Read 𐴔𐴡𐴃𐴞 11

𐴔𐴡𐴃𐴞11

¹𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴃𐴧𐴟 𐴀𐴞𐴥𐴁𐴝𐴌 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴙𐴅𐴧𐴝𐴥 𐴀𐴡𐴥𐴘𐴧𐴠, 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴐𐴡𐴥𐴀𐴌 𐴀𐴡𐴥𐴑𐴧𐴡𐴓𐴡𐴃𐴢 𐴃𐴝𐴦𐴓𐴞𐴔 𐴊𐴞𐴃𐴡 𐴀𐴠𐴊𐴧𐴠 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥 𐴈𐴠𐴥𐴕𐴃𐴟 𐴁𐴝𐴐𐴝𐴥 𐴓𐴡𐴥𐴘𐴧𐴠.

𐴘𐴝𐴇𐴝𐴥𐴘𐴝𐴌 𐴃𐴡𐴌𐴉𐴡𐴥𐴃𐴧𐴟 𐴈𐴡𐴥𐴁𐴡𐴌𐴒𐴗𐴝 𐴀𐴡𐴥𐴑𐴧𐴡𐴓𐴢

²𐴎𐴠𐴣𐴃𐴧𐴠𐴥 𐴘𐴝𐴇𐴝𐴥𐴘𐴝𐴘𐴠 𐴎𐴞𐴘𐴡𐴥𐴓𐴡𐴃𐴢 𐴃𐴝𐴥𐴘 𐴔𐴡𐴀𐴏𐴞𐴤𐴌 𐴈𐴝𐴔 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴠, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴠,³𐴘𐴝𐴀𐴕 𐴉𐴟𐴏𐴝𐴥𐴌 𐴒𐴡𐴙𐴃𐴧𐴡𐴥, ”𐴃𐴟𐴀𐴛 𐴀𐴝𐴘𐴁𐴝𐴤𐴌 𐴈𐴡𐴃𐴝𐴤 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝 𐴕𐴠𐴥, 𐴀𐴝𐴦𐴌 𐴕𐴝𐴥𐴑𐴞 𐴀𐴝𐴣𐴀𐴌𐴝 𐴀𐴝𐴌 𐴀𐴠𐴎𐴧𐴡𐴕𐴡𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴙𐴃𐴧𐴝𐴥𐴔؟“

⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴎𐴡𐴦, 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴉𐴟𐴥𐴕𐴡𐴌 𐴀𐴠𐴊𐴧𐴠 𐴊𐴠𐴑𐴡𐴥𐴌 𐴇𐴞𐴥𐴀𐴕 𐴘𐴝𐴇𐴝𐴥𐴘𐴝𐴌𐴠 𐴎𐴝𐴕𐴡𐴒𐴡𐴥𐴘,⁵𐴑𐴞 𐴈𐴡𐴘𐴓𐴠𐴥, 𐴀𐴝𐴣𐴊𐴝𐴤𐴘𐴠 𐴊𐴠𐴑𐴠𐴥𐴌, 𐴓𐴠𐴚𐴠 𐴀𐴝𐴥𐴣𐴍𐴠𐴌, 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴌, 𐴕𐴝𐴥𐴉𐴝𐴚𐴠 𐴉𐴟𐴥𐴕𐴠𐴌, 𐴔𐴟𐴌𐴟𐴊𐴝 𐴎𐴞𐴕𐴊𐴝 𐴀𐴡𐴥𐴌, 𐴀𐴠𐴊𐴧𐴠 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴌.⁶𐴔𐴟𐴁𐴝𐴌𐴠𐴑 𐴀𐴟𐴁𐴝𐴤, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴀𐴝𐴕𐴊𐴝𐴐𐴝𐴤 𐴕𐴡 𐴒𐴡𐴌𐴠𐴥.“

⁷𐴎𐴠𐴣𐴃𐴧𐴠𐴥 𐴘𐴝𐴇𐴝𐴥𐴘𐴝𐴌 𐴀𐴟𐴔𐴧𐴡𐴃𐴧𐴟𐴕 𐴎𐴝𐴦𐴌𐴒𐴡𐴥𐴘, 𐴀𐴞𐴏𐴝𐴤𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴘𐴝𐴇𐴝𐴥𐴘𐴝𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠 𐴊𐴠, ”𐴃𐴟𐴣𐴀𐴝𐴥𐴌𐴝 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴑𐴞𐴦 𐴏𐴝𐴘𐴃𐴡𐴥 𐴒𐴞𐴀𐴓𐴝 𐴊𐴠𐴥؟ 𐴁𐴡𐴘𐴧𐴝𐴌𐴠 𐴓𐴡𐴌𐴠 𐴊𐴠 𐴇𐴡𐴥𐴙𐴌 𐴕𐴠𐴥؟⁸𐴀𐴝𐴌𐴕𐴡𐴥𐴘𐴓𐴠 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴏𐴝𐴘𐴃𐴡𐴥 𐴒𐴞𐴀𐴓𐴝 𐴊𐴠𐴥؟ 𐴁𐴝𐴌𐴞𐴥𐴑 𐴇𐴡𐴦𐴌 𐴉𐴞𐴕𐴊𐴝𐴤 𐴔𐴝𐴕𐴟𐴥𐴙𐴐𐴢 𐴕𐴠𐴥؟ 𐴎𐴠𐴃𐴝𐴌𐴝𐴤 𐴁𐴝𐴌𐴞𐴥𐴑 𐴇𐴡𐴦𐴌 𐴉𐴞𐴣𐴊𐴠𐴤 𐴀𐴞𐴥𐴃𐴝𐴌𐴝 𐴃𐴡 𐴌𐴝𐴎𐴔𐴡𐴇𐴡𐴥𐴓𐴡𐴃𐴢 𐴀𐴠𐴥𐴕𐴝.⁹𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴏𐴝𐴘𐴃𐴡𐴥 𐴒𐴞𐴀𐴓𐴝 𐴊𐴠𐴥؟ 𐴇𐴡𐴕𐴡𐴤 𐴕𐴡𐴁𐴞 𐴕𐴠𐴥؟ 𐴀𐴡𐴥𐴘, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴕𐴡𐴁𐴞𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴥𐴎𐴧𐴡𐴕 𐴀𐴡𐴌𐴠.¹⁰𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤, 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴏𐴡𐴀, 𐴀𐴝𐴀𐴛 𐴀𐴝𐴣𐴀𐴌 𐴈𐴡𐴥𐴁𐴡𐴌𐴒𐴗𐴝𐴌𐴠 𐴃𐴟𐴣𐴀𐴝𐴥𐴣𐴌 𐴀𐴝𐴒𐴠 𐴊𐴞𐴉𐴠𐴍𐴝𐴥𐴙𐴌, 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴣𐴌 𐴀𐴝𐴒𐴠 𐴃𐴟𐴣𐴀𐴝𐴥𐴣𐴌 𐴉𐴡𐴣𐴃𐴢 𐴃𐴡𐴘𐴧𐴝𐴌 𐴒𐴡𐴌𐴞𐴥𐴁𐴡.‘

¹¹”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴧𐴠 𐴊𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴇𐴡𐴕𐴡𐴤𐴑𐴞𐴘𐴠 𐴕𐴝𐴥𐴘; 𐴔𐴡𐴕𐴃𐴡𐴌 𐴃𐴡𐴀 𐴀𐴟𐴥𐴊𐴧𐴗𐴝 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴎𐴠𐴦𐴕𐴞𐴑𐴞 𐴀𐴠𐴁𐴧𐴠 𐴐𐴡𐴥𐴣𐴍𐴡, 𐴀𐴞𐴥𐴃𐴠 𐴘𐴡𐴥𐴒𐴧𐴗𐴝𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌.¹²𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴓𐴡𐴥𐴃𐴞 𐴘𐴝𐴓𐴝 𐴉𐴡𐴙𐴅𐴧𐴡𐴕𐴃𐴡 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴘𐴠 𐴎𐴟𐴓𐴟𐴥𐴔 𐴉𐴝𐴦𐴃𐴢 𐴀𐴝𐴏𐴠𐴤, 𐴀𐴝𐴦𐴌 𐴎𐴟𐴓𐴟𐴥𐴔𐴑𐴟𐴌 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕𐴡𐴌𐴠 𐴁𐴡𐴓𐴝𐴎𐴟𐴌𐴞 𐴑𐴡𐴁𐴎𐴝 𐴒𐴡𐴙𐴃𐴧𐴡𐴥 𐴑𐴟𐴐𐴞𐴥𐴐𐴢 𐴒𐴡𐴌𐴠𐴥𐴌.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴝𐴔𐴝𐴥𐴔 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴠 𐴀𐴠𐴊𐴧𐴠 𐴃𐴡𐴌𐴝𐴃𐴠 𐴘𐴝𐴇𐴝𐴥𐴘𐴝 𐴉𐴡𐴙𐴅𐴧𐴡𐴕𐴃𐴡 𐴀𐴝𐴒𐴟𐴕 𐴈𐴡𐴃𐴝𐴤 𐴈𐴡𐴘𐴧𐴠𐴥.¹⁴𐴃𐴟𐴣𐴀𐴝𐴥𐴌𐴝𐴃𐴧𐴟 𐴘𐴝𐴀𐴕 𐴑𐴡𐴁𐴟𐴓𐴢 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴘𐴓𐴠𐴥 𐴒𐴡𐴌𐴡𐴤, 𐴎𐴠 𐴀𐴠𐴓𐴞𐴘𐴝𐴏𐴢 𐴀𐴝𐴘𐴁𐴝𐴤𐴌 𐴈𐴡𐴃𐴝𐴤 𐴀𐴝𐴐𐴧𐴞𐴥𐴓𐴢 𐴘𐴝𐴇𐴝𐴥𐴘𐴝 𐴀𐴡𐴥𐴙𐴓𐴊𐴠 𐴀𐴞𐴥𐴁𐴝.¹⁵𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.

¹⁶”𐴀𐴝𐴀𐴛 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌𐴠 𐴑𐴞𐴦 𐴓𐴡𐴘 𐴉𐴟𐴥𐴖𐴝𐴕 𐴒𐴡𐴙𐴃𐴧𐴝𐴥𐴔؟ 𐴀𐴞𐴥𐴃𐴝𐴌𐴝 𐴀𐴟𐴕𐴊𐴞𐴓𐴧𐴝 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴃𐴝𐴌𐴝𐴤 𐴁𐴝𐴎𐴝𐴌𐴡𐴃𐴢 𐴁𐴡𐴀𐴘𐴢 𐴀𐴡𐴙𐴕𐴧𐴡 𐴉𐴟𐴀𐴝𐴙𐴕 𐴊𐴡𐴌𐴠 𐴔𐴝𐴃𐴝𐴘 𐴈𐴡𐴀 𐴊𐴠,¹⁷’𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌𐴝 𐴁𐴝𐴐𐴞𐴤 𐴁𐴝𐴎𐴝𐴘𐴧𐴞𐴥,𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴡𐴥 𐴕𐴝𐴏𐴡;𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌𐴝 𐴁𐴞𐴓𐴝𐴑𐴡𐴌 𐴎𐴝𐴌𐴞 𐴒𐴝𐴘𐴧𐴞𐴥,𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴡𐴥 𐴈𐴝𐴣𐴊𐴡.‘

¹⁸𐴘𐴝𐴇𐴝𐴥𐴘𐴝 𐴀𐴝𐴀𐴘𐴢 𐴎𐴠𐴃𐴧𐴡𐴥𐴃𐴢 𐴈𐴝𐴥𐴀𐴉𐴞𐴘𐴝 𐴕𐴡𐴥 𐴒𐴡𐴌𐴠𐴥, 𐴔𐴝𐴙𐴕𐴐𐴠𐴥 𐴈𐴡𐴀 𐴊𐴠, ’𐴀𐴞𐴥𐴁𐴝𐴌𐴠 𐴁𐴟𐴥𐴃𐴠 𐴉𐴝𐴘𐴧𐴠𐴥.‘¹⁹𐴀𐴝𐴦𐴌 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴀𐴘𐴢 𐴎𐴠𐴃𐴧𐴡𐴥𐴃𐴢 𐴈𐴝𐴥𐴀𐴉𐴞𐴘𐴝 𐴒𐴡𐴌𐴠𐴥𐴌, 𐴔𐴝𐴙𐴕𐴐𐴠𐴥 𐴈𐴡𐴀 𐴊𐴠, ’𐴏𐴡𐴀, 𐴀𐴠𐴎𐴧𐴡𐴕 𐴉𐴞𐴃𐴝𐴥𐴐𐴢 𐴀𐴠𐴊𐴧𐴠 𐴐𐴡𐴥𐴌𐴝𐴁𐴑𐴟𐴌, 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴊𐴟𐴏𐴃𐴡𐴥.‘ 𐴔𐴡𐴕𐴃𐴡𐴌 𐴒𐴞𐴘𐴝𐴕 𐴏𐴡𐴥𐴘𐴧𐴞 𐴊𐴠 𐴇𐴞𐴥𐴘𐴝𐴕, 𐴇𐴞𐴥𐴘𐴝𐴕𐴡𐴌 𐴈𐴝𐴔𐴠 𐴏𐴝𐴥𐴁𐴟𐴃𐴢 𐴀𐴡𐴥.“

𐴃𐴡𐴖𐴝𐴥 𐴕𐴡 𐴒𐴡𐴌𐴠𐴥 𐴊𐴠 𐴐𐴡𐴥𐴀𐴌𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢

²⁰𐴀𐴞𐴏𐴝𐴤𐴘𐴠 𐴎𐴠 𐴐𐴡𐴥𐴀𐴌 𐴒𐴟𐴥𐴕𐴡𐴃𐴢 𐴁𐴠𐴦𐴐𐴁𐴝𐴥𐴑 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴒𐴡𐴙𐴅𐴧𐴞𐴥𐴓𐴢, 𐴇𐴞𐴥𐴀𐴕𐴠 𐴃𐴡𐴖𐴝𐴥 𐴕𐴡𐴥 𐴒𐴡𐴌𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌𐴠 𐴅𐴠𐴥𐴅𐴧𐴠𐴍𐴝𐴘 𐴈𐴡𐴀𐴌 𐴊𐴠,²¹”𐴀𐴡𐴥 𐴑𐴡𐴌𐴝𐴎𐴞𐴕، 𐴃𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴀𐴡𐴥 𐴁𐴠𐴃𐴏𐴝𐴥𐴘𐴊𐴝, 𐴃𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴇𐴞𐴥𐴀𐴕 𐴎𐴡𐴊𐴞 𐴄𐴝𐴘𐴝𐴥𐴌 𐴀𐴠𐴊𐴧𐴠 𐴏𐴞𐴥𐴊𐴡𐴕𐴡𐴃𐴢 𐴒𐴡𐴌𐴝𐴥 𐴎𐴝𐴘𐴃𐴡, 𐴀𐴞𐴥𐴃𐴝𐴌𐴝 𐴏𐴝𐴥𐴓𐴝𐴌𐴐𐴡𐴄𐴢 𐴉𐴞𐴣𐴊𐴞𐴥 𐴀𐴠𐴊𐴧𐴠 𐴏𐴝𐴥𐴘𐴡𐴌 𐴖𐴡𐴌𐴠 𐴁𐴡𐴀𐴘𐴢 𐴁𐴡𐴀𐴗𐴃𐴢 𐴀𐴝𐴒𐴠 𐴓𐴡𐴥𐴃𐴞 𐴃𐴡𐴖𐴝𐴥 𐴒𐴡𐴌𐴞𐴥𐴉𐴠𐴓𐴝𐴘𐴃𐴡.²²𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴑𐴞𐴘𐴝𐴔𐴡𐴃𐴡𐴌 𐴊𐴞𐴕، 𐴇𐴠𐴥 𐴄𐴝𐴘𐴝𐴥𐴌 𐴀𐴠𐴊𐴧𐴠 𐴏𐴞𐴥𐴊𐴡𐴕𐴡𐴌 𐴔𐴝𐴙𐴕𐴐𐴡𐴥𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴃𐴟𐴥𐴖𐴝𐴌𐴡 𐴈𐴡𐴔 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.²³𐴀𐴝𐴦𐴌 𐴃𐴟𐴘, 𐴀𐴡𐴥 𐴑𐴝𐴂𐴝𐴌𐴕𐴝𐴈𐴟𐴥𐴔, 𐴃𐴡𐴌𐴠𐴥 𐴑𐴞𐴥 𐴀𐴝𐴏𐴔𐴝𐴕𐴡𐴃𐴢 𐴁𐴝𐴎𐴠𐴥 𐴉𐴝𐴥𐴕 𐴖𐴡𐴌𐴠 𐴃𐴟𐴓𐴝𐴤 𐴎𐴝𐴘𐴁𐴡؟ 𐴃𐴡𐴌𐴠𐴥 𐴕𐴞𐴏𐴠 𐴉𐴝𐴃𐴝𐴓𐴉𐴟𐴌𐴡𐴃𐴢 𐴀𐴠𐴥𐴕𐴝 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴘𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴃𐴡𐴌 𐴁𐴟𐴥𐴃𐴡𐴌𐴠 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴇𐴞𐴥𐴀𐴕 𐴎𐴡𐴊𐴞 𐴏𐴡𐴥𐴊𐴡𐴔𐴡𐴃𐴢 𐴒𐴡𐴌𐴝𐴥 𐴎𐴝𐴘𐴃𐴡, 𐴇𐴞𐴥𐴘𐴝𐴕 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴄𐴞𐴑𐴞 𐴃𐴝𐴥𐴑𐴞𐴃𐴡.²⁴𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴑𐴞𐴘𐴝𐴔𐴡𐴃𐴡𐴌 𐴊𐴞𐴕، 𐴏𐴡𐴥𐴊𐴡𐴔 𐴐𐴡𐴥𐴀𐴌𐴡𐴌 𐴔𐴝𐴙𐴕𐴐𐴡𐴥𐴃𐴧𐴟 𐴃𐴡𐴌 𐴔𐴝𐴙𐴕𐴐𐴡𐴥𐴌 𐴃𐴟𐴥𐴖𐴝𐴌𐴡 𐴈𐴡𐴔 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.“

𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴧𐴡𐴤

²⁵𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴉𐴢, 𐴀𐴝𐴏𐴔𐴝𐴕 𐴎𐴡𐴁𐴞𐴕𐴡𐴌 𐴔𐴝𐴓𐴞𐴑, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴀𐴞𐴀𐴕𐴡𐴌𐴠 𐴒𐴞𐴘𐴝𐴕𐴞 𐴀𐴠𐴊𐴧𐴠 𐴁𐴟𐴊𐴧𐴞𐴥𐴔𐴝𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴓𐴟𐴑𐴝𐴘 𐴌𐴝𐴑𐴞𐴥 𐴒𐴟𐴌𐴝 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴒𐴡𐴙𐴅𐴧𐴡𐴥.²⁶𐴀𐴡𐴥𐴘, 𐴀𐴡𐴥 𐴁𐴝𐴉𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴣𐴃𐴧𐴟 𐴇𐴞𐴥𐴘𐴝𐴕 𐴁𐴞𐴐𐴞𐴤 𐴉𐴡𐴏𐴡𐴥𐴕 𐴓𐴝𐴙𐴒𐴧𐴠𐴥.

²⁷”𐴀𐴝𐴣𐴀𐴌 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴊𐴞𐴦𐴉𐴠𐴥𐴓𐴝𐴘𐴧𐴠. 𐴉𐴟𐴖𐴝𐴌𐴠 𐴁𐴝𐴉𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠, 𐴀𐴝𐴦𐴌 𐴁𐴝𐴉𐴡𐴌𐴠 𐴘𐴡𐴥 𐴉𐴟𐴖𐴝 𐴀𐴠𐴊𐴧𐴠 𐴉𐴟𐴖𐴝𐴘𐴠 𐴎𐴝𐴌𐴠𐴥 𐴎𐴝𐴇𐴠𐴥𐴌 𐴒𐴡𐴙𐴃𐴧𐴡𐴥 𐴏𐴝𐴀, 𐴘𐴡𐴥𐴒𐴧𐴗𐴝𐴘𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠.

²⁸”𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴡𐴥𐴌𐴝𐴕 𐴀𐴡𐴥𐴘𐴧𐴡 𐴀𐴠𐴊𐴧𐴠 𐴁𐴡𐴥𐴌 𐴉𐴟𐴣𐴎𐴝𐴤 𐴓𐴡𐴥𐴘 𐴀𐴝𐴏𐴡𐴤, 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴧𐴡𐴤, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴝𐴔 𐴊𐴞𐴦𐴘𐴟𐴔.²⁹𐴀𐴝𐴣𐴀𐴌 𐴎𐴟𐴣𐴖𐴝𐴓𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴓𐴡𐴦 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴐𐴞𐴥𐴑𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴕𐴡𐴌𐴡𐴔 𐴀𐴠𐴊𐴧𐴠 𐴐𐴞𐴥𐴊𐴝 𐴊𐴞𐴓𐴢 𐴀𐴡𐴓𐴝, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌 𐴉𐴡𐴌𐴝𐴕𐴠 𐴀𐴝𐴌𐴝𐴔 𐴉𐴝𐴘𐴁𐴡.³⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴎𐴟𐴣𐴖𐴝𐴓𐴢 𐴁𐴡𐴘𐴃𐴠𐴥 𐴀𐴝𐴏𐴝𐴤𐴕, 𐴀𐴝𐴦𐴌 𐴀𐴝𐴣𐴀𐴌 𐴉𐴟𐴣𐴎𐴝𐴤 𐴉𐴝𐴃𐴡𐴓𐴢.“

The Word for the World International

https://app.library.bible/content/87faca8b51c22590