Read 𐴔𐴡𐴃𐴞 4

𐴔𐴡𐴃𐴞4

𐴀𐴞𐴏𐴝𐴤𐴌𐴠 𐴀𐴠𐴕𐴃𐴝𐴥𐴕 𐴒𐴡𐴙𐴅𐴧𐴠𐴥

¹𐴘𐴝𐴥𐴌𐴁𐴝𐴦𐴊𐴠 𐴂𐴝𐴑-𐴌𐴟𐴀𐴘𐴠 𐴀𐴞𐴏𐴝𐴤𐴌𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴓𐴡𐴘𐴒𐴞𐴘𐴠𐴥, 𐴎𐴠𐴀𐴕𐴠 𐴀𐴞𐴥𐴁𐴝𐴌𐴠 𐴀𐴞𐴁𐴞𐴓𐴞𐴥𐴐𐴠 𐴀𐴠𐴕𐴃𐴝𐴥𐴕 𐴒𐴡𐴌𐴠𐴥.²𐴏𐴝𐴓𐴞𐴐𐴢 𐴊𐴞𐴕 𐴏𐴝𐴓𐴞𐴐𐴢 𐴌𐴝𐴙𐴃𐴢 𐴌𐴟𐴎𐴝 𐴌𐴝𐴑𐴞𐴥 𐴁𐴝𐴦𐴊𐴠 𐴀𐴞𐴥𐴁𐴝𐴃𐴧𐴟 𐴁𐴟𐴥𐴑 𐴓𐴝𐴙𐴒𐴧𐴠𐴥.³𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴠𐴕𐴃𐴝𐴥𐴕-𐴒𐴡𐴌𐴡𐴤𐴘𐴝 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴀𐴛 𐴀𐴝𐴓𐴧𐴝𐴌 𐴉𐴟𐴖𐴝 𐴊𐴠 𐴀𐴡𐴥𐴘𐴓𐴠, 𐴀𐴠 𐴉𐴝𐴃𐴧𐴡𐴥𐴌 𐴒𐴟𐴥𐴕𐴡𐴌𐴠 𐴌𐴟𐴄𐴞 𐴀𐴡𐴥𐴘𐴎𐴝𐴘𐴃𐴡𐴘 𐴇𐴡𐴥𐴑𐴟𐴔 𐴊𐴡𐴥.“

⁴𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴔𐴝𐴕𐴟𐴥𐴙𐴐𐴢 𐴏𐴞𐴌𐴞𐴥𐴉𐴢 𐴌𐴟𐴄𐴞 𐴓𐴡𐴘 𐴁𐴝𐴏𐴠 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴌 𐴔𐴟𐴑𐴡𐴃𐴧𐴟 𐴕𐴠𐴦𐴓𐴠 𐴊𐴠 𐴇𐴝𐴥𐴀𐴌 𐴈𐴡𐴃𐴝𐴤 𐴓𐴡𐴥𐴘 𐴁𐴠 𐴁𐴝𐴏𐴠.‘ “

⁵𐴃𐴡𐴥𐴘 𐴇𐴠𐴥 𐴀𐴞𐴁𐴞𐴓𐴞𐴥𐴐𐴠 𐴀𐴞𐴥𐴁𐴝𐴌𐴠 𐴂𐴝𐴑 𐴐𐴡𐴥𐴀𐴌 𐴒𐴝𐴥𐴕𐴡𐴃𐴢 𐴓𐴡𐴘𐴎𐴝𐴘, 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴃𐴟𐴓𐴧𐴞𐴃𐴢 𐴃𐴞𐴥𐴘𐴝𐴒𐴝𐴌𐴝𐴘𐴧𐴠,⁶𐴁𐴝𐴦𐴊𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴀𐴛 𐴀𐴝𐴓𐴧𐴝𐴌 𐴉𐴟𐴖𐴝 𐴊𐴠 𐴀𐴡𐴥𐴘𐴓𐴠, 𐴕𐴞𐴏𐴠 𐴎𐴝𐴥𐴂𐴢 𐴔𐴝𐴌𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,’𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴣𐴌 𐴁𐴝𐴦𐴁𐴟𐴃𐴠 𐴕𐴞𐴎𐴡𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴇𐴡𐴥𐴑𐴟𐴔 𐴊𐴞𐴥𐴁𐴡;𐴃𐴡𐴥𐴘 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴀𐴝𐴥𐴃𐴠 𐴃𐴟𐴣𐴀𐴝𐴥𐴣𐴌𐴠 𐴊𐴡𐴥𐴌𐴞𐴉𐴠𐴓𐴝𐴘𐴁𐴡,𐴎𐴠𐴀𐴕𐴠 𐴃𐴟𐴣𐴀𐴝𐴥𐴣𐴌 𐴄𐴠𐴥𐴚𐴠 𐴇𐴡𐴕𐴡𐴤 𐴉𐴝𐴃𐴧𐴡𐴥𐴌𐴡𐴃𐴢 𐴊𐴟𐴑 𐴕𐴡 𐴉𐴝𐴦.‘ “

⁷𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ”𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴘𐴝𐴀𐴕 𐴀𐴡𐴥 𐴀𐴝𐴏𐴠𐴤, ’𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴔𐴝𐴁𐴟𐴊𐴢 𐴀𐴝𐴓𐴧𐴝𐴌𐴠 𐴀𐴠𐴕𐴃𐴝𐴥𐴕 𐴕𐴡 𐴒𐴡𐴌𐴞𐴥𐴁𐴝.‘ “

⁸𐴃𐴝𐴌𐴉𐴡𐴌𐴠 𐴀𐴞𐴁𐴞𐴓𐴞𐴥𐴐𐴠 𐴀𐴞𐴥𐴁𐴝𐴌𐴠 𐴀𐴠𐴒𐴧𐴗𐴝𐴤 𐴀𐴟𐴣𐴏𐴡𐴓𐴢 𐴉𐴝𐴀𐴌𐴡𐴃𐴢 𐴓𐴡𐴘𐴎𐴝𐴘, 𐴊𐴟𐴕𐴞𐴘𐴝𐴙𐴌 𐴃𐴝𐴔𐴝𐴥𐴔 𐴌𐴝𐴙𐴅𐴧𐴡 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴇𐴞𐴥𐴀𐴕𐴡𐴌 𐴉𐴟𐴌𐴝 𐴐𐴝𐴥𐴀𐴕𐴊𐴝𐴌𐴞 𐴊𐴝𐴈𐴝𐴤𐴘𐴧𐴠.⁹𐴃𐴡𐴥𐴘 𐴀𐴞𐴥𐴃𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴀𐴛 𐴔𐴠𐴍𐴞𐴃𐴢 𐴉𐴡𐴌𐴞 𐴀𐴝𐴣𐴀𐴌𐴠𐴥 𐴏𐴡𐴥𐴘𐴊𐴝 𐴒𐴡𐴌𐴡𐴤, 𐴀𐴝𐴀𐴛 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴃𐴟𐴣𐴀𐴝𐴥𐴣𐴌𐴠 𐴊𐴞𐴦𐴉𐴠𐴥𐴓𐴝𐴘𐴧𐴟𐴔.“

¹⁰𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ”𐴐𐴡𐴥𐴘𐴃𐴝𐴕, 𐴊𐴟𐴌 𐴀𐴡𐴥! 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴔𐴝𐴁𐴟𐴊𐴢 𐴀𐴝𐴓𐴧𐴝𐴌𐴠 𐴁𐴠 𐴏𐴡𐴥𐴘𐴊𐴝 𐴒𐴡𐴌𐴞𐴥𐴁𐴝, 𐴀𐴝𐴦𐴌 𐴏𐴞𐴌𐴞𐴥𐴉𐴢 𐴀𐴞𐴥𐴁𐴝𐴌 𐴁𐴠 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥𐴁𐴝.‘ “

¹¹𐴇𐴠𐴥𐴃𐴟𐴕𐴡𐴃𐴢 𐴀𐴞𐴁𐴞𐴓𐴞𐴥𐴐𐴠 𐴀𐴞𐴥𐴁𐴝𐴌𐴠 𐴀𐴠𐴌𐴞 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴢 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴇𐴠𐴥𐴊𐴔𐴡𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

𐴒𐴝𐴓𐴞𐴓𐴡𐴃𐴢 𐴀𐴞𐴏𐴝𐴤𐴌 𐴈𐴝𐴔𐴡𐴌 𐴐𐴟𐴥𐴌𐴟

¹²𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴘𐴝𐴇𐴝𐴥𐴘𐴝𐴌𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴠 𐴊𐴠 𐴉𐴟𐴥𐴙𐴕𐴧𐴠, 𐴀𐴞𐴥𐴁𐴝 𐴒𐴝𐴓𐴞𐴓𐴡𐴃𐴢 𐴒𐴞𐴦𐴘𐴡𐴥𐴘;¹³𐴀𐴝𐴦𐴌 𐴕𐴝𐴏𐴝𐴥𐴌𐴝𐴃𐴢 𐴐𐴡𐴥𐴀𐴌 𐴉𐴠𐴥𐴓𐴝𐴘, 𐴎𐴠𐴁𐴟𐴓𐴟𐴕 𐴀𐴠𐴊𐴧𐴠 𐴕𐴝𐴉𐴄𐴝𐴓𐴞𐴌 𐴎𐴝𐴒𐴝𐴃𐴢 𐴋𐴞𐴀𐴌 𐴇𐴝𐴣𐴏𐴝 𐴓𐴡𐴘 𐴀𐴝𐴏𐴠𐴤 𐴊𐴠 𐴑𐴝𐴂𐴝𐴌𐴕𐴝𐴈𐴟𐴥𐴔 𐴐𐴡𐴥𐴀𐴌𐴡𐴃𐴢 𐴎𐴝𐴘 𐴃𐴝𐴥𐴙𐴑𐴧𐴠𐴒𐴡𐴘.¹⁴𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥,¹⁵”𐴎𐴠𐴁𐴟𐴓𐴟𐴕𐴡𐴌 𐴀𐴠𐴓𐴝𐴑𐴝𐴃𐴢 𐴀𐴠𐴊𐴧𐴠 𐴕𐴝𐴉𐴄𐴝𐴓𐴞𐴌 𐴀𐴠𐴓𐴝𐴑𐴝𐴃𐴢,𐴊𐴡𐴙𐴅𐴧𐴝𐴌 𐴌𐴝𐴏𐴃𐴝𐴃𐴢, 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴌 𐴀𐴡𐴑𐴟𐴓𐴠,𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴒𐴝𐴓𐴞𐴓𐴢 𐴀𐴡𐴃𐴢,¹⁶𐴎𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴝𐴕𐴊𐴝𐴤𐴌𐴡𐴃𐴢 𐴀𐴝𐴐𐴧𐴞𐴥𐴓𐴢,𐴀𐴞𐴥𐴃𐴝𐴌𐴝 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴉𐴡𐴀𐴌 𐴊𐴠𐴙𐴑𐴧𐴠𐴥,𐴎𐴠𐴃𐴝𐴌𐴝𐴤 𐴔𐴡𐴦𐴃𐴡𐴌 𐴀𐴝𐴕𐴊𐴝𐴤𐴙𐴅𐴝 𐴔𐴟𐴓𐴧𐴟𐴑𐴡𐴃𐴢 𐴀𐴝𐴐𐴧𐴞𐴥𐴓𐴢,𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴉𐴡𐴀𐴌 𐴀𐴡𐴥𐴘𐴧𐴠.“

¹⁷𐴇𐴠𐴥 𐴀𐴡𐴑𐴃𐴡𐴥𐴃𐴢 𐴓𐴡𐴥𐴃𐴞 𐴀𐴞𐴏𐴝𐴤𐴘𐴠 𐴀𐴠𐴀𐴕 𐴈𐴡𐴀𐴘𐴢 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, ”𐴃𐴡𐴖𐴝𐴥 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘.“

𐴐𐴟𐴥𐴌𐴟𐴌 𐴐𐴝𐴥𐴌𐴞𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴋𐴝𐴙𐴑𐴧𐴠𐴥

¹⁸𐴀𐴞𐴏𐴝𐴤 𐴒𐴝𐴓𐴞𐴓𐴢 𐴋𐴞𐴀𐴌 𐴇𐴝𐴣𐴏𐴝 𐴁𐴝𐴥𐴘 𐴀𐴝𐴥𐴣𐴍𐴞 𐴎𐴝𐴦𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴁𐴝𐴘𐴠 𐴊𐴟𐴖𐴝𐴥 𐴁𐴝𐴥𐴘 𐴊𐴠𐴙𐴑𐴧𐴠𐴥, 𐴘𐴝𐴥𐴕𐴞 𐴏𐴝𐴥𐴘𐴔𐴡𐴕, 𐴎𐴞𐴁𐴝𐴤𐴌𐴠 𐴉𐴞𐴃𐴡𐴌 𐴋𐴝𐴙𐴑𐴧𐴠𐴥 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴁𐴝𐴥𐴘 𐴀𐴠𐴕𐴊𐴠𐴌𐴞𐴘𐴝𐴏𐴢 𐴀𐴡𐴌𐴠. 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴋𐴞𐴀𐴃𐴢 𐴎𐴝𐴓𐴢 𐴔𐴝𐴌𐴠𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴎𐴝𐴙𐴓𐴧𐴝 𐴀𐴝𐴐𐴧𐴞𐴥𐴓𐴢.¹⁹𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴕𐴟𐴥𐴙𐴐𐴢 𐴊𐴡𐴥𐴌𐴠 𐴊𐴠 𐴎𐴝𐴙𐴓𐴧𐴝 𐴁𐴝𐴕𐴝𐴘𐴧𐴟𐴥𐴔.“²⁰𐴀𐴞𐴥𐴃𐴝𐴌𐴝 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴃𐴝𐴌𐴝𐴌 𐴎𐴝𐴓𐴢 𐴓𐴟𐴕 𐴀𐴠𐴌𐴞, 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

²¹𐴇𐴞𐴥𐴘𐴝𐴕𐴃𐴟 𐴀𐴝𐴌𐴡𐴤 𐴇𐴡𐴊𐴧𐴟𐴥𐴌 𐴒𐴞𐴦𐴘𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴘𐴠 𐴀𐴝𐴌𐴡𐴤 𐴊𐴟𐴘 𐴁𐴝𐴥𐴘 𐴊𐴠𐴙𐴑𐴧𐴠𐴥, 𐴘𐴝𐴥𐴕𐴞 𐴎𐴠𐴁𐴠𐴊𐴝𐴙𐴌 𐴉𐴟𐴖𐴝 𐴘𐴝𐴑𐴟𐴁𐴡𐴌𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴁𐴝𐴥𐴘 𐴘𐴡𐴇𐴝𐴥𐴕𐴧𐴝 𐴌𐴠. 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴕𐴡𐴦𐴌 𐴖𐴡𐴌𐴠 𐴀𐴞𐴥𐴃𐴝𐴌𐴝𐴌 𐴁𐴝𐴉𐴢 𐴎𐴠𐴁𐴠𐴊𐴝𐴙𐴌 𐴉𐴟𐴥𐴖𐴝𐴣𐴃𐴞 𐴎𐴝𐴓𐴢 𐴄𐴟𐴕𐴠𐴌. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴔𐴝𐴃𐴝𐴘𐴧𐴠𐴥,²²𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴕𐴡𐴦 𐴒𐴝𐴥𐴕 𐴀𐴠𐴊𐴧𐴠 𐴁𐴝𐴉𐴡𐴌𐴠 𐴀𐴠𐴌𐴞, 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.

𐴀𐴞𐴏𐴝𐴤𐴌 𐴃𐴝𐴦𐴓𐴞𐴔 𐴀𐴠𐴊𐴧𐴠 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴝𐴥

²³𐴀𐴞𐴏𐴝𐴤𐴘𐴠 𐴒𐴝𐴓𐴞𐴓𐴡𐴌 𐴀𐴝𐴒𐴝𐴒𐴟𐴌𐴝 𐴎𐴝𐴘-𐴎𐴝𐴘 𐴘𐴡𐴇𐴟𐴥𐴊𐴞𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴃𐴝𐴦𐴓𐴞𐴔 𐴊𐴞𐴃𐴡 𐴀𐴠𐴊𐴧𐴠 𐴌𐴝𐴙𐴅𐴧𐴡𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥, 𐴀𐴝𐴦𐴌 𐴔𐴝𐴙𐴕𐴐𐴡𐴥𐴌 𐴉𐴡𐴃𐴧𐴞𐴥 𐴑𐴞𐴏𐴞𐴥𐴔𐴡𐴌 𐴁𐴞𐴘𐴝𐴌𐴝𐴔 𐴀𐴠𐴊𐴧𐴠 𐴉𐴡𐴃𐴧𐴞𐴥 𐴑𐴞𐴏𐴞𐴥𐴔𐴡𐴌 𐴀𐴡𐴐𐴟𐴥𐴑 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴒𐴡𐴙𐴃𐴧𐴡𐴥.²⁴𐴀𐴞𐴥𐴁𐴝𐴌 𐴈𐴡𐴥𐴁𐴡𐴌 𐴏𐴞𐴀𐴌𐴞𐴘𐴝𐴌 𐴀𐴝𐴒𐴝𐴒𐴟𐴌𐴝 𐴉𐴡𐴥𐴓𐴞𐴒𐴞𐴓𐴒𐴡𐴘; 𐴀𐴝𐴦𐴌 𐴔𐴝𐴙𐴕𐴐𐴠𐴥 𐴁𐴞𐴘𐴝𐴌𐴝𐴙𐴔𐴧𐴝 𐴎𐴠𐴃𐴝𐴌𐴝𐴤𐴃𐴧𐴟 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴁𐴞𐴘𐴝𐴌𐴝𐴔 𐴀𐴝𐴏𐴠𐴤 𐴀𐴠𐴊𐴧𐴠 𐴊𐴟𐴑 𐴉𐴝𐴦𐴌, 𐴎𐴠𐴃𐴝𐴌𐴝𐴤 𐴁𐴟𐴥𐴃𐴠-𐴉𐴝𐴘𐴧𐴝, 𐴎𐴠𐴃𐴝𐴌𐴝𐴤𐴃𐴧𐴟 𐴏𐴟𐴥𐴖𐴝𐴣𐴉𐴞𐴥𐴌𐴝 𐴀𐴝𐴏𐴠𐴤, 𐴎𐴠𐴃𐴝𐴌𐴝𐴤 𐴀𐴝𐴣𐴃𐴟𐴌, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥.²⁵𐴒𐴝𐴓𐴞𐴓𐴢 𐴀𐴡𐴃𐴧𐴟, 𐴊𐴠𐴑𐴝𐴂𐴡𐴥𐴓𐴞𐴏𐴢 𐴀𐴡𐴃𐴧𐴟, 𐴅𐴠𐴌𐴟𐴥𐴏𐴝𐴓𐴠𐴔 𐴀𐴡𐴃𐴧𐴟, 𐴘𐴡𐴇𐴟𐴥𐴊𐴞𐴘𐴝 𐴃𐴧𐴟, 𐴀𐴠𐴊𐴧𐴠 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴌 𐴉𐴝𐴌𐴑𐴟𐴓𐴡𐴃𐴧𐴟 𐴊𐴡𐴓𐴢-𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴞𐴓𐴢.

The Word for the World International

https://app.library.bible/content/87faca8b51c22590