𐴘𐴡𐴇𐴝𐴥𐴕𐴧𐴝1
𐴀𐴝𐴓𐴧𐴝𐴌 𐴑𐴝𐴓𐴝𐴔 𐴀𐴞𐴕𐴏𐴝𐴥𐴕 𐴁𐴡𐴙𐴕𐴧𐴠𐴥
1𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴢 𐴑𐴝𐴓𐴝𐴔 𐴀𐴝𐴐𐴧𐴞𐴥𐴓𐴢, 𐴑𐴝𐴓𐴝𐴔 𐴀𐴝𐴓𐴧𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢, 𐴀𐴠𐴊𐴧𐴠 𐴑𐴝𐴓𐴝𐴔 𐴕𐴞𐴎𐴠 𐴀𐴝𐴓𐴧𐴝 𐴀𐴝𐴐𐴧𐴞𐴥𐴓𐴢.2𐴀𐴞𐴥𐴁𐴝 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴢 𐴀𐴝𐴓𐴧𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.3𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠, 𐴀𐴝𐴦𐴌 𐴎𐴠𐴊𐴟𐴥𐴕 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠 𐴇𐴞𐴥𐴀𐴕𐴡𐴌 𐴁𐴟𐴥𐴃𐴡𐴌𐴠 𐴀𐴠𐴑𐴧𐴝𐴥𐴕 𐴀𐴡𐴥 𐴀𐴞𐴥𐴁𐴝𐴌𐴠 𐴏𐴝𐴥𐴌𐴝 𐴉𐴡𐴘𐴊𐴝 𐴒𐴡𐴌𐴝𐴥 𐴕𐴡𐴥 𐴎𐴝.4𐴀𐴞𐴥𐴁𐴝𐴌 𐴇𐴝𐴣𐴏𐴠 𐴎𐴞𐴕𐴊𐴞𐴒𐴞 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴇𐴠𐴥 𐴎𐴞𐴕𐴊𐴞𐴒𐴞 𐴀𐴝𐴐𐴧𐴞𐴥𐴓𐴢 𐴀𐴞𐴕𐴏𐴝𐴥𐴕𐴡𐴌 𐴕𐴟𐴌.5𐴇𐴠𐴥 𐴕𐴟𐴌𐴠 𐴀𐴝𐴕𐴊𐴝𐴤𐴌𐴡𐴃𐴢 𐴉𐴡𐴀𐴌 𐴊𐴠, 𐴔𐴡𐴕𐴃𐴡𐴌 𐴀𐴝𐴕𐴊𐴝𐴤𐴌𐴠 𐴇𐴠𐴥 𐴕𐴟𐴌𐴡𐴌𐴠 𐴎𐴞𐴃𐴞 𐴕𐴡 𐴉𐴝𐴌𐴠.6𐴀𐴝𐴓𐴧𐴝𐴘𐴠 𐴘𐴝𐴇𐴝𐴥𐴘𐴝 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌𐴠 𐴊𐴟𐴕𐴞𐴘𐴝𐴙𐴃𐴢 𐴊𐴞𐴉𐴠𐴍𐴝𐴥𐴙𐴓𐴢.7𐴘𐴡𐴥𐴒𐴧𐴗𐴝𐴌𐴠 𐴇𐴠𐴥 𐴕𐴟𐴌𐴡𐴌 𐴀𐴠𐴑 𐴒𐴡𐴁𐴝𐴤 𐴀𐴞𐴥𐴏𐴝𐴉𐴠 𐴊𐴞𐴉𐴠𐴍𐴝𐴥 𐴒𐴞𐴥𐴀𐴓𐴢, 𐴎𐴠𐴀𐴕𐴠 𐴁𐴠𐴒𐴧𐴟𐴥𐴕𐴠 𐴘𐴡𐴥𐴒𐴧𐴗𐴝𐴌 𐴒𐴡𐴁𐴝𐴤 𐴉𐴟𐴥𐴕𐴞 𐴀𐴞𐴔𐴝𐴕 𐴀𐴝𐴕𐴠𐴤.8𐴘𐴡𐴥𐴒𐴧𐴗𐴝 𐴕𐴞𐴎𐴠 𐴇𐴡𐴥𐴕𐴡 𐴇𐴠𐴥 𐴕𐴟𐴌 𐴀𐴝𐴐𐴧𐴞𐴥𐴓𐴢 𐴊𐴠 𐴕𐴡, 𐴁𐴡𐴥𐴓𐴑𐴠 𐴘𐴡𐴥𐴒𐴧𐴗𐴝 𐴇𐴠𐴥 𐴕𐴟𐴌𐴡𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥𐴃𐴡 𐴀𐴝𐴙𐴐𐴧𐴞𐴤𐴓𐴢 𐴊𐴠.9𐴏𐴡𐴥𐴘𐴧𐴞 𐴕𐴟𐴌 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴉𐴡𐴃𐴧𐴞𐴥 𐴔𐴝𐴙𐴕𐴐𐴡𐴥𐴌𐴠 𐴉𐴡𐴀𐴌 𐴊𐴠, 𐴀𐴞𐴥𐴁𐴝 𐴊𐴟𐴕𐴞𐴘𐴝𐴙𐴃𐴢 𐴀𐴝𐴘𐴁𐴝𐴤𐴌 𐴀𐴝𐴐𐴧𐴞𐴥𐴓𐴢.10𐴀𐴞𐴥𐴁𐴝 𐴊𐴟𐴕𐴞𐴘𐴝𐴙𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴊𐴟𐴕𐴞𐴘𐴝𐴘 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴉𐴡𐴘𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠, 𐴃𐴡𐴀 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌𐴠 𐴕𐴡𐴥 𐴏𐴞𐴕𐴠𐴥.11𐴀𐴞𐴥𐴁𐴝 𐴕𐴞𐴎𐴡𐴌 𐴔𐴝𐴙𐴕𐴐𐴡𐴥𐴌 𐴇𐴠𐴥𐴍𐴠 𐴀𐴝𐴙𐴐𐴧𐴞𐴤𐴓𐴢, 𐴔𐴡𐴕𐴃𐴡𐴌 𐴕𐴞𐴎𐴡𐴌 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴕𐴡𐴥 𐴒𐴡𐴌𐴠𐴥.12𐴓𐴠𐴑𐴞𐴕 𐴎𐴠𐴃𐴡𐴥 𐴎𐴡𐴕𐴠 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴞𐴥 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴀𐴞𐴥𐴃𐴝𐴌𐴝 𐴉𐴡𐴃𐴧𐴞𐴥 𐴎𐴡𐴕𐴡𐴌𐴠 𐴀𐴞𐴥𐴁𐴝𐴘𐴠 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕 𐴀𐴡𐴥𐴘𐴁𐴝𐴌 𐴇𐴡𐴥𐴑 𐴊𐴞𐴦𐴘𐴠𐴥.13𐴀𐴞𐴥𐴃𐴝𐴌𐴝𐴌 𐴇𐴠𐴥 𐴎𐴡𐴌𐴔𐴡 𐴕𐴡 𐴓𐴡𐴖𐴢 𐴖𐴡𐴥𐴃𐴧𐴟 𐴀𐴡𐴥𐴘𐴧𐴠, 𐴕𐴡 𐴅𐴞𐴏𐴞𐴥𐴔𐴡𐴌 𐴔𐴡𐴕𐴐𐴝𐴥𐴘𐴠 𐴀𐴡𐴥𐴘𐴧𐴠, 𐴀𐴝𐴦𐴌 𐴕𐴡 𐴔𐴝𐴕𐴟𐴥𐴙𐴐𐴡𐴌 𐴔𐴡𐴕𐴐𐴝𐴥𐴘𐴠 𐴀𐴡𐴥𐴘𐴧𐴠, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴃𐴧𐴟 𐴀𐴡𐴥𐴘𐴧𐴠 𐴊𐴠.14𐴇𐴠𐴥 𐴑𐴝𐴓𐴝𐴔 𐴀𐴞𐴕𐴏𐴝𐴥𐴕 𐴁𐴡𐴙𐴕𐴧𐴠𐴥, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴙𐴑𐴧𐴠. 𐴁𐴝𐴉𐴡𐴌 𐴓𐴠𐴇𐴝𐴥𐴌 𐴀𐴠𐴑 𐴉𐴟𐴖𐴝 𐴀𐴞𐴥𐴏𐴝𐴉𐴠 𐴀𐴞𐴥𐴁𐴝𐴌 𐴎𐴠 𐴔𐴡𐴈𐴞𐴥𐴔𐴝 𐴀𐴝𐴏𐴠𐴤 𐴇𐴠𐴥 𐴔𐴡𐴈𐴞𐴥𐴔𐴝𐴌𐴠 𐴀𐴝𐴣𐴀𐴌𐴝 𐴊𐴠𐴙𐴑𐴧𐴞𐴥. 𐴀𐴞𐴥𐴁𐴝 𐴌𐴝𐴇𐴝𐴥𐴔𐴡𐴃𐴠 𐴀𐴠𐴊𐴧𐴠 𐴏𐴡𐴥𐴘𐴧𐴞𐴘𐴠 𐴉𐴟𐴌𐴝𐴘𐴧𐴝.15𐴘𐴝𐴇𐴝𐴥𐴘𐴝𐴘𐴠 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴒𐴟𐴎𐴡𐴌𐴞 𐴈𐴡𐴀𐴙𐴓𐴢 𐴊𐴠, ”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴓𐴝𐴔, ’𐴀𐴝𐴀𐴛 𐴁𐴝𐴦𐴊𐴠 𐴎𐴞𐴁𐴝𐴤 𐴀𐴝𐴘𐴧𐴠𐴤𐴌 𐴀𐴞𐴥𐴁𐴝 𐴀𐴝𐴣𐴀𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴀𐴝𐴣𐴀𐴌 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴏𐴠𐴤.‘ “16𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴃𐴡 𐴀𐴞𐴥𐴁𐴝𐴌 𐴉𐴟𐴌𐴝𐴘𐴧𐴝𐴃𐴧𐴟 𐴌𐴝𐴇𐴝𐴥𐴔𐴡𐴃𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴉𐴝𐴘𐴧𐴞𐴥.17𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴢 𐴊𐴞𐴦𐴘𐴝 𐴒𐴞𐴀𐴓𐴢 𐴊𐴠 𐴔𐴟𐴀𐴏𐴝𐴌 𐴊𐴟𐴖𐴝𐴌𐴝, 𐴔𐴡𐴕𐴃𐴡𐴌 𐴌𐴝𐴇𐴝𐴥𐴔𐴡𐴃𐴢 𐴀𐴠𐴊𐴧𐴠 𐴏𐴡𐴥𐴘𐴧𐴞 𐴀𐴝𐴙𐴐𐴧𐴠𐴥 𐴊𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝.18𐴀𐴝𐴓𐴧𐴝𐴌𐴠 𐴃𐴡 𐴇𐴡𐴕𐴡𐴤𐴑𐴞𐴘𐴠 𐴇𐴡𐴕𐴡𐴤𐴊𐴞𐴕 𐴊𐴠𐴙𐴑𐴧𐴠𐴥 𐴊𐴠 𐴕𐴝𐴥𐴘, 𐴓𐴠𐴑𐴞𐴕 𐴁𐴝𐴉𐴡𐴌 𐴁𐴟𐴑𐴡𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴓𐴠𐴇𐴝𐴥𐴌 𐴀𐴠𐴑 𐴉𐴟𐴖𐴝𐴘𐴠 𐴁𐴠 𐴀𐴞𐴥𐴁𐴝𐴌𐴠 𐴎𐴝𐴇𐴠𐴥𐴌 𐴒𐴡𐴙𐴅𐴧𐴠𐴥.𐴘𐴝𐴇𐴝𐴥𐴘𐴝𐴌 𐴒𐴡𐴁𐴝𐴤
19𐴘𐴝𐴇𐴝𐴥𐴘𐴝𐴌 𐴒𐴡𐴁𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠 𐴘𐴝𐴀𐴕, 𐴎𐴠𐴣𐴃𐴧𐴠𐴥 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴠 𐴅𐴠𐴌𐴟𐴥𐴏𐴝𐴓𐴠𐴔 𐴐𐴡𐴥𐴀𐴌𐴡𐴃𐴧𐴟 𐴇𐴡𐴦𐴎𐴧𐴡𐴕 𐴀𐴞𐴔𐴝𐴔𐴡𐴌𐴠 𐴀𐴠𐴊𐴧𐴠 𐴓𐴠𐴀𐴜𐴞𐴘𐴡 𐴌𐴠 𐴘𐴡𐴥𐴒𐴧𐴗𐴝𐴌 𐴇𐴠𐴥𐴍𐴠 𐴘𐴝𐴀𐴕 𐴉𐴟𐴏𐴝𐴥𐴌 𐴒𐴡𐴙𐴃𐴧𐴡𐴥 𐴊𐴞𐴉𐴠𐴍𐴝𐴥𐴘𐴧𐴠, ”𐴃𐴟𐴀𐴛 𐴇𐴡𐴕؟“20𐴘𐴡𐴥𐴒𐴧𐴗𐴝𐴘𐴠 𐴀𐴞𐴕𐴑𐴝𐴌 𐴕𐴡𐴥 𐴒𐴡𐴌𐴠𐴥, 𐴁𐴡𐴥𐴓𐴑𐴠 𐴐𐴞𐴥𐴑𐴝𐴌 𐴒𐴡𐴌𐴞𐴥 𐴈𐴡𐴘𐴧𐴠𐴥 𐴊𐴠, ”𐴀𐴝𐴀𐴛 𐴔𐴡𐴀𐴏𐴞𐴤 𐴕𐴡.“21𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴀𐴛 𐴇𐴡𐴕؟ 𐴃𐴟𐴀𐴛 𐴇𐴡𐴥𐴕𐴡 𐴕𐴡𐴁𐴞 𐴀𐴠𐴓𐴞𐴘𐴝𐴏𐴢 𐴕𐴠𐴥؟“𐴘𐴡𐴥𐴒𐴧𐴗𐴝𐴘𐴠 𐴈𐴡𐴘𐴧𐴠𐴥 𐴊𐴠, ”𐴕𐴡, 𐴀𐴝𐴀𐴛 𐴕𐴡.“
𐴃𐴡𐴥𐴘 𐴀𐴞𐴥𐴃𐴝𐴌𐴝 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥 𐴊𐴠, ”𐴃𐴟𐴀𐴛 𐴑𐴞𐴥 𐴀𐴝𐴘𐴁𐴝𐴤𐴌 𐴈𐴡𐴃𐴝𐴤 𐴀𐴝𐴏𐴠𐴤 𐴊𐴠 𐴇𐴠𐴥 𐴕𐴡𐴁𐴞؟“
𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ”𐴕𐴡.“22𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴀𐴛 𐴇𐴡𐴕 𐴀𐴝𐴣𐴀𐴌𐴝𐴌𐴠 𐴎𐴟𐴖𐴝𐴁𐴢 𐴊𐴡, 𐴎𐴠𐴀𐴕𐴠 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝𐴌𐴠 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴞 𐴉𐴝𐴌𐴞. 𐴃𐴟𐴀𐴛 𐴕𐴞𐴎𐴡𐴌 𐴁𐴝𐴦𐴁𐴟𐴃𐴠 𐴑𐴞𐴦 𐴈𐴡𐴀؟“23𐴘𐴝𐴇𐴝𐴥𐴘𐴝𐴘𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴈𐴡𐴃𐴝𐴤 𐴓𐴡𐴥𐴘 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ”𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴀𐴠𐴀𐴕 𐴈𐴡𐴀𐴌,’𐴔𐴝𐴁𐴟𐴊𐴡𐴌 𐴌𐴝𐴏𐴃𐴝 𐴀𐴟𐴎𐴟 𐴒𐴡𐴌𐴡𐴤.‘ “ 24𐴇𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌𐴠 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠 𐴊𐴠 𐴀𐴡𐴥𐴙𐴓𐴊𐴠 𐴉𐴠𐴥𐴌𐴡𐴐𐴞 𐴉𐴞𐴥𐴌𐴑𐴝𐴌 𐴃𐴡𐴌𐴉𐴡𐴥𐴃𐴧𐴟.25𐴀𐴞𐴥𐴃𐴝𐴌𐴝 𐴘𐴝𐴇𐴝𐴥𐴘𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥 𐴊𐴠, ”𐴎𐴡𐴊𐴞 𐴃𐴟𐴀𐴛 𐴔𐴡𐴀𐴏𐴞𐴤 𐴕𐴡, 𐴀𐴠𐴓𐴞𐴘𐴝𐴏𐴢 𐴕𐴡, 𐴀𐴠𐴊𐴧𐴠 𐴇𐴠𐴥 𐴕𐴡𐴁𐴞 𐴖𐴝 𐴘𐴡𐴥 𐴕𐴡, 𐴃𐴡𐴥𐴀𐴘𐴓𐴠 𐴃𐴟𐴀𐴛 𐴁𐴝𐴥𐴂𐴄𐴞𐴏𐴔𐴝 𐴑𐴞𐴘𐴝𐴥 𐴊𐴡؟“26𐴘𐴝𐴇𐴝𐴥𐴘𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴘𐴧𐴠𐴥 𐴊𐴠, ”𐴀𐴝𐴀𐴛 𐴃𐴡 𐴉𐴝𐴕𐴞𐴥𐴃𐴢 𐴀𐴠𐴥𐴕𐴝 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴀𐴕 𐴀𐴠𐴑𐴎𐴡𐴕 𐴃𐴞𐴥𐴘𐴝𐴘 𐴀𐴝𐴏𐴠𐴤 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴕𐴡 𐴏𐴞𐴕𐴡𐴥.27𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤 𐴀𐴝𐴀𐴛 𐴁𐴝𐴦𐴊𐴠 𐴀𐴝𐴘𐴧𐴠𐴤𐴌; 𐴀𐴝𐴀𐴛 𐴀𐴞𐴥𐴁𐴝𐴌 𐴐𐴠𐴕𐴄𐴝𐴥𐴌𐴡𐴌 𐴉𐴞𐴥𐴃𐴝 𐴑𐴟𐴥𐴓𐴞 𐴁𐴡𐴓𐴧𐴝 𐴀𐴟𐴥𐴊𐴧𐴗𐴝 𐴓𐴝𐴦𐴘𐴠𐴑 𐴕𐴡.“28𐴀𐴞𐴀𐴕 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴌 𐴉𐴝𐴌𐴑𐴟𐴓𐴠 𐴁𐴠𐴃𐴝𐴥𐴕𐴞𐴘𐴝𐴃𐴢 𐴀𐴡𐴥𐴘𐴧𐴠 𐴊𐴠, 𐴎𐴠𐴍𐴠𐴥 𐴘𐴝𐴇𐴝𐴥𐴘𐴝𐴘𐴠 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴃𐴡.
𐴀𐴝𐴓𐴧𐴝𐴌 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀
29𐴃𐴝𐴌𐴉𐴡𐴌 𐴊𐴞𐴕 𐴘𐴝𐴇𐴝𐴥𐴘𐴝𐴘𐴠 𐴀𐴞𐴏𐴝𐴤 𐴘𐴡𐴥𐴒𐴧𐴗𐴝𐴌 𐴀𐴟𐴎𐴟 𐴀𐴝𐴘𐴧𐴠𐴤𐴌 𐴊𐴠 𐴊𐴠𐴑𐴞𐴥, 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴟𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀, 𐴎𐴞𐴁𐴝𐴤𐴘𐴠 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌 𐴒𐴟𐴕𐴝𐴤 𐴓𐴡𐴘𐴎𐴝𐴒𐴡𐴥𐴘.30𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴓𐴝𐴔, ’𐴀𐴝𐴀𐴛 𐴁𐴝𐴦𐴊𐴠 𐴀𐴠𐴀𐴕 𐴀𐴠𐴑𐴎𐴡𐴕 𐴀𐴝𐴘𐴧𐴠𐴤𐴌, 𐴎𐴞𐴁𐴝𐴤𐴌 𐴃𐴡𐴑𐴧𐴝 𐴀𐴝𐴣𐴀𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴀𐴝𐴣𐴀𐴌 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴏𐴠𐴤.‘31𐴀𐴝𐴀𐴛 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴞𐴥𐴃𐴝𐴔, 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴀𐴡𐴥 𐴉𐴝𐴥𐴕, 𐴀𐴝𐴀𐴛 𐴉𐴝𐴕𐴞𐴥𐴌 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴃𐴡 𐴀𐴝𐴙𐴐𐴧𐴞𐴤 𐴊𐴠.“32𐴃𐴝𐴌𐴉𐴡𐴌𐴠 𐴘𐴝𐴇𐴝𐴥𐴘𐴝𐴘𐴠 𐴘𐴝𐴀𐴕 𐴒𐴡𐴁𐴝𐴤 𐴊𐴞𐴥𐴘𐴠, ”𐴀𐴝𐴀𐴛 𐴊𐴠𐴙𐴑𐴧𐴞𐴥 𐴊𐴠, 𐴂𐴝𐴑-𐴌𐴟𐴀 𐴈𐴡𐴘𐴃𐴡𐴌𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘 𐴀𐴝𐴏𐴔𐴝𐴕𐴡𐴃𐴧𐴟 𐴓𐴝𐴔𐴞 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴖𐴡𐴌𐴠 𐴁𐴡𐴙𐴐𐴧𐴠𐴥.33𐴀𐴝𐴀𐴛 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴞𐴥𐴃𐴝𐴔, 𐴔𐴡𐴕𐴃𐴡𐴌 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴉𐴝𐴕𐴞𐴥𐴌 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴃𐴡 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴈𐴡𐴘𐴧𐴠𐴥 𐴊𐴠, ’𐴎𐴞𐴁𐴝𐴤𐴌 𐴖𐴡𐴌𐴠 𐴂𐴝𐴑-𐴌𐴟𐴀 𐴓𐴝𐴔𐴞 𐴀𐴝𐴀𐴘𐴢 𐴁𐴡𐴘𐴁𐴡𐴥 𐴊𐴠 𐴊𐴠𐴑𐴞𐴥𐴁𐴞, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴂𐴝𐴑-𐴌𐴟𐴀 𐴓𐴡𐴥𐴘 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴁𐴡.‘34𐴀𐴝𐴀𐴛 𐴇𐴠𐴥𐴕𐴊𐴞𐴓𐴧𐴝 𐴊𐴠𐴙𐴑𐴧𐴞𐴥 𐴀𐴠𐴊𐴧𐴠 𐴒𐴡𐴁𐴝𐴤 𐴊𐴞𐴥𐴌 𐴊𐴠 𐴑𐴞, 𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴉𐴟𐴖𐴝.“𐴀𐴞𐴏𐴝𐴤𐴌 𐴏𐴝𐴥𐴃𐴡𐴌 𐴐𐴝𐴥𐴌𐴞𐴃𐴢 𐴀𐴡𐴥𐴑𐴧𐴡𐴓𐴢
35𐴃𐴝𐴌𐴉𐴡𐴌 𐴊𐴞𐴕 𐴀𐴝𐴁𐴝𐴌 𐴘𐴝𐴇𐴝𐴥𐴘𐴝 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴊𐴟𐴘 𐴎𐴡𐴕 𐴀𐴟𐴔𐴧𐴡𐴃𐴢 𐴇𐴠𐴥𐴍𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢.36𐴀𐴝𐴦𐴌 𐴀𐴞𐴏𐴝𐴤 𐴇𐴞𐴥𐴘𐴝𐴕𐴃𐴟 𐴀𐴝𐴥𐴣𐴍𐴞 𐴎𐴝𐴦𐴌 𐴊𐴠 𐴊𐴠𐴑𐴞𐴥, 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴟𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀!“37𐴘𐴡𐴥𐴒𐴧𐴗𐴝𐴌 𐴈𐴡𐴃𐴝𐴤 𐴉𐴟𐴥𐴕𐴞, 𐴇𐴠𐴥 𐴊𐴟𐴕𐴞𐴥 𐴀𐴟𐴔𐴧𐴡𐴃𐴢 𐴀𐴞𐴏𐴝𐴤𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴠.38𐴀𐴞𐴏𐴝𐴤𐴘𐴠 𐴉𐴞𐴏𐴧𐴝𐴥 𐴉𐴞𐴥𐴌𐴞 𐴊𐴠𐴑𐴠𐴥𐴌 𐴊𐴠, 𐴀𐴞𐴥𐴃𐴝𐴌𐴝 𐴉𐴞𐴏𐴠𐴤-𐴉𐴞𐴏𐴠𐴤 𐴀𐴝𐴘𐴧𐴠𐴤𐴌; 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴑𐴞𐴦 𐴃𐴝𐴓𐴝𐴐𐴢 𐴒𐴡𐴌𐴡𐴤𐴌 𐴊𐴠𐴥؟“𐴀𐴞𐴥𐴃𐴝𐴌𐴝 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴌𐴝𐴁𐴧𐴞𐴥“ (𐴎𐴞𐴘𐴝𐴥𐴕𐴡𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠, 𐴀𐴟𐴏𐴃𐴝𐴃𐴢), ”𐴃𐴟𐴀𐴛 𐴇𐴡𐴍𐴠𐴥 𐴃𐴝𐴥𐴑𐴡 𐴊𐴠𐴥؟“39𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴘𐴧𐴡𐴤 𐴏𐴡𐴀𐴒𐴝𐴘.“
𐴃𐴡𐴥𐴘 𐴀𐴞𐴥𐴃𐴝𐴌𐴝 𐴎𐴝𐴘, 𐴀𐴞𐴏𐴝𐴤 𐴃𐴝𐴥𐴑𐴠 𐴊𐴠 𐴎𐴝𐴒𐴝 𐴒𐴝𐴥𐴕 𐴏𐴝𐴘𐴧𐴠𐴥, 𐴀𐴝𐴦𐴌 𐴇𐴠𐴥 𐴊𐴞𐴕 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴙𐴑𐴧𐴞𐴓𐴢. 𐴇𐴠𐴥𐴣𐴃𐴧𐴠 𐴇𐴝𐴥𐴣𐴎𐴞𐴕𐴧𐴝 𐴏𐴝𐴙𐴌𐴒𐴗𐴝𐴥 𐴁𐴝𐴙𐴅𐴧𐴞𐴥𐴓𐴢.40𐴘𐴝𐴇𐴝𐴥𐴘𐴝𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴎𐴠 𐴊𐴟𐴘 𐴎𐴡𐴕 𐴀𐴞𐴏𐴝𐴤𐴌 𐴉𐴞𐴏𐴝𐴥𐴓𐴞 𐴊𐴡𐴙𐴅𐴧𐴞𐴓𐴢, 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕 𐴀𐴝𐴐𐴧𐴞𐴥𐴓𐴢 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴡𐴌 𐴁𐴝𐴥𐴘 𐴀𐴠𐴕𐴊𐴠𐴌𐴞𐴘𐴝𐴏𐴢.41𐴘𐴡𐴥𐴒𐴧𐴗𐴝𐴘𐴠 𐴀𐴝𐴒𐴠 𐴕𐴞𐴎𐴡𐴌 𐴁𐴝𐴥𐴘 𐴏𐴝𐴥𐴘𐴔𐴡𐴕𐴡𐴌𐴠 𐴃𐴟𐴖𐴝𐴘 𐴓𐴡𐴘 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴔𐴠𐴏𐴝𐴥𐴘𐴧𐴝𐴌𐴠 𐴓𐴡𐴦𐴃𐴢 𐴉𐴝𐴘𐴧𐴞𐴥“ (𐴔𐴠𐴏𐴝𐴥𐴘𐴧𐴝 𐴔𐴝𐴀𐴕𐴞, 𐴔𐴡𐴀𐴏𐴞𐴤). 42𐴘𐴡𐴥𐴒𐴧𐴗𐴝𐴘𐴠 𐴏𐴝𐴥𐴘𐴔𐴡𐴕𐴡𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤. 𐴀𐴞𐴏𐴝𐴤𐴘𐴠 𐴏𐴝𐴥𐴘𐴔𐴡𐴕𐴡𐴌 𐴇𐴞𐴥𐴑𐴧𐴝 𐴏𐴝𐴀𐴘𐴢 𐴈𐴡𐴀𐴌 𐴊𐴠, ”𐴃𐴟𐴘 𐴃𐴡 𐴘𐴡𐴇𐴝𐴥𐴕𐴧𐴝𐴌 𐴉𐴟𐴖𐴝 𐴏𐴝𐴥𐴘𐴔𐴡𐴕, 𐴔𐴡𐴕𐴃𐴡𐴌 𐴃𐴡𐴌𐴠𐴥 𐴑𐴠𐴥𐴉𐴝𐴏𐴢 𐴋𐴝𐴈𐴝 𐴎𐴝𐴘𐴁𐴡“(𐴇𐴠𐴥 𐴕𐴝𐴔𐴡𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠, 𐴉𐴞𐴃𐴡𐴌 ).
𐴀𐴞𐴏𐴝𐴤𐴘𐴠 𐴉𐴞𐴓𐴞𐴥𐴂𐴢 𐴀𐴠𐴊𐴧𐴠 𐴕𐴝𐴃𐴝𐴕𐴠𐴓𐴡𐴌𐴠 𐴔𐴝𐴃𐴝𐴘𐴧𐴠𐴥
43𐴃𐴝𐴌𐴉𐴡𐴌 𐴊𐴞𐴕 𐴀𐴞𐴏𐴝𐴤𐴘𐴠 𐴒𐴝𐴓𐴞𐴓𐴢 𐴀𐴠𐴓𐴝𐴑𐴝𐴃𐴢 𐴎𐴝𐴘𐴃𐴡𐴒𐴡𐴥𐴘 𐴕𐴞𐴘𐴡𐴃𐴢 𐴒𐴡𐴙𐴅𐴧𐴠𐴥. 𐴀𐴞𐴥𐴁𐴝𐴘𐴠 𐴉𐴞𐴓𐴞𐴥𐴂𐴡𐴌𐴠 𐴓𐴡𐴦𐴃𐴢 𐴉𐴝𐴘 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌.“44𐴉𐴞𐴓𐴞𐴥𐴂𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴠𐴕𐴊𐴠𐴌𐴞𐴘𐴝𐴏𐴢 𐴀𐴠𐴊𐴧𐴠 𐴉𐴞𐴃𐴡𐴌 𐴃𐴝𐴌𐴝𐴥𐴌 𐴐𐴡𐴥𐴀𐴌 𐴁𐴠𐴃𐴏𐴝𐴥𐴘𐴊𐴝𐴌 𐴔𐴝𐴕𐴟𐴥𐴙𐴐𐴢.45𐴉𐴞𐴓𐴞𐴥𐴂𐴠 𐴕𐴝𐴃𐴝𐴕𐴠𐴓𐴡𐴌𐴠 𐴓𐴡𐴦𐴃𐴢 𐴉𐴝𐴘 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴀𐴟𐴁𐴝𐴤𐴌𐴠 𐴓𐴡𐴦𐴃𐴢 𐴉𐴝𐴘𐴧𐴞𐴥 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴔𐴟𐴀𐴏𐴝𐴘𐴠 𐴃𐴡𐴌𐴝𐴃𐴢 𐴐𐴡𐴥𐴌𐴞𐴉𐴡𐴃𐴢 𐴓𐴠𐴙𐴑𐴧𐴠𐴥, 𐴀𐴝𐴦𐴌 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴓𐴠𐴙𐴑𐴧𐴠𐴥; 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴘𐴟𐴏𐴟𐴥𐴉𐴡𐴌 𐴉𐴟𐴖𐴝 𐴀𐴞𐴏𐴝𐴤, 𐴕𐴝𐴏𐴝𐴥𐴌𐴝𐴃𐴢 𐴐𐴡𐴥𐴀𐴌𐴡𐴌.“46𐴕𐴝𐴃𐴝𐴕𐴠𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴕𐴝𐴏𐴝𐴥𐴌𐴝𐴃𐴡𐴃𐴧𐴟 𐴑𐴞𐴥 𐴑𐴠𐴏𐴧𐴟𐴥 𐴒𐴡𐴔 𐴀𐴝𐴀𐴘𐴢 𐴉𐴝𐴌𐴠؟“𐴉𐴞𐴓𐴞𐴥𐴂𐴠 𐴈𐴡𐴀𐴌 𐴊𐴠, ”𐴀𐴝𐴘𐴧𐴡𐴤, 𐴏𐴡𐴀𐴒𐴝𐴘.“47𐴀𐴞𐴏𐴝𐴤𐴘𐴠 𐴕𐴝𐴃𐴝𐴕𐴠𐴓𐴢 𐴕𐴞𐴎𐴡𐴌 𐴀𐴟𐴎𐴟 𐴀𐴝𐴘𐴧𐴠𐴤𐴌 𐴊𐴠 𐴊𐴠𐴑𐴞𐴥 𐴘𐴡𐴥𐴒𐴧𐴗𐴝𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴠𐴎𐴧𐴡𐴕 𐴏𐴡𐴥𐴘𐴧𐴞 𐴀𐴞𐴏𐴌𐴝𐴥𐴙𐴓𐴞, 𐴎𐴞𐴁𐴝𐴤𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴊𐴟𐴥𐴑𐴝𐴁𐴝𐴎𐴞 𐴕𐴝𐴥𐴘.“48𐴕𐴝𐴃𐴝𐴕𐴠𐴓𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴀𐴝𐴣𐴀𐴌𐴠𐴥 𐴑𐴠𐴀𐴕𐴒𐴡𐴌𐴞 𐴏𐴞𐴕𐴡𐴥؟“
𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌𐴠 𐴉𐴞𐴓𐴞𐴥𐴂𐴠 𐴋𐴝𐴈𐴝𐴘𐴁𐴝𐴥𐴌 𐴀𐴝𐴒𐴠 𐴎𐴠𐴣𐴃𐴧𐴠𐴥 𐴃𐴟𐴀𐴛 𐴋𐴟𐴣𐴙𐴌-𐴒𐴝𐴏𐴢 𐴃𐴝𐴓𐴝 𐴀𐴝𐴐𐴧𐴞𐴥𐴓𐴝, 𐴇𐴠𐴥𐴣𐴃𐴧𐴠 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴊𐴠𐴙𐴑𐴧𐴞𐴥.“49𐴇𐴠𐴥𐴃𐴟𐴕𐴡𐴃𐴢 𐴕𐴝𐴃𐴝𐴕𐴠𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴌𐴝𐴁𐴧𐴞𐴥, 𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴀𐴝𐴓𐴧𐴝𐴌 𐴉𐴟𐴖𐴝, 𐴃𐴟𐴀𐴛 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴁𐴝𐴀𐴣𐴐𐴧𐴝.“50𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴋𐴟𐴣𐴙𐴌-𐴒𐴝𐴏𐴢 𐴃𐴝𐴓𐴝 𐴊𐴠𐴙𐴑𐴧𐴞𐴥 𐴈𐴡𐴘𐴧𐴞𐴥 𐴊𐴠 𐴇𐴞𐴥𐴘𐴝𐴕𐴡𐴓𐴧𐴝 𐴑𐴞𐴥 𐴃𐴟𐴀𐴛 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤؟ 𐴃𐴟𐴀𐴛 𐴀𐴞𐴀𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌-𐴋𐴡𐴣𐴀𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥𐴁𐴝.“51𐴀𐴞𐴥𐴁𐴝𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴊𐴠𐴑𐴞𐴥𐴁𐴝, 𐴀𐴝𐴏𐴔𐴝𐴕 𐴑𐴟𐴥𐴓𐴝 𐴀𐴝𐴦𐴌 𐴀𐴝𐴓𐴧𐴝𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴢 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴖𐴡𐴌𐴠 𐴀𐴟𐴍𐴝𐴥𐴓𐴝𐴔𐴝 𐴒𐴡𐴌𐴠𐴥𐴌.“
The Word for the World International