Read 𐴔𐴡𐴃𐴞 13

𐴔𐴡𐴃𐴞13

𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴢

¹𐴇𐴠𐴥 𐴊𐴞𐴕 𐴀𐴞𐴏𐴝𐴤 𐴒𐴡𐴥𐴌𐴡𐴌 𐴁𐴝𐴀𐴌𐴠 𐴕𐴠𐴦𐴓𐴞 𐴋𐴞𐴀𐴌 𐴇𐴝𐴣𐴏𐴝𐴃𐴢 𐴎𐴝𐴘 𐴁𐴡𐴙𐴐𐴧𐴠𐴥𐴒𐴡𐴘.²𐴀𐴝𐴦𐴌 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴎𐴡𐴔𐴝 𐴀𐴡𐴥𐴘𐴧𐴠 𐴊𐴠𐴥 𐴇𐴠𐴥𐴃𐴡𐴓𐴧𐴝, 𐴀𐴞𐴥𐴁𐴝 𐴀𐴠𐴑𐴧𐴝𐴥𐴕 𐴕𐴡𐴦𐴃𐴢 𐴀𐴟𐴍𐴞𐴤 𐴁𐴡𐴙𐴐𐴧𐴠𐴥, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴧𐴟𐴥𐴕 𐴁𐴠𐴒𐴧𐴟𐴥𐴕 𐴑𐴟𐴓𐴡𐴌 𐴖𐴡𐴌𐴠 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴠.³𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴔𐴠𐴀𐴏𐴝𐴓𐴢 𐴀𐴡𐴥𐴑𐴧𐴡𐴓𐴢 𐴊𐴞𐴥 𐴀𐴞𐴥𐴃𐴝𐴌𐴝𐴌𐴠 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴈𐴡𐴘𐴧𐴠𐴥, 𐴑𐴞 𐴈𐴡𐴘𐴓𐴠𐴥, ”𐴉𐴟𐴥𐴕𐴡, 𐴀𐴠𐴎𐴧𐴡𐴕 𐴁𐴞𐴏𐴢 𐴐𐴞𐴥𐴣𐴍𐴡𐴘𐴝 𐴁𐴞𐴏𐴢 𐴐𐴞𐴥𐴣𐴄𐴧𐴡 𐴕𐴠𐴦𐴙𐴓𐴧𐴠𐴥.⁴𐴘𐴡𐴥𐴒𐴧𐴗𐴝𐴘𐴠 𐴐𐴞𐴥𐴣𐴍𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴇𐴡𐴊𐴟𐴥𐴕 𐴁𐴞𐴏𐴢 𐴌𐴝𐴏𐴃𐴝𐴌 𐴇𐴝𐴣𐴏𐴝𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴠 𐴀𐴝𐴀𐴘𐴢 𐴇𐴞𐴥𐴀𐴕 𐴈𐴝𐴥𐴘𐴉𐴠𐴓𐴝𐴘𐴧𐴠.⁵𐴇𐴡𐴊𐴟𐴥𐴕 𐴁𐴞𐴏𐴢 𐴐𐴞𐴥𐴓𐴢 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴎𐴠𐴍𐴠𐴥 𐴁𐴞𐴐𐴞𐴤 𐴔𐴠𐴍𐴞 𐴕𐴝𐴥𐴘. 𐴔𐴟𐴌 𐴔𐴠𐴍𐴞 𐴕𐴟 𐴀𐴝𐴐𐴧𐴞𐴥𐴓𐴢 𐴀𐴞𐴥𐴏𐴝𐴉𐴠 𐴇𐴞𐴥𐴀𐴕𐴡𐴃𐴢 𐴇𐴝𐴥𐴌𐴝 𐴒𐴠𐴏𐴢 𐴀𐴝𐴙𐴐𐴧𐴠𐴥.⁶𐴔𐴡𐴕𐴃𐴡𐴌 𐴁𐴠𐴙𐴓𐴢 𐴀𐴟𐴙𐴄𐴧𐴠𐴥 𐴌𐴝𐴥𐴌 𐴇𐴞𐴥𐴀𐴕 𐴉𐴟𐴌𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴐𐴞𐴥𐴛𐴡𐴌 𐴕𐴡𐴥 𐴒𐴝𐴏𐴝𐴤 𐴀𐴞𐴥𐴏𐴝𐴉𐴠 𐴇𐴞𐴥𐴀𐴕 𐴉𐴟𐴥𐴖𐴝𐴘𐴒𐴞𐴘𐴡𐴘.⁷𐴇𐴡𐴊𐴟𐴥𐴕 𐴁𐴞𐴏𐴢 𐴑𐴠𐴣𐴍𐴝𐴁𐴡𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴑𐴠𐴣𐴍𐴝𐴁𐴡𐴕 𐴁𐴝𐴌𐴞𐴥 𐴀𐴟𐴍𐴞𐴤 𐴇𐴞𐴥𐴀𐴕𐴡𐴌𐴠 𐴏𐴞𐴁𐴞 𐴌𐴝𐴙𐴑𐴧𐴠𐴥.⁸𐴓𐴠𐴑𐴞𐴕 𐴀𐴝𐴌 𐴇𐴡𐴊𐴟𐴥𐴕 𐴁𐴞𐴏𐴢 𐴒𐴡𐴔 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴇𐴞𐴥𐴀𐴕𐴡𐴃𐴢 𐴉𐴡𐴥𐴏𐴡𐴓𐴢 𐴊𐴡𐴥𐴙𐴅𐴧𐴠: 𐴑𐴠𐴏𐴧𐴟𐴥𐴃𐴢 𐴀𐴠𐴑 𐴐𐴡𐴥𐴃𐴢 𐴒𐴟𐴕, 𐴑𐴠𐴏𐴧𐴟𐴥𐴃𐴢 𐴇𐴝𐴥𐴙𐴄𐴢 𐴒𐴟𐴕, 𐴀𐴝𐴌 𐴑𐴠𐴏𐴧𐴟𐴥𐴃𐴢 𐴃𐴞𐴌𐴞𐴥𐴐𐴢 𐴒𐴟𐴕.⁹𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.“

𐴔𐴠𐴀𐴏𐴝𐴓𐴢 𐴓𐴟𐴕𐴡𐴌 𐴔𐴡𐴑𐴏𐴡𐴥𐴃𐴢

¹⁰𐴁𐴝𐴦𐴊𐴠 𐴐𐴝𐴥𐴌𐴞𐴃𐴧𐴟𐴕 𐴀𐴝𐴀𐴘𐴢 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴔𐴝𐴙𐴕𐴐𐴡𐴥𐴌𐴠 𐴔𐴠𐴀𐴏𐴝𐴓𐴢 𐴊𐴞𐴥 𐴑𐴞𐴘𐴝𐴥 𐴈𐴡𐴃𐴝𐴤 𐴈𐴡𐴀؟“

¹¹𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴌 𐴒𐴟𐴉𐴡𐴕𐴞𐴌𐴠 𐴎𐴝𐴙𐴕𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠 𐴊𐴞𐴘𐴝 𐴒𐴞𐴘𐴠𐴥, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴘𐴝𐴕 𐴊𐴞𐴘𐴝 𐴕𐴡𐴥 𐴎𐴝.¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴃𐴧𐴟 𐴕𐴞𐴑𐴞 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴌𐴠 𐴀𐴝𐴌𐴡𐴤 𐴊𐴞𐴦𐴘𐴝 𐴎𐴝𐴘𐴁𐴡, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴃𐴧𐴟 𐴀𐴡𐴥𐴊𐴡𐴌𐴁𐴝𐴀𐴌𐴝 𐴃𐴝𐴥𐴑𐴞𐴁𐴡; 𐴔𐴡𐴕𐴃𐴡𐴌 𐴎𐴝𐴃𐴧𐴟 𐴕𐴞𐴑𐴞 𐴕𐴝𐴥𐴘, 𐴘𐴡𐴥𐴒𐴧𐴗𐴝𐴃𐴧𐴟 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴀𐴟𐴥𐴊𐴧𐴗𐴝 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡.¹³𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴔𐴠𐴀𐴏𐴝𐴓𐴢 𐴊𐴞𐴥 𐴀𐴠𐴃𐴡𐴓𐴧𐴝𐴤 𐴁𐴠 𐴈𐴡𐴀𐴘𐴢,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴏𐴝𐴘𐴓𐴠𐴥 𐴘𐴡 𐴕𐴡 𐴊𐴠𐴑𐴠𐴥,𐴉𐴟𐴥𐴕𐴞𐴓𐴠 𐴘𐴡 𐴕𐴡 𐴉𐴟𐴥𐴕𐴠, 𐴀𐴝𐴦𐴌 𐴕𐴡 𐴘𐴡𐴥 𐴁𐴟𐴎𐴠𐴥.

¹⁴𐴀𐴞𐴥𐴃𐴝𐴌𐴝𐴌 𐴇𐴞𐴥𐴘𐴝𐴕𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴀𐴝𐴒𐴟𐴕 𐴈𐴡𐴃𐴝𐴤 𐴘𐴝𐴀𐴕 𐴉𐴟𐴌𐴝 𐴀𐴡𐴥𐴘𐴧𐴠,’𐴃𐴟𐴣𐴀𐴝𐴥𐴌𐴝 𐴈𐴝𐴕𐴠 𐴉𐴟𐴥𐴕𐴝𐴃𐴢 𐴃𐴝𐴥𐴑𐴞𐴁𐴝 𐴔𐴡𐴕𐴃𐴡𐴌 𐴕𐴡 𐴁𐴟𐴎𐴞𐴥𐴁𐴝,𐴃𐴟𐴣𐴀𐴝𐴥𐴌𐴝 𐴏𐴟𐴑𐴠𐴤 𐴏𐴝𐴀𐴃𐴢 𐴃𐴝𐴥𐴑𐴞𐴁𐴝 𐴔𐴡𐴕𐴃𐴡𐴌 𐴕𐴡 𐴏𐴞𐴕𐴞𐴥𐴁𐴝.¹⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌 𐴊𐴞𐴓𐴢 𐴃𐴡 𐴊𐴡𐴌𐴡𐴤 𐴀𐴡𐴥𐴘𐴒𐴞𐴘𐴡𐴘,𐴀𐴞𐴥𐴃𐴝𐴌𐴝𐴌 𐴈𐴝𐴕 𐴁𐴡𐴥𐴌 𐴀𐴡𐴥𐴘𐴒𐴞𐴘𐴡𐴘,𐴀𐴝𐴦𐴌 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴏𐴟𐴑 𐴁𐴡𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.𐴀𐴝𐴌𐴕𐴡𐴥𐴘𐴓𐴠 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴏𐴟𐴑𐴠𐴤 𐴊𐴠𐴑𐴞𐴥𐴃𐴡,𐴈𐴝𐴕𐴠 𐴉𐴟𐴥𐴕𐴞𐴃𐴡,𐴕𐴞𐴎𐴡𐴌 𐴊𐴞𐴓𐴠 𐴁𐴟𐴎𐴞𐴥 𐴀𐴝𐴣𐴀𐴌 𐴇𐴝𐴣𐴏𐴠 𐴉𐴞𐴥𐴌𐴞 𐴀𐴝𐴘𐴃𐴡𐴤,𐴀𐴝𐴦𐴌 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴙𐴃𐴧𐴝𐴥𐴔.‘

¹⁶𐴓𐴠𐴑𐴞𐴕 𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝𐴌 𐴏𐴟𐴑, 𐴇𐴞𐴥𐴀𐴕𐴠 𐴊𐴠𐴑𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝; 𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝𐴌 𐴈𐴝𐴕, 𐴇𐴞𐴥𐴀𐴕𐴠 𐴉𐴟𐴥𐴕𐴠 𐴊𐴠 𐴇𐴠𐴥𐴃𐴡𐴓𐴧𐴝.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴁𐴡𐴀𐴗𐴃𐴢 𐴕𐴡𐴁𐴞 𐴀𐴠𐴊𐴧𐴠 𐴉𐴡𐴌𐴇𐴠𐴥𐴏𐴒𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴊𐴠𐴑𐴡𐴥𐴌 𐴇𐴞𐴥𐴀𐴕 𐴊𐴠𐴑𐴞𐴥 𐴁𐴡𐴓𐴧𐴝 𐴀𐴝𐴎𐴧𐴟 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴕𐴡𐴥 𐴊𐴠𐴑𐴠𐴥; 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴉𐴟𐴥𐴕𐴡𐴌 𐴇𐴞𐴥𐴀𐴕 𐴉𐴟𐴥𐴕𐴞 𐴁𐴡𐴓𐴧𐴝 𐴘𐴡𐴥 𐴀𐴝𐴎𐴧𐴟 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴕𐴡𐴥 𐴉𐴟𐴥𐴕𐴠.

𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴡𐴌 𐴔𐴝𐴀𐴕𐴞 𐴁𐴟𐴎𐴝𐴥𐴘𐴊𐴞𐴘𐴠

¹⁸”𐴘𐴝𐴓𐴝 𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴢 𐴓𐴝𐴕𐴡𐴌 𐴔𐴝𐴀𐴕𐴞 𐴑𐴞𐴦 𐴉𐴟𐴥𐴕𐴡.¹⁹𐴎𐴠𐴣𐴃𐴧𐴠𐴥 𐴇𐴡𐴕𐴡𐴤𐴑𐴞𐴘𐴠 𐴌𐴝𐴙𐴅𐴧𐴡𐴌 𐴑𐴝𐴓𐴝𐴔 𐴉𐴟𐴥𐴕𐴠 𐴔𐴡𐴕𐴃𐴡𐴌 𐴕𐴡 𐴁𐴟𐴎𐴠𐴥, 𐴀𐴞𐴁𐴞𐴓𐴞𐴥𐴐𐴠 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌 𐴊𐴞𐴓𐴡𐴃𐴢 𐴎𐴞𐴀𐴕 𐴐𐴞𐴥𐴣𐴍𐴝 𐴒𐴞𐴥𐴘𐴠 𐴇𐴞𐴥𐴀𐴕 𐴇𐴝𐴌𐴞𐴤 𐴓𐴡𐴘𐴎𐴝𐴒𐴡𐴥𐴘. 𐴔𐴝𐴕𐴟𐴥𐴙𐴐𐴢 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴌𐴝𐴏𐴃𐴝𐴌 𐴇𐴝𐴣𐴏𐴝𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢.²⁰𐴐𐴞𐴥𐴓𐴢 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤, 𐴎𐴠𐴦𐴕𐴞𐴑𐴞 𐴑𐴝𐴓𐴝𐴔 𐴉𐴟𐴥𐴕𐴠 𐴀𐴝𐴦𐴌 𐴀𐴠𐴥𐴇𐴡𐴕 𐴇𐴞𐴥𐴀𐴕𐴡𐴌𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥;²¹𐴔𐴡𐴕𐴃𐴡𐴌 𐴕𐴞𐴎𐴡𐴌 𐴁𐴟𐴥𐴃𐴡𐴌𐴠 𐴔𐴡𐴎𐴁𐴟𐴃𐴢 𐴐𐴞𐴥𐴛𐴡𐴌 𐴕𐴡𐴥 𐴒𐴝𐴏𐴝𐴤 𐴊𐴠 𐴇𐴠𐴥𐴃𐴡𐴓𐴧𐴝 𐴇𐴞𐴥𐴀𐴕 𐴇𐴡𐴦𐴊𐴧𐴞𐴕 𐴁𐴠 𐴃𐴝𐴥𐴑𐴠. 𐴎𐴠𐴣𐴃𐴧𐴠𐴥 𐴇𐴠𐴥 𐴑𐴝𐴓𐴝𐴔𐴡𐴌 𐴎𐴡𐴌𐴞𐴘𐴝 𐴔𐴡𐴏𐴞𐴁𐴡𐴃𐴢 𐴘𐴝𐴥 𐴎𐴟𐴓𐴟𐴥𐴔 𐴀𐴝𐴘𐴧𐴠𐴤, 𐴘𐴡𐴥𐴒𐴧𐴗𐴝 𐴀𐴠𐴥𐴇𐴡𐴕 𐴉𐴞𐴏𐴧𐴝𐴥 𐴔𐴝𐴌𐴠.²²𐴑𐴠𐴣𐴍𐴝𐴁𐴡𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤, 𐴎𐴠𐴦𐴕𐴞𐴑𐴞 𐴑𐴝𐴓𐴝𐴔 𐴉𐴟𐴥𐴕𐴠, 𐴔𐴡𐴕𐴃𐴡𐴌 𐴊𐴟𐴕𐴞𐴘𐴝𐴙𐴌 𐴏𐴞𐴕𐴃𐴝𐴁𐴝𐴥𐴉𐴝𐴕𐴞𐴘𐴠 𐴀𐴠𐴊𐴧𐴠 𐴊𐴡𐴥𐴕-𐴊𐴡𐴓𐴡𐴃𐴡𐴌 𐴀𐴝𐴊𐴡𐴌𐴠 𐴇𐴠𐴥 𐴑𐴝𐴓𐴝𐴔𐴡𐴌𐴠 𐴏𐴞𐴁𐴞 𐴌𐴝𐴑𐴠𐴥, 𐴇𐴠𐴥𐴃𐴡𐴓𐴧𐴝 𐴇𐴞𐴥𐴀𐴕𐴡𐴃𐴢 𐴒𐴟𐴓𐴝 𐴕𐴡 𐴊𐴡𐴥𐴌𐴠.²³𐴓𐴠𐴑𐴞𐴕 𐴒𐴡𐴔 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤, 𐴎𐴠𐴦𐴕𐴞𐴑𐴞 𐴑𐴝𐴓𐴝𐴔 𐴉𐴟𐴥𐴕𐴠 𐴀𐴠𐴊𐴧𐴠 𐴁𐴟𐴎𐴠𐴥, 𐴀𐴝𐴦𐴌 𐴒𐴟𐴓𐴝 𐴊𐴡𐴥𐴌𐴝: 𐴑𐴠𐴏𐴧𐴟𐴥𐴘𐴠 𐴀𐴠𐴑 𐴐𐴡𐴥𐴃𐴢 𐴒𐴟𐴕, 𐴑𐴠𐴏𐴧𐴟𐴥𐴘𐴠 𐴇𐴝𐴥𐴙𐴄𐴢 𐴒𐴟𐴕, 𐴀𐴝𐴦𐴌 𐴑𐴠𐴏𐴧𐴟𐴥𐴘𐴠 𐴃𐴞𐴌𐴞𐴥𐴐𐴢 𐴒𐴟𐴕.“

𐴒𐴞𐴣𐴘𐴟𐴃𐴢 𐴔𐴝𐴎𐴠𐴥 𐴑𐴠𐴥𐴌𐴑𐴟𐴣𐴍𐴝𐴌 𐴔𐴠𐴀𐴏𐴝𐴓𐴢

²⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴊𐴞𐴥 𐴈𐴡𐴀𐴌 𐴊𐴠, ”𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴀𐴟𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴡𐴁𐴞𐴕𐴡𐴃𐴢 𐴒𐴡𐴔 𐴁𐴞𐴏𐴢 𐴀𐴡𐴥𐴑𐴧𐴡𐴓𐴢 𐴐𐴞𐴥𐴣𐴄𐴧𐴠.²⁵𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴒𐴟𐴥𐴔 𐴒𐴞𐴥𐴘𐴠 𐴌𐴝𐴥𐴌, 𐴘𐴡𐴥𐴒𐴧𐴗𐴝𐴌 𐴊𐴟𐴐𐴧𐴡𐴕 𐴀𐴝𐴀𐴘𐴢 𐴒𐴞𐴣𐴘𐴟𐴃𐴢 𐴔𐴝𐴎𐴠𐴥 𐴑𐴠𐴥𐴌𐴑𐴟𐴣𐴍𐴝𐴌 𐴁𐴞𐴏𐴢 𐴀𐴡𐴥𐴑𐴧𐴡𐴓𐴢 𐴐𐴞𐴥𐴣𐴍𐴞𐴊𐴞 𐴒𐴞𐴦𐴘𐴠𐴥𐴒𐴡𐴘.²⁶𐴎𐴠𐴣𐴃𐴧𐴠𐴥 𐴒𐴞𐴣𐴘𐴟𐴌 𐴏𐴝𐴌𐴝 𐴁𐴝𐴌𐴞𐴥 𐴀𐴟𐴍𐴞𐴤 𐴉𐴡𐴥𐴏𐴡𐴓𐴢 𐴊𐴡𐴥𐴙𐴅𐴧𐴠, 𐴇𐴠𐴥𐴣𐴃𐴧𐴠 𐴑𐴠𐴥𐴌𐴑𐴟𐴣𐴍𐴝 𐴘𐴡𐴥 𐴊𐴝𐴈𐴝𐴤 𐴒𐴞𐴥𐴘𐴠.

²⁷”𐴃𐴡𐴥𐴘 𐴒𐴡𐴥𐴌𐴡𐴌 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴠 𐴒𐴞𐴌𐴡𐴥𐴏𐴡𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ’𐴅𐴡𐴕𐴝𐴁𐴢, 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴎𐴡𐴁𐴞𐴕𐴡𐴃𐴢 𐴒𐴡𐴔 𐴁𐴞𐴏𐴢 𐴐𐴞𐴥𐴣𐴄𐴧𐴞𐴓𐴝 𐴊𐴠 𐴕𐴡𐴥 𐴕𐴠𐴥؟ 𐴃𐴡𐴥𐴘 𐴑𐴠𐴥𐴌𐴑𐴟𐴣𐴍𐴝 𐴇𐴡𐴕𐴃𐴟𐴤 𐴀𐴝𐴙𐴐𐴧𐴠𐴥؟‘

²⁸”𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ’𐴀𐴠𐴎𐴧𐴡𐴕 𐴊𐴟𐴐𐴧𐴡𐴕𐴠 𐴇𐴞𐴥𐴘𐴝𐴕 𐴒𐴡𐴙𐴅𐴧𐴠𐴥 𐴊𐴠.‘ 𐴒𐴡𐴗𐴀𐴌 𐴒𐴟𐴥𐴕𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ’𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴎𐴝𐴘 𐴇𐴞𐴥𐴀𐴕 𐴇𐴝𐴥𐴣𐴌𐴞 𐴉𐴠𐴥𐴓𐴝𐴘𐴃𐴝𐴔𐴁𐴡𐴘 𐴕𐴠𐴥؟‘

²⁹”𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ’𐴕𐴡, 𐴕𐴡, 𐴃𐴟𐴣𐴀𐴝𐴥𐴌𐴝 𐴑𐴠𐴥𐴌𐴑𐴟𐴣𐴍𐴝 𐴇𐴝𐴥𐴣𐴌𐴞𐴁𐴝𐴐𐴧𐴡𐴃𐴢 𐴒𐴞𐴣𐴘𐴟 𐴘𐴡𐴥 𐴇𐴝𐴥𐴣𐴌𐴞𐴉𐴠𐴓𐴝𐴘𐴁𐴝.³⁰𐴊𐴝𐴘𐴁𐴝𐴌 𐴀𐴝𐴙𐴕𐴊𐴝 𐴕𐴟𐴥 𐴀𐴝𐴘𐴧𐴠𐴤 𐴉𐴡𐴙𐴅𐴧𐴡𐴕𐴃𐴡 𐴊𐴟𐴕𐴞𐴥 𐴒𐴟𐴥𐴕𐴡𐴌𐴠 𐴉𐴟𐴥𐴖𐴝𐴣𐴃𐴞 𐴁𐴝𐴌𐴞𐴥𐴃𐴡 𐴊𐴡; 𐴀𐴡𐴕𐴠 𐴊𐴝𐴘𐴁𐴝𐴌 𐴀𐴝𐴙𐴕𐴊𐴝 𐴀𐴝𐴘𐴓𐴠𐴤 𐴀𐴝𐴀𐴛 𐴊𐴡𐴦𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴘𐴧𐴟𐴥𐴔 𐴊𐴠, 𐴉𐴟𐴌𐴝𐴃𐴢 𐴊𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴀𐴝𐴒𐴠 𐴑𐴠𐴥𐴌𐴑𐴟𐴣𐴍𐴝 𐴒𐴟𐴥𐴕 𐴎𐴡𐴔𐴝 𐴒𐴡𐴌𐴞𐴥𐴉𐴠𐴓𐴝𐴘 𐴃𐴝𐴌𐴝 𐴁𐴝𐴣𐴊𐴞𐴥𐴉𐴠𐴓𐴡; 𐴁𐴝𐴦𐴊𐴠 𐴒𐴞𐴣𐴘𐴟 𐴒𐴟𐴥𐴕 𐴀𐴝𐴣𐴀𐴌 𐴒𐴟𐴊𐴝𐴔𐴡𐴃𐴢 𐴎𐴡𐴔𐴝 𐴒𐴡𐴌𐴡𐴤.‘ “

𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴔𐴠𐴀𐴏𐴝𐴓𐴢

³¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴊𐴞𐴥 𐴈𐴡𐴀𐴌 𐴊𐴠, ”𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴀𐴠𐴒𐴧𐴗𐴝𐴤 𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴋𐴡𐴥𐴙𐴓𐴧𐴝, 𐴎𐴞𐴁𐴝𐴤𐴌𐴠 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴓𐴡𐴦𐴘𐴢 𐴕𐴞𐴎𐴡𐴌 𐴑𐴠𐴥𐴃𐴞𐴃𐴢 𐴓𐴝𐴒𐴝𐴘𐴠𐴥𐴒𐴡𐴘;³²𐴘𐴞𐴥𐴁𐴝 𐴀𐴡𐴙𐴕𐴧𐴡 𐴁𐴞𐴏𐴢 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴐𐴡𐴥𐴣𐴍𐴡 𐴊𐴠 𐴀𐴡𐴥𐴘𐴓𐴠 𐴘𐴡, 𐴁𐴝𐴌𐴞𐴥 𐴀𐴟𐴍𐴞𐴤𐴓𐴠 𐴘𐴞𐴥𐴁𐴝 𐴑𐴠𐴥𐴃𐴞𐴌 𐴃𐴝𐴔𐴝𐴥𐴔 𐴏𐴝𐴌𐴝 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴡𐴥𐴘 𐴀𐴠𐴕𐴊𐴞𐴓𐴧𐴝 𐴀𐴠𐴒𐴧𐴗𐴝𐴤 𐴒𐴝𐴏𐴢 𐴁𐴡𐴕𐴠, 𐴎𐴠𐴀𐴕 𐴕𐴞𐴥𐴑𐴞 𐴉𐴝𐴙𐴑 𐴀𐴡𐴥𐴑𐴧𐴡𐴓𐴠 𐴀𐴝𐴀𐴘𐴢 𐴘𐴞𐴥𐴁𐴝𐴌 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴡𐴃𐴢 𐴁𐴝𐴇𐴝𐴤 𐴁𐴝𐴣𐴊𐴠𐴤.“

𐴐𐴟𐴥𐴄𐴝𐴌𐴡𐴌 𐴔𐴠𐴀𐴏𐴝𐴓𐴢

³³𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴊𐴞𐴥𐴘𐴠 𐴊𐴠 𐴑𐴞 𐴈𐴡𐴘𐴓𐴠𐴥, ”𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴐𐴟𐴥𐴄𐴝𐴌𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕𐴡𐴌𐴠 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝𐴘𐴠 𐴓𐴡𐴦𐴘𐴢 𐴃𐴡𐴑𐴡𐴌𐴞𐴁𐴝𐴕 𐴀𐴠𐴑𐴧𐴟𐴌𐴞 𐴃𐴞𐴕 𐴐𐴠𐴥𐴌 𐴀𐴝𐴄𐴝𐴃𐴢 𐴔𐴞𐴘𐴝𐴥𐴘𐴧𐴠, 𐴁𐴝𐴦𐴊𐴠 𐴒𐴟𐴣𐴍𐴝 𐴈𐴝𐴛𐴡𐴌 𐴊𐴡𐴓𐴝 𐴉𐴟𐴥𐴓𐴞 𐴀𐴟𐴙𐴄𐴧𐴠𐴥.“

𐴔𐴠𐴀𐴏𐴝𐴓𐴢 𐴀𐴡𐴥𐴑𐴧𐴡𐴓𐴡𐴌 𐴀𐴠𐴏𐴃𐴠𐴔𐴝𐴓𐴢

³⁴𐴀𐴞𐴏𐴝𐴤𐴘𐴠 𐴔𐴝𐴙𐴕𐴐𐴡𐴥𐴌𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴔𐴠𐴀𐴏𐴝𐴓𐴢 𐴊𐴞𐴥 𐴁𐴠 𐴈𐴡𐴘𐴧𐴠𐴥; 𐴔𐴠𐴀𐴏𐴝𐴓𐴢 𐴏𐴝𐴥𐴌𐴝 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴡 𐴈𐴡𐴘𐴃𐴡𐴤.³⁵𐴎𐴠𐴀𐴕𐴠 𐴕𐴡𐴁𐴞𐴌 𐴊𐴟𐴖𐴝𐴌𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥:”𐴀𐴝𐴀𐴛 𐴔𐴠𐴀𐴏𐴝𐴓𐴢 𐴀𐴡𐴥𐴑𐴧𐴡𐴓𐴢 𐴊𐴞𐴥 𐴀𐴝𐴣𐴀𐴌 𐴔𐴟𐴦 𐴑𐴟𐴥𐴓𐴞𐴘𐴟𐴔;𐴀𐴝𐴀𐴛 𐴀𐴟𐴀𐴙𐴕 𐴁𐴡𐴘𐴧𐴝𐴕 𐴒𐴡𐴌𐴞𐴥𐴘𐴟𐴔 𐴎𐴞𐴀𐴕 𐴊𐴟𐴕𐴞𐴘𐴝𐴙𐴌 𐴉𐴡𐴘𐴊𐴝𐴘𐴠𐴐𐴞𐴌 𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴓𐴟𐴑𐴝𐴘𐴧𐴝 𐴀𐴝𐴏𐴠𐴤.“

𐴑𐴠𐴥𐴌𐴑𐴟𐴣𐴍𐴝𐴌 𐴔𐴠𐴀𐴏𐴝𐴓𐴢 𐴓𐴝𐴕𐴡𐴌 𐴔𐴝𐴀𐴕𐴞

³⁶𐴁𐴝𐴦𐴊𐴠 𐴀𐴞𐴏𐴝𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴌𐴞 𐴒𐴡𐴥𐴌𐴡𐴌 𐴁𐴟𐴥𐴃𐴡𐴌𐴠 𐴒𐴞𐴦𐴘𐴠𐴥. 𐴀𐴝𐴦𐴌 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴌𐴠 𐴎𐴡𐴁𐴞𐴕𐴡𐴌 𐴑𐴠𐴥𐴌𐴑𐴟𐴣𐴍𐴝𐴌 𐴔𐴠𐴀𐴏𐴝𐴓𐴢 𐴓𐴝𐴕 𐴁𐴟𐴎𐴝𐴥𐴘𐴊𐴡.“

³⁷𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴞𐴁𐴝𐴤𐴘𐴠 𐴕𐴞𐴑𐴞 𐴒𐴡𐴔 𐴁𐴞𐴏𐴢 𐴐𐴞𐴥𐴣𐴄𐴧𐴠, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝.³⁸𐴎𐴡𐴁𐴞𐴕 𐴕𐴝𐴥𐴕 𐴀𐴡𐴥𐴙𐴓𐴊𐴠 𐴊𐴟𐴕𐴞𐴘𐴝𐴘, 𐴒𐴡𐴔 𐴁𐴞𐴏𐴢 𐴏𐴟𐴥𐴕 𐴀𐴡𐴥𐴙𐴓𐴊𐴠 𐴌𐴝𐴙𐴅𐴧𐴡𐴌 𐴉𐴟𐴀𐴝𐴙𐴕, 𐴀𐴝𐴦𐴌 𐴑𐴠𐴥𐴌𐴑𐴟𐴣𐴍𐴝 𐴒𐴟𐴥𐴕 𐴀𐴡𐴥𐴙𐴓𐴊𐴠 𐴀𐴞𐴁𐴞𐴓𐴞𐴥𐴐𐴡𐴌 𐴉𐴟𐴀𐴝𐴙𐴕,³⁹𐴎𐴠 𐴊𐴟𐴐𐴧𐴡𐴕𐴠 𐴇𐴞𐴥𐴀𐴕 𐴐𐴞𐴥𐴣𐴄𐴧𐴠 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴀𐴞𐴁𐴞𐴓𐴞𐴥𐴐𐴢, 𐴊𐴝𐴘𐴁𐴝𐴌 𐴀𐴝𐴙𐴕𐴊𐴝 𐴀𐴡𐴥𐴙𐴓𐴊𐴠 𐴊𐴟𐴕𐴞𐴘𐴝𐴙𐴌 𐴀𐴝𐴇𐴠𐴥𐴌𐴡𐴃𐴢, 𐴀𐴝𐴦𐴌 𐴊𐴡𐴦𐴘𐴝 𐴒𐴟𐴥𐴕 𐴀𐴡𐴥𐴙𐴓𐴊𐴠 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴢.

⁴⁰”𐴎𐴠𐴕𐴊𐴞𐴓𐴧𐴝, 𐴑𐴠𐴥𐴌𐴑𐴟𐴣𐴍𐴝 𐴒𐴟𐴥𐴕𐴡𐴌𐴠 𐴎𐴡𐴔𐴝 𐴒𐴡𐴌𐴞𐴥𐴉𐴠𐴓𐴝𐴘 𐴀𐴡𐴦𐴙𐴕𐴡𐴃𐴢 𐴉𐴟𐴌𐴝𐴃𐴢 𐴊𐴞𐴉𐴠𐴥𐴓𐴠, 𐴀𐴠 𐴊𐴟𐴕𐴞𐴘𐴝𐴙𐴌 𐴀𐴝𐴇𐴠𐴥𐴌𐴡𐴃𐴡𐴃𐴢 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴀𐴡𐴥𐴘𐴁𐴡.⁴¹𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴘𐴠 𐴕𐴞𐴎𐴡𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴊𐴞𐴉𐴠𐴍𐴝𐴥𐴘𐴁𐴡, 𐴀𐴝𐴦𐴌 𐴇𐴞𐴥𐴀𐴕𐴠 𐴀𐴞𐴥𐴁𐴝𐴌 𐴌𐴝𐴙𐴅𐴧𐴡𐴌 𐴁𐴟𐴥𐴃𐴡𐴃𐴧𐴟 𐴎𐴠𐴃𐴝𐴌𐴝𐴤 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴒𐴟𐴕𐴝𐴤𐴃𐴢 𐴉𐴡𐴌𐴝𐴁𐴝 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴑𐴟𐴈𐴝𐴔 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴒𐴡𐴌𐴞𐴥𐴁𐴡,⁴²𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴎𐴡𐴓𐴠𐴌 𐴊𐴠 𐴀𐴡𐴦𐴙𐴕𐴡𐴌 𐴉𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴁𐴡; 𐴇𐴠𐴥𐴍𐴠 𐴈𐴝𐴣𐴊𐴝𐴈𐴝𐴍𐴞 𐴀𐴠𐴊𐴧𐴠 𐴊𐴝𐴃𐴠 𐴊𐴝𐴃𐴢 𐴑𐴞𐴌𐴑𐴞𐴌𐴝𐴕𐴞 𐴀𐴡𐴥𐴘𐴁𐴡.⁴³𐴇𐴠𐴥𐴣𐴃𐴧𐴠 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴢 𐴕𐴞𐴎𐴡𐴌 𐴁𐴝𐴉𐴡𐴌 𐴌𐴝𐴙𐴅𐴧𐴡𐴃𐴢 𐴔𐴝𐴎𐴠𐴥 𐴁𐴠𐴙𐴓𐴡𐴌 𐴋𐴡𐴥𐴙𐴓𐴧𐴝 𐴏𐴡𐴔𐴑𐴞𐴁𐴡𐴥. 𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.

𐴓𐴟𐴑𐴝𐴘 𐴌𐴝𐴙𐴑𐴧𐴝𐴥 𐴊𐴡𐴥𐴕𐴡𐴌 𐴔𐴠𐴀𐴏𐴝𐴓𐴢

⁴⁴”𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴎𐴡𐴁𐴞𐴕𐴡𐴃𐴢 𐴓𐴟𐴑𐴝𐴘 𐴌𐴝𐴙𐴑𐴧𐴝𐴥 𐴊𐴡𐴥𐴕𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴉𐴝𐴘 𐴀𐴝𐴁𐴝𐴌 𐴓𐴟𐴑𐴝𐴘 𐴌𐴝𐴙𐴑𐴧𐴠𐴥; 𐴀𐴝𐴦𐴌 𐴇𐴠𐴥 𐴑𐴟𐴥𐴐𐴞𐴘𐴠 𐴎𐴝𐴘 𐴕𐴞𐴎𐴡𐴃𐴧𐴟 𐴀𐴝𐴏𐴠𐴤 𐴊𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴁𐴠𐴏𐴞 𐴇𐴠𐴥 𐴎𐴡𐴁𐴞𐴕 𐴕𐴝𐴥𐴕 𐴑𐴞𐴕𐴧𐴠𐴥𐴒𐴡𐴘.

𐴔𐴟𐴑𐴃𐴝𐴌 𐴔𐴠𐴀𐴏𐴝𐴓𐴢

⁴⁵”𐴀𐴝𐴁𐴝𐴌, 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴀𐴟𐴕𐴊𐴞𐴓𐴧𐴝 𐴐𐴡𐴥𐴊𐴡𐴌𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴦𐴕𐴞𐴑𐴞 𐴇𐴝𐴥𐴄𐴞 𐴔𐴟𐴑𐴃𐴝 𐴀𐴡𐴥𐴑𐴧𐴡𐴓𐴡𐴌 𐴃𐴝𐴓𐴝𐴐𐴡𐴃𐴢 𐴀𐴝𐴏𐴠𐴤;⁴⁶𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴠𐴒𐴧𐴗𐴝𐴤 𐴁𐴞𐴐𐴞𐴤 𐴊𐴝𐴔𐴞 𐴔𐴟𐴑𐴃𐴝 𐴉𐴝𐴘𐴧𐴠𐴥, 𐴇𐴠𐴥𐴃𐴟𐴕𐴡𐴃𐴢 𐴎𐴝𐴘 𐴕𐴞𐴎𐴡𐴃𐴧𐴟 𐴀𐴝𐴏𐴠𐴤 𐴊𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴁𐴠𐴏𐴞 𐴘𐴞𐴥𐴁𐴝 𐴑𐴞𐴕𐴧𐴠𐴥𐴒𐴡𐴘.

𐴄𐴝𐴕𐴝-𐴎𐴝𐴓𐴡𐴌 𐴔𐴠𐴀𐴏𐴝𐴓𐴢

⁴⁷”𐴀𐴝𐴁𐴝𐴌, 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴀𐴟𐴕𐴊𐴞𐴓𐴧𐴝 𐴄𐴝𐴕𐴝-𐴎𐴝𐴓𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴘𐴝𐴥𐴕 𐴉𐴝𐴕𐴞𐴥𐴃𐴢 𐴁𐴟𐴖𐴝𐴥𐴘 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴔𐴝𐴏𐴢 𐴊𐴡𐴥𐴙𐴅𐴧𐴠,⁴⁸𐴀𐴝𐴦𐴌 𐴇𐴞𐴥𐴘𐴝𐴕 𐴁𐴡𐴥𐴌𐴞𐴒𐴞𐴘𐴡𐴘 𐴌𐴝𐴥𐴌 𐴎𐴝𐴙𐴓𐴧𐴝 𐴀𐴡𐴥𐴑𐴧𐴡𐴓𐴠 𐴄𐴝𐴕𐴞 𐴏𐴡𐴌𐴡𐴃𐴢 𐴀𐴝𐴙𐴕𐴧𐴠𐴤. 𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴁𐴡𐴀𐴘𐴢 𐴒𐴡𐴔 𐴔𐴟𐴥𐴕 𐴒𐴡𐴔 𐴔𐴟𐴥𐴕 𐴋𐴟𐴓𐴝𐴃𐴢 𐴁𐴡𐴥𐴙𐴅𐴧𐴠, 𐴔𐴡𐴕𐴃𐴡𐴌 𐴈𐴡𐴥𐴌𐴝𐴉𐴢 𐴉𐴟𐴕 𐴈𐴡𐴥𐴌𐴝𐴉𐴢 𐴉𐴟𐴕 𐴉𐴠𐴥𐴓𐴝𐴘𐴊𐴞𐴘𐴠.⁴⁹𐴊𐴟𐴕𐴞𐴘𐴝𐴙𐴌 𐴀𐴝𐴇𐴠𐴥𐴌𐴡𐴃𐴡𐴃𐴢 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴀𐴡𐴥𐴘𐴁𐴡. 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴢 𐴀𐴝𐴘𐴁𐴡𐴤, 𐴀𐴝𐴀𐴘𐴢 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴕𐴝𐴉𐴡𐴥𐴌𐴔𐴝𐴕 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴓𐴡𐴑 𐴒𐴡𐴌𐴞𐴥𐴉𐴠𐴓𐴝𐴘𐴁𐴡,⁵⁰𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌𐴠 𐴎𐴡𐴓𐴠𐴌 𐴊𐴠 𐴀𐴡𐴦𐴙𐴕𐴡𐴌 𐴉𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴁𐴡; 𐴇𐴠𐴥𐴍𐴠 𐴈𐴝𐴣𐴊𐴝𐴈𐴝𐴍𐴞 𐴀𐴠𐴊𐴧𐴠 𐴊𐴝𐴃𐴠 𐴊𐴝𐴃𐴢 𐴑𐴞𐴌𐴑𐴞𐴌𐴝𐴕𐴞 𐴀𐴡𐴥𐴘𐴁𐴡.“

𐴕𐴡𐴘𐴝 𐴀𐴠𐴊𐴧𐴠 𐴉𐴟𐴌𐴝𐴕 𐴊𐴡𐴥𐴕

⁵¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴁𐴟𐴙𐴅𐴧𐴡𐴥 𐴕𐴠𐴥؟“
𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴁𐴟𐴙𐴅𐴧𐴞𐴥 𐴎𐴠.“

⁵²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴠𐴥𐴃𐴡𐴓𐴧𐴝 𐴉𐴡𐴃𐴧𐴞𐴥 𐴀𐴝𐴓𐴠𐴔 𐴎𐴠𐴃𐴝𐴌𐴝𐴤 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴌 𐴐𐴝𐴥𐴌𐴞𐴃𐴢 𐴁𐴡𐴕𐴞𐴒𐴞𐴘𐴡𐴥𐴘, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴀𐴠𐴕𐴊𐴞𐴓𐴧𐴝 𐴀𐴠𐴎𐴧𐴡𐴕 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴡𐴌 𐴋𐴡𐴥𐴙𐴓𐴧𐴝 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴒𐴟𐴊𐴝𐴔𐴡𐴃𐴧𐴟 𐴕𐴡𐴘𐴝 𐴀𐴠𐴊𐴧𐴠 𐴉𐴟𐴌𐴝𐴕 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴝.“

𐴕𐴝𐴏𐴝𐴥𐴌𐴝𐴃𐴡𐴃𐴢 𐴀𐴞𐴏𐴝𐴤𐴌𐴠 𐴀𐴞𐴕𐴑𐴝𐴌

⁵³𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴃𐴧𐴟 𐴔𐴠𐴀𐴏𐴝𐴓𐴢 𐴇𐴞𐴥𐴀𐴕 𐴈𐴡𐴘𐴧𐴝𐴤 𐴀𐴡𐴥𐴘𐴧𐴠, 𐴀𐴞𐴥𐴁𐴝 𐴈𐴠𐴥𐴕𐴃𐴟 𐴒𐴞𐴦𐴘𐴠𐴥𐴒𐴡𐴘.⁵⁴𐴀𐴞𐴥𐴁𐴝 𐴕𐴞𐴎𐴡𐴌 𐴖𐴡𐴃𐴡𐴥𐴕𐴡𐴃𐴢 𐴀𐴝𐴀𐴘𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴃𐴝𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴀𐴠𐴀𐴕 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠, 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴀𐴝𐴔𐴧𐴟𐴥𐴑𐴠 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴠 𐴒𐴞𐴘𐴝𐴕 𐴀𐴠𐴊𐴧𐴠 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴀𐴞𐴀𐴕 𐴒𐴡𐴌𐴞𐴥𐴁𐴝𐴌 𐴑𐴠𐴥𐴔𐴡𐴃𐴝 𐴇𐴡𐴕𐴃𐴟𐴤 𐴉𐴝𐴘𐴧𐴠𐴥؟⁵⁵𐴀𐴞𐴁𐴝𐴤 𐴑𐴞𐴥 𐴔𐴞𐴏𐴃𐴞𐴥𐴌𐴞𐴌 𐴉𐴟𐴖𐴝 𐴕𐴡؟ 𐴀𐴞𐴁𐴝𐴤𐴌 𐴔𐴝𐴦 𐴔𐴡𐴌𐴞𐴘𐴝𐴔 𐴈𐴡𐴀 𐴊𐴠 𐴇𐴞𐴥𐴁𐴝 𐴕𐴡 𐴕𐴠𐴥, 𐴀𐴝𐴦𐴌 𐴀𐴞𐴁𐴝𐴤𐴌 𐴁𐴝𐴥𐴘𐴧𐴝𐴙𐴕 𐴘𐴝𐴑𐴟𐴁𐴢, 𐴘𐴟𐴏𐴟𐴥𐴉𐴢, 𐴏𐴝𐴥𐴘𐴔𐴡𐴕 𐴀𐴠𐴊𐴧𐴠 𐴘𐴡𐴇𐴟𐴥𐴊𐴝 𐴕𐴡 𐴕𐴠𐴥؟⁵⁶𐴀𐴞𐴁𐴝𐴤𐴌 𐴁𐴡𐴥𐴘𐴕𐴝𐴙𐴕 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤 𐴊𐴠 𐴕𐴡 𐴕𐴠𐴥؟ 𐴃𐴡𐴥𐴘 𐴀𐴞𐴁𐴝𐴤𐴘𐴠 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴇𐴡𐴕𐴃𐴟𐴤 𐴉𐴝𐴘𐴧𐴠𐴥؟“⁵⁷𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠𐴥.
𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠 𐴇𐴡𐴕𐴡𐴤 𐴕𐴡𐴁𐴞𐴌 𐴀𐴞𐴎𐴧𐴡𐴃𐴢 𐴕𐴞𐴎𐴡𐴌 𐴖𐴡𐴃𐴡𐴥𐴕𐴡𐴃𐴢 𐴀𐴠𐴊𐴧𐴠 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴁𐴝𐴊𐴠 𐴁𐴠𐴒𐴧𐴟𐴥𐴓𐴧𐴝 𐴀𐴝𐴏𐴠𐴤.“

⁵⁸𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴕𐴝𐴁𐴞𐴐𐴧𐴝𐴥𐴐𐴡𐴌 𐴎𐴡𐴌𐴞𐴘𐴝 𐴀𐴞𐴥𐴁𐴝𐴘𐴠 𐴇𐴠𐴥𐴍𐴠 𐴁𐴞𐴐𐴞𐴤 𐴑𐴠𐴌𐴝𐴔𐴡𐴃𐴢 𐴕𐴡𐴥 𐴒𐴡𐴌𐴠𐴥.

The Word for the World International

https://app.library.bible/content/87faca8b51c22590