𐴘𐴡𐴇𐴝𐴥𐴕𐴧𐴝6
𐴉𐴝𐴣𐴏𐴢 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌𐴠 𐴈𐴝𐴥𐴕𐴝 𐴈𐴝𐴥𐴁𐴝𐴘𐴧𐴠
1𐴘𐴝𐴥𐴌𐴁𐴝𐴦𐴊𐴠, 𐴀𐴞𐴏𐴝𐴤 𐴒𐴝𐴓𐴞𐴓𐴢 𐴋𐴞𐴀𐴌 𐴀𐴡𐴑𐴟𐴓𐴠 𐴒𐴞𐴦𐴘𐴠𐴥𐴒𐴡𐴘, 𐴎𐴠 𐴋𐴞𐴀𐴌𐴠 𐴃𐴞𐴁𐴞𐴌𐴞𐴘𐴝𐴏𐴢 𐴋𐴞𐴀 𐴘𐴡𐴥 𐴈𐴡𐴀.2𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴞𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴒𐴡𐴙𐴃𐴧𐴡𐴥 𐴊𐴠 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴃𐴝𐴌𐴝 𐴊𐴠𐴙𐴑𐴧𐴞𐴥𐴓𐴢.3𐴁𐴝𐴦𐴊𐴠 𐴀𐴞𐴏𐴝𐴤 𐴀𐴠𐴒𐴧𐴗𐴝𐴤 𐴉𐴝𐴀𐴌𐴡𐴌 𐴖𐴡𐴌𐴠 𐴀𐴟𐴍𐴞𐴤, 𐴇𐴠𐴥𐴍𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴁𐴡𐴙𐴐𐴧𐴠𐴥.4𐴇𐴠𐴥𐴣𐴃𐴧𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴀𐴝𐴎𐴝𐴊𐴞𐴌-𐴀𐴞𐴊𐴢 𐴋𐴝𐴥𐴑𐴠 𐴀𐴝𐴙𐴐𐴧𐴠𐴥.5𐴀𐴞𐴏𐴝𐴤𐴘𐴠 𐴏𐴟𐴑 𐴃𐴟𐴓𐴞𐴤 𐴏𐴝𐴘𐴧𐴠𐴥 𐴌𐴝𐴥𐴌 𐴊𐴠𐴑𐴠𐴥𐴌 𐴊𐴠, 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴘𐴧𐴠𐴤𐴌, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴉𐴞𐴓𐴞𐴥𐴂𐴡𐴌𐴠 𐴈𐴡𐴀𐴌 𐴊𐴠 ”𐴀𐴠 𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤 𐴇𐴝𐴥𐴘 𐴁𐴡𐴓𐴧𐴝 𐴀𐴝𐴣𐴀𐴌𐴝 𐴌𐴟𐴄𐴞 𐴇𐴡𐴕𐴃𐴟𐴤 𐴑𐴞𐴕𐴞𐴘𐴟𐴥𐴔؟“6𐴉𐴞𐴓𐴞𐴥𐴂𐴡𐴌𐴠 𐴀𐴠𐴕𐴃𐴝𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴈𐴡𐴘𐴧𐴠𐴥 𐴊𐴠, 𐴓𐴠𐴑𐴞𐴕 𐴕𐴞𐴎𐴠 𐴑𐴞𐴦 𐴒𐴡𐴌𐴞𐴥𐴁𐴡 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴀𐴝𐴒𐴠 𐴓𐴡𐴥𐴃𐴞 𐴎𐴝𐴕𐴠.7𐴉𐴞𐴓𐴞𐴥𐴂𐴠 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ”𐴀𐴞𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴌𐴠 𐴈𐴡𐴔-𐴈𐴡𐴔 𐴒𐴡𐴌𐴞 𐴊𐴞𐴦𐴓𐴠𐴥 𐴘𐴡, 𐴃𐴡𐴀 𐴊𐴟𐴘 𐴐𐴡𐴥𐴃𐴢 𐴊𐴞𐴕𐴝𐴥𐴌𐴡𐴌 𐴌𐴟𐴄𐴞 𐴓𐴡𐴘 𐴕𐴡 𐴑𐴟𐴓𐴝𐴘𐴁𐴡𐴥.“8𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴠𐴎𐴧𐴡𐴕𐴠, 𐴘𐴝𐴥𐴕𐴞 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴡𐴌 𐴁𐴝𐴥𐴘 𐴀𐴠𐴕𐴊𐴠𐴌𐴞𐴘𐴝𐴏𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠,9”𐴀𐴠𐴍𐴠𐴥 𐴀𐴠𐴒𐴧𐴗𐴝𐴤 𐴉𐴟𐴖𐴝𐴃𐴧𐴟 𐴉𐴝𐴣𐴏𐴢 𐴏𐴗𐴝𐴥 𐴁𐴝𐴌𐴓𐴞𐴥𐴌 𐴌𐴟𐴄𐴞 𐴀𐴠𐴊𐴧𐴠 𐴊𐴟𐴖𐴝𐴥 𐴔𐴝𐴏𐴢 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴠𐴊𐴟𐴥𐴕 𐴔𐴝𐴙𐴕𐴐𐴡𐴥𐴌𐴠 𐴀𐴞𐴀𐴕𐴠 𐴑𐴞𐴦 𐴀𐴡𐴥𐴘𐴁𐴡؟“10𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴟𐴀𐴝𐴥𐴒𐴝𐴌𐴡.“𐴇𐴠𐴥 𐴎𐴝𐴒𐴝𐴃𐴢 𐴁𐴞𐴐𐴞𐴤 𐴑𐴠𐴥𐴌 𐴀𐴝𐴐𐴧𐴞𐴥𐴓𐴢. 𐴃𐴡𐴥𐴘 𐴁𐴠𐴍𐴝𐴀𐴙𐴕 𐴀𐴞𐴥𐴃𐴝𐴌𐴝 𐴁𐴡𐴙𐴐𐴧𐴠𐴥, 𐴀𐴞𐴥𐴃𐴝𐴌𐴝 𐴃𐴡𐴑𐴡𐴌𐴞𐴁𐴝𐴕 𐴉𐴝𐴣𐴏𐴢 𐴀𐴝𐴥𐴎𐴝𐴌.11𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴌𐴟𐴄𐴞 𐴒𐴟𐴥𐴕 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴁𐴡𐴀𐴘𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴁𐴝𐴍𐴞𐴊𐴞𐴘𐴠𐴥; 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴀𐴞𐴥𐴁𐴝𐴘𐴠 𐴔𐴝𐴏𐴢 𐴀𐴡𐴥 𐴊𐴞𐴦𐴘𐴠𐴥. 𐴀𐴞𐴥𐴃𐴝𐴌𐴝𐴃𐴧𐴟 𐴎𐴠𐴊𐴟𐴥𐴕 𐴔𐴡𐴕𐴠𐴈𐴡𐴘𐴧𐴠𐴥 𐴇𐴠𐴥𐴊𐴟𐴕 𐴇𐴝𐴥𐴘 𐴉𐴝𐴙𐴅𐴧𐴠𐴥.12𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴉𐴠𐴄𐴢 𐴁𐴡𐴥𐴌𐴞 𐴇𐴝𐴥𐴘 𐴁𐴝𐴦𐴊𐴠, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴀𐴌 𐴊𐴠, ”𐴎𐴠 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴁𐴝𐴏𐴞𐴒𐴞𐴘𐴡𐴥𐴘 𐴇𐴞𐴥𐴀𐴕 𐴊𐴡𐴓𐴝 𐴒𐴡𐴌𐴞𐴥𐴉𐴠𐴓𐴡, 𐴎𐴠𐴀𐴕𐴠 𐴑𐴠𐴏𐴧𐴟𐴥 𐴁𐴡𐴌𐴁𐴝𐴊𐴢 𐴕𐴡 𐴎𐴝.“13𐴃𐴡𐴥𐴘 𐴔𐴝𐴙𐴕𐴐𐴠𐴥 𐴇𐴝𐴥𐴘 𐴁𐴝𐴦𐴊𐴠, 𐴁𐴝𐴌𐴓𐴞𐴥𐴌 𐴌𐴟𐴄𐴞 𐴉𐴝𐴣𐴏𐴡𐴥 𐴖𐴝𐴃𐴧𐴟 𐴎𐴠𐴊𐴟𐴥𐴕 𐴁𐴝𐴏𐴞𐴒𐴞𐴘𐴡𐴥𐴘, 𐴇𐴞𐴥𐴀𐴕 𐴊𐴡𐴓𐴝 𐴒𐴡𐴌𐴞𐴥 𐴁𐴝𐴌𐴡𐴥 𐴁𐴝𐴥𐴙𐴌 𐴁𐴡𐴥𐴙𐴅𐴧𐴠.14𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴀𐴞𐴏𐴝𐴤𐴘𐴠 𐴒𐴡𐴙𐴅𐴧𐴠𐴥 𐴊𐴠 𐴑𐴠𐴌𐴝𐴔𐴡𐴃𐴢 𐴃𐴝𐴥𐴕 𐴊𐴠𐴑𐴞𐴥 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞 𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴕𐴡𐴁𐴞 𐴀𐴟𐴁𐴝𐴤 𐴎𐴞𐴁𐴝𐴤 𐴊𐴟𐴕𐴞𐴘𐴝𐴙𐴃𐴢 𐴀𐴝𐴘𐴁𐴝𐴤𐴌 𐴈𐴡𐴃𐴝𐴤 𐴀𐴝𐴏𐴠𐴤.“15𐴃𐴡𐴥𐴘 𐴀𐴞𐴏𐴝𐴤𐴘𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴊𐴠, 𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴀𐴞𐴥𐴁𐴝𐴌𐴠 𐴁𐴡𐴓𐴝𐴎𐴟𐴌𐴞 𐴁𐴝𐴀𐴣𐴐𐴧𐴝 𐴁𐴝𐴕𐴝𐴘 𐴁𐴡𐴓𐴧𐴝 𐴊𐴡𐴥𐴙𐴃𐴧𐴡 𐴀𐴝𐴘𐴃𐴡𐴤 𐴏𐴝𐴥𐴌, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴓𐴡𐴑 𐴀𐴡𐴥𐴘 𐴒𐴝𐴦𐴒𐴝 𐴀𐴝𐴁𐴝𐴌 𐴉𐴝𐴀𐴌𐴡𐴌 𐴖𐴡𐴌𐴠 𐴀𐴟𐴙𐴄𐴧𐴠𐴥𐴒𐴡𐴘.𐴀𐴞𐴏𐴝𐴤 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴙𐴄𐴧𐴠
16𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴇𐴝𐴥𐴣𐴎𐴢 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴋𐴞𐴀𐴃𐴢 𐴒𐴞𐴦𐴘𐴠𐴥,17𐴀𐴝𐴦𐴌 𐴕𐴡𐴦𐴃𐴢 𐴀𐴟𐴍𐴞𐴤, 𐴑𐴝𐴂𐴝𐴌𐴕𐴝𐴈𐴟𐴥𐴔𐴡𐴃𐴢 𐴎𐴝𐴘 𐴁𐴡𐴓𐴧𐴝 𐴋𐴞𐴀 𐴉𐴝𐴌𐴝𐴤𐴃𐴢 𐴊𐴡𐴙𐴅𐴧𐴠. 𐴇𐴠𐴥𐴣𐴃𐴧𐴠 𐴀𐴝𐴕𐴊𐴝𐴤𐴌 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴇𐴞𐴥𐴘𐴝𐴓𐴝 𐴀𐴟𐴥𐴊𐴧𐴗𐴝 𐴀𐴞𐴏𐴝𐴤 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴕𐴟𐴥 𐴀𐴝𐴘𐴧𐴠𐴤.18𐴀𐴠𐴑𐴒𐴗𐴝𐴥 𐴃𐴠𐴎𐴢 𐴁𐴡𐴘𐴧𐴝𐴌𐴡𐴌 𐴎𐴡𐴌𐴞𐴘𐴝, 𐴋𐴞𐴀𐴃𐴢 𐴒𐴡𐴙𐴌 𐴀𐴡𐴥𐴑𐴧𐴡𐴓𐴢 𐴐𐴟𐴥𐴌𐴟 𐴀𐴡𐴥𐴘𐴧𐴠.19𐴀𐴞𐴥𐴃𐴝𐴌𐴝 𐴕𐴡𐴦 𐴁𐴝𐴀𐴘𐴢-𐴁𐴝𐴀𐴘𐴢 𐴃𐴞𐴕 𐴏𐴝𐴙𐴌 𐴔𐴝𐴙𐴓𐴢 𐴀𐴝𐴥𐴕𐴞𐴑 𐴎𐴝𐴘 𐴁𐴝𐴦𐴊𐴠 𐴊𐴠𐴑𐴠𐴥𐴌 𐴊𐴠, 𐴀𐴞𐴏𐴝𐴤 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴕𐴡𐴦𐴌 𐴀𐴟𐴎𐴟 𐴀𐴝𐴘𐴧𐴠𐴤𐴌; 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝𐴃𐴧𐴟 𐴋𐴡𐴦𐴌 𐴓𐴝𐴙𐴒𐴧𐴠𐴥.20𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴀𐴝𐴀𐴛; 𐴕𐴡 𐴋𐴡𐴦𐴌𐴝𐴘𐴧𐴡𐴥.“21𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴕𐴡𐴦𐴃𐴢 𐴃𐴟𐴓𐴞𐴤𐴃𐴡 𐴌𐴝𐴎𐴞 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴠𐴍𐴠𐴥 𐴎𐴝𐴦𐴌 𐴕𐴡𐴦 𐴒𐴝𐴥𐴕 𐴀𐴠𐴥𐴇𐴡𐴕 𐴇𐴠𐴥 𐴎𐴝𐴒𐴝𐴃𐴢 𐴉𐴡𐴀𐴣𐴙𐴐𐴧𐴠𐴒𐴡𐴘.𐴀𐴞𐴏𐴝𐴤 𐴀𐴡𐴥𐴙𐴓𐴊𐴠 𐴎𐴞𐴕𐴊𐴞𐴒𐴞𐴌 𐴌𐴟𐴄𐴞
22𐴋𐴞𐴀𐴌 𐴀𐴡𐴑𐴟𐴓𐴠 𐴎𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴃𐴝𐴥𐴙𐴑𐴧𐴞𐴓𐴢, 𐴀𐴞𐴥𐴃𐴝𐴌𐴝 𐴃𐴝𐴌𐴉𐴡𐴌 𐴊𐴞𐴕 𐴀𐴡𐴥𐴃𐴢 𐴉𐴝𐴘𐴧𐴠𐴥 𐴊𐴠, 𐴇𐴠𐴥𐴍𐴠 𐴀𐴠𐴑𐴧𐴝𐴥𐴕 𐴕𐴡𐴦 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴕𐴡𐴦 𐴕𐴝𐴥𐴘, 𐴀𐴝𐴦𐴌 𐴀𐴞𐴏𐴝𐴤 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴇𐴠𐴥 𐴕𐴡𐴦𐴃𐴢 𐴕𐴡𐴥 𐴀𐴟𐴍𐴠𐴤, 𐴁𐴡𐴥𐴓𐴑𐴠 𐴏𐴞𐴌𐴞𐴥𐴉𐴢 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴒𐴞𐴦𐴘𐴠𐴥 𐴊𐴠.23𐴔𐴡𐴕𐴃𐴡𐴌 𐴑𐴠𐴏𐴧𐴟𐴥 𐴕𐴡𐴦 𐴀𐴡𐴥𐴑𐴧𐴡𐴓𐴢 𐴃𐴞𐴁𐴞𐴌𐴞𐴘𐴝𐴏𐴢 𐴐𐴡𐴥𐴀𐴌𐴡𐴃𐴧𐴟 𐴎𐴝𐴒𐴝 𐴖𐴝𐴀𐴕𐴡𐴌 𐴋𐴝𐴥𐴑𐴠 𐴀𐴝𐴙𐴐𐴧𐴠𐴥, 𐴎𐴞𐴘𐴝𐴥𐴕𐴡𐴃𐴢 𐴔𐴝𐴓𐴞𐴑 𐴀𐴞𐴏𐴝𐴤𐴘𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴌𐴟𐴄𐴞 𐴈𐴝𐴥𐴀𐴙𐴓𐴢.24𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴇𐴠𐴥 𐴎𐴝𐴒𐴝𐴃𐴢 𐴕𐴝𐴥𐴘 𐴊𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴕𐴡𐴦 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴞𐴏𐴝𐴤𐴌𐴠 𐴃𐴟𐴖𐴝𐴘-𐴃𐴟𐴖𐴝𐴘 𐴑𐴝𐴂𐴝𐴌𐴕𐴝𐴈𐴟𐴥𐴔𐴡𐴃𐴢 𐴉𐴡𐴀𐴣𐴙𐴐𐴧𐴠.25𐴀𐴝𐴦𐴌 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴋𐴞𐴀𐴌 𐴀𐴡𐴑𐴟𐴓𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴌𐴝𐴁𐴧𐴞𐴥, 𐴃𐴟𐴀𐴛 𐴀𐴠𐴍𐴠𐴥 𐴇𐴡𐴣𐴃𐴧𐴠𐴥 𐴀𐴝𐴙𐴐𐴧𐴡𐴥؟“26𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥 𐴀𐴝𐴣𐴀𐴌𐴠𐴥 𐴃𐴟𐴖𐴡𐴀𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴉𐴠𐴄𐴢 𐴁𐴡𐴥𐴌𐴞 𐴌𐴟𐴄𐴞 𐴇𐴝𐴥𐴘 𐴉𐴝𐴙𐴅𐴧𐴡𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴃𐴟𐴖𐴡𐴀𐴌 𐴊𐴠.27𐴁𐴡𐴌𐴁𐴝𐴊𐴢 𐴎𐴝𐴒𐴡𐴥𐴘 𐴊𐴠 𐴈𐴝𐴥𐴕𐴝𐴓𐴧𐴝 𐴔𐴠𐴀𐴕𐴧𐴡𐴃𐴢 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴎𐴠 𐴈𐴝𐴥𐴕𐴝 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴉𐴡𐴙𐴅𐴧𐴡𐴕𐴃𐴡 𐴄𐴞𐴑𐴞 𐴃𐴝𐴥𐴑𐴠 𐴇𐴞𐴥𐴀𐴕𐴡𐴓𐴧𐴝 𐴔𐴠𐴀𐴕𐴧𐴡𐴃𐴢 𐴒𐴡𐴌𐴡𐴤, 𐴎𐴞𐴀𐴕 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴘𐴠 𐴊𐴞𐴦𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴖𐴡𐴌𐴠 𐴃𐴡 𐴀𐴝𐴓𐴧𐴝 𐴁𐴝𐴉𐴠 𐴕𐴞𐴎𐴡𐴌 𐴔𐴡𐴀𐴌 𐴓𐴝𐴒𐴝𐴘𐴊𐴞𐴘𐴠.“28𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴝𐴓𐴧𐴝𐴌 𐴈𐴝𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴣𐴀𐴌𐴝𐴃𐴧𐴟 𐴑𐴞𐴦 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥؟“29𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴘𐴠 𐴎𐴞𐴁𐴝𐴤𐴌𐴠 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴝𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴈𐴝𐴔.“30𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴀𐴛 𐴑𐴞𐴦 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴊𐴝𐴈𐴝𐴤𐴘𐴁𐴝, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴊𐴠𐴑𐴞𐴥𐴘𐴡𐴌𐴠 𐴃𐴟𐴣𐴀𐴝𐴥𐴣𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴉𐴝𐴌𐴞؟ 𐴃𐴟𐴀𐴛 𐴑𐴞𐴦 𐴈𐴝𐴔 𐴒𐴡𐴌𐴞𐴥𐴁𐴝؟31𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴊𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴔𐴝𐴕𐴧𐴝𐴥 𐴈𐴝𐴥𐴘𐴧𐴠. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴀𐴞𐴥𐴃𐴝𐴌𐴝 𐴇𐴝𐴥𐴘 𐴁𐴡𐴓𐴧𐴝 𐴀𐴝𐴓𐴧𐴝𐴘𐴠 𐴀𐴝𐴏𐴔𐴝𐴕𐴡𐴃𐴧𐴟 𐴌𐴟𐴄𐴞 𐴊𐴞𐴦𐴘𐴠𐴥.‘ “ 32𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴏𐴔𐴝𐴕𐴡𐴃𐴧𐴟 𐴌𐴟𐴄𐴞 𐴔𐴟𐴀𐴏𐴝𐴘𐴠 𐴊𐴞𐴦𐴘𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴁𐴝𐴉𐴠 𐴊𐴞𐴦𐴘𐴠𐴥 𐴊𐴠. 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴏𐴔𐴝𐴕𐴡𐴃𐴧𐴟 𐴏𐴡𐴥𐴘𐴧𐴞 𐴌𐴟𐴄𐴞 𐴊𐴠𐴦.33𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴌𐴟𐴄𐴞 𐴀𐴡𐴥𐴙𐴓𐴊𐴠 𐴃𐴡 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴀𐴘𐴢 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌𐴠 𐴎𐴞𐴕𐴊𐴞𐴒𐴞 𐴊𐴠𐴦.“34𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴇𐴠𐴥 𐴌𐴟𐴄𐴞 𐴀𐴝𐴣𐴀𐴌𐴝𐴌𐴠 𐴇𐴝𐴥𐴔𐴞𐴐𐴝 𐴊𐴡𐴦.“35𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴠𐴥 𐴎𐴞𐴕𐴊𐴞𐴒𐴞𐴌 𐴌𐴟𐴄𐴞 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴀𐴛. 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴧𐴠𐴤, 𐴀𐴞𐴥𐴃𐴝𐴃𐴧𐴟 𐴇𐴡𐴕𐴡𐴤𐴊𐴞𐴕 𐴁𐴟𐴥𐴑 𐴕𐴡 𐴓𐴝𐴒𐴞𐴁𐴡𐴥, 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴀𐴞𐴥𐴃𐴝𐴃𐴧𐴟 𐴇𐴡𐴕𐴡𐴤𐴊𐴞𐴕 𐴃𐴞𐴌𐴝𐴥𐴐𐴢 𐴕𐴡 𐴓𐴝𐴒𐴞𐴁𐴡𐴥.36𐴓𐴠𐴑𐴞𐴕 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴘𐴉𐴠𐴓𐴝𐴘𐴧𐴞, 𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴊𐴠𐴙𐴑𐴧𐴡𐴥, 𐴔𐴡𐴕𐴃𐴡𐴌 𐴃𐴡𐴀 𐴀𐴞𐴔𐴝𐴕 𐴕𐴟 𐴀𐴝𐴕𐴡𐴤.37𐴎𐴠𐴊𐴟𐴥𐴕𐴡𐴌𐴠 𐴁𐴝𐴉𐴠 𐴀𐴝𐴣𐴀𐴌 𐴀𐴝𐴥𐴃𐴡𐴃𐴢 𐴊𐴠𐴦, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴁𐴡𐴤, 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴁𐴡𐴤, 𐴀𐴝𐴀𐴛 𐴀𐴞𐴥𐴃𐴝𐴌𐴠 𐴇𐴡𐴕𐴡𐴤𐴊𐴞𐴕 𐴊𐴟𐴣𐴌𐴝𐴘 𐴕𐴡 𐴊𐴞𐴘𐴟𐴔.38𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴙𐴐𐴧𐴞𐴤 𐴊𐴠 𐴕𐴞𐴎𐴡𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴕𐴡, 𐴁𐴡𐴥𐴓𐴑𐴠 𐴀𐴟𐴁𐴝𐴤𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴞𐴥 𐴁𐴡𐴓𐴧𐴝, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠.39𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴀𐴡𐴥𐴙𐴓𐴊𐴠, 𐴎𐴠𐴊𐴟𐴥𐴕𐴡𐴌𐴠 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴀𐴝𐴥𐴃𐴡𐴃𐴢 𐴊𐴞𐴦𐴘𐴠𐴥, 𐴀𐴝𐴀𐴛 𐴎𐴠𐴕 𐴈𐴠𐴥𐴕𐴃𐴟 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴝 𐴇𐴝𐴥𐴌𐴝𐴘, 𐴁𐴡𐴥𐴓𐴑𐴠 𐴇𐴝𐴥𐴣𐴐𐴡𐴌𐴡𐴌 𐴊𐴞𐴕 𐴀𐴞𐴥𐴃𐴝𐴌𐴝𐴌𐴠 𐴎𐴞𐴕𐴊𐴝 𐴒𐴡𐴌𐴞𐴥.40𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴁𐴝𐴉𐴡𐴌 𐴔𐴡𐴕𐴐𐴝𐴥 𐴀𐴡𐴥𐴙𐴓𐴊𐴠, 𐴎𐴠𐴦𐴕𐴞𐴑𐴞 𐴉𐴟𐴖𐴝𐴌𐴠 𐴊𐴠𐴑𐴞𐴥 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴀𐴞𐴥𐴃𐴠 𐴎𐴠𐴕 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴉𐴝𐴦. 𐴀𐴝𐴦𐴌 𐴀𐴝𐴀𐴛 𐴀𐴞𐴥𐴃𐴝𐴌𐴠 𐴇𐴝𐴥𐴣𐴐𐴡𐴌𐴡𐴌 𐴊𐴞𐴕 𐴎𐴞𐴕𐴊𐴝 𐴒𐴡𐴌𐴞𐴥𐴘𐴟𐴔.“41𐴇𐴞𐴥𐴘𐴝𐴕 𐴉𐴟𐴥𐴕𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴉𐴟𐴍𐴝𐴉𐴟𐴍𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠, ”𐴎𐴠 𐴌𐴟𐴄𐴞 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴙𐴐𐴧𐴠𐴥, 𐴘𐴞𐴥𐴁𐴝 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴀𐴛.“42𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴘𐴟𐴏𐴟𐴥𐴉𐴡𐴌 𐴉𐴟𐴖𐴝 𐴀𐴞𐴏𐴝𐴤 𐴕𐴡 𐴕𐴞𐴥𐴑𐴞, 𐴎𐴞𐴁𐴝𐴤𐴌 𐴁𐴝𐴉𐴔𐴝𐴦𐴌𐴠 𐴀𐴝𐴣𐴀𐴌𐴝 𐴏𐴞𐴕𐴞𐴥؟ 𐴀𐴞𐴁𐴝𐴤𐴘𐴠 𐴑𐴠𐴀𐴕𐴒𐴡𐴌𐴞 𐴈𐴡𐴀𐴌 𐴊𐴠, 𐴀𐴝𐴀𐴛 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴙𐴐𐴧𐴞𐴤؟“43𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴉𐴡𐴤𐴏𐴡𐴃𐴢 𐴉𐴟𐴍𐴝𐴉𐴟𐴍𐴞 𐴕𐴡 𐴒𐴡𐴙𐴅𐴧𐴡𐴥.44𐴀𐴝𐴣𐴀𐴌 𐴁𐴝𐴉𐴢 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴄𐴝𐴕𐴞 𐴕𐴟 𐴀𐴝𐴕𐴞𐴤𐴓𐴠 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴕𐴡 𐴉𐴝𐴌𐴠. 𐴀𐴝𐴦𐴌 𐴀𐴝𐴀𐴛 𐴀𐴞𐴥𐴃𐴝𐴌𐴠 𐴇𐴝𐴥𐴣𐴐𐴡𐴌𐴡𐴌 𐴊𐴞𐴕 𐴎𐴞𐴕𐴊𐴝 𐴒𐴡𐴌𐴞𐴥𐴘𐴟𐴔.45𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴡𐴃𐴢 𐴀𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤, ’𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴝𐴓𐴧𐴝𐴃𐴧𐴟 𐴃𐴝𐴦𐴓𐴞𐴔 𐴉𐴝𐴘𐴁𐴡.‘ 𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴁𐴝𐴉𐴡𐴃𐴧𐴟 𐴉𐴟𐴥𐴕𐴞 𐴃𐴝𐴦𐴓𐴞𐴔 𐴉𐴝𐴘𐴧𐴠𐴥, 𐴀𐴞𐴥𐴃𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴧𐴠𐴤.46𐴇𐴠𐴥 𐴁𐴝𐴉𐴡𐴌𐴠 𐴃𐴡 𐴀𐴝𐴓𐴧𐴝𐴌 𐴇𐴝𐴣𐴏𐴡𐴥𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴀𐴞𐴥𐴁𐴝𐴘𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡𐴥 𐴊𐴠𐴑𐴠𐴥. 𐴏𐴞𐴌𐴞𐴥𐴉𐴢 𐴀𐴞𐴥𐴁𐴝𐴘𐴠 𐴊𐴠𐴙𐴑𐴧𐴠𐴥 𐴊𐴠.47𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴘𐴡𐴥𐴒𐴧𐴗𐴝𐴃𐴧𐴟 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴀𐴝𐴏𐴠𐴤.48”𐴎𐴞𐴕𐴊𐴞𐴒𐴞𐴌 𐴌𐴟𐴄𐴞 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴀𐴛.49𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴊𐴠 𐴔𐴡𐴘𐴊𐴝𐴕 𐴀𐴠𐴓𐴝𐴑𐴝𐴃𐴢 𐴔𐴝𐴕𐴧𐴝𐴥 𐴈𐴝𐴥𐴘𐴧𐴠, 𐴃𐴡𐴀 𐴀𐴞𐴥𐴃𐴝𐴌𐴝 𐴔𐴡𐴌𐴞𐴒𐴞𐴘𐴡𐴥𐴘.50𐴔𐴡𐴕𐴃𐴡𐴌 𐴘𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴙𐴐𐴧𐴠𐴥 𐴊𐴠 𐴇𐴠𐴥 𐴌𐴟𐴄𐴞, 𐴎𐴠𐴀𐴕𐴠 𐴇𐴡𐴕𐴡𐴤𐴑𐴞𐴘𐴠 𐴇𐴝𐴥𐴘 𐴕𐴡 𐴔𐴡𐴌𐴠.51𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴙𐴐𐴧𐴠𐴥 𐴊𐴠 𐴎𐴞𐴕𐴊𐴞𐴒𐴞𐴌 𐴌𐴟𐴄𐴞 𐴘𐴞𐴥𐴁𐴝. 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴠 𐴌𐴟𐴄𐴞 𐴈𐴝𐴥𐴀, 𐴀𐴞𐴥𐴃𐴠 𐴇𐴝𐴥𐴔𐴞𐴐𐴝𐴓𐴧𐴝 𐴁𐴝𐴏𐴞 𐴃𐴝𐴥𐴑𐴞𐴁𐴡. 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴠 𐴎𐴞𐴕𐴊𐴞𐴒𐴞 𐴉𐴝𐴘 𐴁𐴡𐴓𐴧𐴝 𐴀𐴝𐴀𐴛 𐴊𐴞𐴦𐴘𐴟𐴔 𐴊𐴠 𐴇𐴠𐴥 𐴌𐴟𐴄𐴞 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴒𐴟𐴏𐴧𐴡.“52𐴇𐴞𐴥𐴀𐴕 𐴉𐴟𐴥𐴕𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴉𐴡𐴤𐴏𐴡𐴃𐴢 𐴔𐴝𐴃𐴝𐴔𐴝𐴃𐴞 𐴊𐴞 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴝𐴣𐴀𐴌𐴝𐴌𐴠 𐴑𐴠𐴀𐴕𐴒𐴡𐴌𐴞 𐴕𐴞𐴎𐴡𐴌 𐴒𐴟𐴏𐴧𐴡 𐴇𐴝𐴥𐴘 𐴁𐴡𐴓𐴧𐴝 𐴊𐴞𐴦𐴁𐴡؟“53𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴃𐴟𐴥𐴕 𐴉𐴡𐴙𐴅𐴧𐴡𐴕𐴃𐴡 𐴃𐴟𐴣𐴀𐴝𐴥𐴌𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴒𐴟𐴏𐴧𐴡 𐴀𐴠𐴊𐴧𐴠 𐴓𐴡𐴖𐴢 𐴕𐴡𐴥 𐴈𐴡𐴥𐴀, 𐴇𐴠𐴥𐴃𐴟𐴕 𐴉𐴡𐴙𐴅𐴧𐴡𐴕𐴃𐴡 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴞𐴕𐴊𐴞𐴒𐴞 𐴕𐴝𐴥𐴘.54𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴒𐴟𐴏𐴧𐴡 𐴀𐴠𐴊𐴧𐴠 𐴓𐴡𐴖𐴢 𐴈𐴝𐴥𐴀, 𐴀𐴞𐴥𐴃𐴝𐴃𐴧𐴟 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴀𐴝𐴏𐴠𐴤, 𐴀𐴝𐴦𐴌 𐴀𐴝𐴀𐴛 𐴀𐴞𐴥𐴃𐴝𐴌𐴠 𐴇𐴝𐴥𐴣𐴐𐴡𐴌𐴡𐴌 𐴊𐴞𐴕 𐴎𐴞𐴕𐴊𐴝 𐴒𐴡𐴌𐴞𐴥𐴘𐴟𐴔.55𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴒𐴟𐴏𐴧𐴡 𐴀𐴡𐴥𐴙𐴓𐴊𐴠 𐴏𐴡𐴥𐴘𐴧𐴞 𐴈𐴝𐴥𐴕𐴝, 𐴀𐴝𐴦𐴌 𐴀𐴝𐴣𐴀𐴌 𐴓𐴡𐴖𐴢 𐴀𐴡𐴥𐴙𐴓𐴊𐴠 𐴏𐴡𐴥𐴘𐴧𐴞 𐴉𐴞𐴀𐴁𐴝𐴌 𐴅𐴞𐴕𐴞𐴥𐴐𐴢.56𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴒𐴟𐴏𐴧𐴡 𐴀𐴠𐴊𐴧𐴠 𐴓𐴡𐴖𐴢 𐴈𐴝𐴥𐴀, 𐴀𐴞𐴥𐴃𐴠 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴎𐴝𐴌𐴞 𐴃𐴝𐴥𐴑𐴠, 𐴀𐴝𐴦𐴌 𐴀𐴝𐴀𐴛 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴎𐴝𐴌𐴞 𐴃𐴝𐴥𐴑𐴞.57𐴎𐴞𐴕𐴊𐴝 𐴁𐴝𐴉𐴠 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴀𐴝𐴦𐴌 𐴀𐴝𐴀𐴛 𐴀𐴞𐴥𐴁𐴝𐴌 𐴎𐴡𐴌𐴞𐴘𐴝 𐴎𐴞𐴕𐴊𐴝 𐴀𐴝𐴏𐴞𐴤, 𐴇𐴠𐴥𐴕𐴊𐴞𐴓𐴧𐴝 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴈𐴝𐴥𐴘𐴁𐴡 𐴀𐴞𐴥𐴃𐴠 𐴘𐴡𐴥 𐴀𐴝𐴣𐴀𐴌 𐴎𐴡𐴌𐴞𐴘𐴝 𐴎𐴞𐴕𐴊𐴝 𐴃𐴝𐴥𐴑𐴞𐴁𐴡.58𐴘𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴝𐴏𐴔𐴝𐴕𐴡𐴃𐴧𐴟 𐴕𐴞𐴏𐴠 𐴀𐴝𐴙𐴐𐴧𐴠𐴥 𐴊𐴠 𐴇𐴠𐴥 𐴌𐴟𐴄𐴞. 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴇𐴝𐴥𐴘 𐴔𐴡𐴌𐴞𐴒𐴞𐴘𐴡𐴥𐴘 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴌𐴟𐴄𐴞 𐴕𐴡. 𐴎𐴠𐴦𐴕𐴞𐴑𐴞 𐴀𐴠 𐴌𐴟𐴄𐴞 𐴈𐴝𐴥𐴘𐴁𐴡, 𐴀𐴞𐴥𐴃𐴠 𐴇𐴝𐴥𐴔𐴞𐴐𐴝𐴓𐴧𐴝 𐴁𐴝𐴏𐴞 𐴃𐴝𐴥𐴑𐴞𐴁𐴡.“59𐴀𐴞𐴏𐴝𐴤𐴘𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴑𐴝𐴂𐴝𐴌𐴕𐴝𐴈𐴟𐴥𐴔𐴡𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴃𐴝𐴦𐴓𐴞𐴔 𐴊𐴞𐴁𐴝𐴐𐴧𐴡𐴥𐴃𐴢 𐴈𐴡𐴘𐴧𐴠𐴥.𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴌 𐴈𐴡𐴃𐴝𐴤
60𐴇𐴠𐴥 𐴃𐴝𐴦𐴓𐴞𐴔 𐴉𐴟𐴥𐴕𐴞 𐴀𐴞𐴏𐴝𐴤𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴘𐴝𐴀𐴕 𐴃𐴡 𐴀𐴠𐴑𐴧𐴝𐴥𐴕 𐴁𐴞𐴐𐴞𐴤 𐴈𐴡𐴌𐴝 𐴃𐴝𐴦𐴓𐴞𐴔, 𐴇𐴡𐴕𐴠 𐴒𐴡𐴏𐴞𐴥 𐴉𐴝𐴌𐴞𐴁𐴡𐴥؟“61𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴉𐴟𐴍𐴝𐴉𐴟𐴍𐴞 𐴒𐴡𐴌𐴠𐴥𐴌 𐴊𐴠 𐴇𐴞𐴥𐴘𐴝𐴕 𐴎𐴝𐴕𐴞 𐴉𐴝𐴌𐴞 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴠 𐴃𐴝𐴦𐴓𐴞𐴔𐴠 𐴑𐴞 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴎𐴝𐴌 𐴒𐴡𐴙𐴅𐴧𐴠𐴥؟62𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴉𐴡𐴀𐴘𐴓𐴝 𐴎𐴠𐴍𐴠𐴥 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴁𐴝 𐴎𐴡𐴊𐴞 𐴇𐴠𐴥𐴍𐴠 𐴀𐴟𐴍𐴠𐴤𐴌𐴒𐴡𐴘 𐴊𐴠 𐴊𐴠𐴑𐴡𐴥, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴁𐴝𐴥𐴉𐴞𐴁𐴝؟63𐴌𐴟𐴀𐴘𐴠 𐴀𐴠𐴥𐴕𐴝 𐴎𐴞𐴕𐴊𐴞𐴒𐴞 𐴊𐴠𐴦; 𐴅𐴞𐴏𐴞𐴥𐴔𐴠 𐴃𐴡 𐴇𐴡𐴕𐴡𐴤 𐴉𐴝𐴥𐴘𐴊𐴝 𐴕𐴡 𐴊𐴠𐴦. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴎𐴠 𐴈𐴡𐴃𐴝𐴤 𐴒𐴟𐴥𐴕 𐴈𐴡𐴘𐴧𐴞𐴥, 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴌𐴟𐴀 𐴀𐴠𐴊𐴧𐴠 𐴎𐴞𐴕𐴊𐴞𐴒𐴞.64𐴔𐴡𐴕𐴃𐴡𐴌 𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴃𐴟𐴣𐴀𐴝𐴥𐴌𐴝 𐴇𐴡𐴊𐴟𐴥𐴕𐴠 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴡𐴤.“𐴀𐴞𐴏𐴝𐴤𐴘𐴠 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴎𐴝𐴕𐴠, 𐴇𐴡𐴕𐴃𐴝𐴌𐴝𐴤 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤 𐴀𐴝𐴦𐴌 𐴇𐴡𐴕𐴠 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴞𐴁𐴡.65𐴀𐴞𐴏𐴝𐴤𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴇𐴠𐴥𐴃𐴡𐴓𐴧𐴝 𐴃𐴡 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴓𐴝𐴔, 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴡𐴥, 𐴎𐴠𐴃𐴟𐴥𐴕 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴌 𐴁𐴝𐴉𐴠 𐴀𐴞𐴥𐴃𐴝𐴌𐴠 𐴃𐴡𐴖𐴉𐴞𐴥𐴑 𐴕𐴡 𐴊𐴠𐴦.“66𐴇𐴠𐴥 𐴀𐴡𐴑𐴃𐴡𐴥𐴃𐴢 𐴓𐴡𐴥𐴃𐴞 𐴀𐴞𐴥𐴁𐴝𐴌 𐴁𐴡𐴀𐴗𐴃𐴢 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴞𐴥𐴌𐴞𐴒𐴞𐴘𐴡𐴘, 𐴀𐴝𐴦𐴌 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴏𐴡𐴓𐴝𐴉𐴞𐴥𐴌𐴝 𐴒𐴡𐴌𐴝𐴥 𐴁𐴡𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.67𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴃𐴧𐴟 𐴘𐴡𐴥 𐴑𐴞𐴥 𐴎𐴝𐴘𐴃𐴡𐴒𐴡𐴥𐴘 𐴔𐴡𐴕𐴠𐴈𐴡𐴀𐴌 𐴕𐴠𐴥؟“68𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴀𐴝𐴣𐴀𐴌𐴝 𐴇𐴝𐴌 𐴇𐴝𐴣𐴏𐴠 𐴎𐴝𐴘𐴃𐴝𐴔؟ 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴌 𐴈𐴡𐴃𐴝𐴤 𐴃𐴟𐴣𐴀𐴝𐴥𐴣𐴃𐴧𐴟 𐴀𐴠𐴥𐴕𐴝 𐴀𐴝𐴏𐴠𐴤.69𐴀𐴝𐴣𐴀𐴌𐴝 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤 𐴀𐴝𐴦𐴌 𐴏𐴡𐴥𐴘𐴧𐴞𐴒𐴡𐴌𐴞 𐴎𐴝𐴕𐴞 𐴉𐴝𐴙𐴅𐴧𐴞𐴥 𐴊𐴠, 𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴀𐴝𐴓𐴧𐴝𐴌 𐴂𐴝𐴑𐴎𐴡𐴕.“70𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴑𐴞𐴥 𐴃𐴟𐴣𐴀𐴝𐴥𐴌𐴝 𐴁𐴝𐴌𐴡𐴥 𐴎𐴡𐴕𐴡𐴌𐴠 𐴁𐴝𐴏𐴞𐴥 𐴕𐴡𐴥 𐴓𐴡𐴦𐴘𐴢 𐴕𐴠𐴥؟ 𐴃𐴡𐴀 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴎𐴧𐴡𐴕 𐴀𐴞𐴁𐴞𐴓𐴞𐴥𐴐𐴢 𐴀𐴝𐴏𐴠𐴤.“71𐴇𐴞𐴥𐴘𐴝𐴕 𐴀𐴞𐴏𐴝𐴤𐴘𐴠 𐴏𐴝𐴥𐴘𐴔𐴡𐴕𐴡𐴌 𐴉𐴟𐴖𐴝 𐴘𐴡𐴇𐴟𐴥𐴊𐴝 𐴀𐴞𐴏𐴑𐴝𐴥𐴌𐴞𐴘𐴠𐴃𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥 𐴊𐴠. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴡𐴥𐴘𐴓𐴠 𐴘𐴡, 𐴀𐴞𐴥𐴃𐴠 𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞𐴁𐴡.The Word for the World International