Read 𐴘𐴡𐴇𐴝𐴥𐴕𐴧𐴝 3

𐴘𐴡𐴇𐴝𐴥𐴕𐴧𐴝3

𐴀𐴞𐴏𐴝𐴤 𐴀𐴠𐴊𐴧𐴠 𐴕𐴞𐴑𐴡𐴥𐴊𐴠𐴔𐴝𐴏𐴢

¹𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴕𐴞𐴑𐴡𐴥𐴊𐴠𐴔𐴝𐴏𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴕𐴠𐴃𐴝 𐴀𐴝𐴐𐴧𐴞𐴥𐴓𐴢.²𐴀𐴠𐴑 𐴊𐴞𐴕 𐴌𐴝𐴙𐴃𐴧𐴝 𐴘𐴡𐴥𐴒𐴧𐴗𐴝 𐴀𐴞𐴏𐴝𐴤𐴌 𐴇𐴠𐴥𐴍𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴌𐴝𐴁𐴧𐴞𐴥, 𐴀𐴝𐴣𐴀𐴌𐴝 𐴎𐴝𐴕𐴞, 𐴃𐴟𐴀𐴛 𐴀𐴠𐴥𐴎𐴧𐴡𐴕 𐴀𐴟𐴏𐴃𐴝𐴃𐴢 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴙𐴐𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴎𐴠 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴒𐴡𐴌𐴡𐴤, 𐴀𐴝𐴓𐴧𐴝 𐴉𐴟𐴥𐴖𐴝𐴣𐴃𐴞 𐴕𐴡 𐴃𐴝𐴥𐴑𐴞𐴓𐴠 𐴇𐴡𐴕𐴡𐴤𐴑𐴞𐴘𐴠 𐴇𐴞𐴥𐴀𐴕 𐴒𐴡𐴌𐴞𐴥 𐴕𐴡 𐴉𐴝𐴌𐴠.“

³𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴕𐴡𐴘𐴝 𐴒𐴡𐴌𐴞 𐴎𐴡𐴌𐴔𐴡 𐴕𐴡 𐴀𐴡𐴥𐴘𐴓𐴠, 𐴇𐴡𐴕𐴡𐴤𐴑𐴞𐴘𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴊𐴠𐴑𐴞𐴥 𐴕𐴡 𐴉𐴝𐴌𐴠.“

⁴𐴕𐴞𐴑𐴡𐴥𐴊𐴠𐴔𐴝𐴏𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴢 𐴀𐴠𐴥𐴎𐴧𐴡𐴕 𐴁𐴟𐴌𐴝𐴤 𐴀𐴡𐴥𐴘𐴎𐴝𐴒𐴡𐴘, 𐴀𐴞𐴥𐴃𐴠 𐴑𐴠𐴀𐴕𐴒𐴡𐴌𐴞 𐴀𐴝𐴁𐴝𐴌 𐴎𐴡𐴌𐴔𐴡 𐴓𐴡𐴘𐴁𐴡؟ 𐴊𐴟𐴏𐴝𐴥𐴌𐴝𐴁𐴝𐴌 𐴑𐴞𐴥 𐴀𐴞𐴥𐴃𐴠 𐴔𐴝𐴦𐴌 𐴉𐴠𐴍𐴡𐴃𐴢 𐴒𐴡𐴥𐴓𐴞 𐴀𐴝𐴁𐴝𐴌 𐴎𐴡𐴌𐴔𐴡 𐴀𐴡𐴥𐴘 𐴉𐴝𐴌𐴞𐴁𐴡𐴥؟“

⁵𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴉𐴝𐴕𐴞𐴥 𐴀𐴠𐴊𐴧𐴠 𐴌𐴟𐴀𐴃𐴧𐴟 𐴎𐴡𐴌𐴔𐴡 𐴕𐴡 𐴀𐴡𐴥𐴘𐴓𐴠, 𐴇𐴡𐴕𐴡𐴤𐴑𐴞𐴘𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴒𐴡𐴥𐴓𐴞 𐴕𐴡 𐴉𐴝𐴌𐴠.⁶𐴀𐴞𐴕𐴏𐴝𐴥𐴕𐴡𐴃𐴧𐴟 𐴎𐴞𐴀𐴕 𐴎𐴡𐴌𐴔𐴡 𐴀𐴡𐴥 𐴇𐴞𐴥𐴀𐴕 𐴀𐴞𐴕𐴏𐴝𐴥𐴕, 𐴀𐴝𐴦𐴌 𐴌𐴟𐴀𐴃𐴧𐴟 𐴎𐴞𐴀𐴕 𐴎𐴡𐴌𐴔𐴡 𐴀𐴡𐴥 𐴇𐴞𐴥𐴀𐴕 𐴌𐴟𐴀.⁷𐴀𐴝𐴀𐴛 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴣𐴌𐴠 𐴈𐴡𐴘𐴧𐴞𐴥, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴕𐴡𐴘𐴝 𐴒𐴡𐴌𐴞 𐴎𐴡𐴌𐴔𐴡 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥, 𐴇𐴞𐴥𐴘𐴝𐴕 𐴓𐴡𐴥𐴘 𐴀𐴝𐴔𐴧𐴟𐴥𐴑 𐴕𐴡 𐴀𐴡𐴥𐴘𐴧𐴡.⁸𐴁𐴡𐴘𐴧𐴝𐴌 𐴃𐴡 𐴎𐴞𐴑𐴧𐴝𐴥 𐴔𐴡𐴕𐴠𐴈𐴡𐴀 𐴇𐴞𐴥𐴑𐴧𐴝 𐴁𐴝𐴀, 𐴀𐴝𐴦𐴌 𐴃𐴟𐴀𐴛 𐴇𐴠𐴥 𐴁𐴡𐴘𐴧𐴝𐴌𐴡𐴌 𐴀𐴝𐴁𐴝𐴏𐴢 𐴉𐴟𐴥𐴕𐴡, 𐴔𐴡𐴕𐴃𐴡𐴌 𐴇𐴡𐴕𐴃𐴟𐴤 𐴀𐴝𐴘𐴧𐴠𐴤𐴌 𐴀𐴝𐴦𐴌 𐴇𐴡𐴙𐴑𐴧𐴝𐴤 𐴎𐴝𐴦𐴌 𐴇𐴞𐴥𐴘𐴝𐴕 𐴃𐴡 𐴕𐴡 𐴎𐴝𐴕𐴡. 𐴎𐴠𐴃𐴝𐴌𐴝𐴤 𐴌𐴟𐴀𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴧𐴠 𐴀𐴞𐴥𐴃𐴝𐴌𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝.“

⁹𐴕𐴞𐴑𐴡𐴥𐴊𐴠𐴔𐴝𐴏𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴞𐴀𐴕 𐴑𐴠𐴀𐴕𐴒𐴡𐴌𐴞 𐴀𐴡𐴥𐴘 𐴉𐴝𐴌𐴠؟“

¹⁰𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴊𐴠 𐴀𐴠𐴥𐴎𐴧𐴡𐴕 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴀𐴟𐴏𐴃𐴝𐴃𐴢, 𐴃𐴡𐴀 𐴃𐴟𐴀𐴛 𐴀𐴞𐴀𐴕 𐴕𐴡 𐴁𐴟𐴎𐴡𐴥 𐴊𐴠𐴥؟¹¹𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴝𐴣𐴀𐴌𐴝 𐴎𐴞𐴀𐴕 𐴎𐴝𐴕𐴞 𐴇𐴞𐴥𐴀𐴕 𐴈𐴡𐴀𐴘𐴢, 𐴀𐴝𐴦𐴌 𐴎𐴞𐴀𐴕 𐴊𐴠𐴙𐴑𐴧𐴞𐴥 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤 𐴊𐴞𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌 𐴒𐴡𐴁𐴝𐴤𐴌𐴠 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴡𐴤.¹²𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴊𐴟𐴕𐴞𐴘𐴝𐴘𐴁𐴞 𐴅𐴞𐴕𐴞𐴥𐴐𐴡𐴌 𐴈𐴡𐴃𐴝𐴤 𐴈𐴡𐴘𐴓𐴠𐴥 𐴎𐴠𐴃𐴧𐴡𐴥𐴃𐴢 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴡𐴤, 𐴃𐴡𐴥𐴘 𐴀𐴝𐴏𐴔𐴝𐴕𐴞 𐴅𐴞𐴕𐴞𐴥𐴐𐴡𐴌 𐴈𐴡𐴃𐴝𐴤 𐴈𐴡𐴘𐴓𐴠𐴥 𐴑𐴠𐴀𐴕𐴒𐴡𐴌𐴞 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥𐴁𐴝؟¹³𐴎𐴞𐴁𐴝𐴤 𐴀𐴝𐴏𐴔𐴝𐴕𐴡𐴃𐴢 𐴃𐴝𐴥𐴑𐴠 𐴀𐴝𐴦𐴌 𐴀𐴝𐴏𐴔𐴝𐴕𐴡𐴃𐴧𐴟 𐴓𐴝𐴔𐴞 𐴀𐴝𐴙𐴐𐴧𐴠𐴥, 𐴇𐴠𐴥 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴏𐴝𐴥𐴌𐴝 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴀𐴝𐴏𐴔𐴝𐴕𐴡𐴃𐴢 𐴕𐴡𐴥 𐴀𐴟𐴍𐴠𐴤.¹⁴𐴔𐴟𐴀𐴏𐴝𐴘𐴠 𐴎𐴠𐴕𐴊𐴞𐴓𐴧𐴝 𐴔𐴡𐴘𐴊𐴝𐴕 𐴀𐴠𐴓𐴝𐴑𐴝𐴃𐴢 𐴇𐴝𐴥𐴉𐴡𐴌𐴠 𐴖𐴡𐴌𐴠 𐴃𐴟𐴙𐴓𐴧𐴞𐴥𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴘𐴡𐴥 𐴖𐴡𐴌𐴠 𐴃𐴟𐴓𐴝𐴤 𐴎𐴝𐴘𐴁𐴡,¹⁵𐴎𐴠𐴀𐴕𐴠 𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴀𐴞𐴥𐴃𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴉𐴝𐴦.

¹⁶”𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌𐴠 𐴀𐴠𐴃𐴡𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴠𐴥, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴓𐴠𐴇𐴝𐴥𐴌 𐴀𐴠𐴑 𐴉𐴟𐴖𐴝 𐴊𐴝𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠; 𐴎𐴠𐴀𐴕𐴠 𐴎𐴠𐴦 𐴑𐴞𐴘𐴠𐴥 𐴇𐴠𐴥 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴘𐴡𐴥𐴒𐴧𐴗𐴝 𐴕𐴝𐴐𐴢 𐴕𐴡, 𐴁𐴡𐴥𐴓𐴑𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴉𐴝𐴦.¹⁷𐴀𐴝𐴓𐴧𐴝𐴘𐴠 𐴃𐴡 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌 𐴈𐴡𐴏𐴟𐴥𐴌𐴞 𐴊𐴡𐴥𐴙𐴃𐴧𐴡 𐴕𐴞𐴎𐴡𐴌 𐴉𐴟𐴖𐴝𐴌𐴠 𐴊𐴟𐴕𐴞𐴘𐴝𐴙𐴃𐴢 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴠𐴃𐴡𐴓𐴧𐴝𐴤 𐴊𐴞𐴉𐴠𐴍𐴝𐴥𐴘𐴧𐴠, 𐴎𐴠𐴀𐴕𐴠 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴠𐴥 𐴇𐴠𐴥 𐴉𐴟𐴖𐴝𐴌 𐴊𐴟𐴖𐴝𐴌𐴝 𐴕𐴠𐴅𐴝𐴃𐴢 𐴉𐴝.

¹⁸”𐴎𐴠𐴦𐴕𐴞𐴑𐴞 𐴇𐴠𐴥 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴀𐴞𐴥𐴃𐴝𐴌 𐴈𐴡𐴏𐴟𐴥𐴌 𐴊𐴡𐴥𐴌𐴝 𐴕𐴡 𐴎𐴝; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴞𐴔𐴝𐴕 𐴕𐴟 𐴀𐴝𐴕𐴠𐴤, 𐴀𐴞𐴥𐴃𐴝𐴌 𐴈𐴡𐴏𐴟𐴥𐴌 𐴀𐴝𐴒𐴠 𐴓𐴡𐴥𐴃𐴞 𐴊𐴡𐴥𐴌𐴝 𐴒𐴞𐴥𐴘𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴊𐴠 𐴀𐴝𐴓𐴧𐴝𐴌 𐴏𐴞𐴌𐴞𐴥𐴉𐴢 𐴀𐴠𐴑 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤.¹⁹𐴀𐴞𐴥𐴃𐴝𐴌 𐴈𐴡𐴏𐴟𐴥𐴌 𐴀𐴠𐴃𐴡𐴓𐴧𐴝𐴤 𐴁𐴡𐴥𐴓𐴞 𐴊𐴡𐴥𐴌𐴝 𐴒𐴞𐴥𐴘𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴟𐴕𐴞𐴘𐴝𐴙𐴃𐴢 𐴕𐴟𐴌 𐴀𐴝𐴙𐴐𐴧𐴞𐴤𐴓𐴢, 𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴈𐴝𐴔 𐴈𐴡𐴥𐴌𐴝𐴉𐴢 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴞𐴥𐴃𐴝𐴌𐴝 𐴕𐴟𐴌𐴡𐴌 𐴃𐴟𐴥𐴖𐴝𐴌𐴡 𐴀𐴝𐴕𐴊𐴝𐴤𐴌𐴡𐴌𐴠 𐴁𐴞𐴐𐴞𐴤 𐴉𐴡𐴏𐴡𐴥𐴕 𐴒𐴡𐴙𐴅𐴧𐴠𐴥.²⁰𐴎𐴠𐴦𐴕𐴞𐴑𐴞 𐴈𐴡𐴥𐴌𐴝𐴉𐴢 𐴈𐴝𐴔 𐴒𐴡𐴌𐴠𐴥, 𐴀𐴞𐴥𐴃𐴠 𐴕𐴟𐴌𐴡𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴠𐴥 𐴀𐴝𐴦𐴌 𐴀𐴞𐴥𐴃𐴠 𐴕𐴟𐴌𐴡𐴃𐴢 𐴕𐴟 𐴀𐴝𐴘𐴧𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴀𐴝𐴘𐴓𐴠𐴤 𐴀𐴞𐴥𐴃𐴝𐴌 𐴈𐴡𐴥𐴌𐴝𐴉𐴞 𐴊𐴝𐴈𐴝𐴤 𐴎𐴝𐴘𐴁𐴡 𐴁𐴡𐴓𐴞 𐴋𐴡𐴦𐴌𐴝.²¹𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴏𐴡𐴥𐴘𐴧𐴞 𐴒𐴝𐴥𐴕 𐴒𐴡𐴌𐴞𐴥 𐴎𐴞𐴕𐴊𐴞𐴒𐴞 𐴈𐴝𐴍𐴝, 𐴀𐴞𐴥𐴃𐴠 𐴕𐴟𐴌𐴡𐴃𐴢 𐴀𐴝𐴘𐴧𐴠𐴤, 𐴎𐴠𐴀𐴕𐴠 𐴀𐴞𐴥𐴃𐴝𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴞𐴥𐴘𐴝𐴕 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴊𐴝𐴈𐴝𐴤 𐴎𐴝.“

𐴀𐴞𐴏𐴝𐴤 𐴀𐴠𐴊𐴧𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝

²²𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴃𐴢 𐴒𐴞𐴦𐴘𐴠𐴥. 𐴇𐴠𐴥𐴍𐴠 𐴀𐴞𐴥𐴁𐴝 𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴇𐴡𐴦𐴊𐴧𐴞𐴕 𐴃𐴝𐴥𐴙𐴑𐴧𐴞𐴓𐴢, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴓𐴢.

²³𐴇𐴠𐴥𐴣𐴃𐴧𐴠 𐴏𐴝𐴥𐴓𐴞𐴔 𐴎𐴝𐴒𐴝𐴌 𐴋𐴝𐴥𐴑𐴠 𐴀𐴝𐴘𐴕𐴡𐴕 𐴕𐴝𐴔𐴡𐴌 𐴀𐴠𐴑 𐴉𐴝𐴌𐴝𐴃𐴢 𐴘𐴝𐴇𐴝𐴥𐴘𐴝 𐴘𐴡𐴥 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴎𐴝𐴒𐴝𐴃𐴢 𐴁𐴞𐴐𐴞𐴤 𐴉𐴝𐴕𐴞𐴥 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴝𐴀𐴘𐴢 𐴀𐴞𐴥𐴁𐴝𐴃𐴧𐴟 𐴁𐴝𐴥𐴂𐴄𐴞𐴏𐴔𐴝 𐴓𐴡𐴖𐴝𐴃𐴢 𐴀𐴝𐴐𐴧𐴞𐴥𐴓𐴢.²⁴𐴘𐴝𐴇𐴝𐴥𐴘𐴝𐴌𐴠 𐴇𐴠𐴥 𐴀𐴡𐴑𐴃𐴡𐴥𐴃𐴢 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴘𐴝 𐴕𐴡𐴥 𐴎𐴝.

²⁵𐴀𐴠𐴑 𐴊𐴞𐴕 𐴘𐴝𐴇𐴝𐴥𐴘𐴝𐴌 𐴇𐴡𐴦𐴎𐴧𐴡𐴕 𐴀𐴟𐴔𐴧𐴡𐴃𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴟𐴎𐴟 𐴁𐴝𐴕𐴝𐴌 𐴁𐴝𐴦𐴁𐴟𐴃𐴠 𐴃𐴡𐴌𐴑𐴝𐴃𐴡𐴌𐴑𐴞 𐴊𐴞𐴘𐴠𐴥.²⁶𐴀𐴞𐴥𐴃𐴝𐴌𐴝 𐴘𐴝𐴇𐴝𐴥𐴘𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴌𐴝𐴁𐴧𐴞𐴥, 𐴎𐴞𐴁𐴝𐴤 𐴅𐴡𐴌𐴊𐴝𐴥𐴕 𐴇𐴝𐴥𐴓𐴡𐴌 𐴉𐴝𐴌𐴑𐴟𐴓𐴠 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴃𐴟𐴀𐴛 𐴒𐴡𐴁𐴝𐴤 𐴊𐴞𐴥𐴓𐴝, 𐴏𐴡𐴀, 𐴀𐴞𐴥𐴁𐴝𐴘𐴠 𐴁𐴝𐴥𐴂𐴄𐴞𐴏𐴔𐴝 𐴊𐴠𐴌, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴘𐴧𐴠𐴤𐴌.“

²⁷𐴘𐴝𐴇𐴝𐴥𐴘𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴏𐴔𐴝𐴕𐴡𐴃𐴧𐴟 𐴊𐴞𐴦𐴘𐴝 𐴕𐴡 𐴒𐴞𐴓𐴠𐴥 𐴇𐴡𐴕𐴡𐴤𐴑𐴞𐴘𐴠 𐴑𐴠𐴏𐴧𐴟𐴥 𐴉𐴝𐴘 𐴕𐴡 𐴉𐴝𐴌𐴠.²⁸𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴃𐴡 𐴀𐴝𐴣𐴀𐴌 𐴀𐴠 𐴈𐴡𐴃𐴝𐴤𐴌 𐴒𐴡𐴁𐴝𐴤 𐴀𐴝𐴏𐴡𐴤, 𐴑𐴞 𐴈𐴡𐴘𐴓𐴠𐴥, ’𐴀𐴝𐴀𐴛 𐴔𐴡𐴀𐴏𐴞𐴤 𐴕𐴡, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴀𐴞𐴥𐴁𐴝𐴌 𐴀𐴝𐴒𐴠 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠.‘²⁹𐴎𐴝𐴌 𐴀𐴝𐴥𐴃𐴡𐴃𐴢 𐴊𐴟𐴓𐴞𐴥𐴌𐴠 𐴃𐴟𐴓𐴞𐴤𐴊𐴞𐴘𐴝 𐴒𐴞𐴥𐴘𐴠 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴊𐴟𐴓𐴝𐴤. 𐴊𐴟𐴓𐴝𐴤𐴌 𐴊𐴟𐴏𐴃𐴡𐴥𐴘𐴠 𐴃𐴡 𐴃𐴞𐴥𐴘𐴝𐴘 𐴊𐴟𐴓𐴝𐴤𐴌 𐴈𐴡𐴃𐴝𐴤 𐴉𐴟𐴥𐴕𐴠, 𐴀𐴝𐴦𐴌 𐴊𐴟𐴓𐴝𐴤𐴌 𐴀𐴝𐴁𐴝𐴏𐴢 𐴉𐴟𐴥𐴕𐴞 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥. 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴘𐴝𐴓𐴝 𐴀𐴝𐴣𐴀𐴌 𐴑𐴟𐴥𐴐𐴞 𐴘𐴡𐴥 𐴉𐴟𐴌𐴝 𐴀𐴡𐴥𐴘𐴧𐴠.³⁰𐴁𐴠𐴐𐴡𐴥𐴑 𐴀𐴞𐴥𐴁𐴝𐴃𐴧𐴟 𐴋𐴡𐴣𐴀𐴌 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴐𐴡𐴥𐴣𐴍𐴡 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥.

𐴀𐴝𐴏𐴔𐴝𐴕𐴡𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴀𐴞𐴥𐴁𐴝

³¹”𐴎𐴞𐴁𐴝𐴤 𐴖𐴡𐴃𐴧𐴟𐴥 𐴀𐴝𐴙𐴐𐴧𐴠𐴥, 𐴀𐴞𐴥𐴁𐴝 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠; 𐴎𐴞𐴁𐴝𐴤 𐴊𐴟𐴕𐴞𐴘𐴝𐴘 𐴃𐴧𐴟, 𐴀𐴞𐴥𐴁𐴝 𐴊𐴟𐴕𐴞𐴘𐴝𐴙𐴌, 𐴀𐴝𐴦𐴌 𐴊𐴟𐴕𐴞𐴘𐴝𐴘𐴁𐴞 𐴈𐴡𐴃𐴝𐴤 𐴈𐴡𐴀. 𐴔𐴡𐴕𐴃𐴡𐴌 𐴎𐴞𐴁𐴝𐴤 𐴀𐴝𐴏𐴔𐴝𐴕𐴡𐴃𐴧𐴟 𐴀𐴝𐴙𐴐𐴧𐴠𐴥, 𐴀𐴞𐴥𐴁𐴝 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠.³²𐴀𐴞𐴥𐴁𐴝𐴘𐴠 𐴎𐴞𐴀𐴕 𐴊𐴠𐴙𐴑𐴧𐴠𐴥 𐴀𐴠𐴊𐴧𐴠 𐴉𐴟𐴥𐴙𐴕𐴧𐴠 𐴇𐴞𐴥𐴀𐴕𐴡𐴌 𐴒𐴡𐴁𐴝𐴤 𐴊𐴠𐴥, 𐴃𐴡𐴀 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴁𐴝𐴌 𐴒𐴡𐴁𐴝𐴤 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥.³³𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴠 𐴀𐴠 𐴈𐴡𐴃𐴝𐴤𐴃𐴢 𐴔𐴡𐴀𐴌 𐴓𐴝𐴒𐴝𐴘𐴉𐴠𐴥𐴓𐴝𐴘𐴧𐴠 𐴊𐴠 𐴑𐴞, 𐴀𐴝𐴓𐴧𐴝 𐴀𐴡𐴥𐴙𐴓𐴊𐴠 𐴏𐴡𐴥𐴘𐴧𐴞.³⁴𐴎𐴞𐴁𐴝𐴤𐴌𐴠 𐴀𐴝𐴓𐴧𐴝𐴘𐴠 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴀𐴝𐴓𐴧𐴝𐴌 𐴈𐴡𐴃𐴝𐴤 𐴈𐴡𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴃𐴡 𐴔𐴝𐴉𐴞-𐴔𐴝𐴉𐴞 𐴌𐴟𐴀 𐴕𐴡 𐴊𐴠𐴦.³⁵𐴁𐴝𐴉𐴠 𐴉𐴟𐴖𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴝𐴦𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴞𐴥𐴁𐴝𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴘𐴠.³⁶𐴎𐴠𐴦𐴕𐴞𐴑𐴞 𐴇𐴠𐴥 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴀𐴞𐴥𐴃𐴝𐴃𐴧𐴟 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴀𐴝𐴏𐴠𐴤; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴇𐴠𐴥 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟 𐴀𐴝𐴕𐴠𐴤, 𐴀𐴞𐴥𐴃𐴠 𐴇𐴠𐴥 𐴎𐴞𐴕𐴊𐴞𐴒𐴞 𐴕𐴡 𐴊𐴠𐴑𐴞𐴥𐴁𐴡, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌 𐴖𐴡𐴌𐴠 𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴢 𐴀𐴝𐴏𐴠𐴤.“

The Word for the World International

https://app.library.bible/content/87faca8b51c22590