Read 𐴓𐴟𐴑𐴝𐴥𐴏𐴢 13

𐴓𐴟𐴑𐴝𐴥𐴏𐴢13

𐴃𐴡𐴖𐴝𐴥 𐴒𐴡𐴌𐴡𐴤, 𐴀𐴝𐴌𐴕𐴡𐴥𐴘𐴓𐴠 𐴇𐴝𐴥𐴓𐴝𐴑 𐴀𐴡𐴥𐴘𐴎𐴝𐴘𐴁𐴝𐴒𐴡𐴘

¹𐴇𐴠𐴥 𐴀𐴡𐴑𐴃𐴡𐴥𐴃𐴢 𐴇𐴠𐴥𐴍𐴠 𐴀𐴠𐴕𐴊𐴞𐴓𐴧𐴝 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴇𐴝𐴥𐴎𐴞𐴌 𐴀𐴝𐴐𐴧𐴞𐴥𐴓𐴢, 𐴎𐴠𐴃𐴝𐴌𐴝𐴤 𐴀𐴞𐴏𐴝𐴤𐴌𐴠 𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐𐴢 𐴀𐴟𐴘𐴃𐴝𐴌𐴝𐴤𐴌 𐴁𐴝𐴦𐴁𐴟𐴃𐴠 𐴈𐴡𐴥𐴁𐴡𐴌 𐴊𐴞𐴥𐴓𐴢 𐴎𐴠𐴃𐴝𐴌𐴝𐴤𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴑𐴟𐴌𐴁𐴝𐴕𐴞 𐴊𐴞𐴁𐴝𐴐𐴧𐴡𐴥𐴃𐴢 𐴉𐴞𐴓𐴝𐴃𐴠 𐴑𐴡𐴃𐴡𐴥𐴓𐴢 𐴒𐴡𐴙𐴅𐴧𐴞𐴥𐴓𐴢.²𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴇𐴠𐴥 𐴊𐴡𐴐𐴝𐴤 𐴒𐴝𐴥𐴕 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴑𐴞𐴥𐴘𐴝𐴓𐴡𐴃𐴢 𐴑𐴞𐴥 𐴀𐴞𐴥𐴃𐴝𐴌𐴝 𐴒𐴝𐴓𐴞𐴓𐴡𐴌 𐴀𐴡𐴙𐴕𐴧𐴡 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴒𐴟𐴕𐴝𐴤𐴒𐴝𐴌 𐴀𐴝𐴐𐴧𐴞𐴥𐴓؟³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴕𐴡, 𐴁𐴡𐴥𐴓𐴑𐴠 𐴃𐴡𐴖𐴝𐴥 𐴕𐴡 𐴒𐴡𐴌𐴞𐴥𐴓𐴠, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴓𐴝𐴑 𐴀𐴡𐴥𐴘𐴎𐴝𐴘𐴁𐴝𐴒𐴡𐴘.⁴𐴘𐴝𐴥 𐴎𐴠 𐴀𐴝𐴣𐴍𐴝𐴥𐴌𐴡 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴏𐴞𐴥𐴓𐴡𐴔𐴡𐴌 𐴔𐴞𐴕𐴝𐴥𐴌 𐴉𐴡𐴌𐴞 𐴔𐴡𐴌𐴞𐴒𐴞𐴘𐴡𐴥𐴘, 𐴃𐴟𐴣𐴀𐴝𐴥𐴌𐴝𐴌 𐴑𐴞𐴥𐴘𐴝𐴓𐴡𐴃𐴢 𐴑𐴞𐴥 𐴀𐴞𐴥𐴃𐴝𐴌𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴃𐴝𐴥𐴑𐴠 𐴊𐴠 𐴀𐴡𐴙𐴕𐴧𐴡 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴒𐴟𐴕𐴝𐴤𐴒𐴝𐴌 𐴀𐴝𐴐𐴧𐴞𐴥𐴓؟⁵𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴕𐴡, 𐴁𐴡𐴥𐴓𐴑𐴠 𐴃𐴡𐴖𐴝𐴥 𐴕𐴡 𐴒𐴡𐴌𐴞𐴥𐴓𐴠, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴓𐴝𐴑 𐴀𐴡𐴥𐴘𐴎𐴝𐴘𐴁𐴝𐴒𐴡𐴘.“

𐴒𐴟𐴓𐴝 𐴏𐴝𐴥𐴌𐴝 𐴋𐴟𐴣𐴙𐴌-𐴒𐴝𐴏𐴡𐴌 𐴔𐴠𐴀𐴏𐴝𐴓𐴢

⁶𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴈𐴡𐴘𐴧𐴠𐴥: ”𐴀𐴠𐴎𐴧𐴡𐴕 𐴔𐴝𐴙𐴕𐴐𐴠𐴥 𐴕𐴞𐴎𐴡𐴌 𐴁𐴝𐴒𐴝𐴕𐴡𐴃𐴢 𐴀𐴠𐴒𐴧𐴗𐴝𐴤 𐴋𐴟𐴣𐴙𐴌-𐴒𐴝𐴏𐴢 𐴓𐴝𐴒𐴝𐴀𐴙𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴒𐴝𐴏𐴢 𐴏𐴗𐴝𐴥𐴃𐴢 𐴒𐴟𐴓𐴝 𐴃𐴟𐴖𐴝𐴘𐴃𐴡𐴥 𐴀𐴝𐴙𐴐𐴧𐴞𐴤𐴓𐴢, 𐴔𐴡𐴕𐴃𐴡𐴌 𐴀𐴠𐴒𐴧𐴗𐴝𐴤 𐴘𐴡𐴥 𐴕𐴡𐴥 𐴉𐴝𐴦.⁷𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴁𐴝𐴒𐴝𐴕 𐴏𐴡𐴥𐴣𐴓𐴡𐴘𐴝𐴌𐴠 𐴈𐴡𐴀𐴌 𐴊𐴠, ’𐴏𐴝𐴀, 𐴀𐴝𐴀𐴛 𐴃𐴞𐴕 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴀𐴠 𐴋𐴟𐴣𐴙𐴌-𐴒𐴝𐴏𐴢 𐴏𐴗𐴝𐴥𐴃𐴢 𐴒𐴟𐴓𐴝 𐴃𐴟𐴖𐴝𐴘𐴃𐴡𐴥 𐴀𐴝𐴘𐴧𐴞𐴤𐴌, 𐴔𐴡𐴕𐴃𐴡𐴌 𐴀𐴠𐴒𐴧𐴗𐴝𐴤 𐴘𐴡𐴥 𐴕𐴡𐴥 𐴉𐴝𐴘. 𐴘𐴞𐴁𐴝𐴤𐴌𐴠 𐴈𐴝𐴍𐴞𐴉𐴠𐴥𐴓𐴝, 𐴘𐴞𐴁𐴝𐴤𐴘𐴠 𐴇𐴝𐴥𐴕𐴧𐴝𐴑 𐴔𐴠𐴍𐴞 𐴑𐴞𐴘𐴝𐴥 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴃𐴧𐴡𐴥؟‘⁸𐴏𐴡𐴥𐴣𐴓𐴡𐴘𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ’𐴀𐴡𐴥 𐴔𐴝𐴓𐴞𐴑, 𐴘𐴞𐴁𐴝𐴤𐴌𐴠 𐴀𐴠 𐴁𐴡𐴏𐴡𐴥𐴌 𐴀𐴡𐴥 𐴃𐴝𐴥𐴑𐴞𐴃𐴡 𐴊𐴡𐴥, 𐴀𐴝𐴀𐴛 𐴘𐴞𐴁𐴝𐴤𐴌 𐴏𐴝𐴘𐴌𐴡𐴥𐴑𐴟𐴓𐴃𐴟 𐴑𐴟𐴌𐴞𐴥 𐴉𐴝𐴥𐴣𐴐𐴢 𐴊𐴞𐴥𐴘𐴟𐴔.⁹𐴁𐴝𐴦𐴊𐴠 𐴎𐴡𐴊𐴞 𐴀𐴝𐴘𐴧𐴠𐴤𐴌 𐴊𐴠 𐴁𐴡𐴏𐴡𐴥𐴌 𐴒𐴟𐴓𐴝 𐴊𐴡𐴥𐴌𐴠, 𐴃𐴡𐴥𐴀𐴘𐴓𐴠 𐴄𐴞𐴥𐴑 𐴀𐴝𐴏𐴠𐴤; 𐴔𐴡𐴕𐴃𐴡𐴌 𐴎𐴡𐴊𐴞 𐴕𐴡 𐴊𐴡𐴥𐴌𐴠, 𐴈𐴝𐴍𐴞𐴉𐴠𐴓𐴝𐴘𐴧𐴡.‘ “

𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴠𐴑 𐴒𐴟𐴎𐴝 𐴔𐴝𐴘𐴝𐴉𐴟𐴖𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹⁰𐴀𐴠𐴑 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴞𐴏𐴝𐴤 𐴀𐴠𐴑𐴧𐴝𐴥𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴃𐴝𐴦𐴓𐴞𐴔 𐴊𐴠𐴌.¹¹𐴇𐴠𐴥𐴍𐴠 𐴀𐴠𐴕𐴊𐴞𐴓𐴧𐴝 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝 𐴀𐴝𐴐𐴧𐴞𐴥𐴓𐴢 𐴎𐴞𐴁𐴝𐴤𐴌𐴠 𐴀𐴠𐴒𐴧𐴗𐴝𐴤 𐴈𐴡𐴥𐴌𐴝𐴉𐴢 𐴅𐴞𐴕𐴠 𐴁𐴞𐴘𐴝𐴌𐴝𐴙𐴔𐴧𐴝 𐴁𐴝𐴕𐴝𐴘 𐴌𐴝𐴙𐴑𐴧𐴠𐴥 𐴊𐴠 𐴀𐴝𐴣𐴍𐴝𐴥𐴌𐴡 𐴁𐴡𐴏𐴡𐴥𐴌 𐴀𐴡𐴥𐴘𐴧𐴠. 𐴘𐴡𐴥𐴒𐴧𐴗𐴝 𐴒𐴟𐴎𐴝 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴁𐴞𐴓𐴑𐴟𐴥𐴓𐴢 𐴀𐴟𐴎𐴟 𐴀𐴡𐴥𐴘 𐴕𐴡 𐴉𐴝𐴙𐴃𐴧𐴡.¹²𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴊𐴠𐴑𐴞𐴥, 𐴋𐴝𐴥𐴑𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴀𐴡 𐴇𐴝𐴥𐴓𐴝, 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴁𐴞𐴘𐴝𐴌𐴝𐴔𐴡𐴃𐴧𐴟 𐴀𐴝𐴎𐴝𐴊𐴢 𐴀𐴡𐴥𐴘𐴧𐴡.“¹³𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥𐴘𐴠, 𐴃𐴡𐴥𐴘 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴘𐴡𐴥𐴒𐴧𐴗𐴝 𐴀𐴟𐴎𐴟 𐴀𐴡𐴥𐴘𐴒𐴞𐴘𐴡𐴘 𐴀𐴝𐴦𐴌 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

¹⁴𐴓𐴠𐴑𐴞𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴏𐴡𐴥𐴊𐴧𐴝𐴌𐴠, 𐴀𐴞𐴏𐴝𐴤𐴘𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴁𐴞𐴘𐴝𐴌𐴝𐴙𐴔𐴧𐴝 𐴒𐴡𐴔 𐴒𐴡𐴙𐴅𐴧𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴒𐴟𐴐𐴧𐴝𐴤 𐴒𐴡𐴥𐴌𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴈𐴝𐴔 𐴒𐴡𐴙𐴃𐴧𐴡𐴥 𐴏𐴡𐴥 𐴊𐴞𐴕 𐴀𐴝𐴏𐴠𐴤; 𐴇𐴠𐴥𐴃𐴡𐴓𐴧𐴝 𐴊𐴞𐴕 𐴇𐴞𐴥𐴀𐴕𐴡𐴃𐴢 𐴀𐴝𐴀𐴘𐴢 𐴒𐴡𐴔 𐴀𐴡𐴥𐴘𐴧𐴡𐴒𐴝𐴘, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴕𐴡.“

¹⁵𐴔𐴡𐴕𐴃𐴡𐴌 𐴔𐴝𐴓𐴞𐴑𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴑𐴞𐴥 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴕𐴞𐴎𐴡𐴌 𐴊𐴡𐴀𐴣𐴌𐴝 𐴒𐴡𐴌𐴟𐴌𐴠 𐴘𐴝𐴥 𐴒𐴝𐴊𐴝𐴤𐴌𐴠 𐴀𐴟𐴌𐴝𐴃𐴧𐴟 𐴑𐴟𐴥𐴓𐴞 𐴉𐴝𐴕𐴞𐴥 𐴈𐴝𐴥𐴁𐴝𐴘𐴃𐴡 𐴕𐴡 𐴓𐴡𐴘𐴎𐴡 𐴕𐴠𐴥؟¹⁶𐴃𐴡𐴥𐴘 𐴀𐴠 𐴔𐴝𐴘𐴝𐴉𐴟𐴖𐴝, 𐴎𐴞𐴁𐴝𐴤 𐴀𐴞𐴁𐴌𐴝𐴇𐴞𐴥𐴔𐴡𐴌 𐴎𐴠𐴥𐴌𐴉𐴟𐴖𐴝, 𐴎𐴞𐴁𐴝𐴤𐴌𐴠 𐴐𐴡𐴥𐴘𐴃𐴝𐴕𐴠 𐴀𐴝𐴣𐴍𐴝𐴥𐴌𐴡 𐴁𐴡𐴏𐴡𐴥𐴌 𐴉𐴝𐴥𐴕 𐴁𐴝𐴣𐴊𐴞𐴥 𐴌𐴝𐴙𐴑𐴧𐴞𐴥𐴓𐴢, 𐴘𐴡𐴒𐴧𐴗𐴝𐴥𐴌𐴠 𐴑𐴞𐴥 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴇𐴠𐴥 𐴁𐴝𐴣𐴊𐴝𐴤𐴃𐴧𐴟 𐴀𐴝𐴎𐴝𐴊𐴢 𐴒𐴡𐴌𐴞𐴥𐴊𐴞𐴘𐴝 𐴕𐴡 𐴎𐴝 𐴕𐴠𐴥؟“

¹⁷𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴈𐴡𐴘𐴧𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴌 𐴔𐴟𐴈𐴝𐴥𐴓𐴠𐴉𐴢-𐴒𐴡𐴌𐴡𐴤𐴘𐴝 𐴁𐴠𐴒𐴧𐴟𐴥𐴕𐴠 𐴐𐴡𐴥𐴌𐴡𐴔 𐴉𐴝𐴘𐴧𐴠𐴥; 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴎𐴠 𐴃𐴝𐴦𐴅𐴟𐴙𐴂𐴧𐴝 𐴈𐴝𐴔 𐴒𐴡𐴙𐴃𐴧𐴡𐴥 𐴇𐴞𐴥𐴀𐴕𐴠 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴢 𐴁𐴠𐴒𐴧𐴟𐴥𐴕 𐴑𐴟𐴥𐴐𐴞 𐴀𐴡𐴥𐴘𐴧𐴠.

𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴔𐴠𐴀𐴏𐴝𐴓𐴢

¹⁸𐴃𐴡𐴥𐴘 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴑𐴞𐴘𐴡𐴥𐴌 𐴋𐴡𐴥𐴙𐴓𐴧𐴝؟ 𐴇𐴞𐴥𐴘𐴝𐴕𐴡𐴌𐴠 𐴀𐴝𐴀𐴛 𐴑𐴞𐴦 𐴓𐴡𐴘 𐴁𐴡𐴌𐴝𐴁𐴡𐴌 𐴒𐴡𐴙𐴃𐴧𐴝𐴥𐴔؟¹⁹𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴠𐴒𐴧𐴗𐴝𐴤 𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴋𐴡𐴥𐴙𐴓𐴧𐴝, 𐴎𐴞𐴁𐴝𐴤𐴌𐴠 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴓𐴡𐴦𐴘𐴢 𐴕𐴞𐴎𐴡𐴌 𐴑𐴠𐴥𐴃𐴞𐴃𐴢 𐴓𐴝𐴒𐴝𐴘𐴠𐴥𐴒𐴡𐴘; 𐴘𐴞𐴥𐴁𐴝 𐴁𐴝𐴌𐴞𐴥 𐴀𐴟𐴍𐴞𐴤 𐴀𐴠𐴒𐴧𐴗𐴝𐴤 𐴒𐴝𐴏𐴢 𐴁𐴡𐴙𐴕𐴧𐴠𐴥, 𐴀𐴝𐴦𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴠 𐴘𐴞𐴥𐴁𐴝𐴌 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴡𐴃𐴢 𐴁𐴝𐴇𐴝𐴤 𐴁𐴝𐴙𐴕𐴊𐴠𐴤.“

𐴐𐴟𐴥𐴄𐴝𐴌𐴡𐴌 𐴔𐴠𐴀𐴏𐴝𐴓𐴢

²⁰𐴀𐴞𐴥𐴁𐴝𐴘𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌𐴠 𐴑𐴞𐴦 𐴓𐴡𐴘 𐴁𐴡𐴌𐴝𐴁𐴡𐴌 𐴒𐴡𐴙𐴃𐴧𐴝𐴥𐴔؟²¹𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴐𐴟𐴥𐴄𐴝𐴌𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕𐴡𐴌𐴠 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝𐴘𐴠 𐴓𐴡𐴦𐴘𐴢 𐴃𐴡𐴑𐴡𐴌𐴞𐴁𐴝𐴕 𐴀𐴠𐴑𐴧𐴟𐴌𐴞 𐴃𐴞𐴕 𐴐𐴠𐴥𐴌 𐴀𐴝𐴄𐴝𐴃𐴢 𐴔𐴞𐴘𐴝𐴥𐴘𐴧𐴠, 𐴁𐴝𐴦𐴊𐴠 𐴒𐴟𐴣𐴍𐴝 𐴈𐴝𐴛𐴡𐴌 𐴊𐴡𐴓𐴝 𐴉𐴟𐴥𐴓𐴞 𐴀𐴟𐴙𐴄𐴧𐴠𐴥.“

𐴏𐴞𐴘𐴡𐴕 𐴊𐴡𐴌𐴡𐴎𐴝

²²𐴀𐴞𐴏𐴝𐴤 𐴐𐴡𐴥𐴀𐴌𐴠-𐴐𐴡𐴥𐴀𐴌𐴠 𐴀𐴠𐴊𐴧𐴠 𐴉𐴝𐴌𐴝-𐴉𐴝𐴌𐴝 𐴃𐴝𐴦𐴓𐴞𐴔 𐴊𐴞-𐴊𐴞, 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴀𐴟𐴎𐴟 𐴎𐴝𐴦𐴃𐴢 𐴊𐴡𐴙𐴅𐴧𐴠.²³𐴀𐴠𐴎𐴧𐴡𐴕𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴕𐴠𐴅𐴝𐴃𐴢 𐴉𐴡𐴘𐴝 𐴈𐴡𐴔 𐴕𐴞𐴥𐴑𐴞؟“
𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠,²⁴”𐴏𐴞𐴘𐴡𐴕 𐴊𐴡𐴌𐴡𐴎𐴝 𐴁𐴝𐴥𐴘 𐴒𐴡𐴥𐴓𐴞 𐴁𐴡𐴓𐴧𐴝 𐴎𐴝𐴕-𐴉𐴡𐴌𐴝𐴕𐴠 𐴑𐴟𐴐𐴞𐴥𐴐𐴢 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴁𐴡𐴀𐴗𐴃𐴢 𐴎𐴡𐴕 𐴒𐴡𐴥𐴙𐴓𐴃𐴡 𐴑𐴟𐴐𐴞𐴥𐴐𐴢 𐴒𐴡𐴌𐴞𐴥𐴁𐴡 𐴔𐴡𐴕𐴃𐴡𐴌 𐴕𐴡 𐴉𐴝𐴌𐴞𐴁𐴡𐴥.²⁵𐴎𐴠𐴣𐴃𐴧𐴠𐴥 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴠 𐴀𐴟𐴍𐴞𐴤 𐴊𐴟𐴖𐴝𐴌 𐴁𐴝𐴣𐴊𐴞𐴥𐴉𐴠𐴓𐴝𐴘𐴁𐴡, 𐴃𐴟𐴣𐴀𐴝𐴥𐴌𐴝 𐴁𐴝𐴀𐴌𐴠 𐴃𐴞𐴥𐴘𐴝𐴘 𐴊𐴟𐴖𐴝𐴌 𐴁𐴝𐴅𐴧𐴝𐴘-𐴁𐴝𐴅𐴧𐴝𐴘 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤𐴃𐴢 𐴊𐴡𐴌𐴞𐴁𐴝, ’𐴀𐴡𐴥 𐴔𐴝𐴓𐴞𐴑, 𐴀𐴝𐴣𐴀𐴌𐴝𐴓𐴧𐴝 𐴊𐴟𐴖𐴝𐴌 𐴒𐴝𐴥𐴕 𐴑𐴟𐴥𐴓𐴡.‘
”𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴘𐴁𐴡𐴤 𐴊𐴠, ’𐴀𐴝𐴀𐴛 𐴕𐴡 𐴎𐴝𐴕𐴞 𐴃𐴟𐴣𐴀𐴝𐴥𐴌𐴝 𐴇𐴡𐴍𐴞𐴥𐴘𐴝𐴌.‘

²⁶”𐴇𐴠𐴥𐴃𐴟𐴕𐴡𐴃𐴢 𐴃𐴟𐴣𐴀𐴝𐴥𐴌𐴝 𐴈𐴡𐴖𐴝𐴤𐴃𐴢 𐴊𐴡𐴌𐴞𐴁𐴝 𐴊𐴠, ’𐴀𐴝𐴣𐴀𐴌𐴝 𐴃𐴡 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴀𐴉𐴞𐴘𐴝 𐴒𐴡𐴙𐴅𐴧𐴞𐴥𐴓𐴝𐴔, 𐴀𐴝𐴦𐴌 𐴃𐴟𐴀𐴛 𐴀𐴝𐴣𐴀𐴌𐴝𐴌 𐴌𐴝𐴏𐴃𐴝-𐴌𐴝𐴏𐴃𐴝 𐴃𐴝𐴦𐴓𐴞𐴔 𐴊𐴞𐴃𐴝.‘

²⁷”𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴈𐴡𐴘𐴁𐴡𐴤 𐴊𐴠, ’𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴝𐴀𐴛 𐴕𐴡 𐴎𐴝𐴕𐴞 𐴃𐴟𐴣𐴀𐴝𐴥𐴌𐴝 𐴇𐴡𐴍𐴞𐴥𐴘𐴝𐴌. 𐴑𐴟𐴈𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌 𐴈𐴠𐴥𐴕𐴃𐴟 𐴊𐴟𐴌 𐴀𐴡𐴥.‘

²⁸”𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴞𐴥𐴁𐴝 𐴀𐴠𐴊𐴧𐴠 𐴊𐴝𐴃𐴠 𐴊𐴝𐴃𐴢 𐴑𐴞𐴌𐴑𐴞𐴌𐴝𐴘𐴁𐴝𐴥 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴊𐴠𐴑𐴞𐴥𐴁𐴝 𐴊𐴠, 𐴀𐴞𐴁𐴌𐴝𐴇𐴞𐴥𐴔, 𐴀𐴞𐴏𐴝𐴈𐴝𐴥𐴑, 𐴘𐴝𐴑𐴟𐴁𐴢 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴟𐴥𐴃𐴡𐴌𐴠, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴀𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠.²⁹𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴉𐴟𐴑, 𐴉𐴡𐴏𐴞𐴥𐴔, 𐴀𐴟𐴃𐴧𐴡𐴌, 𐴀𐴠𐴊𐴧𐴠 𐴊𐴡𐴀𐴙𐴕𐴡𐴃𐴧𐴟 𐴀𐴝𐴀𐴘𐴢 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴈𐴝𐴥𐴘𐴃𐴡 𐴁𐴡𐴘𐴁𐴡𐴥.³⁰𐴁𐴠𐴐𐴡𐴥𐴑, 𐴎𐴠𐴃𐴝𐴌𐴝𐴤 𐴀𐴠𐴇𐴡𐴥𐴕 𐴉𐴞𐴏𐴠𐴤 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝 𐴀𐴝𐴒𐴠 𐴀𐴡𐴥𐴘𐴎𐴝𐴘𐴁𐴡𐴘; 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴀𐴠𐴇𐴡𐴥𐴕 𐴀𐴝𐴒𐴠 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝 𐴉𐴞𐴏𐴠𐴤 𐴀𐴡𐴥𐴘𐴎𐴝𐴘𐴁𐴡𐴘.“

𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢

³¹𐴇𐴠𐴥 𐴀𐴡𐴑𐴃𐴡𐴥𐴃𐴢 𐴇𐴡𐴦𐴎𐴧𐴡𐴕 𐴉𐴠𐴥𐴌𐴡𐴐𐴞𐴘𐴠 𐴀𐴝𐴀𐴘𐴢 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴠 𐴎𐴝𐴒𐴝𐴃𐴧𐴟 𐴇𐴡𐴕𐴡𐴤 𐴔𐴞𐴑𐴧𐴝𐴥 𐴎𐴡𐴦𐴒𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴠𐴥𐴌𐴟𐴊𐴡𐴃𐴧𐴟 𐴃𐴟𐴣𐴀𐴝𐴥𐴣𐴌𐴠 𐴔𐴝𐴌𐴞𐴉𐴠𐴙𐴓𐴃𐴡 𐴔𐴡𐴕𐴠𐴈𐴡𐴀𐴌.“

³²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴦, 𐴇𐴠𐴥 𐴐𐴞𐴥𐴘𐴝𐴓𐴡𐴌𐴠 𐴈𐴡𐴘𐴁𐴝𐴤 𐴊𐴠, ’𐴀𐴝𐴀𐴛 𐴀𐴝𐴙𐴅𐴧𐴝 𐴀𐴠𐴊𐴧𐴠 𐴇𐴝𐴙𐴓𐴧𐴝 𐴁𐴟𐴥𐴃𐴢 𐴊𐴝𐴥𐴉𐴝𐴘𐴧𐴟𐴔 𐴀𐴠𐴊𐴧𐴠 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴒𐴡𐴔 𐴒𐴡𐴌𐴞𐴥𐴘𐴟𐴔, 𐴀𐴝𐴦𐴌 𐴃𐴞𐴕 𐴊𐴞𐴕𐴡𐴃𐴢 𐴊𐴞𐴕 𐴀𐴝𐴣𐴀𐴌 𐴔𐴡𐴑𐴏𐴡𐴥𐴃𐴢 𐴉𐴟𐴌𐴝 𐴀𐴡𐴥𐴘𐴁𐴡.‘³³𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴀𐴝𐴣𐴀𐴃𐴧𐴟 𐴀𐴝𐴙𐴅𐴧𐴝, 𐴇𐴝𐴙𐴓𐴧𐴝 𐴀𐴠𐴊𐴧𐴠 𐴉𐴡𐴀𐴌𐴟𐴌 𐴀𐴟𐴎𐴟 𐴏𐴡𐴉𐴡𐴥𐴌 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴕𐴡𐴤 𐴕𐴡𐴁𐴞𐴌 𐴔𐴡𐴦𐴃𐴢 𐴃𐴡 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴁𐴝𐴀𐴌𐴠 𐴀𐴡𐴥𐴘 𐴕𐴡 𐴉𐴝𐴌𐴠.

³⁴”𐴅𐴠𐴌𐴟𐴥𐴏𐴝𐴓𐴠𐴔, 𐴀𐴡𐴥 𐴅𐴠𐴌𐴟𐴥𐴏𐴝𐴓𐴠𐴔, 𐴃𐴟𐴘 𐴎𐴠𐴦𐴕𐴞𐴑𐴞 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴑𐴡𐴃𐴡𐴥𐴓𐴢 𐴒𐴡𐴌𐴡𐴤𐴏𐴢 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤𐴌𐴠 𐴃𐴡𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠 𐴀𐴞𐴥𐴃𐴝𐴌𐴝𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴡𐴏𐴢. 𐴑𐴟𐴀𐴣𐴌𐴞-𐴑𐴟𐴌𐴝𐴤𐴘𐴠 𐴎𐴠𐴕𐴊𐴞𐴓𐴧𐴝 𐴕𐴞𐴎𐴡𐴌 𐴏𐴡𐴥𐴀 𐴀𐴡𐴥𐴑𐴧𐴡𐴓𐴡𐴌𐴠 𐴘𐴞𐴥𐴁𐴝𐴌 𐴉𐴝𐴑𐴡𐴌 𐴁𐴟𐴥𐴃𐴡𐴌𐴠 𐴎𐴡𐴔𐴝 𐴒𐴡𐴌𐴞𐴥 𐴌𐴝𐴑𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴃𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴎𐴡𐴔𐴝 𐴒𐴡𐴌𐴞𐴥 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴝𐴀𐴛 𐴇𐴡𐴃𐴡𐴥 𐴁𐴝𐴌 𐴏𐴝𐴘𐴧𐴞𐴥 𐴊𐴠 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴕𐴡𐴥 𐴏𐴡𐴀.³⁵𐴉𐴟𐴥𐴕𐴡, 𐴃𐴟𐴣𐴀𐴝𐴥𐴌𐴝𐴌 𐴒𐴡𐴥𐴌 𐴃𐴟𐴣𐴀𐴝𐴥𐴌𐴝𐴌 𐴏𐴟𐴑𐴡𐴌 𐴔𐴟𐴀𐴕𐴃𐴟 𐴏𐴝𐴥𐴌𐴝𐴒𐴡𐴌 𐴀𐴡𐴥𐴘𐴎𐴝𐴘𐴁𐴡𐴘. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴠𐴃𐴡𐴥𐴑𐴧𐴝𐴓𐴢 𐴕𐴡 𐴊𐴠𐴑𐴞𐴥𐴁𐴝 𐴎𐴠𐴃𐴡𐴥𐴑𐴧𐴝𐴓𐴢 𐴃𐴟𐴣𐴀𐴝𐴥𐴌𐴝 𐴕𐴡𐴥 𐴈𐴡𐴀 𐴊𐴠, ’𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤 𐴔𐴝𐴁𐴟𐴊𐴡𐴌 𐴕𐴝𐴔𐴠 𐴀𐴝𐴘𐴧𐴠𐴤𐴌.‘ “

The Word for the World International

https://app.library.bible/content/87faca8b51c22590