阅读𐴘𐴝𐴑𐴟𐴁𐴢 2

𐴘𐴝𐴑𐴟𐴁𐴢2

𐴀𐴠𐴑𐴃𐴡𐴌𐴉𐴞𐴥𐴘𐴝𐴌 𐴁𐴝𐴦𐴁𐴟𐴃𐴠 𐴀𐴟𐴥𐴣𐴐𐴞𐴘𐴝𐴌𐴞

¹𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴀𐴝𐴣𐴀𐴌𐴝𐴌 𐴔𐴡𐴈𐴞𐴥𐴔𐴝 𐴀𐴡𐴓𐴝 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤, 𐴃𐴟𐴣𐴀𐴝𐴥𐴌𐴝 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴀𐴠𐴑 𐴕𐴡𐴎𐴡𐴌𐴠 𐴏𐴝𐴘𐴧𐴡𐴥.²𐴊𐴡𐴥𐴌𐴡, 𐴀𐴠𐴎𐴧𐴡𐴕 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴢 𐴃𐴟𐴣𐴀𐴝𐴥𐴌𐴝𐴌 𐴔𐴟𐴅𐴞𐴓𐴞𐴥𐴐𐴡𐴃𐴢 𐴐𐴟𐴥𐴕𐴝𐴌 𐴀𐴡𐴀𐴣𐴍𐴞 𐴊𐴞𐴥 𐴀𐴠𐴊𐴧𐴠 𐴁𐴝𐴌𐴞𐴥𐴑 𐴇𐴡𐴦𐴌𐴏𐴟𐴖𐴡𐴌 𐴉𐴞𐴣𐴊𐴞𐴥 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴇𐴠𐴥𐴍𐴠 𐴀𐴠𐴥𐴎𐴧𐴡𐴕 𐴒𐴡𐴌𐴞𐴉𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥 𐴀𐴝𐴙𐴐𐴧𐴠𐴥, 𐴎𐴝𐴌 𐴒𐴝𐴙𐴌𐴡𐴌 𐴇𐴡𐴦𐴌 𐴕𐴞𐴌𐴡𐴥𐴐𐴢.³𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴎𐴠 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴁𐴝𐴌𐴞𐴥𐴑 𐴇𐴡𐴦𐴌 𐴉𐴞𐴣𐴊𐴞𐴥 𐴀𐴝𐴙𐴐𐴧𐴠𐴥 𐴘𐴡𐴥𐴒𐴧𐴗𐴝𐴌 𐴀𐴟𐴎𐴟 𐴈𐴝𐴥𐴀𐴏𐴢 𐴊𐴞𐴥𐴘𐴝𐴕 𐴊𐴞𐴥 𐴀𐴠𐴕𐴊𐴞𐴓𐴧𐴝 𐴈𐴡𐴀, ”𐴃𐴟𐴀𐴛 𐴀𐴠 𐴒𐴡𐴔 𐴎𐴝𐴒𐴝 𐴒𐴝𐴥𐴕𐴡𐴃𐴢 𐴁𐴡𐴘𐴧𐴡𐴥,“ 𐴀𐴝𐴦𐴌 𐴒𐴡𐴌𐴞𐴉𐴢 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀, ”𐴃𐴟𐴘 𐴀𐴟𐴍𐴠𐴤 𐴃𐴞𐴥𐴘𐴝𐴘 𐴃𐴝𐴥𐴑, 𐴀𐴝𐴌𐴕𐴡𐴥𐴘𐴓𐴠 𐴕𐴞𐴏𐴠 𐴀𐴝𐴣𐴀𐴌 𐴄𐴠𐴥𐴚𐴡𐴌 𐴋𐴝𐴥𐴑𐴠 𐴒𐴡𐴥𐴌𐴞 𐴁𐴡𐴘,“⁴𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴉𐴡𐴌𐴡𐴥𐴑 𐴕𐴡𐴥 𐴒𐴡𐴌𐴡𐴤 𐴕𐴠𐴥 𐴀𐴝𐴦𐴌 𐴁𐴟𐴌𐴝 𐴕𐴞𐴘𐴡𐴃𐴠 𐴁𐴞𐴏𐴝𐴌 𐴕𐴡𐴥 𐴒𐴡𐴌𐴡𐴤 𐴕𐴠𐴥؟

⁵𐴀𐴡𐴥 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴁𐴝𐴥𐴘𐴁𐴡𐴘𐴕𐴝𐴥𐴙𐴕, 𐴉𐴟𐴥𐴕𐴡, 𐴀𐴝𐴓𐴧𐴝𐴘𐴠 𐴀𐴠 𐴊𐴟𐴕𐴞𐴘𐴝𐴙𐴌 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴔𐴝𐴕𐴡𐴃𐴢 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘 𐴁𐴡𐴓𐴧𐴝 𐴀𐴠𐴊𐴧𐴠 𐴌𐴝𐴙𐴅𐴧𐴡 𐴖𐴝𐴀𐴕𐴡𐴌 𐴔𐴞𐴌𐴝𐴏𐴊𐴝𐴥𐴌 𐴀𐴡𐴥𐴘 𐴁𐴡𐴓𐴧𐴝 𐴁𐴝𐴏𐴞𐴥𐴓𐴡𐴘𐴧𐴠 𐴊𐴠 𐴕𐴡 𐴕𐴠𐴥, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴀𐴟𐴘𐴃𐴝𐴌𐴝𐴤𐴌𐴠 𐴊𐴞𐴦𐴁𐴝𐴌 𐴖𐴝𐴦𐴊𐴝 𐴒𐴡𐴙𐴅𐴧𐴠𐴥 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥؟⁶𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴊𐴠 𐴒𐴡𐴌𐴞𐴉𐴢 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴡𐴥. 𐴃𐴟𐴣𐴀𐴝𐴥𐴌𐴝𐴌𐴠 𐴃𐴟𐴖𐴝𐴚𐴒𐴡𐴌 𐴀𐴡𐴥𐴑𐴧𐴡𐴓𐴠 𐴕𐴡 𐴕𐴠𐴥 𐴎𐴝𐴓𐴝 𐴊𐴠 𐴀𐴠𐴊𐴧𐴠 𐴄𐴝𐴕𐴞-𐴄𐴝𐴕𐴞 𐴁𐴞𐴏𐴝𐴌𐴡𐴃𐴢 𐴃𐴟𐴓𐴠𐴥 𐴊𐴠𐴥؟⁷𐴀𐴞𐴥𐴃𐴝𐴌𐴝 𐴕𐴡 𐴕𐴠𐴥 𐴀𐴟𐴁𐴝𐴤𐴌 𐴀𐴞𐴎𐴧𐴡𐴙𐴃𐴧𐴝 𐴕𐴝𐴔𐴡𐴌 𐴑𐴟𐴉𐴠𐴥𐴌𐴞 𐴒𐴡𐴌𐴠𐴥 𐴊𐴠 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴙𐴑𐴧𐴠𐴥؟

⁸𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴕𐴞𐴎𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝.“ 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴇𐴠𐴥 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴒𐴡𐴔 𐴈𐴝𐴔 𐴒𐴡𐴌𐴡𐴤𐴌.⁹𐴓𐴠𐴑𐴞𐴕 𐴎𐴡𐴊𐴞 𐴀𐴠𐴑𐴃𐴡𐴌𐴉𐴞𐴥𐴘𐴝 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴌𐴝 𐴒𐴟𐴕𐴝𐴤 𐴒𐴡𐴌𐴡𐴤𐴌 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴡𐴘𐴝 𐴊𐴠 𐴇𐴞𐴥𐴘𐴝𐴕 𐴐𐴡𐴥𐴌𐴞𐴘𐴡𐴃𐴠 𐴏𐴝𐴥𐴁𐴟𐴃𐴢 𐴒𐴡𐴌𐴠𐴥.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴉𐴟𐴌𐴝 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴀𐴠𐴑𐴧𐴝𐴥𐴕 𐴁𐴝𐴥𐴚𐴒𐴠, 𐴘𐴡𐴥𐴒𐴧𐴗𐴝𐴌𐴠 𐴃𐴡 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴁𐴝𐴥𐴙𐴚𐴒𐴠 𐴁𐴡𐴥𐴓𐴞 𐴊𐴡𐴥𐴌𐴝 𐴎𐴝𐴘𐴁𐴡.¹¹𐴎𐴞𐴁𐴝𐴤𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ”𐴎𐴠𐴕𐴝𐴤 𐴕𐴡 𐴒𐴡𐴌𐴞𐴥𐴁𐴝,“ 𐴀𐴞𐴥𐴁𐴝𐴘𐴠 𐴃𐴡 𐴀𐴠𐴕𐴊𐴞𐴓𐴧𐴝 𐴘𐴡𐴥 𐴈𐴡𐴘𐴧𐴠𐴥, ”𐴑𐴟𐴥𐴕 𐴕𐴡 𐴒𐴡𐴌𐴞𐴥𐴁𐴝.“ 𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴎𐴠𐴕𐴝𐴤 𐴕𐴡 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴑𐴟𐴥𐴕 𐴒𐴡𐴌𐴡𐴤, 𐴃𐴡𐴀 𐴃𐴟𐴣𐴀𐴝𐴥𐴌𐴝 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴡𐴘𐴝 𐴀𐴡𐴥𐴘𐴒𐴞𐴘𐴡𐴒𐴡𐴘.

¹²𐴇𐴡𐴕𐴡𐴤 𐴈𐴡𐴃𐴝𐴤 𐴈𐴡𐴘𐴃𐴠𐴤 𐴀𐴠𐴊𐴧𐴠 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴒𐴡𐴙𐴃𐴧𐴠𐴤 𐴔𐴡𐴕𐴡𐴃𐴢 𐴌𐴝𐴑𐴞𐴥𐴘𐴡 𐴊𐴠, 𐴃𐴟𐴣𐴀𐴝𐴥𐴌𐴝𐴌 𐴁𐴞𐴏𐴝𐴌 𐴀𐴝𐴎𐴝𐴊𐴞 𐴊𐴠𐴊𐴠 𐴐𐴡𐴥𐴌𐴞𐴘𐴡𐴃𐴢 𐴓𐴡𐴥𐴘 𐴒𐴡𐴌𐴝𐴥 𐴎𐴝𐴘𐴁𐴡.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴕𐴡 𐴒𐴡𐴌𐴠𐴥, 𐴁𐴞𐴏𐴝𐴌𐴡𐴌 𐴀𐴡𐴑𐴃𐴡𐴥𐴃𐴢 𐴘𐴡𐴥𐴒𐴧𐴗𐴝𐴌 𐴖𐴡𐴌𐴠 𐴘𐴡𐴥 𐴀𐴝𐴓𐴧𐴝𐴘𐴠 𐴌𐴝𐴇𐴝𐴥𐴔 𐴕𐴡 𐴒𐴡𐴌𐴞𐴥𐴁𐴡. 𐴌𐴝𐴇𐴝𐴥𐴔 𐴊𐴞𐴓𐴢 𐴀𐴡𐴓𐴝 𐴀𐴡𐴥𐴑𐴧𐴡𐴓𐴡𐴌𐴠 𐴃𐴡 𐴌𐴝𐴇𐴝𐴥𐴔𐴡𐴌 𐴏𐴝𐴥𐴀𐴣𐴃𐴠 𐴁𐴞𐴏𐴝𐴌 𐴒𐴡𐴌𐴝𐴥 𐴎𐴝.

𐴀𐴞𐴔𐴝𐴕 𐴀𐴠𐴊𐴧𐴠 𐴀𐴝𐴔𐴡𐴥𐴓𐴢

¹⁴𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀, ”𐴀𐴝𐴣𐴀𐴃𐴧𐴟 𐴀𐴞𐴔𐴝𐴕 𐴀𐴝𐴏𐴠𐴤,“ 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴃𐴧𐴟 𐴀𐴝𐴔𐴡𐴥𐴓𐴢 𐴕𐴝𐴥𐴘, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕𐴡𐴃𐴢 𐴑𐴞𐴦 𐴉𐴝𐴥𐴘𐴊𐴝 𐴀𐴝𐴏𐴠𐴤؟ 𐴇𐴠𐴥𐴕𐴊𐴞𐴓𐴧𐴝 𐴀𐴞𐴔𐴝𐴕𐴠 𐴑𐴞 𐴘𐴡𐴥𐴒𐴧𐴗𐴝𐴌𐴠 𐴁𐴝𐴏𐴝𐴘 𐴉𐴝𐴌𐴞𐴁𐴡𐴥؟¹⁵𐴊𐴡𐴥𐴌𐴡, 𐴀𐴠𐴒𐴧𐴗𐴝𐴤 𐴁𐴝𐴥𐴘 𐴀𐴡𐴥𐴃𐴧𐴟 𐴘𐴝𐴥 𐴁𐴡𐴥𐴙𐴕 𐴀𐴡𐴥𐴃𐴧𐴟 𐴉𐴞𐴣𐴊𐴞𐴥𐴃𐴡 𐴇𐴡𐴦𐴌𐴏𐴟𐴖𐴡𐴌 𐴕𐴝𐴥𐴘, 𐴀𐴝𐴦𐴌 𐴈𐴝𐴥𐴘𐴃𐴡 𐴈𐴝𐴥𐴕𐴝 𐴕𐴝𐴥𐴘.¹⁶𐴇𐴠𐴥 𐴇𐴝𐴥𐴓𐴡𐴃𐴡𐴃𐴢 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀, ”𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴎𐴡𐴦𐴒𐴡𐴥𐴘, 𐴀𐴟𐴔 𐴃𐴝𐴥𐴙𐴑𐴧𐴡 𐴀𐴝𐴦𐴌 𐴈𐴝𐴥𐴀𐴉𐴞𐴘𐴝 𐴒𐴡𐴙𐴅𐴧𐴡𐴥,“ 𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴕𐴡 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴘𐴡𐴥𐴒𐴧𐴗𐴝𐴌 𐴑𐴞𐴦 𐴉𐴝𐴥𐴘𐴊𐴝 𐴀𐴝𐴏𐴠𐴤؟¹⁷𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴎𐴠 𐴀𐴞𐴔𐴝𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴔𐴡𐴥𐴓𐴢 𐴕𐴝𐴥𐴘, 𐴇𐴠𐴥 𐴀𐴞𐴔𐴝𐴕 𐴔𐴡𐴌𐴝.

¹⁸𐴀𐴡𐴥𐴘𐴃𐴡𐴉𐴝𐴌𐴠 𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴡𐴤, ”𐴑𐴞𐴘𐴡𐴥𐴃𐴧𐴟 𐴀𐴞𐴔𐴝𐴕 𐴀𐴝𐴏𐴠𐴤, 𐴀𐴝𐴦𐴌 𐴑𐴞𐴘𐴡𐴥𐴃𐴧𐴟 𐴀𐴝𐴔𐴡𐴥𐴓𐴢 𐴀𐴝𐴏𐴠𐴤.“ 𐴄𐴞𐴥𐴑 𐴀𐴝𐴏𐴠𐴤, 𐴃𐴡𐴥𐴀𐴘𐴓𐴠 𐴀𐴝𐴔𐴡𐴥𐴓𐴢 𐴏𐴝𐴥𐴌𐴝 𐴃𐴟𐴣𐴀𐴝𐴥𐴣𐴌 𐴀𐴞𐴔𐴝𐴕 𐴀𐴝𐴣𐴀𐴌𐴠𐴥 𐴊𐴝𐴈𐴝𐴤𐴘 𐴉𐴝𐴌𐴞𐴁𐴝𐴥 𐴕𐴠𐴥؟ 𐴀𐴝𐴀𐴛 𐴃𐴡 𐴀𐴝𐴣𐴀𐴌 𐴀𐴝𐴔𐴡𐴥𐴓𐴡𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌 𐴀𐴞𐴔𐴝𐴕 𐴃𐴟𐴣𐴀𐴝𐴥𐴣𐴌𐴠 𐴊𐴝𐴈𐴝𐴤𐴘 𐴉𐴝𐴙𐴅𐴧𐴟𐴔.¹⁹𐴃𐴟𐴀𐴛 𐴀𐴠𐴕𐴊𐴞𐴓𐴧𐴝 𐴁𐴞𐴐𐴧𐴝𐴥𐴐𐴢 𐴒𐴡𐴌𐴡𐴤 𐴊𐴠 𐴑𐴞, 𐴀𐴝𐴓𐴧𐴝 𐴀𐴝𐴏𐴠𐴤 𐴊𐴠 𐴀𐴠𐴑𐴒𐴗𐴝𐴥. 𐴇𐴞𐴥𐴘𐴝𐴕 𐴁𐴝𐴥𐴓𐴝! 𐴔𐴡𐴕𐴃𐴡𐴌 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴁𐴞𐴐𐴧𐴝𐴥𐴐𐴢 𐴒𐴡𐴌𐴠𐴥, 𐴀𐴝𐴦𐴌 𐴋𐴡𐴦𐴌𐴠 𐴇𐴝𐴉𐴠.

²⁰𐴀𐴡𐴥 𐴁𐴠𐴑𐴟𐴉𐴢, 𐴎𐴠 𐴀𐴞𐴔𐴝𐴕𐴡𐴌 𐴀𐴝𐴔𐴡𐴥𐴓𐴢 𐴕𐴝𐴥𐴘 𐴇𐴠𐴥 𐴀𐴞𐴔𐴝𐴕𐴡𐴌 𐴊𐴝𐴔 𐴕𐴝𐴥𐴘 𐴊𐴠 𐴇𐴞𐴥𐴘𐴝𐴕𐴡𐴌 𐴃𐴟𐴀𐴛 𐴏𐴝𐴥𐴁𐴟𐴃𐴢 𐴏𐴡𐴀 𐴕𐴠𐴥؟²¹𐴀𐴝𐴣𐴀𐴌𐴝𐴌 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔 𐴃𐴡 𐴀𐴠 𐴀𐴝𐴔𐴡𐴥𐴓𐴠 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴙𐴅𐴧𐴞𐴓𐴢, 𐴑𐴞 𐴈𐴡𐴘𐴓𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴉𐴟𐴖𐴝 𐴀𐴞𐴏𐴝𐴈𐴝𐴥𐴑𐴡𐴌𐴠 𐴑𐴟𐴌𐴁𐴝𐴕𐴞 𐴊𐴞 𐴁𐴡𐴓𐴧𐴝 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴖𐴡𐴌𐴠 𐴂𐴠𐴦𐴐𐴢 𐴒𐴡𐴙𐴅𐴧𐴞𐴥𐴓𐴢.²²𐴃𐴟𐴀𐴛 𐴃𐴡 𐴊𐴠𐴑𐴡𐴥𐴌, 𐴘𐴡𐴥𐴒𐴧𐴗𐴝𐴌 𐴀𐴞𐴔𐴝𐴕 𐴀𐴠𐴊𐴧𐴠 𐴀𐴝𐴔𐴡𐴥𐴓𐴢 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴈𐴝𐴔 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴀𐴞𐴔𐴝𐴕 𐴀𐴡𐴣𐴃𐴧𐴠𐴤 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞 𐴀𐴡𐴥𐴘𐴧𐴠 𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴝𐴔𐴡𐴥𐴓𐴢 𐴒𐴡𐴙𐴅𐴧𐴠𐴥.²³𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠 𐴀𐴠 𐴈𐴡𐴃𐴝𐴤 𐴉𐴟𐴌𐴝 𐴀𐴡𐴥𐴘𐴧𐴠, 𐴑𐴞 𐴈𐴡𐴘𐴓𐴠𐴥, ”𐴀𐴞𐴁𐴌𐴝𐴇𐴞𐴥𐴔𐴠 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴌𐴝𐴙𐴑𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴙𐴕𐴧𐴞𐴥𐴓𐴢.“ 𐴇𐴠𐴥𐴃𐴡𐴓𐴧𐴝 𐴀𐴝𐴓𐴧𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 ”𐴊𐴟𐴏𐴃𐴡𐴥“ 𐴋𐴝𐴙𐴑𐴧𐴠𐴥.²⁴𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴊𐴠 𐴊𐴠𐴙𐴑𐴧𐴡𐴥, 𐴔𐴝𐴕𐴟𐴥𐴙𐴐𐴢 𐴏𐴞𐴌𐴞𐴥𐴉𐴢 𐴀𐴞𐴔𐴝𐴕 𐴃𐴝𐴥𐴑𐴞𐴓𐴠 𐴉𐴡𐴌𐴇𐴠𐴥𐴏𐴒𐴝𐴌 𐴕𐴡 𐴄𐴡𐴥𐴀𐴌𐴠, 𐴄𐴡𐴥𐴀𐴌𐴞𐴃𐴠 𐴀𐴝𐴔𐴡𐴥𐴓𐴢 𐴀𐴡𐴥 𐴓𐴝𐴒𐴠.

²⁵𐴌𐴝𐴇𐴝𐴥𐴁𐴝 𐴕𐴝𐴔𐴡𐴌 𐴔𐴝𐴒𐴞 𐴔𐴝𐴘𐴝𐴉𐴟𐴖𐴝 𐴖𐴝𐴌 𐴇𐴝𐴥𐴓𐴡𐴃𐴢 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝. 𐴇𐴞𐴥𐴁𐴝 𐴀𐴠 𐴀𐴝𐴔𐴡𐴥𐴓𐴠 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴙𐴅𐴧𐴞𐴓𐴢, 𐴑𐴞 𐴈𐴡𐴘𐴓𐴠𐴥, 𐴇𐴞𐴥𐴁𐴝𐴘𐴠 𐴒𐴟𐴌𐴞𐴕𐴊𐴝 𐴒𐴟𐴥𐴕𐴡𐴌𐴠 𐴓𐴟𐴑𐴝𐴘 𐴌𐴝𐴑𐴞𐴥 𐴁𐴝𐴦𐴊𐴠 𐴀𐴝𐴌𐴀𐴠𐴑 𐴁𐴡𐴓𐴞 𐴊𐴟𐴣𐴌𐴝𐴘𐴊𐴞𐴀𐴓𐴢.²⁶𐴇𐴠𐴥 𐴀𐴞𐴥𐴏𐴝𐴉𐴠, 𐴎𐴠𐴕𐴊𐴞𐴓𐴧𐴝, 𐴌𐴟𐴀 𐴏𐴝𐴥𐴌𐴝 𐴒𐴝𐴦 𐴔𐴡𐴌𐴝, 𐴇𐴠𐴥𐴕𐴊𐴞𐴓𐴧𐴝, 𐴀𐴝𐴔𐴡𐴥𐴓𐴢 𐴏𐴝𐴥𐴌𐴝 𐴀𐴞𐴔𐴝𐴕 𐴀𐴡𐴥 𐴔𐴡𐴌𐴝.

The Word for the World International

https://app.library.bible/content/87faca8b51c22590