Read 𐴓𐴟𐴑𐴝𐴥𐴏𐴢 14

𐴓𐴟𐴑𐴝𐴥𐴏𐴢14

𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴁𐴞𐴘𐴝𐴌𐴝𐴙𐴔𐴧𐴝 𐴒𐴡𐴔 𐴒𐴡𐴙𐴅𐴧𐴠𐴥

¹𐴀𐴠𐴑𐴁𐴝𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴠𐴑 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴀𐴠𐴎𐴧𐴡𐴕 𐴏𐴡𐴥𐴊𐴧𐴝𐴌𐴡𐴌 𐴒𐴡𐴥𐴌𐴡𐴃𐴢 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴒𐴞𐴦𐴘𐴠𐴥, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴈𐴝𐴥𐴀𐴏𐴢 𐴕𐴡𐴎𐴡𐴌 𐴌𐴝𐴙𐴑𐴧𐴞𐴥𐴓𐴢.²𐴇𐴠𐴥𐴍𐴠 𐴀𐴞𐴥𐴁𐴝𐴌 𐴔𐴟𐴀𐴕𐴃𐴟 𐴀𐴠𐴕𐴊𐴞𐴓𐴧𐴝 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢 𐴎𐴞𐴁𐴝𐴤𐴃𐴧𐴟 𐴉𐴟𐴥𐴓𐴝 𐴁𐴞𐴘𐴝𐴌𐴝𐴔 𐴀𐴝𐴏𐴠𐴤.³𐴀𐴞𐴏𐴝𐴤𐴘𐴠 𐴀𐴝𐴓𐴠𐴔 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴞𐴥𐴁𐴝𐴌 𐴎𐴝𐴘𐴠𐴏𐴢 𐴀𐴝𐴏𐴠𐴤 𐴕𐴠𐴥 𐴕𐴝𐴥𐴘؟“⁴𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴕𐴞𐴎𐴝𐴥𐴔 𐴔𐴝𐴥𐴌𐴞 𐴃𐴝𐴥𐴙𐴑𐴧𐴞𐴓𐴢. 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴝𐴥𐴃𐴠 𐴊𐴡𐴥𐴌𐴞 𐴒𐴡𐴔 𐴒𐴡𐴙𐴅𐴧𐴠𐴥, 𐴁𐴝𐴦𐴊𐴠 𐴊𐴟𐴣𐴌𐴝𐴘𐴊𐴞𐴘𐴠𐴥.

⁵𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴕 𐴀𐴝𐴏𐴡𐴤, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴉𐴟𐴖𐴝 𐴘𐴝𐴥 𐴊𐴡𐴀𐴣𐴌𐴝-𐴒𐴡𐴌𐴟 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴑𐴟𐴖𐴝𐴃𐴢 𐴉𐴡𐴌𐴞𐴓𐴠𐴥, 𐴘𐴞𐴥𐴁𐴝𐴌𐴠 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴃𐴟𐴓𐴞𐴤 𐴕𐴡 𐴓𐴡𐴘𐴁𐴝 𐴊𐴠؟“⁶𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴇𐴞𐴥𐴘𐴝𐴕𐴡𐴌 𐴇𐴡𐴕𐴡𐴤 𐴎𐴟𐴖𐴝𐴁𐴢 𐴊𐴞 𐴕𐴡𐴥 𐴉𐴝𐴌𐴠.

𐴕𐴞𐴏𐴡 𐴀𐴡𐴥𐴘𐴁𐴝𐴌 𐴕𐴡𐴏𐴞𐴥𐴘𐴡𐴃𐴢

⁷𐴀𐴞𐴏𐴝𐴤𐴘𐴠 𐴎𐴠𐴣𐴃𐴧𐴠𐴥 𐴊𐴝𐴖𐴡𐴃𐴢 𐴉𐴝𐴘𐴧𐴠𐴥 𐴊𐴠 𐴔𐴠𐴀𐴔𐴝𐴕 𐴀𐴡𐴥𐴑𐴧𐴡𐴓𐴠 𐴇𐴡𐴕𐴊𐴞𐴓𐴧𐴝 𐴒𐴡𐴌𐴞 𐴀𐴞𐴎𐴧𐴡𐴙𐴃𐴧𐴝 𐴎𐴝𐴒𐴝 𐴁𐴝𐴏𐴞𐴥𐴓𐴡𐴦𐴌 𐴊𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴊𐴞𐴘𐴠𐴥:⁸”𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴣𐴌𐴠 𐴁𐴡𐴘𐴌𐴝𐴙𐴃𐴧𐴝 𐴈𐴝𐴥𐴕𐴝𐴃𐴢 𐴊𐴝𐴖𐴡𐴃𐴢 𐴊𐴞𐴓𐴠𐴥, 𐴎𐴝𐴘𐴧𐴡𐴌𐴠 𐴀𐴞𐴎𐴧𐴡𐴙𐴃𐴧𐴝 𐴎𐴝𐴒𐴝𐴃𐴢 𐴕𐴡 𐴁𐴡𐴙𐴐𐴧𐴡𐴥𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴡𐴥𐴘𐴃𐴡𐴉𐴝𐴌𐴠 𐴘𐴡𐴥𐴒𐴧𐴗𐴝𐴘𐴠 𐴃𐴟𐴣𐴀𐴝𐴥𐴣𐴌 𐴃𐴟𐴥𐴖𐴝𐴌𐴡 𐴀𐴞𐴎𐴧𐴡𐴃𐴊𐴝𐴥𐴌 𐴀𐴠𐴥𐴎𐴧𐴡𐴕𐴡𐴌𐴠 𐴊𐴝𐴖𐴡𐴃𐴢 𐴊𐴞𐴘𐴠𐴥.⁹𐴎𐴡𐴊𐴞 𐴁𐴡𐴘𐴧𐴡𐴥, 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌𐴠 𐴊𐴝𐴖𐴡𐴃𐴢 𐴊𐴞𐴘𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴀𐴘𐴢 𐴃𐴟𐴣𐴀𐴝𐴥𐴣𐴌𐴠 𐴈𐴡𐴘𐴁𐴡𐴤 𐴊𐴠, ’𐴃𐴟𐴣𐴀𐴝𐴥𐴣𐴌 𐴎𐴝𐴒𐴝 𐴒𐴝𐴥𐴕 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴊𐴡𐴦.‘ 𐴇𐴠𐴥𐴃𐴟𐴕𐴡𐴃𐴢 𐴃𐴟𐴣𐴀𐴝𐴥𐴣𐴃𐴧𐴟 𐴐𐴡𐴥𐴌𐴡𐴔 𐴉𐴝𐴘, 𐴕𐴞𐴏𐴡𐴌 𐴎𐴝𐴒𐴝𐴃𐴢 𐴎𐴝𐴘 𐴁𐴟𐴀𐴝𐴤 𐴉𐴡𐴌𐴞𐴁𐴡𐴥.¹⁰𐴘𐴝𐴥𐴌𐴁𐴡𐴊𐴡𐴓𐴢, 𐴊𐴝𐴖𐴡𐴃𐴢 𐴉𐴝𐴘𐴓𐴠, 𐴎𐴝𐴘𐴧𐴡𐴌𐴠 𐴕𐴞𐴏𐴡𐴌 𐴎𐴝𐴒𐴝𐴃𐴢 𐴁𐴡𐴙𐴐𐴧𐴡𐴥𐴒𐴡𐴘, 𐴎𐴠𐴀𐴕𐴠 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌𐴠 𐴊𐴝𐴖𐴡𐴃𐴢 𐴊𐴞𐴘𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴀𐴘𐴢 𐴈𐴡𐴀 𐴊𐴠, ’𐴊𐴟𐴏𐴃𐴡𐴥, 𐴖𐴡𐴌𐴡𐴌 𐴎𐴝𐴒𐴝𐴃𐴢 𐴎𐴝𐴘 𐴁𐴡𐴘𐴧𐴡𐴥𐴒𐴡𐴘.‘ 𐴇𐴠𐴥𐴃𐴟𐴕𐴡𐴃𐴢 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴀𐴌 𐴊𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴀𐴞𐴎𐴧𐴡𐴃𐴢 𐴉𐴝𐴘𐴁𐴝.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴋𐴡𐴣𐴀𐴌 𐴑𐴟𐴥𐴖𐴝𐴓𐴝, 𐴀𐴞𐴥𐴃𐴝𐴌𐴠 𐴐𐴡𐴥𐴣𐴍𐴡 𐴒𐴡𐴌𐴝𐴥 𐴎𐴝𐴘𐴁𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴐𐴡𐴥𐴣𐴍𐴡 𐴑𐴟𐴥𐴖𐴝𐴓𐴝, 𐴀𐴞𐴥𐴃𐴝𐴌𐴠 𐴋𐴡𐴣𐴀𐴌 𐴒𐴡𐴌𐴝𐴥 𐴎𐴝𐴘𐴁𐴡.“

¹²𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌𐴠 𐴊𐴝𐴖𐴡𐴃𐴢 𐴊𐴞𐴘𐴠𐴥 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴊𐴟𐴀𐴣𐴙𐴅𐴧𐴝𐴌 𐴘𐴝𐴥 𐴁𐴞𐴘𐴝𐴓𐴡𐴌 𐴈𐴝𐴥𐴕𐴝 𐴒𐴡𐴌𐴞𐴥𐴓𐴠, 𐴃𐴟𐴣𐴀𐴝𐴥𐴣𐴌 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠, 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠, 𐴀𐴠𐴒𐴝𐴕𐴝𐴒𐴟𐴙𐴐𐴧𐴞𐴥 𐴌𐴠, 𐴘𐴝𐴥 𐴀𐴝𐴃𐴠𐴇𐴝𐴣𐴏𐴡𐴥𐴌 𐴃𐴟𐴖𐴝𐴚𐴒𐴡𐴌 𐴀𐴡𐴥𐴑𐴧𐴡𐴓𐴡𐴌𐴠 𐴊𐴝𐴖𐴡𐴃𐴢 𐴕𐴡 𐴊𐴞𐴘𐴡𐴥; 𐴎𐴡𐴊𐴞 𐴊𐴡, 𐴀𐴞𐴥𐴃𐴝𐴌𐴝 𐴘𐴡𐴥 𐴖𐴝𐴦𐴉𐴠𐴏𐴢 𐴃𐴟𐴣𐴀𐴝𐴥𐴣𐴌𐴠 𐴊𐴝𐴖𐴡𐴃𐴢 𐴊𐴞 𐴉𐴟𐴥𐴣𐴎𐴝𐴘𐴊𐴞𐴁𐴡.¹³𐴘𐴝𐴥𐴌 𐴃𐴟𐴥𐴖𐴝𐴌𐴡, 𐴃𐴟𐴀𐴛 𐴈𐴝𐴥𐴕𐴝 𐴒𐴡𐴌𐴞𐴥𐴓𐴠, 𐴓𐴟𐴓𐴝𐴤, 𐴓𐴠𐴚, 𐴀𐴠𐴊𐴧𐴠 𐴀𐴝𐴣𐴊𐴝𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴝𐴖𐴡𐴃𐴢 𐴊𐴞𐴘𐴡,¹⁴𐴃𐴡𐴥𐴘 𐴃𐴟𐴀𐴛 𐴁𐴡𐴌𐴈𐴡𐴃𐴢 𐴉𐴝𐴘𐴁𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡 𐴃𐴟𐴣𐴀𐴝𐴥𐴣𐴌𐴠 𐴉𐴟𐴥𐴣𐴎𐴝𐴘𐴊𐴞 𐴕𐴡 𐴉𐴝𐴌𐴞𐴁𐴡𐴥; 𐴀𐴝𐴦𐴌 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴢 𐴇𐴝𐴥𐴣𐴐𐴡𐴌-𐴀𐴡𐴌-𐴊𐴞𐴕 𐴎𐴞𐴕𐴊𐴝 𐴀𐴡𐴥𐴘 𐴀𐴟𐴍𐴞𐴤𐴁𐴡 𐴊𐴠 𐴇𐴞𐴥𐴘𐴝𐴓𐴝 𐴃𐴟𐴀𐴛 𐴁𐴡𐴊𐴡𐴓𐴝 𐴉𐴝𐴘𐴁𐴝.“

𐴋𐴡𐴣𐴀𐴌 𐴔𐴠𐴓𐴝𐴌 𐴔𐴠𐴀𐴏𐴝𐴓𐴢

¹⁵𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥 𐴊𐴠 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴠 𐴇𐴞𐴥𐴘𐴝𐴕 𐴉𐴟𐴥𐴕𐴞 𐴈𐴡𐴀𐴌 𐴊𐴠, ”𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴈𐴝𐴥𐴕𐴝 𐴈𐴝𐴥𐴘𐴁𐴡.“

¹⁶𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴠𐴎𐴧𐴡𐴕 𐴔𐴝𐴙𐴕𐴐𐴠𐴥 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴈𐴝𐴥𐴕𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴁𐴡𐴀𐴗𐴃𐴢 𐴑𐴞𐴘𐴡𐴥𐴌𐴠 𐴊𐴝𐴖𐴡𐴃𐴢 𐴊𐴞𐴘𐴠𐴥.¹⁷𐴈𐴝𐴥𐴕𐴝𐴌 𐴀𐴡𐴑𐴃𐴡𐴥 𐴀𐴡𐴥𐴘𐴧𐴠 𐴌𐴝𐴥𐴌, 𐴀𐴞𐴥𐴃𐴝𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴔𐴝𐴃𐴝𐴘 𐴁𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴒𐴡𐴗𐴀𐴌 𐴊𐴞𐴉𐴠𐴍𐴝𐴥𐴘𐴧𐴠, ’𐴀𐴝𐴘𐴧𐴡𐴤, 𐴘𐴝𐴓𐴝 𐴁𐴠𐴒𐴧𐴟𐴥𐴕 𐴃𐴡𐴘𐴧𐴝𐴌 𐴀𐴡𐴥𐴘𐴧𐴠.‘

¹⁸”𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴎𐴡𐴕-𐴎𐴡𐴕 𐴁𐴠𐴒𐴧𐴟𐴥𐴕𐴠 𐴁𐴝𐴇𐴝𐴤𐴕𐴝 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠. 𐴉𐴡𐴀𐴘𐴓𐴝𐴌 𐴀𐴞𐴥𐴃𐴠 𐴈𐴡𐴀𐴌 𐴊𐴠, ’𐴀𐴝𐴀𐴛 𐴀𐴠𐴑𐴧𐴝𐴥𐴕 𐴎𐴝𐴒𐴝 𐴑𐴞𐴕𐴧𐴞𐴥, 𐴀𐴝𐴣𐴀𐴃𐴧𐴟 𐴇𐴞𐴥𐴘𐴝𐴕 𐴏𐴝𐴘𐴃𐴡𐴥 𐴎𐴝𐴦 𐴉𐴡𐴌𐴞𐴁𐴡𐴥; 𐴔𐴠𐴀𐴌𐴁𐴝𐴕𐴞 𐴒𐴡𐴥𐴌𐴞 𐴀𐴝𐴣𐴀𐴌𐴠𐴥 𐴔𐴝𐴉𐴢 𐴒𐴡𐴌𐴡𐴤.‘

¹⁹”𐴀𐴝𐴌 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ’𐴀𐴝𐴀𐴛 𐴉𐴝𐴣𐴏𐴢 𐴎𐴟𐴌𐴝 𐴊𐴡𐴀𐴣𐴌𐴝-𐴒𐴡𐴌𐴟 𐴑𐴞𐴕𐴧𐴞𐴥, 𐴀𐴝𐴀𐴛 𐴇𐴞𐴥𐴀𐴕 𐴇𐴝𐴥𐴍𐴞𐴁𐴡 𐴕𐴠𐴥 𐴏𐴝𐴘𐴃𐴡𐴥 𐴎𐴝𐴙𐴌; 𐴔𐴠𐴀𐴌𐴁𐴝𐴕𐴞 𐴒𐴡𐴥𐴌𐴞 𐴀𐴝𐴣𐴀𐴌𐴠𐴥 𐴔𐴝𐴉𐴢 𐴒𐴡𐴌𐴡𐴤.‘

²⁰”𐴀𐴝𐴌𐴡𐴤 𐴀𐴠𐴥𐴎𐴧𐴡𐴕𐴠 𐴈𐴡𐴀𐴌 𐴊𐴠, ’𐴀𐴝𐴀𐴛 𐴕𐴡𐴘𐴝-𐴕𐴡𐴘𐴝 𐴁𐴞𐴘𐴝𐴥 𐴒𐴡𐴙𐴅𐴧𐴞𐴥 𐴊𐴠; 𐴀𐴝𐴀𐴛 𐴀𐴝𐴀𐴘𐴢 𐴕𐴡 𐴉𐴝𐴙𐴅𐴧𐴟𐴔.‘

²¹”𐴃𐴡𐴥𐴘 𐴒𐴡𐴗𐴀𐴌𐴒𐴗𐴝𐴥 𐴀𐴝𐴀𐴘𐴢 𐴃𐴝𐴌 𐴒𐴞𐴌𐴡𐴥𐴏𐴡𐴌𐴠 𐴇𐴞𐴥𐴀𐴕 𐴎𐴝𐴕𐴝𐴘𐴧𐴠𐴥. 𐴁𐴝𐴦𐴊𐴠 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴠 𐴒𐴟𐴐𐴧𐴝𐴤 𐴒𐴡𐴥𐴌𐴞 𐴕𐴞𐴎𐴡𐴌 𐴒𐴡𐴗𐴀𐴌𐴡𐴌𐴠 𐴈𐴡𐴀𐴌 𐴊𐴠, ’𐴃𐴡𐴌𐴝𐴃𐴡𐴌𐴞 𐴐𐴡𐴥𐴀𐴌𐴡𐴌 𐴌𐴝𐴏𐴃𐴝-𐴌𐴝𐴏𐴃𐴝 𐴀𐴠𐴊𐴧𐴠 𐴒𐴡𐴓𐴊𐴞-𐴒𐴡𐴓𐴊𐴞 𐴎𐴝𐴘 𐴒𐴡𐴌𐴞𐴉𐴢, 𐴔𐴝𐴎𐴟𐴌, 𐴀𐴝𐴣𐴊𐴝𐴤 𐴀𐴠𐴊𐴧𐴠 𐴓𐴠𐴚 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴕𐴒𐴡𐴥𐴘.‘

²²”𐴃𐴝𐴌𐴉𐴡𐴌𐴠 𐴒𐴡𐴗𐴀𐴌𐴒𐴗𐴝𐴥𐴘𐴠 𐴈𐴡𐴀𐴌 𐴊𐴠, ’𐴔𐴝𐴓𐴞𐴑, 𐴃𐴟𐴀𐴛 𐴎𐴠𐴀𐴕 𐴇𐴡𐴥𐴑𐴟𐴔 𐴒𐴡𐴙𐴅𐴧𐴡𐴥 𐴇𐴠𐴥𐴀𐴕 𐴒𐴡𐴙𐴅𐴧𐴝𐴥 𐴀𐴡𐴥𐴘𐴧𐴠, 𐴓𐴠𐴑𐴞𐴕 𐴀𐴝𐴙𐴅𐴧𐴡𐴤 𐴎𐴝𐴒𐴝 𐴇𐴝𐴥𐴓𐴞 𐴀𐴝𐴏𐴠𐴤.‘

²³”𐴒𐴞𐴌𐴡𐴥𐴏𐴠 𐴒𐴡𐴗𐴀𐴌𐴒𐴗𐴝𐴥𐴌𐴠 𐴈𐴡𐴀𐴌 𐴊𐴠, ’𐴁𐴝𐴀𐴌𐴠 𐴌𐴝𐴏𐴃𐴝-𐴌𐴝𐴏𐴃𐴝 𐴀𐴠𐴊𐴧𐴠 𐴉𐴡𐴣𐴃𐴠𐴥-𐴉𐴡𐴣𐴃𐴠𐴥 𐴎𐴝𐴦, 𐴎𐴝𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴍𐴠𐴥 𐴀𐴝𐴘 𐴁𐴡𐴓𐴧𐴝 𐴔𐴡𐴅𐴁𐴟𐴌 𐴒𐴡𐴌𐴞𐴥𐴐𐴢, 𐴎𐴠𐴀𐴕𐴠 𐴀𐴝𐴣𐴀𐴌 𐴒𐴡𐴥𐴌 𐴁𐴡𐴥𐴌𐴞𐴎𐴝𐴒𐴡𐴘.²⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴠𐴃𐴝𐴌𐴝𐴤𐴌𐴠 𐴊𐴝𐴖𐴡𐴃𐴢 𐴊𐴞𐴘𐴝 𐴒𐴞𐴘𐴠𐴥, 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴈𐴝𐴥𐴕𐴝 𐴇𐴝𐴥𐴘 𐴕𐴡 𐴉𐴝𐴌𐴞𐴁𐴡𐴥.‘ “

𐴀𐴟𐴔𐴧𐴡𐴃𐴢 𐴀𐴡𐴥𐴘𐴁𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

²⁵𐴀𐴠𐴑𐴁𐴝𐴌 𐴎𐴠𐴣𐴃𐴧𐴠𐴥 𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴁𐴝𐴘𐴠 𐴉𐴞𐴥𐴌𐴞 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠,²⁶”𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴠𐴥𐴍𐴠 𐴀𐴝𐴘𐴧𐴠𐴤 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴁𐴝𐴉𐴢, 𐴔𐴝𐴦, 𐴁𐴡𐴖𐴢, 𐴉𐴟𐴀𐴝𐴙𐴕, 𐴁𐴝𐴥𐴘𐴧𐴝𐴙𐴕 𐴀𐴠𐴊𐴧𐴠 𐴁𐴡𐴥𐴘𐴕𐴝𐴙𐴕 𐴀𐴡𐴌𐴠, 𐴁𐴡𐴥𐴓𐴑𐴠 𐴕𐴞𐴎𐴡𐴌 𐴎𐴝𐴕𐴡𐴌𐴠 𐴀𐴟𐴥𐴊𐴧𐴗𐴝 𐴀𐴝𐴣𐴀𐴌𐴠𐴥 𐴒𐴡𐴌𐴠𐴥 𐴊𐴠 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴈𐴡𐴔 𐴔𐴟𐴇𐴝𐴥𐴁𐴧𐴡𐴃𐴢 𐴕𐴡 𐴒𐴡𐴙𐴓𐴧𐴠𐴥, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴀𐴟𐴔𐴧𐴡𐴃𐴢 𐴀𐴡𐴥𐴘 𐴕𐴡 𐴉𐴝𐴌𐴠.²⁷𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴑𐴟𐴥𐴌𐴟𐴐𐴢 𐴕𐴡 𐴁𐴡𐴀𐴘𐴢 𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴊𐴡𐴌𐴠, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴀𐴟𐴔𐴧𐴡𐴃𐴢 𐴀𐴡𐴥𐴘 𐴕𐴡 𐴉𐴝𐴌𐴠.

²⁸”𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴕 𐴀𐴝𐴏𐴠𐴤, 𐴀𐴠𐴑𐴧𐴝𐴥𐴕 𐴔𐴞𐴕𐴝𐴥𐴌 𐴁𐴝𐴕𐴝𐴘𐴃𐴡𐴥 𐴏𐴝𐴘𐴓𐴠𐴥 𐴀𐴝𐴒𐴠 𐴁𐴡𐴀𐴘𐴢 𐴕𐴞𐴎𐴡𐴃𐴧𐴟 𐴇𐴞𐴥𐴘𐴝𐴕 𐴉𐴟𐴌𐴝𐴉𐴟𐴌𐴞 𐴁𐴝𐴕𐴝𐴘 𐴁𐴡𐴓𐴧𐴝 𐴑𐴟𐴓𐴝 𐴊𐴠 𐴇𐴠𐴥𐴊𐴟𐴕 𐴄𐴞𐴛𐴝-𐴉𐴡𐴘𐴐𐴝𐴤 𐴀𐴝𐴏𐴠𐴤 𐴕𐴠𐴥 𐴕𐴝𐴥𐴘 𐴑𐴞𐴘𐴝𐴏𐴢 𐴕𐴡 𐴒𐴡𐴌𐴞𐴥𐴁𐴡 𐴊𐴠𐴥؟²⁹𐴀𐴝𐴌𐴕𐴡𐴥𐴘𐴓𐴠 𐴃𐴡 𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴒𐴟𐴙𐴅𐴧𐴝 𐴒𐴝𐴥𐴕 𐴃𐴟𐴓𐴞𐴤 𐴁𐴝𐴦𐴊𐴠 𐴒𐴟𐴣𐴍𐴝 𐴃𐴟𐴓𐴞𐴤 𐴕𐴡 𐴉𐴝𐴌𐴠, 𐴎𐴠𐴃𐴝𐴌𐴝𐴤 𐴊𐴠𐴑𐴞𐴥𐴁𐴡 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴘𐴡𐴥𐴒𐴧𐴗𐴝𐴌𐴠 𐴃𐴠𐴥𐴐𐴠𐴌𐴝𐴘𐴁𐴡,³⁰𐴀𐴠𐴀𐴕 𐴈𐴡𐴀𐴘𐴢, ’𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴁𐴝𐴕𐴝 𐴐𐴟𐴥𐴌𐴟 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴒𐴟𐴣𐴍𐴝 𐴃𐴟𐴓𐴞𐴤 𐴕𐴡𐴥 𐴉𐴝𐴌𐴠.‘

³¹”𐴘𐴝𐴥𐴃𐴡, 𐴀𐴠𐴕𐴊𐴞𐴓𐴧𐴝 𐴁𐴝𐴀𐴣𐴐𐴧𐴝 𐴇𐴡𐴕 𐴀𐴝𐴏𐴠𐴤, 𐴀𐴝𐴌𐴀𐴠𐴑 𐴁𐴝𐴀𐴣𐴐𐴧𐴝 𐴓𐴧𐴡𐴥𐴘 𐴓𐴝𐴌𐴝𐴥𐴘 𐴒𐴡𐴙𐴃𐴧𐴡𐴥 𐴎𐴝𐴘𐴁𐴝𐴌 𐴃𐴝𐴥𐴑𐴞𐴓𐴠 𐴀𐴝𐴒𐴠 𐴁𐴡𐴀𐴘𐴢 𐴕𐴞𐴎𐴡𐴌 𐴊𐴡𐴐𐴢 𐴀𐴝𐴥𐴎𐴝𐴌 𐴉𐴡𐴥𐴗𐴏𐴢 𐴓𐴡𐴥𐴘, 𐴕𐴞𐴎𐴡𐴌 𐴇𐴠𐴥𐴓𐴝𐴉𐴢 𐴀𐴝𐴘𐴁𐴡𐴤 𐴊𐴠 𐴑𐴟𐴌𐴞 𐴀𐴝𐴥𐴎𐴝𐴌 𐴉𐴡𐴥𐴗𐴏𐴡𐴌 𐴔𐴟𐴑𐴝𐴁𐴠𐴓𐴝 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥 𐴕𐴠𐴥 𐴕𐴡 𐴉𐴝𐴌𐴞𐴁𐴡𐴥 𐴑𐴞𐴘𐴝𐴏𐴢 𐴕𐴡 𐴒𐴡𐴌𐴞𐴥𐴁𐴡 𐴊𐴠𐴥؟³²𐴕𐴡 𐴉𐴝𐴌𐴞𐴁𐴡𐴥 𐴊𐴠 𐴀𐴡𐴥𐴘𐴓𐴠, 𐴘𐴡𐴥𐴒𐴧𐴗𐴝𐴘𐴠 𐴊𐴟𐴌𐴠𐴥 𐴃𐴝𐴥𐴑𐴞𐴃𐴠 𐴕𐴡𐴔𐴝𐴙𐴕𐴊𐴝 𐴊𐴞𐴉𐴠𐴍𐴝𐴥𐴘, 𐴁𐴡𐴕𐴞𐴎𐴝𐴘𐴁𐴡𐴥𐴘 𐴓𐴧𐴝 𐴐𐴡𐴌𐴡𐴥𐴃𐴡𐴌 𐴀𐴝𐴌𐴡𐴏𐴢 𐴒𐴡𐴌𐴞𐴥𐴁𐴡.³³𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴠𐴌𐴞 𐴕𐴡 𐴊𐴠, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴀𐴟𐴔𐴧𐴡𐴃𐴢 𐴀𐴡𐴥𐴘 𐴕𐴡 𐴉𐴝𐴌𐴠.

𐴔𐴡𐴎𐴝 𐴏𐴝𐴥𐴌𐴝 𐴕𐴟𐴕 𐴑𐴞𐴔𐴡𐴃𐴢 𐴏𐴝𐴥𐴌𐴝

³⁴”𐴕𐴟𐴕 𐴃𐴡 𐴒𐴡𐴔 𐴅𐴞𐴕𐴞𐴥𐴐𐴢, 𐴔𐴡𐴕𐴃𐴡𐴌 𐴎𐴡𐴊𐴞 𐴕𐴟𐴕𐴡𐴌 𐴊𐴡𐴑 𐴎𐴝𐴦𐴒𐴡𐴥𐴘, 𐴃𐴡𐴥𐴀𐴘𐴓𐴠 𐴇𐴞𐴥𐴀𐴕𐴡𐴌𐴠 𐴑𐴠𐴀𐴕𐴒𐴡𐴌𐴞 𐴀𐴝𐴁𐴝𐴌 𐴕𐴟𐴕𐴐𐴝𐴥 𐴒𐴡𐴌𐴝𐴥 𐴎𐴝𐴘𐴁𐴡؟³⁵𐴇𐴞𐴥𐴀𐴕 𐴃𐴡 𐴕𐴡 𐴎𐴡𐴁𐴞𐴕𐴡𐴓𐴧𐴝 𐴈𐴝𐴔 𐴀𐴝𐴘𐴧𐴠𐴤 𐴀𐴝𐴦𐴌 𐴕𐴡 𐴉𐴝𐴥𐴣𐴐𐴢 𐴀𐴞𐴥𐴏𐴝𐴉𐴠 𐴈𐴝𐴔 𐴀𐴝𐴘𐴧𐴠𐴤; 𐴔𐴝𐴙𐴕𐴐𐴠𐴥 𐴇𐴞𐴥𐴀𐴕𐴡𐴌𐴠 𐴁𐴝𐴀𐴌𐴠 𐴉𐴠𐴥𐴓𐴝𐴘𐴊𐴠.
”𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.“

The Word for the World International

https://app.library.bible/content/87faca8b51c22590