ອ່ານ 𐴔𐴡𐴃𐴞 12

𐴔𐴡𐴃𐴞12

𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴞𐴣𐴘𐴟𐴌 𐴃𐴟𐴥𐴌 𐴃𐴟𐴓𐴝𐴤

¹𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴞𐴏𐴝𐴤 𐴒𐴞𐴣𐴘𐴟𐴌 𐴑𐴟𐴣𐴍𐴝𐴤 𐴁𐴝𐴥𐴘 𐴎𐴝𐴦𐴌; 𐴀𐴝𐴦𐴌 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴟𐴥𐴑 𐴓𐴝𐴙𐴒𐴧𐴠𐴥 𐴌𐴝𐴥𐴌, 𐴀𐴞𐴥𐴃𐴝𐴌𐴝 𐴒𐴞𐴣𐴘𐴟𐴌 𐴃𐴟𐴥𐴌 𐴀𐴡𐴥𐴑𐴧𐴡𐴓𐴢 𐴃𐴟𐴓𐴞𐴤-𐴃𐴟𐴓𐴞𐴤 𐴈𐴝𐴥𐴀𐴃𐴢 𐴊𐴡𐴙𐴅𐴧𐴠.²𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴎𐴞𐴘𐴝𐴥𐴕 𐴒𐴡𐴌𐴞𐴥𐴁𐴝𐴌 𐴔𐴝𐴕𐴝𐴥, 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴣𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴒𐴡𐴌𐴠𐴥𐴌.“

³𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴑𐴞𐴥 𐴘𐴝𐴀𐴕 𐴕𐴡𐴥 𐴉𐴡𐴌𐴡𐴥, 𐴎𐴠𐴣𐴃𐴧𐴠𐴥 𐴊𐴝𐴖𐴟𐴊𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴟𐴥𐴑 𐴓𐴝𐴙𐴒𐴧𐴞𐴥𐴓𐴢, 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴘𐴠 𐴑𐴞𐴦 𐴒𐴡𐴙𐴅𐴧𐴞𐴥𐴓𐴢 𐴊𐴠𐴥؟⁴𐴀𐴞𐴥𐴁𐴝𐴘𐴠 𐴃𐴡 𐴀𐴝𐴓𐴧𐴝𐴌 𐴒𐴡𐴥𐴌𐴡𐴃𐴢 𐴒𐴡𐴥𐴙𐴓𐴧𐴠𐴒𐴡𐴘, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴠, 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴂𐴠𐴦𐴐𐴢 𐴒𐴡𐴙𐴅𐴧𐴝𐴥 𐴌𐴟𐴄𐴞 𐴈𐴝𐴥𐴀𐴙𐴓𐴢, 𐴎𐴞𐴀𐴕 𐴈𐴝𐴥𐴘𐴁𐴝𐴌 𐴀𐴠𐴎𐴝𐴎𐴡𐴃𐴢 𐴕𐴡 𐴀𐴞𐴥𐴁𐴝𐴃𐴧𐴟 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴕𐴡 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴐𐴧𐴞𐴥𐴓𐴢, 𐴁𐴡𐴥𐴓𐴑𐴠 𐴏𐴞𐴌𐴞𐴥𐴉𐴢 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴠 𐴀𐴝𐴐𐴧𐴞𐴥𐴓𐴢.⁵𐴘𐴝𐴥𐴃𐴡 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴃𐴡𐴌𐴝𐴃𐴡𐴃𐴢 𐴘𐴝𐴀𐴕 𐴕𐴡𐴥 𐴉𐴡𐴌𐴡𐴥, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴕𐴞𐴘𐴡𐴔 𐴁𐴝𐴥𐴚𐴒𐴞𐴓𐴠 𐴘𐴡 𐴀𐴞𐴥𐴃𐴝𐴌𐴝 𐴁𐴠𐴈𐴡𐴏𐴟𐴥𐴌 𐴊𐴠𐴥؟⁶𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴑𐴎𐴡𐴕 𐴀𐴞𐴣𐴘𐴡𐴥𐴃𐴢 𐴀𐴝𐴏𐴠𐴤.⁷𐴓𐴠𐴑𐴞𐴕 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴠 𐴈𐴡𐴃𐴝𐴤𐴌 𐴔𐴝𐴀𐴕𐴞 𐴒𐴝𐴥𐴕 𐴎𐴝𐴙𐴕𐴃𐴝, ’𐴀𐴝𐴀𐴛 𐴑𐴟𐴌𐴁𐴝𐴕𐴞 𐴏𐴝𐴀𐴘𐴢 𐴊𐴠 𐴕𐴡, 𐴁𐴡𐴥𐴓𐴑𐴠 𐴌𐴝𐴇𐴝𐴥𐴔 𐴏𐴝𐴀𐴘𐴢 𐴊𐴠,‘ 𐴃𐴡𐴥𐴀𐴘𐴓𐴠 𐴁𐴠𐴈𐴡𐴏𐴟𐴥𐴌𐴡𐴌𐴠 𐴈𐴡𐴏𐴟𐴥𐴌 𐴕𐴡 𐴊𐴞𐴃𐴝.⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴡𐴥𐴙𐴓𐴊𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴔𐴝𐴓𐴞𐴑.“

𐴀𐴠𐴎𐴧𐴡𐴕 𐴉𐴟𐴥𐴖𐴝𐴕𐴝 𐴀𐴝𐴥𐴃𐴢 𐴀𐴡𐴓𐴝 𐴔𐴝𐴕𐴟𐴥𐴙𐴐𐴢

⁹𐴀𐴞𐴏𐴝𐴤 𐴈𐴠𐴥𐴕𐴃𐴟 𐴎𐴝𐴘𐴒𐴡𐴥𐴘 𐴀𐴞𐴥𐴃𐴝𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴒𐴞𐴦𐴘𐴠𐴥.¹⁰𐴇𐴠𐴥𐴍𐴠 𐴀𐴠𐴎𐴧𐴡𐴕 𐴀𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴝𐴌 𐴀𐴝𐴥𐴃𐴢 𐴉𐴟𐴥𐴖𐴝𐴘𐴒𐴞𐴘𐴡𐴘. 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝𐴘 𐴉𐴝𐴌𐴠 𐴉𐴝𐴥𐴕 𐴀𐴞𐴥𐴁𐴝𐴌𐴠 𐴏𐴟𐴥𐴖𐴝𐴓𐴢 𐴒𐴡𐴌𐴠𐴥𐴌 𐴊𐴠, ”𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴞𐴥𐴁𐴝𐴌 𐴎𐴝𐴘𐴠𐴏𐴢 𐴀𐴝𐴏𐴠𐴤 𐴕𐴠𐴥؟“

¹¹𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴕 𐴀𐴝𐴏𐴠𐴤, 𐴎𐴝𐴃𐴧𐴟 𐴀𐴠𐴒𐴧𐴗𐴝𐴤 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴝𐴏𐴠𐴤, 𐴀𐴝𐴦𐴌 𐴘𐴞𐴥𐴁𐴝 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴝𐴣𐴌𐴝𐴥𐴃𐴢 𐴉𐴡𐴌𐴞𐴓𐴠𐴥 𐴘𐴞𐴥𐴁𐴝𐴌𐴠 𐴊𐴡𐴥𐴌𐴞 𐴃𐴟𐴓𐴞𐴤 𐴕𐴡 𐴓𐴡𐴘𐴁𐴡 𐴊𐴠𐴥؟¹²𐴀𐴞𐴕𐴏𐴝𐴥𐴕𐴡𐴌 𐴑𐴞𐴔𐴡𐴃𐴢 𐴃𐴡 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴃𐴟𐴥𐴖𐴝𐴌𐴡 𐴁𐴡𐴀𐴗𐴃𐴢 𐴁𐴞𐴐𐴞𐴤! 𐴇𐴠𐴥𐴃𐴡𐴓𐴧𐴝, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴡𐴔 𐴈𐴝𐴔 𐴒𐴡𐴌𐴞𐴥𐴁𐴝𐴌 𐴎𐴝𐴘𐴠𐴏𐴢 𐴀𐴝𐴏𐴠𐴤.“

¹³𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴀𐴝𐴥𐴃𐴧𐴝𐴕 𐴁𐴝𐴌𐴡𐴥.“𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴁𐴝𐴌𐴝𐴤𐴘𐴧𐴠, 𐴇𐴠𐴥𐴃𐴟𐴕𐴡𐴃𐴢 𐴇𐴞𐴥𐴘𐴝𐴕 𐴒𐴡𐴔 𐴀𐴡𐴥𐴘 𐴀𐴡𐴙𐴕𐴧𐴡 𐴒𐴝𐴥𐴕𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴒𐴞𐴘𐴡𐴘.¹⁴𐴘𐴝𐴥𐴌𐴁𐴝𐴦𐴊𐴠 𐴉𐴠𐴥𐴌𐴡𐴐𐴞 𐴀𐴞𐴥𐴃𐴝𐴌𐴝 𐴁𐴝𐴀𐴌𐴠 𐴎𐴝𐴘 𐴏𐴡𐴥𐴓𐴧𐴝 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴑𐴞𐴦 𐴁𐴡𐴃𐴠 𐴔𐴝𐴌𐴞𐴉𐴠𐴥𐴓𐴝𐴘 𐴉𐴝𐴌𐴞𐴁𐴡𐴥.

𐴀𐴝𐴓𐴧𐴝𐴌 𐴁𐴝𐴙𐴐𐴧𐴝𐴥 𐴈𐴝𐴥𐴀𐴊𐴠𐴔

¹⁵𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴇𐴞𐴥𐴘𐴝𐴕 𐴎𐴝𐴕𐴞 𐴉𐴝𐴌𐴞 𐴈𐴠𐴥𐴕𐴃𐴟 𐴒𐴞𐴦𐴘𐴠𐴥𐴒𐴡𐴘. 𐴁𐴡𐴀𐴗𐴃𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴞𐴓𐴢, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴁𐴞𐴘𐴝𐴌𐴝𐴙𐴔𐴧𐴝 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴞𐴥𐴁𐴝𐴘𐴠 𐴒𐴡𐴔 𐴒𐴡𐴙𐴅𐴧𐴞𐴥𐴓𐴢.¹⁶𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴕𐴞𐴐𐴡𐴥𐴃𐴢 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴘𐴃𐴡𐴤.¹⁷𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴊𐴟𐴖𐴝𐴌𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥:¹⁸”𐴏𐴡𐴀! 𐴀𐴝𐴣𐴀𐴌 𐴈𐴝𐴥𐴀𐴊𐴠𐴔 𐴀𐴡𐴌𐴠, 𐴎𐴞𐴁𐴝𐴤𐴌𐴠 𐴀𐴝𐴀𐴛 𐴁𐴝𐴏𐴞𐴥𐴓𐴡𐴘𐴧𐴞,𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝, 𐴎𐴞𐴁𐴝𐴤𐴌𐴠 𐴓𐴡𐴥𐴘 𐴀𐴝𐴣𐴀𐴌 𐴌𐴟𐴀 𐴑𐴟𐴥𐴐𐴞.𐴀𐴝𐴀𐴛 𐴀𐴝𐴣𐴀𐴌 𐴌𐴟𐴀 𐴀𐴞𐴁𐴝𐴤𐴌 𐴖𐴡𐴌𐴠 𐴋𐴝𐴥𐴓𐴞𐴊𐴞𐴘𐴟𐴔,𐴀𐴝𐴦𐴌 𐴀𐴞𐴁𐴝𐴤𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴞𐴕𐴏𐴝𐴥𐴉𐴢 𐴀𐴠𐴓𐴝𐴕 𐴒𐴡𐴌𐴞𐴥𐴁𐴡.¹⁹𐴀𐴞𐴁𐴝𐴤𐴘𐴠 𐴕𐴡 𐴇𐴡𐴙𐴅𐴧𐴝 𐴊𐴞𐴁𐴡, 𐴕𐴡 𐴏𐴞𐴓𐴧𐴝𐴘𐴁𐴡𐴥,𐴀𐴝𐴦𐴌 𐴕𐴡 𐴌𐴝𐴏𐴃𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴞𐴁𐴝𐴤𐴌 𐴀𐴝𐴁𐴝𐴏𐴢 𐴇𐴡𐴕𐴡𐴤𐴑𐴞𐴘𐴠 𐴉𐴟𐴥𐴕𐴞𐴁𐴡.²⁰𐴀𐴞𐴁𐴝𐴤𐴘𐴠 𐴀𐴞𐴕𐴏𐴝𐴥𐴉𐴡𐴌𐴠 𐴉𐴡𐴥𐴃𐴝 𐴕𐴡𐴥 𐴒𐴡𐴌𐴠𐴥 𐴉𐴡𐴙𐴅𐴧𐴡𐴕𐴃𐴡,𐴀𐴠𐴥𐴓𐴝𐴘𐴧𐴝 𐴇𐴡𐴥𐴙𐴌𐴡𐴌𐴠 𐴕𐴡 𐴁𐴝𐴥𐴚𐴒𐴞𐴁𐴡,𐴀𐴝𐴦𐴌 𐴊𐴟𐴥𐴖𐴝𐴣𐴌 𐴊𐴠 𐴁𐴝𐴃𐴧𐴞 𐴕𐴡 𐴕𐴞𐴉𐴝𐴥𐴘𐴁𐴡.²¹𐴀𐴞𐴁𐴝𐴤𐴌 𐴕𐴝𐴔𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴐𐴝𐴤 𐴌𐴝𐴑𐴞𐴥𐴁𐴡.“

𐴀𐴞𐴏𐴝𐴤 𐴀𐴠𐴊𐴧𐴠 𐴁𐴠𐴓𐴎𐴠𐴁𐴟𐴓𐴢

²²𐴘𐴝𐴥𐴌𐴁𐴝𐴦𐴊𐴠 𐴀𐴠𐴎𐴧𐴡𐴕 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴡𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴕𐴝𐴤 𐴒𐴞𐴥𐴘𐴠, 𐴘𐴡𐴥𐴒𐴧𐴗𐴝 𐴀𐴝𐴣𐴊𐴝𐴤 𐴀𐴠𐴊𐴧𐴠 𐴁𐴟𐴑 𐴀𐴝𐴐𐴧𐴞𐴥𐴓𐴢. 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥 𐴌𐴝𐴥𐴌, 𐴇𐴠𐴥 𐴀𐴝𐴣𐴊𐴝𐴤 𐴀𐴠𐴊𐴧𐴠 𐴁𐴟𐴑 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴔𐴝𐴃𐴞 𐴘𐴡𐴥 𐴉𐴝𐴙𐴅𐴧𐴠𐴥 𐴀𐴠𐴊𐴧𐴠 𐴊𐴠𐴑𐴞𐴥 𐴘𐴡𐴥 𐴉𐴝𐴙𐴅𐴧𐴠𐴥.²³𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴊𐴝𐴖𐴟𐴊𐴡𐴌 𐴉𐴟𐴖𐴝 𐴀𐴡𐴥𐴘 𐴕𐴠𐴥؟“

²⁴𐴇𐴞𐴥𐴘𐴝𐴕 𐴉𐴟𐴥𐴕𐴞 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝 𐴊𐴠 𐴏𐴞𐴌𐴞𐴥𐴉𐴢 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴏𐴡𐴥𐴊𐴧𐴝𐴌 𐴁𐴠𐴓𐴎𐴠𐴁𐴟𐴓𐴡𐴌 𐴃𐴝𐴦𐴑𐴡𐴃𐴠.“

²⁵𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠 𐴌𐴝𐴙𐴅𐴧𐴡𐴃𐴢 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥, 𐴇𐴞𐴥𐴘𐴝𐴕 𐴃𐴡 𐴉𐴝𐴥𐴕𐴝 𐴀𐴡𐴥𐴘𐴎𐴝𐴒𐴡𐴘; 𐴀𐴝𐴦𐴌 𐴎𐴠 𐴐𐴡𐴥𐴀𐴌𐴡𐴃𐴢 𐴘𐴝𐴥 𐴒𐴡𐴥𐴌𐴡𐴃𐴢 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥, 𐴇𐴞𐴥𐴘𐴝𐴕 𐴀𐴡𐴥 𐴃𐴡 𐴄𐴞𐴑𐴞 𐴕𐴡 𐴃𐴝𐴥𐴑𐴞𐴁𐴡.²⁶𐴇𐴠𐴥𐴕𐴊𐴞𐴓𐴧𐴝, 𐴎𐴡𐴊𐴞 𐴐𐴡𐴥𐴘𐴃𐴝𐴕𐴠 𐴐𐴡𐴥𐴘𐴃𐴝𐴕 𐴊𐴝𐴥𐴉𐴝, 𐴃𐴡𐴥𐴀𐴘𐴓𐴠 𐴃𐴡 𐴀𐴞𐴥𐴃𐴠 𐴕𐴞𐴎𐴡𐴌 𐴀𐴟𐴓𐴋𐴝 𐴕𐴞𐴎𐴠 𐴁𐴝𐴥𐴑 𐴀𐴡𐴥𐴘𐴒𐴞𐴘𐴡𐴘; 𐴇𐴠𐴥𐴀𐴕 𐴀𐴡𐴥𐴘𐴓𐴠 𐴀𐴞𐴥𐴃𐴝𐴌 𐴌𐴝𐴙𐴅𐴧𐴡 𐴑𐴠𐴀𐴕𐴒𐴡𐴌𐴞 𐴄𐴞𐴑𐴞 𐴃𐴝𐴥𐴑𐴞𐴁𐴡؟²⁷𐴀𐴝𐴦𐴌 𐴎𐴡𐴊𐴞 𐴀𐴝𐴀𐴛 𐴁𐴟𐴥𐴃𐴢 𐴊𐴝𐴥𐴉𐴝𐴘 𐴊𐴠 𐴁𐴠𐴓𐴎𐴠𐴁𐴟𐴓𐴡𐴌 𐴃𐴝𐴦𐴑𐴡𐴃𐴠 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴊𐴠 𐴇𐴝𐴌 𐴃𐴝𐴦𐴑𐴡𐴃𐴠 𐴊𐴝𐴥𐴉𐴝 𐴊𐴠𐴥؟ 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴞𐴏𐴝𐴌𐴇𐴝𐴌 𐴀𐴡𐴥𐴘𐴁𐴡 𐴊𐴠 𐴀𐴞𐴥𐴃𐴝𐴌𐴝.²⁸𐴔𐴡𐴕𐴃𐴡𐴌 𐴎𐴡𐴊𐴞 𐴀𐴝𐴀𐴛 𐴁𐴟𐴥𐴃𐴢 𐴊𐴝𐴥𐴉𐴝𐴘 𐴊𐴠 𐴀𐴝𐴓𐴧𐴝𐴌 𐴌𐴟𐴀𐴌 𐴃𐴝𐴦𐴑𐴡𐴃𐴠 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴀𐴘𐴒𐴞𐴘𐴡𐴘.

²⁹”𐴇𐴡𐴕𐴡𐴤𐴑𐴞𐴘𐴠 𐴁𐴡𐴓𐴟𐴖𐴝𐴌 𐴔𐴝𐴕𐴟𐴥𐴙𐴐𐴡𐴌 𐴒𐴡𐴥𐴌𐴡𐴃𐴢 𐴒𐴡𐴥𐴓𐴞 𐴘𐴡𐴥𐴒𐴧𐴗𐴝𐴌 𐴐𐴡𐴥𐴔𐴁𐴡𐴃𐴧𐴞 𐴓𐴟𐴄𐴢 𐴒𐴡𐴌𐴞𐴥 𐴑𐴠𐴀𐴕𐴒𐴡𐴌𐴞 𐴉𐴝𐴌𐴞𐴁𐴡𐴥, 𐴎𐴡𐴊𐴞 𐴀𐴝𐴒𐴠 𐴁𐴡𐴓𐴟𐴖𐴝𐴌 𐴔𐴝𐴕𐴟𐴥𐴙𐴐𐴢 𐴘𐴡𐴥𐴒𐴧𐴗𐴝𐴌𐴠 𐴁𐴝𐴣𐴊𐴞𐴥 𐴕𐴡 𐴀𐴠𐴌𐴠؟ 𐴁𐴝𐴣𐴊𐴞𐴥 𐴀𐴠𐴌𐴞𐴓𐴠𐴥 𐴀𐴠𐴥𐴕𐴝 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌 𐴓𐴟𐴄𐴢 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥.

³⁰”𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴞𐴥𐴑𐴧𐴝 𐴕𐴡, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴀𐴟𐴓𐴋𐴝; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴊𐴡𐴓𐴝 𐴕𐴡 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴐𐴞𐴥𐴣𐴍𐴝𐴐𐴞𐴄𐴧𐴝𐴤 𐴒𐴡𐴌𐴠𐴥.

³¹”𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴞𐴕𐴏𐴝𐴥𐴕𐴡𐴌 𐴇𐴝𐴥𐴀𐴌 𐴒𐴟𐴕𐴝𐴤 𐴀𐴠𐴊𐴧𐴠 𐴑𐴟𐴉𐴠𐴥𐴌𐴞 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴎𐴝𐴘𐴁𐴡, 𐴔𐴡𐴕𐴃𐴡𐴌 𐴂𐴝𐴑-𐴌𐴟𐴀𐴌 𐴀𐴟𐴓𐴋𐴝 𐴑𐴟𐴉𐴠𐴥𐴌𐴞 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴕𐴡 𐴎𐴝𐴘𐴁𐴡.³²𐴇𐴡𐴕𐴡𐴤𐴑𐴞𐴘𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴇𐴠𐴥𐴓𐴝𐴉𐴢 𐴇𐴡𐴕𐴡𐴤 𐴈𐴡𐴃𐴝𐴤 𐴈𐴡𐴘𐴓𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴃𐴡 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴎𐴝𐴘𐴁𐴡; 𐴔𐴡𐴕𐴃𐴡𐴌 𐴇𐴡𐴕𐴡𐴤𐴑𐴞𐴘𐴠 𐴂𐴝𐴑-𐴌𐴟𐴀𐴌 𐴇𐴠𐴥𐴓𐴝𐴉𐴢 𐴈𐴡𐴃𐴝𐴤 𐴈𐴡𐴘𐴓𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴕𐴡 𐴎𐴝𐴘𐴁𐴡, 𐴀𐴠 𐴎𐴡𐴁𐴝𐴕𐴝𐴃𐴢 𐴀𐴡𐴥 𐴕𐴡 𐴎𐴝𐴘𐴁𐴡, 𐴀𐴝𐴦𐴌 𐴀𐴝𐴘𐴧𐴠𐴤𐴌 𐴊𐴠 𐴎𐴡𐴁𐴝𐴕𐴝𐴃𐴢 𐴀𐴡𐴥 𐴕𐴡 𐴎𐴝𐴘𐴁𐴡.

𐴒𐴝𐴏𐴢 𐴏𐴞𐴕𐴝𐴥 𐴎𐴝 𐴊𐴠 𐴒𐴟𐴓𐴝𐴘𐴠

³³”𐴒𐴝𐴏𐴢 𐴒𐴡𐴔 𐴊𐴠 𐴀𐴡𐴥𐴘𐴓𐴠 𐴘𐴞𐴥𐴁𐴝𐴌 𐴒𐴟𐴓𐴝 𐴘𐴡𐴥 𐴒𐴡𐴔 𐴀𐴡𐴥𐴘𐴁𐴡, 𐴀𐴝𐴦𐴌 𐴎𐴡𐴊𐴞 𐴒𐴝𐴏𐴢 𐴈𐴡𐴥𐴌𐴝𐴉𐴢 𐴊𐴠 𐴀𐴡𐴥𐴘𐴓𐴠 𐴘𐴞𐴥𐴁𐴝𐴌 𐴒𐴟𐴓𐴝 𐴘𐴡𐴥 𐴈𐴡𐴥𐴌𐴝𐴉𐴢 𐴀𐴡𐴥𐴘𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴝𐴏𐴢 𐴃𐴡 𐴒𐴟𐴓𐴝𐴘𐴠 𐴀𐴠𐴥𐴕𐴝 𐴏𐴞𐴕𐴝𐴥 𐴎𐴝.³⁴𐴀𐴡𐴥 𐴇𐴝𐴥𐴉𐴡𐴌 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢! 𐴃𐴟𐴣𐴀𐴝𐴥𐴌𐴝 𐴈𐴡𐴥𐴌𐴝𐴉𐴢 𐴀𐴡𐴥𐴘 𐴑𐴠𐴀𐴕𐴒𐴡𐴌𐴞 𐴒𐴡𐴔 𐴈𐴡𐴃𐴝𐴤 𐴈𐴡𐴀𐴘𐴢 𐴉𐴝𐴌𐴞𐴁𐴝𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴞𐴓𐴢 𐴎𐴞𐴀𐴕𐴠 𐴉𐴟𐴌𐴝𐴘𐴧𐴝, 𐴔𐴟𐴑𐴠𐴥 𐴇𐴞𐴥𐴀𐴕 𐴁𐴠 𐴈𐴡𐴀.³⁵𐴒𐴡𐴔 𐴔𐴝𐴕𐴟𐴥𐴙𐴐𐴠 𐴒𐴡𐴔 𐴎𐴡𐴔𐴝𐴘𐴧𐴝𐴃𐴧𐴟 𐴒𐴡𐴔 𐴔𐴟𐴥𐴕 𐴕𐴠𐴦𐴓𐴝; 𐴀𐴝𐴦𐴌 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴠 𐴈𐴡𐴥𐴌𐴝𐴉𐴢 𐴎𐴡𐴔𐴝𐴘𐴧𐴝𐴃𐴧𐴟 𐴈𐴡𐴥𐴌𐴝𐴉𐴢 𐴉𐴟𐴕 𐴕𐴠𐴦𐴓𐴝.³⁶𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴔𐴝𐴕𐴟𐴥𐴙𐴐𐴠 𐴕𐴡 𐴁𐴝𐴥𐴉𐴞 𐴈𐴡𐴀 𐴊𐴠 𐴉𐴡𐴃𐴧𐴞𐴥 𐴈𐴡𐴃𐴝𐴤𐴌 𐴇𐴞𐴥𐴏𐴝𐴉𐴢 𐴀𐴞𐴥𐴃𐴝𐴌𐴝𐴃𐴧𐴟 𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴊𐴞𐴘𐴝 𐴉𐴡𐴌𐴞𐴁𐴡𐴥.³⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴠𐴈𐴡𐴏𐴟𐴥𐴌 𐴄𐴡𐴥𐴀𐴌𐴞𐴁𐴝 𐴊𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤𐴘𐴠, 𐴀𐴝𐴦𐴌 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴞𐴁𐴝 𐴊𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤𐴘𐴠.“

𐴕𐴞𐴐𐴝𐴥𐴕 𐴊𐴝𐴈𐴝𐴤𐴘𐴁𐴝𐴌 𐴊𐴝𐴁𐴞

³⁸𐴘𐴝𐴥𐴌𐴁𐴝𐴦𐴊𐴠 𐴇𐴡𐴦𐴎𐴧𐴡𐴕 𐴀𐴝𐴓𐴠𐴔 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴟𐴥𐴎𐴟𐴌, 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴣𐴃𐴧𐴟 𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕 𐴏𐴝𐴘𐴃𐴡𐴥 𐴏𐴝𐴀𐴘𐴢.“

³⁹𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴠 𐴎𐴡𐴁𐴝𐴕𐴝𐴌 𐴈𐴡𐴥𐴌𐴝𐴉𐴢 𐴀𐴠𐴊𐴧𐴠 𐴎𐴠𐴕𐴝𐴤𐴑𐴟𐴌 𐴔𐴝𐴙𐴕𐴐𐴠𐴥 𐴕𐴞𐴐𐴝𐴥𐴕 𐴊𐴝𐴁𐴞 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴌𐴠 𐴕𐴡𐴁𐴞 𐴘𐴟𐴕𐴟𐴏𐴡𐴌 𐴕𐴞𐴐𐴝𐴥𐴕 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴕𐴞𐴐𐴝𐴥𐴕 𐴊𐴞𐴘𐴝 𐴕𐴡 𐴎𐴝𐴘𐴁𐴡.⁴⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴟𐴕𐴟𐴏𐴢 𐴎𐴠𐴕𐴊𐴞𐴓𐴧𐴝 𐴃𐴞𐴕 𐴊𐴞𐴕 𐴃𐴞𐴕 𐴌𐴝𐴙𐴃𐴢 𐴋𐴡𐴣𐴀𐴌 𐴔𐴝𐴏𐴡𐴌 𐴉𐴠𐴍𐴡𐴃𐴢 𐴀𐴝𐴐𐴧𐴞𐴥𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴘𐴡𐴥 𐴔𐴠𐴍𐴞𐴌 𐴃𐴡𐴓𐴠 𐴃𐴞𐴕 𐴊𐴞𐴕 𐴃𐴞𐴕 𐴌𐴝𐴙𐴃𐴢 𐴃𐴝𐴥𐴑𐴞𐴁𐴡.⁴¹𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴕𐴞𐴕𐴞𐴜𐴞 𐴐𐴡𐴥𐴀𐴌𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴞𐴀𐴕𐴡𐴌 𐴉𐴟𐴥𐴖𐴝𐴣𐴃𐴞 𐴃𐴞𐴥𐴘𐴝𐴘𐴁𐴡, 𐴀𐴝𐴦𐴌 𐴀𐴞𐴃𐴝𐴌𐴝𐴤𐴌𐴠 𐴈𐴡𐴏𐴟𐴥𐴌 𐴊𐴞𐴥𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡 𐴘𐴟𐴕𐴟𐴏𐴡𐴌 𐴀𐴠𐴓𐴝𐴕 𐴉𐴟𐴥𐴕𐴞 𐴃𐴡𐴖𐴝𐴥 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴏𐴡𐴀, 𐴘𐴟𐴕𐴟𐴏𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴑𐴎𐴡𐴕 𐴀𐴞𐴣𐴘𐴡𐴥𐴃𐴢 𐴀𐴝𐴏𐴠𐴤.⁴²𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴐𐴞𐴁𐴝𐴤 𐴔𐴟𐴓𐴧𐴟𐴑𐴡𐴌 𐴌𐴝𐴕𐴞 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴞𐴀𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴟𐴍𐴞𐴤𐴁𐴡, 𐴀𐴝𐴦𐴌 𐴀𐴞𐴃𐴝𐴌𐴝𐴤𐴌𐴠 𐴈𐴡𐴏𐴟𐴥𐴌 𐴊𐴞𐴥𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴘𐴠 𐴃𐴡 𐴏𐴡𐴥𐴓𐴡𐴔𐴝𐴕𐴡𐴌 𐴁𐴟𐴊𐴧𐴞𐴥𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴁𐴡𐴓𐴧𐴝 𐴊𐴟𐴕𐴞𐴘𐴝𐴙𐴌 𐴐𐴠𐴥𐴐𐴢 𐴔𐴝𐴃𐴝𐴥𐴃𐴧𐴟 𐴀𐴝𐴙𐴐𐴧𐴞𐴤𐴓𐴢, 𐴀𐴝𐴦𐴌 𐴏𐴡𐴀, 𐴏𐴡𐴥𐴓𐴡𐴔𐴝𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴑𐴎𐴡𐴕 𐴀𐴞𐴣𐴘𐴡𐴥𐴃𐴢 𐴀𐴝𐴏𐴠𐴤.

𐴈𐴡𐴥𐴌𐴝𐴉𐴢 𐴅𐴞𐴕𐴡𐴌 𐴖𐴝𐴦𐴉𐴠𐴏𐴞

⁴³”𐴎𐴠𐴣𐴃𐴧𐴠𐴥 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴃𐴧𐴟 𐴈𐴡𐴥𐴌𐴝𐴉𐴢 𐴅𐴞𐴕 𐴕𐴠𐴦𐴓𐴠, 𐴇𐴠𐴥𐴣𐴃𐴧𐴠 𐴇𐴠𐴥 𐴅𐴞𐴕 𐴕𐴗𐴝𐴥 𐴉𐴟𐴥𐴖𐴝𐴕𐴝 𐴎𐴝𐴒𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘 𐴀𐴝𐴌𐴝𐴔 𐴒𐴡𐴙𐴃𐴧𐴡𐴥 𐴎𐴝𐴒𐴝 𐴃𐴟𐴖𐴝. 𐴔𐴡𐴕𐴃𐴡𐴌 𐴕𐴡 𐴉𐴝𐴘𐴓𐴠,⁴⁴𐴕𐴞𐴎𐴡𐴌𐴠𐴥 𐴕𐴞𐴎𐴠 𐴈𐴡𐴀 𐴊𐴠 ’𐴀𐴝𐴀𐴛 𐴀𐴝𐴣𐴀𐴌 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴘𐴧𐴟𐴔𐴁𐴡𐴥𐴘, 𐴎𐴠𐴕𐴃𐴟𐴥 𐴀𐴝𐴀𐴛 𐴕𐴠𐴦𐴓𐴞𐴀𐴝𐴙𐴐𐴧𐴞𐴥,‘ 𐴘𐴞𐴥𐴁𐴝 𐴎𐴠𐴣𐴃𐴧𐴠𐴥 𐴖𐴝𐴦𐴉𐴠𐴏𐴢 𐴀𐴝𐴘𐴧𐴠𐴤, 𐴇𐴠𐴥 𐴎𐴝𐴒𐴝 𐴒𐴝𐴥𐴕 𐴇𐴝𐴥𐴓𐴞, 𐴏𐴝𐴥𐴉𐴢 𐴒𐴡𐴙𐴅𐴧𐴝𐴥 𐴀𐴠𐴊𐴧𐴠 𐴄𐴞𐴥𐴑 𐴒𐴡𐴙𐴅𐴧𐴝𐴥 𐴓𐴡𐴦𐴃𐴉𐴝.⁴⁵𐴁𐴝𐴦𐴊𐴠 𐴘𐴞𐴥𐴁𐴝 𐴎𐴝𐴘 𐴀𐴝𐴌𐴡𐴤 𐴇𐴝𐴥𐴣𐴃𐴧𐴗𐴝 𐴕𐴞𐴎𐴡𐴌 𐴃𐴟𐴥𐴖𐴝𐴌𐴡 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴝𐴕𐴠𐴤, 𐴀𐴝𐴦𐴌 𐴇𐴞𐴥𐴀𐴕 𐴒𐴡𐴥𐴓𐴞 𐴇𐴠𐴥𐴍𐴠 𐴃𐴝𐴥𐴑𐴠; 𐴃𐴡𐴥𐴘 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝𐴌 𐴉𐴞𐴏𐴡𐴥𐴌 𐴇𐴝𐴥𐴓𐴡𐴃𐴢 𐴀𐴝𐴒𐴡𐴌 𐴇𐴝𐴥𐴓𐴡𐴃𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴈𐴡𐴥𐴌𐴝𐴉𐴢 𐴀𐴡𐴥𐴘𐴎𐴝𐴒𐴡𐴘. 𐴀𐴠 𐴎𐴡𐴁𐴝𐴕𐴝𐴌 𐴈𐴡𐴥𐴌𐴝𐴉𐴢 𐴔𐴝𐴙𐴕𐴐𐴡𐴥𐴌 𐴇𐴝𐴥𐴓𐴡𐴃𐴢 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴀𐴡𐴥𐴘𐴁𐴡.“

𐴀𐴞𐴏𐴝𐴤𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕

⁴⁶𐴀𐴞𐴏𐴝𐴤𐴘𐴠 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴌𐴠 𐴇𐴞𐴥𐴀𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴁𐴝𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕 𐴀𐴞𐴥𐴁𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴘𐴃𐴡𐴤 𐴁𐴝𐴀𐴌𐴠 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴠.⁴⁷𐴀𐴠𐴎𐴧𐴡𐴕𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴃𐴟𐴣𐴀𐴝𐴥𐴣𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕 𐴊𐴠 𐴃𐴟𐴣𐴀𐴝𐴥𐴣𐴌 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴘𐴃𐴡𐴤 𐴁𐴝𐴀𐴌𐴠 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴠.“

⁴⁸𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌𐴠 𐴎𐴝𐴕𐴝𐴘𐴧𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴔𐴝𐴦 𐴇𐴡𐴕؟ 𐴀𐴝𐴦𐴌 𐴀𐴝𐴣𐴀𐴌 𐴁𐴝𐴥𐴘𐴧𐴝𐴙𐴕 𐴇𐴡𐴕𐴃𐴝𐴌𐴝𐴤؟“⁴⁹𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴀𐴟𐴎𐴟 𐴀𐴝𐴥𐴃𐴢 𐴁𐴝𐴌𐴝𐴤𐴘 𐴈𐴡𐴀𐴌 𐴊𐴠, ”𐴀𐴡𐴥𐴃𐴞𐴘𐴝, 𐴀𐴝𐴣𐴀𐴌 𐴔𐴝𐴦 𐴀𐴠𐴊𐴧𐴠 𐴀𐴝𐴣𐴀𐴌 𐴁𐴝𐴥𐴘𐴧𐴝𐴙𐴕.⁵⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴏𐴡𐴓𐴠, 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴁𐴝𐴥𐴘, 𐴁𐴡𐴥𐴙𐴕 𐴀𐴝𐴦𐴌 𐴔𐴝𐴦.“

The Word for the World International

https://app.library.bible/content/87faca8b51c22590