Leia 𐴓𐴟𐴑𐴝𐴥𐴏𐴢 24

𐴓𐴟𐴑𐴝𐴥𐴏𐴢24

𐴀𐴞𐴏𐴝𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴒𐴞𐴘𐴡𐴘

¹𐴇𐴝𐴥𐴉𐴃𐴝𐴌 𐴉𐴡𐴀𐴘𐴓𐴝 𐴊𐴞𐴕 𐴁𐴞𐴀𐴕𐴧𐴝 𐴑𐴟𐴥𐴁𐴢 𐴏𐴡𐴥𐴀𐴌𐴠, 𐴁𐴠𐴍𐴞𐴘𐴝𐴥𐴙𐴕 𐴕𐴟𐴥𐴕𐴠 𐴑𐴟𐴥𐴐𐴁𐴡 𐴔𐴡𐴏𐴡𐴥𐴓𐴧𐴝 𐴀𐴟𐴀𐴙𐴕 𐴓𐴡𐴦𐴘𐴢 𐴈𐴡𐴁𐴡𐴌 𐴒𐴗𐴝𐴃𐴢 𐴀𐴝𐴙𐴐𐴧𐴠𐴥 𐴎𐴞𐴀𐴕 𐴀𐴞𐴥𐴃𐴝𐴌𐴝 𐴃𐴡𐴘𐴧𐴝𐴌 𐴒𐴡𐴙𐴅𐴧𐴞𐴥𐴓𐴢.²𐴀𐴞𐴥𐴃𐴝𐴌𐴝 𐴈𐴡𐴁𐴡𐴌𐴡𐴌 𐴔𐴟𐴑𐴡𐴃𐴧𐴟 𐴐𐴞𐴥𐴓𐴢 𐴓𐴝𐴕 𐴓𐴝𐴌𐴞𐴉𐴠𐴓𐴝𐴘𐴧𐴝 𐴓𐴡𐴦𐴃𐴢 𐴉𐴝𐴀𐴙𐴓𐴢,³𐴔𐴡𐴕𐴃𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠 𐴌𐴝𐴥𐴌, 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴓𐴝𐴐𐴢 𐴓𐴡𐴦𐴃𐴢 𐴕𐴡𐴥 𐴉𐴝𐴦.⁴𐴀𐴞𐴥𐴃𐴝𐴌𐴝 𐴀𐴡𐴓𐴎𐴡𐴥𐴓𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴝𐴏𐴞𐴔𐴁𐴞𐴃𐴢 𐴏𐴡𐴏𐴡𐴙𐴑𐴧𐴝 𐴇𐴡𐴦𐴌 𐴉𐴞𐴕𐴊𐴝𐴤 𐴊𐴟𐴖𐴝𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌 𐴋𐴝𐴥𐴑𐴡𐴃𐴧𐴟 𐴃𐴞𐴥𐴘𐴝𐴘𐴧𐴠.⁵𐴁𐴠𐴍𐴞𐴘𐴝𐴥𐴙𐴕 𐴀𐴞𐴥𐴃𐴝𐴌𐴝 𐴋𐴡𐴦𐴌𐴠 𐴔𐴝𐴃𐴝𐴥 𐴇𐴠𐴥𐴔𐴧𐴞𐴑𐴧𐴝 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴎𐴞𐴕𐴊𐴝𐴖𐴝𐴤𐴌𐴠 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴔𐴝𐴥𐴎𐴠 𐴑𐴞𐴘𐴝𐴥 𐴃𐴟𐴖𐴡𐴀𐴌؟⁶𐴀𐴞𐴥𐴁𐴝 𐴀𐴠𐴍𐴠𐴥 𐴕𐴝𐴥𐴘, 𐴀𐴞𐴥𐴁𐴝 𐴎𐴞𐴕𐴊𐴝 𐴀𐴡𐴥𐴘𐴒𐴞𐴘𐴡𐴘. 𐴔𐴡𐴕𐴡𐴃𐴢 𐴒𐴡𐴌𐴡𐴤, 𐴀𐴞𐴥𐴁𐴝𐴘𐴠 𐴒𐴝𐴓𐴞𐴓𐴡𐴃𐴢 𐴃𐴝𐴥𐴑𐴞𐴃𐴠 𐴃𐴟𐴣𐴀𐴝𐴥𐴌𐴝𐴌𐴠 𐴑𐴞𐴦 𐴈𐴡𐴀𐴙𐴓𐴢.⁷𐴈𐴡𐴀𐴙𐴓𐴢 𐴊𐴠, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴝 𐴉𐴡𐴌𐴞𐴁𐴡𐴥, 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴃𐴞𐴕 𐴊𐴞𐴕𐴡𐴃𐴢 𐴊𐴞𐴕 𐴀𐴞𐴥𐴁𐴝𐴃𐴧𐴟 𐴀𐴝𐴁𐴝𐴌 𐴎𐴞𐴕𐴊𐴝 𐴀𐴡𐴥𐴘𐴎𐴝𐴒𐴡𐴘 𐴉𐴡𐴌𐴞𐴁𐴡𐴥.“⁸𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝𐴃𐴧𐴟 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴔𐴡𐴕𐴡𐴃𐴢 𐴀𐴟𐴙𐴄𐴧𐴞𐴥𐴓𐴢.

⁹𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴈𐴡𐴁𐴡𐴌𐴡𐴃𐴧𐴟 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴠𐴒𐴝𐴌𐴡 𐴎𐴡𐴕 𐴕𐴟𐴥𐴕𐴡𐴌𐴠 𐴀𐴠𐴊𐴧𐴠 𐴁𐴝𐴑𐴞 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴎𐴝𐴕𐴝𐴘𐴧𐴠𐴥.¹⁰𐴎𐴠𐴃𐴝𐴌𐴝𐴤 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴇𐴞𐴥𐴀𐴕 𐴎𐴝𐴕𐴝𐴘𐴧𐴠𐴥, 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞, 𐴅𐴡𐴀𐴝𐴕𐴧𐴝, 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌 𐴔𐴝𐴦 𐴔𐴡𐴌𐴞𐴘𐴝𐴔; 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴌𐴡𐴤 𐴁𐴠𐴍𐴞𐴘𐴝𐴥𐴙𐴕 𐴀𐴡𐴥𐴑𐴧𐴡𐴓𐴢 𐴀𐴝𐴐𐴧𐴞𐴥𐴓𐴢.¹¹𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴃𐴧𐴟 𐴇𐴞𐴥𐴀𐴕 𐴀𐴝𐴓𐴄𐴟𐴉𐴝𐴥𐴓𐴄𐴟 𐴈𐴡𐴃𐴝𐴤𐴌 𐴋𐴡𐴥𐴙𐴓𐴢 𐴓𐴝𐴙𐴒𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴁𐴠𐴍𐴞𐴘𐴝𐴥𐴙𐴕 𐴕𐴟𐴥𐴕𐴡𐴌𐴠 𐴁𐴞𐴐𐴧𐴝𐴥𐴐𐴢 𐴕𐴡𐴥 𐴒𐴡𐴌𐴠𐴥.¹²𐴓𐴠𐴑𐴞𐴕 𐴉𐴞𐴃𐴡𐴌 𐴀𐴟𐴍𐴞𐴤 𐴈𐴡𐴁𐴡𐴌𐴡𐴃𐴢 𐴊𐴟𐴣𐴌𐴊𐴞𐴘𐴠𐴥, 𐴀𐴝𐴦𐴌 𐴕𐴞𐴘𐴟𐴥𐴌𐴞 𐴏𐴝𐴘𐴧𐴠𐴥 𐴌𐴝𐴥𐴌 𐴊𐴠𐴑𐴠𐴥𐴌 𐴊𐴠, 𐴏𐴞𐴌𐴞𐴥𐴉𐴢 𐴇𐴡𐴇𐴡𐴥𐴕𐴡𐴌 𐴇𐴡𐴦𐴌 𐴒𐴟𐴥𐴕 𐴁𐴠 𐴀𐴝𐴏𐴠𐴤. 𐴀𐴞𐴥𐴁𐴝𐴘𐴠 𐴇𐴠𐴥 𐴇𐴝𐴥𐴓𐴡𐴃𐴢 𐴊𐴠𐴑𐴞𐴥 𐴃𐴝𐴦𐴅𐴟𐴂𐴢 𐴀𐴡𐴥𐴘, 𐴒𐴡𐴥𐴌𐴡𐴃𐴢 𐴒𐴞𐴦𐴘𐴠𐴥𐴒𐴡𐴘.

𐴀𐴠𐴥𐴔𐴝𐴘𐴟𐴏𐴡𐴌 𐴉𐴡𐴣𐴃𐴡𐴃𐴢 𐴀𐴞𐴏𐴝𐴤𐴘𐴠 𐴊𐴝𐴈𐴝𐴤𐴊𐴞𐴘𐴠

¹³𐴏𐴡𐴀, 𐴇𐴠𐴥 𐴊𐴞𐴕 𐴀𐴞𐴥𐴃𐴝𐴌𐴝𐴃𐴧𐴟 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴀𐴠𐴑𐴧𐴝𐴥𐴕 𐴀𐴠𐴥𐴔𐴝𐴘𐴟𐴏𐴢 𐴕𐴝𐴔𐴡𐴌 𐴉𐴝𐴌𐴝𐴃𐴢 𐴎𐴝𐴦𐴌, 𐴎𐴞𐴘𐴝𐴥𐴕 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴧𐴟 𐴇𐴝𐴥𐴣𐴃𐴢 𐴔𐴝𐴙𐴓𐴢 𐴊𐴟𐴌𐴠𐴥.¹⁴𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠, 𐴎𐴞𐴀𐴕 𐴀𐴡𐴥𐴘𐴧𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴁𐴝𐴦𐴁𐴟𐴃𐴠 𐴒𐴡𐴉𐴝𐴃𐴢 𐴀𐴝𐴐𐴧𐴞𐴥𐴓𐴢.¹⁵𐴀𐴞𐴥𐴃𐴝𐴌𐴝 𐴒𐴡𐴉𐴠𐴌 𐴊𐴠 𐴀𐴠𐴊𐴧𐴠 𐴃𐴡𐴏𐴑𐴝𐴌𐴝 𐴒𐴡𐴌𐴠𐴥𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤 𐴕𐴞𐴎𐴠 𐴋𐴝𐴥𐴑𐴠 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴥𐴣𐴍𐴝𐴃𐴢 𐴊𐴡𐴙𐴅𐴧𐴠.¹⁶𐴓𐴠𐴑𐴞𐴕 𐴀𐴞𐴥𐴃𐴝𐴌𐴝𐴌 𐴏𐴟𐴑𐴡𐴌𐴠 𐴀𐴞𐴥𐴁𐴝𐴌𐴠 𐴏𐴞𐴕𐴞𐴥 𐴕𐴡 𐴉𐴝𐴌𐴠 𐴉𐴝𐴥𐴕 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠.

¹⁷𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴀𐴞𐴀𐴕 𐴑𐴞𐴘𐴡𐴥𐴌 𐴁𐴝𐴦𐴁𐴟𐴃𐴠 𐴒𐴡𐴉𐴡𐴀𐴌 𐴊𐴠𐴥؟“
𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴕𐴝𐴑𐴔𐴟𐴑 𐴇𐴝𐴓𐴝 𐴒𐴡𐴌𐴞𐴥 𐴃𐴞𐴥𐴘𐴝𐴘𐴒𐴞𐴘𐴡𐴘.¹⁸𐴀𐴞𐴥𐴃𐴝𐴌𐴝𐴃𐴧𐴟 𐴎𐴝𐴌 𐴕𐴝𐴔 𐴕𐴞𐴑𐴞 𐴑𐴝𐴓𐴠𐴀𐴡𐴥𐴂𐴝𐴏𐴢, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴉𐴡𐴌𐴁𐴝𐴥𐴐𐴞 𐴏𐴞𐴌𐴞𐴥𐴉𐴢 𐴃𐴟𐴀𐴛 𐴀𐴠𐴎𐴧𐴡𐴕𐴠 𐴕𐴞𐴑𐴞 𐴀𐴠 𐴇𐴡𐴦𐴊𐴧𐴞𐴕𐴡𐴌 𐴁𐴟𐴥𐴃𐴡𐴌𐴠 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴀𐴕 𐴕𐴡 𐴎𐴝𐴕𐴡 𐴊𐴠𐴥؟“

¹⁹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴑𐴞𐴦 𐴀𐴡𐴥𐴘𐴧𐴠 𐴊𐴠𐴥؟“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴏𐴝𐴤 𐴕𐴝𐴏𐴝𐴥𐴌𐴞𐴌 𐴖𐴡𐴌𐴠 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴀𐴕. 𐴀𐴞𐴥𐴁𐴝 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴡𐴌 𐴕𐴡𐴎𐴡𐴌𐴡𐴃𐴢 𐴈𐴝𐴔𐴠 𐴀𐴠𐴊𐴧𐴠 𐴈𐴡𐴃𐴝𐴤𐴁𐴝𐴃𐴧𐴝𐴌𐴝𐴘𐴠 𐴀𐴠𐴒𐴧𐴗𐴝𐴤 𐴃𐴝𐴦𐴑𐴡𐴃𐴖𐴝𐴓𐴝 𐴕𐴡𐴁𐴞 𐴀𐴝𐴐𐴧𐴞𐴥𐴓𐴢.²⁰𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴔𐴡𐴦𐴃𐴡𐴌 𐴏𐴝𐴥𐴣𐴎𐴝𐴓𐴧𐴝 𐴒𐴡𐴏𐴝𐴥𐴘𐴊𐴞𐴘𐴠, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴝 𐴒𐴞𐴥𐴘𐴠.²¹𐴓𐴠𐴑𐴞𐴕 𐴀𐴝𐴣𐴀𐴌𐴝𐴃𐴧𐴟 𐴀𐴝𐴐𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠, 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌𐴠 𐴀𐴞𐴥𐴁𐴝𐴘𐴠 𐴁𐴠 𐴀𐴝𐴎𐴝𐴊𐴢 𐴒𐴡𐴌𐴞𐴥𐴁𐴡. 𐴀𐴝𐴌𐴡𐴤 𐴈𐴡𐴘𐴧𐴟𐴥𐴔 𐴈𐴡𐴘𐴓𐴠𐴥, 𐴀𐴞𐴀𐴕 𐴀𐴡𐴥𐴘𐴧𐴠 𐴊𐴠 𐴀𐴝𐴙𐴅𐴧𐴝 𐴃𐴞𐴕 𐴊𐴞𐴕 𐴀𐴡𐴥𐴘𐴒𐴞𐴘𐴡𐴘.²²𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴃𐴧𐴟 𐴇𐴡𐴦𐴎𐴧𐴡𐴕 𐴁𐴠𐴍𐴞𐴘𐴝𐴥𐴙𐴕 𐴊𐴠 𐴀𐴝𐴣𐴀𐴌𐴝𐴌𐴠 𐴀𐴝𐴔𐴧𐴟𐴥𐴑 𐴒𐴡𐴌𐴞𐴥𐴊𐴞𐴘𐴠. 𐴀𐴞𐴥𐴃𐴝𐴌𐴝 𐴁𐴞𐴀𐴕𐴧𐴝 𐴑𐴟𐴥𐴁𐴢 𐴏𐴡𐴥𐴀𐴌𐴠 𐴈𐴡𐴁𐴡𐴌 𐴒𐴗𐴝𐴃𐴢 𐴒𐴞𐴀𐴓𐴢,²³𐴔𐴡𐴕𐴃𐴡𐴌 𐴀𐴞𐴥𐴁𐴝𐴌 𐴓𐴝𐴐𐴢 𐴓𐴡𐴦𐴃𐴢 𐴕𐴡𐴥 𐴉𐴝𐴦. 𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴈𐴡𐴘𐴧𐴠𐴥𐴒𐴝𐴘 𐴊𐴠, 𐴀𐴞𐴥𐴃𐴝𐴌𐴝𐴌𐴠 𐴉𐴞𐴥𐴌𐴞𐴏𐴃𐴝𐴘𐴠 𐴊𐴝𐴈𐴝𐴤𐴊𐴞𐴘𐴠 𐴀𐴝𐴦𐴌 𐴇𐴞𐴥𐴀𐴕𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴘𐴧𐴠𐴥 𐴊𐴠, 𐴀𐴞𐴥𐴁𐴝 𐴎𐴞𐴕𐴊𐴝 𐴀𐴝𐴏𐴠𐴤.²⁴𐴇𐴠𐴥𐴃𐴟𐴕𐴡𐴃𐴢 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝𐴃𐴧𐴟 𐴇𐴡𐴦𐴎𐴧𐴡𐴕𐴠 𐴈𐴡𐴁𐴡𐴌 𐴒𐴗𐴝𐴃𐴢 𐴒𐴞𐴦𐴘𐴠𐴥 𐴌𐴝𐴥𐴌, 𐴁𐴠𐴍𐴞𐴘𐴝𐴥𐴙𐴕 𐴕𐴟𐴥𐴕𐴠 𐴈𐴡𐴘𐴧𐴠𐴥 𐴊𐴠 𐴔𐴡𐴎𐴞𐴕 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴕𐴡𐴥 𐴊𐴠𐴑𐴠𐴥.“

²⁵𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴠𐴑𐴟𐴉𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴃𐴡 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀𐴘𐴒𐴞𐴘𐴠 𐴊𐴠 𐴈𐴡𐴃𐴝𐴤 𐴁𐴠𐴒𐴧𐴟𐴥𐴕 𐴁𐴞𐴐𐴧𐴝𐴥𐴐𐴢 𐴒𐴡𐴙𐴃𐴧𐴠𐴤 𐴁𐴞𐴐𐴞𐴤 𐴀𐴝𐴏𐴃𐴠𐴤!²⁶𐴔𐴡𐴀𐴏𐴞𐴤𐴃𐴧𐴟 𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝𐴃𐴢 𐴒𐴡𐴥𐴙𐴓𐴃𐴠 𐴊𐴟𐴑 𐴇𐴞𐴥𐴀𐴕 𐴉𐴝𐴦𐴌 𐴑𐴞 𐴎𐴡𐴌𐴟𐴌 𐴕𐴟 𐴀𐴝𐴐𐴧𐴞𐴥𐴓؟“²⁷𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴔𐴟𐴀𐴏𐴝 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴐𐴟𐴥𐴌𐴟 𐴒𐴡𐴌𐴞𐴥, 𐴉𐴟𐴌𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴀𐴞𐴥𐴃𐴝𐴌𐴝𐴌𐴠 𐴁𐴟𐴎𐴝𐴥𐴘𐴊𐴞𐴘𐴠.

²⁸𐴎𐴝𐴘𐴃𐴠-𐴎𐴝𐴘𐴃𐴠 𐴀𐴞𐴥𐴃𐴝𐴌𐴝 𐴎𐴝𐴦𐴌 𐴊𐴠 𐴉𐴝𐴌𐴝𐴌 𐴇𐴝𐴣𐴏𐴝𐴥𐴇𐴝𐴣𐴏𐴞 𐴉𐴡𐴀𐴣𐴙𐴐𐴧𐴠 𐴌𐴝𐴥𐴌; 𐴀𐴞𐴥𐴁𐴝𐴘𐴠 𐴀𐴝𐴌𐴡𐴤 𐴊𐴟𐴌𐴠𐴥 𐴎𐴝𐴦𐴌 𐴉𐴝𐴥𐴕 𐴒𐴡𐴙𐴅𐴧𐴞𐴥𐴓𐴢.²⁹𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴁𐴠𐴐𐴝𐴤𐴁𐴞𐴐𐴞𐴤 𐴀𐴝𐴌𐴡𐴏𐴢 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴘𐴎𐴡𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴝𐴥𐴣𐴎𐴢 𐴀𐴡𐴥𐴘𐴎𐴝𐴌𐴒𐴡𐴘, 𐴀𐴝𐴦𐴌 𐴊𐴞𐴕 𐴉𐴟𐴥𐴌𐴝𐴘𐴧𐴠𐴒𐴝𐴘.“ 𐴃𐴡𐴥𐴘 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞 𐴁𐴡𐴓𐴧𐴝 𐴁𐴟𐴥𐴃𐴡𐴌𐴠 𐴒𐴞𐴦𐴘𐴠𐴥.

³⁰𐴀𐴝𐴦𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥, 𐴀𐴞𐴥𐴁𐴝𐴘𐴠 𐴌𐴟𐴄𐴞 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴁𐴝𐴥𐴚𐴒𐴞 𐴀𐴞𐴥𐴃𐴝𐴌𐴝𐴌𐴠 𐴊𐴞𐴦𐴘𐴠𐴥.³¹𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝𐴌 𐴏𐴟𐴑 𐴑𐴟𐴥𐴓𐴞𐴒𐴞𐴘𐴡𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴏𐴞𐴕𐴧𐴠𐴥; 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴕𐴡𐴎𐴡𐴌𐴡𐴃𐴧𐴟 𐴒𐴝𐴙𐴁𐴢 𐴀𐴡𐴥𐴘𐴒𐴞𐴘𐴡𐴘.³²𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴉𐴡𐴣𐴃𐴡𐴃𐴢 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴀𐴌 𐴀𐴝𐴦𐴌 𐴀𐴝𐴣𐴀𐴌𐴝𐴌𐴠 𐴂𐴝𐴑-𐴑𐴝𐴓𐴝𐴔 𐴁𐴟𐴎𐴝𐴥𐴘 𐴊𐴠𐴌, 𐴇𐴠𐴥𐴣𐴃𐴧𐴠 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌𐴝𐴌 𐴊𐴞𐴓𐴢 𐴎𐴡𐴓𐴝𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴕𐴡 𐴕𐴠𐴥؟“

³³𐴀𐴞𐴥𐴃𐴝𐴌𐴝 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴀𐴟𐴍𐴞𐴤 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴖𐴝𐴦𐴉𐴠𐴏𐴢 𐴀𐴝𐴀𐴘𐴒𐴞𐴘𐴡𐴘, 𐴀𐴝𐴦𐴌 𐴇𐴠𐴥𐴍𐴠 𐴀𐴠𐴒𐴝𐴌𐴡 𐴎𐴡𐴕 𐴕𐴟𐴥𐴕𐴡𐴌𐴠 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴓𐴡𐴦𐴃𐴢 𐴉𐴝𐴘𐴧𐴠𐴥,³⁴𐴀𐴝𐴦𐴌 𐴈𐴡𐴀𐴌 𐴊𐴠, ”𐴔𐴝𐴓𐴞𐴑 𐴏𐴡𐴥𐴘𐴧𐴞 𐴎𐴞𐴕𐴊𐴝 𐴀𐴡𐴥𐴘𐴧𐴠; 𐴀𐴞𐴥𐴁𐴝𐴘𐴠 𐴏𐴝𐴥𐴘𐴔𐴡𐴕𐴡𐴌𐴠 𐴊𐴝𐴈𐴝𐴤𐴊𐴞𐴘𐴠.“

³⁵𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴊𐴟𐴕𐴞𐴥 𐴎𐴡𐴕𐴠 𐴉𐴡𐴣𐴃𐴡𐴃𐴢 𐴑𐴞𐴦 𐴀𐴡𐴥𐴘𐴧𐴠 𐴊𐴠 𐴎𐴝𐴕𐴝𐴘𐴧𐴠𐴥, 𐴀𐴠𐴊𐴧𐴠 𐴀𐴞𐴏𐴝𐴤𐴘𐴠 𐴌𐴟𐴄𐴞 𐴁𐴝𐴥𐴚𐴒𐴞𐴁𐴝𐴌 𐴀𐴡𐴑𐴃𐴡𐴥𐴃𐴢 𐴀𐴞𐴥𐴁𐴝𐴌𐴠 𐴀𐴞𐴥𐴃𐴝𐴌𐴝 𐴑𐴠𐴀𐴕𐴒𐴡𐴌𐴞 𐴏𐴞𐴕𐴧𐴞𐴥𐴓𐴢 𐴊𐴠 𐴇𐴞𐴥𐴘𐴝𐴕 𐴀𐴡𐴥 𐴎𐴝𐴕𐴝𐴘𐴧𐴠𐴥.

𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴝𐴈𐴝𐴤𐴊𐴞𐴘𐴠

³⁶𐴀𐴞𐴥𐴃𐴝𐴌𐴝 𐴇𐴞𐴥𐴀𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤 𐴕𐴞𐴎𐴠 𐴀𐴞𐴥𐴃𐴝𐴌𐴝𐴌 𐴔𐴝𐴎𐴠𐴥 𐴀𐴝𐴀𐴘𐴢 𐴃𐴞𐴥𐴘𐴝𐴘𐴧𐴠, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴝𐴏𐴧𐴝𐴓𐴝𐴔𐴟 𐴀𐴝𐴓𐴝𐴘𐴑𐴟𐴔.“

³⁷𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴋𐴡𐴦𐴌𐴠 𐴃𐴡𐴊𐴧𐴡𐴤 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴥𐴃𐴝𐴌𐴝 𐴄𐴝𐴥𐴀𐴙𐴅𐴧𐴠 𐴊𐴠 𐴁𐴟𐴥𐴃𐴢 𐴊𐴠𐴑𐴠𐴥𐴌 𐴁𐴡𐴥𐴓𐴞.³⁸𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴋𐴡𐴦𐴌𐴡𐴥𐴌 𐴑𐴞𐴘𐴝𐴥؟ 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴐𐴡𐴥𐴀𐴑 𐴑𐴞𐴘𐴝𐴥 𐴀𐴝𐴘𐴧𐴠𐴤𐴌؟³⁹𐴀𐴝𐴣𐴀𐴌 𐴀𐴝𐴥𐴃𐴢 𐴄𐴠𐴥𐴚 𐴏𐴡𐴀, 𐴀𐴞𐴁𐴝𐴤 𐴀𐴝𐴀𐴛. 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞 𐴏𐴡𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴟𐴥𐴃𐴡𐴃𐴧𐴟 𐴃𐴡 𐴒𐴟𐴏𐴧𐴡 𐴀𐴠𐴊𐴧𐴠 𐴀𐴝𐴥𐴣𐴋𐴧𐴞 𐴕𐴝𐴥𐴘, 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴃𐴧𐴟 𐴀𐴝𐴏𐴠𐴤 𐴊𐴠 𐴊𐴠𐴑𐴡𐴥𐴌.“

⁴⁰𐴇𐴞𐴥𐴘𐴝𐴕 𐴈𐴡𐴀𐴘𐴢 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴕𐴞𐴎𐴡𐴌 𐴀𐴝𐴥𐴃𐴢 𐴄𐴠𐴥𐴚 𐴊𐴝𐴈𐴝𐴤𐴘𐴧𐴠.⁴¹𐴀𐴞𐴥𐴃𐴝𐴌𐴝 𐴎𐴠𐴃𐴧𐴡𐴥𐴃𐴢 𐴑𐴟𐴥𐴐𐴞𐴘𐴠 𐴀𐴠𐴊𐴧𐴠 𐴃𐴝𐴦𐴅𐴟𐴂𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴠𐴌, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴝𐴥𐴘 𐴁𐴡𐴓𐴧𐴝 𐴀𐴠𐴍𐴠𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴑𐴠𐴏𐴧𐴟𐴥 𐴀𐴝𐴏𐴠𐴤 𐴕𐴠𐴥؟“⁴²𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴠𐴑 𐴇𐴝𐴥𐴕𐴋𐴝 𐴏𐴞𐴥𐴛𐴝𐴃𐴢 𐴊𐴞𐴥𐴘𐴝 𐴔𐴝𐴏𐴢 𐴊𐴞𐴦𐴘𐴠𐴥.⁴³𐴀𐴝𐴦𐴌 𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴓𐴡𐴦𐴘𐴢 𐴀𐴞𐴥𐴃𐴝𐴌𐴝𐴌 𐴐𐴝𐴥𐴙𐴑𐴧𐴝𐴃𐴢 𐴈𐴝𐴥𐴘𐴧𐴠.

⁴⁴𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴀𐴕 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴈𐴡𐴃𐴝𐴤 𐴎𐴞𐴀𐴕 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠 𐴈𐴡𐴀𐴘𐴓𐴝𐴔, 𐴑𐴞 𐴈𐴡𐴘𐴓𐴠𐴥, 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴎𐴞𐴀𐴕 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴀𐴡𐴃𐴢, 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴢 𐴀𐴡𐴃𐴢, 𐴀𐴠𐴊𐴧𐴠 𐴎𐴡𐴁𐴟𐴌 𐴐𐴡𐴥𐴌𐴞𐴉𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴀𐴡𐴥𐴖𐴝𐴌 𐴎𐴡𐴌𐴟𐴌.“

⁴⁵𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴊𐴠𐴔𐴝𐴑 𐴑𐴟𐴥𐴓𐴞𐴊𐴞𐴘𐴠, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴂𐴝𐴑-𐴑𐴝𐴓𐴝𐴔 𐴁𐴟𐴎𐴞𐴥 𐴉𐴝𐴌𐴠.⁴⁶𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, 𐴔𐴡𐴀𐴏𐴞𐴤𐴘𐴠 𐴊𐴟𐴑 𐴉𐴝𐴘𐴁𐴡 𐴀𐴝𐴦𐴌 𐴃𐴞𐴕 𐴊𐴞𐴕𐴡𐴃𐴢 𐴊𐴞𐴕 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴎𐴝𐴘𐴁𐴡𐴘,⁴⁷𐴁𐴝𐴦𐴊𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴒𐴡𐴌𐴞𐴥 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴞𐴥𐴁𐴝𐴌 𐴕𐴝𐴔𐴠 𐴒𐴟𐴕𐴝𐴤 𐴔𐴝𐴉𐴢 𐴉𐴝𐴘𐴁𐴝𐴌 𐴃𐴡𐴖𐴝𐴥𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴘𐴁𐴡.⁴⁸𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴞𐴀𐴕 𐴁𐴠𐴒𐴧𐴟𐴥𐴕𐴡𐴌 𐴒𐴡𐴁𐴝𐴤.⁴⁹𐴏𐴡𐴀, 𐴀𐴝𐴣𐴀𐴌 𐴁𐴝𐴉𐴡𐴌 𐴖𐴝𐴦𐴊𐴝 𐴒𐴡𐴙𐴅𐴧𐴝𐴥 𐴖𐴝𐴌𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴊𐴞𐴘𐴟𐴔; 𐴓𐴠𐴑𐴞𐴕 𐴀𐴝𐴏𐴔𐴝𐴕𐴡𐴃𐴧𐴟 𐴃𐴝𐴦𐴑𐴡𐴃𐴠 𐴁𐴡𐴥𐴌𐴞 𐴕𐴡𐴥 𐴎𐴡𐴒𐴡𐴘 𐴉𐴡𐴙𐴅𐴧𐴡𐴕𐴃𐴡 𐴀𐴠 𐴐𐴡𐴥𐴀𐴌𐴡𐴃𐴢 𐴃𐴝𐴥𐴙𐴑𐴧𐴡.“

𐴀𐴞𐴏𐴝𐴤𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠

⁵⁰𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴝𐴀𐴌𐴑𐴟𐴓𐴠 𐴁𐴠𐴃𐴝𐴥𐴕𐴞𐴘𐴝𐴌 𐴇𐴠𐴥𐴊𐴧𐴟𐴌 𐴉𐴡𐴙𐴅𐴧𐴡𐴕𐴃𐴡 𐴓𐴡𐴘𐴒𐴞𐴘𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴌 𐴀𐴝𐴥𐴃𐴢 𐴃𐴟𐴓𐴞𐴤 𐴀𐴞𐴥𐴃𐴝𐴌𐴝𐴌𐴠 𐴁𐴡𐴌𐴈𐴡𐴃𐴢 𐴊𐴞𐴘𐴠𐴥.⁵¹𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴡𐴌𐴈𐴡𐴃𐴢 𐴊𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴓𐴡𐴑 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠.⁵²𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴌𐴞𐴥 𐴁𐴝𐴦𐴊𐴠, 𐴁𐴞𐴐𐴞𐴤 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴖𐴝𐴦𐴉𐴠𐴏𐴢 𐴀𐴝𐴀𐴘𐴒𐴞𐴘𐴡𐴘,⁵³𐴀𐴝𐴦𐴌 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴇𐴝𐴥𐴎𐴞𐴌 𐴃𐴝𐴥𐴑𐴞 𐴓𐴝𐴒𐴝𐴃𐴝𐴌 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590