Read 𐴓𐴟𐴑𐴝𐴥𐴏𐴢 11

𐴓𐴟𐴑𐴝𐴥𐴏𐴢11

𐴊𐴟𐴖𐴝 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹𐴀𐴠𐴑𐴁𐴝𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴞𐴏𐴝𐴤𐴘𐴠 𐴀𐴠𐴑𐴧𐴝𐴥𐴕 𐴎𐴝𐴒𐴝𐴃𐴢 𐴊𐴟𐴖𐴝 𐴒𐴡𐴌𐴠𐴥𐴌; 𐴀𐴞𐴥𐴁𐴝𐴃𐴧𐴟 𐴊𐴟𐴖𐴝 𐴒𐴡𐴙𐴅𐴧𐴝𐴥 𐴀𐴡𐴥𐴘𐴧𐴠 𐴌𐴝𐴥𐴌, 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴠𐴎𐴧𐴡𐴕𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴣𐴀𐴌𐴝𐴌𐴠 𐴊𐴟𐴖𐴝 𐴒𐴡𐴌𐴝𐴥 𐴐𐴞𐴥𐴑𐴡, 𐴎𐴠𐴕𐴊𐴞𐴓𐴧𐴝 𐴘𐴝𐴇𐴝𐴥𐴘𐴝𐴘𐴠 𐴘𐴡𐴥 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴐𐴞𐴥𐴑𐴝𐴘𐴧𐴠.“²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴊𐴟𐴖𐴝 𐴒𐴡𐴌𐴡𐴤, 𐴈𐴡𐴘𐴁𐴝𐴤 𐴊𐴠:’𐴀𐴡𐴥 𐴁𐴝𐴉𐴢,𐴃𐴟𐴣𐴀𐴝𐴥𐴣𐴌 𐴕𐴝𐴔 𐴂𐴝𐴑 𐴔𐴝𐴕𐴝 𐴎𐴡𐴑.𐴃𐴟𐴣𐴀𐴝𐴥𐴣𐴌 𐴌𐴝𐴙𐴅𐴧𐴡 𐴀𐴝𐴘𐴧𐴡𐴤𐴑.³𐴀𐴝𐴣𐴀𐴌𐴝𐴌𐴠 𐴀𐴝𐴣𐴀𐴌𐴝𐴌 𐴊𐴞𐴕𐴡𐴌 𐴈𐴝𐴥𐴕𐴝 𐴊𐴞𐴕𐴠 𐴊𐴡𐴦.⁴𐴀𐴝𐴣𐴀𐴌𐴝𐴌 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴢 𐴔𐴝𐴉𐴢 𐴒𐴡𐴌𐴡𐴤,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴕𐴞𐴎𐴠 𐴘𐴡𐴥 𐴊𐴠 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴈𐴡𐴏𐴟𐴥𐴌𐴞 𐴒𐴡𐴌𐴠𐴥 𐴀𐴞𐴥𐴃𐴝𐴌𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥.𐴀𐴝𐴣𐴀𐴌𐴝𐴌𐴠 𐴀𐴠𐴕𐴃𐴝𐴥𐴕𐴡𐴃𐴢 𐴉𐴡𐴙𐴃𐴧𐴡 𐴕𐴡 𐴊𐴞𐴘𐴡𐴥.‘ “

⁵𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴊𐴡𐴥𐴌𐴡, 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤 𐴀𐴠𐴎𐴧𐴡𐴕𐴡𐴃𐴧𐴟 𐴀𐴠𐴒𐴧𐴗𐴝𐴤 𐴊𐴟𐴏𐴃𐴡𐴥 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴊𐴟𐴏𐴃𐴡𐴥𐴌 𐴇𐴝𐴣𐴏𐴠 𐴌𐴝𐴙𐴃𐴕𐴞𐴐𐴞𐴥𐴃𐴢 𐴎𐴝𐴘 𐴈𐴡𐴀𐴌 𐴊𐴠, ’𐴊𐴟𐴏𐴃𐴡𐴥, 𐴀𐴝𐴣𐴀𐴌𐴠𐴥 𐴃𐴞𐴕 𐴕𐴗𐴝𐴥 𐴌𐴟𐴄𐴞 𐴀𐴟𐴊𐴝𐴥𐴌 𐴊𐴡𐴥;⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴀𐴠𐴑 𐴊𐴟𐴏𐴃𐴡𐴥 𐴀𐴞𐴥𐴁𐴝𐴌 𐴏𐴡𐴉𐴡𐴥𐴌𐴡𐴃𐴢 𐴎𐴝𐴘𐴃𐴠-𐴎𐴝𐴘𐴃𐴠 𐴀𐴝𐴣𐴀𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴈𐴝𐴥𐴁𐴝𐴘 𐴁𐴡𐴓𐴧𐴝 𐴀𐴝𐴣𐴀𐴃𐴧𐴟 𐴑𐴠𐴏𐴧𐴟𐴥 𐴕𐴝𐴥𐴘.‘⁷𐴇𐴠𐴥𐴃𐴟𐴕𐴡𐴃𐴢 𐴁𐴟𐴥𐴃𐴡𐴃𐴧𐴟 𐴃𐴝𐴥𐴘 𐴊𐴟𐴏𐴃𐴡𐴥𐴘𐴠 𐴈𐴡𐴀𐴌 𐴊𐴠, ’𐴀𐴝𐴣𐴀𐴌𐴠𐴥 𐴉𐴠𐴌𐴠𐴐𐴝𐴕 𐴕𐴡 𐴒𐴡𐴙𐴅𐴧𐴡𐴥, 𐴀𐴠𐴇𐴡𐴥𐴕 𐴊𐴟𐴖𐴝𐴌 𐴁𐴝𐴣𐴊𐴝𐴤, 𐴀𐴝𐴦𐴌 𐴀𐴝𐴣𐴀𐴌 𐴉𐴟𐴀𐴝𐴙𐴕 𐴀𐴠𐴊𐴧𐴠 𐴀𐴝𐴀𐴛 𐴁𐴞𐴏𐴝𐴥𐴕𐴝𐴃𐴢. 𐴀𐴝𐴀𐴛 𐴀𐴟𐴍𐴞𐴤 𐴃𐴟𐴣𐴀𐴝𐴥𐴣𐴌𐴠 𐴑𐴠𐴏𐴧𐴟𐴥 𐴊𐴞𐴦 𐴕𐴡 𐴉𐴝𐴙𐴅𐴧𐴟𐴔.‘⁸𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴡𐴊𐴞 𐴀𐴞𐴥𐴃𐴠 𐴕𐴞𐴎𐴡𐴌 𐴊𐴟𐴏𐴃𐴡𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴟𐴍𐴞𐴤 𐴑𐴠𐴏𐴧𐴟𐴥 𐴕𐴡 𐴊𐴞𐴦𐴓𐴠𐴥 𐴘𐴡, 𐴃𐴡𐴀 𐴘𐴡𐴥𐴒𐴧𐴗𐴝𐴌 𐴖𐴝𐴌𐴝𐴖𐴡𐴌𐴞 𐴔𐴝𐴒𐴝𐴌 𐴎𐴡𐴌𐴞𐴘𐴝 𐴀𐴞𐴥𐴃𐴠 𐴀𐴟𐴍𐴞𐴤 𐴘𐴡𐴥𐴒𐴧𐴗𐴝𐴃𐴧𐴟 𐴎𐴠𐴊𐴟𐴥𐴕 𐴓𐴝𐴒𐴠𐴌 𐴇𐴠𐴥𐴊𐴟𐴕 𐴊𐴞𐴦𐴁𐴡.

⁹”𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴔𐴝𐴒𐴡, 𐴃𐴟𐴣𐴀𐴝𐴥𐴌𐴝𐴌𐴠 𐴊𐴞𐴦𐴘𐴝 𐴎𐴝𐴘𐴁𐴡; 𐴃𐴟𐴖𐴡, 𐴃𐴟𐴣𐴀𐴝𐴥𐴌𐴝 𐴉𐴝𐴘𐴁𐴝; 𐴊𐴟𐴖𐴝𐴌 𐴁𐴝𐴙𐴅𐴧𐴡, 𐴃𐴟𐴣𐴀𐴝𐴥𐴌𐴝𐴓𐴧𐴝 𐴊𐴟𐴖𐴝𐴌 𐴑𐴟𐴥𐴓𐴝 𐴎𐴝𐴘𐴁𐴡.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴔𐴝𐴒𐴠, 𐴀𐴞𐴥𐴃𐴠 𐴉𐴝𐴦; 𐴎𐴠𐴦𐴕𐴞𐴑𐴞 𐴃𐴟𐴖𐴝, 𐴀𐴞𐴥𐴃𐴠 𐴃𐴟𐴖𐴝𐴘 𐴉𐴝𐴦; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴊𐴟𐴖𐴝𐴌 𐴁𐴝𐴙𐴅𐴧𐴝, 𐴀𐴞𐴥𐴃𐴝𐴌 𐴓𐴧𐴝 𐴑𐴟𐴥𐴓𐴝 𐴎𐴝𐴘𐴁𐴡.

¹¹”𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴁𐴝𐴉𐴢 𐴇𐴡𐴕 𐴀𐴝𐴏𐴠𐴤, 𐴕𐴞𐴎𐴡𐴌 𐴉𐴟𐴖𐴝𐴘𐴠 𐴔𐴝𐴏𐴢 𐴔𐴝𐴒𐴞𐴓𐴠𐴥, 𐴔𐴝𐴏𐴡𐴌 𐴁𐴡𐴊𐴡𐴓𐴢 𐴇𐴝𐴥𐴉𐴢 𐴊𐴞𐴦𐴁𐴡 𐴊𐴠𐴥؟¹²𐴘𐴝𐴥𐴃𐴡 𐴀𐴝𐴕𐴋𐴝 𐴔𐴝𐴒𐴞𐴓𐴠𐴥, 𐴁𐴞𐴏𐴧𐴟𐴥 𐴊𐴞𐴦𐴁𐴡 𐴊𐴠𐴥؟¹³𐴇𐴠𐴥 𐴀𐴞𐴥𐴏𐴝𐴉𐴠, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴈𐴡𐴥𐴌𐴝𐴉𐴢 𐴀𐴡𐴥𐴘 𐴁𐴝𐴦𐴊𐴠 𐴀𐴟𐴥𐴊𐴧𐴗𐴝 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴒𐴡𐴔-𐴒𐴡𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴊𐴞𐴦 𐴎𐴝𐴕𐴡, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴑𐴞𐴘𐴝𐴥 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴃𐴧𐴟 𐴔𐴝𐴒𐴠 𐴀𐴞𐴥𐴃𐴝𐴌𐴝𐴌𐴠 𐴂𐴝𐴑-𐴌𐴟𐴀 𐴕𐴡 𐴊𐴞𐴦𐴃𐴡؟“

𐴀𐴞𐴏𐴝𐴤 𐴀𐴠𐴊𐴧𐴠 𐴁𐴠𐴓𐴎𐴠𐴁𐴟𐴓𐴢

¹⁴𐴀𐴠𐴑 𐴊𐴞𐴕 𐴀𐴞𐴏𐴝𐴤𐴘𐴠 𐴀𐴠𐴒𐴧𐴗𐴝𐴤 𐴁𐴟𐴑 𐴁𐴟𐴥𐴃𐴢 𐴊𐴝𐴥𐴉𐴝𐴌; 𐴁𐴟𐴥𐴃𐴧𐴗𐴝 𐴕𐴠𐴦𐴓𐴞𐴒𐴞𐴘𐴡𐴥𐴘 𐴌𐴝𐴥𐴌, 𐴁𐴟𐴑 𐴀𐴝𐴐𐴧𐴞𐴥𐴓𐴢 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝 𐴔𐴝𐴃𐴞 𐴉𐴝𐴙𐴅𐴧𐴠𐴥, 𐴀𐴝𐴦𐴌 𐴇𐴞𐴥𐴘𐴝𐴕𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘.¹⁵𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝 𐴊𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴏𐴡𐴥𐴊𐴧𐴝𐴌 𐴁𐴠𐴓𐴎𐴠𐴁𐴟𐴓𐴡𐴌 𐴃𐴝𐴦𐴑𐴡𐴃𐴠.“¹⁶𐴀𐴝𐴌 𐴇𐴡𐴊𐴟𐴥𐴕𐴠 𐴀𐴞𐴥𐴁𐴝𐴌𐴠 𐴀𐴠𐴕𐴃𐴝𐴥𐴕 𐴒𐴡𐴌𐴝𐴥𐴌 𐴕𐴞𐴘𐴡𐴃𐴠, 𐴀𐴞𐴥𐴁𐴝𐴃𐴧𐴟 𐴀𐴠𐴑𐴧𐴝𐴥𐴕 𐴀𐴝𐴏𐴔𐴝𐴕𐴞 𐴕𐴞𐴐𐴝𐴥𐴕 𐴊𐴝𐴁𐴞 𐴒𐴡𐴙𐴅𐴧𐴠𐴥.

¹⁷𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠 𐴌𐴝𐴙𐴅𐴧𐴡𐴃𐴢 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥, 𐴇𐴞𐴥𐴘𐴝𐴕 𐴃𐴡 𐴉𐴝𐴥𐴕𐴝 𐴀𐴡𐴥𐴘𐴎𐴝𐴒𐴡𐴘; 𐴀𐴝𐴦𐴌 𐴎𐴠 𐴒𐴡𐴥𐴌𐴡𐴃𐴢 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥, 𐴇𐴞𐴥𐴘𐴝𐴕 𐴀𐴡𐴥 𐴃𐴡 𐴁𐴡𐴌𐴁𐴝𐴊𐴢 𐴀𐴡𐴥𐴘𐴎𐴝𐴒𐴡𐴘.¹⁸𐴇𐴠𐴥𐴕𐴊𐴞𐴓𐴧𐴝, 𐴎𐴡𐴊𐴞 𐴐𐴡𐴥𐴘𐴃𐴝𐴕 𐴕𐴞𐴎𐴡𐴌 𐴀𐴟𐴓𐴋𐴝 𐴕𐴞𐴎𐴠 𐴀𐴡𐴥, 𐴀𐴞𐴥𐴃𐴝𐴌 𐴌𐴝𐴙𐴅𐴧𐴡 𐴑𐴠𐴀𐴕𐴒𐴡𐴌𐴞 𐴄𐴞𐴑𐴞𐴁𐴡𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴈𐴡𐴀𐴌 𐴊𐴠, 𐴀𐴝𐴀𐴛 𐴁𐴟𐴥𐴃𐴢 𐴊𐴝𐴥𐴉𐴝𐴘 𐴊𐴠 𐴁𐴠𐴓𐴎𐴠𐴁𐴟𐴓𐴡𐴌 𐴃𐴝𐴦𐴑𐴡𐴃𐴠.¹⁹𐴃𐴡𐴀 𐴎𐴡𐴊𐴞 𐴀𐴝𐴀𐴛 𐴁𐴟𐴥𐴃𐴢 𐴊𐴝𐴥𐴉𐴝𐴘 𐴊𐴠 𐴁𐴠𐴓𐴎𐴠𐴁𐴟𐴓𐴡𐴌 𐴃𐴝𐴦𐴑𐴡𐴃𐴠 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴊𐴠 𐴇𐴝𐴌 𐴃𐴝𐴦𐴑𐴡𐴃𐴠 𐴊𐴝𐴥𐴉𐴝 𐴊𐴠𐴥؟ 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴞𐴏𐴝𐴌𐴇𐴝𐴌 𐴀𐴡𐴥𐴘𐴁𐴡 𐴊𐴠 𐴀𐴞𐴥𐴃𐴝𐴌𐴝.²⁰𐴓𐴠𐴑𐴞𐴕 𐴎𐴡𐴊𐴞 𐴀𐴝𐴀𐴛 𐴁𐴟𐴥𐴃𐴢 𐴊𐴝𐴥𐴉𐴝𐴘 𐴊𐴠 𐴀𐴝𐴓𐴧𐴝𐴌 𐴃𐴝𐴦𐴑𐴡𐴃𐴠 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴃𐴡 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴀𐴘𐴒𐴞𐴘𐴡𐴘.

²¹”𐴎𐴠𐴣𐴃𐴧𐴠𐴥 𐴇𐴡𐴕𐴡𐴤 𐴁𐴡𐴓𐴟𐴖𐴝𐴌 𐴔𐴝𐴕𐴟𐴥𐴙𐴐𐴠 𐴀𐴝𐴥𐴃𐴞𐴘𐴝𐴌 𐴉𐴞𐴣𐴊𐴞𐴥 𐴕𐴞𐴎𐴡𐴌 𐴒𐴡𐴥𐴌𐴡𐴌𐴠 𐴉𐴝𐴀𐴌𐴝𐴊𐴞 𐴃𐴝𐴥𐴑𐴠, 𐴇𐴠𐴥𐴣𐴃𐴧𐴠 𐴘𐴡𐴥𐴒𐴧𐴗𐴝𐴌 𐴏𐴝𐴥𐴔𐴝𐴕 𐴀𐴡𐴥𐴑𐴧𐴡𐴓𐴢 𐴈𐴠𐴥𐴉𐴝𐴎𐴡𐴃𐴢 𐴃𐴝𐴥𐴑𐴠.²²𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴌 𐴃𐴟𐴥𐴖𐴝𐴌𐴡 𐴁𐴡𐴓𐴟𐴖𐴝𐴌 𐴀𐴠𐴎𐴧𐴡𐴕 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌𐴠 𐴇𐴝𐴥𐴔𐴓𐴝 𐴒𐴡𐴌𐴞𐴥 𐴇𐴝𐴥𐴌𐴝𐴘𐴉𐴠𐴓𐴠, 𐴇𐴠𐴥𐴣𐴃𐴧𐴠 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌 𐴇𐴠𐴥 𐴀𐴝𐴥𐴃𐴞𐴘𐴝𐴌 𐴓𐴡𐴘𐴎𐴝𐴒𐴡𐴥𐴘 𐴎𐴞𐴀𐴕𐴡𐴌 𐴖𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴁𐴡𐴥𐴌𐴝𐴐𐴝 𐴒𐴡𐴙𐴃𐴧𐴡𐴥, 𐴀𐴝𐴦𐴌 𐴎𐴞𐴃𐴞 𐴎𐴞𐴀𐴕 𐴓𐴟𐴄𐴢 𐴒𐴡𐴙𐴅𐴧𐴠𐴥 𐴇𐴞𐴥𐴀𐴕 𐴁𐴝𐴍𐴞𐴊𐴞𐴉𐴠𐴥𐴓𐴠.

²³”𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴞𐴥𐴑𐴧𐴝 𐴕𐴡, 𐴘𐴡𐴥𐴒𐴧𐴗𐴝 𐴀𐴝𐴣𐴀𐴌 𐴀𐴟𐴓𐴋𐴝; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴊𐴡𐴓𐴝 𐴕𐴡 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴐𐴞𐴥𐴣𐴍𐴝𐴐𐴞𐴄𐴧𐴝𐴤 𐴒𐴡𐴌𐴠𐴥.

𐴈𐴡𐴥𐴌𐴝𐴉𐴢 𐴅𐴞𐴕𐴡𐴌 𐴖𐴝𐴦𐴉𐴠𐴏𐴞

²⁴”𐴎𐴠𐴣𐴃𐴧𐴠𐴥 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴃𐴧𐴟 𐴈𐴡𐴥𐴌𐴝𐴉𐴢 𐴅𐴞𐴕 𐴕𐴠𐴦𐴓𐴠, 𐴇𐴠𐴥𐴣𐴃𐴧𐴠 𐴇𐴠𐴥 𐴅𐴞𐴕 𐴕𐴗𐴝𐴥 𐴉𐴟𐴥𐴖𐴝𐴕𐴝 𐴎𐴝𐴒𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘 𐴀𐴝𐴌𐴝𐴔 𐴒𐴡𐴙𐴃𐴧𐴡𐴥 𐴎𐴝𐴒𐴝 𐴃𐴟𐴖𐴝. 𐴔𐴡𐴕𐴃𐴡𐴌 𐴕𐴡 𐴉𐴝𐴘𐴓𐴠, 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴈𐴡𐴀 𐴊𐴠, ’𐴀𐴝𐴀𐴛 𐴀𐴝𐴣𐴀𐴌 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴘𐴧𐴟𐴔𐴁𐴡𐴥𐴘, 𐴎𐴠𐴕𐴃𐴟𐴥 𐴀𐴝𐴀𐴛 𐴕𐴠𐴦𐴓𐴞𐴀𐴝𐴙𐴐𐴧𐴞𐴥.‘²⁵𐴘𐴞𐴥𐴁𐴝 𐴎𐴠𐴣𐴃𐴧𐴠𐴥 𐴖𐴝𐴦𐴉𐴠𐴏𐴢 𐴀𐴝𐴘𐴧𐴠𐴤, 𐴇𐴠𐴥 𐴎𐴝𐴒𐴝 𐴒𐴝𐴥𐴕 𐴏𐴝𐴥𐴉𐴢 𐴒𐴡𐴙𐴅𐴧𐴝𐴥 𐴀𐴠𐴊𐴧𐴠 𐴄𐴞𐴥𐴑 𐴒𐴡𐴙𐴅𐴧𐴝𐴥 𐴓𐴡𐴦𐴃𐴉𐴝.²⁶𐴁𐴝𐴦𐴊𐴠 𐴘𐴞𐴥𐴁𐴝 𐴎𐴝𐴘 𐴀𐴝𐴌𐴡𐴤 𐴇𐴝𐴥𐴣𐴃𐴧𐴗𐴝 𐴕𐴞𐴎𐴡𐴌 𐴃𐴟𐴥𐴖𐴝𐴌𐴡 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴝𐴕𐴠𐴤, 𐴀𐴝𐴦𐴌 𐴇𐴞𐴥𐴀𐴕 𐴒𐴡𐴥𐴓𐴞 𐴇𐴠𐴥𐴍𐴠 𐴃𐴝𐴥𐴑𐴠. 𐴃𐴡𐴥𐴘 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝𐴌 𐴉𐴞𐴏𐴡𐴥𐴌 𐴇𐴝𐴥𐴓𐴡𐴃𐴢 𐴀𐴝𐴒𐴡𐴌 𐴇𐴝𐴥𐴓𐴡𐴃𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴈𐴡𐴥𐴌𐴝𐴉𐴢 𐴀𐴡𐴥𐴘𐴎𐴝𐴒𐴡𐴘.“

𐴏𐴡𐴥𐴘𐴧𐴞 𐴔𐴟𐴁𐴝𐴌𐴠𐴑

²⁷𐴀𐴞𐴏𐴝𐴤𐴘𐴠 𐴇𐴞𐴥𐴀𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴃𐴧𐴟 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝𐴘𐴠 𐴒𐴟𐴎𐴡𐴌𐴞 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴟𐴁𐴝𐴌𐴠𐴑 𐴀𐴡 𐴉𐴠𐴄𐴢 𐴎𐴞𐴁𐴝𐴤𐴃𐴢 𐴃𐴟𐴀𐴛 𐴀𐴝𐴐𐴧𐴞𐴥𐴓𐴝, 𐴀𐴠𐴊𐴧𐴠 𐴀𐴡 𐴊𐴟𐴊𐴢 𐴎𐴞𐴀𐴕 𐴃𐴟𐴀𐴛 𐴈𐴝𐴥𐴀𐴘𐴓𐴝.“

²⁸𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴔𐴡𐴕𐴃𐴡𐴌 𐴀𐴟𐴘𐴃𐴝𐴌𐴝𐴤 𐴀𐴝𐴌𐴡𐴤 𐴁𐴞𐴐𐴞𐴤 𐴔𐴟𐴁𐴝𐴌𐴠𐴑, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴉𐴟𐴥𐴕𐴠 𐴀𐴠𐴊𐴧𐴠 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥.“

𐴕𐴞𐴐𐴝𐴥𐴕 𐴊𐴝𐴈𐴝𐴤𐴘𐴁𐴝𐴌 𐴊𐴝𐴁𐴞

²⁹𐴎𐴠𐴃𐴧𐴡𐴥𐴃𐴢 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴎𐴡𐴔𐴝 𐴀𐴡𐴥𐴌, 𐴀𐴞𐴏𐴝𐴤𐴘𐴠 𐴈𐴡𐴖𐴝𐴤𐴃𐴢 𐴐𐴟𐴥𐴌𐴟 𐴊𐴡𐴙𐴅𐴧𐴠 𐴊𐴠, ”𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴈𐴡𐴥𐴌𐴝𐴉𐴢; 𐴀𐴞𐴃𐴝𐴌𐴝𐴤 𐴕𐴞𐴐𐴝𐴥𐴕 𐴊𐴝𐴁𐴞 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴀𐴞𐴃𐴝𐴌𐴝𐴤𐴌𐴠 𐴕𐴡𐴁𐴞 𐴘𐴟𐴕𐴟𐴏𐴡𐴌 𐴕𐴞𐴐𐴝𐴥𐴕 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴕𐴞𐴐𐴝𐴥𐴕 𐴊𐴞𐴘𐴝 𐴕𐴡 𐴎𐴝𐴘𐴁𐴡.³⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴟𐴕𐴟𐴏𐴢 𐴎𐴠𐴕𐴊𐴞𐴓𐴧𐴝 𐴕𐴞𐴕𐴞𐴜𐴞 𐴐𐴡𐴥𐴀𐴌𐴡𐴌 𐴔𐴝𐴙𐴕𐴐𐴡𐴥𐴌 𐴓𐴧𐴝 𐴕𐴞𐴐𐴝𐴥𐴕 𐴀𐴡𐴥𐴀𐴙𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴘𐴡𐴥 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌 𐴓𐴧𐴝 𐴕𐴞𐴐𐴝𐴥𐴕 𐴀𐴡𐴥𐴘𐴁𐴡.³¹𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴐𐴞𐴁𐴝𐴤 𐴔𐴟𐴓𐴧𐴟𐴑𐴡𐴌 𐴌𐴝𐴕𐴞 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴞𐴀𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴟𐴍𐴞𐴤𐴁𐴡, 𐴀𐴠𐴊𐴧𐴠 𐴀𐴞𐴃𐴝𐴌𐴝𐴤𐴌𐴠 𐴈𐴡𐴏𐴟𐴥𐴌 𐴊𐴞𐴥𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴘𐴠 𐴃𐴡 𐴏𐴡𐴥𐴓𐴡𐴔𐴝𐴕𐴡𐴌 𐴁𐴟𐴊𐴧𐴞𐴥𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴁𐴡𐴓𐴧𐴝 𐴊𐴟𐴕𐴞𐴘𐴝𐴙𐴌 𐴐𐴠𐴥𐴐𐴢 𐴔𐴝𐴃𐴝𐴥𐴃𐴧𐴟 𐴀𐴝𐴙𐴐𐴧𐴞𐴤𐴓𐴢, 𐴀𐴝𐴦𐴌 𐴏𐴡𐴀, 𐴏𐴡𐴥𐴓𐴡𐴔𐴝𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴑𐴎𐴡𐴕 𐴀𐴞𐴣𐴘𐴡𐴥𐴃𐴢 𐴀𐴝𐴏𐴠𐴤.³²𐴑𐴞𐴘𐴝𐴔𐴡𐴃𐴡𐴌 𐴊𐴞𐴕 𐴕𐴞𐴕𐴞𐴜𐴞 𐴐𐴡𐴥𐴀𐴌𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴞𐴀𐴕𐴡𐴌 𐴉𐴟𐴥𐴖𐴝𐴣𐴃𐴞 𐴃𐴞𐴥𐴘𐴝𐴘𐴁𐴡, 𐴀𐴝𐴦𐴌 𐴀𐴞𐴃𐴝𐴌𐴝𐴤𐴌𐴠 𐴈𐴡𐴏𐴟𐴥𐴌 𐴊𐴞𐴥𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴃𐴡 𐴘𐴟𐴕𐴟𐴏𐴡𐴌 𐴀𐴠𐴓𐴝𐴕 𐴉𐴟𐴥𐴕𐴞 𐴃𐴡𐴖𐴝𐴥 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴏𐴡𐴀, 𐴘𐴟𐴕𐴟𐴏𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴑𐴎𐴡𐴕 𐴀𐴞𐴣𐴘𐴡𐴥𐴃𐴢 𐴀𐴝𐴏𐴠𐴤.

𐴒𐴝𐴦𐴌 𐴉𐴡𐴀𐴌

³³”𐴇𐴡𐴕𐴡𐴤𐴑𐴞𐴘𐴠 𐴃𐴡 𐴏𐴠𐴌𐴝𐴑 𐴊𐴡𐴥𐴌𐴝𐴘 𐴓𐴟𐴑𐴝𐴘 𐴘𐴝𐴥 𐴁𐴝𐴥𐴙𐴌𐴡𐴌 𐴃𐴡𐴓𐴠 𐴌𐴝𐴑𐴠𐴥 𐴊𐴠 𐴕𐴝𐴥𐴘, 𐴁𐴡𐴥𐴓𐴑𐴠 𐴁𐴡𐴘𐴍𐴡𐴥𐴕𐴞𐴌 𐴖𐴡𐴌𐴠 𐴁𐴠 𐴌𐴝𐴑𐴠𐴥, 𐴎𐴠𐴀𐴕𐴠 𐴎𐴠𐴃𐴝𐴌𐴝𐴤 𐴁𐴟𐴥𐴃𐴡𐴌𐴠 𐴀𐴝𐴘𐴧𐴠𐴤 𐴀𐴞𐴥𐴃𐴝𐴌𐴝 𐴉𐴡𐴀𐴌 𐴊𐴠𐴑𐴠𐴥.³⁴𐴃𐴟𐴣𐴀𐴝𐴥𐴣𐴌 𐴒𐴝𐴦𐴌 𐴏𐴠𐴌𐴝𐴑 𐴀𐴡𐴥𐴙𐴓𐴊𐴠 𐴃𐴟𐴣𐴀𐴝𐴥𐴣𐴌 𐴏𐴟𐴑; 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴣𐴌 𐴏𐴟𐴑 𐴒𐴡𐴔 𐴀𐴝𐴏𐴠𐴤 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴣𐴌 𐴒𐴟𐴣𐴍𐴝 𐴒𐴝𐴦 𐴉𐴡𐴀𐴌𐴠 𐴉𐴟𐴌𐴝𐴘𐴧𐴝 𐴀𐴡𐴥𐴘𐴁𐴡; 𐴔𐴡𐴕𐴃𐴡𐴌 𐴈𐴡𐴥𐴌𐴝𐴉𐴢 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴣𐴌 𐴒𐴝𐴦 𐴘𐴡𐴥 𐴀𐴝𐴕𐴊𐴝𐴤𐴌𐴠 𐴉𐴟𐴌𐴝𐴘𐴧𐴝 𐴀𐴡𐴥𐴘𐴁𐴡.³⁵𐴇𐴠𐴥𐴃𐴡𐴓𐴧𐴝 𐴀𐴟𐴥𐴣𐴐𐴞𐴘𐴝𐴌, 𐴃𐴟𐴣𐴀𐴝𐴥𐴣𐴌 𐴁𐴟𐴥𐴃𐴡𐴌𐴠 𐴎𐴠 𐴉𐴡𐴀𐴌 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴎𐴠𐴀𐴕𐴠 𐴀𐴝𐴕𐴊𐴝𐴤𐴌 𐴕𐴡.³⁶𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴒𐴟𐴣𐴍𐴝 𐴒𐴝𐴦 𐴉𐴡𐴀𐴌𐴠 𐴉𐴟𐴌𐴝𐴘𐴧𐴝 𐴃𐴝𐴥𐴑𐴠 𐴀𐴝𐴦𐴌 𐴇𐴡𐴕𐴡𐴤 𐴀𐴠𐴑𐴧𐴝𐴥𐴕 𐴇𐴞𐴥𐴏𐴧𐴝 𐴀𐴝𐴕𐴊𐴝𐴤𐴌𐴡𐴃𐴢 𐴕𐴡 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴃𐴡 𐴇𐴞𐴥𐴘𐴝𐴕 𐴀𐴠𐴕𐴊𐴞𐴓𐴧𐴝 𐴉𐴟𐴌𐴝𐴉𐴟𐴌𐴞 𐴉𐴡𐴀𐴌𐴡𐴃𐴢 𐴀𐴡𐴥𐴘𐴁𐴡, 𐴎𐴠𐴕𐴊𐴞𐴓𐴧𐴝 𐴏𐴠𐴌𐴝𐴑 𐴊𐴡𐴥𐴌𐴝𐴘𐴓𐴠 𐴃𐴟𐴣𐴀𐴝𐴥𐴣𐴌𐴠 𐴉𐴡𐴀𐴌 𐴊𐴠.“

𐴉𐴠𐴥𐴌𐴡𐴐𐴞𐴌 𐴖𐴡𐴌𐴠 𐴀𐴠𐴊𐴧𐴠 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴓𐴠𐴔𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢

³⁷𐴀𐴞𐴏𐴝𐴤𐴘𐴠 𐴇𐴞𐴥𐴀𐴕 𐴁𐴡𐴘𐴧𐴝𐴕 𐴒𐴡𐴌𐴠𐴥𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴠𐴎𐴧𐴡𐴕 𐴉𐴠𐴥𐴌𐴡𐴐𐴞𐴘𐴠 𐴀𐴞𐴥𐴁𐴝𐴌𐴠 𐴕𐴞𐴎𐴡𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴊𐴝𐴖𐴡𐴃𐴢 𐴊𐴞𐴘𐴠𐴥; 𐴃𐴡𐴥𐴘 𐴀𐴞𐴥𐴁𐴝 𐴁𐴟𐴥𐴃𐴡𐴌𐴠 𐴎𐴝𐴘 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥.³⁸𐴀𐴞𐴥𐴁𐴝𐴘𐴠 𐴈𐴝𐴥𐴕𐴝 𐴈𐴝𐴥𐴘𐴁𐴝𐴌 𐴀𐴝𐴒𐴠 𐴀𐴝𐴥𐴃𐴢 𐴕𐴡𐴥 𐴊𐴟𐴥𐴖𐴠 𐴊𐴠 𐴊𐴠𐴑𐴞𐴥, 𐴉𐴠𐴥𐴌𐴡𐴐𐴞 𐴖𐴝 𐴀𐴝𐴔𐴧𐴟𐴥𐴑 𐴀𐴡𐴥𐴘𐴒𐴞𐴘𐴡𐴘.

³⁹𐴔𐴝𐴓𐴞𐴑𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴉𐴞𐴘𐴝𐴓𐴝𐴌 𐴀𐴠𐴊𐴧𐴠 𐴃𐴝𐴥𐴓𐴢-𐴁𐴝𐴏𐴡𐴥𐴕𐴡𐴌 𐴁𐴝𐴀𐴌𐴋𐴝𐴥𐴑 𐴁𐴠 𐴏𐴝𐴥𐴉𐴢 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴃𐴡 𐴓𐴝𐴓𐴡𐴥𐴏𐴠 𐴀𐴠𐴊𐴧𐴠 𐴈𐴡𐴥𐴌𐴝𐴉𐴞𐴘𐴠 𐴉𐴟𐴌𐴝𐴘𐴧𐴝.⁴⁰𐴀𐴡𐴥 𐴉𐴡𐴦𐴓𐴢 𐴀𐴡𐴥𐴑𐴧𐴡𐴓𐴢, 𐴁𐴝𐴀𐴌𐴋𐴝𐴥𐴑 𐴁𐴝𐴕𐴝𐴘𐴧𐴠𐴥 𐴊𐴠 𐴀𐴝𐴓𐴧𐴝𐴘𐴠 𐴑𐴞 𐴁𐴟𐴥𐴃𐴡𐴌𐴡𐴌 𐴋𐴝𐴥𐴑 𐴀𐴡𐴥 𐴕𐴡𐴥 𐴁𐴝𐴕𐴝 𐴕𐴠𐴥؟⁴¹𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴏𐴡𐴥𐴃𐴑𐴝 𐴒𐴡𐴌𐴞𐴥𐴉𐴠𐴓𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴝𐴘𐴁𐴡𐴘.

⁴²”𐴀𐴡𐴥 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴉𐴟𐴊𐴞𐴕𐴝𐴌, 𐴃𐴠𐴏𐴉𐴝𐴃𐴝𐴌 𐴀𐴠𐴊𐴧𐴠 𐴑𐴠𐴥𐴃𐴞𐴌 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴇𐴝𐴥𐴑𐴡𐴌 𐴊𐴡𐴐𐴢 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴊𐴡𐴦, 𐴓𐴠𐴑𐴞𐴕 𐴀𐴝𐴓𐴧𐴝𐴌 𐴀𐴞𐴕𐴏𐴝𐴥𐴉𐴢 𐴀𐴠𐴊𐴧𐴠 𐴔𐴟𐴇𐴝𐴥𐴁𐴧𐴡𐴃𐴡𐴌𐴠 𐴁𐴝𐴊𐴢 𐴊𐴞𐴉𐴠𐴥𐴓𐴡. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴞𐴀𐴕 𐴀𐴡𐴥 𐴒𐴡𐴌𐴡𐴤𐴕 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴀𐴟𐴀𐴙𐴕 𐴀𐴡𐴥 𐴁𐴝𐴊𐴢 𐴕𐴡 𐴊𐴡𐴕 𐴀𐴝𐴐𐴧𐴞𐴥𐴓𐴢.

⁴³”𐴀𐴡𐴥 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴟𐴣𐴏𐴡𐴓𐴢 𐴃𐴡𐴑𐴧𐴝𐴌 𐴇𐴝𐴊𐴞𐴌𐴝𐴤𐴃𐴢 𐴁𐴡𐴘𐴃𐴡𐴥 𐴉𐴡𐴏𐴡𐴥𐴕 𐴒𐴡𐴌𐴡𐴤, 𐴀𐴠𐴊𐴧𐴠 𐴁𐴝𐴎𐴝𐴌𐴠-𐴁𐴝𐴎𐴝𐴌𐴠 𐴏𐴡𐴥𐴓𐴝𐴔 𐴉𐴝𐴘𐴃𐴡 𐴏𐴡𐴀.

⁴⁴”𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴡𐴥𐴃𐴢 𐴕𐴡 𐴉𐴝𐴦 𐴊𐴠 𐴈𐴡𐴁𐴡𐴌𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕𐴡𐴌 𐴖𐴡𐴃𐴧𐴟𐴥 𐴔𐴝𐴙𐴕𐴐𐴠𐴥 𐴇𐴡𐴘 𐴕𐴡 𐴉𐴝𐴌𐴞 𐴀𐴝𐴥𐴣𐴍𐴠.“

⁴⁵𐴇𐴠𐴥𐴃𐴟𐴕𐴡𐴃𐴢 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴎𐴧𐴡𐴕𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴃𐴟𐴀𐴛 𐴊𐴠 𐴇𐴞𐴥𐴀𐴕 𐴈𐴡𐴀𐴘𐴢 𐴀𐴝𐴣𐴀𐴌𐴝𐴌𐴠 𐴘𐴡𐴥 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴡𐴤𐴌.“

⁴⁶𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴘𐴡𐴥 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴝𐴙𐴕𐴐𐴡𐴥𐴌 𐴖𐴡𐴌𐴠 𐴀𐴠𐴕𐴊𐴞𐴓𐴧𐴝 𐴉𐴟𐴣𐴎𐴝𐴤 𐴃𐴟𐴓𐴞𐴤𐴊𐴡, 𐴎𐴞𐴀𐴕 𐴁𐴡𐴘𐴃𐴠𐴥 𐴊𐴟𐴑, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴃𐴡 𐴉𐴟𐴣𐴎𐴝 𐴇𐴞𐴥𐴀𐴕𐴡𐴃𐴢 𐴀𐴠𐴒𐴧𐴗𐴝𐴤 𐴀𐴡𐴦𐴣𐴓𐴢 𐴀𐴟𐴥𐴊𐴧𐴗𐴝 𐴕𐴡 𐴓𐴝𐴒𐴡.

⁴⁷”𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴈𐴡𐴁𐴡𐴌𐴡𐴌𐴠 𐴁𐴝𐴕𐴝𐴘𐴃𐴟𐴓𐴡𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴙𐴓𐴢 𐴊𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠.⁴⁸𐴇𐴠𐴥𐴀𐴕𐴒𐴡𐴌𐴞 𐴃𐴟𐴣𐴀𐴝𐴥𐴌𐴝 𐴒𐴡𐴁𐴝𐴤 𐴊𐴡𐴥 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴈𐴝𐴔𐴡𐴃𐴢 𐴌𐴝𐴎𐴞 𐴀𐴝𐴏𐴡𐴤; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠 𐴊𐴠 𐴃𐴡 𐴀𐴞𐴥𐴃𐴝𐴌𐴝, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴈𐴡𐴁𐴡𐴌𐴡𐴌𐴠 𐴁𐴝𐴕𐴝𐴘𐴃𐴟𐴓𐴡𐴥 𐴊𐴠 𐴃𐴟𐴣𐴀𐴝𐴥𐴌𐴝.⁴⁹𐴇𐴠𐴥𐴃𐴡𐴓𐴧𐴝 𐴃𐴡 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴒𐴞𐴘𐴝𐴕𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ’𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴕𐴡𐴁𐴞 𐴀𐴠𐴊𐴧𐴠 𐴌𐴡𐴏𐴟𐴥𐴓𐴢 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴘𐴧𐴟𐴔, 𐴀𐴞𐴥𐴃𐴝𐴌𐴝 𐴈𐴠𐴥𐴕𐴃𐴟 𐴇𐴡𐴊𐴟𐴥𐴕𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴡 𐴀𐴠𐴊𐴧𐴠 𐴇𐴡𐴊𐴟𐴥𐴕𐴡𐴌𐴠 𐴎𐴟𐴓𐴟𐴥𐴔 𐴒𐴡𐴌𐴞𐴥𐴁𐴡.⁵⁰𐴇𐴠𐴥𐴃𐴡𐴓𐴧𐴝 𐴊𐴟𐴕𐴞𐴘𐴝𐴙𐴌 𐴉𐴡𐴘𐴊𐴝𐴘𐴠𐴐𐴞𐴌 𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴎𐴠𐴊𐴟𐴥𐴕 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴓𐴡𐴖𐴢 𐴁𐴝𐴥𐴐𐴝 𐴒𐴞𐴥𐴘𐴠, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴡𐴥𐴘𐴁𐴡 𐴊𐴠 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢,⁵¹𐴀𐴝𐴁𐴠𐴓𐴡𐴌 𐴓𐴡𐴖𐴢 𐴖𐴡𐴥𐴃𐴧𐴟 𐴓𐴡𐴥𐴃𐴞 𐴀𐴡 𐴎𐴝𐴑𐴝𐴌𐴞𐴥𐴘𐴝𐴌 𐴓𐴡𐴖𐴢 𐴉𐴡𐴙𐴅𐴧𐴡𐴕𐴃𐴡, 𐴎𐴞𐴁𐴝𐴤𐴌𐴠 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴀𐴠𐴊𐴧𐴠 𐴂𐴝𐴑 𐴎𐴝𐴒𐴝𐴌 𐴔𐴝𐴎𐴠𐴥𐴔𐴝𐴙𐴅𐴧𐴝 𐴑𐴟𐴥𐴕 𐴒𐴡𐴌𐴝𐴥 𐴒𐴞𐴥𐴘𐴠. 𐴀𐴡𐴥𐴘, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴇𐴞𐴥𐴀𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴡𐴥𐴘𐴁𐴡 𐴊𐴠 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢.‘

⁵²”𐴀𐴡𐴥 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴁𐴟𐴊𐴧𐴞𐴥𐴌 𐴏𐴝𐴁𐴞𐴤 𐴓𐴡𐴘𐴉𐴠𐴥𐴓𐴝𐴘𐴧𐴡; 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴘𐴡𐴥 𐴕𐴡𐴥 𐴒𐴡𐴥𐴓𐴡, 𐴀𐴝𐴦𐴌 𐴒𐴡𐴥𐴓𐴠𐴌 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥 𐴀𐴡𐴀𐴣𐴏𐴞 𐴌𐴝𐴙𐴑𐴧𐴡𐴥.“

⁵³𐴀𐴞𐴏𐴝𐴤 𐴈𐴠𐴥𐴕𐴃𐴟 𐴕𐴠𐴦𐴓𐴞 𐴎𐴝𐴦𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴝𐴓𐴠𐴔 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴌𐴝𐴑 𐴒𐴡𐴌𐴞𐴥 𐴀𐴞𐴥𐴁𐴝𐴌𐴠 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴏𐴟𐴥𐴖𐴝𐴓𐴢 𐴀𐴡𐴥𐴑𐴧𐴡𐴓𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠,⁵⁴𐴀𐴝𐴦𐴌 𐴇𐴠𐴥𐴀𐴕𐴒𐴡𐴌𐴞 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴓𐴡𐴥𐴘 𐴈𐴡𐴓𐴡𐴃𐴢 𐴉𐴠𐴥𐴓𐴝𐴘𐴃𐴡 𐴏𐴡𐴦𐴛 𐴒𐴡𐴌𐴞𐴥 𐴀𐴝𐴐𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590