Read 𐴘𐴝𐴑𐴟𐴁𐴢 4

𐴘𐴝𐴑𐴟𐴁𐴢4

𐴊𐴟𐴕𐴞𐴘𐴝𐴘 𐴓𐴧𐴡𐴘 𐴊𐴟𐴏𐴃𐴞𐴥𐴒𐴞𐴌𐴞

¹𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴔𐴝𐴌𐴝𐴔𐴝𐴌𐴞 𐴀𐴠𐴊𐴧𐴠 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴇𐴡𐴕𐴃𐴟𐴤 𐴀𐴝𐴘𐴧𐴠𐴤؟ 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴝𐴘𐴝𐴐𐴞 𐴒𐴡𐴌𐴞𐴥𐴁𐴝𐴌 𐴎𐴠 𐴀𐴝𐴎𐴧𐴟 𐴀𐴝𐴏𐴠𐴤 𐴇𐴞𐴥𐴀𐴕 𐴀𐴡𐴥𐴃𐴧𐴟 𐴕𐴡 𐴕𐴠𐴥 𐴀𐴝𐴘𐴧𐴠𐴤 𐴊𐴠, 𐴎𐴞𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴒𐴝𐴦𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴡𐴃𐴢 𐴓𐴝𐴌𐴝𐴥𐴘 𐴒𐴡𐴌𐴠𐴥؟²𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴎𐴧𐴟 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴕𐴡 𐴉𐴝𐴘𐴓𐴠 𐴑𐴟𐴥𐴕 𐴒𐴡𐴌𐴡𐴤. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴓𐴝𐴓𐴡𐴥𐴏𐴢 𐴓𐴝𐴒𐴠, 𐴔𐴡𐴕𐴃𐴡𐴌 𐴕𐴡 𐴉𐴝𐴘𐴓𐴠 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴒𐴡𐴌𐴡𐴤 𐴀𐴠𐴊𐴧𐴠 𐴔𐴝𐴌𐴝𐴔𐴝𐴌𐴞 𐴊𐴡. 𐴃𐴡𐴀 𐴃𐴟𐴣𐴀𐴝𐴥𐴌𐴝 𐴀𐴝𐴎𐴧𐴟 𐴒𐴡𐴌𐴡𐴤 𐴊𐴠 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴃𐴧𐴟 𐴕𐴡 𐴃𐴝𐴥𐴑𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴊𐴠 𐴀𐴝𐴓𐴧𐴝𐴃𐴧𐴟 𐴕𐴡 𐴔𐴝𐴒𐴡.³𐴃𐴟𐴣𐴀𐴝𐴥𐴌𐴝 𐴔𐴝𐴒𐴞𐴓𐴠𐴥 𐴘𐴡 𐴕𐴡 𐴉𐴡𐴦, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴈𐴡𐴥𐴌𐴝𐴉𐴢 𐴕𐴞𐴘𐴡𐴃𐴠 𐴀𐴠𐴥𐴕𐴝 𐴔𐴝𐴒𐴡, 𐴎𐴠𐴀𐴕𐴠 𐴇𐴞𐴥𐴀𐴕 𐴓𐴡𐴥𐴘 𐴀𐴝𐴘𐴝𐴐𐴞 𐴒𐴡𐴌𐴞𐴥 𐴉𐴝𐴌𐴡.

⁴𐴀𐴡𐴥 𐴁𐴠𐴘𐴔𐴝𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴊𐴟𐴕𐴞𐴘𐴝𐴘 𐴓𐴧𐴡𐴘 𐴊𐴟𐴏𐴃𐴞𐴥 𐴒𐴡𐴌𐴡𐴤𐴕 𐴔𐴝𐴀𐴕𐴞 𐴀𐴝𐴓𐴧𐴝 𐴓𐴧𐴡𐴘 𐴊𐴟𐴐𐴧𐴡𐴕 𐴀𐴡𐴥𐴕 𐴊𐴠𐴥؟ 𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴊𐴟𐴕𐴞𐴘𐴝𐴘 𐴓𐴧𐴡𐴘 𐴊𐴟𐴏𐴃𐴞𐴥 𐴒𐴡𐴙𐴃𐴧𐴡𐴥 𐴏𐴝𐴀, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌𐴠𐴥 𐴀𐴝𐴓𐴧𐴝𐴌 𐴊𐴟𐴐𐴧𐴡𐴕 𐴁𐴝𐴕𐴝.⁵𐴀𐴝𐴦𐴌 𐴕𐴝𐴥𐴑𐴞 𐴃𐴟𐴣𐴀𐴝𐴥𐴌𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴘𐴝𐴀𐴕 𐴇𐴝𐴥𐴕𐴧𐴝𐴑 𐴀𐴝𐴏𐴠𐴤 𐴁𐴡𐴥𐴓𐴞 𐴄𐴝𐴥𐴀𐴌𐴡, 𐴑𐴞 𐴈𐴡𐴘𐴓𐴠𐴥, ”𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴎𐴠 𐴌𐴟𐴀 𐴊𐴞𐴦𐴘𐴠𐴥, 𐴇𐴠𐴥 𐴌𐴟𐴀 𐴓𐴧𐴝 𐴀𐴞𐴥𐴁𐴝𐴃𐴧𐴟 𐴒𐴝𐴘𐴌𐴡𐴃𐴢 𐴓𐴝𐴒𐴠؟“⁶𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴢 𐴀𐴝𐴌𐴡𐴤 𐴁𐴞𐴐𐴞𐴤. 𐴇𐴠𐴥𐴃𐴡𐴓𐴧𐴝 𐴃𐴡 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,”𐴀𐴝𐴓𐴧𐴝 𐴉𐴡𐴇𐴡𐴥𐴌 𐴀𐴡𐴓𐴝 𐴀𐴡𐴥𐴑𐴧𐴡𐴓𐴡𐴌 𐴀𐴟𐴓𐴋𐴝 𐴃𐴞𐴥𐴘𐴝,𐴔𐴡𐴕𐴃𐴡𐴌 𐴕𐴞𐴌𐴡𐴥𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴒𐴡𐴌𐴠𐴥.“

⁷𐴇𐴠𐴥𐴃𐴡𐴓𐴧𐴝, 𐴕𐴞𐴎𐴡𐴌𐴠𐴥 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡. 𐴀𐴞𐴁𐴞𐴓𐴞𐴥𐴐𐴡𐴌 𐴔𐴟𐴑𐴝𐴁𐴠𐴓𐴝 𐴒𐴡𐴌𐴡𐴤, 𐴃𐴡𐴥𐴘 𐴀𐴞𐴥𐴃𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴊𐴝𐴥𐴘𐴎𐴝𐴘𐴁𐴡𐴘.⁸𐴀𐴝𐴓𐴧𐴝𐴌 𐴋𐴝𐴥𐴑𐴠 𐴀𐴝𐴘𐴧𐴡𐴤, 𐴃𐴡𐴥𐴘 𐴀𐴞𐴥𐴁𐴝 𐴃𐴟𐴣𐴀𐴝𐴥𐴌𐴝𐴌 𐴋𐴝𐴥𐴑𐴠 𐴀𐴝𐴘𐴁𐴡𐴤. 𐴀𐴡𐴥 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢, 𐴕𐴞𐴎𐴡𐴌𐴠𐴥 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴌𐴝 𐴊𐴟𐴘 𐴔𐴞𐴑𐴧𐴝𐴥 𐴔𐴡𐴕 𐴀𐴡𐴓𐴝 𐴀𐴡𐴥𐴑𐴧𐴡𐴓𐴠 𐴕𐴞𐴎𐴡𐴌 𐴊𐴞𐴓𐴢 𐴏𐴝𐴥𐴉𐴢 𐴒𐴡𐴌𐴡𐴤.⁹𐴀𐴝𐴉𐴏𐴟𐴥𐴏𐴢 𐴇𐴝𐴥𐴘 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴡𐴤 𐴀𐴠𐴊𐴧𐴠 𐴁𐴞𐴓𐴝𐴑 𐴒𐴡𐴌𐴡𐴤; 𐴀𐴝𐴥𐴣𐴐𐴝𐴌 𐴁𐴡𐴊𐴡𐴓𐴢 𐴈𐴝𐴣𐴊𐴡, 𐴀𐴝𐴦𐴌 𐴑𐴟𐴥𐴐𐴞𐴌 𐴁𐴡𐴊𐴡𐴓𐴢 𐴉𐴠𐴌𐴠𐴐𐴝𐴕 𐴀𐴡𐴥.¹⁰𐴕𐴞𐴎𐴡𐴌𐴠𐴥 𐴕𐴞𐴎𐴠 𐴔𐴝𐴓𐴞𐴑𐴡𐴌 𐴕𐴡𐴎𐴡𐴌𐴡𐴃𐴢 𐴕𐴞𐴌𐴡𐴥𐴐𐴢 𐴀𐴡𐴥, 𐴃𐴡𐴥𐴘 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴖𐴡𐴌𐴡𐴌 𐴃𐴡𐴑𐴧𐴝𐴃𐴢 𐴃𐴟𐴓𐴞𐴤𐴁𐴡.

𐴁𐴞𐴏𐴝𐴌 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴀𐴟𐴥𐴣𐴐𐴞𐴘𐴝𐴌𐴞

¹¹𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴠𐴎𐴧𐴡𐴕𐴡𐴌 𐴁𐴡𐴊𐴕𐴝𐴔 𐴀𐴠𐴎𐴧𐴡𐴕𐴠 𐴕𐴡 𐴒𐴡𐴙𐴅𐴧𐴡𐴥. 𐴎𐴠𐴦𐴕𐴞𐴑𐴞 𐴀𐴝𐴌𐴀𐴠𐴑 𐴁𐴝𐴥𐴘𐴡𐴌 𐴁𐴡𐴊𐴕𐴝𐴔 𐴒𐴡𐴌𐴠𐴥 𐴘𐴝𐴥 𐴁𐴞𐴏𐴝𐴌 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴐𐴡𐴥𐴌𐴞𐴘𐴡𐴃𐴡𐴌 𐴁𐴡𐴊𐴕𐴝𐴔 𐴒𐴡𐴙𐴅𐴧𐴠𐴥 𐴉𐴝𐴥𐴕 𐴀𐴠𐴊𐴧𐴠 𐴁𐴞𐴏𐴝𐴌 𐴒𐴡𐴙𐴅𐴧𐴠𐴥 𐴉𐴝𐴥𐴕. 𐴎𐴡𐴊𐴞 𐴃𐴟𐴀𐴛 𐴐𐴡𐴥𐴌𐴞𐴘𐴡𐴃𐴡𐴌 𐴁𐴞𐴏𐴝𐴌 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴃𐴡 𐴃𐴟𐴀𐴛 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢-𐴒𐴡𐴌𐴡𐴤𐴘𐴝 𐴕𐴡, 𐴁𐴡𐴥𐴓𐴑𐴠 𐴇𐴞𐴥𐴘𐴝𐴕𐴡𐴌 𐴁𐴞𐴏𐴝𐴌𐴇𐴝𐴌.¹²𐴐𐴡𐴥𐴌𐴞𐴘𐴡𐴃𐴢-𐴊𐴡𐴦𐴘𐴝 𐴀𐴠𐴊𐴧𐴠 𐴁𐴞𐴏𐴝𐴌𐴇𐴝𐴌 𐴀𐴠𐴑𐴎𐴡𐴕 𐴁𐴠 𐴀𐴝𐴏𐴠𐴤, 𐴎𐴞𐴁𐴝𐴤𐴘𐴠 𐴁𐴝𐴏𐴝𐴘 𐴘𐴡𐴥 𐴉𐴝𐴌𐴠 𐴊𐴡𐴥𐴚𐴐𐴡 𐴘𐴡𐴥 𐴒𐴡𐴌𐴞𐴥 𐴉𐴝𐴌𐴠. 𐴔𐴡𐴕𐴃𐴡𐴌 𐴃𐴟𐴀𐴛 𐴇𐴡𐴕 𐴀𐴝𐴁𐴝𐴌 𐴃𐴟𐴣𐴀𐴝𐴥𐴣𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌 𐴁𐴞𐴏𐴝𐴌 𐴒𐴡𐴙𐴃𐴧𐴝𐴥؟

𐴁𐴡𐴌𐴝𐴥𐴙𐴌 𐴁𐴝𐴦𐴁𐴟𐴃𐴠 𐴀𐴟𐴥𐴣𐴐𐴞𐴘𐴝𐴌𐴞

¹³𐴉𐴟𐴥𐴕𐴡, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴠𐴕𐴊𐴞𐴓𐴧𐴝 𐴈𐴡𐴀, ”𐴀𐴝𐴙𐴅𐴧𐴝 𐴕𐴡 𐴀𐴡𐴥𐴘𐴓𐴠 𐴇𐴝𐴙𐴓𐴧𐴝 𐴀𐴝𐴣𐴀𐴌𐴝 𐴉𐴡𐴥𐴓𐴝𐴕𐴝 𐴐𐴡𐴥𐴀𐴌 𐴒𐴝𐴥𐴕𐴡𐴃𐴢 𐴎𐴝𐴘𐴧𐴟𐴔, 𐴀𐴝𐴦𐴌 𐴇𐴠𐴥𐴍𐴠 𐴀𐴠𐴑 𐴁𐴡𐴏𐴡𐴥𐴌 𐴃𐴝𐴥𐴑𐴞 𐴁𐴝𐴦𐴊𐴠 𐴐𐴡𐴥𐴊𐴡𐴌𐴞 𐴒𐴡𐴌𐴞𐴥 𐴁𐴞𐴐𐴞𐴤-𐴁𐴞𐴐𐴞𐴤 𐴄𐴞𐴛𐴝 𐴈𐴝𐴔𐴝𐴘𐴧𐴟𐴥𐴔.“¹⁴𐴃𐴟𐴣𐴀𐴝𐴥𐴌𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴎𐴞𐴕𐴊𐴞𐴒𐴞𐴃𐴢 𐴇𐴝𐴙𐴓𐴧𐴝 𐴑𐴞𐴦 𐴀𐴡𐴥𐴘𐴁𐴡 𐴊𐴠 𐴇𐴞𐴥𐴘𐴝𐴕 𐴀𐴟𐴥𐴊𐴧𐴗𐴝 𐴕𐴡 𐴎𐴝𐴕𐴡. 𐴃𐴟𐴣𐴀𐴝𐴥𐴌𐴝𐴌 𐴎𐴞𐴕𐴊𐴞𐴒𐴞 𐴃𐴡 𐴁𐴝𐴥𐴉𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕 𐴀𐴠𐴏𐴧𐴝𐴥𐴃𐴢 𐴀𐴝𐴥𐴕𐴞𐴑 𐴊𐴝𐴈𐴝𐴤 𐴎𐴝𐴘 𐴁𐴝𐴦𐴊𐴠 𐴒𐴝𐴙𐴁𐴢 𐴀𐴡𐴥𐴘𐴎𐴝𐴒𐴡𐴘.¹⁵𐴇𐴞𐴥𐴘𐴝𐴕𐴡𐴌 𐴁𐴡𐴊𐴡𐴓𐴢 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴠𐴕𐴊𐴞𐴓𐴧𐴝 𐴈𐴡𐴀𐴕 𐴏𐴝𐴀, ”𐴔𐴝𐴓𐴞𐴑𐴠 𐴏𐴝𐴘𐴓𐴠𐴥, 𐴀𐴝𐴣𐴀𐴌𐴝 𐴁𐴝𐴏𐴞 𐴃𐴝𐴥𐴑𐴞𐴘𐴟𐴔 𐴀𐴝𐴦𐴌 𐴖𐴝𐴀𐴕-𐴘𐴝𐴀𐴕 𐴒𐴡𐴌𐴞𐴥𐴘𐴟𐴔.“¹⁶𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴊𐴠 𐴒𐴟𐴔𐴝𐴕𐴠 𐴁𐴡𐴌𐴝𐴥𐴘 𐴒𐴡𐴌𐴡𐴤; 𐴇𐴠𐴥𐴕𐴊𐴞𐴓𐴧𐴝 𐴁𐴡𐴌𐴝𐴥𐴘 𐴁𐴠𐴒𐴧𐴟𐴥𐴕 𐴈𐴡𐴥𐴌𐴝𐴉𐴢.¹⁷𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴒𐴡𐴔 𐴔𐴝𐴥𐴕 𐴒𐴡𐴌𐴞𐴥 𐴎𐴝𐴕𐴠 𐴔𐴡𐴕𐴃𐴡𐴌 𐴕𐴡 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴃𐴧𐴟 𐴒𐴟𐴕𐴝𐴤 𐴀𐴡𐴥𐴘𐴁𐴡.

The Word for the World International

https://app.library.bible/content/87faca8b51c22590