Read 𐴓𐴟𐴑𐴝𐴥𐴏𐴢 23

𐴓𐴟𐴑𐴝𐴥𐴏𐴢23

𐴉𐴞𐴓𐴝𐴃𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤

¹𐴃𐴝𐴌𐴉𐴡𐴌𐴠 𐴔𐴟𐴅𐴞𐴓𐴞𐴥𐴐𐴢 𐴄𐴞𐴥𐴘𐴝 𐴀𐴟𐴍𐴞𐴤 𐴀𐴞𐴏𐴝𐴤𐴌𐴠 𐴉𐴞𐴓𐴝𐴃𐴡𐴌 𐴇𐴝𐴣𐴏𐴠 𐴓𐴡𐴘𐴒𐴞𐴘𐴠𐴥.²𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴠𐴕𐴊𐴞𐴓𐴧𐴝 𐴀𐴠𐴓𐴎𐴝𐴔 𐴀𐴡𐴥𐴑𐴧𐴡𐴓𐴢 𐴓𐴝𐴒𐴝𐴃𐴢 𐴊𐴡𐴙𐴅𐴧𐴠, ”𐴀𐴝𐴣𐴀𐴌𐴝 𐴓𐴡𐴦𐴃𐴢 𐴉𐴝𐴘𐴧𐴞𐴥 𐴊𐴠, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴝𐴣𐴀𐴌𐴝𐴌 𐴑𐴡𐴗𐴔𐴡𐴌𐴠 𐴒𐴟𐴔𐴌𐴝𐴤 𐴒𐴡𐴌𐴞𐴥𐴉𐴠𐴓𐴠𐴌. 𐴀𐴞𐴁𐴝𐴤𐴘𐴠 𐴌𐴡𐴔𐴞 𐴁𐴝𐴀𐴣𐴐𐴧𐴝𐴌𐴠 𐴇𐴝𐴥𐴎𐴝𐴕𐴝 𐴕𐴡 𐴊𐴞𐴦𐴃𐴡 𐴔𐴝𐴕𐴝𐴥 𐴒𐴡𐴌𐴠𐴥, 𐴀𐴠𐴊𐴧𐴠 𐴊𐴝𐴁𐴞 𐴒𐴡𐴌𐴠𐴥 𐴊𐴠 𐴑𐴞 𐴀𐴞𐴥𐴁𐴝 𐴕𐴞𐴎𐴠 𐴔𐴡𐴀𐴏𐴞𐴤, 𐴁𐴝𐴀𐴣𐴐𐴧𐴝.“

³𐴉𐴞𐴓𐴝𐴃𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝 𐴕𐴞𐴥𐴑𐴞؟“
𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴡𐴥𐴘, 𐴃𐴟𐴀𐴛 𐴈𐴡𐴀𐴌 𐴊𐴠 𐴇𐴠𐴥𐴕𐴊𐴞𐴓𐴧𐴝.“

⁴𐴃𐴡𐴥𐴘 𐴉𐴞𐴓𐴝𐴃𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴔𐴟𐴥𐴕𐴡𐴌𐴠 𐴀𐴠𐴊𐴧𐴠 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴃𐴧𐴟 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡 𐴉𐴝𐴙𐴌.“

⁵𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴞𐴃𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴉𐴟𐴌𐴝 𐴘𐴡𐴇𐴟𐴥𐴊𐴞𐴘𐴝𐴃𐴢 𐴃𐴝𐴦𐴓𐴞𐴔 𐴊𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴟𐴏𐴑𐴝𐴘 𐴊𐴠𐴌. 𐴀𐴞𐴁𐴝𐴤𐴘𐴠 𐴇𐴠𐴥𐴕𐴊𐴞𐴓𐴧𐴝 𐴒𐴝𐴓𐴞𐴓𐴡𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴒𐴡𐴌𐴞𐴥 𐴀𐴠 𐴎𐴝𐴒𐴝𐴃𐴢 𐴉𐴡𐴙𐴅𐴧𐴡𐴕𐴃𐴡 𐴀𐴝𐴙𐴐𐴧𐴠𐴥 𐴊𐴠.“

𐴈𐴠𐴥𐴌𐴟𐴊𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤

⁶𐴉𐴞𐴓𐴝𐴃𐴠 𐴇𐴞𐴥𐴘𐴝𐴕 𐴉𐴟𐴥𐴙𐴕𐴧𐴠 𐴌𐴝𐴥𐴌, 𐴔𐴝𐴕𐴟𐴥𐴙𐴐𐴢 𐴀𐴞𐴁𐴝𐴤 𐴒𐴝𐴓𐴞𐴓𐴡𐴌 𐴕𐴞𐴑𐴞 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥.⁷𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤 𐴎𐴠𐴃𐴧𐴡𐴥𐴃𐴢 𐴈𐴠𐴥𐴌𐴟𐴊𐴡𐴌 𐴀𐴠𐴓𐴝𐴑𐴝𐴌 𐴔𐴝𐴕𐴟𐴥𐴙𐴐𐴢 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌𐴠 𐴈𐴠𐴥𐴌𐴟𐴊𐴡𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴘𐴊𐴞𐴘𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴀𐴡𐴑𐴃𐴡𐴥𐴃𐴢 𐴈𐴠𐴥𐴌𐴟𐴊𐴢 𐴀𐴡𐴥 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴐𐴧𐴞𐴥𐴓𐴢.

⁸𐴈𐴠𐴥𐴌𐴟𐴊𐴠 𐴀𐴞𐴏𐴝𐴤𐴌𐴠 𐴊𐴠𐴑𐴞𐴥 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴁𐴞𐴐𐴞𐴤 𐴊𐴠𐴌𐴞 𐴓𐴡𐴥𐴃𐴞 𐴀𐴞𐴥𐴁𐴝𐴌𐴠 𐴊𐴠𐴑𐴞𐴥 𐴁𐴡𐴓𐴧𐴝 𐴀𐴝𐴎𐴧𐴟 𐴒𐴡𐴌𐴞𐴥 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴞𐴓𐴢 𐴊𐴠 𐴇𐴞𐴥𐴘𐴝𐴓𐴝 𐴓𐴡𐴥𐴃𐴞 𐴀𐴞𐴥𐴁𐴝𐴃𐴧𐴟 𐴑𐴠𐴏𐴧𐴟𐴥 𐴑𐴠𐴌𐴝𐴔𐴡𐴃𐴢 𐴏𐴝𐴘 𐴁𐴡𐴓𐴧𐴝 𐴀𐴝𐴐𐴝𐴤 𐴒𐴡𐴙𐴅𐴧𐴞𐴥𐴓𐴢.⁹𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴁𐴡𐴀𐴗𐴃𐴢 𐴏𐴟𐴥𐴖𐴝𐴓𐴝-𐴏𐴟𐴥𐴖𐴝𐴓𐴞 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴇𐴡𐴕𐴡𐴤 𐴎𐴟𐴖𐴝𐴁𐴢 𐴕𐴡𐴥 𐴊𐴠.¹⁰𐴋𐴡𐴣𐴀𐴌 𐴀𐴞𐴔𐴝𐴔 𐴔𐴟𐴥𐴕𐴠 𐴀𐴠𐴊𐴧𐴠 𐴀𐴝𐴓𐴠𐴔 𐴔𐴟𐴥𐴕𐴠 𐴇𐴠𐴥𐴍𐴠 𐴃𐴞𐴥𐴘𐴝𐴘 𐴎𐴟𐴌𐴠𐴏𐴟𐴥𐴌𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝𐴃𐴢 𐴀𐴝𐴐𐴧𐴞𐴥𐴓𐴢.¹¹𐴃𐴝𐴌𐴉𐴡𐴌𐴠 𐴈𐴠𐴥𐴌𐴟𐴊𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴁𐴠𐴀𐴞𐴎𐴧𐴡𐴃𐴞 𐴀𐴠𐴊𐴧𐴠 𐴄𐴝𐴥𐴃𐴄𐴝𐴘 𐴒𐴡𐴙𐴅𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴏𐴡𐴏𐴡𐴙𐴑𐴧𐴝 𐴀𐴠𐴒𐴧𐴗𐴝𐴤 𐴎𐴟𐴁𐴧𐴝 𐴉𐴞𐴣𐴊𐴝𐴥𐴘 𐴉𐴞𐴓𐴝𐴃𐴡𐴌 𐴇𐴝𐴣𐴏𐴠 𐴖𐴝𐴦𐴉𐴠𐴏𐴢 𐴊𐴞𐴉𐴠𐴍𐴝𐴥𐴘𐴊𐴞𐴘𐴠.¹²𐴇𐴠𐴥 𐴊𐴞𐴕 𐴉𐴞𐴓𐴝𐴃𐴢 𐴀𐴠𐴊𐴧𐴠 𐴈𐴠𐴥𐴌𐴟𐴊𐴢 𐴊𐴟𐴏𐴃𐴡𐴥 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴒𐴠 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕 𐴊𐴟𐴐𐴧𐴡𐴕 𐴀𐴝𐴐𐴧𐴞𐴥𐴓𐴢.

𐴀𐴞𐴏𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴇𐴡𐴥𐴑𐴟𐴔

¹³𐴉𐴞𐴓𐴝𐴃𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠, 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝𐴘 𐴎𐴡𐴔𐴝 𐴒𐴡𐴙𐴅𐴧𐴠𐴥,¹⁴𐴃𐴡𐴥𐴘 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴙𐴕𐴧𐴡𐴤 𐴊𐴠, 𐴀𐴞𐴁𐴝𐴤𐴘𐴠 𐴔𐴝𐴙𐴕𐴐𐴡𐴥𐴌𐴠 𐴁𐴝𐴒𐴞 𐴁𐴡𐴕𐴞 𐴁𐴡𐴓𐴧𐴝 𐴀𐴟𐴏𐴑𐴝𐴘 𐴊𐴠𐴌 𐴈𐴡𐴀𐴘𐴢. 𐴔𐴡𐴕𐴃𐴡𐴌 𐴏𐴡𐴀, 𐴀𐴝𐴀𐴛 𐴀𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝𐴌 𐴐𐴝𐴥𐴙𐴑𐴧𐴝𐴃𐴢 𐴎𐴠𐴌𐴝𐴥 𐴒𐴡𐴙𐴅𐴧𐴞𐴥, 𐴃𐴟𐴣𐴀𐴝𐴥𐴌𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴖𐴡𐴌𐴠 𐴎𐴞𐴀𐴕 𐴀𐴠𐴓𐴎𐴝𐴔 𐴓𐴝𐴒𐴡𐴀𐴌, 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴀𐴞𐴁𐴝𐴤𐴃𐴧𐴟 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡 𐴉𐴝𐴙𐴌.¹⁵𐴈𐴠𐴥𐴌𐴟𐴊𐴠 𐴘𐴡𐴥 𐴕𐴡𐴥 𐴉𐴝𐴦, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴀𐴞𐴁𐴝𐴤𐴌𐴠 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴖𐴝𐴦𐴉𐴠𐴏𐴢 𐴊𐴞𐴉𐴠𐴍𐴝𐴥𐴘𐴊𐴞𐴘𐴠 𐴊𐴠; 𐴃𐴟𐴣𐴀𐴝𐴥𐴌𐴝 𐴊𐴠𐴑𐴡𐴥𐴌, 𐴔𐴡𐴦𐴃𐴡𐴌 𐴓𐴝𐴦𐴘𐴠𐴑 𐴀𐴞𐴁𐴝𐴤𐴘𐴠 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴡𐴥 𐴒𐴡𐴌𐴠𐴥.¹⁶𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴀𐴞𐴁𐴝𐴤𐴌𐴠 𐴏𐴝𐴥𐴣𐴎𐴝 𐴊𐴞𐴥 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴟𐴔.“¹⁷𐴘𐴡𐴥𐴒𐴧𐴗𐴝𐴃𐴧𐴟 𐴉𐴡𐴃𐴧𐴞𐴥 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴊𐴞𐴕 𐴇𐴡𐴕𐴡𐴤 𐴀𐴠𐴑 𐴇𐴡𐴊𐴞𐴌𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝 𐴉𐴡𐴙𐴃𐴧𐴡.

¹⁸𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴡, 𐴁𐴝𐴥𐴌𐴝𐴁𐴧𐴝𐴌𐴠 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴡.“¹⁹𐴁𐴝𐴥𐴌𐴝𐴁𐴧𐴝𐴌𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴝 𐴒𐴞𐴀𐴓𐴢 𐴊𐴠, 𐴀𐴞𐴥𐴃𐴠 𐴐𐴡𐴥𐴀𐴌𐴡𐴃𐴢 𐴁𐴝𐴒𐴞𐴘𐴝𐴘 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴠𐴊𐴧𐴠 𐴑𐴟𐴥𐴕 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝.

²⁰𐴉𐴞𐴓𐴝𐴃𐴠 𐴀𐴞𐴏𐴝𐴤𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴁𐴝𐴌 𐴕𐴞𐴘𐴡𐴃𐴠, 𐴀𐴞𐴥𐴃𐴝𐴌𐴝𐴌𐴠 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴈𐴡𐴃𐴝𐴤 𐴀𐴝𐴁𐴝𐴌 𐴈𐴡𐴀𐴙𐴓𐴢.²¹𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢, ”𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴡, 𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴡!“

²²𐴉𐴞𐴓𐴝𐴃𐴠 𐴃𐴞𐴏𐴝𐴥𐴌𐴝𐴁𐴝𐴌 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴑𐴞𐴘𐴝𐴥, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴑𐴞𐴦 𐴁𐴟𐴌𐴝 𐴒𐴡𐴙𐴅𐴧𐴠𐴥 𐴊𐴠𐴥؟ 𐴀𐴝𐴀𐴛 𐴃𐴡 𐴀𐴞𐴁𐴝𐴤𐴃𐴧𐴟 𐴔𐴡𐴌𐴝 𐴉𐴡𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡𐴥 𐴉𐴝𐴘; 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴀𐴞𐴁𐴝𐴤𐴌𐴠 𐴏𐴝𐴥𐴣𐴎𐴝 𐴊𐴞𐴥 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴟𐴔.“

²³𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴞𐴃𐴢 𐴒𐴡𐴌𐴞𐴥 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴊𐴝𐴁𐴞 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴑𐴞, 𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴎𐴝𐴥𐴘 𐴁𐴡𐴓𐴧𐴝. 𐴀𐴝𐴦𐴌 𐴀𐴝𐴇𐴠𐴥𐴌𐴞𐴃𐴢 𐴀𐴞𐴥𐴃𐴝𐴌𐴝𐴌 𐴒𐴟𐴎𐴡𐴌𐴝 𐴑𐴝𐴦𐴔𐴞𐴘𐴝𐴁𐴢 𐴀𐴡𐴥𐴘𐴧𐴠.²⁴𐴃𐴡𐴥𐴘 𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴌 𐴊𐴝𐴁𐴞 𐴔𐴡𐴎𐴞𐴕 𐴒𐴡𐴌𐴝𐴥 𐴎𐴝𐴥𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴘𐴠.²⁵𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝 𐴔𐴝𐴙𐴒𐴧𐴞𐴥𐴓𐴢 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴠, 𐴎𐴞𐴁𐴝𐴤𐴌𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴝 𐴒𐴞𐴀𐴓𐴢 𐴊𐴠, 𐴁𐴝𐴒𐴞𐴘𐴝𐴘 𐴀𐴠𐴊𐴧𐴠 𐴑𐴟𐴥𐴕 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝; 𐴔𐴡𐴕𐴃𐴡𐴌 𐴀𐴞𐴏𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴝𐴥 𐴎𐴝𐴥𐴘 𐴁𐴡𐴓𐴧𐴝 𐴒𐴡𐴏𐴝𐴥𐴘 𐴊𐴞𐴥𐴉𐴠𐴓𐴝𐴘𐴧𐴠.

𐴀𐴞𐴏𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴝𐴘𐴧𐴠

²⁶𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴓𐴡𐴘𐴎𐴝𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴃𐴝𐴌𐴝 𐴑𐴟𐴌𐴠𐴕𐴞 𐴐𐴡𐴥𐴀𐴌𐴡𐴌 𐴏𐴝𐴥𐴘𐴔𐴡𐴕 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌𐴠 𐴒𐴝𐴚 𐴎𐴝𐴒𐴝𐴃𐴧𐴟 𐴀𐴝𐴘𐴧𐴠𐴤𐴌 𐴊𐴠 𐴇𐴠𐴥𐴍𐴠 𐴊𐴡𐴥𐴌𐴞𐴉𐴠𐴓𐴝𐴘𐴧𐴠, 𐴊𐴡𐴥𐴌𐴞 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴑𐴟𐴥𐴌𐴟𐴐𐴢 𐴐𐴝𐴕 𐴃𐴟𐴓𐴞𐴤𐴊𐴞𐴘𐴠, 𐴇𐴞𐴥𐴘𐴝𐴕 𐴀𐴞𐴏𐴝𐴤𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴁𐴡𐴀𐴘𐴢 𐴓𐴡𐴘𐴎𐴝𐴘 𐴁𐴡𐴓𐴧𐴝.²⁷𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴞𐴏𐴝𐴤𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴁𐴡𐴀𐴗𐴃𐴢 𐴁𐴠𐴍𐴞𐴘𐴝𐴥𐴙𐴕 𐴀𐴡𐴥 𐴀𐴝𐴐𐴧𐴞𐴥𐴓𐴢 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴓𐴧𐴝 𐴁𐴟𐴑 𐴑𐴞𐴓𐴝𐴘-𐴑𐴞𐴓𐴝𐴘 𐴈𐴝𐴣𐴊𐴝𐴃𐴢 𐴀𐴝𐴐𐴧𐴞𐴥𐴓𐴢.²⁸𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌 𐴇𐴞𐴥𐴑𐴧𐴝 𐴉𐴞𐴥𐴌𐴞 𐴈𐴡𐴀𐴌 𐴊𐴠, ”𐴀𐴡𐴥 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴔𐴝𐴘𐴝𐴉𐴟𐴀𐴝𐴙𐴕, 𐴀𐴝𐴣𐴀𐴌 𐴓𐴧𐴝 𐴕𐴡 𐴈𐴝𐴣𐴊𐴞𐴘𐴡𐴥, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴓𐴧𐴝 𐴀𐴠𐴊𐴧𐴠 𐴕𐴞𐴎𐴡𐴌 𐴉𐴟𐴀𐴝𐴙𐴕 𐴊𐴡𐴌 𐴓𐴧𐴝 𐴈𐴝𐴣𐴊𐴡.²⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴏𐴡𐴀, 𐴀𐴠𐴀𐴕 𐴊𐴞𐴕 𐴀𐴝𐴘𐴧𐴠𐴤𐴌, 𐴎𐴠 𐴊𐴞𐴕 𐴔𐴝𐴙𐴕𐴐𐴠𐴥 𐴈𐴡𐴘𐴁𐴡𐴤 𐴊𐴠, ’𐴔𐴟𐴁𐴝𐴌𐴠𐴑 𐴁𐴝𐴥𐴎𐴢 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴝𐴌𐴝𐴤𐴃𐴧𐴟 𐴇𐴡𐴕𐴡𐴤𐴊𐴞𐴕 𐴉𐴟𐴀𐴝𐴙𐴕 𐴕𐴡𐴥 𐴀𐴡𐴥𐴘𐴧𐴡, 𐴎𐴠𐴃𐴝𐴌𐴝𐴤 𐴇𐴡𐴕𐴡𐴤𐴊𐴞𐴕 𐴁𐴟𐴑𐴡𐴌 𐴊𐴟𐴊𐴢 𐴕𐴡𐴥 𐴈𐴝𐴥𐴀𐴁𐴝.‘³⁰𐴇𐴠𐴥𐴣𐴃𐴧𐴠 𐴔𐴝𐴙𐴕𐴐𐴠𐴥 𐴔𐴟𐴌𐴝𐴤 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴘𐴁𐴡𐴤 𐴊𐴠, ’𐴀𐴝𐴣𐴀𐴌𐴝𐴌 𐴖𐴡𐴌𐴠 𐴉𐴡𐴌,‘ 𐴀𐴝𐴦𐴌 𐴉𐴝𐴀𐴌 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴘𐴁𐴡𐴤 𐴊𐴠, ’𐴀𐴝𐴣𐴀𐴌𐴝𐴌𐴠 𐴎𐴝𐴥𐴉𐴝𐴘𐴉𐴠𐴓𐴢.‘ ³¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴠 𐴊𐴝𐴌𐴒𐴗𐴝𐴤 𐴑𐴠𐴦𐴣𐴏𐴝 𐴃𐴝𐴥𐴑𐴞𐴃𐴠 𐴎𐴡𐴊𐴞 𐴀𐴠𐴕𐴊𐴞𐴓𐴧𐴝 𐴒𐴡𐴌𐴠𐴥, 𐴉𐴟𐴥𐴖𐴝𐴘𐴓𐴠 𐴑𐴞𐴦 𐴕𐴡 𐴒𐴡𐴌𐴞𐴥𐴁𐴡 𐴊𐴠 𐴀𐴝𐴏𐴠𐴤؟“

³²𐴀𐴞𐴥𐴃𐴝𐴌𐴝 𐴀𐴡𐴙𐴕𐴧𐴡 𐴊𐴟𐴘 𐴎𐴡𐴕 𐴀𐴝𐴐𐴝𐴥𐴔𐴞𐴌𐴠 𐴘𐴡𐴥 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴓𐴡𐴘𐴎𐴝𐴌.³³𐴀𐴞𐴥𐴃𐴝𐴌𐴝 𐴎𐴠𐴣𐴃𐴧𐴠𐴥 𐴔𐴝𐴃𐴝𐴥𐴌 𐴔𐴝𐴓𐴝 𐴈𐴡𐴀 𐴊𐴠 𐴎𐴝𐴒𐴝 𐴇𐴞𐴥𐴘𐴝𐴕𐴡𐴃𐴢 𐴉𐴡𐴀𐴣𐴙𐴐𐴧𐴠, 𐴇𐴠𐴥𐴍𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴠𐴊𐴧𐴠 𐴇𐴠𐴥 𐴀𐴝𐴐𐴝𐴥𐴔𐴞 𐴒𐴟𐴥𐴕𐴡𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴘𐴠, 𐴀𐴠𐴎𐴧𐴡𐴕𐴡𐴌𐴠 𐴀𐴞𐴥𐴁𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴀𐴠𐴊𐴧𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴀𐴞𐴥𐴁𐴝𐴌 𐴁𐴝𐴕 𐴋𐴝𐴥𐴑 𐴀𐴡𐴃𐴧𐴟.³⁴𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴉𐴢, 𐴀𐴞𐴃𐴝𐴌𐴝𐴤𐴌𐴠 𐴔𐴝𐴉𐴢 𐴒𐴡𐴌𐴡𐴤; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴃𐴝𐴌𐴝𐴤 𐴑𐴞𐴦 𐴒𐴡𐴌𐴠𐴥𐴌 𐴊𐴠 𐴇𐴞𐴥𐴘𐴝𐴕 𐴀𐴞𐴃𐴝𐴌𐴝𐴤 𐴕𐴡 𐴎𐴝𐴕𐴠.“
𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴓𐴡𐴄𐴝𐴥𐴌𐴞 𐴔𐴝𐴌𐴞 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴀𐴞𐴥𐴁𐴝𐴌 𐴇𐴡𐴦𐴌𐴏𐴟𐴖𐴡𐴌𐴡𐴌𐴠 𐴁𐴝𐴥𐴑 𐴒𐴡𐴙𐴅𐴧𐴠𐴥.

³⁵𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴃𐴞𐴥𐴘𐴝𐴘 𐴏𐴝𐴀𐴘𐴢 𐴃𐴝𐴥𐴙𐴑𐴧𐴞𐴓𐴢. 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴀𐴞𐴥𐴁𐴝𐴌𐴠 𐴄𐴝𐴥𐴃𐴄𐴝𐴘 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴃𐴡 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴁𐴝𐴏𐴝𐴘𐴃𐴡𐴥; 𐴎𐴡𐴊𐴞 𐴀𐴞𐴁𐴝𐴤 𐴀𐴝𐴓𐴧𐴝𐴌 𐴁𐴝𐴙𐴐𐴧𐴝𐴥 𐴔𐴡𐴀𐴏𐴞𐴤 𐴖𐴝 𐴊𐴠 𐴀𐴡𐴥𐴘𐴓𐴠, 𐴘𐴝𐴓𐴝 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴁𐴝𐴏𐴡𐴗𐴑 𐴏𐴝𐴥𐴘.“

³⁶𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴋𐴝𐴥𐴑𐴠 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴄𐴝𐴥𐴃𐴄𐴝𐴘 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴇𐴝𐴥𐴘 𐴁𐴡𐴓𐴧𐴝 𐴏𐴞𐴥𐴌𐴑𐴝 𐴊𐴞𐴦³⁷𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴘 𐴘𐴡𐴇𐴟𐴥𐴊𐴞𐴌 𐴁𐴝𐴀𐴣𐴐𐴧𐴝 𐴊𐴠 𐴀𐴡𐴥𐴘𐴓𐴠, 𐴘𐴝𐴓𐴝 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴁𐴝𐴏𐴝 𐴏𐴝𐴥𐴘!“

³⁸𐴀𐴞𐴥𐴁𐴝𐴌 𐴔𐴝𐴃𐴝𐴥𐴌 𐴖𐴡𐴃𐴧𐴟𐴥 𐴀𐴠𐴑𐴧𐴝𐴥𐴕 𐴏𐴝𐴥𐴙𐴕𐴁𐴟𐴥𐴄𐴢 𐴀𐴡𐴥 𐴔𐴝𐴌𐴞𐴊𐴞𐴀𐴓𐴢, 𐴎𐴞𐴘𐴝𐴥𐴕𐴡𐴃𐴢 𐴓𐴠𐴙𐴑𐴧𐴠𐴥 𐴊𐴠, ” 𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝.“

³⁹𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴘𐴝 𐴒𐴞𐴘𐴠𐴥 𐴊𐴠 𐴀𐴝𐴐𐴝𐴥𐴔𐴞𐴃𐴧𐴟 𐴀𐴠𐴎𐴧𐴡𐴕𐴠 𐴀𐴞𐴥𐴁𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴃𐴟𐴘 𐴑𐴞 𐴔𐴡𐴀𐴏𐴞𐴤 𐴕𐴡؟ 𐴕𐴞𐴎𐴡𐴌𐴠𐴥 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌𐴠 𐴁𐴝𐴏𐴝 𐴏𐴠𐴕𐴝𐴥.“

⁴⁰𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴀𐴝𐴐𐴝𐴥𐴔𐴞 𐴖𐴝𐴘𐴠 𐴀𐴞𐴥𐴃𐴝𐴌𐴠 𐴅𐴠𐴥𐴅𐴧𐴠𐴍𐴝𐴘 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴘 𐴑𐴞 𐴀𐴝𐴓𐴧𐴝𐴌𐴠 𐴀𐴟𐴥𐴊𐴧𐴗𐴝 𐴕𐴡 𐴋𐴡𐴦𐴌𐴡𐴏؟ 𐴃𐴟𐴘 𐴘𐴡𐴥 𐴊𐴠 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴏𐴝𐴥𐴣𐴎𐴝 𐴉𐴡𐴀𐴌.⁴¹𐴁𐴠𐴐𐴡𐴥𐴑 𐴀𐴝𐴣𐴀𐴌𐴝𐴌 𐴏𐴝𐴥𐴣𐴎𐴝 𐴇𐴡𐴥𐴑𐴧𐴡𐴃𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴕𐴞𐴎𐴡𐴌 𐴈𐴝𐴔𐴡𐴓𐴧𐴝 𐴎𐴞𐴘𐴝𐴥𐴕 𐴓𐴝𐴦𐴘𐴠𐴑 𐴇𐴞𐴥𐴘𐴝𐴕 𐴉𐴝𐴙𐴌 𐴊𐴠, 𐴓𐴠𐴑𐴞𐴕 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴃𐴡 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡𐴥 𐴒𐴡𐴌𐴠𐴥.“

⁴²𐴃𐴝𐴌𐴉𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴞𐴏𐴝𐴤, 𐴃𐴟𐴀𐴛 𐴕𐴞𐴎𐴡𐴌 𐴌𐴝𐴙𐴅𐴧𐴡𐴃𐴢 𐴀𐴝𐴘𐴁𐴝𐴤 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴝𐴣𐴀𐴌𐴠𐴥 𐴘𐴝𐴦𐴊𐴢 𐴌𐴝𐴙𐴑𐴧𐴡𐴥.“

⁴³𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴝𐴙𐴅𐴧𐴝 𐴃𐴟𐴀𐴛 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴅𐴡𐴕𐴧𐴡𐴃𐴟𐴓𐴢-𐴉𐴠𐴥𐴌𐴡𐴊𐴟𐴏𐴡𐴃𐴢 𐴀𐴡𐴥𐴘𐴁𐴝.“

𐴀𐴞𐴏𐴝𐴤𐴌 𐴔𐴡𐴦𐴃𐴢

⁴⁴𐴇𐴠𐴥𐴣𐴃𐴧𐴠 𐴊𐴟𐴀𐴣𐴙𐴅𐴧𐴝𐴌 𐴁𐴝𐴌𐴡𐴥 𐴖𐴝 𐴀𐴝𐴥𐴕𐴞𐴑 𐴁𐴝𐴙𐴅𐴧𐴠𐴥, 𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴃𐴞𐴕 𐴕𐴗𐴝𐴥 𐴁𐴝𐴥𐴎𐴠 𐴉𐴝𐴥𐴕 𐴒𐴟𐴣𐴍𐴝 𐴔𐴟𐴓𐴧𐴟𐴑 𐴀𐴝𐴕𐴊𐴝𐴤𐴌 𐴀𐴡𐴥𐴘 𐴀𐴝𐴐𐴧𐴞𐴥𐴓𐴢,⁴⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴘𐴓𐴠 𐴉𐴡𐴀𐴌 𐴊𐴞𐴥𐴘𐴝 𐴁𐴡𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠; 𐴀𐴝𐴦𐴌 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴉𐴡𐴌𐴡𐴊𐴝 𐴒𐴝𐴥𐴕 𐴉𐴝𐴥𐴍𐴞 𐴊𐴟𐴘 𐴁𐴝𐴥𐴑 𐴀𐴡𐴥𐴘𐴒𐴞𐴘𐴡𐴘.⁴⁶𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴉𐴢, 𐴃𐴟𐴣𐴀𐴝𐴥𐴣𐴌 𐴀𐴝𐴥𐴃𐴡𐴃𐴢 𐴀𐴝𐴣𐴀𐴌 𐴌𐴟𐴀 𐴒𐴡𐴏𐴝𐴥𐴘𐴊𐴞𐴘𐴞.“ 𐴇𐴞𐴥𐴘𐴝𐴕 𐴈𐴡𐴀𐴘𐴢 𐴁𐴝𐴦𐴊𐴠 𐴀𐴞𐴥𐴁𐴝 𐴀𐴠𐴕𐴃𐴠𐴇𐴝𐴓𐴢 𐴀𐴡𐴥𐴘𐴒𐴞𐴘𐴡𐴘.

⁴⁷𐴎𐴞𐴘𐴝𐴥𐴕 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴌𐴡𐴔𐴞 𐴐𐴝𐴥𐴀𐴂𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴁𐴠𐴈𐴡𐴏𐴟𐴥𐴌 𐴀𐴝𐴐𐴧𐴞𐴥𐴓𐴢!“

⁴⁸𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴎𐴠𐴃𐴝𐴌𐴝𐴤 𐴇𐴠𐴥 𐴃𐴡𐴦𐴣𐴐𐴝𐴤 𐴏𐴝𐴘𐴃𐴡𐴥 𐴎𐴡𐴔𐴝 𐴀𐴡𐴥𐴘𐴧𐴠, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴎𐴞𐴀𐴕 𐴀𐴡𐴥𐴘𐴧𐴠 𐴇𐴞𐴥𐴀𐴕 𐴊𐴠𐴑𐴞𐴥 𐴁𐴟𐴑 𐴑𐴞𐴓𐴝𐴘-𐴑𐴞𐴓𐴝𐴘 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘.⁴⁹𐴔𐴡𐴕𐴃𐴡𐴌 𐴀𐴞𐴥𐴁𐴝𐴌 𐴏𐴞𐴕𐴉𐴡𐴌𐴞𐴏𐴡 𐴔𐴝𐴕𐴟𐴥𐴙𐴐𐴢 𐴀𐴠𐴊𐴧𐴠 𐴁𐴠𐴍𐴞𐴘𐴝𐴥𐴙𐴕 𐴎𐴠𐴃𐴝𐴌𐴝𐴤 𐴒𐴝𐴓𐴞𐴓𐴡𐴃𐴧𐴟 𐴓𐴡𐴥𐴃𐴞 𐴀𐴞𐴥𐴁𐴝𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴞𐴓𐴢, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴊𐴟𐴌𐴠𐴥 𐴒𐴡𐴥𐴌𐴞 𐴃𐴞𐴥𐴘𐴝𐴘 𐴇𐴞𐴥𐴀𐴕 𐴏𐴝𐴀𐴘𐴢 𐴃𐴝𐴥𐴙𐴑𐴧𐴞𐴓𐴢.

𐴀𐴞𐴏𐴝𐴤𐴌𐴠 𐴊𐴡𐴇𐴡𐴥𐴕 𐴒𐴡𐴌𐴝𐴥𐴘𐴧𐴠

⁵⁰𐴘𐴟𐴏𐴟𐴥𐴉𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴒𐴡𐴔 𐴀𐴠𐴊𐴧𐴠 𐴉𐴡𐴌𐴇𐴠𐴥𐴏𐴒𐴝𐴌 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴠𐴔𐴁𐴡𐴥𐴌 𐴀𐴝𐴐𐴧𐴞𐴥𐴓𐴢,⁵¹𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝 𐴀𐴞𐴥𐴃𐴝𐴌𐴝𐴌 𐴏𐴡𐴥𐴓𐴧𐴝𐴃𐴢 𐴀𐴠𐴊𐴧𐴠 𐴈𐴝𐴔𐴡𐴃𐴢 𐴌𐴝𐴎𐴞 𐴕𐴟 𐴀𐴝𐴐𐴧𐴞𐴥𐴓𐴢. 𐴘𐴡𐴥𐴒𐴧𐴗𐴝 𐴘𐴡𐴇𐴟𐴥𐴊𐴞𐴌 𐴐𐴡𐴥𐴀𐴌 𐴀𐴝𐴌𐴝𐴔𐴝𐴥𐴃𐴞𐴘𐴝𐴃𐴢 𐴃𐴝𐴥𐴑𐴞𐴃𐴡, 𐴀𐴝𐴦𐴌 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴀𐴝𐴐𐴧𐴞𐴥𐴓𐴢.⁵²𐴘𐴡𐴥𐴒𐴧𐴗𐴝𐴘𐴠 𐴉𐴞𐴓𐴝𐴃𐴡𐴌 𐴇𐴝𐴣𐴏𐴠 𐴎𐴝𐴘 𐴀𐴞𐴏𐴝𐴤𐴌 𐴓𐴝𐴐𐴧𐴗𐴝 𐴔𐴝𐴙𐴒𐴧𐴠𐴥,⁵³𐴁𐴝𐴦𐴊𐴠 𐴓𐴝𐴐𐴧𐴗𐴝 𐴓𐴝𐴔𐴝𐴘 𐴀𐴠𐴑𐴧𐴝𐴥𐴕 𐴇𐴡𐴇𐴡𐴥𐴕𐴡𐴌 𐴇𐴡𐴦𐴌𐴡𐴃𐴢 𐴁𐴠𐴌𐴝𐴤𐴘𐴧𐴠, 𐴀𐴝𐴦𐴌 𐴐𐴞𐴥𐴓𐴢 𐴑𐴟𐴥𐴣𐴊𐴞 𐴁𐴝𐴕𐴝𐴘𐴧𐴠𐴥 𐴊𐴠 𐴀𐴠𐴒𐴧𐴗𐴝𐴤 𐴈𐴡𐴁𐴡𐴌𐴡𐴌 𐴁𐴟𐴥𐴃𐴡𐴌𐴠 𐴌𐴝𐴙𐴑𐴧𐴠𐴥𐴒𐴡𐴘, 𐴎𐴞𐴁𐴝𐴤𐴃𐴢 𐴇𐴡𐴕𐴡𐴤𐴊𐴞𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴊𐴡𐴇𐴡𐴥𐴕 𐴒𐴡𐴌𐴝𐴥𐴙𐴓𐴢 𐴊𐴠 𐴕𐴝𐴥𐴘.⁵⁴𐴇𐴠𐴥 𐴊𐴞𐴕 𐴀𐴝𐴐𐴧𐴞𐴥𐴓𐴢 𐴀𐴠𐴕𐴃𐴠𐴎𐴝𐴔-𐴀𐴡𐴌-𐴊𐴞𐴕، 𐴀𐴝𐴦𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴐𐴟𐴥𐴌𐴟 𐴀𐴡𐴥𐴘𐴁𐴝𐴌 𐴀𐴡𐴑𐴃𐴡𐴥 𐴀𐴡𐴥𐴘𐴧𐴠.

⁵⁵𐴒𐴝𐴓𐴞𐴓𐴡𐴃𐴧𐴟 𐴎𐴠 𐴁𐴠𐴍𐴞𐴘𐴝𐴥𐴙𐴕 𐴕𐴟𐴥𐴕 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴙𐴐𐴧𐴞𐴤𐴓𐴢 𐴀𐴞𐴥𐴃𐴝𐴌𐴝 𐴉𐴞𐴏𐴝𐴥 𐴊𐴡𐴌𐴞, 𐴈𐴡𐴁𐴡𐴌𐴒𐴗𐴝𐴥 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴓𐴝𐴐𐴧𐴗𐴝𐴌𐴠 𐴑𐴠𐴀𐴕𐴒𐴡𐴌𐴞 𐴌𐴝𐴙𐴑𐴧𐴠𐴥 𐴊𐴠 𐴊𐴠𐴙𐴑𐴧𐴞𐴥𐴓𐴢.⁵⁶𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴖𐴝𐴦𐴉𐴠𐴏𐴢 𐴎𐴝𐴘𐴒𐴡𐴥𐴘, 𐴑𐴟𐴥𐴐𐴁𐴡 𐴔𐴡𐴏𐴡𐴥𐴓𐴧𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴝𐴣𐴃𐴡𐴌 𐴀𐴡𐴥𐴑𐴧𐴡𐴓𐴢 𐴃𐴡𐴘𐴧𐴝𐴌 𐴒𐴡𐴙𐴅𐴧𐴞𐴥𐴓𐴢. 𐴀𐴝𐴦𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴐𐴡𐴥𐴌𐴞𐴘𐴡𐴃𐴡𐴌 𐴇𐴡𐴥𐴑𐴟𐴔 𐴔𐴡𐴎𐴞𐴕 𐴎𐴞𐴌𐴝𐴀𐴙𐴓𐴢.

The Word for the World International

https://app.library.bible/content/87faca8b51c22590