Read 𐴓𐴟𐴑𐴝𐴥𐴏𐴢 10

𐴓𐴟𐴑𐴝𐴥𐴏𐴢10

𐴇𐴡𐴥𐴙𐴃𐴧𐴡𐴌-𐴊𐴟𐴘 𐴎𐴡𐴕𐴡𐴌𐴠 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥 𐴊𐴞𐴉𐴠𐴍𐴝𐴥𐴘𐴧𐴠

¹𐴘𐴝𐴥𐴌𐴁𐴝𐴦𐴊𐴠, 𐴔𐴝𐴓𐴞𐴑𐴠 𐴀𐴡𐴙𐴕𐴧𐴡 𐴇𐴡𐴥𐴙𐴃𐴧𐴡𐴌-𐴊𐴟𐴘 𐴎𐴡𐴕𐴡𐴌𐴠 𐴘𐴡𐴥 𐴁𐴝𐴏𐴞𐴥𐴓𐴡𐴘𐴧𐴠, 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌𐴠 𐴊𐴟𐴘 𐴎𐴡𐴕 𐴊𐴟𐴘 𐴎𐴡𐴕 𐴒𐴡𐴌𐴞𐴥 𐴕𐴞𐴎𐴡𐴌 𐴀𐴝𐴒𐴠 𐴀𐴡 𐴐𐴡𐴥𐴀𐴌 𐴀𐴠𐴊𐴧𐴠 𐴎𐴝𐴒𐴝 𐴉𐴡𐴃𐴧𐴞𐴥 𐴀𐴠𐴑𐴧𐴝𐴥𐴕𐴡𐴃𐴢 𐴊𐴞𐴉𐴠𐴍𐴝𐴥𐴘𐴧𐴠, 𐴎𐴠𐴍𐴠𐴥-𐴎𐴠𐴍𐴠𐴥 𐴀𐴞𐴥𐴁𐴝 𐴕𐴞𐴎𐴠 𐴎𐴝𐴘𐴁𐴡.²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴉𐴡𐴥𐴏𐴡𐴓𐴢 𐴊𐴠 𐴁𐴞𐴐𐴞𐴤 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴊𐴡𐴦𐴘𐴝 𐴁𐴞𐴐𐴞𐴤 𐴈𐴡𐴔; 𐴇𐴠𐴥𐴃𐴡𐴓𐴧𐴝 𐴉𐴡𐴥𐴏𐴡𐴓𐴡𐴌 𐴔𐴝𐴓𐴞𐴑𐴡𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴡𐴤, 𐴀𐴞𐴥𐴁𐴝𐴌 𐴉𐴡𐴥𐴏𐴡𐴓𐴢 𐴊𐴝𐴘𐴃𐴡 𐴊𐴡𐴦𐴘𐴝 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴘 𐴁𐴡𐴓𐴧𐴝.³𐴎𐴡𐴦; 𐴉𐴟𐴥𐴕𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴌𐴝𐴚𐴑𐴟𐴣𐴙𐴌𐴡𐴌 𐴔𐴝𐴎𐴠𐴥 𐴊𐴞𐴉𐴠𐴍𐴝𐴥𐴙𐴌 𐴊𐴠.⁴𐴇𐴡𐴕𐴡𐴤 𐴄𐴞𐴛𐴝𐴌 𐴎𐴝𐴓𐴞, 𐴇𐴡𐴥𐴙𐴓𐴧𐴝, 𐴘𐴝𐴥 𐴐𐴠𐴕𐴄𐴝𐴥𐴌 𐴕𐴡 𐴓𐴡𐴘𐴎𐴝𐴘𐴧𐴡𐴥; 𐴀𐴝𐴦𐴌 𐴉𐴡𐴣𐴃𐴡𐴃𐴢 𐴇𐴡𐴕𐴡𐴤𐴑𐴞𐴘𐴡𐴌𐴠 𐴏𐴡𐴥𐴓𐴝𐴔 𐴕𐴡 𐴊𐴞𐴘𐴡𐴥.

⁵”𐴃𐴟𐴣𐴀𐴝𐴥𐴌𐴝 𐴎𐴠 𐴒𐴡𐴥𐴌𐴡𐴃𐴢 𐴒𐴡𐴥𐴓𐴞𐴁𐴝, 𐴀𐴝𐴒𐴠 𐴈𐴡𐴘𐴁𐴝𐴤 𐴊𐴠, ’𐴀𐴠 𐴒𐴡𐴥𐴌𐴡𐴃𐴢 𐴐𐴝𐴥𐴕𐴃𐴞 𐴀𐴡𐴥𐴑.‘⁶𐴎𐴡𐴊𐴞 𐴇𐴠𐴥𐴍𐴠 𐴐𐴝𐴥𐴕𐴃𐴞𐴌 𐴓𐴝𐴦𐴘𐴠𐴑 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴢 𐴃𐴝𐴥𐴑𐴠, 𐴃𐴟𐴣𐴀𐴝𐴥𐴌𐴝𐴌 𐴐𐴝𐴥𐴕𐴃𐴞 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴃𐴝𐴥𐴑𐴞𐴁𐴡; 𐴔𐴡𐴕𐴃𐴡𐴌 𐴎𐴡𐴊𐴞 𐴕𐴡 𐴃𐴝𐴥𐴑𐴠, 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴉𐴞𐴥𐴌𐴞 𐴀𐴝𐴀𐴘𐴎𐴝𐴥𐴘𐴁𐴡𐴘.⁷𐴇𐴠𐴥 𐴒𐴡𐴥𐴌𐴡𐴃𐴢 𐴃𐴝𐴥𐴑𐴞𐴘𐴡, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴞𐴀𐴕 𐴊𐴠𐴦 𐴇𐴞𐴥𐴀𐴕 𐴈𐴝𐴥𐴘𐴧𐴡 𐴀𐴠𐴊𐴧𐴠 𐴉𐴞𐴀𐴘𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴟𐴎𐴟𐴌 𐴃𐴡 𐴕𐴞𐴎𐴡𐴌 𐴔𐴟𐴎𐴟𐴌𐴞 𐴉𐴝𐴘𐴁𐴝𐴌 𐴓𐴝𐴦𐴘𐴠𐴑. 𐴒𐴡𐴥𐴌𐴠-𐴒𐴡𐴥𐴌𐴠 𐴕𐴡 𐴒𐴟𐴥𐴌𐴞𐴘𐴡.

⁸”𐴃𐴟𐴣𐴀𐴝𐴥𐴌𐴝 𐴎𐴠 𐴐𐴡𐴥𐴀𐴌𐴡𐴃𐴢 𐴒𐴡𐴥𐴓𐴞𐴁𐴝, 𐴎𐴡𐴊𐴞 𐴇𐴠𐴥𐴍𐴞𐴘𐴝𐴌 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴀𐴕 𐴊𐴠𐴦 𐴇𐴞𐴥𐴀𐴕 𐴈𐴝𐴥𐴘𐴧𐴡.⁹𐴇𐴠𐴥𐴍𐴞𐴘𐴝𐴌 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴔 𐴒𐴡𐴙𐴅𐴧𐴡𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴈𐴡𐴘𐴁𐴝𐴤 𐴊𐴠, ’𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴟𐴣𐴀𐴝𐴥𐴌𐴝𐴌 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘.‘¹⁰𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴎𐴠 𐴐𐴡𐴥𐴀𐴌𐴡𐴃𐴢 𐴒𐴡𐴥𐴓𐴞𐴁𐴝, 𐴀𐴞𐴥𐴃𐴝𐴌𐴝 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕𐴡𐴌 𐴒𐴡𐴓𐴊𐴞-𐴒𐴡𐴓𐴊𐴞 𐴎𐴝𐴘 𐴈𐴡𐴘𐴁𐴝𐴤 𐴊𐴠,¹¹’𐴃𐴟𐴣𐴀𐴝𐴥𐴌𐴝𐴌 𐴐𐴡𐴥𐴀𐴌𐴡𐴌 𐴊𐴟𐴥𐴙𐴓𐴢 𐴎𐴞𐴀𐴕 𐴀𐴝𐴣𐴀𐴌𐴝𐴌 𐴄𐴠𐴥𐴚𐴡𐴌 𐴃𐴡𐴓𐴧𐴝𐴃𐴢 𐴁𐴝𐴎𐴞𐴥 𐴃𐴝𐴥𐴙𐴑𐴧𐴠, 𐴀𐴝𐴣𐴀𐴌𐴝 𐴇𐴞𐴥𐴀𐴕 𐴀𐴟𐴥𐴊𐴧𐴗𐴝 𐴃𐴟𐴣𐴀𐴝𐴥𐴌𐴝𐴌 𐴀𐴟𐴓𐴋𐴝 𐴎𐴝𐴥𐴌𐴞𐴉𐴠𐴓𐴝𐴙𐴌; 𐴔𐴡𐴕𐴃𐴡𐴌 𐴔𐴡𐴕𐴡𐴃𐴢 𐴌𐴝𐴙𐴑𐴧𐴡𐴥 𐴊𐴠 𐴑𐴞, 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘.‘¹²𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴡 𐴊𐴞𐴕 𐴏𐴡𐴥𐴊𐴡𐴔 𐴐𐴡𐴥𐴀𐴌𐴡𐴌 𐴃𐴟𐴥𐴖𐴝𐴌𐴡 𐴇𐴠𐴥 𐴐𐴡𐴥𐴀𐴌 𐴇𐴞𐴥𐴘𐴝𐴕𐴡𐴃𐴧𐴟 𐴁𐴞𐴐𐴞𐴤 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.

𐴃𐴡𐴖𐴝𐴥 𐴕𐴡𐴥 𐴒𐴡𐴌𐴠𐴥 𐴊𐴠 𐴐𐴡𐴥𐴀𐴌𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢

¹³”𐴀𐴡𐴥 𐴑𐴡𐴌𐴝𐴎𐴞𐴕، 𐴃𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴀𐴡𐴥 𐴁𐴠𐴃𐴏𐴝𐴥𐴘𐴊𐴝, 𐴃𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴇𐴞𐴥𐴀𐴕 𐴎𐴡𐴊𐴞 𐴄𐴝𐴘𐴝𐴥𐴌 𐴀𐴠𐴊𐴧𐴠 𐴏𐴞𐴥𐴊𐴡𐴕𐴡𐴃𐴢 𐴒𐴡𐴌𐴝𐴥 𐴎𐴝𐴘𐴃𐴡, 𐴀𐴞𐴥𐴃𐴝𐴌𐴝 𐴏𐴝𐴥𐴓𐴝𐴌𐴐𐴡𐴄𐴢 𐴉𐴞𐴣𐴊𐴞𐴥 𐴀𐴠𐴊𐴧𐴠 𐴏𐴝𐴥𐴘𐴡𐴌 𐴖𐴡𐴌𐴠 𐴁𐴡𐴀𐴘𐴢 𐴁𐴡𐴀𐴗𐴃𐴢 𐴀𐴝𐴒𐴠 𐴓𐴡𐴥𐴃𐴞 𐴃𐴡𐴖𐴝𐴥 𐴒𐴡𐴌𐴞𐴥𐴉𐴠𐴓𐴝𐴘𐴃𐴡.¹⁴𐴔𐴡𐴕𐴃𐴡𐴌 𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴄𐴝𐴘𐴝𐴥𐴌 𐴀𐴠𐴊𐴧𐴠 𐴏𐴞𐴥𐴊𐴡𐴕𐴡𐴌 𐴔𐴝𐴙𐴕𐴐𐴡𐴥𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴃𐴟𐴥𐴖𐴝𐴌𐴡 𐴈𐴡𐴔 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.¹⁵𐴀𐴝𐴦𐴌 𐴃𐴟𐴘, 𐴀𐴡𐴥 𐴑𐴝𐴂𐴝𐴌𐴕𐴝𐴈𐴟𐴥𐴔, 𐴃𐴡𐴌𐴠𐴥 𐴑𐴞𐴥 𐴀𐴝𐴏𐴔𐴝𐴕𐴡𐴃𐴢 𐴁𐴝𐴎𐴠𐴥 𐴉𐴝𐴥𐴕 𐴖𐴡𐴌𐴠 𐴃𐴟𐴓𐴝𐴤 𐴎𐴝𐴘𐴁𐴡؟ 𐴃𐴡𐴌𐴠𐴥 𐴃𐴡 𐴕𐴞𐴏𐴠 𐴉𐴝𐴃𐴝𐴓𐴉𐴟𐴌𐴡𐴃𐴢 𐴀𐴠𐴥𐴕𐴝 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴘𐴁𐴡.“

¹⁶𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴀𐴌 𐴊𐴠, ”𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴉𐴟𐴥𐴕𐴠, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴠 𐴊𐴠; 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴀𐴞𐴕𐴑𐴝𐴌 𐴒𐴡𐴌𐴠𐴥 𐴊𐴠; 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴀𐴞𐴕𐴑𐴝𐴌 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴠𐴥 𐴊𐴠.“

𐴇𐴡𐴥𐴙𐴃𐴧𐴡𐴌-𐴊𐴟𐴘 𐴎𐴡𐴕 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥

¹⁷𐴁𐴝𐴦𐴊𐴠 𐴇𐴡𐴥𐴙𐴃𐴧𐴡𐴌-𐴊𐴟𐴘 𐴎𐴡𐴕 𐴕𐴟𐴥𐴕 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴃𐴟𐴣𐴀𐴝𐴥𐴣𐴌 𐴕𐴝𐴔𐴠 𐴃𐴡 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴀𐴝𐴣𐴀𐴌𐴝𐴌 𐴈𐴡𐴃𐴝𐴤 𐴔𐴝𐴕𐴠!“

¹⁸𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴐𐴡𐴥𐴘𐴃𐴝𐴕 𐴁𐴞𐴅𐴞𐴓𐴞 𐴏𐴡𐴔𐴑𐴠 𐴉𐴝𐴥𐴚𐴒𐴡𐴌𐴞 𐴀𐴝𐴏𐴔𐴝𐴕𐴡𐴃𐴧𐴟 𐴉𐴡𐴌𐴠𐴌 𐴊𐴠 𐴀𐴝𐴀𐴛 𐴊𐴠𐴙𐴑𐴧𐴞𐴥.¹⁹𐴏𐴡𐴀, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴉𐴢 𐴀𐴠𐴊𐴧𐴠 𐴁𐴞𐴏𐴧𐴟𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴞𐴁𐴝𐴌 𐴀𐴠𐴊𐴧𐴠 𐴊𐴟𐴐𐴧𐴡𐴕𐴡𐴌 𐴇𐴝𐴥𐴀𐴌 𐴃𐴝𐴦𐴑𐴡𐴃𐴡𐴌 𐴖𐴡𐴌𐴠 𐴑𐴠𐴥𐴔𐴡𐴃𐴝 𐴊𐴞𐴦𐴘𐴞𐴥; 𐴇𐴡𐴕𐴡𐴤 𐴑𐴠𐴏𐴧𐴟𐴥𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴥𐴃𐴞 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴡𐴥.²⁰𐴓𐴠𐴑𐴞𐴕 𐴁𐴟𐴥𐴃𐴢-𐴉𐴠𐴌𐴡𐴃𐴢 𐴀𐴡𐴥𐴑𐴧𐴡𐴓𐴠 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴔𐴝𐴕𐴠 𐴊𐴠 𐴇𐴞𐴥𐴘𐴝𐴕𐴠 𐴑𐴟𐴥𐴐𐴞 𐴕𐴡 𐴀𐴡𐴥𐴘𐴧𐴡, 𐴁𐴡𐴥𐴓𐴑𐴠 𐴀𐴠𐴃𐴡𐴓𐴧𐴝𐴤 𐴑𐴟𐴥𐴐𐴞 𐴀𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴕𐴝𐴔 𐴀𐴝𐴏𐴔𐴝𐴕𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤.“

𐴀𐴞𐴏𐴝𐴤𐴌 𐴑𐴟𐴥𐴐𐴞

²¹𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴂𐴝𐴑-𐴌𐴟𐴀𐴌 𐴑𐴟𐴥𐴐𐴞𐴘𐴠 𐴉𐴟𐴌𐴝𐴘𐴧𐴝 𐴀𐴡𐴥𐴘 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴉𐴢, 𐴀𐴝𐴏𐴔𐴝𐴕 𐴎𐴡𐴁𐴞𐴕𐴡𐴌 𐴔𐴝𐴓𐴞𐴑, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴀𐴞𐴀𐴕 𐴒𐴞𐴘𐴝𐴕𐴞 𐴀𐴠𐴊𐴧𐴠 𐴁𐴟𐴊𐴧𐴞𐴥𐴔𐴝𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴓𐴟𐴑𐴝𐴘 𐴌𐴝𐴑𐴞𐴥 𐴒𐴟𐴌𐴝 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴒𐴡𐴙𐴅𐴧𐴡𐴥. 𐴀𐴡𐴥𐴘, 𐴀𐴡𐴥 𐴁𐴝𐴉𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴣𐴃𐴧𐴟 𐴇𐴞𐴥𐴘𐴝𐴕 𐴁𐴞𐴐𐴞𐴤 𐴉𐴡𐴏𐴡𐴥𐴕 𐴓𐴝𐴙𐴒𐴧𐴠𐴥.

²²”𐴀𐴝𐴣𐴀𐴌 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴊𐴞𐴦𐴉𐴠𐴥𐴓𐴝𐴘𐴧𐴠. 𐴉𐴟𐴖𐴝 𐴇𐴡𐴕 𐴊𐴠 𐴇𐴞𐴥𐴘𐴝𐴕 𐴁𐴝𐴉𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠, 𐴀𐴝𐴦𐴌 𐴁𐴝𐴉𐴢 𐴇𐴡𐴕 𐴊𐴠 𐴇𐴞𐴥𐴘𐴝𐴕 𐴉𐴟𐴖𐴝 𐴀𐴠𐴊𐴧𐴠 𐴉𐴟𐴖𐴝𐴘𐴠 𐴎𐴝𐴌𐴠𐴥 𐴎𐴝𐴇𐴠𐴥𐴌 𐴒𐴡𐴙𐴃𐴧𐴡𐴥 𐴏𐴝𐴀, 𐴘𐴡𐴥𐴒𐴧𐴗𐴝𐴘𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠.“

²³𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴐𐴝𐴥𐴌𐴞𐴃𐴧𐴟𐴕𐴡𐴌 𐴀𐴟𐴎𐴟 𐴉𐴞𐴥𐴌𐴞, 𐴎𐴟𐴘𐴃𐴠𐴥𐴒𐴡𐴌𐴞 𐴈𐴡𐴀𐴌 𐴊𐴠, ”𐴔𐴟𐴁𐴝𐴌𐴠𐴑 𐴏𐴟𐴑 𐴀𐴟𐴀𐴙𐴕 𐴎𐴞𐴀𐴕𐴠 𐴃𐴟𐴣𐴀𐴝𐴥𐴌𐴝 𐴊𐴠𐴑𐴡𐴥 𐴊𐴠 𐴇𐴞𐴥𐴀𐴕 𐴊𐴠𐴑𐴠𐴥.²⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴁𐴡𐴀𐴗𐴃𐴢 𐴕𐴡𐴁𐴞 𐴀𐴠𐴊𐴧𐴠 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴠 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴊𐴠𐴑𐴡𐴥𐴌 𐴇𐴞𐴥𐴀𐴕 𐴊𐴠𐴑𐴞𐴥 𐴁𐴡𐴓𐴧𐴝 𐴀𐴝𐴎𐴧𐴟 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴕𐴡𐴥 𐴊𐴠𐴑𐴠𐴥; 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴉𐴟𐴥𐴕𐴡𐴌 𐴇𐴞𐴥𐴀𐴕 𐴉𐴟𐴥𐴕𐴞 𐴁𐴡𐴓𐴧𐴝 𐴘𐴡𐴥 𐴀𐴝𐴎𐴧𐴟 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴕𐴡𐴥 𐴉𐴟𐴥𐴕𐴠.“

²⁵𐴀𐴠𐴑𐴁𐴝𐴌, 𐴐𐴡𐴥𐴌𐴞𐴘𐴡𐴃𐴡𐴌 𐴀𐴠𐴥𐴎𐴧𐴡𐴕 𐴀𐴝𐴓𐴠𐴔𐴠 𐴃𐴞𐴥𐴘𐴝𐴘 𐴀𐴞𐴏𐴝𐴤𐴌𐴠 𐴀𐴠𐴕𐴃𐴝𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴔𐴞𐴌𐴝𐴏𐴢 𐴉𐴝𐴘𐴃𐴠 𐴀𐴝𐴣𐴀𐴃𐴧𐴟 𐴑𐴞𐴦 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥؟“

²⁶𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴐𐴡𐴥𐴌𐴞𐴘𐴡𐴃𐴡𐴃𐴢 𐴑𐴞𐴦 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤؟ 𐴃𐴟𐴀𐴛 𐴇𐴠𐴥𐴍𐴠 𐴑𐴞𐴦 𐴉𐴡𐴙𐴅𐴧𐴡𐴥؟“

²⁷𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴔𐴝𐴁𐴟𐴊𐴢 𐴃𐴟𐴣𐴀𐴝𐴥𐴌𐴝𐴌 𐴀𐴝𐴓𐴧𐴝𐴌𐴠 𐴕𐴞𐴎𐴡𐴌 𐴉𐴟𐴌𐴝 𐴊𐴞𐴓𐴠, 𐴉𐴟𐴌𐴝 𐴎𐴝𐴕𐴠, 𐴉𐴟𐴌𐴝 𐴁𐴡𐴓𐴠, 𐴀𐴠𐴊𐴧𐴠 𐴉𐴟𐴌𐴝 𐴊𐴠𐴔𐴝𐴑𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝, 𐴀𐴝𐴦𐴌 𐴕𐴞𐴎𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝. “²⁸𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴏𐴡𐴥𐴘𐴧𐴞 𐴎𐴟𐴖𐴝𐴁𐴢 𐴊𐴞𐴘𐴡𐴥; 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴡𐴤𐴒𐴡𐴘, 𐴃𐴡𐴥𐴘 𐴃𐴟𐴀𐴛 𐴁𐴝𐴏𐴞𐴁𐴝𐴥.“

²⁹𐴔𐴡𐴕𐴃𐴡𐴌 𐴕𐴞𐴎𐴡𐴌𐴠𐴥 𐴏𐴡𐴥𐴘𐴧𐴞 𐴏𐴝𐴥𐴁𐴟𐴃𐴢 𐴒𐴡𐴌𐴞𐴥𐴁𐴝𐴌 𐴑𐴞𐴥𐴘𐴝𐴓𐴠, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴝𐴣𐴀𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴕𐴟𐴥𐴙𐴐𐴢 𐴇𐴡𐴕؟“

𐴒𐴡𐴔 𐴏𐴝𐴔𐴝𐴥𐴌𐴞

³⁰𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴠𐴑𐴁𐴝𐴌, 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴧𐴟 𐴕𐴞𐴏𐴠 𐴅𐴠𐴌𐴞𐴑𐴡𐴥𐴃𐴢 𐴎𐴝𐴦𐴌, 𐴀𐴝𐴦𐴌 𐴇𐴠𐴥𐴍𐴠 𐴋𐴝𐴈𐴝𐴣𐴙𐴄𐴡𐴌 𐴀𐴝𐴥𐴃𐴡𐴃𐴢 𐴉𐴡𐴙𐴅𐴧𐴠𐴥. 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌 𐴇𐴡𐴦𐴌𐴏𐴟𐴖𐴡𐴌 𐴑𐴟𐴥𐴓𐴞𐴉𐴠𐴓𐴝𐴘 𐴔𐴝𐴌𐴝-𐴊𐴡𐴥𐴌𐴝 𐴒𐴡𐴌𐴞𐴥, 𐴀𐴝𐴊𐴝𐴤 𐴔𐴡𐴌𐴝 𐴉𐴠𐴥𐴓𐴝𐴘 𐴒𐴞𐴦𐴘𐴠𐴥𐴒𐴡𐴘.³¹𐴁𐴝𐴦𐴊𐴠 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴠𐴎𐴧𐴡𐴕 𐴀𐴞𐴔𐴝𐴔 𐴇𐴠𐴥 𐴉𐴡𐴣𐴃𐴢 𐴁𐴝𐴥𐴘 𐴎𐴝𐴦𐴌, 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴊𐴠𐴑𐴞𐴥 𐴉𐴝𐴐𐴈𐴝𐴍𐴞 𐴒𐴞𐴦𐴘𐴡𐴥𐴘.³²𐴇𐴠𐴥𐴕𐴊𐴞𐴓𐴧𐴝, 𐴀𐴠𐴎𐴧𐴡𐴕 𐴓𐴠𐴀𐴜𐴞 𐴘𐴡𐴥 𐴇𐴠𐴥 𐴎𐴝𐴒𐴝𐴃𐴢 𐴀𐴝𐴀𐴘𐴢 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴊𐴠𐴑𐴞𐴥, 𐴉𐴝𐴐𐴈𐴝𐴍𐴞 𐴒𐴞𐴦𐴘𐴡𐴥𐴘.³³𐴓𐴠𐴑𐴞𐴕 𐴀𐴠𐴎𐴧𐴡𐴕 𐴏𐴝𐴔𐴝𐴥𐴌𐴞 𐴏𐴡𐴉𐴡𐴥𐴌 𐴒𐴡𐴙𐴃𐴧𐴠𐴤-𐴒𐴡𐴙𐴃𐴧𐴠𐴤 𐴔𐴝𐴕𐴟𐴥𐴙𐴐𐴧𐴗𐴝𐴌 𐴀𐴞𐴥𐴣𐴘𐴡𐴃𐴢 𐴉𐴡𐴀𐴣𐴙𐴐𐴧𐴠; 𐴀𐴝𐴦𐴌 𐴀𐴞𐴥𐴁𐴝𐴃𐴧𐴟 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴊𐴠𐴑𐴞𐴥 𐴉𐴠𐴄𐴉𐴟𐴙𐴅𐴧𐴠𐴥𐴥.³⁴𐴃𐴡𐴥𐴘 𐴀𐴞𐴥𐴁𐴝 𐴔𐴝𐴕𐴟𐴥𐴙𐴐𐴧𐴗𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢, 𐴘𐴡𐴥𐴒𐴧𐴗𐴝𐴌 𐴎𐴡𐴈𐴡𐴥𐴔 𐴀𐴡𐴥𐴑𐴧𐴡𐴓𐴡𐴃𐴢 𐴃𐴠𐴓𐴢 𐴀𐴠𐴊𐴧𐴠 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴋𐴝𐴥𐴓𐴞𐴊𐴞 𐴉𐴝𐴄𐴧𐴞 𐴁𐴝𐴣𐴊𐴞𐴥𐴊𐴞𐴘𐴠; 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴌𐴠 𐴕𐴞𐴎𐴡𐴌 𐴒𐴝𐴊𐴝𐴤𐴌 𐴖𐴡𐴌𐴠 𐴃𐴟𐴓𐴞𐴤 𐴓𐴡𐴦𐴘𐴢, 𐴀𐴠𐴑𐴧𐴝𐴥𐴕 𐴔𐴟𐴏𐴝𐴥𐴉𐴠𐴌-𐴈𐴝𐴥𐴕𐴝𐴃𐴢 𐴓𐴡𐴘𐴎𐴝𐴘 𐴑𐴠𐴥𐴌𐴔𐴡𐴏𐴢 𐴒𐴡𐴙𐴅𐴧𐴠𐴥.³⁵𐴃𐴝𐴌𐴉𐴡𐴌 𐴊𐴞𐴕 𐴀𐴞𐴥𐴁𐴝𐴘𐴠 𐴊𐴟𐴘 𐴊𐴞𐴕𐴝𐴥𐴌 𐴄𐴞𐴛𐴝 𐴕𐴠𐴦𐴓𐴝𐴘 𐴔𐴟𐴏𐴝𐴥𐴉𐴠𐴌-𐴈𐴝𐴥𐴕𐴝𐴌 𐴒𐴞𐴌𐴡𐴥𐴏𐴡𐴌𐴠 𐴊𐴞𐴦 𐴈𐴡𐴀𐴌 𐴊𐴠, ’𐴘𐴡𐴒𐴧𐴗𐴝𐴥𐴌𐴠 𐴑𐴠𐴥𐴌𐴔𐴡𐴏𐴢 𐴒𐴡𐴌𐴡𐴤; 𐴎𐴡𐴊𐴞 𐴀𐴞𐴀𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴇𐴡𐴥𐴏𐴧𐴝 𐴀𐴡𐴥, 𐴀𐴝𐴀𐴛 𐴀𐴝𐴘𐴓𐴠𐴤 𐴃𐴟𐴣𐴀𐴝𐴥𐴣𐴌𐴠 𐴉𐴟𐴥𐴣𐴎𐴞𐴉𐴠𐴓𐴝𐴘𐴧𐴟𐴔.‘

³⁶”𐴇𐴠𐴥 𐴀𐴞𐴥𐴏𐴝𐴉𐴠, 𐴇𐴠𐴥 𐴃𐴞𐴕𐴞𐴥 𐴎𐴡𐴕 𐴀𐴡𐴃𐴧𐴟, 𐴋𐴝𐴈𐴝𐴣𐴙𐴄𐴡𐴌 𐴀𐴝𐴥𐴃𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴕𐴟𐴥𐴙𐴐𐴢 𐴇𐴡𐴕𐴧𐴗𐴝𐴤 𐴁𐴡𐴥𐴓𐴞 𐴄𐴝𐴥𐴀𐴌𐴡؟“

³⁷𐴀𐴝𐴓𐴠𐴔𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴙𐴅𐴧𐴠𐴥 𐴊𐴠 𐴀𐴞𐴥𐴁𐴝.“
𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴦, 𐴃𐴟𐴀𐴛 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴡𐴤𐴒𐴡𐴘.“

𐴔𐴡𐴌𐴡𐴃𐴝 𐴀𐴠𐴊𐴧𐴠 𐴔𐴡𐴌𐴞𐴘𐴝𐴔 𐴓𐴡𐴘 𐴀𐴞𐴏𐴝𐴤 𐴊𐴡𐴓𐴝 𐴀𐴡𐴥𐴘𐴧𐴠

³⁸𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴎𐴝𐴘𐴃𐴠-𐴎𐴝𐴘𐴃𐴠 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴒𐴡𐴥𐴙𐴓𐴧𐴠; 𐴀𐴝𐴦𐴌 𐴇𐴠𐴥𐴍𐴠 𐴔𐴡𐴌𐴡𐴃𐴝 𐴕𐴝𐴔𐴡𐴌 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝𐴘𐴠 𐴀𐴞𐴥𐴁𐴝𐴌𐴠 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴙𐴅𐴧𐴠𐴥.³⁹𐴇𐴞𐴥𐴁𐴝𐴃𐴧𐴟 𐴔𐴡𐴌𐴞𐴘𐴝𐴔 𐴕𐴝𐴔𐴡𐴌 𐴀𐴠𐴒𐴧𐴗𐴝𐴤 𐴁𐴡𐴥𐴙𐴕 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴔𐴝𐴓𐴞𐴑𐴡𐴌 𐴄𐴠𐴥𐴚𐴡𐴌 𐴒𐴟𐴌𐴝𐴃𐴢 𐴁𐴡𐴀𐴘𐴢 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴉𐴟𐴥𐴕𐴝𐴃𐴢 𐴀𐴝𐴐𐴧𐴞𐴥𐴓𐴢.⁴⁰𐴓𐴠𐴑𐴞𐴕 𐴔𐴡𐴌𐴡𐴃𐴝 𐴔𐴠𐴀𐴔𐴝𐴕 𐴀𐴡𐴥𐴑𐴧𐴡𐴓𐴡𐴓𐴧𐴝 𐴖𐴝𐴀𐴕-𐴘𐴝𐴀𐴕 𐴕𐴝𐴓𐴢 𐴒𐴡𐴙𐴃𐴧𐴠𐴤-𐴒𐴡𐴙𐴃𐴧𐴠𐴤 𐴉𐴠𐴌𐴠𐴐𐴝𐴕 𐴀𐴡𐴥𐴘𐴒𐴞𐴘𐴡𐴘; 𐴇𐴞𐴥𐴁𐴝𐴘𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴃𐴟𐴀𐴛 𐴕𐴡 𐴊𐴠𐴑𐴡𐴥𐴌 𐴕𐴠𐴥, 𐴀𐴝𐴣𐴀𐴌 𐴁𐴡𐴥𐴘𐴕𐴠 𐴇𐴠𐴥𐴊𐴔𐴡𐴃𐴡𐴌 𐴈𐴝𐴔 𐴁𐴠𐴒𐴧𐴟𐴥𐴕 𐴀𐴝𐴀𐴛 𐴀𐴠𐴎𐴧𐴡𐴕𐴡𐴌𐴠 𐴓𐴝𐴒𐴝𐴘𐴊𐴞 𐴃𐴝𐴥𐴙𐴑𐴧𐴠 𐴊𐴠𐴥؟ 𐴇𐴞𐴥𐴁𐴝𐴌𐴠 𐴀𐴝𐴣𐴀𐴌𐴠𐴥 𐴔𐴡𐴊𐴡𐴃𐴢 𐴒𐴡𐴙𐴃𐴧𐴡𐴥 𐴈𐴡𐴀𐴕𐴝.“

⁴¹𐴔𐴝𐴓𐴞𐴑𐴠 𐴇𐴞𐴥𐴁𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴔𐴡𐴌𐴡𐴃𐴝, 𐴔𐴡𐴌𐴡𐴃𐴝, 𐴃𐴟𐴘 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴓𐴡𐴥𐴘 𐴏𐴞𐴕𐴃𐴝𐴁𐴝𐴥𐴉𐴝𐴕𐴝𐴃𐴢 𐴀𐴠𐴊𐴧𐴠 𐴉𐴠𐴌𐴠𐴐𐴝𐴕𐴞𐴃𐴢 𐴀𐴝𐴏𐴡𐴤𐴏𐴢,⁴²𐴓𐴠𐴑𐴞𐴕 𐴀𐴠𐴑𐴧𐴝𐴥𐴕 𐴏𐴞𐴎𐴢 𐴁𐴠 𐴎𐴡𐴌𐴟𐴌𐴞; 𐴔𐴡𐴌𐴞𐴘𐴝𐴔𐴠 𐴇𐴠𐴥 𐴒𐴡𐴔 𐴇𐴞𐴥𐴏𐴧𐴝 𐴒𐴝𐴥𐴕 𐴁𐴝𐴏𐴞𐴥𐴓𐴡𐴘𐴧𐴠 𐴊𐴠, 𐴀𐴝𐴦𐴌 𐴇𐴞𐴥𐴘𐴝𐴕 𐴇𐴞𐴥𐴁𐴝𐴃𐴧𐴟 𐴓𐴡𐴘𐴉𐴠𐴥𐴓𐴝 𐴕𐴡 𐴎𐴝𐴘𐴁𐴡.“

The Word for the World International

https://app.library.bible/content/87faca8b51c22590