Read 𐴓𐴟𐴑𐴝𐴥𐴏𐴢 9

𐴓𐴟𐴑𐴝𐴥𐴏𐴢9

𐴁𐴝𐴌𐴡𐴥 𐴎𐴡𐴕 𐴕𐴟𐴥𐴕𐴡𐴌𐴠 𐴃𐴡𐴁𐴡𐴓𐴞𐴑𐴡𐴃𐴢 𐴊𐴞𐴉𐴠𐴍𐴝𐴥𐴘𐴧𐴠

¹𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴉𐴟𐴥𐴖𐴝𐴣𐴃𐴞 𐴔𐴝𐴃𐴝𐴘, 𐴉𐴡𐴃𐴧𐴞𐴥 𐴋𐴡𐴙𐴓𐴧𐴝 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴝𐴘 𐴁𐴡𐴓𐴧𐴝 𐴀𐴠𐴊𐴧𐴠 𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴃𐴝𐴌𐴝𐴌𐴠 𐴃𐴝𐴦𐴑𐴡𐴃𐴢 𐴀𐴠𐴊𐴧𐴠 𐴑𐴠𐴥𐴔𐴡𐴃𐴝 𐴊𐴞𐴦𐴘𐴠𐴥.²𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴊𐴧𐴠 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴊𐴞𐴉𐴠𐴍𐴝𐴥𐴘𐴧𐴠.³𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴉𐴡𐴣𐴃𐴡𐴓𐴧𐴝 𐴑𐴠𐴏𐴧𐴟𐴥 𐴕𐴡 𐴓𐴡𐴘𐴎𐴝𐴘𐴧𐴡𐴥: 𐴕𐴡 𐴓𐴝𐴍𐴞𐴥, 𐴕𐴡 𐴇𐴡𐴥𐴙𐴓𐴧𐴝, 𐴕𐴡 𐴈𐴝𐴥𐴕𐴝, 𐴕𐴡 𐴄𐴞𐴛𐴝, 𐴕𐴡 𐴁𐴝𐴃𐴧𐴞𐴥 𐴇𐴡𐴦𐴌.⁴𐴃𐴟𐴣𐴀𐴝𐴥𐴌𐴝 𐴎𐴠 𐴒𐴡𐴥𐴌𐴡𐴃𐴢 𐴒𐴡𐴥𐴓𐴞𐴁𐴝 𐴇𐴠𐴥 𐴒𐴡𐴥𐴌𐴡𐴃𐴢 𐴐𐴡𐴥𐴀𐴌 𐴇𐴞𐴥𐴘𐴝𐴕𐴡𐴃𐴧𐴟 𐴕𐴠𐴦𐴓𐴞 𐴕𐴡𐴥 𐴎𐴡𐴦𐴒𐴡𐴥𐴘 𐴉𐴡𐴙𐴅𐴧𐴡𐴕𐴃𐴡 𐴃𐴝𐴥𐴑𐴞𐴘𐴡.⁵𐴎𐴠 𐴐𐴡𐴥𐴀𐴌𐴡𐴌 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥, 𐴇𐴠𐴥 𐴐𐴡𐴥𐴀𐴌𐴡𐴃𐴧𐴟 𐴕𐴠𐴦𐴓𐴞 𐴎𐴝𐴘𐴁𐴝𐴐𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴄𐴠𐴥𐴚𐴡𐴌 𐴃𐴡𐴓𐴧𐴝𐴌 𐴊𐴟𐴥𐴙𐴓𐴢 𐴎𐴝𐴥𐴌𐴞𐴉𐴠𐴓𐴝𐴘𐴧𐴡, 𐴎𐴠𐴀𐴕𐴠 𐴇𐴞𐴥𐴀𐴕𐴠 𐴀𐴞𐴥𐴃𐴝𐴌𐴝𐴌 𐴀𐴟𐴓𐴋𐴝 𐴒𐴡𐴁𐴝𐴤 𐴊𐴠𐴥.“⁶𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴌𐴡𐴖𐴝𐴕𐴝 𐴓𐴡𐴘 𐴉𐴝𐴌𐴝-𐴉𐴝𐴌𐴝 𐴎𐴝𐴘, 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴠𐴊𐴧𐴠 𐴉𐴡𐴃𐴧𐴞𐴥 𐴎𐴝𐴒𐴝𐴃𐴢 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴔 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

𐴈𐴠𐴥𐴌𐴟𐴊𐴡𐴌 𐴀𐴡𐴓𐴎𐴡𐴥𐴓𐴢

⁷𐴒𐴝𐴓𐴞𐴓𐴡𐴌 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴈𐴠𐴥𐴌𐴟𐴊𐴠, 𐴎𐴞𐴀𐴕 𐴀𐴡𐴥𐴌 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴥𐴙𐴕𐴧𐴠. 𐴘𐴡𐴥𐴒𐴧𐴗𐴝 𐴁𐴞𐴐𐴞𐴤 𐴀𐴡𐴓𐴎𐴡𐴥𐴓𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, 𐴘𐴝𐴇𐴝𐴥𐴘𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠,⁸𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, 𐴀𐴠𐴓𐴞𐴘𐴝𐴏𐴢 𐴎𐴝𐴇𐴠𐴥𐴌 𐴀𐴡𐴥𐴘𐴧𐴠 𐴊𐴠, 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴕𐴡𐴁𐴞 𐴀𐴠𐴒𐴧𐴗𐴝𐴤 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠.⁹𐴔𐴡𐴕𐴃𐴡𐴌 𐴈𐴠𐴥𐴌𐴟𐴊𐴠 𐴈𐴡𐴀𐴌 𐴊𐴠, ”𐴘𐴝𐴇𐴝𐴥𐴘𐴝𐴌 𐴈𐴡𐴓𐴧𐴝 𐴊𐴠 𐴀𐴝𐴀𐴛 𐴕𐴞𐴎𐴠 𐴈𐴝𐴍𐴞𐴉𐴠𐴥𐴓𐴝 𐴁𐴝𐴥𐴘𐴓𐴝𐴔, 𐴔𐴡𐴕𐴃𐴡𐴌 𐴀𐴞𐴁𐴝𐴤 𐴇𐴡𐴕 𐴎𐴝𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴉𐴟𐴥𐴕𐴞𐴌؟“ 𐴇𐴞𐴥𐴘𐴝 𐴓𐴡𐴥𐴃𐴞 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴏𐴝𐴘 𐴁𐴡𐴓𐴧𐴝 𐴑𐴟𐴐𐴞𐴥𐴐𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

𐴉𐴝𐴣𐴏𐴢 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌𐴠 𐴈𐴝𐴥𐴕𐴝 𐴈𐴝𐴥𐴁𐴝𐴘𐴧𐴠

¹⁰𐴏𐴝𐴥𐴇𐴝𐴁𐴞 𐴒𐴟𐴥𐴕 𐴖𐴝𐴦𐴉𐴠𐴏𐴢 𐴀𐴝𐴀𐴘𐴢, 𐴀𐴞𐴥𐴃𐴝𐴌𐴝 𐴎𐴞𐴀𐴕-𐴎𐴞𐴀𐴕 𐴒𐴡𐴙𐴅𐴧𐴞𐴥𐴓𐴢 𐴇𐴞𐴥𐴀𐴕 𐴀𐴞𐴏𐴝𐴤𐴌𐴠 𐴎𐴝𐴕𐴝𐴘𐴧𐴠𐴥. 𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢, 𐴁𐴠𐴃𐴏𐴝𐴥𐴘𐴊𐴝 𐴈𐴡𐴀 𐴊𐴠 𐴉𐴝𐴌𐴝 𐴇𐴞𐴥𐴘𐴝𐴕𐴡𐴃𐴢 𐴎𐴟𐴘𐴃𐴠𐴥𐴒𐴡𐴌𐴞 𐴒𐴞𐴦𐴘𐴠𐴥𐴒𐴡𐴘.¹¹𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴇𐴡𐴘 𐴉𐴝𐴌𐴞 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴞𐴓𐴢. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴃𐴝𐴦𐴓𐴞𐴔 𐴊𐴞𐴘𐴠𐴥 𐴀𐴠𐴊𐴧𐴠 𐴁𐴞𐴘𐴝𐴌𐴝𐴙𐴔𐴧𐴝 𐴎𐴠𐴃𐴝𐴌𐴝𐴤𐴃𐴧𐴟 𐴒𐴡𐴔 𐴀𐴡𐴥𐴘𐴁𐴝𐴌 𐴎𐴡𐴌𐴟𐴌𐴡𐴃𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥.

¹²𐴎𐴠𐴣𐴃𐴧𐴠𐴥 𐴁𐴠𐴙𐴓𐴢 𐴒𐴡𐴥𐴓𐴞𐴁𐴝𐴌 𐴀𐴡𐴑𐴃𐴡𐴥 𐴀𐴡𐴥𐴘𐴧𐴠, 𐴇𐴠𐴥 𐴁𐴝𐴌𐴡𐴥 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴝𐴀𐴘𐴢 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴊𐴟𐴣𐴌𐴝𐴘𐴊𐴡, 𐴎𐴠𐴀𐴕𐴠 𐴃𐴝𐴌𐴝𐴥 𐴀𐴝𐴃𐴠𐴇𐴝𐴣𐴏𐴡𐴥𐴌 𐴉𐴝𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴊𐴧𐴠 𐴒𐴝𐴚 𐴎𐴝𐴒𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘 𐴑𐴠𐴏𐴧𐴟𐴥 𐴈𐴝𐴥𐴘𐴁𐴝𐴌 𐴀𐴠𐴊𐴧𐴠 𐴃𐴝𐴥𐴑𐴞𐴁𐴝𐴌 𐴎𐴝𐴒𐴝 𐴃𐴟𐴖𐴝𐴘 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴀𐴝𐴏𐴞𐴤 𐴊𐴠 𐴘𐴝𐴀𐴕 𐴃𐴡 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝.“

¹³𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴝𐴥𐴘 𐴁𐴡𐴓𐴧𐴝 𐴑𐴠𐴏𐴧𐴟𐴥 𐴃𐴝𐴌𐴝𐴥𐴌𐴠 𐴃𐴟𐴣𐴀𐴝𐴥𐴌𐴝 𐴊𐴡𐴦.“
𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴊𐴠 𐴉𐴝𐴣𐴏𐴢 𐴏𐴗𐴝𐴥 𐴌𐴟𐴄𐴞 𐴀𐴠𐴊𐴧𐴠 𐴊𐴟𐴖𐴝𐴥 𐴔𐴝𐴏𐴢 𐴁𐴝𐴊𐴠 𐴀𐴝𐴌 𐴑𐴠𐴏𐴧𐴟𐴥 𐴕𐴝𐴥𐴘, 𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴎𐴝𐴘 𐴃𐴝𐴌𐴝𐴥 𐴁𐴠𐴒𐴧𐴟𐴥𐴕𐴡𐴓𐴧𐴝 𐴈𐴝𐴥𐴕𐴝 𐴑𐴞𐴕𐴞 𐴀𐴝𐴙𐴕𐴃𐴝𐴤𐴔𐴁𐴡𐴘 𐴕𐴠𐴥؟“¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴍𐴠 𐴉𐴝𐴣𐴏𐴢 𐴀𐴝𐴥𐴎𐴝𐴌 𐴉𐴡𐴙𐴅𐴧𐴡𐴕𐴃𐴡 𐴁𐴠𐴍𐴝𐴀𐴙𐴕 𐴀𐴝𐴐𐴧𐴞𐴥𐴓𐴢.
𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴀𐴌 𐴊𐴠, ”𐴃𐴝𐴌𐴝𐴥𐴌𐴠 𐴀𐴠𐴑 𐴋𐴝𐴀𐴘𐴡𐴃𐴢 𐴉𐴡𐴕𐴎𐴝𐴙𐴐𐴢 𐴎𐴡𐴕 𐴉𐴡𐴕𐴎𐴝𐴙𐴐𐴢 𐴎𐴡𐴕 𐴒𐴡𐴌𐴞𐴥 𐴁𐴟𐴀𐴝𐴥𐴒𐴝𐴌𐴡.“¹⁵𐴀𐴞𐴥𐴃𐴝𐴌𐴝 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴁𐴠𐴒𐴧𐴟𐴥𐴕𐴡𐴌𐴠 𐴁𐴟𐴀𐴝𐴥𐴒𐴝𐴌𐴝𐴘𐴧𐴠.¹⁶𐴀𐴞𐴥𐴁𐴝𐴘𐴠 𐴇𐴠𐴥 𐴉𐴝𐴣𐴏𐴢 𐴏𐴗𐴝𐴥 𐴌𐴟𐴄𐴞 𐴀𐴠𐴊𐴧𐴠 𐴊𐴟𐴖𐴝𐴥 𐴔𐴝𐴏𐴢 𐴏𐴟𐴥𐴕 𐴓𐴡𐴦𐴘𐴢 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴏𐴝𐴀𐴘𐴢 𐴇𐴞𐴥𐴀𐴕𐴡𐴌𐴠 𐴁𐴡𐴌𐴈𐴡𐴃𐴢 𐴊𐴞𐴘𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌𐴠 𐴁𐴝𐴥𐴚𐴒𐴞-𐴁𐴝𐴥𐴚𐴒𐴞 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴞𐴦𐴘𐴠𐴥, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴝𐴍𐴞𐴊𐴞 𐴁𐴡𐴓𐴧𐴝.¹⁷𐴃𐴝𐴌𐴝𐴥 𐴁𐴠𐴒𐴧𐴟𐴥𐴕𐴠 𐴉𐴠𐴄𐴢 𐴁𐴡𐴥𐴌𐴞 𐴈𐴝𐴥𐴘𐴧𐴠. 𐴁𐴝𐴦𐴊𐴠 𐴎𐴠 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴁𐴝𐴏𐴞𐴒𐴞𐴘𐴡𐴥𐴘, 𐴐𐴝𐴥𐴌𐴞𐴃𐴧𐴟𐴕𐴠 𐴇𐴞𐴥𐴀𐴕 𐴉𐴠𐴣𐴍𐴝𐴘 𐴓𐴡𐴦𐴘𐴢 𐴉𐴟𐴌𐴝 𐴁𐴝𐴌𐴡𐴥 𐴁𐴝𐴥𐴙𐴌 𐴁𐴡𐴥𐴙𐴅𐴧𐴠.

𐴉𐴞𐴃𐴡𐴌𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴝𐴌 𐴒𐴡𐴙𐴅𐴧𐴠𐴥

¹⁸𐴀𐴠𐴑𐴁𐴝𐴌 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴇𐴝𐴥𐴓𐴞𐴒𐴝 𐴊𐴟𐴖𐴝 𐴒𐴡𐴌𐴠𐴥𐴌, 𐴀𐴝𐴦𐴌 𐴐𐴝𐴥𐴌𐴞𐴃𐴧𐴟𐴕 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴝𐴙𐴕𐴐𐴠𐴥 𐴀𐴝𐴀𐴛 𐴇𐴡𐴕 𐴁𐴡𐴓𐴞 𐴈𐴡𐴀؟“

¹⁹𐴀𐴞𐴥𐴃𐴝𐴌𐴝 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴁𐴡𐴥𐴓𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝; 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀 𐴊𐴠, 𐴕𐴡𐴁𐴞 𐴀𐴠𐴓𐴞𐴘𐴝𐴏𐴢; 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀 𐴊𐴠, 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴕𐴡𐴁𐴞 𐴀𐴠𐴒𐴧𐴗𐴝𐴤 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠.“

²⁰𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴈𐴡𐴀, 𐴀𐴝𐴀𐴛 𐴇𐴡𐴕؟“𐴉𐴞𐴃𐴡𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴔𐴡𐴀𐴏𐴞𐴤.“

𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴔𐴡𐴦𐴃𐴢 𐴀𐴠𐴊𐴧𐴠 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥

²¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴌𐴝𐴒𐴡𐴌𐴞 𐴀𐴟𐴥𐴣𐴐𐴞𐴘𐴝𐴌𐴞 𐴊𐴞𐴥𐴘𐴠, 𐴀𐴝𐴦𐴌 𐴇𐴞𐴥𐴘𐴝𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴘𐴃𐴡𐴤 𐴔𐴝𐴕𐴝𐴥 𐴒𐴡𐴙𐴅𐴧𐴠𐴥.²²𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴈𐴝𐴥𐴔𐴝𐴈𐴝 𐴁𐴡𐴀𐴗𐴃𐴢 𐴋𐴡𐴥𐴙𐴓𐴧𐴝 𐴊𐴟𐴑 𐴉𐴝𐴦 𐴉𐴡𐴌𐴞𐴁𐴡𐴥; 𐴀𐴝𐴦𐴌 𐴔𐴟𐴌𐴟𐴁𐴧𐴞, 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴠𐴊𐴧𐴠 𐴀𐴝𐴓𐴠𐴔𐴡𐴃𐴧𐴟 𐴀𐴞𐴕𐴑𐴝𐴌 𐴇𐴝𐴥𐴘𐴁𐴡; 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴎𐴝𐴘𐴁𐴡, 𐴔𐴡𐴕𐴃𐴡𐴌 𐴃𐴞𐴕 𐴊𐴞𐴕𐴡𐴃𐴢 𐴊𐴞𐴕 𐴎𐴞𐴕𐴊𐴝 𐴒𐴡𐴌𐴝𐴥 𐴎𐴝𐴘𐴁𐴡.“

²³𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴀𐴝𐴘𐴃𐴡𐴤 𐴔𐴡𐴕𐴠𐴈𐴡𐴀, 𐴘𐴡𐴥𐴒𐴧𐴗𐴝𐴃𐴧𐴟 𐴕𐴞𐴎𐴡𐴌𐴠𐴥 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴉𐴡𐴃𐴧𐴞𐴥 𐴊𐴞𐴕 𐴕𐴞𐴎𐴡𐴌 𐴑𐴟𐴥𐴌𐴟𐴐𐴢 𐴁𐴡𐴀𐴘𐴢 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴝 𐴉𐴡𐴌𐴞𐴁𐴡𐴥.²⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴝𐴕 𐴁𐴝𐴏𐴝𐴘𐴃𐴡𐴥 𐴏𐴝𐴀, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴇𐴝𐴥𐴌𐴝𐴘𐴉𐴠𐴓𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴝𐴏𐴃𐴠𐴥 𐴕𐴞𐴎𐴡𐴌 𐴎𐴝𐴕 𐴇𐴝𐴥𐴌𐴝𐴘𐴉𐴠𐴓𐴠, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴁𐴝𐴏𐴝𐴘𐴉𐴠𐴥𐴓𐴝𐴘𐴁𐴡.²⁵𐴑𐴞𐴦 𐴓𐴝𐴉𐴢, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴝𐴔𐴝𐴥𐴔 𐴊𐴟𐴕𐴞𐴘𐴝𐴘 𐴉𐴝𐴦, 𐴔𐴡𐴕𐴃𐴡𐴌 𐴕𐴞𐴎𐴡𐴌𐴠𐴥 𐴇𐴝𐴥𐴌𐴝𐴘𐴉𐴠𐴓𐴠 𐴘𐴝𐴥𐴃𐴡 𐴓𐴟𐴏𐴧𐴝𐴥𐴕 𐴒𐴡𐴌𐴞𐴥𐴉𐴠𐴓𐴠؟²⁶𐴎𐴠𐴦 𐴑𐴞𐴘𐴠𐴥 𐴀𐴝𐴣𐴀𐴌𐴠𐴥 𐴓𐴡𐴥𐴘 𐴀𐴠𐴊𐴧𐴠 𐴀𐴝𐴣𐴀𐴌 𐴈𐴡𐴃𐴝𐴤𐴌𐴠 𐴓𐴡𐴥𐴘 𐴐𐴡𐴥𐴌𐴔𐴝, 𐴘𐴡𐴥𐴒𐴧𐴗𐴝𐴌𐴠 𐴓𐴡𐴥𐴘 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴘𐴠 𐴘𐴡𐴥 𐴐𐴡𐴥𐴌𐴔𐴝𐴘𐴁𐴡 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴕𐴞𐴎𐴡𐴌, 𐴁𐴝𐴉𐴢 𐴀𐴡𐴌, 𐴀𐴠𐴊𐴧𐴠 𐴂𐴝𐴑 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴔𐴡𐴈𐴞𐴥𐴔𐴝𐴘𐴠 𐴀𐴝𐴘𐴁𐴡𐴤.

²⁷”𐴓𐴠𐴑𐴞𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴠𐴍𐴠𐴥 𐴀𐴠𐴕𐴊𐴞𐴓𐴧𐴝 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴃𐴞𐴥𐴘𐴝𐴘𐴧𐴝 𐴀𐴝𐴏𐴠𐴤, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴕𐴡𐴥 𐴊𐴠𐴑𐴞𐴥𐴃𐴠 𐴕𐴡 𐴔𐴡𐴌𐴞𐴁𐴡𐴥.“

𐴀𐴞𐴏𐴝𐴤𐴌 𐴏𐴟𐴥𐴌𐴡𐴃𐴢 𐴁𐴡𐴊𐴡𐴓𐴞𐴒𐴞𐴘𐴡𐴥𐴘

²⁸𐴇𐴞𐴥𐴀𐴕 𐴈𐴡𐴀𐴘𐴢 𐴀𐴝𐴣𐴐𐴄𐴡 𐴊𐴞𐴕 𐴀𐴝𐴥𐴕𐴞𐴑 𐴁𐴝𐴦𐴊𐴠, 𐴀𐴞𐴏𐴝𐴤𐴘𐴠 𐴉𐴞𐴃𐴡𐴌 𐴀𐴡𐴌𐴠, 𐴘𐴡𐴇𐴝𐴥𐴕𐴧𐴝 𐴌𐴠, 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌𐴠 𐴓𐴡𐴦𐴘𐴢 𐴉𐴝𐴀𐴌𐴡𐴌 𐴖𐴡𐴌𐴠 𐴊𐴟𐴖𐴝 𐴒𐴡𐴙𐴃𐴧𐴡𐴥 𐴀𐴟𐴙𐴄𐴧𐴠𐴥𐴒𐴡𐴘.²⁹𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴁𐴝𐴌 𐴏𐴞𐴘𐴝𐴥𐴌𐴝𐴌 𐴏𐴟𐴥𐴌𐴡𐴃𐴢 𐴁𐴡𐴊𐴡𐴓𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴀𐴞𐴥𐴁𐴝𐴌 𐴇𐴡𐴦𐴌 𐴊𐴡𐴥𐴓𐴝 𐴀𐴡𐴥𐴘 𐴏𐴡𐴏𐴧𐴡𐴇𐴝𐴃𐴢 𐴊𐴡𐴙𐴅𐴧𐴠.³⁰𐴀𐴝𐴏𐴞𐴔𐴁𐴞𐴃𐴢 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴀𐴌, 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠 𐴔𐴟𐴀𐴏𐴝 𐴀𐴠𐴊𐴧𐴠 𐴀𐴠𐴓𐴞𐴘𐴝𐴏𐴢.³¹𐴃𐴝𐴌𐴝𐴥 𐴔𐴡𐴈𐴞𐴥𐴔𐴝𐴌 𐴏𐴝𐴥𐴀𐴣𐴃𐴠 𐴊𐴝𐴈𐴝𐴤 𐴊𐴞𐴥 𐴀𐴞𐴥𐴁𐴝𐴌 𐴀𐴠𐴕𐴃𐴠𐴇𐴝𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴀𐴙𐴓𐴢, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴉𐴟𐴌𐴝 𐴒𐴡𐴌𐴞𐴥𐴁𐴝𐴌 𐴀𐴝𐴏𐴠𐴤.³²𐴉𐴞𐴃𐴡𐴌 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴢 𐴔𐴟𐴌 𐴒𐴟𐴥𐴔𐴡𐴃𐴢 𐴀𐴝𐴐𐴧𐴞𐴥𐴓𐴢; 𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴃𐴝𐴥𐴔𐴉𐴝𐴘𐴧𐴠 𐴌𐴝𐴥𐴌, 𐴀𐴞𐴏𐴝𐴤𐴌 𐴔𐴡𐴈𐴞𐴥𐴔𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴠 𐴊𐴠 𐴔𐴝𐴕𐴟𐴥𐴙𐴐𐴢 𐴊𐴟𐴕𐴞𐴥 𐴎𐴡𐴕𐴡𐴌𐴠 𐴊𐴠𐴙𐴑𐴧𐴠𐴥.³³𐴁𐴝𐴦𐴊𐴠 𐴇𐴠𐴥 𐴔𐴝𐴕𐴟𐴥𐴙𐴐𐴢 𐴊𐴟𐴕𐴞𐴥 𐴎𐴡𐴕 𐴀𐴞𐴥𐴁𐴝𐴌 𐴈𐴠𐴥𐴕𐴃𐴟 𐴎𐴝𐴦𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴉𐴞𐴃𐴡𐴌𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴟𐴥𐴎𐴟𐴌, 𐴒𐴡𐴔 𐴀𐴡𐴥𐴘𐴧𐴠 𐴀𐴝𐴣𐴀𐴌𐴝 𐴀𐴠𐴍𐴠𐴥 𐴀𐴝𐴏𐴞𐴤. 𐴀𐴝𐴣𐴀𐴌𐴝 𐴀𐴠𐴍𐴠𐴥 𐴃𐴞𐴕 𐴕𐴝𐴥𐴕 𐴄𐴝𐴔𐴁𐴟 𐴄𐴝𐴑𐴞: 𐴀𐴠𐴑𐴧𐴝𐴥𐴕 𐴃𐴟𐴣𐴀𐴝𐴥𐴣𐴌 𐴓𐴧𐴝, 𐴀𐴠𐴑𐴧𐴝𐴥𐴕 𐴔𐴟𐴀𐴏𐴝𐴓𐴧𐴝, 𐴀𐴠𐴊𐴧𐴠 𐴀𐴝𐴌 𐴀𐴠𐴑𐴧𐴝𐴥𐴕 𐴀𐴠𐴓𐴞𐴘𐴝𐴏𐴢 𐴀𐴡𐴓𐴧𐴝.“ 𐴇𐴝𐴥𐴓𐴠𐴑𐴠 𐴀𐴞𐴥𐴁𐴝 𐴕𐴞𐴎𐴠 𐴑𐴞𐴦 𐴈𐴡𐴀𐴌 𐴕𐴞𐴎𐴠 𐴕𐴡 𐴎𐴝𐴕𐴠.

³⁴𐴉𐴞𐴃𐴡𐴌𐴠 𐴇𐴞𐴥𐴘𐴝𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴠𐴑𐴧𐴝𐴥𐴕 𐴔𐴞𐴘𐴟𐴥𐴓𐴝 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌𐴠 𐴏𐴝𐴥𐴘𐴉𐴠𐴓𐴝𐴘𐴧𐴠. 𐴀𐴞𐴥𐴃𐴝𐴌𐴝 𐴔𐴞𐴘𐴟𐴥𐴓𐴝 𐴓𐴡𐴥𐴘 𐴏𐴝𐴥𐴘𐴎𐴝𐴌𐴒𐴡𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴋𐴡𐴦𐴌𐴝𐴀𐴙𐴓𐴢.³⁵𐴀𐴝𐴦𐴌 𐴇𐴠𐴥 𐴔𐴞𐴘𐴟𐴥𐴓𐴝𐴃𐴧𐴟 𐴀𐴠𐴒𐴧𐴗𐴝𐴤 𐴀𐴝𐴁𐴝𐴏𐴢 𐴀𐴝𐴙𐴐𐴧𐴠𐴥, 𐴑𐴞 𐴈𐴡𐴘𐴓𐴠𐴥, ”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴉𐴟𐴖𐴝 𐴎𐴞𐴁𐴝𐴤𐴌𐴠 𐴀𐴝𐴀𐴛 𐴁𐴝𐴏𐴞𐴥𐴓𐴡𐴘𐴧𐴞; 𐴀𐴞𐴁𐴝𐴤𐴌 𐴈𐴡𐴃𐴝𐴤 𐴉𐴟𐴥𐴕𐴡!“³⁶𐴀𐴝𐴁𐴝𐴏𐴢 𐴏𐴗𐴝𐴥 𐴀𐴝𐴙𐴐𐴧𐴝𐴤 𐴀𐴡𐴥𐴘 𐴁𐴝𐴦𐴊𐴠, 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴒𐴝𐴦𐴒𐴝 𐴓𐴡𐴦𐴃𐴢 𐴉𐴝𐴘𐴧𐴠𐴥. 𐴀𐴞𐴥𐴃𐴝𐴌𐴝 𐴇𐴞𐴥𐴘𐴝𐴕 𐴀𐴝𐴙𐴊𐴧𐴡𐴕𐴠 𐴌𐴝𐴙𐴑𐴧𐴞𐴥𐴓𐴢, 𐴀𐴝𐴦𐴌 𐴎𐴞𐴀𐴕 𐴊𐴠𐴙𐴑𐴧𐴠𐴥 𐴇𐴞𐴥𐴀𐴕 𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡𐴥 𐴎𐴝𐴕𐴝.

𐴀𐴞𐴏𐴝𐴤𐴘𐴠 𐴈𐴡𐴥𐴌𐴝𐴉𐴢 𐴅𐴞𐴕𐴠-𐴉𐴝𐴘𐴧𐴝 𐴀𐴠𐴒𐴧𐴗𐴝𐴤 𐴉𐴟𐴖𐴝 𐴒𐴡𐴔 𐴒𐴡𐴙𐴅𐴧𐴠𐴥

³⁷𐴃𐴝𐴌𐴉𐴡𐴌 𐴊𐴞𐴕 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴉𐴝𐴀𐴌𐴡𐴃𐴧𐴟 𐴓𐴝𐴔𐴞 𐴀𐴝𐴙𐴐𐴧𐴠𐴥, 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴓𐴧𐴡𐴥𐴘 𐴊𐴡𐴓𐴝 𐴀𐴡𐴥𐴘𐴧𐴠.³⁸𐴊𐴡𐴓𐴡𐴃𐴧𐴟 𐴀𐴠𐴎𐴧𐴡𐴕𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴀𐴝𐴣𐴀𐴌 𐴉𐴟𐴖𐴝 𐴖𐴝𐴌𐴠 𐴀𐴠𐴑𐴧𐴝𐴥 𐴏𐴡𐴀, 𐴀𐴞𐴥𐴃𐴠 𐴀𐴝𐴣𐴀𐴌 𐴓𐴠𐴇𐴝𐴥𐴌 𐴀𐴠𐴑 𐴉𐴟𐴖𐴝.³⁹𐴀𐴞𐴥𐴃𐴝𐴌𐴠 𐴀𐴠𐴒𐴧𐴗𐴝𐴤 𐴅𐴞𐴕𐴠 𐴊𐴡𐴥𐴌𐴠, 𐴀𐴝𐴦𐴌 𐴀𐴞𐴥𐴃𐴠 𐴀𐴠𐴥𐴇𐴡𐴕 𐴒𐴟𐴎𐴡𐴌𐴝𐴕 𐴔𐴝𐴌𐴠; 𐴘𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴠 𐴊𐴡𐴥𐴌𐴉𐴡𐴌𐴝𐴁𐴝𐴘 𐴒𐴝𐴓𐴡𐴃𐴧𐴟 𐴉𐴠𐴥𐴕𐴝 𐴀𐴝𐴕𐴠𐴤. 𐴘𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴠 𐴁𐴞𐴐𐴞𐴤 𐴊𐴟𐴑 𐴊𐴞 𐴔𐴡𐴐𐴑𐴞𐴓𐴡𐴌 𐴏𐴝𐴥𐴀𐴣𐴃𐴠 𐴁𐴠 𐴀𐴠𐴌𐴞𐴊𐴠.⁴⁰𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴇𐴠𐴥 𐴅𐴞𐴕 𐴕𐴗𐴝𐴥 𐴕𐴠𐴦𐴓𐴝𐴘𐴉𐴠𐴥𐴓𐴝𐴘𐴃𐴡 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴞𐴥𐴓𐴝𐴔, 𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴕𐴡𐴥 𐴉𐴝𐴌𐴠.“

⁴¹𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴞𐴔𐴝𐴕 𐴏𐴝𐴥𐴌𐴝 𐴀𐴠𐴊𐴧𐴠 𐴁𐴝𐴥𐴀𐴣𐴌𐴝 𐴕𐴡𐴏𐴡𐴥𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴝𐴌𐴡𐴤 𐴇𐴡𐴃𐴡𐴥𐴑𐴧𐴝𐴓𐴢 𐴃𐴝𐴥𐴑𐴞𐴃𐴝𐴔؟ 𐴇𐴡𐴃𐴡𐴥𐴊𐴞𐴕 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴌𐴊𐴝𐴐𐴢 𐴒𐴡𐴙𐴃𐴧𐴝𐴥𐴔؟ 𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴖𐴝𐴌𐴠 𐴀𐴠𐴍𐴠𐴥 𐴀𐴝𐴕𐴡𐴤.“

⁴²𐴉𐴟𐴖𐴝 𐴖𐴝 𐴀𐴝𐴘𐴧𐴠𐴤𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴃𐴝𐴌𐴠 𐴁𐴟𐴥𐴃𐴧𐴗𐴝𐴘𐴠 𐴔𐴠𐴍𐴞𐴃𐴢 𐴀𐴝𐴣𐴏𐴝𐴥𐴌𐴞 𐴊𐴡𐴥𐴌𐴉𐴡𐴌𐴝𐴁𐴝𐴃𐴢 𐴊𐴡𐴙𐴅𐴧𐴠. 𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴇𐴠𐴥 𐴈𐴡𐴥𐴌𐴝𐴉𐴢 𐴅𐴞𐴕 𐴕𐴗𐴝𐴥𐴌𐴠 𐴊𐴡𐴥𐴀𐴣𐴑 𐴊𐴞𐴥, 𐴉𐴟𐴖𐴝 𐴖𐴝𐴌𐴠 𐴒𐴡𐴔 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴁𐴝𐴦𐴊𐴠 𐴀𐴞𐴥𐴃𐴝𐴌𐴠 𐴁𐴝𐴉𐴡𐴌 𐴇𐴝𐴣𐴏𐴠 𐴖𐴝𐴦𐴉𐴠𐴏𐴢 𐴊𐴞𐴦𐴉𐴠𐴥𐴓𐴝𐴘𐴧𐴠.⁴³𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴝𐴓𐴧𐴝𐴌 𐴋𐴡𐴣𐴀𐴌 𐴑𐴟𐴊𐴟𐴌𐴟𐴃𐴢 𐴊𐴠𐴑𐴞𐴥 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘. 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴔𐴡𐴦𐴃𐴡𐴌 𐴁𐴝𐴦𐴁𐴟𐴃𐴠 𐴀𐴝𐴁𐴝𐴌 𐴀𐴝𐴒𐴟𐴕 𐴈𐴡𐴘𐴧𐴠𐴥 (𐴔𐴡𐴃𐴢 17‏:22‏-23; 𐴔𐴝𐴑 9‏:30‏-32)
𐴎𐴠 𐴀𐴡𐴑𐴃𐴡𐴥𐴃𐴢 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴀𐴞𐴏𐴝𐴤𐴘𐴠 𐴒𐴡𐴙𐴃𐴧𐴡𐴥 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴀𐴌 𐴊𐴠,⁴⁴”𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴀𐴠 𐴈𐴡𐴃𐴝𐴤 𐴀𐴞𐴀𐴕 𐴈𐴝𐴕𐴡𐴃𐴢 𐴒𐴡𐴥𐴓𐴝𐴘 𐴓𐴡𐴦, 𐴑𐴞 𐴈𐴡𐴘𐴓𐴠𐴥, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴝 𐴎𐴝𐴘𐴁𐴡.“⁴⁵𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴕𐴡 𐴁𐴟𐴎𐴞𐴥𐴃𐴡. 𐴀𐴞𐴥𐴃𐴝𐴌𐴝𐴃𐴧𐴟 𐴇𐴞𐴥𐴘𐴝𐴕 𐴓𐴟𐴑𐴝𐴘𐴉𐴠𐴥𐴓𐴝 𐴒𐴞𐴥𐴘𐴠, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴁𐴟𐴎𐴞𐴥 𐴕𐴡 𐴉𐴝𐴌𐴠; 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴇𐴠𐴥 𐴈𐴡𐴃𐴝𐴤𐴌 𐴁𐴝𐴦𐴁𐴟𐴃𐴠 𐴉𐴟𐴏𐴝𐴥𐴌 𐴒𐴡𐴙𐴃𐴧𐴠𐴤 𐴘𐴡𐴥 𐴋𐴡𐴦𐴌𐴝𐴘𐴃𐴡𐴥.

𐴀𐴠𐴁𐴧𐴠 𐴋𐴡𐴣𐴀𐴌 𐴇𐴡𐴕𐴧𐴗𐴝𐴤؟

⁴⁶𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴑𐴧𐴝𐴥𐴕 𐴁𐴝𐴌𐴝𐴤𐴁𐴝𐴌𐴞 𐴐𐴟𐴥𐴌𐴟 𐴀𐴡𐴥𐴘𐴧𐴠, 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴁𐴧𐴠 𐴋𐴡𐴣𐴀𐴌 𐴇𐴡𐴕𐴧𐴗𐴝𐴤 𐴈𐴡𐴀𐴘𐴢.⁴⁷𐴓𐴠𐴑𐴞𐴕 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴊𐴞𐴓𐴡𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞, 𐴀𐴠𐴒𐴧𐴗𐴝𐴤 𐴒𐴟𐴌𐴝 𐴉𐴟𐴖𐴝 𐴓𐴡𐴦𐴘𐴢 𐴀𐴞𐴥𐴁𐴝𐴌 𐴋𐴝𐴥𐴑𐴠 𐴒𐴡𐴥𐴌𐴞 𐴃𐴞𐴥𐴘𐴝𐴒𐴝𐴌𐴝𐴘𐴧𐴠,⁴⁸𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠𐴦 𐴑𐴞𐴘𐴠𐴥 𐴀𐴠 𐴉𐴟𐴖𐴝 𐴖𐴝𐴌𐴠 𐴀𐴝𐴣𐴀𐴌 𐴕𐴝𐴔𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠; 𐴀𐴝𐴦𐴌 𐴎𐴠𐴦 𐴑𐴞𐴘𐴠𐴥 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴎𐴠𐴦𐴕𐴞𐴑𐴞 𐴀𐴠𐴁𐴧𐴠 𐴐𐴡𐴥𐴣𐴍𐴡, 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴠𐴁𐴧𐴠 𐴋𐴡𐴣𐴀𐴌.“

𐴎𐴠𐴦 𐴃𐴟𐴣𐴀𐴝𐴥𐴌𐴝𐴌 𐴀𐴟𐴓𐴋𐴝 𐴕𐴡, 𐴘𐴡𐴥𐴒𐴧𐴗𐴝 𐴃𐴟𐴣𐴀𐴝𐴥𐴌𐴝𐴌 𐴇𐴞𐴥𐴑𐴧𐴝

⁴⁹𐴘𐴡𐴇𐴝𐴥𐴕𐴧𐴝𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴟𐴥𐴎𐴟𐴌, 𐴀𐴝𐴣𐴀𐴌𐴝 𐴊𐴠𐴙𐴑𐴧𐴞𐴥 𐴊𐴠, 𐴀𐴠𐴒𐴧𐴗𐴝𐴤 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴣𐴌 𐴕𐴝𐴔𐴠 𐴁𐴟𐴥𐴃𐴢 𐴕𐴠𐴦𐴓𐴝𐴌; 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴟𐴣𐴀𐴝𐴥𐴣𐴌 𐴉𐴞𐴏𐴝𐴥𐴓𐴞 𐴕𐴡𐴥 𐴊𐴡𐴥𐴌𐴠 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝 𐴘𐴡𐴥𐴒𐴧𐴗𐴝𐴌𐴠 𐴔𐴝𐴕𐴝𐴥 𐴒𐴡𐴙𐴅𐴧𐴞𐴥.“

⁵⁰𐴓𐴠𐴑𐴞𐴕 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴘𐴡𐴥𐴒𐴧𐴗𐴝𐴌𐴠 𐴔𐴝𐴕𐴝𐴥 𐴕𐴡 𐴒𐴡𐴙𐴅𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴌 𐴀𐴟𐴓𐴋𐴝 𐴕𐴡, 𐴘𐴡𐴥𐴒𐴧𐴗𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴇𐴞𐴥𐴑𐴧𐴝.“

𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠𐴥

⁵¹𐴀𐴞𐴏𐴝𐴤 𐴀𐴝𐴏𐴔𐴝𐴕𐴡𐴃𐴢 𐴀𐴟𐴍𐴞𐴤 𐴎𐴝𐴘𐴁𐴝𐴌 𐴊𐴞𐴕 𐴎𐴠𐴃𐴧𐴡𐴥𐴃𐴢 𐴋𐴝𐴥𐴑𐴠 𐴀𐴝𐴘𐴧𐴠𐴤𐴌, 𐴀𐴞𐴥𐴁𐴝𐴘𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴎𐴝𐴘 𐴁𐴡𐴓𐴧𐴝 𐴉𐴝𐴥𐴘𐴏𐴠𐴓𐴝 𐴓𐴡𐴘𐴧𐴠𐴥.⁵²𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴀𐴝𐴒𐴠 𐴈𐴡𐴥𐴁𐴡𐴌𐴒𐴗𐴝 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴘𐴧𐴠; 𐴀𐴞𐴥𐴃𐴝𐴌𐴝 𐴎𐴝𐴘 𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴡𐴌 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴒𐴡𐴥𐴙𐴓𐴧𐴠, 𐴎𐴠𐴀𐴕𐴠 𐴀𐴞𐴥𐴁𐴝𐴓𐴧𐴝 𐴁𐴠𐴒𐴧𐴟𐴥𐴕 𐴀𐴠𐴕𐴃𐴠𐴎𐴝𐴔 𐴒𐴡𐴌𐴞𐴥 𐴉𐴝𐴌𐴠.⁵³𐴓𐴠𐴑𐴞𐴕 𐴇𐴠𐴥𐴍𐴞𐴘𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴕𐴡𐴥 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴏𐴡𐴉𐴡𐴥𐴌 𐴀𐴝𐴐𐴧𐴞𐴥𐴓𐴢 𐴊𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴀𐴟𐴎𐴟.⁵⁴𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴢 𐴘𐴝𐴑𐴟𐴁𐴢 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴘𐴠 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴣𐴀𐴌𐴝 𐴇𐴡𐴥𐴑𐴟𐴔 𐴊𐴞𐴥 𐴀𐴝𐴏𐴔𐴝𐴕𐴡𐴃𐴧𐴟 𐴀𐴡𐴦𐴙𐴕 𐴕𐴝𐴎𐴞𐴓𐴢 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌𐴠 𐴉𐴟𐴥𐴌𐴝𐴘𐴉𐴠𐴓𐴝𐴘𐴃𐴝𐴔 𐴕𐴠𐴥؟“⁵⁵𐴔𐴡𐴕𐴃𐴡𐴌 𐴀𐴞𐴥𐴁𐴝 𐴉𐴞𐴥𐴌𐴞 𐴀𐴞𐴥𐴃𐴝𐴌𐴝𐴌𐴠 𐴅𐴠𐴥𐴅𐴧𐴠𐴍𐴝𐴘 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴇𐴡𐴕𐴊𐴞𐴓𐴧𐴝 𐴌𐴟𐴀𐴌 𐴊𐴠 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡;⁵⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴎𐴝𐴕 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘𐴃𐴡 𐴀𐴝𐴙𐴐𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴁𐴝𐴏𐴝𐴘𐴃𐴡𐴥 𐴀𐴝𐴙𐴐𐴧𐴠𐴥 𐴊𐴠.“𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴝𐴌 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴒𐴞𐴦𐴘𐴡𐴥𐴘.

𐴀𐴟𐴔𐴧𐴡𐴃𐴢 𐴀𐴡𐴥𐴘𐴁𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

⁵⁷𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴌𐴝𐴏𐴃𐴝 𐴁𐴝𐴥𐴘 𐴎𐴝𐴦𐴌, 𐴔𐴝𐴕𐴟𐴥𐴙𐴐𐴢 𐴀𐴠𐴥𐴎𐴧𐴡𐴕𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴎𐴠𐴍𐴠𐴥 𐴎𐴝𐴘𐴁𐴝, 𐴀𐴝𐴀𐴛 𐴘𐴡𐴥 𐴇𐴠𐴥𐴍𐴠 𐴃𐴟𐴣𐴀𐴝𐴥𐴣𐴌 𐴉𐴞𐴏𐴝𐴥𐴓𐴞 𐴎𐴝𐴘𐴧𐴟𐴔.“

⁵⁸𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴐𐴞𐴥𐴘𐴝𐴓𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴒𐴝𐴣𐴃𐴢 𐴀𐴝𐴏𐴠𐴤 𐴀𐴝𐴦𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴝𐴇𐴝𐴤 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴕𐴞𐴎𐴡𐴌 𐴔𐴝𐴃𐴝𐴥 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴟𐴥𐴊𐴧𐴗𐴝 𐴇𐴡𐴕𐴡𐴤 𐴔𐴞𐴑𐴧𐴝𐴥 𐴎𐴝𐴒𐴝 𐴕𐴝𐴥𐴘.“

⁵⁹𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴀𐴝𐴘𐴧𐴡𐴤.“𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴒𐴠 𐴀𐴝𐴀𐴛 𐴎𐴝𐴘 𐴀𐴝𐴣𐴀𐴌 𐴁𐴝𐴉𐴡𐴌𐴠 𐴊𐴡𐴇𐴡𐴥𐴕 𐴒𐴡𐴌𐴞𐴥 𐴀𐴝𐴘𐴧𐴞𐴤.“

⁶⁰𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴔𐴟𐴌𐴟𐴊𐴝 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴕𐴞𐴎𐴡𐴌 𐴔𐴟𐴌𐴟𐴊𐴝𐴌𐴠 𐴊𐴡𐴇𐴡𐴥𐴕 𐴒𐴡𐴌𐴡𐴥𐴗𐴑𐴒𐴡𐴘, 𐴔𐴡𐴕𐴃𐴡𐴌 𐴃𐴟𐴀𐴛 𐴎𐴝𐴘 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴃𐴡𐴁𐴡𐴓𐴞𐴑 𐴒𐴡𐴌𐴡𐴤𐴒𐴡𐴘.“

⁶¹𐴀𐴝𐴌 𐴀𐴠𐴑𐴎𐴡𐴕𐴠 𐴘𐴡𐴥 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴉𐴞𐴏𐴝𐴥𐴓𐴞 𐴀𐴝𐴙𐴐𐴧𐴟𐴤𐴔, 𐴓𐴠𐴑𐴞𐴕 𐴀𐴝𐴒𐴠 𐴀𐴝𐴀𐴛 𐴀𐴝𐴣𐴀𐴌 𐴒𐴡𐴥𐴌𐴡𐴌 𐴔𐴝𐴕𐴟𐴥𐴙𐴐𐴡𐴃𐴧𐴟 𐴁𐴞𐴊𐴝𐴘 𐴓𐴡𐴘 𐴀𐴝𐴘𐴧𐴞𐴤.“

⁶²𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴀𐴝𐴥𐴃𐴢 𐴕𐴝𐴈𐴡𐴓𐴡𐴃𐴢 𐴌𐴝𐴑𐴞𐴥 𐴉𐴞𐴏𐴧𐴝𐴥 𐴏𐴝𐴀𐴘𐴢 𐴃𐴝𐴥𐴑𐴠, 𐴘𐴡𐴥𐴒𐴧𐴗𐴝 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴓𐴝𐴦𐴘𐴠𐴑 𐴕𐴡.“

The Word for the World International

https://app.library.bible/content/87faca8b51c22590