Read 𐴔𐴡𐴃𐴞 10

𐴔𐴡𐴃𐴞10

𐴀𐴞𐴏𐴝𐴤𐴘𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴢 𐴁𐴝𐴏𐴞𐴥𐴓𐴡𐴘𐴧𐴠

¹𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴡𐴌𐴠 𐴔𐴝𐴃𐴝𐴘, 𐴀𐴞𐴥𐴃𐴝𐴌𐴝𐴌𐴠 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴘𐴁𐴝𐴌 𐴀𐴠𐴊𐴧𐴠 𐴉𐴡𐴃𐴧𐴞𐴥 𐴑𐴞𐴏𐴞𐴥𐴔𐴡𐴌 𐴁𐴞𐴘𐴝𐴌𐴝𐴔 𐴀𐴠𐴊𐴧𐴠 𐴉𐴡𐴃𐴧𐴞𐴥 𐴑𐴞𐴏𐴞𐴥𐴔𐴡𐴌 𐴀𐴡𐴐𐴟𐴥𐴑 𐴒𐴡𐴔 𐴒𐴡𐴌𐴞𐴥𐴁𐴝𐴌 𐴑𐴠𐴥𐴔𐴡𐴃𐴝 𐴊𐴞𐴦𐴘𐴠𐴥.

²𐴇𐴠𐴥 𐴁𐴝𐴌𐴡𐴥 𐴎𐴡𐴕 𐴏𐴝𐴥𐴇𐴝𐴁𐴞𐴌 𐴕𐴝𐴔 𐴀𐴡𐴥𐴙𐴓𐴊𐴠 𐴀𐴞𐴀𐴕: 𐴉𐴡𐴀𐴘𐴓𐴝 𐴖𐴝, 𐴏𐴝𐴥𐴘𐴔𐴡𐴕, 𐴎𐴞𐴁𐴝𐴤𐴌𐴠 𐴉𐴞𐴃𐴡𐴌 𐴋𐴝𐴑𐴠, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴁𐴝𐴥𐴘 𐴀𐴠𐴕𐴊𐴠𐴌𐴞𐴘𐴝𐴏𐴢; 𐴎𐴠𐴁𐴠𐴊𐴝𐴙𐴌 𐴉𐴟𐴖𐴝 𐴘𐴝𐴑𐴟𐴁𐴢 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴁𐴝𐴥𐴘 𐴘𐴡𐴇𐴝𐴥𐴕𐴧𐴝;³𐴉𐴞𐴓𐴞𐴥𐴂𐴢, 𐴁𐴝𐴌𐴃𐴡𐴥𐴓𐴡𐴔𐴞𐴘𐴡, 𐴃𐴡𐴥𐴔𐴝𐴏𐴢, 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴔𐴡𐴃𐴞, 𐴀𐴝𐴓𐴉𐴝𐴥𐴘𐴧𐴝𐴏𐴡𐴌 𐴉𐴟𐴖𐴝 𐴘𐴝𐴑𐴟𐴁𐴢, 𐴃𐴝𐴥𐴀𐴊𐴞𐴘𐴝𐴏𐴢,⁴𐴏𐴝𐴥𐴘𐴔𐴡𐴕 𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴎𐴠𐴥𐴓𐴡𐴃𐴢, 𐴀𐴠𐴊𐴧𐴠 𐴘𐴡𐴇𐴟𐴥𐴊𐴝 𐴀𐴞𐴏𐴑𐴝𐴥𐴌𐴞𐴘𐴠𐴃𐴢, 𐴎𐴠𐴦𐴕𐴞𐴑𐴞 𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞𐴓𐴢.

𐴁𐴝𐴌𐴡𐴥 𐴎𐴡𐴕 𐴕𐴟𐴥𐴕𐴡𐴌𐴠 𐴃𐴡𐴁𐴡𐴓𐴞𐴑𐴡𐴃𐴢 𐴊𐴞𐴉𐴠𐴍𐴝𐴥𐴘𐴧𐴠

⁵𐴀𐴞𐴏𐴝𐴤𐴘𐴠 𐴇𐴠𐴥 𐴁𐴝𐴌𐴡𐴥 𐴎𐴡𐴕 𐴕𐴟𐴥𐴕𐴡𐴌𐴠 𐴀𐴠𐴕𐴊𐴞𐴓𐴧𐴝 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥 𐴊𐴞𐴉𐴠𐴍𐴝𐴥𐴘𐴧𐴠: ”𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴞𐴥𐴑𐴧𐴝 𐴕𐴡 𐴎𐴝𐴘𐴧𐴡, 𐴀𐴝𐴦𐴌 𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴡𐴌 𐴇𐴡𐴕𐴡𐴤 𐴐𐴡𐴥𐴀𐴌𐴡𐴃𐴢 𐴕𐴡 𐴒𐴡𐴥𐴙𐴓𐴧𐴡.⁶𐴁𐴡𐴥𐴓𐴑𐴠 𐴀𐴞𐴏𐴌𐴝𐴥𐴙𐴓𐴢 𐴑𐴡𐴗𐴔 𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴟𐴕𐴡𐴌 𐴇𐴝𐴣𐴏𐴠 𐴎𐴝𐴘𐴧𐴡.⁷𐴎𐴝𐴘𐴃𐴠-𐴎𐴝𐴘𐴃𐴠 𐴀𐴠𐴕𐴊𐴞𐴓𐴧𐴝 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥𐴘𐴡, ’𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘.‘⁸𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴒𐴡𐴔 𐴒𐴡𐴌𐴞𐴥𐴘𐴡, 𐴔𐴟𐴌𐴟𐴊𐴝𐴌𐴠 𐴎𐴞𐴕𐴊𐴝 𐴒𐴡𐴌𐴞𐴥𐴘𐴡, 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥𐴘𐴡, 𐴀𐴝𐴦𐴌 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴘𐴧𐴡. 𐴃𐴟𐴣𐴀𐴝𐴥𐴌𐴝 𐴔𐴝𐴦𐴕𐴝 𐴉𐴝𐴘𐴧𐴡𐴥, 𐴔𐴝𐴦𐴕𐴝 𐴊𐴞𐴦𐴘𐴡.

⁹”𐴑𐴠𐴣𐴙𐴓𐴡𐴌 𐴎𐴝𐴓𐴞𐴃𐴢 𐴒𐴡𐴌𐴞 𐴐𐴟𐴥𐴕𐴝, 𐴌𐴟𐴉𐴝, 𐴘𐴝𐴥 𐴃𐴝𐴔𐴝𐴌 𐴉𐴡𐴘𐴐𐴝𐴤 𐴕𐴡 𐴓𐴡𐴘𐴎𐴝𐴘𐴧𐴡𐴥,¹⁰𐴏𐴡𐴉𐴡𐴥𐴌𐴡𐴓𐴧𐴝 𐴇𐴡𐴕𐴡𐴤 𐴇𐴡𐴥𐴙𐴓𐴧𐴝, 𐴁𐴝𐴃𐴧𐴞𐴥 𐴇𐴡𐴦𐴌, 𐴐𐴠𐴕𐴄𐴝𐴥𐴌 𐴀𐴠𐴊𐴧𐴠 𐴓𐴝𐴍𐴞𐴥 𐴕𐴡 𐴓𐴡𐴘𐴎𐴝𐴘𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴈𐴝𐴔 𐴒𐴡𐴌𐴠𐴥 𐴀𐴞𐴥𐴃𐴠 𐴃𐴡 𐴈𐴝𐴥𐴕𐴝 𐴉𐴝𐴘𐴁𐴝𐴌 𐴓𐴝𐴦𐴘𐴠𐴑.¹¹𐴃𐴟𐴣𐴀𐴝𐴥𐴌𐴝 𐴎𐴠 𐴐𐴡𐴥𐴀𐴌𐴡𐴃𐴢 𐴘𐴝𐴥 𐴉𐴝𐴌𐴝𐴃𐴢 𐴒𐴡𐴥𐴓𐴞𐴁𐴝, 𐴇𐴠𐴥𐴍𐴠 𐴎𐴝𐴒𐴝 𐴊𐴞𐴦𐴁𐴝𐴌 𐴓𐴝𐴦𐴘𐴠𐴑 𐴇𐴡𐴕 𐴀𐴝𐴏𐴠𐴤 𐴃𐴝𐴓𐴝𐴐𐴢 𐴒𐴡𐴌𐴞𐴥𐴘𐴡, 𐴀𐴝𐴦𐴌 𐴐𐴡𐴥𐴀𐴌 𐴇𐴞𐴥𐴘𐴝𐴕𐴡𐴃𐴧𐴟 𐴕𐴡𐴥 𐴕𐴠𐴦𐴓𐴡 𐴉𐴡𐴙𐴅𐴧𐴡𐴕𐴃𐴡 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌𐴡𐴃𐴢 𐴃𐴝𐴥𐴑𐴞𐴘𐴡.¹²𐴒𐴡𐴥𐴌𐴡𐴃𐴢 𐴒𐴡𐴥𐴓𐴞𐴁𐴝𐴐𐴧𐴡𐴃𐴢 𐴏𐴡𐴥𐴓𐴝𐴔 𐴊𐴞𐴥𐴘𐴡.¹³𐴎𐴡𐴊𐴞 𐴒𐴡𐴥𐴌 𐴇𐴞𐴥𐴘𐴝𐴕 𐴓𐴝𐴦𐴘𐴠𐴑 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴌𐴝𐴌 𐴐𐴝𐴥𐴕𐴃𐴞 𐴇𐴞𐴥𐴘𐴝𐴕𐴡𐴃𐴢 𐴃𐴝𐴥𐴑𐴡𐴗𐴑. 𐴔𐴡𐴕𐴃𐴡𐴌 𐴓𐴝𐴦𐴘𐴠𐴑 𐴕𐴡 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴌𐴝𐴌 𐴐𐴝𐴥𐴕𐴃𐴞 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴉𐴞𐴥𐴌𐴞 𐴀𐴝𐴘𐴧𐴡𐴤𐴑.¹⁴𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥 𐴘𐴝𐴥𐴃𐴡 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴕𐴡 𐴉𐴟𐴥𐴕𐴠, 𐴃𐴡𐴥𐴀𐴘𐴓𐴠 𐴇𐴠𐴥 𐴒𐴡𐴥𐴌𐴡𐴃𐴧𐴟 𐴘𐴝𐴥 𐴐𐴡𐴥𐴀𐴌𐴡𐴃𐴧𐴟 𐴎𐴝𐴘𐴁𐴝𐴐𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴄𐴠𐴥𐴚𐴡𐴌 𐴃𐴡𐴓𐴧𐴝𐴌 𐴊𐴟𐴥𐴙𐴓𐴢 𐴎𐴝𐴥𐴌𐴞𐴉𐴠𐴓𐴝𐴘𐴧𐴡.¹⁵𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴇𐴠𐴥 𐴐𐴡𐴥𐴀𐴌 𐴇𐴞𐴥𐴘𐴝𐴕𐴡𐴃𐴧𐴟 𐴏𐴡𐴥𐴊𐴡𐴔 𐴀𐴠𐴊𐴧𐴠 𐴒𐴡𐴔𐴡𐴥𐴌𐴝𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.

𐴀𐴝𐴘𐴧𐴠𐴤𐴌 𐴊𐴠 𐴎𐴟𐴓𐴟𐴥𐴔 𐴀𐴡𐴥𐴑𐴧𐴡𐴓𐴢

¹⁶”𐴉𐴟𐴥𐴕𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴌𐴝𐴚𐴑𐴟𐴣𐴙𐴌 𐴀𐴡𐴥𐴑𐴧𐴡𐴓𐴡𐴌 𐴔𐴝𐴎𐴠𐴥 𐴊𐴞𐴉𐴠𐴍𐴝𐴥𐴙𐴌 𐴊𐴠. 𐴇𐴠𐴥𐴃𐴡𐴓𐴧𐴝 𐴇𐴝𐴥𐴉𐴡𐴌 𐴋𐴡𐴥𐴙𐴓𐴧𐴝 𐴏𐴝𐴓𐴝𐴥𐴑 𐴀𐴡𐴥 𐴀𐴝𐴦𐴌 𐴈𐴡𐴘𐴃𐴡𐴌𐴡𐴌 𐴋𐴡𐴥𐴙𐴓𐴧𐴝 𐴔𐴝𐴦𐴏𐴟𐴔 𐴁𐴡𐴕𐴡.¹⁷𐴔𐴝𐴙𐴕𐴐𐴡𐴥𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴊𐴝𐴓𐴡𐴃𐴡𐴃𐴢 𐴃𐴟𐴓𐴞𐴤𐴊𐴞𐴁𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴥𐴃𐴝𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴁𐴠𐴃𐴢 𐴔𐴝𐴌𐴞𐴁𐴡𐴥.¹⁸𐴀𐴝𐴣𐴀𐴌 𐴓𐴧𐴝 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴑𐴞𐴔 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴀𐴟𐴥𐴊𐴧𐴗𐴝 𐴀𐴝𐴕𐴝𐴤 𐴎𐴝𐴘𐴁𐴡, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝𐴌 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴝𐴣𐴀𐴌 𐴒𐴡𐴁𐴝𐴤 𐴊𐴞𐴥 𐴉𐴝𐴌𐴡.¹⁹𐴓𐴠𐴑𐴞𐴕 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴊𐴡𐴥𐴌𐴞𐴊𐴞𐴁𐴡, 𐴇𐴠𐴥𐴣𐴃𐴧𐴠 𐴑𐴞𐴦 𐴈𐴡𐴘𐴁𐴝𐴤 𐴘𐴝𐴥 𐴑𐴠𐴀𐴕𐴒𐴡𐴌𐴞 𐴈𐴡𐴘𐴁𐴝𐴤 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴞𐴀𐴕 𐴈𐴡𐴖𐴝𐴤 𐴉𐴡𐴌𐴞𐴁𐴡𐴥, 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌𐴠 𐴇𐴠𐴥𐴃𐴟𐴕𐴡𐴃𐴢 𐴊𐴞𐴦𐴘𐴝 𐴎𐴝𐴘𐴁𐴡.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴡𐴀𐴘𐴧𐴝 𐴃𐴡 𐴃𐴟𐴣𐴀𐴝𐴥𐴌𐴝 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴡𐴌 𐴌𐴟𐴀 𐴀𐴠𐴥𐴕𐴝, 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌 𐴊𐴟𐴖𐴝𐴌𐴝 𐴈𐴡𐴃𐴝𐴤 𐴈𐴡𐴀.

²¹”𐴁𐴝𐴥𐴘𐴧𐴠 𐴁𐴝𐴥𐴘𐴡𐴌𐴠 𐴀𐴝𐴦𐴌 𐴁𐴝𐴉𐴠 𐴉𐴟𐴖𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴊𐴡𐴥𐴌𐴞𐴊𐴞𐴁𐴡. 𐴉𐴟𐴀𐴝𐴙𐴕 𐴊𐴠 𐴕𐴞𐴎𐴡𐴌 𐴁𐴝𐴉𐴔𐴝𐴦𐴌 𐴇𐴠𐴥𐴓𐴝𐴉𐴢 𐴃𐴞𐴥𐴘𐴝𐴘 𐴀𐴞𐴥𐴃𐴝𐴌𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴁𐴝𐴥𐴘𐴁𐴡.²²𐴀𐴝𐴣𐴀𐴌 𐴕𐴝𐴔𐴡𐴓𐴧𐴝 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴒𐴧𐴟𐴥𐴕𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴇𐴠𐴥𐴌𐴞 𐴉𐴡𐴙𐴅𐴧𐴡𐴕𐴃𐴡 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥𐴁𐴡, 𐴘𐴡𐴥𐴒𐴧𐴗𐴝𐴘𐴠 𐴁𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡.²³𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴐𐴡𐴥𐴀𐴌𐴡𐴃𐴢 𐴎𐴟𐴓𐴟𐴥𐴔 𐴒𐴡𐴌𐴠𐴥, 𐴀𐴝𐴌𐴀𐴠𐴑𐴧𐴝𐴥𐴕𐴡𐴃𐴢 𐴊𐴝𐴥𐴘 𐴎𐴝𐴘𐴧𐴡𐴒𐴡𐴥𐴘. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴞𐴏𐴌𐴝𐴥𐴙𐴓𐴡𐴌 𐴉𐴡𐴃𐴧𐴞𐴥 𐴐𐴡𐴥𐴀𐴌𐴡𐴃𐴢 𐴎𐴝𐴘𐴧𐴝 𐴕𐴡𐴥 𐴀𐴡𐴥𐴘𐴃𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴀𐴘𐴎𐴝𐴥𐴘𐴁𐴡𐴘.

²⁴”𐴐𐴝𐴥𐴌𐴞𐴃𐴢 𐴕𐴞𐴎𐴡𐴌 𐴀𐴟𐴏𐴃𐴝𐴃𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴕𐴡, 𐴀𐴝𐴦𐴌 𐴒𐴡𐴗𐴀𐴌 𐴕𐴞𐴎𐴡𐴌 𐴒𐴞𐴌𐴡𐴥𐴏𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴕𐴡.²⁵𐴐𐴝𐴥𐴌𐴞𐴃𐴢 𐴕𐴞𐴎𐴡𐴌 𐴀𐴟𐴏𐴃𐴝𐴃𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴓𐴠 𐴀𐴝𐴦𐴌 𐴒𐴡𐴗𐴀𐴌 𐴕𐴞𐴎𐴡𐴌 𐴒𐴞𐴌𐴡𐴥𐴏𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴓𐴠 𐴑𐴝𐴉𐴞𐴥. 𐴀𐴞𐴥𐴃𐴝𐴌𐴝 𐴎𐴡𐴊𐴞 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴡𐴌𐴠 𐴁𐴠𐴓𐴎𐴠𐴁𐴟𐴓𐴢 𐴈𐴡𐴘𐴧𐴠𐴥 𐴊𐴠 𐴀𐴡𐴥𐴘𐴓𐴠, 𐴇𐴠𐴥 𐴒𐴡𐴥𐴌𐴡𐴌 𐴔𐴝𐴙𐴕𐴐𐴡𐴥𐴌𐴠 𐴀𐴝𐴌𐴡𐴤 𐴇𐴡𐴃𐴡𐴥 𐴋𐴡𐴙𐴓𐴧𐴝 𐴈𐴡𐴘𐴁𐴡𐴤 𐴉𐴝𐴥𐴣𐴓𐴧𐴝𐴌!

𐴇𐴝𐴌𐴠𐴤 𐴋𐴡𐴦𐴌𐴝 𐴉𐴡𐴌𐴞𐴁𐴡𐴥؟

²⁶”𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝𐴌𐴠 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴇𐴠𐴥𐴌 𐴕𐴡 𐴀𐴡𐴥𐴘𐴁𐴡 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴅𐴞𐴕𐴞𐴥𐴐𐴢 𐴒𐴟𐴥𐴙𐴅𐴧𐴝 𐴕𐴝𐴥𐴘, 𐴀𐴝𐴦𐴌 𐴎𐴝𐴕𐴝 𐴕𐴡 𐴎𐴝𐴘𐴁𐴡 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴅𐴞𐴕𐴞𐴥𐴐𐴢 𐴓𐴟𐴑𐴝𐴘𐴧𐴝 𐴕𐴝𐴥𐴘.²⁷𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴀𐴕 𐴀𐴝𐴕𐴊𐴝𐴤𐴌𐴡𐴃𐴢 𐴈𐴡𐴀𐴙𐴌, 𐴇𐴞𐴥𐴀𐴕 𐴉𐴡𐴀𐴌𐴡𐴃𐴢 𐴈𐴡𐴘𐴧𐴡𐴥; 𐴀𐴝𐴦𐴌 𐴎𐴞𐴀𐴕 𐴃𐴟𐴣𐴀𐴝𐴥𐴌𐴝𐴌 𐴈𐴝𐴕𐴡𐴃𐴢 𐴉𐴟𐴥𐴐𐴉𐴟𐴐𐴝𐴘 𐴈𐴡𐴖𐴝𐴤 𐴒𐴞𐴥𐴘𐴠, 𐴇𐴞𐴥𐴀𐴕 𐴒𐴡𐴥𐴌𐴡𐴌 𐴏𐴝𐴥𐴊𐴡𐴌 𐴖𐴡𐴃𐴧𐴟𐴥 𐴀𐴠𐴓𐴝𐴕 𐴒𐴡𐴙𐴅𐴧𐴡𐴥.²⁸𐴀𐴟𐴘𐴃𐴝𐴌𐴝𐴤𐴌𐴠 𐴕𐴡 𐴋𐴡𐴦𐴌𐴝𐴘𐴧𐴡𐴥 𐴎𐴠𐴃𐴝𐴌𐴝𐴤 𐴇𐴝𐴘𐴧𐴝𐴌𐴠 𐴑𐴡𐴃𐴡𐴥𐴓𐴢 𐴒𐴡𐴌𐴠𐴥 𐴔𐴡𐴕𐴃𐴡𐴌 𐴌𐴟𐴀𐴌𐴠 𐴑𐴡𐴃𐴡𐴥𐴓𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴠; 𐴁𐴡𐴥𐴓𐴑𐴠 𐴀𐴟𐴁𐴝𐴤𐴌𐴠 𐴋𐴡𐴦𐴌𐴡 𐴎𐴞𐴁𐴝𐴤𐴘𐴠 𐴌𐴟𐴀 𐴀𐴠𐴊𐴧𐴠 𐴅𐴞𐴏𐴞𐴥𐴔 𐴊𐴟𐴕𐴞𐴥𐴘𐴝𐴕𐴡𐴌𐴠 𐴎𐴟𐴎𐴟𐴑𐴡𐴃𐴢 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘 𐴉𐴝𐴌𐴠.²⁹𐴊𐴟𐴖𐴝𐴥 𐴉𐴞𐴛𐴝𐴙𐴅𐴧𐴝 𐴑𐴞 𐴁𐴞𐴐𐴞𐴤 𐴈𐴡𐴔 𐴄𐴞𐴛𐴝 𐴓𐴡𐴘 𐴕𐴡 𐴁𐴠𐴏𐴠 𐴕𐴠𐴥؟ 𐴃𐴡𐴀 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴡𐴌 𐴀𐴠𐴎𐴞𐴕 𐴏𐴝𐴥𐴌𐴝 𐴈𐴠𐴥𐴕𐴃𐴟 𐴀𐴠𐴒𐴧𐴗𐴝𐴤 𐴘𐴡𐴥 𐴔𐴠𐴍𐴞𐴃𐴢 𐴉𐴡𐴌𐴠 𐴊𐴠 𐴕𐴝𐴥𐴘.³⁰𐴁𐴠𐴐𐴡𐴥𐴑, 𐴃𐴟𐴣𐴀𐴝𐴥𐴌𐴝𐴌 𐴔𐴝𐴃𐴝𐴥𐴌 𐴏𐴟𐴓𐴢 𐴀𐴟𐴥𐴊𐴧𐴗𐴝 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴃𐴧𐴟 𐴒𐴡𐴕𐴝 𐴀𐴝𐴏𐴠𐴤.³¹𐴇𐴠𐴥𐴃𐴡𐴓𐴧𐴝, 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴃𐴟𐴣𐴀𐴝𐴥𐴌𐴝𐴌 𐴑𐴞𐴔𐴡𐴃𐴢 𐴁𐴡𐴀𐴗𐴃𐴢 𐴉𐴞𐴛𐴝𐴙𐴅𐴧𐴝 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤.

𐴔𐴡𐴀𐴏𐴞𐴤𐴌𐴠 𐴐𐴞𐴥𐴑𐴝𐴌 𐴀𐴠𐴊𐴧𐴠 𐴀𐴞𐴕𐴑𐴝𐴌 𐴒𐴡𐴌𐴝𐴥

³²”𐴎𐴠𐴦 𐴑𐴞𐴘𐴠𐴥 𐴀𐴝𐴣𐴀𐴌𐴠𐴥 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴐𐴞𐴥𐴑𐴝𐴌 𐴒𐴡𐴌𐴠𐴥, 𐴀𐴝𐴀𐴛 𐴘𐴡𐴥 𐴘𐴡𐴥𐴒𐴧𐴗𐴝𐴌𐴠 𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴔𐴟𐴀𐴕𐴃𐴟 𐴐𐴞𐴥𐴑𐴝𐴌 𐴒𐴡𐴌𐴞𐴥𐴘𐴟𐴔.³³𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴀𐴞𐴕𐴑𐴝𐴌 𐴒𐴡𐴌𐴠𐴥, 𐴀𐴝𐴀𐴛 𐴘𐴡𐴥 𐴘𐴡𐴥𐴒𐴧𐴗𐴝𐴌𐴠 𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴔𐴟𐴀𐴕𐴃𐴟 𐴀𐴞𐴕𐴑𐴝𐴌 𐴒𐴡𐴌𐴞𐴥𐴘𐴟𐴔.

𐴐𐴝𐴥𐴕𐴃𐴞 𐴕𐴡, 𐴁𐴡𐴥𐴓𐴑𐴠 𐴃𐴡𐴓𐴟𐴖𐴝𐴌

³⁴”𐴀𐴝𐴀𐴛 𐴊𐴟𐴕𐴞𐴘𐴝𐴙𐴃𐴢 𐴐𐴝𐴥𐴕𐴃𐴞 𐴊𐴞𐴦𐴃𐴡 𐴀𐴝𐴙𐴐𐴧𐴞𐴤 𐴁𐴡𐴥𐴓𐴞 𐴕𐴡 𐴄𐴝𐴥𐴀𐴌𐴞𐴘𐴡. 𐴀𐴝𐴀𐴛 𐴐𐴝𐴥𐴕𐴃𐴞 𐴊𐴞𐴦𐴃𐴡 𐴀𐴝𐴙𐴐𐴧𐴞𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴃𐴡𐴓𐴟𐴖𐴝𐴌 𐴏𐴡𐴓𐴝𐴘𐴃𐴡𐴥 𐴀𐴝𐴙𐴐𐴧𐴞𐴤 𐴊𐴠.³⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴝𐴙𐴐𐴧𐴞𐴤 𐴊𐴠, 𐴉𐴟𐴖𐴝𐴌𐴠 𐴁𐴝𐴉𐴡𐴌 𐴀𐴟𐴓𐴋𐴝 𐴒𐴡𐴌𐴞𐴥𐴊𐴞 𐴁𐴡𐴓𐴧𐴝, 𐴎𐴠𐴥𐴌𐴉𐴟𐴖𐴝𐴌𐴠 𐴔𐴝𐴦𐴌 𐴀𐴟𐴓𐴋𐴝 𐴒𐴡𐴌𐴞𐴥𐴊𐴞 𐴁𐴡𐴓𐴧𐴝, 𐴀𐴝𐴦𐴌 𐴁𐴡𐴖𐴢 𐴖𐴡𐴥𐴌𐴠 𐴇𐴡𐴥𐴖𐴌𐴞𐴌 𐴀𐴟𐴓𐴋𐴝 𐴒𐴡𐴌𐴞𐴥𐴊𐴞 𐴁𐴡𐴓𐴧𐴝.³⁶𐴔𐴝𐴕𐴟𐴥𐴙𐴐𐴡𐴌 𐴊𐴟𐴐𐴧𐴡𐴕 𐴀𐴡𐴥𐴘𐴁𐴡 𐴊𐴠 𐴕𐴞𐴎𐴡𐴌 𐴒𐴡𐴥𐴌𐴡𐴌 𐴔𐴝𐴕𐴟𐴥𐴙𐴐𐴢.

³⁷”𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴒𐴡𐴌𐴠𐴥 𐴊𐴠 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴕𐴞𐴎𐴡𐴌 𐴁𐴝𐴉𐴡𐴌𐴠 𐴘𐴝𐴥 𐴔𐴝𐴦𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴓𐴝𐴦𐴘𐴠𐴑 𐴕𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴒𐴡𐴌𐴠𐴥 𐴊𐴠 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴕𐴞𐴎𐴡𐴌 𐴉𐴟𐴖𐴝𐴌𐴠 𐴘𐴝𐴥 𐴎𐴠𐴥𐴌𐴉𐴟𐴖𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴓𐴝𐴦𐴘𐴠𐴑 𐴕𐴡.³⁸𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴑𐴟𐴥𐴌𐴟𐴐𐴢 𐴕𐴡 𐴁𐴡𐴀𐴘𐴢 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴠, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴓𐴝𐴦𐴘𐴠𐴑 𐴕𐴡.³⁹𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴝𐴕 𐴁𐴝𐴏𐴝𐴘𐴃𐴡𐴥 𐴏𐴝𐴀, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴇𐴝𐴥𐴌𐴝𐴘𐴉𐴠𐴓𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴝𐴏𐴃𐴠𐴥 𐴕𐴞𐴎𐴡𐴌 𐴎𐴝𐴕 𐴇𐴝𐴥𐴌𐴝𐴘𐴉𐴠𐴓𐴠, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴉𐴝𐴘𐴁𐴡.

𐴁𐴡𐴐𐴧𐴞𐴥𐴐𐴢 𐴀𐴡𐴥𐴑𐴧𐴡𐴓𐴢

⁴⁰”𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠.⁴¹𐴎𐴠𐴦𐴕𐴞𐴑𐴞 𐴇𐴡𐴕𐴡𐴤 𐴕𐴡𐴁𐴞𐴌𐴠 𐴕𐴡𐴁𐴞𐴌 𐴕𐴝𐴔𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴕𐴡𐴁𐴞𐴌 𐴁𐴡𐴐𐴧𐴞𐴥𐴐𐴢 𐴉𐴝𐴘𐴁𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴇𐴡𐴕𐴡𐴤 𐴉𐴡𐴌𐴇𐴠𐴥𐴏𐴒𐴝𐴌𐴡𐴌𐴠 𐴉𐴡𐴌𐴇𐴠𐴥𐴏𐴒𐴝𐴌𐴡𐴌 𐴕𐴝𐴔𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴉𐴡𐴌𐴇𐴠𐴥𐴏𐴒𐴝𐴌𐴡𐴌 𐴁𐴡𐴐𐴧𐴞𐴥𐴐𐴢 𐴉𐴝𐴘𐴁𐴡.⁴²𐴇𐴡𐴕𐴡𐴤𐴑𐴞𐴘𐴠 𐴀𐴞𐴃𐴝𐴌𐴝𐴤𐴌 𐴁𐴟𐴥𐴃𐴡𐴃𐴧𐴟 𐴀𐴠𐴁𐴧𐴠 𐴕𐴞𐴌𐴡𐴥𐴐𐴢 𐴀𐴠𐴥𐴎𐴧𐴡𐴕𐴡𐴌𐴠 𐴀𐴝𐴣𐴀𐴌 𐴀𐴟𐴔𐴧𐴡𐴃𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴠𐴑 𐴉𐴞𐴘𐴝𐴓𐴝 𐴄𐴝𐴥𐴕𐴋𐴝 𐴉𐴝𐴕𐴞𐴥 𐴊𐴞𐴦𐴓𐴠𐴥 𐴀𐴟𐴥𐴊𐴧𐴗𐴝, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴘𐴡𐴥𐴒𐴧𐴗𐴝𐴘𐴠 𐴈𐴝𐴥𐴔𐴝𐴈𐴝 𐴕𐴞𐴎𐴡𐴌 𐴁𐴡𐴐𐴧𐴞𐴥𐴐𐴢 𐴉𐴝𐴘 𐴎𐴝𐴘𐴁𐴡.“

The Word for the World International

https://app.library.bible/content/87faca8b51c22590