𐴠𐴓𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

³¹”𐴀𐴠𐴕𐴊𐴞𐴓𐴧𐴝 𐴘𐴡𐴥 𐴈𐴡𐴖𐴝𐴤 𐴒𐴞𐴥𐴀𐴓𐴢, ’𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴡𐴖𐴡𐴌𐴠 𐴏𐴝𐴥𐴌𐴞𐴉𐴠𐴓𐴠, 𐴀𐴞𐴥𐴃𐴠 𐴇𐴞𐴥𐴁𐴝𐴌𐴠 𐴏𐴝𐴥𐴌𐴇𐴝𐴁𐴡𐴏𐴢 𐴊𐴡𐴑.‘ ³²𐴓𐴠𐴑𐴞𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴡𐴖𐴡𐴌𐴠 𐴎𐴠𐴕𐴝𐴤𐴌 𐴈𐴡𐴏𐴟𐴥𐴌 𐴓𐴡𐴥𐴘 𐴁𐴝𐴊𐴠 𐴀𐴡𐴙𐴕𐴧𐴡 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴓𐴡𐴥𐴘 𐴏𐴝𐴥𐴌𐴞𐴉𐴠𐴓𐴠, 𐴀𐴞𐴥𐴃𐴠 𐴇𐴞𐴥𐴁𐴝𐴌𐴠 𐴎𐴠𐴕𐴝𐴤 𐴒𐴡𐴌𐴝𐴥𐴁𐴝; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴏𐴝𐴥𐴌𐴞𐴉𐴠𐴓𐴝𐴘𐴧𐴝 𐴔𐴝𐴘𐴝𐴉𐴟𐴖𐴝𐴌𐴠 𐴁𐴞𐴘𐴝𐴥 𐴒𐴡𐴌𐴠𐴥, 𐴀𐴞𐴥𐴃𐴠 𐴘𐴡𐴥 𐴎𐴠𐴕𐴝𐴤 𐴒𐴡𐴌𐴠𐴥.

𐴈𐴡𐴏𐴡𐴥𐴔 𐴇𐴝𐴥𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

³³”𐴃𐴟𐴣𐴀𐴝𐴥𐴌𐴝 𐴀𐴝𐴌𐴡𐴤 𐴉𐴟𐴥𐴙𐴕𐴧𐴞𐴓𐴝 𐴊𐴠 𐴑𐴞, 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢, ’𐴔𐴞𐴏𐴝𐴥 𐴈𐴡𐴏𐴡𐴥𐴔 𐴕𐴝 𐴇𐴝𐴥𐴘𐴧𐴡, 𐴁𐴡𐴥𐴓𐴑𐴠 𐴃𐴟𐴀𐴛 𐴎𐴞𐴘𐴝𐴥𐴕𐴡𐴓𐴧𐴝 𐴈𐴡𐴏𐴡𐴥𐴔 𐴇𐴝𐴥𐴘𐴧𐴡, 𐴇𐴞𐴥𐴘𐴝𐴕 𐴔𐴝𐴁𐴟𐴊𐴡𐴌 𐴇𐴝𐴣𐴏𐴠 𐴉𐴟𐴌𐴝 𐴒𐴡𐴌𐴞𐴥𐴁𐴝.‘³⁴𐴓𐴠𐴑𐴞𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴁𐴞𐴓𐴑𐴟𐴥𐴓𐴢 𐴈𐴡𐴏𐴡𐴥𐴔 𐴕𐴝 𐴇𐴝𐴥𐴘𐴧𐴡, 𐴀𐴝𐴏𐴔𐴝𐴕𐴡𐴌 𐴕𐴝𐴔𐴠 𐴘𐴡𐴥 𐴕𐴝 𐴇𐴝𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕 𐴃𐴡 𐴀𐴝𐴓𐴧𐴝𐴌 𐴃𐴡𐴑𐴃𐴡𐴥.³⁵𐴎𐴡𐴁𐴞𐴕𐴡𐴌 𐴕𐴝𐴔𐴠 𐴘𐴡𐴥 𐴕𐴝 𐴇𐴝𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕 𐴃𐴡 𐴀𐴞𐴥𐴁𐴝𐴌 𐴉𐴡𐴦 𐴌𐴝𐴑𐴞𐴥𐴁𐴝𐴌 𐴁𐴝𐴚𐴒𐴟𐴥. 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴕𐴝𐴔𐴠 𐴘𐴡𐴥 𐴕𐴝 𐴇𐴝𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴁𐴡𐴌 𐴁𐴝𐴀𐴣𐴐𐴧𐴝𐴌 𐴐𐴡𐴥𐴀𐴌.³⁶𐴕𐴞𐴎𐴡𐴌 𐴔𐴝𐴃𐴝𐴥 𐴊𐴡𐴥𐴌𐴞 𐴘𐴡𐴥 𐴈𐴡𐴏𐴡𐴥𐴔 𐴕𐴝 𐴇𐴝𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴃𐴡 𐴀𐴠𐴑𐴧𐴝𐴥𐴕 𐴏𐴟𐴓𐴢 𐴀𐴟𐴥𐴊𐴧𐴗𐴝 𐴊𐴡𐴥𐴓𐴝 𐴘𐴝𐴥 𐴇𐴝𐴓𐴝 𐴒𐴡𐴌𐴞𐴥 𐴕𐴡 𐴉𐴝𐴌𐴡.³⁷𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴁𐴝𐴕𐴝𐴤 𐴀𐴠𐴊𐴧𐴟𐴥𐴌 𐴈𐴡𐴘𐴧𐴡𐴥, 𐴀𐴡𐴥𐴘𐴓𐴠 ’𐴀𐴡𐴥𐴘‘ 𐴀𐴝𐴦𐴌 𐴕𐴡 𐴀𐴡𐴥𐴘𐴓𐴠 ’𐴕𐴡,‘ 𐴘𐴝𐴥𐴌 𐴁𐴝𐴀𐴌𐴠 𐴎𐴞𐴀𐴕 𐴀𐴝𐴘𐴧𐴠𐴤 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴞𐴁𐴞𐴓𐴞𐴥𐴐𐴡𐴌 𐴃𐴡𐴌𐴉𐴡𐴥𐴃𐴧𐴟.

𐴁𐴡𐴊𐴡𐴓𐴝 𐴓𐴡𐴖𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

³⁸”𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴉𐴟𐴥𐴙𐴕𐴧𐴞𐴓𐴝, ’𐴏𐴟𐴑𐴡𐴌 𐴁𐴡𐴊𐴡𐴓𐴢 𐴏𐴟𐴑, 𐴀𐴝𐴦𐴌 𐴊𐴝𐴃𐴡𐴌 𐴁𐴡𐴊𐴡𐴓𐴢 𐴊𐴝𐴃𐴢.‘ ³⁹𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴇𐴡𐴕𐴡𐴤 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴔𐴟𐴑𐴝𐴁𐴠𐴓𐴝 𐴕𐴡 𐴒𐴡𐴙𐴅𐴧𐴡𐴥. 𐴁𐴡𐴥𐴓𐴑𐴠 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌𐴠 𐴊𐴠𐴕 𐴋𐴝𐴥𐴑𐴡𐴌 𐴒𐴝𐴓𐴏𐴝𐴁𐴝 𐴏𐴝𐴥𐴘 𐴏𐴟𐴖𐴝𐴌 𐴔𐴝𐴌𐴠, 𐴀𐴞𐴥𐴃𐴝𐴌𐴠 𐴀𐴡 𐴋𐴝𐴥𐴑 𐴀𐴡𐴥 𐴉𐴞𐴥𐴌𐴝𐴘𐴊𐴞𐴘𐴡.⁴⁰𐴀𐴝𐴦𐴌 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴣𐴌 𐴑𐴟𐴌𐴟𐴃𐴝 𐴓𐴡𐴘𐴉𐴠𐴥𐴓𐴝𐴘𐴃𐴡 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴔𐴡𐴦𐴊𐴧𐴞𐴔𐴝 𐴒𐴡𐴙𐴃𐴧𐴡𐴥 𐴏𐴝𐴀, 𐴀𐴞𐴥𐴃𐴝𐴌𐴠 𐴃𐴟𐴣𐴀𐴝𐴥𐴣𐴌 𐴏𐴝𐴊𐴧𐴡𐴌 𐴀𐴡𐴥 𐴊𐴞𐴦𐴉𐴠𐴥𐴓𐴝𐴘𐴧𐴡.⁴¹𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴣𐴌𐴠 𐴀𐴠𐴑 𐴔𐴝𐴙𐴓𐴢 𐴎𐴝𐴘𐴃𐴡 𐴁𐴡𐴓𐴝𐴎𐴟𐴌𐴞 𐴒𐴡𐴙𐴓𐴧𐴠𐴥, 𐴀𐴞𐴥𐴃𐴝𐴌 𐴉𐴟𐴥𐴖𐴝𐴣𐴃𐴞 𐴊𐴟𐴘 𐴔𐴝𐴙𐴓𐴢 𐴎𐴝𐴘𐴧𐴡.⁴²𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴃𐴧𐴟 𐴔𐴝𐴒𐴠, 𐴀𐴞𐴥𐴃𐴝𐴌𐴠 𐴊𐴞𐴦𐴘𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴃𐴧𐴟 𐴀𐴟𐴊𐴝𐴥𐴌 𐴏𐴝𐴀, 𐴀𐴞𐴥𐴃𐴝𐴌𐴠 𐴕𐴡 𐴉𐴞𐴥𐴌𐴝𐴘𐴧𐴡.

𐴊𐴟𐴐𐴧𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤

⁴³”𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴉𐴟𐴥𐴙𐴕𐴧𐴞𐴓𐴝, ’𐴕𐴞𐴎𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝, 𐴀𐴝𐴦𐴌 𐴊𐴟𐴐𐴧𐴡𐴕𐴡𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥𐴁𐴝.‘⁴⁴𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝𐴌 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴡𐴥; 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴟𐴓𐴟𐴥𐴔 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴡𐴥,⁴⁵𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴉𐴟𐴀𐴝𐴙𐴕 𐴄𐴡𐴥𐴀𐴌𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴒𐴡𐴔 𐴈𐴡𐴥𐴌𐴝𐴉𐴢 𐴊𐴟𐴕𐴞𐴥 𐴒𐴟𐴥𐴕𐴡𐴌 𐴖𐴡𐴌𐴠 𐴀𐴞𐴥𐴁𐴝𐴌 𐴁𐴠𐴙𐴓𐴡𐴌 𐴉𐴡𐴀𐴌 𐴊𐴠, 𐴀𐴝𐴦𐴌 𐴉𐴡𐴌𐴇𐴠𐴥𐴏𐴒𐴝𐴌𐴡𐴌 𐴖𐴡𐴌𐴠 𐴀𐴠𐴊𐴧𐴠 𐴑𐴟𐴈𐴝𐴔-𐴒𐴡𐴌𐴡𐴤𐴘𐴝𐴌 𐴖𐴡𐴌𐴠 𐴎𐴡𐴥𐴌 𐴊𐴞𐴉𐴠𐴍𐴝𐴥.⁴⁶𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴐𐴟𐴥𐴊𐴟 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴏𐴟𐴥𐴖𐴝𐴁𐴢 𐴑𐴞𐴘𐴡𐴥𐴓𐴧𐴝 𐴉𐴝𐴘𐴁𐴝؟ 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴑𐴞𐴥 𐴇𐴠𐴥𐴕𐴊𐴞𐴓𐴧𐴝 𐴕𐴡 𐴒𐴡𐴌𐴠𐴥 𐴕𐴠𐴥؟⁴⁷𐴀𐴝𐴦𐴌 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴐𐴟𐴥𐴊𐴟 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴏𐴡𐴥𐴓𐴝𐴔 𐴊𐴡𐴥, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴀𐴡𐴙𐴕𐴧𐴡 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴑𐴞𐴦 𐴒𐴡𐴌𐴡𐴤𐴌؟ 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴑𐴞𐴥 𐴇𐴠𐴥𐴕𐴊𐴞𐴓𐴧𐴝 𐴕𐴡 𐴒𐴡𐴌𐴠𐴥 𐴕𐴠𐴥؟⁴⁸𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴢 𐴎𐴠𐴕𐴊𐴞𐴓𐴧𐴝 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞 𐴀𐴡𐴥.“

The Word for the World International

https://app.library.bible/content/87faca8b51c22590