Read 𐴓𐴟𐴑𐴝𐴥𐴏𐴢 12

𐴓𐴟𐴑𐴝𐴥𐴏𐴢12

𐴔𐴟𐴕𐴝𐴉𐴠𐴥𐴑𐴞𐴌 𐴁𐴝𐴦𐴁𐴟𐴃𐴠 𐴀𐴟𐴥𐴣𐴐𐴞𐴘𐴝𐴌𐴞

¹𐴇𐴠𐴥 𐴀𐴡𐴑𐴃𐴡𐴥𐴃𐴢, 𐴎𐴠𐴣𐴃𐴧𐴠𐴥 𐴀𐴠𐴊𐴟𐴥𐴕 𐴀𐴝𐴥𐴎𐴝𐴌-𐴀𐴝𐴥𐴎𐴝𐴌 𐴔𐴝𐴕𐴟𐴥𐴙𐴐𐴢 𐴎𐴡𐴔𐴝 𐴀𐴡𐴥𐴘𐴧𐴠 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴌 𐴖𐴡𐴌𐴠 𐴀𐴠𐴎𐴧𐴡𐴕 𐴉𐴡𐴌𐴠𐴌, 𐴀𐴞𐴏𐴝𐴤𐴘𐴠 𐴀𐴠𐴁𐴧𐴠 𐴀𐴝𐴒𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴖𐴝𐴤 𐴐𐴟𐴥𐴌𐴟 𐴒𐴡𐴙𐴅𐴧𐴠𐴥 𐴊𐴠 𐴑𐴞, ”𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴐𐴟𐴥𐴄𐴝𐴌𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴘𐴝𐴥𐴕𐴞 𐴀𐴞𐴥𐴃𐴝𐴌𐴝𐴌 𐴔𐴟𐴕𐴝𐴉𐴠𐴥𐴑𐴞 𐴃𐴧𐴟.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴇𐴠𐴥𐴌 𐴕𐴡 𐴀𐴡𐴥𐴘𐴁𐴡 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴅𐴞𐴕𐴞𐴥𐴐𐴢 𐴒𐴟𐴥𐴙𐴅𐴧𐴝 𐴕𐴝𐴥𐴘, 𐴀𐴝𐴦𐴌 𐴎𐴝𐴕𐴝 𐴕𐴡 𐴎𐴝𐴘𐴁𐴡 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴅𐴞𐴕𐴞𐴥𐴐𐴢 𐴓𐴟𐴑𐴝𐴘𐴧𐴝 𐴕𐴝𐴥𐴘.³𐴇𐴠𐴥 𐴀𐴞𐴥𐴏𐴝𐴉𐴠, 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴀𐴝𐴕𐴊𐴝𐴤𐴌𐴡𐴃𐴢 𐴈𐴡𐴘𐴧𐴡𐴥, 𐴇𐴞𐴥𐴀𐴕 𐴉𐴡𐴀𐴌𐴡𐴃𐴢 𐴉𐴟𐴥𐴕𐴝 𐴎𐴝𐴘𐴁𐴡; 𐴀𐴝𐴦𐴌 𐴎𐴞𐴀𐴕 𐴁𐴟𐴥𐴃𐴡𐴌𐴡𐴌 𐴑𐴝𐴔𐴝𐴥𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴉𐴟𐴥𐴐𐴉𐴟𐴐𐴝𐴘𐴧𐴡, 𐴇𐴞𐴥𐴀𐴕 𐴒𐴡𐴥𐴌𐴡𐴌 𐴏𐴝𐴥𐴊𐴡𐴌 𐴖𐴡𐴃𐴧𐴟𐴥 𐴀𐴠𐴓𐴝𐴕 𐴒𐴡𐴌𐴝𐴥 𐴎𐴝𐴘𐴁𐴡.

𐴇𐴝𐴌𐴠𐴤 𐴋𐴡𐴦𐴌𐴝 𐴉𐴡𐴌𐴞𐴁𐴡𐴥

⁴”𐴀𐴡𐴥 𐴀𐴝𐴣𐴀𐴌 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴟𐴘𐴃𐴝𐴌𐴝𐴤𐴌𐴠 𐴕𐴡 𐴋𐴡𐴦𐴌𐴝𐴘𐴧𐴡𐴥 𐴎𐴠𐴃𐴝𐴌𐴝𐴤 𐴇𐴝𐴘𐴧𐴝𐴌𐴠 𐴑𐴡𐴃𐴡𐴥𐴓𐴢 𐴒𐴡𐴌𐴠𐴥 𐴔𐴡𐴕𐴃𐴡𐴌 𐴘𐴝𐴥𐴌𐴁𐴝𐴦𐴊𐴠 𐴀𐴝𐴌 𐴑𐴠𐴏𐴧𐴟𐴥 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥𐴌 𐴕𐴡 𐴃𐴝𐴥𐴑𐴠.⁵𐴓𐴠𐴑𐴞𐴕 𐴀𐴝𐴀𐴛 𐴊𐴝𐴈𐴝𐴤𐴘𐴊𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴝𐴌𐴠𐴤 𐴋𐴡𐴦𐴌𐴝 𐴉𐴡𐴌𐴞𐴁𐴡𐴥: 𐴀𐴟𐴁𐴝𐴤𐴌𐴠 𐴋𐴡𐴦𐴌𐴡 𐴎𐴞𐴁𐴝𐴤𐴃𐴧𐴟 𐴃𐴟𐴣𐴀𐴝𐴥𐴣𐴌 𐴇𐴝𐴘𐴧𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴝𐴦𐴊𐴠 𐴎𐴟𐴎𐴟𐴑𐴡𐴃𐴢 𐴉𐴠𐴥𐴓𐴝𐴘𐴊𐴞𐴁𐴝𐴌 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤. 𐴀𐴡𐴥𐴘, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴞𐴥𐴁𐴝𐴌𐴠 𐴁𐴠 𐴋𐴡𐴦𐴌𐴡.⁶𐴉𐴝𐴣𐴏𐴢 𐴏𐴗𐴝𐴥 𐴉𐴞𐴛𐴝𐴙𐴅𐴧𐴝 𐴑𐴞 𐴈𐴡𐴔 𐴄𐴞𐴛𐴝 𐴓𐴡𐴘 𐴕𐴡 𐴁𐴠𐴏𐴠 𐴕𐴠𐴥؟ 𐴃𐴡𐴀 𐴇𐴞𐴥𐴀𐴕𐴡𐴌 𐴁𐴟𐴥𐴃𐴡𐴃𐴧𐴟 𐴀𐴝𐴓𐴧𐴝𐴘𐴠 𐴀𐴠𐴒𐴧𐴗𐴝𐴤𐴌𐴠 𐴘𐴡𐴥 𐴕𐴡 𐴉𐴡𐴀𐴌𐴝.⁷𐴁𐴠𐴐𐴡𐴥𐴑 𐴃𐴟𐴣𐴀𐴝𐴥𐴌𐴝𐴌 𐴔𐴝𐴃𐴝𐴥𐴌 𐴏𐴟𐴓𐴢 𐴀𐴟𐴥𐴊𐴧𐴗𐴝 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴃𐴧𐴟 𐴒𐴡𐴕𐴝 𐴀𐴝𐴏𐴠𐴤. 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴃𐴟𐴣𐴀𐴝𐴥𐴌𐴝𐴌 𐴑𐴞𐴔𐴡𐴃𐴢 𐴁𐴡𐴀𐴗𐴃𐴢 𐴉𐴞𐴛𐴝𐴙𐴅𐴧𐴝 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤.

𐴀𐴞𐴏𐴝𐴤𐴌𐴠 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴐𐴞𐴥𐴑𐴝𐴌 𐴀𐴝𐴦𐴌 𐴀𐴞𐴕𐴑𐴝𐴌 𐴒𐴡𐴌𐴝𐴥

⁸”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴐𐴞𐴥𐴑𐴝𐴌 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴘𐴠 𐴘𐴡𐴥 𐴀𐴝𐴓𐴧𐴝𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴐𐴞𐴥𐴑𐴝𐴌 𐴒𐴡𐴌𐴞𐴥𐴁𐴡.⁹𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴀𐴞𐴕𐴑𐴝𐴌 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴀𐴝𐴓𐴧𐴝𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴀𐴞𐴕𐴑𐴝𐴌 𐴒𐴡𐴌𐴝𐴥 𐴎𐴝𐴘𐴁𐴡.¹⁰𐴇𐴡𐴕𐴡𐴤𐴑𐴞𐴘𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴇𐴠𐴥𐴓𐴝𐴉𐴢 𐴇𐴡𐴕𐴡𐴤 𐴈𐴡𐴃𐴝𐴤 𐴈𐴡𐴘𐴓𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴃𐴡 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴎𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴂𐴝𐴑-𐴌𐴟𐴀𐴌 𐴑𐴟𐴉𐴠𐴥𐴌𐴞 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴕𐴡 𐴎𐴝𐴘𐴁𐴡.

¹¹”𐴎𐴠𐴣𐴃𐴧𐴠𐴥 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴀𐴡𐴃𐴢, 𐴀𐴠𐴊𐴧𐴠 𐴇𐴝𐴥𐴑𐴞𐴔 𐴀𐴠𐴊𐴧𐴠 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴓𐴡𐴘𐴎𐴝, 𐴇𐴠𐴥𐴣𐴃𐴧𐴠 𐴇𐴡𐴕𐴊𐴞𐴓𐴧𐴝 𐴘𐴝𐴥 𐴑𐴞𐴦 𐴎𐴟𐴖𐴝𐴁𐴢 𐴊𐴞𐴁𐴝 𐴘𐴝𐴥𐴃𐴡 𐴑𐴞𐴦 𐴈𐴡𐴘𐴁𐴝𐴤 𐴊𐴠 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥;¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴞𐴀𐴕 𐴈𐴡𐴖𐴝𐴤 𐴉𐴡𐴌𐴞𐴁𐴡𐴥, 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌𐴠 𐴂𐴝𐴑-𐴌𐴟𐴀𐴘𐴠 𐴇𐴠𐴥𐴃𐴟𐴕𐴡𐴃𐴢 𐴐𐴞𐴥𐴑𐴝𐴘𐴊𐴞𐴁𐴡.“

𐴀𐴠𐴑𐴒𐴗𐴝𐴥 𐴉𐴡𐴦𐴓𐴢 𐴊𐴡𐴥𐴕𐴞𐴌 𐴔𐴠𐴀𐴏𐴝𐴓𐴢

¹³𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴓𐴗𐴝𐴥𐴃𐴧𐴟 𐴀𐴠𐴎𐴧𐴡𐴕𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴝𐴣𐴀𐴌 𐴁𐴝𐴥𐴘𐴡𐴌𐴠 𐴀𐴝𐴣𐴀𐴌 𐴓𐴡𐴥𐴘 𐴔𐴞𐴌𐴝𐴏𐴢 𐴁𐴝𐴥𐴑 𐴒𐴡𐴌𐴞𐴥𐴉𐴠𐴓𐴝𐴘𐴃𐴡 𐴈𐴡𐴀.“

¹⁴𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴡 𐴔𐴞𐴛𐴝, 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴞𐴏𐴝𐴌𐴇𐴝𐴌 𐴘𐴝𐴥 𐴁𐴝𐴥𐴑 𐴒𐴡𐴌𐴞𐴥𐴊𐴡𐴘𐴝 𐴇𐴡𐴕𐴠 𐴁𐴝𐴕𐴝𐴘𐴧𐴠𐴥؟“¹⁵𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴡𐴥𐴁𐴡𐴌𐴡𐴊𐴧𐴝𐴌, 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴓𐴝𐴓𐴏𐴞𐴥𐴃𐴧𐴟 𐴁𐴝𐴏𐴞 𐴃𐴝𐴥𐴙𐴑𐴧𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴕𐴏𐴝𐴥𐴕𐴡𐴌 𐴎𐴞𐴕𐴊𐴞𐴒𐴞 𐴕𐴞𐴎𐴡𐴌 𐴄𐴝𐴓𐴢-𐴄𐴝𐴓𐴢 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞𐴌 𐴖𐴡𐴌𐴠 𐴕𐴡.“

¹⁶𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴈𐴡𐴘𐴧𐴠𐴥, 𐴑𐴞 𐴈𐴡𐴘𐴓𐴠𐴥, ”𐴀𐴠𐴎𐴧𐴡𐴕 𐴊𐴡𐴥𐴕𐴞𐴌 𐴎𐴡𐴁𐴞𐴕𐴡𐴃𐴢 𐴁𐴞𐴐𐴞𐴤 𐴉𐴡𐴥𐴏𐴡𐴓𐴢 𐴊𐴡𐴥𐴙𐴅𐴧𐴠.¹⁷𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴁𐴝𐴥𐴉𐴠𐴌 𐴊𐴠, ’𐴀𐴝𐴀𐴛 𐴑𐴞𐴦 𐴒𐴡𐴙𐴃𐴧𐴝𐴥𐴔, 𐴀𐴝𐴣𐴀𐴃𐴧𐴟 𐴊𐴠 𐴉𐴡𐴥𐴏𐴡𐴓𐴢 𐴎𐴡𐴔𐴝 𐴌𐴝𐴑𐴞𐴥𐴁𐴝𐴌 𐴎𐴝𐴒𐴝 𐴕𐴝𐴥𐴘؟‘

¹⁸”𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ’𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴒𐴡𐴙𐴅𐴧𐴟𐴥𐴔: 𐴀𐴝𐴣𐴀𐴌 𐴒𐴟𐴊𐴝𐴔 𐴀𐴡𐴥𐴑𐴧𐴡𐴓𐴢 𐴁𐴝𐴥𐴚𐴒𐴞𐴉𐴠𐴓𐴝𐴘 𐴋𐴡𐴣𐴀𐴌-𐴋𐴡𐴣𐴀𐴌 𐴒𐴡𐴥𐴌𐴞 𐴁𐴝𐴕𐴝𐴘𐴧𐴟𐴥𐴔, 𐴀𐴝𐴦𐴌 𐴀𐴝𐴣𐴀𐴌 𐴉𐴡𐴥𐴏𐴡𐴓𐴢 𐴀𐴠𐴊𐴧𐴠 𐴔𐴝𐴓𐴢-𐴏𐴝𐴥𐴔𐴝𐴕𐴝 𐴁𐴠𐴒𐴧𐴟𐴥𐴕 𐴇𐴠𐴥𐴍𐴠 𐴌𐴝𐴑𐴞𐴥𐴘𐴟𐴔.¹⁹𐴁𐴝𐴦𐴊𐴠 𐴀𐴝𐴀𐴛 𐴀𐴝𐴣𐴀𐴌 𐴌𐴟𐴀𐴌𐴠 𐴈𐴡𐴘𐴧𐴟𐴥𐴔 𐴊𐴠, 𐴀𐴡𐴥 𐴌𐴟𐴀, 𐴃𐴡𐴌𐴃𐴧𐴟 𐴁𐴡𐴀𐴗𐴃𐴢 𐴁𐴡𐴏𐴡𐴥𐴌𐴡𐴓𐴧𐴝 𐴁𐴞𐴐𐴞𐴤 𐴑𐴟𐴥𐴌𐴝𐴉𐴢 𐴀𐴝𐴏𐴠𐴤. 𐴘𐴝𐴓𐴝 𐴐𐴟𐴥𐴑 𐴒𐴡𐴥𐴌, 𐴈𐴝𐴥𐴀𐴉𐴞𐴘𐴝 𐴒𐴡𐴥𐴌 𐴀𐴠𐴊𐴧𐴠 𐴑𐴟𐴥𐴐𐴞 𐴃𐴝𐴥𐴑.‘

²⁰”𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ’𐴀𐴡𐴥 𐴉𐴡𐴦𐴓𐴢, 𐴀𐴝𐴙𐴅𐴧𐴝 𐴌𐴝𐴙𐴃𐴧𐴝 𐴊𐴠 𐴃𐴡𐴌 𐴎𐴝𐴕 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡; 𐴃𐴡𐴥𐴘 𐴃𐴟𐴘 𐴎𐴞𐴀𐴕 𐴎𐴡𐴔𐴝 𐴒𐴡𐴙𐴅𐴧𐴡𐴥𐴏𐴢 𐴇𐴞𐴥𐴀𐴕 𐴇𐴝𐴌 𐴀𐴡𐴥𐴘𐴁𐴡؟‘

²¹”𐴇𐴠𐴥𐴕𐴊𐴞𐴓𐴧𐴝 𐴀𐴡𐴥𐴙𐴓𐴊𐴠 𐴔𐴝𐴕𐴟𐴥𐴙𐴐𐴢 𐴀𐴟𐴁𐴝𐴤, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴓𐴧𐴝 𐴊𐴡𐴥𐴕 𐴎𐴡𐴔𐴝 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴃𐴟𐴖𐴝𐴚𐴒𐴡𐴌 𐴕𐴡.“

𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥

²²𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴑𐴞𐴦 𐴈𐴝𐴥𐴘𐴧𐴟𐴔 𐴈𐴡𐴀𐴘𐴢 𐴎𐴞𐴕𐴊𐴞𐴒𐴞𐴓𐴧𐴝 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥, 𐴀𐴝𐴦𐴌 𐴑𐴞𐴦 𐴉𐴞𐴣𐴊𐴞𐴥𐴘𐴟𐴔 𐴈𐴡𐴀𐴘𐴢 𐴒𐴝𐴦 𐴓𐴧𐴝 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥.²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴞𐴕𐴊𐴞𐴒𐴞 𐴃𐴡 𐴈𐴝𐴥𐴕𐴝𐴌 𐴃𐴟𐴥𐴖𐴝𐴌𐴡 𐴑𐴞𐴔𐴡𐴃𐴞, 𐴀𐴝𐴦𐴌 𐴒𐴝𐴦 𐴃𐴡 𐴇𐴡𐴦𐴌𐴏𐴟𐴖𐴡𐴌𐴡𐴌 𐴃𐴟𐴥𐴖𐴝𐴌𐴡 𐴑𐴞𐴔𐴡𐴃𐴞.²⁴𐴈𐴝𐴖𐴝 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴝𐴥𐴉𐴞𐴏𐴡; 𐴇𐴞𐴥𐴀𐴕𐴠 𐴃𐴡 𐴕𐴡 𐴐𐴞𐴥𐴣𐴍𐴠, 𐴕𐴡 𐴊𐴝𐴦, 𐴀𐴝𐴦𐴌 𐴕𐴡 𐴇𐴞𐴥𐴀𐴕𐴡𐴃𐴧𐴟 𐴒𐴟𐴊𐴝𐴔 𐴘𐴝𐴥 𐴇𐴝𐴣𐴅𐴧𐴝 𐴀𐴝𐴏𐴠𐴤; 𐴃𐴡𐴀 𐴀𐴝𐴓𐴧𐴝𐴘𐴠 𐴇𐴞𐴥𐴀𐴕𐴡𐴌𐴠 𐴈𐴝𐴥𐴀𐴁𐴝. 𐴃𐴟𐴣𐴀𐴝𐴥𐴌𐴝 𐴃𐴡 𐴉𐴝𐴙𐴑 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴑𐴞𐴔𐴡𐴃𐴞.²⁵𐴃𐴟𐴣𐴀𐴝𐴥𐴌𐴝 𐴇𐴡𐴕𐴠 𐴏𐴞𐴕𐴃𐴝 𐴒𐴡𐴌𐴞𐴥 𐴕𐴞𐴎𐴡𐴌 𐴇𐴡𐴥𐴘𐴧𐴝𐴃𐴡𐴌𐴠 𐴀𐴠𐴑 𐴒𐴡𐴥𐴕𐴋𐴝 𐴁𐴝𐴌𐴝𐴤𐴘 𐴉𐴝𐴌𐴞𐴁𐴝𐴥 𐴊𐴠 𐴀𐴝𐴏𐴡𐴤؟²⁶𐴃𐴟𐴣𐴀𐴝𐴥𐴌𐴝 𐴇𐴠𐴥𐴃𐴧𐴞𐴌𐴞𐴕 𐴈𐴝𐴔 𐴔𐴝𐴥𐴕 𐴀𐴟𐴥𐴊𐴧𐴗𐴝 𐴒𐴡𐴌𐴞𐴥 𐴕𐴡 𐴉𐴝𐴙𐴓𐴧𐴠, 𐴀𐴡𐴙𐴕𐴧𐴡 𐴏𐴞𐴏𐴡𐴓𐴧𐴝 𐴑𐴞𐴘𐴝𐴥 𐴏𐴞𐴕𐴃𐴝 𐴒𐴡𐴌𐴡𐴤؟

²⁷”𐴉𐴟𐴥𐴓𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴝𐴥𐴉𐴞𐴏𐴡, 𐴇𐴞𐴥𐴀𐴕 𐴑𐴠𐴀𐴕𐴒𐴡𐴌𐴞 𐴁𐴝𐴌𐴞𐴥 𐴀𐴟𐴍𐴠𐴤 𐴊𐴠; 𐴇𐴞𐴥𐴀𐴕𐴠 𐴃𐴡 𐴕𐴡 𐴔𐴠𐴀𐴕𐴧𐴡𐴃𐴢 𐴒𐴡𐴌𐴠𐴥, 𐴀𐴝𐴦𐴌 𐴕𐴡 𐴉𐴟𐴥𐴣𐴃𐴝 𐴈𐴝𐴍𐴠; 𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴁𐴝𐴀𐴣𐴐𐴧𐴝 𐴏𐴡𐴥𐴓𐴡𐴔𐴝𐴕𐴠 𐴀𐴟𐴥𐴊𐴧𐴗𐴝 𐴘𐴡𐴥𐴒𐴧𐴗𐴝𐴌 𐴃𐴝𐴔𐴝𐴥𐴔 𐴊𐴡𐴥𐴕-𐴊𐴡𐴓𐴡𐴃𐴢 𐴓𐴡𐴘 𐴇𐴞𐴥𐴀𐴕 𐴀𐴠𐴑𐴒𐴗𐴝𐴥𐴌 𐴋𐴡𐴥𐴙𐴓𐴧𐴝 𐴕𐴞𐴎𐴡𐴌𐴠𐴥 𐴇𐴝𐴥𐴣𐴎𐴝𐴘 𐴉𐴝𐴙𐴅𐴧𐴠𐴥 𐴊𐴠 𐴕𐴝𐴥𐴘.²⁸𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴀𐴝𐴓𐴧𐴝𐴘𐴠 𐴔𐴡𐴘𐴊𐴝𐴕𐴡𐴌 𐴑𐴠𐴥𐴌𐴡𐴌𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴇𐴝𐴥𐴣𐴎𐴝, 𐴎𐴞𐴀𐴕 𐴀𐴝𐴙𐴅𐴧𐴝 𐴀𐴝𐴏𐴠𐴤 𐴀𐴝𐴦𐴌 𐴇𐴝𐴙𐴓𐴧𐴝 𐴀𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝; 𐴃𐴡𐴥𐴀𐴘𐴓𐴠 𐴀𐴡𐴥 𐴈𐴡𐴔 𐴁𐴞𐴐𐴧𐴝𐴥𐴐𐴢 𐴀𐴡𐴓𐴝 𐴀𐴡𐴥𐴑𐴧𐴡𐴓𐴢, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴤 𐴇𐴡𐴃𐴡𐴥 𐴇𐴝𐴥𐴣𐴎𐴝𐴘𐴁𐴡 𐴉𐴝𐴥𐴣𐴓𐴧𐴝𐴌؟²⁹𐴑𐴞𐴦 𐴈𐴝𐴥𐴘𐴁𐴝 𐴘𐴝𐴥 𐴑𐴞𐴦 𐴉𐴞𐴀𐴁𐴝 𐴇𐴞𐴥𐴀𐴕𐴡𐴌 𐴃𐴝𐴓𐴝𐴐𐴡𐴃𐴢 𐴉𐴡𐴌𐴞 𐴕𐴡 𐴃𐴝𐴥𐴙𐴑𐴧𐴡; 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥.³⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴟𐴕𐴞𐴘𐴝𐴙𐴌 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴠 𐴀𐴠𐴥𐴕𐴝 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴉𐴞𐴏𐴠𐴤 𐴓𐴝𐴒𐴞 𐴃𐴝𐴥𐴑𐴠, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴞𐴥𐴀𐴕 𐴓𐴝𐴒𐴠𐴌 𐴊𐴠 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴠 𐴎𐴝𐴕𐴠.³¹𐴘𐴝𐴥𐴌𐴁𐴡𐴊𐴡𐴓𐴢 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴃𐴝𐴓𐴝𐴐𐴡𐴃𐴢 𐴃𐴝𐴥𐴑𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥 𐴊𐴞𐴦𐴘𐴝 𐴎𐴝𐴘𐴁𐴡.

𐴀𐴝𐴏𐴔𐴝𐴕𐴡𐴃𐴢 𐴊𐴡𐴥𐴕 𐴎𐴡𐴔𐴝 𐴒𐴡𐴌𐴝𐴥

³²”𐴀𐴡𐴥 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴒𐴟𐴌𐴝 𐴎𐴝𐴥𐴑, 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴡𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴌𐴝𐴙𐴅𐴧𐴡 𐴊𐴞𐴦𐴘𐴝 𐴉𐴡𐴏𐴡𐴥𐴕 𐴓𐴝𐴙𐴒𐴧𐴠𐴥.³³𐴃𐴟𐴣𐴀𐴝𐴥𐴌𐴝𐴌 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴁𐴠𐴏𐴞 𐴏𐴡𐴥𐴃𐴑𐴝 𐴒𐴡𐴌𐴞𐴥𐴉𐴠𐴓𐴡, 𐴀𐴝𐴦𐴌 𐴕𐴞𐴎𐴡𐴌 𐴓𐴧𐴝 𐴀𐴠𐴕𐴊𐴞𐴓𐴧𐴝 𐴄𐴞𐴛𐴝𐴌 𐴎𐴝𐴓𐴞 𐴃𐴡𐴘𐴧𐴝𐴌 𐴒𐴡𐴌𐴡𐴤 𐴎𐴞𐴁𐴝𐴤 𐴉𐴟𐴌𐴝𐴕 𐴀𐴡𐴥𐴘 𐴕𐴡 𐴎𐴝𐴒𐴡𐴥𐴘, 𐴘𐴝𐴥𐴕𐴞 𐴀𐴝𐴏𐴔𐴝𐴕𐴡𐴃𐴢 𐴀𐴠𐴕𐴊𐴞𐴓𐴧𐴝 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴎𐴡𐴔𐴝 𐴒𐴡𐴌𐴡𐴤, 𐴎𐴞𐴀𐴕 𐴇𐴡𐴕𐴡𐴤𐴊𐴞𐴕 𐴕𐴡 𐴉𐴟𐴥𐴌𐴝, 𐴎𐴠𐴍𐴠𐴥 𐴏𐴟𐴌 𐴋𐴝𐴥𐴑𐴠 𐴕𐴟 𐴀𐴝𐴘𐴧𐴠𐴤 𐴀𐴝𐴦𐴌 𐴉𐴟𐴑𐴠 𐴕𐴝𐴐𐴢 𐴕𐴡 𐴒𐴡𐴌𐴠𐴥.³⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴎𐴠𐴍𐴠𐴥, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴃𐴝𐴥𐴑𐴞𐴁𐴡 𐴊𐴠 𐴘𐴡𐴥 𐴇𐴠𐴥𐴍𐴠.

𐴁𐴞𐴐𐴧𐴝𐴥𐴐𐴊𐴝𐴌 𐴒𐴡𐴗𐴀𐴌

³⁵”𐴃𐴟𐴣𐴀𐴝𐴥𐴌𐴝 𐴒𐴟𐴄𐴢 𐴊𐴡 𐴀𐴠𐴊𐴧𐴠 𐴏𐴠𐴌𐴝𐴑 𐴊𐴡𐴥𐴌𐴝𐴘 𐴌𐴝𐴑𐴡𐴥.³⁶𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴟𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥 𐴎𐴠𐴃𐴝𐴌𐴝𐴤 𐴕𐴞𐴎𐴡𐴌 𐴒𐴞𐴌𐴡𐴥𐴏𐴢 𐴁𐴡𐴘𐴌𐴝𐴃𐴡𐴃𐴧𐴟 𐴇𐴡𐴣𐴃𐴧𐴠𐴥 𐴖𐴝𐴦𐴉𐴠𐴏𐴢 𐴀𐴝𐴘𐴁𐴡𐴤 𐴊𐴠 𐴇𐴞𐴥𐴘𐴝𐴕𐴡𐴌 𐴀𐴠𐴕𐴃𐴠𐴎𐴝𐴌𐴡𐴃𐴢 𐴃𐴝𐴥𐴑𐴠, 𐴎𐴠𐴀𐴕𐴠 𐴘𐴡𐴥𐴒𐴧𐴗𐴝 𐴀𐴝𐴀𐴘𐴢 𐴊𐴟𐴖𐴝𐴌 𐴁𐴝𐴙𐴅𐴧𐴝𐴘𐴓𐴠 𐴔𐴡𐴃𐴧𐴡𐴌 𐴘𐴡𐴥𐴒𐴧𐴗𐴝𐴌𐴠 𐴊𐴟𐴖𐴝𐴌 𐴑𐴟𐴥𐴓𐴞𐴊𐴞 𐴉𐴝𐴌𐴠.³⁷𐴔𐴟𐴁𐴝𐴌𐴠𐴑 𐴒𐴡𐴗𐴀𐴌 𐴀𐴟𐴘𐴃𐴝𐴌𐴝𐴤 𐴎𐴠𐴃𐴝𐴌𐴝𐴤𐴌𐴠 𐴒𐴞𐴌𐴡𐴥𐴏𐴢 𐴀𐴝𐴘𐴓𐴠𐴤 𐴏𐴡𐴦𐴛 𐴃𐴝𐴥𐴙𐴑𐴧𐴝 𐴓𐴡𐴦𐴃𐴉𐴝. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴘𐴡𐴥𐴒𐴧𐴗𐴝𐴘𐴠 𐴑𐴠𐴣𐴙𐴓𐴢 𐴁𐴝𐴣𐴊𐴞𐴥 𐴇𐴠𐴥 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴌𐴠 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴟𐴀𐴝𐴥𐴒𐴝𐴌𐴝𐴘𐴁𐴡, 𐴀𐴝𐴦𐴌 𐴋𐴝𐴥𐴑𐴠 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌𐴠 𐴈𐴝𐴥𐴕𐴝 𐴈𐴝𐴥𐴁𐴝𐴘𐴁𐴡.³⁸𐴎𐴡𐴊𐴞 𐴘𐴡𐴥𐴒𐴧𐴗𐴝𐴘𐴠 𐴀𐴝𐴊𐴝𐴤 𐴌𐴝𐴙𐴃𐴧𐴝 𐴘𐴝𐴥 𐴘𐴝𐴥𐴌𐴁𐴝𐴦𐴊𐴠 𐴀𐴝𐴘𐴓𐴠𐴤 𐴘𐴡 𐴀𐴞𐴥𐴃𐴝𐴌𐴝𐴌𐴠 𐴃𐴡𐴘𐴧𐴝𐴌 𐴃𐴝𐴥𐴙𐴑𐴧𐴝 𐴓𐴡𐴦𐴃𐴉𐴝, 𐴃𐴡𐴥𐴀𐴘𐴓𐴠 𐴇𐴠𐴥 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴢 𐴃𐴡 𐴔𐴟𐴁𐴝𐴌𐴠𐴑.

³⁹”𐴓𐴠𐴑𐴞𐴕 𐴘𐴝𐴀𐴕 𐴎𐴝𐴕𐴞 𐴌𐴝𐴑𐴡𐴥 𐴊𐴠 𐴑𐴞, 𐴎𐴡𐴊𐴞 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴠 𐴏𐴟𐴌 𐴇𐴡𐴣𐴃𐴧𐴠𐴥 𐴀𐴝𐴘𐴁𐴡𐴤 𐴊𐴠 𐴎𐴝𐴙𐴕𐴃𐴡, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴒𐴡𐴥𐴌𐴡𐴌𐴠 𐴁𐴝𐴥𐴚𐴒𐴞𐴃𐴡 𐴕𐴡 𐴊𐴞𐴃𐴡.⁴⁰𐴃𐴟𐴣𐴀𐴝𐴥𐴌𐴝 𐴘𐴡𐴥 𐴃𐴡𐴘𐴧𐴝𐴌 𐴃𐴝𐴥𐴑𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴃𐴟𐴣𐴀𐴝𐴥𐴌𐴝 𐴕𐴡 𐴄𐴝𐴥𐴀𐴌𐴡 𐴊𐴠 𐴀𐴡𐴑𐴃𐴡𐴥𐴃𐴢 𐴁𐴠 𐴀𐴝𐴘𐴁𐴡𐴤.“

⁴¹𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴃𐴟𐴀𐴛 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴀𐴝𐴣𐴀𐴌𐴝𐴌𐴠 𐴈𐴡𐴀𐴌 𐴊𐴠 𐴕𐴠𐴥 𐴕𐴝𐴥𐴑𐴞 𐴁𐴠𐴒𐴧𐴟𐴥𐴕 𐴀𐴡𐴌𐴠؟“

⁴²𐴔𐴝𐴓𐴞𐴑𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴠𐴀𐴕 𐴁𐴞𐴐𐴧𐴝𐴥𐴐𐴊𐴝𐴌 𐴀𐴠𐴊𐴧𐴠 𐴁𐴟𐴊𐴧𐴞𐴥𐴔𐴝𐴕 𐴔𐴝𐴎𐴞𐴥 𐴇𐴡𐴕 𐴀𐴝𐴏𐴠𐴤, 𐴎𐴝𐴌𐴠𐴥 𐴀𐴞𐴥𐴃𐴝𐴌 𐴒𐴞𐴌𐴡𐴥𐴏𐴠 𐴕𐴞𐴎𐴡𐴌 𐴀𐴡𐴙𐴕𐴧𐴡 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴎𐴞𐴔𐴧𐴝𐴊𐴝𐴌 𐴁𐴝𐴕𐴝𐴘𐴁𐴡𐴥, 𐴀𐴞𐴥𐴃𐴝𐴌𐴝𐴌𐴠 𐴄𐴝𐴙𐴔𐴡𐴌 𐴖𐴡𐴌𐴠 𐴈𐴝𐴥𐴕𐴝 𐴁𐴝𐴍𐴞𐴊𐴞 𐴁𐴡𐴓𐴧𐴝؟⁴³𐴔𐴟𐴁𐴝𐴌𐴠𐴑 𐴒𐴡𐴗𐴀𐴌 𐴀𐴟𐴁𐴝𐴤 𐴎𐴝𐴌𐴠𐴥 𐴕𐴞𐴎𐴡𐴌 𐴒𐴞𐴌𐴡𐴥𐴏𐴠 𐴖𐴝𐴦𐴉𐴠𐴏𐴢 𐴀𐴝𐴘𐴓𐴠𐴤 𐴈𐴝𐴔 𐴇𐴞𐴥𐴀𐴕 𐴒𐴡𐴌𐴠𐴥𐴌 𐴊𐴠 𐴓𐴡𐴦𐴃𐴉𐴝.⁴⁴𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴃𐴝𐴔𐴝𐴥𐴔 𐴐𐴡𐴥𐴔𐴁𐴡𐴃𐴧𐴞𐴌 𐴖𐴡𐴌𐴠 𐴀𐴞𐴥𐴃𐴝𐴌𐴠 𐴎𐴞𐴔𐴧𐴝𐴊𐴝𐴌 𐴁𐴝𐴕𐴝𐴘𐴁𐴡𐴥.⁴⁵𐴓𐴠𐴑𐴞𐴕 𐴎𐴡𐴊𐴞 𐴇𐴠𐴥 𐴒𐴡𐴗𐴀𐴌𐴠 𐴕𐴞𐴎𐴡𐴌 𐴊𐴞𐴓𐴠-𐴊𐴞𐴓𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀, ’𐴀𐴝𐴣𐴀𐴌 𐴒𐴞𐴌𐴡𐴥𐴏𐴢 𐴀𐴝𐴘𐴃𐴠𐴤 𐴁𐴡𐴀𐴗𐴃𐴢 𐴊𐴠𐴌𐴞 𐴀𐴝𐴏𐴠𐴤,‘ 𐴀𐴝𐴦𐴌 𐴀𐴞𐴥𐴃𐴠 𐴀𐴡𐴙𐴕𐴧𐴡 𐴒𐴡𐴗𐴀𐴌 𐴀𐴠𐴊𐴧𐴠 𐴁𐴝𐴣𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴌𐴝𐴃𐴢 𐴊𐴡𐴌𐴠 𐴀𐴠𐴊𐴧𐴠 𐴈𐴝𐴥𐴀𐴉𐴞𐴘𐴝 𐴒𐴡𐴌𐴞𐴥 𐴄𐴟𐴀𐴓𐴢 𐴀𐴡𐴥𐴘𐴎𐴝𐴒𐴡𐴘;⁴⁶𐴃𐴡𐴥𐴀𐴘𐴓𐴠 𐴇𐴠𐴥 𐴒𐴡𐴗𐴀𐴌𐴡𐴌 𐴒𐴞𐴌𐴡𐴥𐴏𐴢 𐴀𐴠𐴀𐴕 𐴊𐴞𐴕𐴡𐴃𐴢 𐴀𐴝𐴘𐴁𐴡𐴤, 𐴎𐴠 𐴊𐴞𐴕 𐴀𐴞𐴥𐴃𐴠 𐴘𐴡𐴥𐴒𐴧𐴗𐴝 𐴀𐴝𐴘𐴁𐴡𐴤 𐴊𐴠 𐴕𐴡 𐴄𐴝𐴥𐴀𐴌𐴠, 𐴀𐴠𐴊𐴧𐴠 𐴀𐴠𐴀𐴕 𐴀𐴡𐴑𐴃𐴡𐴥𐴃𐴢 𐴀𐴝𐴘𐴁𐴡𐴤, 𐴎𐴠 𐴀𐴡𐴑𐴃𐴡𐴥𐴃𐴢 𐴀𐴞𐴥𐴃𐴠 𐴇𐴡𐴘 𐴕𐴡 𐴉𐴝𐴌𐴠. 𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴈𐴝𐴍𐴞 𐴇𐴝𐴥𐴕-𐴇𐴝𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴁𐴡 𐴀𐴠𐴊𐴧𐴠 𐴕𐴝𐴉𐴡𐴥𐴌𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠 𐴐𐴝𐴥𐴔𐴞𐴓𐴢 𐴒𐴡𐴌𐴞𐴥𐴁𐴡.

⁴⁷”𐴎𐴠 𐴒𐴡𐴗𐴀𐴌𐴠 𐴒𐴞𐴌𐴡𐴥𐴏𐴡𐴌 𐴔𐴡𐴕𐴐𐴝𐴥𐴌𐴠 𐴎𐴝𐴕𐴠 𐴔𐴡𐴕𐴃𐴡𐴌 𐴃𐴡𐴘𐴧𐴝𐴌 𐴕𐴡𐴥 𐴘𐴝𐴥𐴃𐴡 𐴘𐴡𐴥𐴒𐴧𐴗𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴕𐴡𐴥 𐴒𐴡𐴌𐴠𐴥, 𐴀𐴞𐴥𐴃𐴠 𐴁𐴞𐴐𐴞𐴤 𐴉𐴞𐴍𐴝 𐴇𐴝𐴥𐴘𐴁𐴡;⁴⁸𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴕𐴡 𐴎𐴝𐴕𐴞, 𐴉𐴞𐴍𐴝 𐴇𐴝𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔 𐴒𐴡𐴌𐴠𐴥, 𐴀𐴞𐴥𐴃𐴠 𐴁𐴞𐴐𐴞𐴤 𐴈𐴡𐴔 𐴉𐴞𐴍𐴝 𐴇𐴝𐴥𐴘𐴁𐴡. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴌𐴠𐴥 𐴁𐴞𐴐𐴞𐴤 𐴊𐴞𐴦𐴘𐴝 𐴒𐴞𐴘𐴠𐴥, 𐴀𐴞𐴥𐴃𐴝𐴃𐴧𐴟 𐴁𐴞𐴐𐴞𐴤 𐴊𐴝𐴁𐴞 𐴒𐴡𐴌𐴝𐴥 𐴎𐴝𐴘𐴁𐴡; 𐴀𐴝𐴦𐴌 𐴎𐴝𐴌𐴠𐴥 𐴁𐴞𐴐𐴞𐴤 𐴒𐴡𐴏𐴝𐴥𐴘𐴊𐴞𐴘𐴝 𐴒𐴞𐴥𐴘𐴠, 𐴀𐴞𐴥𐴃𐴝𐴃𐴧𐴟 𐴀𐴝𐴌𐴡𐴤 𐴁𐴞𐴐𐴞𐴤 𐴔𐴝𐴒𐴝 𐴎𐴝𐴘𐴁𐴡.

𐴀𐴞𐴏𐴝𐴤𐴌 𐴎𐴡𐴌𐴞𐴘𐴝 𐴉𐴝𐴀𐴄𐴝-𐴉𐴝𐴀𐴄𐴞

⁴⁹”𐴀𐴝𐴀𐴛 𐴊𐴟𐴕𐴞𐴘𐴝𐴙𐴃𐴢 𐴀𐴡𐴦𐴙𐴕 𐴎𐴡𐴓𐴝𐴘𐴊𐴞𐴃𐴡 𐴀𐴝𐴙𐴐𐴧𐴞𐴤 𐴊𐴠, 𐴎𐴡𐴊𐴞 𐴀𐴝𐴒𐴠 𐴓𐴡𐴥𐴃𐴞 𐴎𐴡𐴓𐴝𐴘𐴧𐴝 𐴀𐴡𐴥𐴘𐴃𐴡, 𐴀𐴝𐴀𐴛 𐴑𐴠𐴀𐴕 𐴑𐴟𐴥𐴐𐴞 𐴀𐴡𐴥𐴘𐴃𐴝𐴔!⁵⁰𐴓𐴠𐴑𐴞𐴕 𐴀𐴝𐴣𐴀𐴃𐴧𐴟 𐴀𐴠𐴒𐴧𐴗𐴝𐴤 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘𐴁𐴝𐴌 𐴀𐴝𐴏𐴠𐴤, 𐴘𐴞𐴥𐴁𐴝 𐴕𐴡𐴥 𐴓𐴡𐴘 𐴉𐴡𐴙𐴅𐴧𐴡𐴕𐴃𐴡 𐴀𐴝𐴀𐴛 𐴑𐴠𐴀𐴕 𐴉𐴠𐴌𐴠𐴐𐴝𐴕𐴞𐴃𐴢 𐴀𐴝𐴏𐴞𐴤!⁵¹𐴀𐴝𐴀𐴛 𐴊𐴟𐴕𐴞𐴘𐴝𐴙𐴃𐴢 𐴐𐴝𐴥𐴕𐴃𐴞 𐴊𐴞𐴦𐴃𐴡 𐴀𐴝𐴙𐴐𐴧𐴞𐴤 𐴁𐴡𐴥𐴓𐴞 𐴄𐴝𐴥𐴀𐴌𐴡 𐴕𐴞𐴥𐴑𐴞؟ 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴕𐴡, 𐴁𐴡𐴥𐴓𐴑𐴠 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴞𐴤 𐴊𐴠;⁵²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴇𐴡𐴥𐴕𐴡𐴃𐴧𐴟 𐴓𐴡𐴥𐴃𐴞 𐴀𐴠𐴑 𐴒𐴡𐴥𐴌𐴡𐴌 𐴉𐴝𐴣𐴏𐴢 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴓𐴡𐴑-𐴀𐴝𐴓𐴡𐴑 𐴀𐴡𐴥𐴘𐴎𐴝𐴘𐴁𐴡𐴘: 𐴃𐴞𐴕 𐴎𐴡𐴕 𐴊𐴟𐴘 𐴎𐴡𐴕𐴡𐴌 𐴀𐴟𐴓𐴋𐴝, 𐴀𐴝𐴦𐴌 𐴊𐴟𐴘 𐴎𐴡𐴕 𐴃𐴞𐴕 𐴎𐴡𐴕𐴡𐴌 𐴀𐴟𐴓𐴋𐴝.⁵³𐴀𐴞𐴥𐴃𐴝𐴌𐴝 𐴀𐴠𐴕𐴊𐴞𐴓𐴧𐴝 𐴀𐴝𐴓𐴡𐴑 𐴀𐴡𐴥𐴘𐴎𐴝𐴘𐴁𐴡𐴘: 𐴉𐴟𐴖𐴝𐴌 𐴀𐴟𐴓𐴋𐴝 𐴁𐴝𐴉𐴢, 𐴁𐴝𐴉𐴡𐴌 𐴀𐴟𐴓𐴋𐴝 𐴉𐴟𐴖𐴝, 𐴎𐴠𐴥𐴌𐴉𐴟𐴖𐴝𐴌 𐴀𐴟𐴓𐴋𐴝 𐴔𐴝𐴦, 𐴔𐴝𐴦𐴌 𐴀𐴟𐴓𐴋𐴝 𐴎𐴠𐴥𐴌𐴉𐴟𐴖𐴝, 𐴁𐴡𐴖𐴢 𐴖𐴡𐴥𐴌 𐴀𐴟𐴓𐴋𐴝 𐴇𐴡𐴥𐴖𐴌𐴞, 𐴀𐴝𐴦𐴌 𐴇𐴡𐴥𐴖𐴌𐴞𐴌 𐴀𐴟𐴓𐴋𐴝 𐴁𐴡𐴖𐴢.“

𐴀𐴡𐴑𐴃𐴡𐴥 𐴉𐴡𐴌𐴡𐴥𐴑 𐴒𐴡𐴌𐴝𐴥

⁵⁴𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴈𐴡𐴀𐴌 𐴊𐴠, ”𐴉𐴡𐴏𐴞𐴥𐴔𐴡𐴃𐴧𐴟 𐴔𐴞𐴘𐴟𐴥𐴓𐴝 𐴀𐴟𐴍𐴠𐴤𐴌 𐴊𐴠 𐴊𐴠𐴑𐴞𐴥𐴓𐴠 𐴃𐴟𐴣𐴀𐴝𐴥𐴌𐴝 𐴃𐴡𐴌𐴝𐴃𐴡𐴌𐴞 𐴈𐴡𐴀 𐴊𐴠, ’𐴎𐴡𐴥𐴌 𐴀𐴝𐴘𐴁𐴡𐴤,‘ 𐴀𐴝𐴦𐴌 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥.⁵⁵𐴀𐴝𐴦𐴌 𐴊𐴡𐴀𐴘𐴕𐴝𐴓𐴞 𐴁𐴡𐴘𐴧𐴝𐴌 𐴁𐴝𐴘𐴓𐴠𐴥 𐴈𐴡𐴀 𐴊𐴠, ’𐴒𐴡𐴌𐴡𐴔 𐴉𐴡𐴌𐴞𐴁𐴡𐴥,‘ 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥.⁵⁶𐴀𐴡𐴥 𐴔𐴟𐴕𐴝𐴉𐴠𐴥𐴑 𐴀𐴡𐴥𐴑𐴧𐴡𐴓𐴢! 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴡𐴁𐴞𐴕𐴡𐴌 𐴀𐴠𐴊𐴧𐴠 𐴀𐴝𐴏𐴔𐴝𐴕𐴡𐴌 𐴏𐴟𐴥𐴌𐴡𐴃𐴢 𐴏𐴝𐴀𐴘𐴢 𐴔𐴡𐴀𐴏𐴟𐴔 𐴉𐴡𐴌𐴡𐴥𐴑 𐴒𐴡𐴌𐴞𐴥 𐴎𐴝𐴕𐴡, 𐴔𐴡𐴕𐴃𐴡𐴌 𐴀𐴠𐴇𐴡𐴥𐴕𐴡𐴌 𐴎𐴡𐴁𐴝𐴕𐴝𐴌𐴠 𐴑𐴞𐴘𐴝𐴥 𐴉𐴡𐴌𐴡𐴥𐴑 𐴒𐴡𐴌𐴞𐴥 𐴕𐴡 𐴎𐴝𐴕𐴡؟

𐴊𐴟𐴐𐴧𐴡𐴕 𐴓𐴡𐴘 𐴁𐴡𐴕𐴡𐴕

⁵⁷”𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴑𐴞𐴘𐴝𐴥 𐴎𐴞𐴘𐴝𐴥𐴕 𐴏𐴡𐴥𐴘𐴧𐴞 𐴇𐴞𐴥𐴘𐴝𐴕𐴡𐴌 𐴉𐴝𐴥𐴘𐴏𐴠𐴓𐴝 𐴕𐴡 𐴒𐴡𐴌𐴡𐴤؟⁵⁸𐴎𐴠𐴣𐴃𐴧𐴠𐴥 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴊𐴟𐴐𐴧𐴡𐴕𐴡𐴌 𐴉𐴟𐴥𐴖𐴝𐴣𐴃𐴞 𐴁𐴞𐴏𐴝𐴌𐴇𐴝𐴌𐴡𐴌 𐴇𐴝𐴣𐴏𐴠 𐴎𐴡𐴦, 𐴇𐴠𐴥𐴣𐴃𐴧𐴠 𐴉𐴡𐴣𐴃𐴡𐴃𐴢 𐴃𐴝𐴥𐴑𐴞𐴃𐴠 𐴀𐴞𐴥𐴃𐴝𐴌 𐴓𐴡𐴥𐴘 𐴔𐴝𐴦𐴔𐴠𐴓𐴝 𐴇𐴡𐴥𐴓𐴢 𐴒𐴡𐴌𐴞𐴥𐴉𐴠𐴓𐴝𐴘𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴡𐴥, 𐴀𐴝𐴌𐴕𐴡𐴥𐴘𐴓𐴠 𐴀𐴞𐴥𐴃𐴠 𐴃𐴟𐴣𐴀𐴝𐴥𐴣𐴌𐴠 𐴁𐴞𐴏𐴝𐴌𐴇𐴝𐴌𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴁𐴡, 𐴀𐴝𐴦𐴌 𐴁𐴞𐴏𐴝𐴌𐴇𐴝𐴌𐴠 𐴃𐴟𐴣𐴀𐴝𐴥𐴣𐴌𐴠 𐴉𐴟𐴓𐴞𐴐𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴁𐴡, 𐴁𐴝𐴦𐴊𐴠 𐴉𐴟𐴓𐴞𐴐𐴠 𐴃𐴟𐴣𐴀𐴝𐴥𐴣𐴌𐴠 𐴎𐴞𐴘𐴡𐴥𐴓𐴢 𐴔𐴝𐴌𐴞𐴁𐴡𐴥.⁵⁹𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴈𐴡𐴀𐴙𐴌, 𐴃𐴟𐴀𐴛 𐴀𐴝𐴇𐴠𐴥𐴌𐴞 𐴉𐴡𐴘𐴐𐴝𐴤 𐴕𐴡𐴥 𐴊𐴡𐴦 𐴉𐴡𐴙𐴅𐴧𐴡𐴕𐴃𐴡 𐴈𐴠𐴥𐴕𐴃𐴟 𐴇𐴝𐴥𐴓𐴝𐴏𐴢 𐴀𐴡𐴥𐴘 𐴕𐴡 𐴉𐴝𐴌𐴞𐴁𐴝𐴥.“

The Word for the World International

https://app.library.bible/content/87faca8b51c22590