Read 𐴘𐴡𐴇𐴝𐴥𐴕𐴧𐴝 5

𐴘𐴡𐴇𐴝𐴥𐴕𐴧𐴝5

𐴁𐴠𐴃𐴠𐴥𐴏𐴊𐴝𐴃𐴢 𐴁𐴞𐴘𐴝𐴌𐴝𐴙𐴔𐴧𐴝 𐴒𐴡𐴔 𐴒𐴡𐴙𐴅𐴧𐴠𐴥

¹𐴘𐴝𐴥𐴌𐴁𐴝𐴦𐴊𐴠, 𐴘𐴡𐴇𐴟𐴥𐴊𐴞𐴌 𐴀𐴠𐴑𐴧𐴝𐴥𐴕 𐴀𐴞𐴊𐴢 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴏𐴝𐴤 𐴖𐴡𐴌𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴞𐴦𐴘𐴠𐴥.²𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴁𐴠𐴥𐴌𐴝𐴏𐴡𐴥𐴀𐴓𐴢 𐴒𐴠𐴙𐴄𐴢 𐴈𐴡𐴀 𐴊𐴠 𐴇𐴞𐴥𐴘𐴝𐴕𐴡𐴌 𐴋𐴝𐴥𐴑𐴠 𐴀𐴠𐴒𐴧𐴗𐴝𐴤 𐴉𐴡𐴀𐴙𐴌 𐴀𐴝𐴏𐴠𐴤, 𐴎𐴞𐴁𐴝𐴤𐴌𐴠 𐴇𐴞𐴁𐴌𐴟𐴤 𐴎𐴟𐴁𐴝𐴕𐴡𐴃𐴢 𐴁𐴠𐴃𐴠𐴥𐴏𐴊𐴝 𐴈𐴡𐴀, 𐴇𐴠𐴥 𐴉𐴡𐴀𐴙𐴌 𐴒𐴗𐴝𐴃𐴢 𐴉𐴝𐴣𐴏𐴢 𐴏𐴝𐴥𐴕 𐴁𐴝𐴦𐴕𐴋𐴝 𐴀𐴝𐴏𐴠𐴤.³𐴁𐴝𐴦𐴕𐴋𐴝 𐴇𐴞𐴥𐴀𐴕𐴡𐴃𐴢 𐴁𐴞𐴐𐴞𐴤 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴢 𐴉𐴡𐴌𐴞 𐴃𐴝𐴥𐴑𐴞𐴃𐴡, 𐴎𐴠𐴕𐴊𐴞𐴓𐴧𐴝 𐴕𐴞𐴑𐴞, 𐴀𐴝𐴣𐴊𐴝𐴤, 𐴓𐴠𐴚, 𐴔𐴝𐴎𐴟𐴌. 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴉𐴝𐴕𐴞𐴥𐴌 𐴓𐴡𐴌𐴝𐴏𐴡𐴌𐴝𐴌𐴠 𐴏𐴡𐴦𐴛 𐴒𐴡𐴌𐴞𐴥 𐴃𐴝𐴥𐴑𐴞𐴃𐴡.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴀𐴠𐴑 𐴉𐴞𐴥𐴌𐴞𐴏𐴃𐴝 𐴄𐴝𐴘𐴔𐴠-𐴄𐴝𐴘𐴔𐴠 𐴇𐴠𐴥 𐴉𐴡𐴀𐴙𐴌 𐴒𐴗𐴝𐴃𐴢 𐴓𐴝𐴔𐴞 𐴀𐴝𐴀𐴘𐴢 𐴉𐴝𐴕𐴞𐴥 𐴓𐴝𐴌𐴞𐴃𐴡𐴥, 𐴀𐴝𐴦𐴌 𐴉𐴝𐴕𐴞𐴥 𐴓𐴝𐴌𐴞 𐴁𐴝𐴦𐴊𐴠 𐴎𐴠𐴦𐴕𐴞𐴑𐴞 𐴀𐴝𐴒𐴠 𐴓𐴝𐴔𐴞 𐴉𐴝𐴌𐴠 𐴀𐴞𐴥𐴃𐴝𐴌 𐴎𐴠 𐴇𐴡𐴕𐴡𐴤 𐴁𐴞𐴘𐴝𐴌𐴝𐴔 𐴒𐴡𐴔 𐴀𐴡𐴥𐴘𐴎𐴝𐴘𐴃𐴡𐴘.⁵𐴇𐴠𐴥𐴍𐴠 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤 𐴃𐴞𐴌𐴞𐴥𐴐𐴢-𐴀𐴝𐴣𐴐𐴄𐴡 𐴁𐴡𐴏𐴡𐴥𐴌𐴅𐴝 𐴁𐴞𐴘𐴝𐴌𐴝𐴙𐴔𐴧𐴝.⁶𐴀𐴞𐴏𐴝𐴤𐴘𐴠 𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴌𐴠 𐴇𐴠𐴥𐴍𐴠 𐴉𐴡𐴌𐴞 𐴃𐴝𐴥𐴙𐴑𐴧𐴠 𐴊𐴠 𐴊𐴠𐴙𐴑𐴧𐴠𐴥, 𐴀𐴝𐴦𐴌 𐴘𐴡𐴥𐴒𐴧𐴗𐴝 𐴁𐴞𐴐𐴞𐴤 𐴊𐴠𐴌𐴞 𐴓𐴡𐴥𐴃𐴞 𐴇𐴠𐴥 𐴇𐴝𐴥𐴓𐴡𐴃𐴡𐴃𐴢 𐴀𐴝𐴏𐴠𐴤 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥, 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴣𐴃𐴧𐴟 𐴒𐴡𐴔 𐴀𐴡𐴥𐴘𐴃𐴡 𐴔𐴡𐴕𐴠𐴈𐴡𐴀𐴌 𐴕𐴠؟“

⁷𐴁𐴞𐴘𐴝𐴌𐴝𐴙𐴔𐴧𐴝 𐴖𐴝𐴘𐴠 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴟𐴏𐴃𐴝𐴃𐴢, 𐴉𐴝𐴕𐴞𐴥 𐴓𐴝𐴌𐴠 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞 𐴉𐴡𐴀𐴙𐴌𐴡𐴃𐴢 𐴓𐴝𐴔𐴝𐴘𐴊𐴞 𐴁𐴡𐴓𐴧𐴝 𐴀𐴝𐴣𐴀𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴕𐴝𐴥𐴘. 𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴉𐴡𐴀𐴣𐴏𐴞𐴃𐴠-𐴉𐴡𐴀𐴣𐴏𐴞𐴃𐴠 𐴀𐴝𐴣𐴀𐴌 𐴀𐴝𐴒𐴡𐴃𐴧𐴟 𐴀𐴝𐴌 𐴀𐴠𐴎𐴧𐴡𐴕 𐴓𐴝𐴔𐴞𐴎𐴝𐴒𐴡𐴥𐴘.“

⁸𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴍𐴡𐴥, 𐴃𐴟𐴣𐴀𐴝𐴥𐴣𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴝𐴥𐴣𐴍𐴡.“⁹𐴁𐴝𐴦𐴊𐴠 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴔𐴝𐴕𐴟𐴥𐴙𐴐𐴧𐴗𐴝 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴕𐴞𐴎𐴡𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴝𐴥𐴣𐴍𐴝𐴃𐴢 𐴊𐴡𐴙𐴅𐴧𐴠.
𐴇𐴠𐴥 𐴊𐴞𐴕 𐴀𐴝𐴐𐴧𐴞𐴥𐴓𐴢 𐴘𐴡𐴇𐴟𐴥𐴊𐴞𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕.¹⁰𐴇𐴞𐴥𐴘𐴝𐴕𐴡𐴓𐴧𐴝 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴒𐴡𐴔 𐴒𐴡𐴌𐴝𐴥 𐴒𐴞𐴥𐴘𐴠, 𐴘𐴡𐴥𐴒𐴧𐴗𐴝𐴌𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀𐴌 𐴊𐴠, ”𐴀𐴝𐴙𐴅𐴧𐴝 𐴃𐴡 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕; 𐴀𐴝𐴙𐴅𐴧𐴝 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴘𐴎𐴡𐴕 𐴐𐴡𐴥𐴌𐴞𐴘𐴡𐴃𐴡𐴌 𐴔𐴝𐴕𐴝𐴥.“

¹¹𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴒𐴡𐴔 𐴒𐴡𐴙𐴅𐴧𐴠𐴥 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴈𐴡𐴘𐴧𐴠𐴥 𐴊𐴠, ’𐴃𐴟𐴣𐴀𐴝𐴥𐴣𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴝𐴥𐴣𐴍𐴡.‘“

¹²𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴎𐴠𐴦𐴕𐴞𐴑𐴞 𐴃𐴡𐴌𐴠𐴥 𐴃𐴡𐴌 𐴁𐴞𐴏𐴝𐴥𐴕𐴝 𐴃𐴟𐴓𐴞𐴤 𐴓𐴡𐴦𐴘𐴢 𐴀𐴝𐴥𐴣𐴍𐴞𐴃𐴡 𐴈𐴡𐴘𐴧𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴇𐴡𐴕؟“

¹³𐴓𐴠𐴑𐴞𐴕 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴒𐴡𐴔 𐴒𐴡𐴌𐴝𐴥 𐴒𐴞𐴥𐴘𐴠, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝 𐴇𐴡𐴕 𐴇𐴡𐴘 𐴕𐴡 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴎𐴝𐴒𐴝𐴃𐴢 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴏𐴝𐴤 𐴇𐴞𐴥𐴘𐴝𐴕𐴃𐴟 𐴒𐴝𐴙𐴉𐴢 𐴀𐴡𐴥𐴘𐴒𐴞𐴓𐴒𐴡𐴘.

¹⁴𐴘𐴝𐴥𐴌𐴁𐴝𐴦𐴊𐴠, 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴓𐴡𐴦𐴃𐴢 𐴉𐴝𐴘 𐴈𐴡𐴀𐴌 𐴊𐴠, ”𐴏𐴡𐴀, 𐴃𐴟𐴀𐴛 𐴒𐴡𐴔 𐴀𐴡𐴥𐴘𐴒𐴞𐴘𐴡𐴒𐴡𐴘. 𐴀𐴝𐴌 𐴒𐴟𐴕𐴝𐴤 𐴕𐴡 𐴒𐴡𐴙𐴅𐴧𐴡𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴣𐴌 𐴇𐴝𐴥𐴓𐴡𐴃𐴢 𐴀𐴝𐴒𐴡𐴌 𐴃𐴟𐴥𐴖𐴝𐴌𐴡 𐴈𐴡𐴥𐴌𐴝𐴉𐴢 𐴕𐴡 𐴀𐴡𐴥.“¹⁵𐴁𐴝𐴦𐴊𐴠 𐴔𐴝𐴕𐴟𐴥𐴙𐴐𐴧𐴗𐴝 𐴎𐴝𐴘 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴥 𐴊𐴠, 𐴘𐴡𐴥𐴒𐴧𐴗𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥 𐴊𐴠 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤.

¹⁶𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴎𐴝𐴓𐴝𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴇𐴠𐴥𐴕𐴊𐴞𐴓𐴧𐴝 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴙𐴃𐴧𐴡𐴥.¹⁷𐴓𐴠𐴑𐴞𐴕 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴁𐴝𐴉𐴢 𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴈𐴝𐴔 𐴒𐴡𐴌𐴝𐴥𐴃𐴢 𐴀𐴝𐴏𐴠𐴤, 𐴀𐴝𐴦𐴌 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴒𐴡𐴌𐴞𐴥𐴌.“¹⁸𐴀𐴞𐴏𐴝𐴤𐴌 𐴇𐴠𐴥 𐴈𐴡𐴃𐴝𐴤 𐴓𐴧𐴝 𐴁𐴡𐴥𐴓𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴀𐴝𐴌𐴡𐴤 𐴁𐴞𐴐𐴞𐴤 𐴑𐴟𐴐𐴞𐴥𐴐𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴏𐴞𐴌𐴞𐴥𐴉𐴢 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴕𐴞𐴘𐴡𐴔 𐴁𐴝𐴥𐴚𐴒𐴞𐴃𐴡 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴓𐴧𐴝 𐴀𐴞𐴥𐴁𐴝𐴌 𐴁𐴝𐴉𐴢 𐴈𐴡𐴀𐴘𐴢 𐴕𐴞𐴎𐴡𐴌𐴠𐴥 𐴀𐴝𐴓𐴧𐴝 𐴓𐴧𐴡𐴘 𐴉𐴟𐴥𐴀𐴝𐴙𐴕𐴧𐴝 𐴘𐴡𐴥 𐴒𐴡𐴙𐴃𐴧𐴡𐴥.

𐴉𐴟𐴖𐴝𐴌 𐴀𐴝𐴊𐴞𐴥𐴑𐴝𐴌

¹⁹𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴉𐴟𐴖𐴝 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴑𐴠𐴏𐴧𐴟𐴥 𐴒𐴡𐴌𐴞𐴥 𐴕𐴡 𐴉𐴝𐴌𐴠. 𐴀𐴞𐴥𐴁𐴝𐴘𐴠 𐴏𐴞𐴌𐴞𐴥𐴉𐴢 𐴀𐴟𐴀𐴙𐴕 𐴒𐴡𐴌𐴠𐴥 𐴎𐴞𐴀𐴕 𐴁𐴝𐴉𐴠 𐴒𐴡𐴌𐴠𐴥 𐴊𐴠 𐴊𐴠𐴑𐴠𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴝𐴉𐴠 𐴎𐴞𐴀𐴕 𐴒𐴡𐴌𐴠𐴥, 𐴉𐴟𐴖𐴝𐴘𐴠 𐴘𐴡𐴥 𐴇𐴞𐴥𐴀𐴕 𐴀𐴠𐴥𐴕𐴝 𐴒𐴡𐴌𐴠𐴥.²⁰𐴁𐴝𐴉𐴠 𐴕𐴞𐴎𐴡𐴌 𐴉𐴟𐴖𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴝𐴦𐴌 𐴕𐴞𐴎𐴠 𐴎𐴞𐴀𐴕 𐴒𐴡𐴌𐴠𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴖𐴝𐴌𐴠 𐴊𐴝𐴈𐴝𐴤. 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌-𐴋𐴡𐴣𐴀𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴉𐴟𐴖𐴝𐴌𐴠 𐴊𐴝𐴈𐴝𐴤𐴘𐴁𐴡, 𐴎𐴠𐴀𐴕𐴠 𐴇𐴞𐴥𐴀𐴕 𐴊𐴠𐴑𐴞𐴥 𐴃𐴟𐴣𐴀𐴝𐴥𐴌𐴝 𐴃𐴝𐴦𐴅𐴟𐴂𐴢 𐴀𐴡𐴥.²¹𐴁𐴝𐴉𐴠 𐴎𐴠𐴕𐴊𐴞𐴓𐴧𐴝 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴞𐴕𐴊𐴝 𐴒𐴡𐴌𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴉𐴟𐴖𐴝𐴘𐴠 𐴘𐴡𐴥 𐴎𐴝𐴌𐴠𐴥 𐴔𐴡𐴕𐴠𐴈𐴡𐴀 𐴃𐴝𐴌𐴠𐴥 𐴎𐴞𐴕𐴊𐴝 𐴒𐴡𐴌𐴠𐴥.²²𐴀𐴝𐴌𐴡𐴤 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴁𐴝𐴉𐴠 𐴇𐴡𐴕𐴡𐴤𐴑𐴞𐴘𐴡𐴌 𐴁𐴞𐴏𐴝𐴌 𐴕𐴡 𐴒𐴡𐴌𐴠𐴥, 𐴁𐴡𐴥𐴓𐴑𐴠 𐴁𐴞𐴏𐴝𐴌𐴡𐴌 𐴇𐴝𐴥𐴀𐴌 𐴎𐴞𐴔𐴧𐴝 𐴉𐴟𐴖𐴝𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴠,²³𐴎𐴠𐴀𐴕𐴠 𐴎𐴠𐴕𐴊𐴞𐴓𐴧𐴝 𐴁𐴝𐴉𐴡𐴌𐴠 𐴁𐴠𐴒𐴧𐴟𐴥𐴕𐴠 𐴀𐴞𐴎𐴧𐴡𐴃𐴢 𐴒𐴡𐴌𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴉𐴟𐴖𐴝𐴌𐴠 𐴘𐴡𐴥 𐴀𐴞𐴎𐴧𐴡𐴃𐴢 𐴒𐴡𐴌𐴠𐴥. 𐴎𐴠𐴦𐴕𐴞𐴑𐴞 𐴉𐴟𐴖𐴝𐴌𐴠 𐴀𐴞𐴎𐴧𐴡𐴃𐴢 𐴕𐴡 𐴒𐴡𐴌𐴠𐴥, 𐴀𐴞𐴥𐴃𐴠 𐴉𐴟𐴖𐴝𐴌𐴠 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴇𐴠𐴥 𐴁𐴝𐴉𐴡𐴌𐴠 𐴘𐴡𐴥 𐴀𐴞𐴎𐴧𐴡𐴃𐴢 𐴕𐴡 𐴒𐴡𐴌𐴠𐴥.

²⁴”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴠 𐴀𐴝𐴦𐴌 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴀𐴞𐴥𐴃𐴝𐴃𐴧𐴟 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴀𐴝𐴏𐴠𐴤. 𐴀𐴞𐴥𐴃𐴝𐴌 𐴖𐴡𐴌𐴠 𐴇𐴡𐴕𐴡𐴤 𐴏𐴝𐴥𐴣𐴎𐴝𐴌 𐴇𐴡𐴥𐴑𐴟𐴔 𐴕𐴡 𐴀𐴡𐴥𐴘𐴁𐴡, 𐴁𐴡𐴥𐴓𐴑𐴠 𐴀𐴞𐴥𐴃𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴞𐴒𐴞𐴃𐴢 𐴉𐴝𐴌𐴝𐴤𐴘𐴒𐴞𐴘𐴡𐴘.²⁵𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴁𐴡𐴥𐴓𐴑𐴠 𐴀𐴠𐴇𐴡𐴥𐴕 𐴀𐴝𐴀𐴘𐴒𐴞𐴘𐴡𐴘, 𐴎𐴠𐴣𐴃𐴧𐴠𐴥 𐴔𐴡𐴌𐴝 𐴀𐴡𐴥𐴑𐴧𐴡𐴓𐴠 𐴀𐴝𐴓𐴧𐴝𐴌 𐴉𐴟𐴖𐴝𐴌 𐴀𐴝𐴁𐴝𐴏𐴢 𐴉𐴟𐴥𐴕𐴞𐴁𐴡; 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴉𐴟𐴥𐴕𐴞𐴁𐴡 𐴀𐴞𐴥𐴃𐴝𐴌𐴝 𐴎𐴞𐴕𐴊𐴝 𐴀𐴡𐴥𐴘𐴁𐴡.²⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴕𐴊𐴞𐴓𐴧𐴝 𐴁𐴝𐴉𐴢 𐴕𐴞𐴎𐴠 𐴎𐴞𐴕𐴊𐴞𐴒𐴞𐴌 𐴔𐴝𐴓𐴞𐴑, 𐴇𐴠𐴥𐴕𐴊𐴞𐴓𐴧𐴝 𐴀𐴞𐴥𐴁𐴝𐴘𐴠 𐴉𐴟𐴖𐴝𐴌𐴠 𐴘𐴡𐴥 𐴎𐴞𐴕𐴊𐴞𐴒𐴞𐴌 𐴔𐴝𐴓𐴞𐴑 𐴁𐴝𐴕𐴝𐴘𐴧𐴠𐴥.²⁷𐴀𐴞𐴥𐴁𐴝𐴘𐴠 𐴉𐴟𐴖𐴝𐴌𐴠 𐴁𐴞𐴏𐴝𐴌𐴡𐴌 𐴀𐴝𐴊𐴞𐴥𐴑𐴝𐴌 𐴊𐴞𐴦𐴘𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝.

²⁸”𐴇𐴞𐴥𐴀𐴕 𐴉𐴟𐴥𐴕𐴞 𐴃𐴝𐴦𐴅𐴟𐴂𐴢 𐴕𐴡 𐴀𐴡𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴎𐴠𐴃𐴝𐴌𐴝𐴤 𐴈𐴡𐴁𐴡𐴌𐴡𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴌 𐴀𐴝𐴁𐴝𐴏𐴢 𐴉𐴟𐴥𐴕𐴞𐴁𐴡,²⁹𐴇𐴠𐴥𐴣𐴃𐴧𐴠 𐴕𐴠𐴦𐴓𐴞𐴀𐴝𐴘𐴁𐴡𐴥; 𐴎𐴠𐴃𐴝𐴌𐴝𐴤 𐴒𐴡𐴔 𐴈𐴝𐴔 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝 𐴎𐴞𐴕𐴊𐴞𐴒𐴞 𐴉𐴝𐴘 𐴁𐴡𐴓𐴧𐴝 𐴀𐴟𐴍𐴞𐴤𐴁𐴡; 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴈𐴡𐴥𐴌𐴝𐴉𐴢 𐴈𐴝𐴔 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝 𐴏𐴝𐴥𐴣𐴎𐴝 𐴉𐴝𐴘 𐴁𐴡𐴓𐴧𐴝 𐴀𐴟𐴍𐴞𐴤𐴁𐴡.

𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤

³⁰”𐴀𐴝𐴀𐴛 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴑𐴠𐴏𐴧𐴟𐴥 𐴒𐴡𐴌𐴞𐴥 𐴕𐴡 𐴉𐴝𐴌𐴞. 𐴀𐴝𐴀𐴛 𐴎𐴠𐴕𐴊𐴞𐴓𐴧𐴝 𐴉𐴟𐴥𐴕𐴞 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴁𐴞𐴏𐴝𐴌 𐴒𐴡𐴌𐴞𐴥; 𐴀𐴝𐴦𐴌 𐴀𐴝𐴣𐴀𐴌 𐴁𐴞𐴏𐴝𐴌 𐴏𐴡𐴥𐴘𐴧𐴞, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴕𐴞𐴎𐴡𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴙𐴃𐴧𐴡𐴥 𐴕𐴡 𐴏𐴝𐴀𐴘𐴢, 𐴁𐴡𐴥𐴓𐴑𐴠 𐴀𐴟𐴁𐴝𐴤𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴙𐴃𐴧𐴡𐴥 𐴏𐴝𐴀𐴘𐴢 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠.

³¹”𐴀𐴝𐴀𐴛 𐴎𐴡𐴊𐴞 𐴕𐴞𐴎𐴡𐴌 𐴁𐴝𐴦𐴁𐴟𐴃𐴠 𐴕𐴞𐴎𐴠 𐴒𐴡𐴁𐴝𐴤 𐴊𐴞𐴥, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴒𐴡𐴁𐴝𐴤 𐴏𐴡𐴥𐴘𐴧𐴞 𐴕𐴡.³²𐴔𐴡𐴕𐴃𐴡𐴌 𐴀𐴝𐴌 𐴀𐴠𐴎𐴧𐴡𐴕 𐴀𐴝𐴏𐴠𐴤, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴠𐴥, 𐴀𐴝𐴦𐴌 𐴀𐴝𐴀𐴛 𐴎𐴝𐴕𐴞, 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴊𐴠𐴊𐴠 𐴒𐴡𐴁𐴝𐴤 𐴏𐴡𐴥𐴘𐴧𐴞.

³³”𐴃𐴟𐴣𐴀𐴝𐴥𐴌𐴝 𐴃𐴡 𐴘𐴝𐴇𐴝𐴥𐴘𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴙𐴃𐴧𐴡𐴥 𐴊𐴞𐴉𐴠𐴍𐴝𐴥𐴘𐴓𐴝, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴘𐴠 𐴏𐴡𐴥𐴘𐴧𐴞 𐴒𐴝𐴥𐴕 𐴒𐴡𐴁𐴝𐴤 𐴊𐴞𐴥𐴘𐴠.³⁴𐴁𐴠𐴐𐴡𐴥𐴑, 𐴀𐴝𐴀𐴛 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴌 𐴒𐴡𐴁𐴝𐴤𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴕𐴡 𐴒𐴡𐴌𐴞𐴥, 𐴓𐴠𐴑𐴞𐴕 𐴀𐴝𐴀𐴛 𐴀𐴞𐴀𐴕 𐴀𐴠𐴃𐴡𐴓𐴧𐴝𐴤 𐴈𐴡𐴀𐴙𐴌, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴕𐴠𐴅𐴝𐴃𐴢 𐴉𐴡.³⁵𐴘𐴝𐴇𐴝𐴥𐴘𐴝 𐴀𐴝𐴐𐴧𐴞𐴥𐴓𐴢 𐴏𐴠𐴌𐴝𐴑 𐴖𐴝𐴀𐴕, 𐴎𐴞𐴘𐴝𐴥𐴕𐴠 𐴎𐴡𐴓𐴞 𐴉𐴡𐴀𐴌 𐴊𐴠; 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴇𐴡𐴦𐴊𐴧𐴞𐴕𐴡𐴓𐴧𐴝 𐴘𐴡𐴥𐴒𐴧𐴗𐴝𐴌 𐴉𐴡𐴀𐴌𐴡𐴃𐴢 𐴑𐴟𐴥𐴐𐴞 𐴒𐴡𐴙𐴃𐴧𐴡𐴥 𐴌𐴝𐴎𐴞 𐴀𐴡𐴥𐴘𐴓𐴝.

³⁶”𐴓𐴠𐴑𐴞𐴕 𐴘𐴝𐴇𐴝𐴥𐴘𐴝𐴌 𐴒𐴡𐴁𐴝𐴤𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴒𐴡𐴁𐴝𐴤 𐴀𐴝𐴣𐴀𐴃𐴧𐴟 𐴀𐴝𐴏𐴠𐴤; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴈𐴝𐴔 𐴀𐴟𐴀𐴙𐴕 𐴒𐴡𐴌𐴞𐴥𐴌 𐴎𐴞𐴀𐴕 𐴉𐴟𐴌𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴠𐴥, 𐴀𐴝𐴦𐴌 𐴀𐴝𐴀𐴛 𐴒𐴡𐴌𐴞𐴥 𐴊𐴠 𐴈𐴝𐴔 𐴇𐴞𐴥𐴀𐴕𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴠𐴥 𐴊𐴠 𐴑𐴞, 𐴀𐴝𐴣𐴀𐴌𐴠𐴥 𐴁𐴝𐴉𐴠 𐴊𐴞𐴉𐴠𐴍𐴝𐴥𐴘𐴧𐴠.³⁷𐴇𐴠𐴥 𐴁𐴝𐴉𐴢 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴁𐴝 𐴕𐴞𐴎𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥𐴘𐴠. 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴊𐴞𐴕 𐴕𐴡 𐴀𐴞𐴥𐴁𐴝𐴌 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴡, 𐴀𐴝𐴦𐴌 𐴕𐴡 𐴀𐴞𐴥𐴁𐴝𐴌 𐴏𐴞𐴘𐴝𐴥𐴌𐴝-𐴏𐴟𐴥𐴌𐴡𐴃𐴢 𐴊𐴠𐴙𐴑𐴧𐴡𐴥.³⁸𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴀𐴞𐴥𐴁𐴝𐴌 𐴑𐴝𐴓𐴝𐴔 𐴕𐴡 𐴃𐴝𐴥𐴑𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴊𐴠 𐴀𐴞𐴥𐴁𐴝𐴘𐴠 𐴎𐴞𐴁𐴝𐴤𐴌𐴠 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟 𐴀𐴝𐴕𐴡𐴤.³⁹𐴃𐴟𐴣𐴀𐴝𐴥𐴌𐴝 𐴃𐴡 𐴂𐴝𐴑-𐴑𐴝𐴓𐴝𐴔𐴡𐴌 𐴊𐴟𐴖𐴝𐴌𐴝 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴉𐴝𐴘𐴁𐴝 𐴁𐴡𐴓𐴞 𐴄𐴝𐴥𐴀𐴌𐴞 𐴊𐴞𐴓𐴔𐴡𐴕 𐴊𐴞 𐴂𐴝𐴑-𐴑𐴝𐴓𐴝𐴔 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴇𐴠𐴥 𐴂𐴝𐴑-𐴑𐴝𐴓𐴝𐴔𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴀𐴠𐴥𐴕𐴝 𐴒𐴡𐴁𐴝𐴤 𐴊𐴠𐴥.⁴⁰𐴃𐴡𐴀 𐴃𐴟𐴣𐴀𐴝𐴥𐴌𐴝 𐴎𐴞𐴕𐴊𐴞𐴒𐴞 𐴉𐴝𐴘 𐴁𐴡𐴓𐴧𐴝 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴃𐴡𐴤 𐴕𐴡 𐴏𐴡𐴀.

⁴¹”𐴀𐴝𐴀𐴛 𐴀𐴞𐴕𐴏𐴝𐴥𐴕𐴡𐴃𐴧𐴟 𐴀𐴞𐴎𐴧𐴡𐴃𐴢 𐴉𐴝𐴘𐴃𐴡 𐴕𐴡 𐴏𐴝𐴀𐴘𐴢.⁴²𐴓𐴠𐴑𐴞𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴞𐴕𐴞𐴥, 𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴀𐴝𐴓𐴧𐴝𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴕𐴝𐴥𐴘.⁴³𐴀𐴝𐴀𐴛 𐴀𐴝𐴣𐴀𐴌 𐴁𐴝𐴉𐴡𐴌 𐴕𐴝𐴔𐴠 𐴀𐴝𐴙𐴐𐴧𐴞𐴤, 𐴃𐴡𐴀 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴡𐴤; 𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴑𐴞𐴘𐴠𐴥 𐴎𐴡𐴊𐴞 𐴕𐴞𐴎𐴡𐴌 𐴕𐴝𐴔𐴠 𐴀𐴝𐴘𐴓𐴠𐴤, 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴠 𐴑𐴡𐴁𐴟𐴓𐴢 𐴒𐴡𐴌𐴞𐴥𐴁𐴝.⁴⁴𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴠𐴎𐴧𐴡𐴕𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴇𐴝𐴣𐴏𐴡𐴥𐴃𐴧𐴟 𐴀𐴞𐴎𐴧𐴡𐴃𐴢 𐴉𐴝𐴘𐴃𐴡 𐴏𐴡𐴀, 𐴔𐴡𐴕𐴃𐴡𐴌 𐴎𐴠 𐴀𐴞𐴎𐴧𐴡𐴃𐴢 𐴀𐴝𐴓𐴧𐴝𐴌 𐴇𐴝𐴣𐴏𐴡𐴥𐴃𐴧𐴟 𐴉𐴝𐴦 𐴎𐴝 𐴇𐴞𐴥𐴘𐴝𐴕 𐴉𐴝𐴘𐴃𐴡 𐴑𐴟𐴐𐴞𐴥𐴐𐴢 𐴕𐴡 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴌𐴝 𐴑𐴠𐴀𐴕𐴒𐴡𐴌𐴞 𐴀𐴞𐴔𐴝𐴕 𐴀𐴝𐴕𐴞𐴤𐴁𐴝؟

⁴⁵”𐴃𐴟𐴣𐴀𐴝𐴥𐴌𐴝 𐴕𐴡 𐴄𐴝𐴥𐴀𐴙𐴅𐴧𐴡 𐴊𐴠 𐴑𐴞, 𐴀𐴝𐴀𐴛 𐴁𐴝𐴉𐴡𐴌 𐴔𐴟𐴀𐴕𐴃𐴟 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴏𐴟𐴥𐴌 𐴊𐴞𐴥𐴘𐴟𐴔. 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴁𐴝𐴤𐴘𐴠 𐴈𐴡𐴏𐴟𐴥𐴌 𐴊𐴞𐴥𐴁𐴡 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴔𐴟𐴀𐴏𐴝, 𐴎𐴞𐴁𐴝𐴤𐴌 𐴖𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴁𐴡𐴥𐴌𐴝𐴐𐴝 𐴌𐴝𐴙𐴑𐴧𐴡𐴥.⁴⁶𐴃𐴟𐴣𐴀𐴝𐴥𐴌𐴝 𐴎𐴡𐴊𐴞 𐴔𐴟𐴀𐴏𐴝𐴌𐴠 𐴁𐴞𐴐𐴧𐴝𐴥𐴐𐴢 𐴒𐴡𐴙𐴃𐴧𐴝𐴥, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴘𐴡𐴥 𐴁𐴞𐴐𐴧𐴝𐴥𐴐𐴢 𐴒𐴡𐴙𐴃𐴧𐴝𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴀𐴠𐴥𐴕𐴝 𐴓𐴠𐴙𐴑𐴧𐴠𐴥.⁴⁷𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴀𐴞𐴥𐴁𐴝𐴌 𐴓𐴠𐴑𐴝𐴥𐴌𐴠 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴡𐴤, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴈𐴡𐴃𐴝𐴤 𐴑𐴠𐴀𐴕𐴒𐴡𐴌𐴞 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥𐴁𐴝؟“

The Word for the World International

https://app.library.bible/content/87faca8b51c22590