Read 𐴘𐴡𐴇𐴝𐴥𐴕𐴧𐴝 2

𐴘𐴡𐴇𐴝𐴥𐴕𐴧𐴝2

𐴑𐴝𐴥𐴕𐴝 𐴉𐴝𐴌𐴝𐴃𐴢 𐴔𐴝𐴎𐴠 𐴁𐴡𐴘𐴌𐴝𐴃𐴢

¹𐴃𐴞𐴕 𐴊𐴞𐴕𐴡𐴃𐴢 𐴊𐴞𐴕 𐴒𐴝𐴓𐴞𐴓𐴡𐴌 𐴑𐴝𐴥𐴕𐴝 𐴉𐴝𐴌𐴝𐴃𐴢 𐴀𐴠𐴑𐴧𐴝𐴥𐴕 𐴁𐴡𐴘𐴌𐴝𐴃𐴢 𐴀𐴡𐴥𐴘𐴧𐴠. 𐴀𐴞𐴏𐴝𐴤𐴌 𐴔𐴝𐴦 𐴇𐴠𐴥𐴍𐴠 𐴀𐴝𐴐𐴧𐴞𐴥𐴓𐴢.²𐴇𐴠𐴥 𐴁𐴡𐴘𐴌𐴝𐴃𐴡𐴃𐴢 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴘𐴡𐴥 𐴊𐴝𐴖𐴡𐴃𐴢 𐴊𐴞𐴘𐴠𐴥.³𐴎𐴠𐴣𐴃𐴧𐴠𐴥 𐴇𐴠𐴥𐴍𐴠 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴉𐴟𐴥𐴌𐴝𐴘𐴒𐴞𐴘𐴡𐴘, 𐴀𐴞𐴏𐴝𐴤𐴌 𐴔𐴝𐴦𐴘𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴞𐴃𐴝𐴌𐴝𐴤𐴃𐴧𐴟 𐴀𐴝𐴌 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴕𐴝𐴥𐴘.“

⁴𐴀𐴞𐴏𐴝𐴤𐴘𐴠 𐴔𐴝𐴦𐴌𐴠 𐴈𐴡𐴀𐴌 𐴊𐴠, ”𐴔𐴝𐴀, 𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴃𐴟𐴀𐴛 𐴓𐴡𐴥𐴘 𐴀𐴝𐴀𐴛 𐴓𐴡𐴥𐴘 𐴑𐴞𐴦 𐴁𐴝𐴎𐴝𐴥 𐴀𐴝𐴏𐴠𐴤؟ 𐴀𐴝𐴣𐴀𐴌 𐴀𐴡𐴑𐴃𐴡𐴥 𐴊𐴠 𐴀𐴝𐴙𐴅𐴧𐴡𐴤 𐴕𐴟𐴥 𐴀𐴝𐴘𐴧𐴠𐴤.“

⁵𐴀𐴞𐴏𐴝𐴤𐴌 𐴔𐴝𐴦𐴘𐴠 𐴈𐴝𐴥𐴀𐴊𐴠𐴔 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴀𐴕 𐴒𐴡𐴙𐴃𐴧𐴡𐴥 𐴈𐴡𐴀, 𐴇𐴞𐴥𐴀𐴕 𐴒𐴡𐴙𐴅𐴧𐴡𐴥.“

⁶𐴘𐴡𐴇𐴟𐴥𐴊𐴞𐴌 𐴐𐴡𐴥𐴌𐴞𐴘𐴡𐴃𐴢 𐴔𐴡𐴎𐴞𐴕 𐴀𐴟𐴎𐴟 𐴁𐴝𐴕𐴝𐴘 𐴁𐴡𐴓𐴧𐴝 𐴇𐴠𐴥𐴍𐴠 𐴉𐴝𐴃𐴧𐴡𐴥𐴌𐴡𐴌 𐴏𐴡𐴥 𐴖𐴝 𐴏𐴞𐴘𐴟𐴤 𐴁𐴟𐴀𐴝𐴥𐴒𐴝𐴌𐴝𐴘𐴧𐴝 𐴀𐴝𐴐𐴧𐴞𐴥𐴓𐴢, 𐴇𐴞𐴥𐴀𐴕 𐴀𐴠𐴑𐴒𐴗𐴝𐴥𐴃𐴢 𐴔𐴝𐴥𐴎𐴠 𐴑𐴟𐴌𐴞𐴃𐴧𐴟 𐴃𐴞𐴌𐴞𐴥𐴐𐴢 𐴒𐴠𐴓𐴡𐴥𐴔 𐴉𐴡𐴙𐴅𐴧𐴡𐴕𐴃𐴡 𐴉𐴝𐴕𐴞𐴥 𐴀𐴝𐴣𐴍𐴞𐴃𐴡𐴤.

⁷𐴀𐴞𐴏𐴝𐴤𐴘𐴠 𐴈𐴝𐴥𐴀𐴊𐴠𐴔 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴠 𐴏𐴞𐴘𐴟𐴤 𐴒𐴟𐴥𐴕𐴡𐴃𐴢 𐴉𐴝𐴕𐴞𐴥 𐴁𐴡𐴥𐴌𐴡.“𐴃𐴡𐴥𐴘 𐴀𐴞𐴥𐴃𐴝𐴌𐴝 𐴇𐴞𐴥𐴀𐴕𐴡𐴃𐴢 𐴄𐴞𐴂𐴢-𐴄𐴞𐴂𐴢 𐴉𐴝𐴕𐴞𐴥 𐴁𐴡𐴥𐴙𐴅𐴧𐴠.

⁸𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴘𐴝𐴓𐴝 𐴀𐴠𐴕𐴃𐴟𐴥 𐴇𐴡𐴊𐴟𐴥𐴕 𐴓𐴡𐴦𐴘𐴢 𐴁𐴡𐴘𐴌𐴝𐴙𐴃𐴧𐴝 𐴈𐴝𐴥𐴕𐴝𐴌 𐴎𐴞𐴔𐴧𐴝𐴊𐴝𐴌𐴡𐴌𐴠 𐴊𐴡𐴦𐴒𐴡𐴥𐴘.“
𐴃𐴡𐴥𐴘 𐴀𐴞𐴥𐴃𐴝𐴌𐴝 𐴓𐴡𐴘𐴒𐴞𐴘𐴠𐴥.⁹𐴎𐴠 𐴉𐴝𐴕𐴞𐴥 𐴒𐴟𐴥𐴕 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴁𐴡𐴕𐴞𐴒𐴞𐴘𐴡𐴥𐴘, 𐴇𐴞𐴥𐴀𐴕 𐴇𐴠𐴥 𐴎𐴞𐴔𐴧𐴝𐴊𐴝𐴌𐴒𐴗𐴝𐴥𐴘𐴠 𐴈𐴝𐴥𐴘𐴏𐴝𐴘 𐴁𐴝𐴦𐴊𐴠 𐴊𐴟𐴓𐴝𐴤𐴌𐴠 𐴔𐴝𐴃𐴝𐴘𐴧𐴠𐴥. 𐴘𐴡𐴥𐴒𐴧𐴗𐴝𐴘𐴠 𐴇𐴠𐴥 𐴀𐴝𐴚𐴒𐴟𐴌𐴡𐴌 𐴌𐴡𐴐𐴧𐴟𐴥𐴕 𐴇𐴡𐴕𐴃𐴟𐴤 𐴀𐴝𐴙𐴐𐴧𐴠𐴥 𐴇𐴡𐴘 𐴕𐴡 𐴉𐴝𐴌𐴠, 𐴔𐴡𐴕𐴃𐴡𐴌 𐴒𐴡𐴗𐴀𐴌 𐴎𐴠𐴃𐴝𐴌𐴝𐴤 𐴉𐴝𐴕𐴞𐴥 𐴀𐴝𐴙𐴕𐴧𐴠𐴤 𐴀𐴞𐴥𐴃𐴝𐴌𐴝 𐴇𐴡𐴘 𐴉𐴝𐴌𐴠.¹⁰𐴘𐴡𐴥𐴒𐴧𐴗𐴝𐴘𐴠 𐴊𐴟𐴓𐴝𐴤𐴌𐴠 𐴈𐴡𐴀𐴌 𐴊𐴠, ”𐴉𐴡𐴃𐴧𐴞𐴥 𐴔𐴝𐴙𐴕𐴐𐴠𐴥 𐴊𐴠 𐴀𐴝𐴒𐴠 𐴒𐴡𐴔 𐴀𐴝𐴚𐴒𐴟𐴌𐴡𐴌 𐴌𐴡𐴐𐴧𐴟𐴥𐴕 𐴈𐴝𐴥𐴁𐴝𐴘𐴉𐴠𐴓𐴝, 𐴀𐴝𐴦𐴌 𐴔𐴠𐴀𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴔𐴡𐴕 𐴔𐴡𐴎𐴞𐴕 𐴈𐴝𐴥𐴘𐴧𐴝 𐴀𐴡𐴥𐴘𐴓𐴠 𐴁𐴝𐴦𐴊𐴠 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴈𐴡𐴥𐴌𐴝𐴉𐴢 𐴉𐴞𐴕 𐴈𐴝𐴥𐴀𐴁𐴝. 𐴔𐴡𐴕𐴃𐴡𐴌 𐴃𐴟𐴀𐴛 𐴀𐴝𐴙𐴅𐴧𐴡𐴤 𐴒𐴡𐴔 𐴀𐴝𐴚𐴒𐴟𐴌𐴡𐴌 𐴌𐴡𐴐𐴧𐴟𐴥𐴕 𐴌𐴝𐴑𐴞𐴥𐴊𐴞𐴘𐴡.“

¹¹𐴒𐴝𐴓𐴞𐴓𐴡𐴌 𐴑𐴝𐴥𐴕𐴝 𐴉𐴝𐴌𐴝𐴃𐴢 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴞𐴥𐴏𐴝𐴉𐴠 𐴀𐴠 𐴉𐴡𐴀𐴘𐴓𐴝 𐴐𐴟𐴥𐴌𐴟𐴌 𐴑𐴠𐴌𐴝𐴔𐴡𐴃𐴢 𐴃𐴝𐴥𐴕 𐴒𐴡𐴌𐴞𐴥 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴒𐴡𐴙𐴅𐴧𐴠𐴥. 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

¹²𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤, 𐴀𐴞𐴏𐴝𐴤𐴌 𐴔𐴝𐴦, 𐴁𐴝𐴥𐴘𐴧𐴝𐴙𐴕, 𐴀𐴠𐴊𐴧𐴠 𐴐𐴝𐴥𐴌𐴞𐴃𐴧𐴟𐴕 𐴕𐴞𐴏𐴠 𐴑𐴝𐴂𐴝𐴌𐴕𐴝𐴈𐴟𐴥𐴔 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴠𐴥; 𐴀𐴞𐴥𐴃𐴝𐴌𐴝 𐴇𐴠𐴥𐴍𐴠 𐴇𐴡𐴦𐴊𐴧𐴞𐴕 𐴃𐴝𐴥𐴙𐴑𐴧𐴞𐴓𐴢.

𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴂𐴝𐴑-𐴏𐴝𐴥𐴉𐴢 𐴒𐴡𐴙𐴅𐴧𐴠𐴥

¹³𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴀𐴝𐴎𐴝𐴊𐴞𐴌-𐴀𐴞𐴊𐴢 𐴎𐴠𐴣𐴃𐴧𐴠𐴥 𐴋𐴝𐴥𐴑𐴠 𐴀𐴝𐴙𐴐𐴧𐴠𐴥, 𐴀𐴞𐴏𐴝𐴤 𐴖𐴡𐴌𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴞𐴦𐴘𐴠𐴥.¹⁴𐴀𐴝𐴦𐴌 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴔𐴝𐴎𐴠𐴥 𐴀𐴞𐴥𐴁𐴝𐴘𐴠 𐴊𐴠𐴑𐴠𐴥𐴌 𐴊𐴠, 𐴔𐴝𐴙𐴕𐴐𐴠𐴥 𐴒𐴡𐴌𐴟, 𐴁𐴠𐴥𐴌𐴝𐴏𐴡𐴥𐴀𐴓𐴢, 𐴀𐴠𐴊𐴧𐴠 𐴈𐴡𐴘𐴃𐴡𐴌 𐴀𐴡𐴥𐴑𐴧𐴡𐴓𐴢 𐴁𐴠𐴏𐴠𐴌, 𐴀𐴝𐴦𐴌 𐴇𐴡𐴊𐴟𐴥𐴕𐴠 𐴁𐴡𐴀𐴘𐴢 𐴁𐴝𐴄𐴧𐴝 𐴁𐴝𐴥𐴚𐴒𐴠𐴌.¹⁵𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴌𐴡𐴏𐴞𐴥 𐴓𐴡𐴥𐴘 𐴀𐴠𐴑𐴧𐴝𐴥𐴕 𐴐𐴡𐴀𐴣𐴑 𐴁𐴝𐴕𐴝𐴘 𐴀𐴞𐴥𐴃𐴝𐴌𐴝𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴧𐴟 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴠𐴊𐴧𐴠 𐴒𐴡𐴌𐴟 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴓𐴡𐴦𐴌𐴝𐴘𐴊𐴞𐴘𐴠. 𐴀𐴞𐴥𐴁𐴝𐴘𐴠 𐴁𐴝𐴄𐴧𐴝 𐴁𐴝𐴥𐴚𐴒𐴡𐴘𐴝 𐴀𐴡𐴥𐴑𐴧𐴡𐴓𐴡𐴌 𐴄𐴠𐴁𐴞𐴥𐴓𐴢 𐴕𐴝𐴃𐴋𐴞𐴘𐴝𐴒𐴝𐴌𐴝𐴘𐴊𐴞 𐴀𐴞𐴥𐴃𐴝𐴌𐴝𐴌 𐴄𐴞𐴛𐴝-𐴉𐴡𐴘𐴐𐴝𐴤 𐴐𐴞𐴥𐴣𐴍𐴝𐴐𐴞𐴄𐴧𐴝𐴤 𐴒𐴡𐴌𐴞𐴥𐴊𐴞𐴘𐴠.¹⁶𐴎𐴠𐴃𐴝𐴌𐴝𐴤 𐴈𐴡𐴘𐴃𐴡𐴌 𐴁𐴠𐴏𐴠𐴌, 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴠𐴕𐴃𐴟𐴥 𐴀𐴞𐴀𐴕 𐴓𐴡𐴘𐴎𐴡𐴒𐴡𐴥𐴘! 𐴀𐴝𐴣𐴀𐴌 𐴁𐴝𐴉𐴡𐴌 𐴒𐴡𐴥𐴌𐴡𐴌𐴠 𐴁𐴝𐴎𐴝𐴌 𐴕𐴡 𐴁𐴝𐴕𐴝𐴘𐴧𐴡𐴥!“¹⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴂𐴝𐴑-𐴑𐴝𐴓𐴝𐴔𐴡𐴌 𐴀𐴠 𐴈𐴡𐴃𐴝𐴤 𐴔𐴡𐴕𐴡𐴃𐴢 𐴀𐴟𐴙𐴄𐴧𐴠𐴥, ”𐴃𐴟𐴣𐴀𐴝𐴥𐴣𐴌 𐴒𐴡𐴥𐴌𐴡𐴌 𐴔𐴟𐴇𐴝𐴥𐴁𐴧𐴡𐴃𐴠 𐴀𐴝𐴣𐴀𐴌𐴠𐴥 𐴈𐴝𐴥𐴘𐴉𐴠𐴓𐴝𐴘𐴁𐴡.“

¹⁸𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴣𐴃𐴧𐴟 𐴀𐴞𐴀𐴕 𐴒𐴡𐴌𐴞𐴥𐴁𐴝𐴌 𐴀𐴝𐴊𐴞𐴥𐴑𐴝𐴌 𐴀𐴝𐴏𐴠𐴤 𐴊𐴠 𐴇𐴞𐴥𐴘𐴝𐴕, 𐴃𐴟𐴀𐴛 𐴀𐴝𐴣𐴀𐴌𐴝𐴌𐴠 𐴑𐴞𐴦 𐴑𐴠𐴌𐴝𐴔𐴡𐴃𐴢 𐴊𐴝𐴈𐴝𐴤𐴘 𐴏𐴝𐴥𐴁𐴟𐴃𐴢 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥؟“

¹⁹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴘𐴝𐴀𐴕 𐴁𐴝𐴥𐴚𐴒𐴞𐴉𐴠𐴓𐴡, 𐴀𐴝𐴀𐴛 𐴃𐴞𐴕 𐴊𐴞𐴕𐴡𐴌 𐴁𐴟𐴥𐴃𐴡𐴌𐴠 𐴁𐴝𐴕𐴝𐴘𐴊𐴞𐴘𐴟𐴔.“

²⁰𐴘𐴡𐴇𐴟𐴥𐴊𐴞 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴘𐴝𐴀𐴕 𐴁𐴝𐴕𐴝𐴘𐴃𐴠𐴥 𐴏𐴝𐴓𐴞𐴐𐴢-𐴏𐴡𐴥 𐴁𐴡𐴏𐴡𐴥𐴌 𐴓𐴝𐴙𐴒𐴧𐴠𐴥, 𐴀𐴝𐴦𐴌 𐴃𐴟𐴀𐴛 𐴃𐴞𐴕 𐴊𐴞𐴕𐴡𐴌 𐴁𐴟𐴥𐴃𐴡𐴌𐴠 𐴁𐴝𐴕𐴝𐴘 𐴊𐴞𐴁𐴝 𐴊𐴠𐴥؟“²¹𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴝𐴎𐴝𐴥 𐴊𐴞𐴥 𐴀𐴞𐴥𐴁𐴝𐴌 𐴕𐴞𐴎𐴡𐴌 𐴒𐴝𐴦𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥 𐴊𐴠.²²𐴇𐴠𐴥𐴃𐴡𐴓𐴧𐴝 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠 𐴈𐴡𐴃𐴝𐴤 𐴔𐴡𐴕𐴡𐴃𐴢 𐴀𐴟𐴙𐴄𐴧𐴠𐴥. 𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴂𐴝𐴑-𐴑𐴝𐴓𐴝𐴔 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴇𐴠𐴥 𐴈𐴡𐴃𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

𐴀𐴞𐴏𐴝𐴤𐴘𐴠 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴏𐴞𐴕𐴠𐴥

²³𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤𐴘𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴃𐴝𐴥𐴑𐴞𐴃𐴠 𐴎𐴠 𐴑𐴠𐴌𐴝𐴔𐴡𐴃𐴢 𐴒𐴡𐴙𐴅𐴧𐴞𐴥𐴓𐴢, 𐴇𐴞𐴥𐴀𐴕 𐴊𐴠𐴑𐴞𐴥 𐴁𐴞𐴐𐴞𐴤 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.²⁴𐴓𐴠𐴑𐴞𐴕 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴡𐴥𐴌𐴝𐴐𐴝 𐴕𐴡𐴥 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴁𐴝𐴥𐴓𐴝𐴒𐴡𐴌𐴞 𐴏𐴞𐴕𐴠𐴥,²⁵𐴀𐴝𐴦𐴌 𐴀𐴞𐴥𐴁𐴝𐴃𐴧𐴟 𐴔𐴝𐴙𐴕𐴐𐴡𐴥𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤 𐴒𐴡𐴁𐴝𐴤 𐴕𐴡 𐴓𐴝𐴒𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴙𐴕𐴐𐴡𐴥𐴌 𐴊𐴞𐴓𐴡𐴃𐴢 𐴑𐴞𐴦 𐴀𐴝𐴏𐴠𐴤 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴎𐴝𐴕𐴠.

The Word for the World International

https://app.library.bible/content/87faca8b51c22590