Read 𐴘𐴡𐴇𐴝𐴥𐴕𐴧𐴝 4

𐴘𐴡𐴇𐴝𐴥𐴕𐴧𐴝4

𐴀𐴞𐴏𐴝𐴤 𐴀𐴠𐴊𐴧𐴠 𐴏𐴝𐴔𐴝𐴥𐴌𐴞 𐴔𐴝𐴘𐴝𐴉𐴟𐴖𐴝

¹𐴎𐴠𐴣𐴃𐴧𐴠𐴥 𐴔𐴝𐴓𐴞𐴑𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴊𐴠 𐴑𐴞, 𐴀𐴞𐴥𐴁𐴝𐴘𐴠 𐴘𐴝𐴇𐴝𐴥𐴘𐴝𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴀𐴟𐴔𐴧𐴡𐴃𐴢 𐴁𐴝𐴕𐴝𐴘𐴧𐴠𐴥 𐴊𐴠 𐴀𐴝𐴦𐴌 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴠 𐴊𐴠 𐴇𐴞𐴥𐴀𐴕 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴉𐴟𐴥𐴙𐴕𐴧𐴠,²𐴇𐴝𐴥𐴓𐴠𐴑𐴠 𐴀𐴞𐴏𐴝𐴤 𐴕𐴞𐴎𐴠 𐴁𐴝𐴥𐴂𐴄𐴞𐴏𐴔𐴝 𐴕𐴡 𐴊𐴞𐴃𐴡, 𐴁𐴡𐴥𐴓𐴑𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴊𐴞𐴃𐴡 𐴊𐴠,³𐴃𐴡𐴥𐴘 𐴀𐴞𐴥𐴁𐴝 𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴃𐴧𐴟 𐴕𐴠𐴦𐴓𐴞 𐴀𐴝𐴁𐴝𐴌 𐴒𐴝𐴓𐴞𐴓𐴢 𐴀𐴠𐴓𐴝𐴑𐴝𐴃𐴢 𐴎𐴝𐴦𐴌𐴒𐴡𐴥𐴘.

⁴𐴎𐴝𐴘𐴃𐴠 𐴀𐴞𐴥𐴁𐴝𐴃𐴧𐴟 𐴏𐴝𐴔𐴝𐴥𐴌𐴞𐴘𐴝 𐴀𐴠𐴓𐴝𐴑𐴝 𐴁𐴝𐴥𐴘 𐴎𐴝𐴦 𐴉𐴡𐴌𐴠𐴌.⁵𐴎𐴝𐴘𐴃𐴠-𐴎𐴝𐴘𐴃𐴠 𐴀𐴞𐴥𐴁𐴝 𐴏𐴝𐴔𐴝𐴥𐴌𐴞𐴘𐴝𐴌 𐴏𐴟𐴥𐴑𐴡𐴌 𐴕𐴝𐴔𐴡𐴌 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴉𐴡𐴀𐴣𐴙𐴐𐴧𐴠, 𐴎𐴞𐴘𐴝𐴥𐴕 𐴘𐴝𐴑𐴟𐴁𐴠 𐴕𐴞𐴎𐴡𐴌 𐴉𐴟𐴖𐴝 𐴘𐴟𐴏𐴟𐴥𐴉𐴡𐴌𐴠 𐴊𐴞𐴀𐴓𐴢 𐴊𐴠 𐴎𐴡𐴁𐴞𐴕𐴡𐴌 𐴋𐴝𐴥𐴑𐴠.⁶𐴇𐴠𐴥𐴍𐴠 𐴘𐴝𐴑𐴟𐴁𐴡𐴌 𐴉𐴝𐴄𐴢-𐴑𐴟𐴖𐴝 𐴀𐴝𐴐𐴧𐴞𐴥𐴓𐴢. 𐴀𐴞𐴏𐴝𐴤 𐴀𐴝𐴥𐴣𐴙𐴄𐴧𐴠-𐴀𐴝𐴥𐴣𐴙𐴄𐴧𐴠 𐴀𐴡𐴥𐴌𐴝𐴕 𐴀𐴡𐴥𐴘 𐴇𐴠𐴥 𐴉𐴝𐴄𐴢-𐴑𐴟𐴖𐴝 𐴖𐴝𐴌 𐴇𐴝𐴣𐴏𐴝𐴃𐴢 𐴁𐴡𐴙𐴐𐴧𐴠𐴥. 𐴇𐴠𐴥𐴣𐴃𐴧𐴠 𐴁𐴠𐴙𐴓𐴢 𐴄𐴞𐴥𐴑 𐴀𐴡𐴥𐴘𐴧𐴠.

⁷𐴀𐴠𐴑𐴒𐴗𐴝𐴥 𐴏𐴝𐴔𐴝𐴥𐴌𐴞𐴘𐴝𐴌 𐴔𐴝𐴘𐴝𐴉𐴟𐴖𐴝 𐴇𐴠𐴥𐴍𐴠 𐴉𐴝𐴕𐴞𐴥 𐴃𐴟𐴙𐴓𐴃𐴡𐴥 𐴀𐴝𐴙𐴐𐴧𐴠𐴥. 𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴠𐴥 𐴀𐴠𐴑 𐴃𐴞𐴌𐴝𐴥𐴐𐴢 𐴉𐴝𐴕𐴞𐴥 𐴈𐴝𐴥𐴀𐴁𐴝.“⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴐𐴡𐴥𐴀𐴌𐴡𐴃𐴢 𐴈𐴝𐴥𐴕𐴝 𐴑𐴞𐴕𐴃𐴡 𐴒𐴞𐴦𐴘𐴡𐴥𐴘.

⁹𐴇𐴠𐴥𐴃𐴡𐴓𐴧𐴝 𐴇𐴠𐴥 𐴏𐴝𐴔𐴝𐴥𐴌𐴞 𐴔𐴝𐴘𐴝𐴉𐴟𐴖𐴝𐴘𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴊𐴠 𐴀𐴠𐴥𐴎𐴧𐴡𐴕 𐴏𐴝𐴔𐴝𐴥𐴌𐴞 𐴔𐴝𐴘𐴝𐴉𐴟𐴖𐴝, 𐴃𐴟𐴀𐴛 𐴘𐴡𐴇𐴟𐴥𐴊𐴞 𐴀𐴡𐴥𐴘𐴧𐴡𐴌𐴠 𐴑𐴠𐴀𐴕𐴒𐴡𐴌𐴞 𐴀𐴝𐴣𐴀𐴃𐴧𐴟 𐴉𐴝𐴕𐴞𐴥 𐴔𐴝𐴒𐴡𐴌؟“ 𐴇𐴞𐴥𐴁𐴝𐴘𐴠 𐴀𐴠 𐴈𐴡𐴃𐴝𐴤 𐴀𐴠𐴃𐴡𐴓𐴧𐴝𐴤 𐴈𐴡𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴇𐴡𐴕𐴡𐴤 𐴃𐴝𐴦𐴓𐴟𐴑𐴝𐴃𐴢 𐴕𐴝𐴥𐴘.

¹⁰𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴘 𐴎𐴡𐴊𐴞 𐴀𐴝𐴓𐴧𐴝𐴌 𐴇𐴝𐴥𐴊𐴞𐴘𐴝𐴌𐴠 𐴀𐴠𐴊𐴧𐴠 𐴃𐴡𐴌𐴃𐴧𐴟 𐴇𐴡𐴕𐴠 𐴉𐴝𐴕𐴞𐴥 𐴔𐴝𐴙𐴒𐴧𐴠𐴥 𐴇𐴡𐴘 𐴉𐴝𐴙𐴃𐴧𐴞, 𐴃𐴡𐴥𐴀𐴘𐴓𐴠 𐴃𐴟𐴘 𐴀𐴞𐴥𐴁𐴝𐴃𐴧𐴟 𐴉𐴝𐴕𐴞𐴥 𐴔𐴝𐴒𐴞𐴃𐴞𐴥, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴃𐴡𐴌𐴠𐴥 𐴎𐴞𐴕𐴊𐴞𐴒𐴞 𐴊𐴠𐴦 𐴊𐴠 𐴉𐴝𐴕𐴞𐴥 𐴊𐴞𐴦𐴃𐴡.“

¹¹𐴔𐴝𐴘𐴝𐴉𐴟𐴖𐴝𐴘𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴃𐴟𐴣𐴀𐴝𐴥𐴣𐴃𐴧𐴟 𐴊𐴠 𐴉𐴝𐴕𐴞𐴥 𐴃𐴟𐴓𐴞𐴤 𐴁𐴡𐴓𐴧𐴝 𐴇𐴡𐴕𐴡𐴤 𐴃𐴝𐴥𐴌𐴝 𐴕𐴝𐴥𐴘, 𐴀𐴝𐴦𐴌 𐴉𐴝𐴄𐴢-𐴑𐴟𐴖𐴝 𐴃𐴡 𐴔𐴟𐴌. 𐴃𐴡𐴥𐴘 𐴃𐴟𐴀𐴛 𐴇𐴠𐴥 𐴎𐴞𐴕𐴊𐴞𐴒𐴞𐴌 𐴉𐴝𐴕𐴞𐴥 𐴇𐴡𐴍𐴠𐴥 𐴉𐴝𐴘𐴧𐴡𐴥؟¹²𐴃𐴟𐴀𐴛 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴘𐴝𐴑𐴟𐴁𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴕𐴞𐴥𐴑𐴞, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴝𐴌𐴠 𐴀𐴠 𐴉𐴝𐴄𐴢-𐴑𐴟𐴖𐴝 𐴖𐴝 𐴊𐴞𐴦𐴘𐴠𐴥, 𐴀𐴝𐴦𐴌 𐴀𐴞𐴥𐴁𐴝 𐴕𐴞𐴎𐴠, 𐴀𐴞𐴥𐴁𐴝𐴌 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴠, 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴒𐴡𐴌𐴟𐴏𐴡𐴥𐴓𐴢 𐴀𐴡𐴥𐴑𐴧𐴡𐴓𐴠 𐴘𐴞𐴁𐴝𐴤𐴌 𐴉𐴝𐴕𐴞𐴥 𐴈𐴝𐴥𐴘𐴧𐴠؟“

¹³𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴎𐴠𐴦𐴕𐴞𐴑𐴞 𐴀𐴠 𐴉𐴝𐴕𐴞𐴥 𐴈𐴝𐴥𐴀, 𐴀𐴞𐴥𐴃𐴝𐴃𐴧𐴟 𐴀𐴝𐴁𐴝𐴌 𐴃𐴞𐴌𐴝𐴥𐴐𐴢 𐴓𐴝𐴒𐴞𐴁𐴡𐴥,¹⁴𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴀𐴛 𐴊𐴞𐴦 𐴊𐴠 𐴉𐴝𐴕𐴞𐴥 𐴈𐴝𐴥𐴀 𐴀𐴞𐴥𐴃𐴝𐴃𐴧𐴟 𐴀𐴝𐴌 𐴇𐴡𐴕𐴡𐴤𐴊𐴞𐴕 𐴃𐴞𐴌𐴝𐴥𐴐𐴢 𐴕𐴡 𐴓𐴝𐴒𐴞𐴁𐴡𐴥, 𐴁𐴡𐴥𐴓𐴑𐴠 𐴀𐴝𐴀𐴛 𐴊𐴞𐴦𐴘𐴟𐴔 𐴊𐴠 𐴇𐴠𐴥 𐴉𐴝𐴕𐴞𐴥 𐴀𐴞𐴥𐴃𐴝𐴌 𐴊𐴞𐴓𐴡𐴃𐴢 𐴎𐴡𐴥𐴕𐴧𐴝𐴃𐴧𐴟 𐴀𐴟𐴍𐴠𐴤 𐴉𐴝𐴥𐴚𐴒𐴡𐴌𐴞 𐴀𐴟𐴍𐴞𐴤𐴁𐴡, 𐴀𐴝𐴦𐴌 𐴇𐴞𐴥𐴀𐴕𐴠 𐴀𐴞𐴥𐴃𐴝𐴌𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴊𐴞𐴦𐴁𐴡.“

¹⁵𐴔𐴝𐴘𐴝𐴉𐴟𐴖𐴝𐴘𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴠𐴥 𐴇𐴠𐴥 𐴉𐴝𐴕𐴞𐴥 𐴊𐴡𐴦, 𐴎𐴠𐴀𐴕𐴠 𐴀𐴝𐴣𐴀𐴃𐴧𐴟 𐴀𐴝𐴌 𐴃𐴞𐴌𐴝𐴥𐴐𐴢 𐴕𐴡 𐴓𐴝𐴒𐴠, 𐴀𐴝𐴦𐴌 𐴀𐴠𐴍𐴠𐴥 𐴉𐴝𐴕𐴞𐴥 𐴓𐴧𐴝 𐴘𐴡𐴥 𐴀𐴝𐴀 𐴕𐴡 𐴉𐴡𐴌𐴠.“

¹⁶𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠 ”𐴃𐴡𐴥𐴀𐴘𐴓𐴠 𐴎𐴝𐴦, 𐴃𐴡𐴌 𐴇𐴡𐴥𐴐𐴡𐴔𐴡𐴌𐴠 𐴀𐴠𐴍𐴠𐴥 𐴔𐴝𐴃𐴝𐴘 𐴀𐴝𐴕𐴒𐴡𐴥𐴘.“

¹⁷𐴔𐴝𐴘𐴝𐴉𐴟𐴖𐴝𐴘𐴠 𐴀𐴞𐴏𐴝𐴤𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴃𐴧𐴟 𐴊𐴠 𐴇𐴡𐴕𐴡𐴤 𐴇𐴡𐴥𐴐𐴡𐴔 𐴕𐴝𐴥𐴘.“ 𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴘 𐴏𐴡𐴥𐴘𐴧𐴞 𐴈𐴡𐴘𐴧𐴡𐴥𐴏𐴢, 𐴃𐴡𐴌𐴃𐴧𐴟 𐴇𐴡𐴕𐴡𐴤 𐴇𐴡𐴥𐴐𐴡𐴔 𐴕𐴝𐴥𐴘.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌𐴃𐴧𐴟 𐴘𐴝𐴦𐴌 𐴀𐴝𐴒𐴠 𐴉𐴝𐴣𐴏𐴢 𐴏𐴗𐴝𐴥 𐴇𐴡𐴥𐴐𐴡𐴔 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴀𐴠𐴇𐴡𐴥𐴕 𐴎𐴠𐴦𐴕𐴞𐴑𐴞 𐴃𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤, 𐴀𐴞𐴥𐴃𐴠 𐴘𐴡𐴥 𐴃𐴡𐴌 𐴇𐴡𐴥𐴐𐴡𐴔 𐴕𐴡. 𐴃𐴟𐴘 𐴏𐴡𐴥𐴘𐴧𐴞 𐴈𐴡𐴘𐴧𐴡𐴥𐴏𐴢.“

¹⁹𐴔𐴝𐴘𐴝𐴉𐴟𐴖𐴝𐴘𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴝𐴀𐴛 𐴀𐴠𐴇𐴡𐴥𐴕 𐴎𐴝𐴕𐴞 𐴉𐴝𐴙𐴅𐴧𐴞𐴥, 𐴃𐴟𐴀𐴛 𐴀𐴠𐴥𐴎𐴧𐴡𐴕 𐴕𐴡𐴁𐴞.²⁰𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴀𐴠 𐴉𐴝𐴀𐴌 𐴒𐴗𐴝𐴌 𐴖𐴡𐴌𐴠 𐴀𐴠𐴁𐴝𐴦𐴊𐴡𐴃𐴢 𐴒𐴡𐴙𐴃𐴧𐴡𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀 𐴊𐴠, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴝𐴥𐴌 𐴉𐴡𐴥𐴌𐴡𐴏𐴢.“

²¹𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴔𐴝𐴘𐴝𐴉𐴟𐴖𐴝, 𐴀𐴝𐴣𐴀𐴌 𐴈𐴡𐴃𐴝𐴤 𐴁𐴞𐴐𐴧𐴝𐴥𐴐𐴢 𐴒𐴡𐴥𐴌, 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴃𐴟𐴣𐴀𐴝𐴥𐴌𐴝 𐴁𐴝𐴉𐴡𐴌 𐴀𐴠𐴁𐴝𐴦𐴊𐴡𐴃𐴢 𐴕𐴡 𐴀𐴠 𐴉𐴝𐴀𐴌𐴡𐴌 𐴖𐴡𐴌𐴠 𐴒𐴡𐴌𐴞𐴥𐴁𐴝, 𐴀𐴝𐴦𐴌 𐴕𐴡 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴡𐴌𐴞𐴥𐴁𐴝.²²𐴃𐴟𐴣𐴀𐴝𐴥𐴌𐴝 𐴎𐴞𐴁𐴝𐴤𐴌𐴠 𐴕𐴡 𐴏𐴞𐴕𐴡𐴥 𐴀𐴞𐴥𐴁𐴝𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴡𐴤 𐴊𐴠; 𐴔𐴡𐴕𐴃𐴡𐴌 𐴀𐴝𐴣𐴀𐴌𐴝 𐴎𐴞𐴁𐴝𐴤𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥 𐴀𐴞𐴥𐴁𐴝𐴌𐴠 𐴏𐴞𐴕𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴠𐴅𐴝𐴃𐴡𐴌 𐴔𐴡𐴑𐴝 𐴘𐴡𐴇𐴟𐴥𐴊𐴞𐴌 𐴁𐴟𐴥𐴃𐴡𐴃𐴧𐴟 𐴀𐴠𐴥𐴕𐴝 𐴀𐴝𐴙𐴐𐴧𐴠𐴥.²³𐴓𐴠𐴑𐴞𐴕 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴀𐴠𐴇𐴡𐴥𐴕 𐴀𐴡𐴥𐴙𐴓𐴊𐴠 𐴇𐴠𐴥 𐴀𐴡𐴑𐴃𐴡𐴥, 𐴎𐴠𐴣𐴃𐴧𐴠𐴥 𐴏𐴡𐴥𐴘𐴧𐴞 𐴀𐴠𐴁𐴝𐴦𐴊𐴡𐴃𐴒𐴝𐴥𐴌 𐴀𐴡𐴥𐴑𐴧𐴡𐴓𐴠 𐴌𐴟𐴀 𐴀𐴠𐴊𐴧𐴠 𐴏𐴡𐴥𐴘𐴧𐴞 𐴓𐴡𐴥𐴘 𐴁𐴝𐴉𐴡𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴝𐴉𐴠 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴀𐴠𐴁𐴝𐴦𐴊𐴡𐴃𐴒𐴝𐴥𐴌𐴡𐴌 𐴃𐴝𐴓𐴝𐴐𐴢 𐴒𐴡𐴌𐴠𐴥𐴌.²⁴𐴀𐴝𐴓𐴧𐴝 𐴀𐴡𐴥𐴙𐴓𐴊𐴠 𐴌𐴟𐴀, 𐴇𐴠𐴥𐴃𐴡𐴓𐴧𐴝 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴠𐴥 𐴀𐴞𐴥𐴃𐴝𐴌𐴝𐴃𐴧𐴟 𐴀𐴞𐴥𐴁𐴝𐴌 𐴀𐴠𐴁𐴝𐴦𐴊𐴡𐴃𐴢 𐴌𐴟𐴀 𐴀𐴠𐴊𐴧𐴠 𐴏𐴡𐴥𐴘𐴧𐴞 𐴓𐴡𐴥𐴘 𐴒𐴡𐴌𐴝𐴥𐴌 𐴎𐴡𐴌𐴟𐴌.“

²⁵𐴔𐴝𐴘𐴝𐴉𐴟𐴖𐴝𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴎𐴝𐴕𐴞 𐴔𐴠𐴏𐴝𐴥𐴘𐴧𐴝 𐴀𐴝𐴘𐴧𐴠𐴤𐴌, 𐴘𐴝𐴥𐴕𐴞 𐴔𐴡𐴀𐴏𐴞𐴤. 𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴀𐴝𐴘𐴁𐴡𐴤, 𐴀𐴝𐴣𐴀𐴌𐴝𐴌𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴕𐴝𐴘𐴊𐴞𐴁𐴡.“

²⁶𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴥𐴁𐴝, 𐴎𐴞𐴁𐴝𐴤𐴘𐴠 𐴃𐴡𐴌 𐴓𐴡𐴘 𐴈𐴡𐴃𐴝𐴤 𐴈𐴡𐴀𐴙𐴌.“

²⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴏𐴝𐴤𐴘𐴠 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝 𐴓𐴧𐴡𐴘 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝 𐴀𐴝𐴔𐴧𐴟𐴥𐴑 𐴀𐴡𐴥𐴘𐴒𐴞𐴘𐴡𐴘; 𐴔𐴡𐴕𐴃𐴡𐴌 𐴃𐴡𐴀 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴠 𐴉𐴟𐴏𐴝𐴥𐴌 𐴕𐴡𐴥 𐴒𐴡𐴌𐴠𐴥 𐴊𐴠 𐴑𐴞, ”𐴃𐴟𐴀𐴛 𐴑𐴞𐴦 𐴃𐴟𐴖𐴡𐴀𐴌؟“ 𐴘𐴝𐴥, ”𐴃𐴟𐴀𐴛 𐴑𐴞𐴘𐴡𐴥𐴓𐴧𐴝 𐴇𐴞𐴥𐴁𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴀𐴌؟“

²⁸𐴁𐴝𐴦𐴊𐴠 𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴕𐴞𐴎𐴡𐴌 𐴉𐴝𐴕𐴞𐴥𐴌 𐴒𐴡𐴥𐴌𐴝 𐴖𐴝 𐴀𐴠𐴌𐴞, 𐴉𐴝𐴌𐴝𐴃𐴢 𐴎𐴝𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠,²⁹”𐴀𐴝𐴘𐴧𐴡𐴤, 𐴃𐴟𐴣𐴀𐴝𐴥𐴌𐴝 𐴀𐴠𐴒𐴧𐴗𐴝𐴤 𐴔𐴝𐴕𐴟𐴥𐴙𐴐𐴡𐴌𐴠 𐴏𐴡𐴀𐴒𐴝𐴘, 𐴎𐴞𐴁𐴝𐴤𐴘𐴠 𐴀𐴝𐴀𐴛 𐴀𐴝𐴣𐴀𐴌 𐴎𐴞𐴕𐴊𐴞𐴒𐴞𐴃𐴢 𐴎𐴞𐴀𐴕-𐴎𐴞𐴀𐴕 𐴒𐴡𐴙𐴅𐴧𐴞𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌𐴠𐴥 𐴈𐴡𐴘𐴧𐴠𐴥. 𐴃𐴡𐴥𐴀𐴘𐴓𐴠 𐴀𐴞𐴥𐴁𐴝 𐴇𐴡𐴥𐴕𐴡 𐴇𐴠𐴥 𐴔𐴡𐴀𐴏𐴞𐴤 𐴕𐴠𐴥؟“³⁰𐴃𐴡𐴥𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴉𐴝𐴌𐴝𐴃𐴧𐴟 𐴕𐴠𐴦𐴓𐴞 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴀𐴃𐴢 𐴊𐴡𐴙𐴅𐴧𐴠.

³¹𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴌𐴝𐴁𐴧𐴞𐴥, 𐴑𐴠𐴏𐴧𐴟𐴥 𐴈𐴡𐴥𐴀𐴕𐴝.“

³²𐴓𐴠𐴑𐴞𐴕 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴃𐴧𐴟 𐴀𐴠𐴀𐴕 𐴈𐴝𐴥𐴘𐴁𐴝𐴌 𐴈𐴝𐴥𐴕𐴝 𐴀𐴝𐴏𐴠𐴤, 𐴎𐴞𐴀𐴕𐴡𐴌 𐴁𐴝𐴦𐴁𐴟𐴃𐴠 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡.“

³³𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴝𐴉𐴡𐴤𐴏𐴡𐴃𐴢 𐴈𐴡𐴀𐴌 𐴊𐴠, ”𐴇𐴡𐴕𐴡𐴤𐴑𐴞𐴘𐴠 𐴇𐴡𐴥𐴕𐴡 𐴀𐴞𐴥𐴁𐴝𐴌𐴠 𐴈𐴝𐴥𐴕𐴝 𐴀𐴝𐴕𐴞𐴤𐴊𐴞𐴘𐴠 𐴕𐴠𐴥؟“

³⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴀𐴠𐴊𐴧𐴠 𐴈𐴝𐴔 𐴉𐴟𐴌𐴝 𐴒𐴡𐴌𐴡𐴤𐴕 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴈𐴝𐴥𐴕𐴝.³⁵𐴃𐴟𐴣𐴀𐴝𐴥𐴌𐴝 𐴑𐴞𐴥 𐴀𐴠𐴕𐴊𐴞𐴓𐴧𐴝 𐴕𐴡 𐴈𐴡𐴀 𐴕𐴠𐴥, 𐴑𐴞 𐴈𐴡𐴘𐴓𐴠𐴥, ’𐴀𐴝𐴌𐴡𐴤 𐴏𐴝𐴙𐴌 𐴔𐴝𐴐𐴢 𐴀𐴝𐴏𐴠𐴤, 𐴁𐴝𐴦𐴊𐴠 𐴉𐴡𐴥𐴏𐴡𐴓𐴢 𐴈𐴝𐴍𐴞𐴁𐴝𐴥𐴌 𐴀𐴝𐴙𐴕𐴊𐴝 𐴀𐴝𐴘𐴁𐴡𐴤؟‘ 𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴏𐴟𐴑 𐴃𐴟𐴓𐴞𐴤 𐴁𐴞𐴓𐴡𐴌 𐴀𐴟𐴎𐴟 𐴏𐴡𐴀, 𐴉𐴡𐴥𐴏𐴡𐴓𐴢 𐴀𐴡𐴥𐴑𐴧𐴡𐴓𐴢 𐴈𐴝𐴍𐴞 𐴁𐴡𐴓𐴧𐴝 𐴉𐴝𐴒𐴞𐴒𐴞𐴘𐴡𐴥𐴘.³⁶𐴉𐴡𐴥𐴏𐴡𐴓𐴢 𐴈𐴝𐴍𐴡𐴘𐴝 𐴀𐴡𐴥𐴑𐴧𐴡𐴓𐴠 𐴀𐴠𐴇𐴡𐴥𐴕 𐴀𐴡𐴥 𐴔𐴟𐴎𐴟𐴌𐴞 𐴉𐴝𐴦𐴌, 𐴀𐴝𐴦𐴌 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴓𐴧𐴝 𐴉𐴡𐴥𐴏𐴡𐴓𐴢 𐴀𐴡𐴥𐴑𐴧𐴡𐴓𐴢 𐴎𐴡𐴔𐴝 𐴒𐴡𐴌𐴞𐴥 𐴌𐴝𐴑𐴠𐴥𐴌, 𐴎𐴠𐴀𐴕𐴠 𐴓𐴝𐴒𐴡𐴘𐴝 𐴀𐴠𐴊𐴧𐴠 𐴈𐴝𐴍𐴡𐴘𐴝 𐴊𐴟𐴕𐴞𐴥 𐴎𐴡𐴕𐴠 𐴔𐴞𐴓𐴞 𐴑𐴟𐴥𐴐𐴞 𐴀𐴡𐴥.³⁷𐴀𐴠 𐴈𐴡𐴃𐴝𐴤 𐴏𐴡𐴥𐴘𐴧𐴞 𐴊𐴠 𐴑𐴞, ’𐴀𐴠𐴎𐴧𐴡𐴕𐴠 𐴓𐴝𐴒𐴝, 𐴀𐴝𐴌 𐴀𐴠𐴎𐴧𐴡𐴕𐴠 𐴈𐴝𐴍𐴠.‘³⁸𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴥𐴏𐴡𐴓𐴢 𐴀𐴟𐴀𐴙𐴕 𐴈𐴝𐴍𐴞𐴃𐴡𐴥 𐴊𐴞𐴉𐴠𐴍𐴝𐴥𐴘𐴓𐴝𐴔 𐴎𐴞𐴀𐴕𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴔𐴠𐴀𐴕𐴧𐴡𐴃𐴢 𐴕𐴡𐴥 𐴒𐴡𐴌𐴡𐴤; 𐴀𐴡𐴙𐴕𐴧𐴡 𐴔𐴝𐴙𐴕𐴐𐴠𐴥 𐴔𐴠𐴀𐴕𐴧𐴡𐴃𐴢 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌 𐴇𐴠𐴥 𐴔𐴠𐴀𐴕𐴧𐴡𐴃𐴡𐴌 𐴉𐴡𐴥𐴏𐴡𐴓𐴢 𐴈𐴝𐴙𐴄𐴧𐴡𐴥.“

³⁹𐴇𐴠𐴥 𐴔𐴝𐴘𐴝𐴉𐴟𐴖𐴝𐴌 𐴀𐴠 𐴈𐴡𐴃𐴝𐴤 𐴉𐴟𐴥𐴕𐴞 𐴉𐴝𐴌𐴝 𐴇𐴞𐴥𐴘𐴝𐴕𐴡𐴌 𐴁𐴞𐴐𐴞𐴤 𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴑𐴞 𐴈𐴡𐴘𐴓𐴠𐴥, ”𐴀𐴝𐴀𐴛 𐴀𐴝𐴣𐴀𐴌 𐴎𐴞𐴕𐴊𐴞𐴒𐴞𐴃𐴢 𐴎𐴞𐴀𐴕-𐴎𐴞𐴀𐴕 𐴒𐴡𐴙𐴅𐴧𐴞𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴈𐴡𐴘𐴧𐴠𐴥.“⁴⁰𐴎𐴠𐴣𐴃𐴧𐴠𐴥 𐴇𐴠𐴥 𐴏𐴝𐴔𐴝𐴥𐴌𐴞 𐴀𐴡𐴥𐴑𐴧𐴡𐴓𐴢 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥, 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴡 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥𐴓𐴢, 𐴃𐴡𐴥𐴘 𐴀𐴞𐴥𐴁𐴝 𐴇𐴠𐴥𐴍𐴠 𐴊𐴟𐴘 𐴊𐴞𐴕 𐴃𐴝𐴥𐴙𐴑𐴧𐴞𐴓𐴢.⁴¹𐴀𐴞𐴥𐴁𐴝𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴀𐴝𐴌𐴡𐴤 𐴁𐴞𐴐𐴞𐴤 𐴔𐴝𐴙𐴕𐴐𐴠𐴥 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤𐴓𐴢.

⁴²𐴀𐴞𐴥𐴃𐴝𐴌𐴝 𐴔𐴝𐴘𐴝𐴉𐴟𐴖𐴝 𐴖𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴀𐴠𐴇𐴡𐴥𐴕 𐴊𐴠 𐴀𐴝𐴣𐴀𐴌𐴝 𐴃𐴡𐴌 𐴈𐴡𐴃𐴝𐴤𐴌 𐴎𐴡𐴌𐴞𐴘𐴝 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝 𐴕𐴞𐴎𐴠 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴎𐴝𐴕𐴞 𐴉𐴝𐴙𐴅𐴧𐴞𐴥 𐴊𐴠 𐴑𐴞, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴡𐴌 𐴏𐴡𐴥𐴘𐴧𐴞 𐴕𐴠𐴅𐴝𐴃𐴊𐴡𐴘𐴝.“

𐴀𐴠𐴑 𐴐𐴝𐴥𐴀𐴂𐴡𐴌 𐴉𐴟𐴖𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

⁴³𐴊𐴟𐴘 𐴊𐴞𐴕 𐴁𐴝𐴦𐴊𐴠 𐴀𐴞𐴏𐴝𐴤 𐴈𐴠𐴥𐴕𐴃𐴟 𐴌𐴡𐴖𐴝𐴕𐴝 𐴓𐴡𐴘 𐴒𐴝𐴓𐴞𐴓𐴡𐴃𐴢 𐴒𐴞𐴦𐴘𐴠𐴥.⁴⁴𐴀𐴞𐴏𐴝𐴤 𐴕𐴞𐴎𐴠 𐴀𐴝𐴒𐴠 𐴈𐴡𐴀𐴙𐴓𐴢 𐴊𐴠, ”𐴎𐴠 𐴇𐴡𐴕𐴡𐴤 𐴕𐴡𐴁𐴞𐴌 𐴀𐴞𐴎𐴧𐴡𐴃𐴢 𐴕𐴞𐴎𐴡𐴌 𐴖𐴡𐴃𐴡𐴥𐴕𐴡𐴃𐴢 𐴕𐴝𐴥𐴘.“⁴⁵𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴒𐴝𐴓𐴞𐴓𐴡𐴃𐴢 𐴀𐴝𐴙𐴐𐴧𐴠𐴥, 𐴒𐴝𐴓𐴞𐴓𐴡𐴌 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌𐴠 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴏𐴝𐴤𐴘𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴎𐴝𐴊𐴞𐴌-𐴀𐴞𐴊𐴡𐴃𐴢 𐴎𐴠 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴙𐴅𐴧𐴞𐴥𐴓𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴞𐴥𐴃𐴝𐴌𐴝 𐴊𐴠𐴙𐴑𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴘𐴡𐴥 𐴇𐴠𐴥 𐴀𐴞𐴊𐴡𐴃𐴢 𐴒𐴞𐴀𐴓𐴢.

⁴⁶𐴁𐴝𐴦𐴊𐴠 𐴀𐴞𐴥𐴁𐴝 𐴀𐴝𐴁𐴝𐴌 𐴒𐴝𐴓𐴞𐴓𐴡𐴌 𐴑𐴝𐴥𐴕𐴝 𐴉𐴝𐴌𐴝𐴃𐴢 𐴒𐴞𐴦𐴘𐴠𐴥, 𐴎𐴠𐴍𐴠𐴥 𐴀𐴞𐴥𐴁𐴝𐴘𐴠 𐴉𐴝𐴕𐴞𐴥𐴌𐴠 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴁𐴝𐴕𐴝𐴀𐴙𐴓𐴢. 𐴇𐴠𐴥𐴍𐴠 𐴑𐴝𐴂𐴝𐴌𐴕𐴝𐴈𐴟𐴥𐴔 𐴐𐴡𐴥𐴀𐴌𐴡𐴃𐴢 𐴀𐴠𐴑 𐴐𐴝𐴥𐴀𐴂𐴡𐴌 𐴉𐴟𐴖𐴝𐴃𐴧𐴟 𐴀𐴡𐴐𐴟𐴥𐴑 𐴀𐴡𐴥𐴘𐴧𐴠.⁴⁷𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴙𐴕𐴧𐴠 𐴊𐴠 𐴑𐴞, 𐴀𐴞𐴏𐴝𐴤 𐴘𐴡𐴇𐴟𐴥𐴊𐴞𐴘𐴝𐴃𐴧𐴟 𐴒𐴝𐴓𐴞𐴓𐴡𐴃𐴢 𐴀𐴝𐴀𐴘𐴒𐴞𐴘𐴡𐴘, 𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴎𐴝𐴘 𐴀𐴝𐴌𐴡𐴏𐴢 𐴒𐴡𐴌𐴠𐴥𐴌 𐴊𐴠, 𐴘𐴡𐴥𐴒𐴧𐴗𐴝𐴌 𐴉𐴟𐴖𐴝 𐴖𐴝𐴌𐴠 𐴒𐴡𐴔 𐴒𐴡𐴙𐴃𐴧𐴡𐴥 𐴀𐴝𐴘𐴃𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴟𐴖𐴝 𐴖𐴝 𐴔𐴡𐴌𐴡𐴕-𐴔𐴡𐴌𐴡𐴕 𐴀𐴡𐴥𐴀𐴙𐴓𐴢.

⁴⁸𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴠𐴊𐴧𐴠 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴕𐴡 𐴊𐴠𐴑𐴞𐴥𐴓𐴠 𐴁𐴞𐴓𐴑𐴟𐴥𐴓𐴢 𐴀𐴞𐴔𐴝𐴕 𐴕𐴟 𐴀𐴝𐴕𐴞𐴤𐴁𐴝.“

⁴⁹𐴁𐴝𐴀𐴣𐴐𐴧𐴝𐴌 𐴐𐴝𐴥𐴀𐴂𐴠 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴀𐴝𐴣𐴀𐴌 𐴉𐴟𐴖𐴝 𐴖𐴝 𐴔𐴡𐴌𐴞𐴁𐴝𐴥𐴌 𐴀𐴝𐴒𐴠 𐴀𐴝𐴘𐴧𐴡𐴤!“

⁵⁰𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴦𐴒𐴡𐴥𐴘; 𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴁𐴝𐴏𐴞𐴁𐴡𐴥.“𐴁𐴝𐴦𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴞𐴏𐴝𐴤𐴌 𐴈𐴡𐴃𐴝𐴤 𐴀𐴠𐴑𐴞𐴕 𐴒𐴡𐴌𐴞𐴥 𐴒𐴞𐴦𐴘𐴠𐴥𐴒𐴡𐴘.⁵¹𐴘𐴡𐴥𐴒𐴧𐴗𐴝 𐴉𐴡𐴣𐴃𐴡𐴃𐴢 𐴃𐴝𐴥𐴘𐴃𐴠, 𐴕𐴞𐴎𐴡𐴌 𐴇𐴡𐴊𐴟𐴥𐴕 𐴒𐴟𐴓𐴝𐴔𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘!“⁵²𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴉𐴟𐴖𐴝 𐴇𐴡𐴣𐴃𐴧𐴠𐴥 𐴒𐴡𐴔 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝𐴃𐴧𐴟 𐴈𐴡𐴥𐴁𐴡𐴌 𐴓𐴡𐴥𐴘𐴧𐴠. 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴒𐴠𐴓𐴢 𐴊𐴠 𐴇𐴝𐴙𐴓𐴧𐴝 𐴊𐴞𐴕𐴡𐴌 𐴀𐴠𐴒𐴧𐴗𐴝𐴤 𐴁𐴝𐴥𐴎𐴠 𐴀𐴞𐴥𐴃𐴝𐴌 𐴎𐴡𐴌 𐴒𐴞𐴦𐴘𐴡𐴥𐴘.“

⁵³𐴇𐴠𐴥𐴃𐴟𐴕𐴡𐴃𐴢 𐴁𐴝𐴉𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴊𐴠, 𐴏𐴡𐴥𐴘𐴧𐴞 𐴀𐴡𐴣𐴃𐴧𐴠𐴤 𐴉𐴟𐴖𐴝 𐴖𐴝 𐴒𐴡𐴔 𐴀𐴡𐴥𐴘𐴧𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴈𐴡𐴘𐴧𐴠𐴥 𐴊𐴠, ”𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴁𐴝𐴏𐴞𐴁𐴡𐴥.“𐴁𐴝𐴦𐴊𐴠 𐴘𐴡𐴥𐴒𐴧𐴗𐴝 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌 𐴄𐴞𐴥𐴘𐴝𐴘𐴠 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

⁵⁴𐴘𐴝𐴀𐴕 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤𐴌 𐴊𐴟𐴘 𐴕𐴡𐴔𐴁𐴡𐴥𐴌𐴡𐴌 𐴑𐴠𐴌𐴝𐴔𐴡𐴃𐴢, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴘𐴡𐴇𐴟𐴥𐴊𐴞𐴘𐴝𐴃𐴧𐴟 𐴕𐴠𐴦𐴓𐴞 𐴀𐴝𐴁𐴝𐴌 𐴒𐴝𐴓𐴞𐴓𐴡𐴃𐴢 𐴀𐴝𐴀𐴘𐴢 𐴒𐴡𐴙𐴅𐴧𐴠𐴥.

The Word for the World International

https://app.library.bible/content/87faca8b51c22590