Read 𐴘𐴝𐴑𐴟𐴁𐴢 3

𐴘𐴝𐴑𐴟𐴁𐴢3

𐴕𐴞𐴎𐴡𐴌 𐴎𐴡𐴁𐴝𐴕 𐴏𐴡𐴥𐴣𐴓𐴝𐴌 𐴁𐴝𐴦𐴁𐴟𐴃𐴠

¹𐴀𐴝𐴣𐴀𐴌 𐴁𐴝𐴥𐴘𐴧𐴝𐴙𐴕, 𐴃𐴟𐴣𐴀𐴝𐴥𐴌𐴝 𐴁𐴞𐴐𐴞𐴤 𐴎𐴡𐴕 𐴀𐴟𐴏𐴃𐴝𐴃𐴢 𐴕𐴡 𐴁𐴡𐴙𐴕𐴧𐴡. 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴣𐴀𐴌𐴝 𐴎𐴠𐴃𐴝𐴌𐴝𐴤 𐴀𐴟𐴏𐴃𐴝𐴃𐴢 𐴀𐴝𐴏𐴞𐴤 𐴀𐴝𐴣𐴀𐴌𐴝𐴌 𐴁𐴞𐴏𐴝𐴌 𐴀𐴡𐴙𐴕𐴧𐴡 𐴑𐴞𐴘𐴡𐴥𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴈𐴡𐴌𐴝 𐴀𐴡𐴥𐴘𐴁𐴡.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴒𐴡𐴓𐴃𐴞 𐴀𐴡𐴥𐴑𐴧𐴡𐴓𐴢 𐴒𐴡𐴌𐴞𐴥. 𐴔𐴡𐴕𐴃𐴡𐴌 𐴉𐴟𐴌𐴝𐴉𐴟𐴌𐴞 𐴁𐴝𐴓𐴡𐴑 𐴔𐴝𐴕𐴟𐴥𐴙𐴐𐴢 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴘𐴠 𐴎𐴞𐴀𐴕 𐴈𐴡𐴀 𐴇𐴞𐴥𐴀𐴕𐴡𐴃𐴢 𐴇𐴡𐴕𐴡𐴤 𐴒𐴟𐴕𐴝𐴤 𐴕𐴡 𐴒𐴡𐴌𐴠𐴥 𐴀𐴠𐴊𐴧𐴠 𐴕𐴞𐴎𐴡𐴌 𐴒𐴝𐴦 𐴒𐴟𐴣𐴍𐴝𐴌𐴠 𐴏𐴡𐴥𐴣𐴓𐴞 𐴌𐴝𐴑𐴞𐴥 𐴉𐴝𐴌𐴠.

³𐴀𐴝𐴣𐴀𐴌𐴝 𐴃𐴡 𐴒𐴟𐴥𐴌𐴝𐴌𐴠 𐴏𐴡𐴥𐴣𐴓𐴞 𐴌𐴝𐴑𐴞𐴥 𐴁𐴡𐴓𐴧𐴝 𐴒𐴟𐴥𐴌𐴝𐴌 𐴒𐴝𐴓𐴡𐴃𐴢 𐴓𐴠𐴈𐴝𐴕 𐴓𐴝𐴒𐴝𐴘, 𐴁𐴝𐴦𐴊𐴠 𐴀𐴝𐴣𐴀𐴌𐴝 𐴇𐴞𐴥𐴀𐴕𐴡𐴌 𐴒𐴟𐴣𐴍𐴝 𐴒𐴝𐴦𐴌𐴠 𐴎𐴞𐴑𐴧𐴝𐴥 𐴔𐴡𐴕𐴠𐴈𐴡𐴀 𐴇𐴞𐴥𐴑𐴧𐴝 𐴓𐴡𐴘𐴎𐴝𐴘 𐴉𐴝𐴌𐴞.⁴𐴎𐴝𐴀𐴣𐴏𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴘𐴡𐴥 𐴁𐴝𐴥𐴉𐴞𐴏𐴡: 𐴇𐴞𐴥𐴀𐴕 𐴎𐴠𐴃𐴧𐴡𐴥𐴌 𐴋𐴡𐴣𐴀𐴌 𐴀𐴡𐴥𐴘𐴁𐴡 𐴀𐴡𐴥𐴑 𐴀𐴝𐴦𐴌 𐴎𐴠𐴀𐴕 𐴃𐴠𐴎𐴢 𐴁𐴡𐴘𐴧𐴝𐴌𐴠 𐴏𐴡𐴓𐴞𐴁𐴡𐴥 𐴏𐴡𐴓𐴡𐴗𐴑, 𐴔𐴡𐴕𐴃𐴡𐴌 𐴇𐴞𐴥𐴀𐴕𐴡𐴌𐴠 𐴏𐴠𐴥𐴌𐴝𐴙𐴚𐴒𐴝𐴘𐴠 𐴀𐴠𐴑𐴧𐴝𐴥𐴕 𐴁𐴞𐴐𐴞𐴤 𐴐𐴡𐴥𐴣𐴍𐴡 𐴏𐴟𐴥𐴖𐴝𐴕 𐴓𐴡𐴥𐴘𐴧𐴡𐴌𐴠 𐴎𐴞𐴑𐴧𐴝𐴥 𐴔𐴡𐴕𐴠𐴈𐴡𐴀 𐴇𐴞𐴥𐴑𐴧𐴝 𐴓𐴡𐴘𐴎𐴝.⁵𐴀𐴝𐴣𐴀𐴌𐴝𐴌 𐴎𐴞𐴌 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝; 𐴇𐴞𐴥𐴘𐴝𐴕 𐴒𐴝𐴦𐴌 𐴀𐴠𐴑𐴧𐴝𐴥𐴕 𐴐𐴡𐴥𐴣𐴍𐴡 𐴇𐴞𐴥𐴏𐴧𐴝 𐴊𐴠 𐴀𐴡𐴥𐴘𐴓𐴠 𐴘𐴡, 𐴇𐴞𐴥𐴘𐴝𐴕𐴠 𐴋𐴡𐴣𐴀𐴌-𐴋𐴡𐴣𐴀𐴌 𐴉𐴡𐴇𐴡𐴥𐴌𐴝𐴘 𐴀𐴡𐴥𐴑𐴧𐴡𐴓𐴢 𐴒𐴡𐴌𐴠𐴥. 𐴃𐴟𐴣𐴀𐴝𐴥𐴌𐴝 𐴘𐴝𐴀𐴕 𐴀𐴡𐴥 𐴁𐴝𐴥𐴉𐴡, 𐴀𐴠𐴑𐴧𐴞𐴕𐴞𐴥𐴏𐴧𐴝𐴌𐴝 𐴀𐴡𐴦𐴙𐴕 𐴓𐴡𐴘 𐴇𐴡𐴃𐴡𐴥 𐴋𐴡𐴣𐴀𐴌-𐴋𐴡𐴣𐴀𐴌 𐴎𐴡𐴦𐴣𐴓𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝𐴃𐴢 𐴊𐴞 𐴉𐴝𐴌𐴠.⁶𐴎𐴞𐴌 𐴈𐴡𐴀 𐴊𐴠 𐴇𐴞𐴥𐴘𐴝𐴕 𐴀𐴡𐴦𐴙𐴕𐴡𐴌 𐴋𐴡𐴥𐴙𐴓𐴧𐴝 𐴘𐴡𐴥; 𐴀𐴝𐴣𐴀𐴌𐴝𐴌 𐴒𐴝𐴦𐴃𐴢 𐴎𐴠 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴇𐴞𐴥𐴀𐴕𐴡𐴌 𐴁𐴟𐴥𐴃𐴡𐴌𐴠 𐴎𐴞𐴌𐴡𐴌𐴠 𐴑𐴟𐴈𐴝𐴔𐴡𐴌 𐴀𐴠𐴑𐴧𐴝𐴥𐴕 𐴊𐴟𐴕𐴞𐴘𐴝𐴘 𐴈𐴡𐴘𐴓𐴠𐴥 𐴉𐴝𐴌𐴠. 𐴇𐴞𐴥𐴘𐴝𐴕𐴠 𐴀𐴝𐴣𐴀𐴌𐴝𐴌 𐴒𐴝𐴦 𐴀𐴝𐴒𐴝𐴒𐴟𐴌𐴝 𐴕𐴝𐴉𐴝𐴑 𐴒𐴡𐴌𐴞𐴥𐴉𐴠𐴓𐴝𐴘 𐴀𐴝𐴣𐴀𐴌𐴝𐴌 𐴎𐴞𐴕𐴊𐴞𐴒𐴞 𐴒𐴟𐴣𐴍𐴝𐴃𐴢 𐴀𐴡𐴦𐴙𐴕 𐴊𐴡𐴥𐴌𐴝𐴘 𐴊𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕𐴡𐴃𐴢 𐴎𐴟𐴎𐴟𐴑𐴡𐴌 𐴀𐴡𐴦𐴙𐴕 𐴀𐴝𐴏𐴠𐴤.

⁷𐴀𐴞𐴕𐴏𐴝𐴥𐴕𐴠 𐴃𐴡 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴅𐴝𐴕𐴟𐴖𐴝𐴌, 𐴉𐴝𐴙𐴑, 𐴁𐴟𐴑𐴠 𐴀𐴝𐴥𐴣𐴍𐴠 𐴊𐴠 𐴎𐴝𐴕𐴊𐴝𐴥𐴌, 𐴀𐴠𐴊𐴧𐴠 𐴉𐴝𐴕𐴞𐴥𐴌 𐴎𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌𐴠 𐴏𐴡𐴥𐴣𐴙𐴓𐴧𐴠 𐴀𐴠𐴊𐴧𐴠 𐴘𐴝𐴓𐴝 𐴘𐴡𐴥 𐴏𐴡𐴥𐴣𐴓𐴠.⁸𐴔𐴡𐴕𐴃𐴡𐴌 𐴇𐴡𐴕𐴡𐴤 𐴔𐴝𐴙𐴕𐴐𐴠𐴥 𐴎𐴞𐴌𐴡𐴌𐴠 𐴏𐴡𐴥𐴣𐴓𐴞 𐴉𐴝𐴌𐴠 𐴊𐴠 𐴕𐴝𐴥𐴘; 𐴎𐴞𐴌 𐴀𐴡𐴥𐴙𐴓𐴊𐴠 𐴀𐴠𐴑𐴧𐴝𐴥𐴕 𐴈𐴡𐴥𐴌𐴝𐴉𐴢 𐴅𐴞𐴕𐴞𐴥𐴐𐴢 𐴎𐴞𐴘𐴝𐴥𐴕𐴡𐴌𐴠 𐴏𐴡𐴥𐴣𐴓𐴞 𐴉𐴝𐴌𐴝 𐴕𐴡 𐴎𐴝; 𐴇𐴞𐴥𐴘𐴝𐴕 𐴇𐴝𐴥𐴉𐴡𐴌 𐴁𐴞𐴐𐴡𐴌 𐴋𐴡𐴥𐴙𐴓𐴧𐴝 𐴁𐴞𐴐𐴞𐴤 𐴇𐴡𐴥𐴃𐴝𐴌𐴝.

⁹𐴇𐴠𐴥 𐴎𐴞𐴌 𐴎𐴞𐴘𐴝𐴥𐴕 𐴓𐴡𐴥𐴘 𐴀𐴝𐴣𐴀𐴌𐴝 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴠𐴊𐴧𐴠 𐴁𐴝𐴉𐴡𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥, 𐴇𐴞𐴥𐴘𐴝𐴕 𐴓𐴡𐴥𐴘 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴏𐴟𐴥𐴌𐴡𐴃𐴠 𐴁𐴝𐴕𐴝𐴘𐴧𐴝 𐴀𐴞𐴕𐴏𐴝𐴥𐴕𐴡𐴌𐴠 𐴒𐴡𐴎𐴧𐴡𐴁𐴢 𐴀𐴡𐴥 𐴊𐴞.¹⁰𐴀𐴝𐴣𐴀𐴌𐴝𐴌 𐴎𐴠 𐴔𐴟𐴑 𐴀𐴡𐴥𐴃𐴧𐴟 𐴃𐴝𐴦𐴌𐴞𐴉𐴢 𐴀𐴝𐴘𐴧𐴠𐴤 𐴇𐴠𐴥 𐴔𐴟𐴑 𐴀𐴡𐴥𐴃𐴧𐴟 𐴒𐴡𐴎𐴧𐴡𐴁𐴢 𐴀𐴡𐴥 𐴀𐴝𐴘𐴧𐴠𐴤. 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴕𐴡 𐴀𐴡𐴥𐴕 𐴏𐴝𐴥.¹¹𐴎𐴠 𐴕𐴡𐴓𐴑𐴗𐴝𐴃𐴧𐴟 𐴔𐴟𐴃𐴟𐴥𐴌𐴝 𐴉𐴝𐴕𐴞𐴥 𐴀𐴟𐴍𐴠𐴤, 𐴇𐴠𐴥 𐴕𐴡𐴓𐴑𐴗𐴝𐴃𐴧𐴟 𐴑𐴞𐴥 𐴕𐴟𐴕𐴝 𐴉𐴝𐴕𐴞𐴥 𐴘𐴡𐴥 𐴀𐴟𐴍𐴠𐴤 𐴕𐴠𐴥؟¹²𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕, 𐴋𐴟𐴣𐴙𐴌-𐴒𐴝𐴏𐴡𐴃𐴢 𐴑𐴞𐴥 𐴎𐴡𐴓𐴉𐴝𐴘 𐴊𐴡𐴥𐴌𐴠 𐴕𐴠𐴥؟ 𐴀𐴝𐴦𐴌 𐴀𐴝𐴚𐴒𐴟𐴌-𐴒𐴝𐴏𐴡𐴃𐴢 𐴑𐴞𐴥 𐴋𐴟𐴣𐴙𐴌 𐴒𐴟𐴓𐴝 𐴊𐴡𐴥𐴌𐴠 𐴕𐴠𐴥؟ 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴕𐴟𐴕𐴝 𐴉𐴝𐴕𐴞𐴥𐴌 𐴕𐴡𐴓𐴑𐴗𐴝𐴃𐴧𐴟 𐴔𐴟𐴃𐴟𐴥𐴌𐴝 𐴉𐴝𐴕𐴞𐴥 𐴕𐴡 𐴀𐴟𐴍𐴠𐴤.

𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴘𐴧𐴠𐴤 𐴊𐴠 𐴒𐴞𐴘𐴝𐴕

¹³𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴒𐴞𐴘𐴝𐴕𐴞 𐴀𐴠𐴊𐴧𐴠 𐴁𐴟𐴎𐴡𐴥𐴕𐴡𐴌 𐴔𐴝𐴕𐴟𐴥𐴙𐴐𐴢 𐴇𐴡𐴕 𐴀𐴝𐴏𐴠𐴤؟ 𐴃𐴝𐴥𐴑𐴞𐴓𐴠, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴁𐴝𐴥𐴓𐴝 𐴏𐴡𐴓𐴝𐴏𐴡𐴓𐴢 𐴓𐴡𐴘 𐴏𐴝𐴥𐴁𐴟𐴃𐴢 𐴒𐴡𐴌𐴡𐴥𐴗𐴑 𐴊𐴠 𐴑𐴞, 𐴒𐴞𐴘𐴝𐴕 𐴃𐴝𐴥𐴑𐴞𐴓𐴠 𐴎𐴠 𐴕𐴡𐴌𐴡𐴔𐴊𐴝𐴌𐴞 𐴃𐴝𐴥𐴑𐴠 𐴇𐴠𐴥 𐴕𐴡𐴌𐴡𐴔𐴊𐴝𐴌𐴞𐴌 𐴏𐴝𐴥𐴀𐴣𐴃𐴠 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴌𐴠𐴥.¹⁴𐴓𐴠𐴑𐴞𐴕 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴁𐴞𐴐𐴞𐴤 𐴌𐴞𐴐𐴢 𐴀𐴠𐴊𐴧𐴠 𐴏𐴞𐴌𐴞𐴥𐴉𐴢 𐴕𐴞𐴎𐴡𐴌 𐴉𐴝𐴥𐴘𐴊𐴝 𐴃𐴟𐴖𐴝𐴌 𐴕𐴞𐴘𐴡𐴃𐴢 𐴃𐴝𐴥𐴑𐴠, 𐴒𐴟𐴔𐴝𐴕 𐴕𐴡 𐴁𐴡𐴙𐴕𐴧𐴡 𐴀𐴝𐴦𐴌 𐴇𐴝𐴥𐴣𐴏𐴝𐴌𐴠 𐴔𐴞𐴏𐴝𐴥 𐴕𐴡 𐴁𐴝𐴕𐴝𐴘𐴧𐴡𐴥.¹⁵𐴇𐴠𐴥𐴕𐴊𐴞𐴓𐴧𐴝 𐴒𐴞𐴘𐴝𐴕 𐴀𐴝𐴘𐴧𐴠𐴤 𐴊𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴕𐴡, 𐴁𐴡𐴥𐴓𐴑𐴠 𐴊𐴟𐴕𐴞𐴘𐴝𐴘 𐴃𐴧𐴟, 𐴈𐴡𐴥𐴌𐴝𐴉𐴢 𐴔𐴡𐴕𐴐𐴝𐴥 𐴃𐴧𐴟, 𐴀𐴠𐴊𐴧𐴠 𐴁𐴟𐴥𐴃𐴉𐴠𐴌𐴡𐴃𐴢 𐴀𐴡𐴥𐴃𐴧𐴟.¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴍𐴠𐴥 𐴌𐴞𐴐𐴢 𐴀𐴠𐴊𐴧𐴠 𐴏𐴞𐴌𐴞𐴥𐴉𐴢 𐴕𐴞𐴎𐴡𐴌 𐴉𐴝𐴥𐴘𐴊𐴝 𐴃𐴟𐴖𐴝𐴌 𐴕𐴞𐴘𐴡𐴃𐴢 𐴃𐴝𐴥𐴑𐴠, 𐴇𐴠𐴥𐴍𐴠 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴀𐴠𐴊𐴧𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴁𐴟𐴌𐴝 𐴈𐴝𐴔 𐴀𐴡𐴥 𐴃𐴝𐴥𐴑𐴠.

¹⁷𐴔𐴡𐴕𐴃𐴡𐴌 𐴎𐴠 𐴒𐴞𐴘𐴝𐴕 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴘𐴧𐴠𐴤, 𐴇𐴞𐴥𐴘𐴝𐴕 𐴀𐴠𐴁𐴧𐴠 𐴀𐴝𐴒𐴠 𐴂𐴝𐴑, 𐴁𐴝𐴦𐴊𐴠 𐴐𐴝𐴥𐴕𐴃𐴞𐴘𐴠 𐴁𐴡𐴥𐴌𐴝; 𐴇𐴞𐴥𐴘𐴝𐴕𐴡𐴃𐴢 𐴐𐴞𐴥𐴊𐴝𐴘𐴞 𐴀𐴠𐴊𐴧𐴠 𐴁𐴟𐴎𐴢 𐴀𐴝𐴏𐴠𐴤; 𐴇𐴞𐴥𐴘𐴝𐴕 𐴌𐴝𐴇𐴝𐴥𐴔𐴠 𐴀𐴠𐴊𐴧𐴠 𐴒𐴡𐴔 𐴕𐴡𐴃𐴞𐴎𐴝𐴘𐴠 𐴉𐴟𐴌𐴝𐴘𐴧𐴝; 𐴇𐴞𐴥𐴘𐴝𐴕𐴡𐴃𐴢 𐴇𐴡𐴕𐴡𐴤 𐴉𐴡𐴌𐴡𐴥𐴑𐴝𐴘 𐴘𐴝𐴥 𐴔𐴟𐴕𐴝𐴉𐴠𐴥𐴑𐴞 𐴕𐴝𐴥𐴘.¹⁸𐴐𐴝𐴥𐴕𐴃𐴞 𐴀𐴝𐴕𐴞𐴤𐴁𐴝𐴌 𐴔𐴠𐴀𐴕𐴧𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴠 𐴉𐴡𐴌𐴇𐴠𐴥𐴏𐴒𐴝𐴌𐴞 𐴊𐴝𐴘𐴁𐴝𐴌 𐴁𐴞𐴏𐴢 𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴐𐴞𐴥𐴣𐴍𐴠.

The Word for the World International

https://app.library.bible/content/87faca8b51c22590